पुणे ता. ८ : राष्ट्रवादी कॉँग्रेस शरदचंद्र पवार पक्षाच्या पिंपरी चिंचवड शहर व जिल्हा निरीक्षक पदावर पक्षाचे प्रदेश सरचिटणीस व प्रवक्ते सुनील माने यांची नियुक्ती झाली आहे. पक्षाचे प्रदेशाध्यक्ष शशिकांत शिंदे यांनी याबाबत आज पत्र सुनील माने यांना मुंबई येथे दिले. यावेळी प्रदेश सरचिटणीस रवींद्र पवार उपस्थित होते.

पिंपरी चिंचवड शहर, तालुका व जिल्हयातील ग्रामीण प्रभाग व बूथ पातळीवर पक्षाचा आढावा घेणे, जिल्ह्यातील सर्व फ्रंटल व विभागाच्या संघटनेच्या पदावरील नियुकत्यांचा आढावा घेणे, संघटनात्मक मजबूती, कार्यकर्ता सक्रियता व बुथ समित्या कार्यान्वयित आहेत का याचा सातत्याने आढावा घेणे, पक्षशिस्त व संघटनेमध्ये एकसंघता ठेवण्यासाठी कार्यरत राहणे. कोणतीही गटबाजी, अनुशासन भंग, पक्षविरोधी वक्तव्य किंवा कृती आढळल्यास त्यावर तत्काळ हस्तक्षेप करून प्रदेश कार्यालयास अहवाल सादर करणे, स्थानिक प्रश्न, जनभावना व राजकीय परिस्थितीचा निष्पक्ष अहवाल सादर करणे, प्रदेश कार्यालयाकडून देण्यात येणारे विविध कार्यक्रम, आंदोलने याचा आढावा घेऊन त्याबाबत प्रदेश कार्यालयास कळवणे, निवडणूक पूर्वतयारी, संभाव्य उमेदवारांचे मूल्यमापन, स्थानिक परिस्थिती लक्षात घेऊन संघटनात्मक रणनिती सुचवणे, मासिक प्रगती अहवाल नियमितपणे प्रदेश कार्यालयास सादर करणे, जिल्हा संघटना वरिष्ठ नेतृत्व यांच्यात समन्वय साधने आदि जबाबदऱ्या निरीक्षक म्हणून सुनील माने यांना सांभाळाव्या लागणार आहेत.

पुणे विभागात विविध कार्यक्रमाचे आयोजन; अधिकाधिक नागरिकांनी या कार्यक्रमाचा लाभ घ्यावा-प्रादेशिक उपायुक्त वंदना कोचुरे

पुणे, दि. ८: सामाजिक न्याय व विशेष सहाय्य विभागाच्यावतीने ८ एप्रिल ते १४ एप्रिल २०२६ या कालावधीत ‘भारतरत्न डॉ. बाबासाहेब आंबेडकर सामाजिक समता सप्ताहानिमित्त पुणे विभागातील पुणे, सातारा,सोलापूर, कोल्हापूर आणि सांगली जिल्ह्यात विविध कार्यक्रमाचे आयोजन करण्यात आले आहे, या कार्यक्रमाचा अधिकाधिक नागरिकांनी लाभ घ्यावा, असे आवाहन समाज कल्याण विभागाच्या प्रादेशिक उपायुक्त वंदना कोचुरे यांनी केले आहे.

प्रादेशिक कार्यालयात प्रादेशिक उपायुक्त वंदना कोचुरे यांच्या हस्ते डॉ. बाबासाहेब आंबेडकर यांच्या प्रतिमेचे पूजन करून सप्ताहाचा शुभारंभ झाला. यावेळी सहायक संचालक (वित्त व लेखा) अनिल गिते , सहायक आयुक्त विशाल लोंढे, माधुरी वाघमोडे, ज्ञानेश्वर जावळे, समाज कल्याण अधिकारी उपस्थित होते. यावेळी आयोजित पत्रकार परिषदेत सप्ताहाची माहिती देण्यासोबतच भारतीय संविधानाच्या उद्देशिकेचे वाटप करण्यात आले.

या सप्ताहाच्या माध्यमातून सामाजिक समता, महापुरुषांचे विचार आणि शासकीय योजना तळागाळातील लोकांपर्यंत पोहोचवल्या जाणार आहेत. या सप्ताहाच्या नियोजनाबाबत पुणे व‍िभागातील जिल्हा स्तरावर शहरी व ग्रामिण भागात सहाय्यक आयुक्त समाज कल्‍याण पुणे, सातारा, सांगली, सोलापूर, व कोल्‍हापूर या कार्यालयाने आपापल्या कार्यक्षेत्रात जय्यत तयारी केली असून, या सात दिवसांत खालीलप्रमाणे विशेष कार्यक्रमांचे आयोजन करण्यात येणार आहे.

दिनांक ९ एप्रिल रोजी युवा संवाद कार्यक्रमाअंतर्गत महाविद्यालये व शासकीय वसतिगृहांमध्ये महाड चवदार तळे सत्याग्रह शताब्दी वर्ष, संत गाडगे महाराज यांची १५० वी जयंती आणि आंबेडकरी विचार या विषयांवर व्याख्याने व वक्तृत्व स्पर्धांचे आयोजन करण्यात आले आहे.

दिनांक १० एप्रिल रोजी योजना प्रबोधन कार्यक्रमाअंतर्गत समता दूतांमार्फत पथनाट्ये व लघुनाटिका सादर करून शासकीय योजनांचे प्रबोधन करण्यात येणार आहे. तसेच ‘मार्जिन मनी’ योजनेच्या लाभार्थ्यांसाठी विशेष कार्यशाळेचे आयोजन करण्यात येणार आहे.

दिनांक ११ एप्रिल रोजी महात्मा फुले जयंतीनिमित्त महात्मा ज्योतिबा फुले यांच्या द्विशताब्दी जयंतीनिमित्त त्यांच्या सामाजिक कार्यावर आधारित विविध गौरवपर कार्यक्रमाचे आयोजन करण्यात येणार आहे.

दिनांक १२ एप्रिल रोजी संविधान जागर व महिला मेळाव्याअंतर्गत संविधानातील मूलभूत अधिकार व कर्तव्यांवर व्याख्याने आयोजित केली असून, महिलांच्या सक्षमीकरणासाठी विशेष महिला मेळावा घेण्यात येणार आहे.

दिनांक १३ एप्रिल २०२६ रोजी सामाजिक बांधिलकी उपक्रमाअंतर्गत ज्येष्ठ नागरिक मेळावा, रक्तदान शिबीर आणि स्वच्छता अभियानाद्वारे सामाजिक सेवेचे व्रत जोपासले जाईल. तसेच कोल्‍हापूर औद्योगिक संस्‍था मार्गदर्शनपर कार्यशाळा आयोजि‍त केली जाईल

दिनांक १४ एप्रिल रोजी डॉ. बाबासाहेब आंबेडकर यांना अभिवादन करून जयंती साजरी केली जाणार असून व्याख्याने आणि चर्चासत्रांनंतर या सामाजिक समता सप्ताहाचा समारोप होणार आहे.

लव्ह जिहाद पीडित महिलांसाठी ‘ऑपरेशन दुर्गा’ अभियान -पोलीस ठाण्यांमध्ये भरोसा सेलप्रमाणे स्वतंत्र ‘लव्ह जिहाद’ सेल स्थापन करा -मेधा कुलकर्णी

पुणे-खासदार मेधा कुलकर्णी यांनी ‘लव्ह जिहाद’च्या बळी ठरलेल्या महिलांसाठी ‘ऑपरेशन दुर्गा अभियान’ सुरू करण्याची घोषणा केली आहे. या अभियानांतर्गत समाजात जनजागृती करून पीडित महिलांना समुपदेशन, पुनर्वसन आणि आवश्यक मदत दिली जाईल.या अभियानासाठी लवकरच एक हेल्पलाइन क्रमांक जाहीर करण्यात येणार असल्याचे कुलकर्णी यांनी पत्रकार परिषदेत सांगितले. या माध्यमातून पीडितांना त्वरित संपर्क साधता येईल.तसेच पोलीस ठाण्यांमध्ये भरोसा सेलप्रमाणे स्वतंत्र ‘लव्ह जिहाद’ सेल स्थापन करावा अशीही मागणी यावेळी मेधा कुलकर्णी यांनी केली .

यावेळी त्यांनी सायली सुर्वे या महिलेच्या ‘घरवापसी’चे यश नमूद केले. सायलीचा पती आतिफ तासे याच्यावर 28 गुन्हे दाखल असून, त्याला तातडीने अटक करून सायलीला घटस्फोट मिळावा अशी मागणी कुलकर्णी यांनी केली. सायलीवर मानसिक दडपण असून, तिच्या चार मुलांना आणि आई-वडिलांनाही धोका असल्याचे त्यांनी सांगितले.

सायली सुर्वेला ‘घरवापसी’नंतरही पोलीस संरक्षण मिळाले नाही, यावर कुलकर्णी यांनी प्रश्नचिन्ह उपस्थित केले. स्थानिक पोलिसांनी वेळीच संरक्षण दिले असते तर तिच्या सासरच्यांनी तिला बळजबरीने परत नेले नसते, असे त्या म्हणाल्या. सायलीच्या मानसिक स्थितीकडेही पोलिसांनी दुर्लक्ष केल्याचा आरोप त्यांनी केला.

सायलीने सासू गुलशन तासे हिच्या विरोधात दबावाखाली दिलेला जबाब पोलिसांनी ग्राह्य धरू नये, असेही कुलकर्णी यांनी म्हटले. गुलशन तासेवर अनेक गुन्हे दाखल असून, तिच्या चार सुना हिंदू आहेत आणि काहींनी सासूविरोधात तक्रारीही केल्या आहेत. हा ‘लव्ह जिहाद’चा प्रकार असल्याचे कुलकर्णी यांनी अधोरेखित केले.पोलीस ठाण्यांमध्ये भरोसा सेलप्रमाणे स्वतंत्र ‘लव्ह जिहाद’ सेल स्थापन करण्याची मागणी त्यांनी केली. महाराष्ट्र सरकारने बळजबरीने धर्म बदलण्यासाठी कोणावरही दबाव टाकला जाणार नाही, असा निर्णय घेतला असल्याचेही त्यांनी यावेळी सांगितले.

आमदार गोपीचंद पडळकर आपल्या भूमिकेवर ठाम; पोलिसांचा कडक बंदोबस्त

पुणे-पुण्यातील सासवड ते कोंढवा दरम्यान आमदार गोपीचंद पडळकर, आमदार संग्राम जगताप आणि माजी आमदार संजय जगताप यांच्या नेतृत्वाखाली काढण्यात आलेला ‘हिंदू जनआक्रोश मोर्चा’ पोलिसांनी मधेच रोखल्याने तणाव निर्माण झाला आहे. या मोर्चाअंतर्गत आयोजित केलेली बाईक रॅली खडी मशीन चौकापर्यंत जाणार होती आणि तिथे गोपीचंद पडळकर यांची सभा होणार होती. मात्र पोलिसांनी ही रॅली नियोजित स्थळापूर्वीच अडवल्याने गेल्या दीड तासांपासून आमदार पडळकर आणि संग्राम जगताप पुढे जाण्याच्या भूमिकेवर ठाम आहेत.

पुरंदर तालुक्यातील भिवरी गावातील बापदेव घाट परिसरात घडलेल्या घटनेच्या निषेधार्थ आमदार गोपीचंद पडळकर, आमदार संग्राम जगताप आणि माजी आमदार संजय जगताप यांच्या नेतृत्वाखाली काढण्यात आलेल्या ‘हिंदू जनआक्रोश मोर्चा’ला रोखण्यासाठी पुणे पोलिसांनी आज पहाटेपासूनच कडेकोट बंदोबस्त तैनात केला आहे. शिवतीर्थ सासवड येथून निघालेली ही भव्य बाईक रॅली कोंढव्यातील खडीमशीन चौकापर्यंत जाणार होती. मात्र कायदा व सुव्यवस्थेचे कारण देत पोलिसांनी जागोजागी बॅरिकेड्स लावून रस्ते बंद केले आहेत. या रॅलीत मोठ्या संख्येने तरुण आणि नागरिक सहभागी झाले असून, मार्गावर तैनात असलेल्या मोठ्या पोलीस फौजफाट्यामुळे परिसरात तणावपूर्ण शांतता आहे.

या मोर्चाच्या माध्यमातून कोंढव्यातील संबंधित संशयितांवर तातडीने गुन्हे दाखल करून त्यांना अटक करावी, तसेच भिवरी ग्रामस्थांवर दाखल केलेले कथित खोटे गुन्हे मागे घ्यावेत, अशी आक्रमक मागणी करण्यात येत आहे. या मागण्यांसह पुरंदर तालुक्यातील जमीन खरेदी प्रकरणातील अन्यायावरही या आंदोलनाद्वारे भूमिका मांडली जाणार आहे.

पुणे, दि. ८ : प्रादेशिक परिवहन कार्यालय, पुणे मार्फत सन २०२५-२६ या आर्थिक वर्षात महसूल वसूली, अंमलबजावणी व अनुषंगिक कामकाजाबाबत उल्लेखनीय कामगिरी करण्यात आली आहे. शासनाने निर्धारित केलेल्या १८९५.१७ कोटी रुपयांच्या उद्दिष्टाच्या तुलनेत कार्यालयाने १९२२.१२ कोटी रुपये महसूल वसूल करत १०१.४२ टक्के उद्दिष्टपूर्ती साध्य केली आहे.

रस्ता सुरक्षा अंमलबजावणी अंतर्गत तपासणीत दोषी आढळलेल्या ६१ हजार ५०९ वाहनांवर ई-तपासणी कारवाई करण्यात आली असून, त्यातून २५.६८ कोटी रुपयांचा महसूल प्राप्त झाला आहे. तसेच १ लाख ८६ हजार ८२४ वाहन चालक अनुज्ञप्ती व ५ हजार ५८४ आंतरराष्ट्रीय वाहन परवाने जारी करण्यात आले आहेत.

थकीत मोटार वाहन करापोटी ३२.२३ कोटी रुपये व पर्यावरण करापोटी ९.८० कोटी रुपये महसूल वसूल करण्यात आला आहे. ई-लिलावाद्वारे १९३ वाहनांच्या विक्रीतून १.०६ कोटी रुपयांचा महसूल मिळाला आहे.

कार्यालयाच्या कार्यक्षेत्रात ११ लाख १८ हजार ८४४ वाहनांना एचएसआरपी नंबर प्लेट बसविण्यात आल्या असून, ३ लाख ४५ हजार ५४३ नवीन वाहनांची नोंदणी करण्यात आली आहे. तसेच ५६ हजार १७२ पसंती क्रमांक आरक्षित करून त्यातून ७३.७६ कोटी रुपयांचा महसूल मिळविण्यात आलाअसल्याची माहिती प्रादेशिक परिहवन अधिकारी अर्चना गायकवाड यांनी दिली आहे.

पुणे : राष्ट्रवादीचे ज्येष्ठ नेते शरद पवार अध्यक्ष असलेल्या आणि खा. सुप्रिया सुळे, सुनेत्रा पवार, युगेंद्र पवार आदी मातब्बर संचालक असलेल्या विद्या प्रतिष्ठान संस्थेच्या नांदेड सिटी येथील पब्लिक स्कुलमध्ये आर्थिक गैरव्यवहाराचे प्रकरण समोर आले आहे. एडमिन विभागात काम करणाऱ्या अधिकाऱ्यासह त्याच्या पत्नीवर संस्थेची तब्बल ३६ लाख ९९ हजार ९८८ रुपयांच्या फसवणुकीचा ठपका ठेवण्यात आला आहे. याप्रकरणी नांदेड सिटी पोलीस ठाण्यात गुन्हा दाखल करण्यात आला आहे.

राजेंद्र अनपट, अश्विनी तरटे उर्फ अश्विनी अनपट अशी गुन्हा दाखल झालेल्यांची नावे आहेत. याप्रकरणी शाळेच्या प्रिन्सिपॉल वंदना सचिन जोशी (वय ५५, रा. आंबेगाव बुद्रुक) यांनी फिर्याद दिली आहे. हा प्रकार नोव्हेंबर २०२४ ते जून २०२५ या कालावधीत घडला. पोलिसांकडून मिळालेल्या प्राथमिक माहितीनुसार, राजेंद्र अनपट हे नांदेड सिटी पब्लिक स्कुलच्या एडमिन विभागात काम करतात. तर, अश्विनी अनपट या त्यांच्या पत्नी आहेत.

यादोघांनी इंटरनेट बँकिंगचा वापर करून संस्थेच्या परवानगीशिवाय मोठी रक्कम स्वतःच्या खात्यांत वर्ग करून घेतली. प्राथमिक तपासात हा सर्व प्रकार उघड झाला आहे. तसेच, या व्यवहारांना झाकण्यासाठी संस्थेच्या अभिलेखात खोट्या नोंदी देखील नोंदवण्यात आल्या. या आर्थिक गैरव्यवहारातून आरोपींनी स्वतःचा आर्थिक फायदा करून घेत संस्थेचा विश्वासघात केल्याचे स्पष्ट झाले आहे. या प्रकरणी संबंधित आरोपींविरुद्ध गुन्हा दाखल करण्यात आला असून, पुढील तपास पोलीस उपनिरीक्षक सावंत करत आहेत.

विद्या प्रतिष्ठान ही प्रतिथयश शिक्षण संस्था असून ज्येष्ठ नेते शरद पवार यांचे संस्थापक अध्यक्ष आहेत. तर, उपाध्यक्ष एड. अशोक प्रभुणे असून युगेंद्र पवार हे खजिनदार आहेत. नीलिमा गुजर या सचिव आहेत, तर, माजी उपमुख्यमंत्री अजित पवार हे सदस्य होते. यासोबतच, खासदार सुप्रिया सुळे, उपमुख्यमंत्री सुनेत्रा पवार, विठ्ठलदास मणियार, बाळासाहेब तावरे, डॉ. राजीव शाह, किरण गुजर, मंदार सिकची हे संचालक आहेत.

• पेठ क्र. १२ आणि ३०-३२ मधील गृहयोजनेची सोडत संपन्न; अत्याधुनिक तंत्रज्ञानाचा वापर!
• लाभार्थ्यांच्या डोळ्यांत आनंदाश्रू; मानवी हस्तक्षेपाशिवाय पारदर्शक प्रक्रिया; यशस्वी लाभार्थ्यांचे महानगर आयुक्तांकडून अभिनंदन

आकुर्डी/पुणे : पुणे महानगर प्रदेश विकास प्राधिकरणाच्या (पीएमआरडीए) पेठ क्र. १२ आणि ३०-३२ मधील गृहयोजनेतील एकूण १०२९ सदनिकांची संगणकीय सोडत बुधवारी (दि. ८ एप्रिल) अत्यंत पारदर्शक वातावरणात पार पडली. मानवरहित आणि अत्याधुनिक तंत्रज्ञानावर आधारित या प्रक्रियेतून स्वतःच्या हक्काचे घर मिळाल्याचे जाहीर होताच आकुर्डी येथील ग. दि. माडगूळकर नाट्यगृहात उपस्थित अनेक लाभार्थ्यांच्या डोळ्यांत आनंदाश्रू तरळले आणि संपूर्ण सभागृहातील वातावरण भावूक झाले. ‘पीएमआरडीए’चे महानगर आयुक्त डॉ. अभिजीत चौधरी, सहआयुक्त (जमीन व मालमत्ता) पूनम मेहता आणि सहआयुक्त (प्रशासन) रूपाली आवले-डंबे यांच्या हस्ते ही बहुप्रतिक्षित सोडत काढण्यात आली. यावेळी यशस्वी लाभार्थ्यांना महानगर आयुक्तांच्या हस्ते पुष्पगुच्छ देऊन सन्मानित करण्यात आले.

याप्रसंगी मार्गदर्शन करताना महानगर आयुक्त डॉ. अभिजीत चौधरी यांनी प्रशासनाला महत्त्वाच्या सूचना दिल्या. अचूक व दर्जेदार तंत्रज्ञानाच्या साहाय्याने ही प्रक्रिया अत्यंत पारदर्शकपणे राबविण्यात आली असून, ज्या लाभार्थ्यांचे घराचे स्वप्न आज पूर्ण झाले आहे, त्यांना कर्जप्रकरणे व इतर कार्यालयीन बाबींसाठी ‘पीएमआरडीए’ प्रशासनाने सर्वतोपरी सहाय्य करावे, असे ते म्हणाले. हक्काचे घर मिळूनही केवळ आर्थिक अडचणींमुळे कोणाचेही स्वप्न अपूर्ण राहू नये, याची काळजी घेण्याचे निर्देशही त्यांनी दिले. ही संपूर्ण प्रक्रिया ‘ओव्हरसाईट कमिटी’च्या कडक निगराणीखाली पार पडली. यामध्ये सेवानिवृत्त अपर जिल्हाधिकारी दीपक नलावडे, सेवानिवृत्त जिल्हा सूचना विज्ञान अधिकारी धनंजय कुलकर्णी आणि सेवानिवृत्त मुख्य माहिती तंत्रज्ञान अधिकारी नीलकंठ पोमण यांनी प्रत्यक्ष कामकाज पाहिले, तर मुंबई ‘म्हाडा’च्या मुख्य माहिती व संचार तंत्रज्ञान अधिकारी सविता बोडके यांनी व्हिडिओ कॉन्फरन्सिंगद्वारे प्रक्रियेवर लक्ष ठेवले.

ज्या लाभार्थ्यांना प्रत्यक्ष उपस्थित राहता आले नाही, त्यांच्यासाठी ‘पीएमआरडीए’कडून एसएमएसद्वारे यूट्यूब लिंक उपलब्ध करून देण्यात आली होती. कार्यक्रमाचे प्रास्ताविक सहआयुक्त पूनम मेहता यांनी करून सोडत प्रक्रियेची माहिती दिली व तांत्रिक बाबी स्पष्ट केल्या. सूत्रसंचालन सहाय्यक लेखाधिकारी पूनम बोराटे यांनी केले, तर उपस्थितांचे आभार उपायुक्त हिम्मत खराडे यांनी मानले. या सोहळ्यास वित्तीय नियंत्रक जितेंद्र कोळंबे, मुख्य अभियंता शिवप्रसाद बागडी, अधीक्षक भूमिअभिलेख आशा जाधव, तहसीलदार अभिजीत जगताप यांच्यासह ‘पीएमआरडीए’चे अधिकारी, कर्मचारी आणि नागरिक मोठ्या संख्येने उपस्थित होते.

या सोडतीमध्ये पेठ क्र. १२ आणि पेठ क्र. ३०-३२ मधील आर्थिकदृष्ट्या दुर्बल घटक (EWS) व अल्प उत्पन्न गट (LIG) अशा दोन्ही गटांची आकडेवारी जाहीर करण्यात आली. पेठ क्र. १२ मधील ईडब्ल्यूएस गटामध्ये सर्वसाधारण प्रवर्गातील ५२, अनुसूचित जाती १३, अनुसूचित जमाती ८, विमुक्त जाती ३, भटक्या जमाती २ आणि शारीरिकदृष्ट्या अपंग प्रवर्गातील ३ सदनिकांसाठी विजेते निश्चित झाले. याच पेठेत अल्प उत्पन्न गटामध्ये (LIG) सर्वसाधारण २१७, अनुसूचित जाती ३३, अनुसूचित जमाती २०, विमुक्त जाती १०, भटक्या जमाती २ आणि अपंग प्रवर्गातील १६ लाभार्थ्यांना घरे मिळाली. दुसरीकडे, पेठ क्र. ३०-३२ च्या ईडब्ल्यूएस गटामध्ये सर्वसाधारण २३७, अनुसूचित जाती ३७, अनुसूचित जमाती ७, विमुक्त जाती ३, भटक्या जमाती ५ आणि अपंग प्रवर्गातील ५ लाभार्थ्यांची निवड झाली. तर याच पेठेत एलआयजी गटामध्ये सर्वसाधारण १५१, अनुसूचित जाती २९, अनुसूचित जमाती ३, विमुक्त जाती ४ आणि अपंग प्रवर्गातील ११ लाभार्थ्यांचे हक्काच्या घराचे स्वप्न साकार झाले आहे. या यशस्वी लाभार्थ्यांची आणि प्रतीक्षा यादीतील उमेदवारांची यादी ‘पीएमआरडीए’च्या संकेतस्थळावर प्रसिद्ध करण्यात आली असून, या लाभार्थ्यांना ‘एसएमएस’देखील पाठवण्यात आले आहेत.

पुणे महानगरपालिका आणि पुणे शहर पोलीस आयुक्तालयाच्या अमली पदार्थ विरोधी जनजागृती मोहिमेचा शुभारंभ

पुणे (दि ०७): नागरिक लोकप्रतिनिधींना केवळ रस्ते, ड्रेनेजसारखी कामे करण्यासाठी निवडून देत नाहीत. समाजात घडणाऱ्या चुकीच्या गोष्टींना आळा घालणे ही देखील लोकप्रतिनिधी म्हणून आमची जबाबदारी आहे. अमली पदार्थांमुळे तरुणाईत वाढणारी व्यसनाधीनता रोखण्यासाठी समाजात व्यापक जनचळवळ उभारण्याचे काम येत्या काळामध्ये करत, पोलीस आणि नागरिक यांच्यातील सेतू म्हणून आम्ही कार्य करू, अशी ग्वाही सभागृह नेते गणेश बिडकर यांनी दिली आहे.

पुणे महानगरपालिका आणि पुणे शहर पोलीस आयुक्तालय यांच्या संयुक्त विद्यमाने शहरात राबवण्यात येणाऱ्या अमली पदार्थ विरोधी जनजागृती मोहिमेची सुरुवात प्रभाग क्रमांक २४ मधून करण्यात आली, यावेळी बिडकर बोलत होते. यावेळी नगरसेवक देवेंद्र वडके, कल्पना बहिरट, उज्वला यादव, निलेश आल्हाट, परिमंडळ एकचे पोलीस उपायुक्त कृषीकेश रावले, सहायक पोलीस आयुक्त अनुजा देशमाने, फरासखानाचे वरिष्ठ पोलीस निरीक्षक प्रशांत भस्मे यांच्यासह परिसरातील नागरिक मोठ्या संख्येने उपस्थित होते.

पुणे शहरामध्ये ड्रग्स तस्करी आणि सेवनाचे प्रकार वाढण्याच्या घटना पुढे आल्या आहेत. पोलिसांकडून अशा गैरप्रकारांना आळा घालण्याचे काम केले जाते. लोकप्रतिनिधी आणि नागरिकांकडून देखील सहकार्य मिळाल्यास अमली पदार्थाच्या तस्करीला रोखण्यात मदत होऊ शकते. या पार्श्वभूमीवर पुणे महानगरपालिका व पोलीस आयुक्तालयाच्या माध्यमातून विशेष जनजागृती मोहीम शहरांमध्ये हाती घेण्यात आली आहे.

यावेळी गणेश बिडकर म्हणाले, “अमली पदार्थांच्या विळख्यात अडकून अनेक कुटुंब उद्ध्वस्त होत आहेत. वाढत्या ड्रग्सच्या वापराला आळा घालणे ही केवळ पोलिसांची जबाबदारी नसून समाजातील प्रत्येक घटकाची आहे. ज्या ठिकाणी अमली पदार्थांची विक्री होत असल्याची माहिती मिळेल, तेथे कारवाईसाठी पोलिसांना आम्ही पूर्ण सहकार्य करू, कमी किमतीत अमली पदार्थ उपलब्ध होत असल्याने तरुण पिढी मोठ्या प्रमाणावर या व्यसनाच्या गर्तेत ओढली जात आहे. या उपक्रमामुळे शहरात व्यसनमुक्तीसाठी जनजागृती वाढण्यास मदत होईल.