एनसीईआरटीच्या पुस्तकात मराठा साम्राज्याच्या नकाशाचा पुन्हा समावेश व्हावा या मागणीसाठी भव्य मोर्चा

पुणे:

महाराष्ट्र हा केवळ एक भूप्रदेश नाही तर छत्रपती शिवाजी महाराजांचे कर्तृत्व, छत्रपती संभाजी महाराजांचे बलिदान आणि स्वराज्य स्थापनेत योगदान दिलेल्या अनेक मावळ्यांच्या त्यागाचे प्रतीक म्हणून तो भारताच्या स्वाभिमानाचा विषय आहे. मराठा साम्राज्य ही देशाच्या इतिहासातील प्रेरणादायी बाब आहे. त्यामुळे मराठा साम्राज्याचा नकाशा एनसीईआरटीच्या पुस्तकांमध्ये पुन्हा समाविष्ट झालाच पाहिजे, अशी आग्रही मागणी सातारा गादीच्या प्रतिनिधी छत्रपती वृषाली राजे भोसले यांनी केली.

एनसीईआरटीने हिंदी आणि इंग्रजी माध्यमांच्या पुस्तकातून मराठा साम्राज्याचा नकाशा काढून टाकला आहे. याबाबत राज्यभरात तीव्र प्रतिक्रिया उमटली. खुद्द राज्य सरकारने पत्र देऊन देखील एनसीईआरटीने अद्याप त्याची दखल घेतलेली नाही. या बाबीच्या निषेधार्थ छत्रपती वृषाली राजे यांच्या प्रमुख मार्गदर्शनाखाली या महाराष्ट्र धर्म मोर्चाचे आयोजन करण्यात आले. छत्रपती शिवाजी महाराज आणि राजमाता जिजाऊ यांच्या वास्तव्याने पावन झालेल्या लाल महालापासून जिल्हाधिकारी कार्यालयापर्यंत हा मोर्चा काढण्यात आला.

एनसीईआरटीकडून पाठ्यपुस्तकातील मराठा साम्राज्याचा नकाशा हटवून दैदीप्यमान इतिहासाला लपवण्याचा आणि खोटा इतिहास विद्यार्थ्यांपर्यंत घेऊन जाण्याचा प्रयत्न केला जात आहे. छत्रपती घराण्यासह संपूर्ण महाराष्ट्राकडून आपण त्याचा निषेध करीत आहोत, असे छत्रपती वृषाली राजे यांनी यावेळी नमूद केले.

तसेच महाराष्ट्र सरकारने याबाबतीत केंद्राकडे पाठपुरावा करावा, असे आवाहन करतानाच त्यांनी मराठा साम्राज्याच्या नकाशाची पाठ्यपुस्तकात पुनर्स्थापना होईपर्यंत हा संघर्ष सुरूच राहील, असा इशाराही दिला. या मोर्चात इतिहास संशोधक, अभ्यासक यांच्यासह विविध संघटना, संस्थाचे पदाधिकारी, कार्यकर्ते मोठ्या संख्येने उपस्थित होते. 

नवी दिल्लीतील जागतिक ऊर्जा नेतृत्व परिषदेत मानाचा पुरस्कार

मुंबई, दि. २२ मे २०२६: जगभरातील सरकारी, औद्योगिक, शैक्षणिक व संशोधन संस्थांच्या समन्वयातून ऊर्जा व पर्यावरण क्षेत्रात काम करणाऱ्या ग्लोबल एनर्जी अॅण्ड एन्व्हायरमेंट फाउंडेशनच्या (जीईईएफ) वतीने महावितरणचे संचालक (मानव संसाधन) श्री. राजेंद्र पवार यांचा विद्युत क्षेत्रात मानव संसाधनातील कामगिरीसाठी ‘ग्लोबल एचआर लीडर ऑफ द इयर-२०२६’ पुरस्काराने गौरव करण्यात आला.

‘जीईईएफ’च्या वतीने शुक्रवारी (दि. २२) नवी दिल्ली येथे ‘जागतिक ऊर्जा नेतृत्व परिषद-२०२६’ चे आयोजन करण्यात आले. या परिषदेत स्वच्छ आणि हरित ऊर्जा तंत्रज्ञानाचा प्रसार करण्यासाठी विविध तज्ज्ञ सहभागी झाले होते व प्रामुख्याने विकसित भारत आणि ऊर्जा सुरक्षितता यावर विचारमंथन झाले.

महावितरणचे अध्यक्ष व व्यवस्थापकीय संचालक श्री. लोकेश चंद्र यांच्या मार्गदर्शनात संचालक (मानव संसाधन) श्री. राजेंद्र पवार यांनी ८६ हजार कर्मचारी आणि सव्वा तीन कोटी वीजग्राहकांना केंद्रस्थानी ठेवून विद्युत सुरक्षिततेचे उपक्रम व त्यासाठी जागतिक विक्रमी लोकसहभाग, कर्मचारी कल्याण व प्रोत्साहनपर धोरण, कर्मचारी संघटना संवाद-उपक्रम, आधुनिक कौशल्य विकास प्रशिक्षण, मानव संसाधनामध्ये आधुनिक तंत्रज्ञानाचा वापर, महिला कर्मचारी सन्मान व सक्षमीकरण, कर्मचाऱ्यांना हरित ऊर्जेसाठी प्रोत्साहन यासारखे कर्मचारी-हितैषी अनेक उपक्रम राबविले. व्यवस्थापनाच्या मंजुरीने धोरणात्मक निर्णय अंमलात आणले.

या कामगिरीचे मूल्यमापन करून ‘जीईईएफ’च्या निवड समितीकडून जागतिक परिषदेत पुरस्कार जाहीर करण्यात आला. यात विद्युत क्षेत्रातील मनुष्यबळ विकासाच्या योगदानासाठी महावितरणचे संचालक (मानव संसाधन) श्री. राजेंद्र पवार यांचा ‘ग्लोबल एचआर लीडर ऑफ द इयर-२०२६’ पुरस्काराने सन्मान करण्यात आला. भारतातील रशियन फेडरेशनचे उपायुक्त डॉ. एव्हगेनी ग्रिव्हा, आइसलँडचे राजदूत श्री. बेनेडिक्ट होस्कुल्डसन आणि नीती आयोगाचे माजी सदस्य डॉ. विजयकुमार सारस्वत यांच्याहस्ते श्री. पवार यांना हा पुरस्कार प्रदान करण्यात आला.

पुणे, दि.२२: महाराष्ट्र विधानपरिषद द्विवार्षिक निवडणुकीच्या २०२६ शांततेत, निर्भय आणि न्याय्य वातावरणात पार पाडण्याच्यादृष्टीने पुणे जिल्हाधिकारी तथा जिल्हादंडाधिकारी जितेंद्र डूडी यांनी निवडणूक प्रचाराकरिता वापरण्यात येणारे वाहन, उमेदवारांने नामनिर्देशन दाखल करतावेळी अवलंब करावयाची कार्यपद्धती, मतपत्रिका छपाईच्या अनुषंगाने प्रतिबंधात्मक आदेश जारी केले आहेत.

जिल्हा निवडणूक निर्णय अधिकारी यांचे कार्यालयात वाहनांच्या ताफ्यामध्ये तीन पेक्षा जास्त मोटारगाड्या, वाहने यांचा समावेश नसावा. तसेच निवडणूक निर्णय अधिकारी यांच्या दालनात पाच व्यक्ती उपस्थित राहतील, या व्यतिरिक्त कोणालाही प्रवेश दिला जाणार नाही. तसेच निवडणूक निर्णय अधिकारी कार्यालयाच्या परिसरात नामनिर्देशनपत्र दाखल करतेवेळी मिरवणूक, सभा घेणे, घोषणा देणे, वाद्य वाजविणे किवा गाणी म्हणणे आणि कोणत्याही प्रकारचा निवडणूक प्रचार करण्यास निर्बंध घालण्यात आले आहे.

फिरत्या वाहनांवर पक्ष प्रचाराचा झेंडा हा वाहनाच्या डाव्या बाजूला विंड स्क्रिन ग्लासच्यापुढे राहणार नाही आणि तो त्यावाहनाच्या टपापासून २ फुट उंधी पेक्षा जास्त राहणार नाही. प्रचाराच्या फिरत्या वाहनांवर कापडी फलक वाहन चालकाच्या आसनामागे वाहनाच्या डाव्या व उजव्या बाजूने लावण्यात यावा, इतर कोणत्याही बाजुस लावू नये. वाहनावर लावायचा पक्ष प्रचाराचा झेंडा किंवा कापडी फलक संबंधित पक्षाचे जिल्हाध्यक्ष उमेदवार, प्रतिनिधी, निवडणूक प्रचारासाठी निवडणूक निर्णय अधिकारी यांच्याकडून अधिकृत परवानगी घेतलेल्या वाहना व्यतिरिक्त इतर कोणत्याही वाहनांवर लावता येणार नाही.

राजकीय पक्ष, निवडणूक लढविणारे उमेदवार किंवा त्यांच्या प्रतिनिधीनी, त्यांच्या हितचिंतक, मुद्रणालयाचे मालक व इतर सर्व माध्यमाद्वारे छपाई करणाऱ्या मालकाने तसेच प्रकाशकाने नमुना मतपत्रिका छापतांना पुढील बाबीवर निर्बंध घालण्यात येत आहेत. यामध्ये इतर उमेदवाराचे नाव व त्यांनी नेमून देण्यात आलेले चिन्ह वापरणे, आयोगाने निश्चित केल्याप्रमाणे नमूना मतपत्रिकेसाठी कागद वापरणे तसेच कागदाच्या आकारामध्ये नमुना मतपत्रिकेची छपाई करणे.

महाराष्ट्र विधानपरिषद द्विवार्षिक निवडणुकीच्या २०२६ शांततेत, निर्भय आणि न्याय्य वातावरणात पार पाडण्याच्यादृष्टीने पुणे जिल्हाधिकारी तथा जिल्हादंडाधिकारी जितेंद्र डूडी यांनी भारतीय नागरीक सुरक्षा संहिता, २०२३ चे कलम १६३ अन्वये आदेश जारी केले आहेत, सदरचे आदेश २२ जून २०२६ पर्यंत अंमलात राहणार असून या प्रतिबंधात्मक आदेशाचे उल्लंघन करणारी कोणतीही व्यक्ती भारतीय न्याय संहिता, २०२३ मधील कलम २२३ तसेच इतर प्रचलित कायद्यांनुसार शिक्षेस पात्र राहील असेही आदेशात नमुद करण्यात आले आहे.

नीट पेपरची महाराष्ट्रात सर्वाधिक विक्री-आत्तापर्यंत 11 जणांना अटक
पुणे दि.२२:नीट-यूजी पेपरफुटी प्रकरणात आणखी एक धक्कादायक बाब समोर आली असून, या प्रकरणातील एका नव्या मास्टरमाईंडला अटक करण्यात आली आहे. भौतिकशास्त्राचे प्रश्न लीक केल्याप्रकरणी मनीषा संजय हवालदार या महिलेला बेड्या ठोकण्यात आल्या असून, या महत्त्वपूर्ण कारवाईमुळे पेपरफुटीच्या या मोठ्या रॅकेटचे आणखी काही धागेदोरे उघड होण्याची शक्यता निर्माण झाली आहे.

पुण्यातील सेठ हिरालाल सर्फ प्रशालेत कार्यरत असलेल्या मनीषा हवालदार हिला सीबीआयने नीट पेपरफुटी प्रकरणात पुण्यातून अटक केली आहे. नॅशनल टेस्टिंग एजन्सीने तिची पेपर प्रक्रियेसाठी तज्ज्ञ म्हणून नियुक्ती केली होती, ज्यामुळे तिला भौतिकशास्त्राच्या प्रश्नपत्रिकांपर्यंत सहज पोहोचता येत होते. यापूर्वी अटक करण्यात आलेल्या मनीषा मांढरे हिच्या संगनमताने तिने भौतिकशास्त्राचे काही प्रश्न लीक केले होते आणि तपासादरम्यान हेच लीक झालेले प्रश्न प्रत्यक्ष नीटच्या प्रश्नपत्रिकेत आल्याचे निष्पन्न झाले आहे.
दरम्यान, नॅशनल टेस्टिंग एजन्सीने 3 मे रोजी नीट-यूजी परीक्षेचे आयोजन केले होते. मात्र पेपर फुटल्याचे स्पष्ट झाल्यानंतर ती रद्द करून आता ही परीक्षा 21 जून रोजी नव्याने घेतली जाणार आहे. या संपूर्ण पेपरफुटी प्रकरणाचा तपास सध्या सीबीआय करत असून, त्यांनी धडक कारवाई करत आपले अटकसत्र सुरू ठेवले आहे. मनीषा हवालदार हिच्या अटकेच्या रूपाने सीबीआयने पुण्यातून केलेली ही अकरावी मोठी कारवाई असून, यामुळे या रॅकेटचे आणखी काही धागेदोरे उघड होण्याची शक्यता आहे.

दरम्यान, सीबीआय चौकशीत उघड झाले आहे की, नीटचा पेपर 5 राज्यांमध्ये विकला गेला होता. सर्वाधिक विक्री महाराष्ट्रात झाली आणि दुसऱ्या क्रमांकावर राजस्थान आहे. एजन्सीच्या अधिकाऱ्याने सांगितले की, आतापर्यंत अटक केलेल्या आरोपींच्या चौकशीतून आणि डिजिटल गॅजेट्स तपासल्यानंतर ही माहिती समोर आली आहे.

सीबीआयचे म्हणणे आहे की, पुढील आरोपींच्या अटकेनंतर पेपरफुटीचे प्रकरण आणखी मोठे असू शकते. याच कारणामुळे एजन्सीला अजून हे निश्चित करता येत नाहीये की, किती विद्यार्थ्यांनी पेपर विकत घेतला होता. चौकशीत समोर आले आहे की, काही पालकांनी पेपर पुढे इतर लोकांना विकला होता, असे सीबीआयचे म्हणणे आहे.

पुणे, दि. २१ : दहशतवाद व हिंसाचार विरोधी दिनानिमित्त जिल्हाधिकारी कार्यालयात शपथविधी कार्यक्रमाचे आयोजन करण्यात आले. यावेळी तहसीलदार श्वेता पवार यांनी अधिकारी व कर्मचाऱ्यांना दहशतवाद आणि हिंसाचाराला विरोध करण्याची तसेच शांतता, सामाजिक सलोखा आणि राष्ट्रीय एकात्मता जपण्याची शपथ दिली.
दहशतवाद व हिंसाचारामुळे समाजात भीती, अस्थिरता आणि द्वेषाचे वातावरण निर्माण होते. अशा प्रवृत्तींपासून दूर राहून लोकशाही मूल्यांचे जतन करण्यासाठी प्रत्येक नागरिकाने सजग राहण्याची गरज असल्याचे यावेळी सांगण्यात आले. तसेच समाजात शांतता, बंधुता आणि परस्पर सहकार्याची भावना वाढीस लागावी, यासाठी सर्वांनी एकत्रित प्रयत्न करण्याचे आवाहन करण्यात आले.
या शपथविधी कार्यक्रमात नायब तहसीलदार सुयोग बेंद्रे यांच्यासह विविध विभागांचे अधिकारी व कर्मचारी उपस्थित होते. कार्यक्रमाच्या माध्यमातून दहशतवाद आणि हिंसाचारमुक्त समाज निर्माण करण्याचा संदेश देण्यात आला.

पुणे, दि. २१ – दैनिक प्रभातचे वरिष्ठ छायाचित्रकार संदीप अशोक घोडके (वय ४६) यांचे गुरुवारी (दि. २१ मे) हृदयविकाराच्या झटक्याने निधन झाले. त्यांच्या निधनाने पुणे पत्रकारितेसह सामाजिक आणि राजकीय वर्तुळात मोठी शोककळा पसरली आहे.
त्यांच्या पश्चात पत्नी, दोन मुले, वडील, दोन भाऊ आणि एक बहीण असा परिवार आहे. विश्रांतवाडी येथील स्मशानभूमीत त्यांच्या पार्थिवावर शोकाकुल वातावरणात अंत्यसंस्कार करण्यात आले. दैनिक प्रभातमध्ये रुजू झाल्यानंतर दीड दशकाहून अधिक काळ त्यांनी आपल्या कॅमेऱ्याच्या माध्यमातून पुण्याच्या सामाजिक, राजकीय आणि सांस्कृतिक घडामोडी अचूक टिपल्या. कर्तव्यदक्ष छायाचित्रकार असण्यासह पुणे स्टेशन परिसरात त्यांची स्वतःची वृत्तपत्र एजन्सीही होती. ते पुणे श्रमिक पत्रकार संघ आणि पुणे वृत्तपत्र विक्रेता संघटनेचे सदस्य होते. एक मनमिळावू, कष्टाळू आणि नेहमी इतरांच्या मदतीला धावून जाणारे व्यक्तिमत्त्व म्हणून ते परिचित होते. त्यांच्या या अकाली एक्झिटने सर्वांनाच मोठा धक्का बसला आहे.
दैनिक प्रभातचे कार्यकारी संपादक अविनाश भट, पुणे पत्रकार प्रतिष्ठानचे अध्यक्ष शैलेश काळे, आमदार बापू पठारे आणि माजी उपमहापौर डॉ. सिद्धार्थ धेंडे यांनी श्रद्धांजलीपर भाषणात संदीप यांच्या कामाचा गौरव केला. याप्रसंगी दैनिक प्रभातचे सरव्यवस्थापक रविकुमार इंडी, मार्केटिंग विभागाचे व्यवस्थापक प्रवीण पारखी, एचआर व्यवस्थापक प्रवीण थूल, पुणे श्रमिक पत्रकार संघाचे अध्यक्ष ब्रिजमोहन पाटील, नगरसेवक बॉबी टिंगरे, सुहास टिंगरे, सुरेंद्र पठारे यांच्यासह राजकीय, सामाजिक, शैक्षणिक, आरोग्य, पोलीस व पत्रकार क्षेत्रातील मान्यवरांसह छायाचित्रकार आणि नातेवाईक उपस्थित होते.