पुणे, दि. २१: महाराष्ट्र लोकसेवा हक्क अधिनियम २०१५ अन्वये नागरिकांना ऑनलाईन सेवा विहीत वेळेमध्ये पारदर्शकपणे उपलब्ध करुन देण्यात याव्यात; या सेवा नागरिकांना घरपोच देण्याबाबत कार्यवाही करावी अशा सूचना राज्य लोकसेवा आयोगाच्या पुणे विभागाचे राज्य आयुक्त सुधाकर तेलंग यांनी दिल्या.

उपविभागीय अधिकारी कार्यालयात आयोजित आढावा बैठकीत ते बोलत होते. यावेळी बारामती एमआयडीसीचे प्रादेशिक अधिकारी हणुमंत पाटील, उप विभागीय अधिकारी उत्तम दिघे, तहसीलदार स्वप्नील रावडे, गट विकास अधिकारी किशोर माने, नगर परिषदेचे मुख्याधिकारी पंकज भुसे, आदी उपस्थित होते.

श्री. तेलंग म्हणाले, महाराष्ट्र राज्यातील नागरिकांना राज्यशासनातर्फे दिल्या जाणाऱ्या सेवा पारदर्शक, गतिमान व कालबध्द पद्धतीने देण्याकरीता महाराष्ट्र लोकसेवा हक्क अधिनियम, २०१५ पारित करण्यात आला आहे. त्यानुसार या कायद्यान्वये पुरविण्यात येणा-या सर्व सेवा सुविधांची प्रभावी अंमलबजावणी करावी. अधिनियमांच्या अनुषंगाने पारदर्शकता, उत्तरदायित्व, कालबध्द सेवा, कार्यक्षम सेवा, माहिती तंत्रज्ञानाचा वापर व ई-प्रशासन संस्कृतीचा अवलंब करणे याबाबत अधिकाऱ्यांना मार्गदर्शन केले.

बारामती तालुक्यामध्ये एकूण १४७ इतके महा ई-सेवा व आपले सरकार सेवा केंद्र आहेत. यापैकी किमान ५ आदर्श आपले सरकार सेवा ग्रामपंचायत व आपले सरकार सेवा केंद्र तयार करावेत. तसेच सर्व महा ई-सेवा व आपले सरकार केंद्रांकरिता सेवा-सुविधाबाबतचे प्रशिक्षण लवकरच आयोजित करणेत येईल, असेही श्री. तेलंग म्हणाले.

श्री. तेलंग यांनी मौजे माळेगाव बु. येथील महा ई-सेवा केंद्राची पाहणी केली. यावेळी तालुक्यातील सर्व शासकीय कार्यालयांचे विभाग प्रमुख उपस्थित होते.

पुणे- पुण्यातील तरुणाई किती खतरनाक मार्गावरून जीवन प्रवास करतेय याबाबत हल्ली काही वर्षांपासून नेहमीच चर्चा होतेय, अगदी याच अनुषंगाने काल वनराज आंदेकर च्या हत्येचा बदला घेण्यासाठी अक्षय म्हस्केवर गोळीबार आणि कोयत्याने वार करत खुनी हल्ला केलेल्या आरोपींची पुष्टी होते आहे. पोलिसांनी सहजांना या हल्ल्याच्या प्रकरणी पकडले आहे ज्यातील एक अल्पवयीन मुलगा आहे तर अन्य ५ जन १९ ते २५ वयोगटातील तरुण आहेत. ज्यांनी भर सकाळी दहा वाजण्याच्या सुमारास गर्दीने गजबजलेल्या बालाजीनगर परिसरात हा खुनी हल्ला केला .या सर्व आरोपींना 27 मे पर्यंत पोलीस कोठडीत ठेवण्याचे आदेश न्यायालयाने दिले आहेत .

पोलिसांनी या संदर्भात सांगितले कि,’पुणे शहरातील राष्ट्रवादी कॉग्रेसचे माजी नगरसेवक वनराज सुर्यकांत आंदेकर याचे खुनाच्या गुन्ह्यामध्ये अटक असलेला आरोपी आकाश बापु म्हस्के याचा लहान भाऊ अक्षय उर्फ बाळु बापु म्हस्के, वय २६ वर्ष याचेवर पाळत ठेवुन त्याला जिवे ठार मारण्याचे उद्देशाने तो दिनांक २०/०५/२०२६ रोजी सकाळी १०.०० वा. चे सुमारास राजश्री शाहु बँक चौक, बालाजीनगर, धनकवडी, पुणे येथे रिक्षात बसलेला असताना त्याचेवर पिस्टलने फायर करुन तसेच धारधार हत्याराने वार करून गंभीर जखमी केले म्हणुन सहकारनगर पोलीस स्टेशन गु.र.नं. २०४/२०२६ भा.न्या.सं.क १०९, ६१ (२), १८९, १९०,१९१ (२) (३), ३(५) आर्म अॅक्ट क. ३ (२५), ४ (२५) व मपोॲक्ट ३७ (१) (३) सह १३५ अन्वये गुन्हा दाखल करण्यात आला आहे.
या गुन्हयाच्या अनुषंगाने वरिष्ठांचे मागर्दशनाखाली गुन्हे शाखा, युनिट १ चे प्रभारी अधिकारी वरिष्ठ पोलीस निरीक्षक अजित जाधव व त्यांचेकडील तपास पथक हे आरोपींचा शोध घेत असताना नमुद गुन्ह्यात ऋषिप्रसाद मोहन आंबट हा असल्याचे निष्पन्न झाल्याने त्याचे वडीलांच्याकडे चौकशी केली असता ऋषिप्रसाद हा नमुद गुन्ह्यातील इतर साथीदारांसह लोणावळा येथे असल्याची माहीती मिळाली.
युनिट-१ चे प्रभारी अधिकारी वरिष्ठ पोलीस निरीक्षक अजित जाधव व युनिट-०१, गुन्हे शाखा कडील पोलीस अंमलदार असे लोणावळा तेथे जावुन आरोपीतांचा शोध घेत असताना आरोपी हे पुणे-मुंबई हायवे वरील बेहेरगाव, कार्ला, लोणावळा येथे एकविरा देवी कडे जाणारे रस्त्याचे कमानी जवळ येणार असल्याची खात्रीशीर गोपनीय माहीती मिळाल्याने तात्काळ बातमीचे ठिकाणी जावुन सापळा रचुन थांबले असताना गुन्ह्यातील आरोपीत आवेज आश्पाक शेख हा त्याचे साथिदारांसह तेथे आला असताना त्यांना शिताफीने ताब्यात घेतले. त्यांना त्यांचे नाव व पत्ता विचारता त्यांनी त्यांची नावे १) आवेज अशपाक शेख वय २६ वर्ष रा. २७१, गणेश पेठ, अजय सी फुड शेजारी, पुणे २) अमन फारुख बागवाले वय २१ वर्ष, रागोल्डनग्रेस, तळ मजला, भारत टॉकीज जवळ, भवानी पेठ, पुणे ३) वेदात श्रीनिवास टेमगिरे वय १९ वर्ष रा ६० भवानीपेठ, पालखी विठोबा चौक, पुणे ४) त्रह्मीप्रसाद मोहन आंबट वय २१ वर्ष रा. हमाल तालीमनाना पेठ, नवरंगमित्र मंडळा जवळ, पुणे ५) आफ्ताब शरिफ सय्यद, वय २२ वर्ष रा. भाग्योदय नगर, वैशाली नर्सिंग होम शेजारी, कोंढवा, खुर्द, पुणे व एक विधिसंघर्षग्रस्त बालक असल्याचे सांगितले. त्यांचेकडे अधिक तपास करता त्यांनी सदर गुन्हा केल्याचे निष्पन्न झाले. त्यांना ताब्यात घेऊन पुढील तपासाकरीता सहकारनगर पोलीस स्टेशनचे ताब्यात देण्यात आले आहे.सदरची कामगिरी पोलीस आयुक्त अमितेश कुमार,अपर पोलीस आयुक्त, प्रशासन (अति. कार्य. पोलीस सह आयुक्त) संजय पाटील, अपर पोलीस आयुक्त, गुन्हे तेजस्विनी सातपुते, पोलीस उप-आयुक्त, गुन्हे गौहर हसन, सहा. पोलीस आयुक्त, गुन्हे-१, शैलेद्र संखे यांच्या मार्गदर्शनाखाली वरिष्ठ पोलीस निरीक्षक युनिट-१ गुन्हे शाखा अजित जाधव, वरिष्ठ पोलीस निरीक्षक युनिट-२ गुन्हे शाखा अश्विनी जगताप यांचे सुचनांप्रमाणे पोलीस उप-निरीक्षक राहुल मखरे पोलीस अंमलदार विनोद शिंदे, अनिकेत बाबर, शशिकांत दरेकर, हेमंत पेरणे, अमित जमदाडे, मयुर भोसले, सुहास डोगरे, निलेश साबळे, युवराज कांबळे, उमेश मठपती व अविनाश दळवी यांचे पथकाने केली आहे.

पुणे : जिल्हाधिकारी जितेंद्र डुडी यांच्या आदेशानुसार समाज कल्याण विभागाच्या विविध योजनांचा व सामाजिक प्रश्नांचा सविस्तर आढावा घेण्यासाठी आज बैठक आयोजित करण्यात आली. समाज कल्याण विभागाचे सहायक आयुक्त विशाल लोंढे यांनी बैठकीत विविध विभागांकडून सुरू असलेल्या कामकाजाचा आढावा घेत संबंधित अधिकाऱ्यांना तातडीने कार्यवाही करण्याचे निर्देश दिले.

बैठकीत जिल्ह्यातील ज्येष्ठ नागरिकांच्या समस्या, त्यांच्या कल्याणासाठी राबविण्यात येणाऱ्या योजना तसेच ज्येष्ठ नागरिकांसाठी विरंगुळा केंद्र स्थापन करण्याबाबत विशेष चर्चा करण्यात आली. ग्रामीण व शहरी भागातील ज्येष्ठ नागरिकांना सामाजिक संवाद, आरोग्यविषयक मार्गदर्शन आणि मनोरंजनाच्या सुविधा उपलब्ध करून देण्यासाठी आवश्यक प्रस्ताव तयार करण्याच्या सूचना संबंधित विभागांना देण्यात आल्या.

तसेच राज्य शासनाच्या जादूटोणा विरोधी कायद्याच्या प्रभावी अंमलबजावणीसंदर्भातही सविस्तर आढावा घेण्यात आला. समाजात अंधश्रद्धा निर्मूलनाबाबत जनजागृती वाढविणे, तक्रारींवर तातडीने कारवाई करणे आणि विविध विभागांमध्ये समन्वय वाढविण्याच्या सूचना यावेळी देण्यात आल्या.

पुणे जिल्ह्यातील गावांची व वस्त्यांची जातीवाचक नावे बदलण्याच्या प्रक्रियेचाही बैठकीत आढावा घेण्यात आला. यासंदर्भातील प्रस्ताव, स्थानिक स्तरावरील कार्यवाही आणि प्रशासनिक प्रक्रिया गतीमान करण्याबाबत निर्देश देण्यात आले. सामाजिक समतेच्या दृष्टीने हा विषय महत्त्वाचा असून संबंधित विभागांनी यावर प्राधान्याने काम करावे, असे सांगण्यात आले.

जिल्ह्यातील हाताने मैला उचलणाऱ्या सफाई कामगारांच्या समस्या, त्यांचे पुनर्वसन, पर्यायी रोजगार, सुरक्षा साधनांची उपलब्धता आणि शासकीय योजनांचा लाभ याबाबतही चर्चा झाली. संबंधित विभागांनी अशा कामगारांची अद्ययावत माहिती संकलित करून त्यांच्यासाठी आवश्यक उपाययोजना राबविण्याचे निर्देश देण्यात आले.

ऊसतोड कामगारांच्या प्रश्नांवरही बैठकीत चर्चा करण्यात आली. स्थलांतर, आरोग्य सुविधा, मुलांचे शिक्षण, निवास आणि शासकीय योजनांचा लाभ यासंदर्भातील विविध मुद्द्यांवर संबंधित विभागांनी समन्वयाने काम करण्याचे निर्देश देण्यात आले.

तृतीय पंथीयांच्या सामाजिक, शैक्षणिक व रोजगारविषयक समस्यांचाही बैठकीत सविस्तर आढावा घेण्यात आला. त्यांना शासनाच्या विविध योजनांचा लाभ मिळवून देणे, ओळखपत्र, आरोग्य सुविधा आणि कौशल्य विकास प्रशिक्षण उपलब्ध करून देण्यासाठी विशेष मोहीम राबविण्याबाबत सूचना करण्यात आल्या.

बैठकीत घेण्यात आलेल्या सर्व विषयांवर संबंधित विभागांनी तातडीने कार्यवाही करून अहवाल सादर करावा, असे निर्देश सहायक आयुक्त विशाल लोंढे यांनी दिले.

यावेळी जिल्हा परिषद समाज कल्याण अधिकारी राधाकिसन देवढे, विविध विभागांचे अधिकारी उपस्थित होते. काही अधिकारी प्रत्यक्ष उपस्थित राहिले तर काही अधिकारी दूरदृश्य प्रणालीद्वारे बैठकीत सहभागी झाले.

यावेळी या बैठकीमध्ये अनुसूचित जाती व अनुसूचित जमाती अत्याचार प्रतिबंध अधिनियम १९८९ अंतर्गत दाखल झालेल्या गुन्ह्यांबाबत आढावा घेण्यात आला. प्रलंबित गुन्ह्याच्या अनुषंगाने विहित काल मर्यादेत कार्यवाही करण्याचे निर्देश देण्यात आले.

पुणे-

आज दि. २१ मे २०२६ रोजी पुणे शहर जिल्हा काँग्रेस कमिटी (पश्चिम विभाग) च्या अध्यक्ष पदाचा पदभार माजी अध्यक्ष अरविंद शिंदे यांच्या कडून दिप्तीताई चवधरी यांनी काँग्रेस भवन येथे पक्षाच्या प्रमुख पदाधिकाऱ्यांच्या उपस्थितीमध्ये स्विकारला.

अखिल भारतीय काँग्रेस कमिटीचे सरचिटणीस के. सी. वेणूगोपाल यांच्या आदेशाने व महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांच्या मान्यतेने माजी आमदार दिप्तीचवधरी यांची नियुक्ती करण्यात आली आहे.

आज काँग्रेस भवन येथे पार पडलेल्या पदभार स्विकारण्याच्या कार्यक्रमामध्ये बोलताना अरविंद शिंदे म्हणाले की, ‘‘माझ्या सारख्या कार्यकर्त्याला काँग्रेस पक्षाने पुण्यासारख्या शहराचे अध्यक्ष पद दिले ही माझ्या आयुष्‍यातील खुप मोठी गोष्ट आहे. अध्यक्ष असताना शहरातील निष्ठावान व सर्वसामान्य कार्यकर्त्यांना घेवून व पदाधिकारी व नगरसेवकांना विचारात घेवून पक्षाचे काम गेली ४ वर्ष मी प्रामाणिकपणे केले काँग्रेस पक्षाच्या नगरसेवकांची संख्या वाढविली. यावेळी अनेक ज्ञात – अज्ञात कार्यकर्त्यांनी व नेत्यांनी सहकार्य केले त्यामुळे मी पक्षाची धुरा सांभाळू शकलो.’’

नवनिर्वाचित अध्यक्ष दिप्ती चवधरी यावेळी म्हणाल्या की, ‘‘काँग्रेस पक्षाचे काम करीत असताना एक काँग्रेसची कार्यकर्ती ते पुणे शहर जिल्हा काँग्रेस कमिटीची अध्यक्ष या प्रवासामध्ये अनेकांनी मला साथ दिली. पक्षाचे प्रामाणिकपणे केलेल्या कामाचे फळ आज अध्यक्ष पदाच्या रूपाने मला मिळाले. यामागे प्रदेश काँग्रेस कमिटीचे अध्यक्ष हर्षवर्धन सपकाळ, महाराष्ट्राचे प्रभारी रमेश चेन्नीथला, सतेज उर्फ बंटी पाटील, निरिक्षक विनोद सुलतानपुरी व पुणे शहर काँग्रेसचे वरिष्ठ नेते व कार्यकर्ते यांच्या सहकार्याने काँग्रेस पक्षाच्या हिताचे काम मी करेन. त्याचबरोबर येणाऱ्या काळात काँग्रेस पक्षाला उर्जा प्राप्त करण्यासाठी सर्व सामान्य कार्यकर्ते व नेते यांच्या विचारांची काँग्रेस करण्याचा प्रयत्न करेन.’’

यानंतर पुणे शहर काँग्रेस सेवादल अध्यक्ष लतेंद्र भिंगारे व पुणे शहर काँग्रेस ज्येष्ठ नागरिक संघाचे अध्यक्ष द. स. पोळेकर यांनी दिप्तीताईंचा सत्कार करून त्यांना पुढील कार्यास शुभेच्छा दिल्या.
यावेळी नगरसेवक रफिक शेख, सुनिल शिंदे, माजी नगरसेवक अजित दरेकर, मेहबुब नदाफ, चंद्रशेखर कपोते, राजेंद्र भुतडा, बाळासाहेब अमराळे, प्राची दुधाने, राजाभाऊ कदम, सेवादल प्रमुख लतेंद्र भिंगारे, अजिज सय्यद, सोशल मिडीया अध्यक्ष गुलाम हुसेन खान, सुरेश नांगरे, फिरोज शेख, मुन्ना खंडेलवाल, ऋग्वेदिता सपकाळ, हर्षद हांडे, वैभव डांगमाळी, ॲड. ताम्हणकर विनोद चौरे, नितीन वायदंडे, कुशल चव्‍हाण, गणेश साळुंके, राजू बजेरी, राजेश जाधव, भारत पवार, राहुल वंजारी, बबन गोल्डे, स्नेहा रेणूसे, अन्वर पठाण, सुंदर ओव्‍हाळ, विकास कांबळे, अन्वर शेख, महेश पवार, विक्रम शहाणे, विजय सरोदे, सेल्वराज ॲन्थोनी, विल्सन मॅसी, भोला वांजळे, गणेश गुगळे आदी उपस्थित होते.

पुणे- आज पुण्याच्या कॉंग्रेस भवनात संगणक क्रांतीचे जनक आणि भारतचे माजी पंतप्रधान स्व राजीव गांधी यांना पुष्पांजली वाहताना नाव नियुक्त शहराध्यक्ष दीप्ती चवधरी यांनी राजीव गांधींच्या स्मृतींना उजाळा दिला.

माजी पंतप्रधान, भारतरत्न स्व.राजीवजी गांधी यांच्या पुण्यतिथीनिमित्त कॉंग्रेस भवन येथे त्यांच्या प्रतिमेस पुष्पहार अर्पण करून श्रद्धांजली वाहण्यात आली यावेळी पुणे शहर जिल्हा काँग्रेस कमिटीच्या नवनियुक्त अध्यक्षा दीप्तीताई चवधरी, पुणे शहर काँग्रेसचे माजी अध्यक्ष, नगरसेवक अरविंद शिंदे, नगरसेवक रफिक शेख,माजी नगरसेवक अजित दरेकर, महिला शहराध्यक्ष स्वाती शिंदे, बाळासाहेब अमराळे,पुणे शहर उपाध्यक्षा प्राची दुधाने,सुंदरताई ओव्हाळ,हर्षद हांडे,राजाभाऊ कदम, वैभव डांगमाळी, राहुल वंजारी, सुरेश नांगरे, रमेश सोनकांबळे, भगवान कडू,अनवर शेख, संतोष देसाई,चंद्रशेखर कपोते,अजिझ सय्यद व इतर पदाधिकारी उपस्थित होते.

सावित्रीबाई फुले पुणे विद्यापीठात (SPPU) माजी पंतप्रधान राजीव गांधी यांच्या पुण्यतिथीनिमित्त ‘दहशतवाद आणि हिंसाचार विरोधी दिन’ पाळण्यात आला. या प्रसंगी राजीव गांधी यांना आदरांजली वाहण्यात आली आणि दहशतवाद व हिंसाचार विरोधी प्रतिज्ञा घेण्यात आली.

विद्यापीठाच्या सरस्वती सभागृहात आयोजित या कार्यक्रमात कुलगुरू प्रा. (डॉ.) सुरेश गोसावी, प्र-कुलगुरू प्रा. डॉ. पराग काळकर, व्यवस्थापन परिषद सदस्य रवींद्र शिंगणापूरकर, अधिष्ठाता डॉ. प्रभाकर देसाई, डॉ. सदानंद बनसोडे, डॉ. मंडलिक, वित्त व लेखा अधिकारी सीएमए डॉ. चारूशिला गायके, परीक्षा व मूल्यमापन मंडळाचे संचालक डॉ. तलवारे आणि संचालक व विभागप्रमुख डॉ. विलास आढाव यांनी राजीव गांधी यांच्या प्रतिमेस पुष्पहार अर्पण करून अभिवादन केले.

सहायक कुलसचिव डॉ. अजय ठुबे यांनी कार्यक्रमाचे सूत्रसंचालन केले. या प्रसंगी विविध शैक्षणिक व प्रशासकीय विभागांचे विभागप्रमुख, संघटनांचे पदाधिकारी, शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते.

पुणे-कविता पटेकरसह नऊ जणांविरुद्ध महापालिकेच्या एका अधिकाऱ्याला जातीवाचक शिवीगाळ करून त्रास दिल्याप्रकरणी तसेच खंडणी मागितल्याच्या आरोपाखाली आणि अ‍ॅट्रोसिटी कायद्यांतर्गत गुन्हा दाखल करण्यात आला आहे. ही घटना २७ मार्च २०२६ रोजी पुणे महापालिकेच्या आवारात घडली. विभागीय अतिक्रमण अधिकाऱ्यांनी याप्रकरणी शिवाजीनगर पोलीस ठाण्यात फिर्याद दिली आहे.या प्रकरणी ऋषिकेश अभिमान सावंत, सुनिल जयवंतराव पवार, उमेर मैनुद्दीन शेख, राजेंद्र विलास जाधव, रमेश विष्णु खामकर, शंकर किन्नु ठाकूर, मिलिंद जाधव, नागुबाई ऊर्फ मीनाताई सिद्धप्पा धोत्रे आणि कविता विनयकुमार पटेकर यांच्यावर गुन्हा दाखल करण्यात आला आहे.कविता पटेकर यांनी दिव्यांगत्वाचा फायदा घेत मनपा भवनाबाहेर वारंवार आंदोलने करून शासकीय कामकाजात अडथळा निर्माण केला. त्यांनी सोशल मीडियावर चुकीची माहिती प्रसारित करून अधिकाऱ्यांची बदनामी केल्याचाही आरोप आहे.

पोलिसांनी दिलेल्या माहितीनुसार, फिर्यादी अधिकारी शासकीय कर्तव्य बजावत असताना ऋषिकेश सावंत यांनी त्यांना अडवून जातीवाचक शिवीगाळ केली आणि ‘तुझी नोकरी खातो’ अशी धमकी दिली. यानंतर सुनिल पवार आणि इतरांनी त्यांच्या हितसंबंधातील व्यक्तींच्या रस्त्यावरील बेकायदेशीर स्टॉल्सवर कारवाई होऊ नये यासाठी अधिकाऱ्यावर दबाव आणला.संबंधित अधिकाऱ्यांविरोधात विविध शासकीय विभागांकडे खोटे तक्रार अर्ज दाखल करून त्यांना त्रास देण्यात आला. तसेच, अतिक्रमण निरीक्षक धम्मानंद गायकवाड यांच्याविरोधातील तक्रारी मागे घेण्यासाठी १० हजार रुपयांची खंडणी मागितल्याचाही आरोप फिर्यादीत नमूद आहे.या प्रकरणाचा पुढील तपास सहायक पोलीस आयुक्त चंद्रकांत भोसले करत आहेत.

पुणे-भारतातील संगणक क्रांतीचे जनक आणि माजी पंतप्रधान राजीव गांधी यांच्या पुण्यतिथीनिमित्त त्यांच्या प्रतिमेस अतिरिक्त महापालिका आयुक्त श्री. प्रजित नायर यांनी पुष्पहार अर्पण करून विनम्र अभिवादन केले.तसेच दहशतवाद व हिंसाचार विरोधी दिनानिमित्त मनपा भवन परिसरात उपस्थित अधिकारी व कर्मचाऱ्यांनी राष्ट्रीय एकात्मता, शांतता आणि अहिंसेचा संदेश दृढ करण्यासाठी शपथ घेतली.

शहर अभियंता अनिरुद्ध पावसकर , नगरसचिव योगिता भोसले ,उपायुक्त रवी पवार ,आशा राऊत, किशोरी शिंदे आदी मान्यवर अधिकारी यावेळी उपस्थित होते.

पुणे–राष्ट्रवादी काँग्रेस शरदचंद्र पवार पक्षाचे प्रवक्ते विकास लवांडे यांना अखेर पोलिसांनी अटक केली आहे. वारकरी संप्रदायाबाबत केलेल्या वादग्रस्त वक्तव्याप्रकरणी दाखल गुन्ह्यात पुणे न्यायालयाने त्यांचा अंतरिम अटकपूर्व जामीन रद्द केल्यानंतर ही कारवाई करण्यात आली. न्यायालयाने मुदतवाढीचा अर्ज फेटाळून लवांडे यांचे संरक्षण काढून घेतल्याने वाघोली पोलिसांनी त्यांना ताब्यात घेतले. या प्रकरणामुळे राजकीय आणि वारकरी वर्तुळात मोठी चर्चा रंगली आहे.

वारकरी संप्रदायात घुसखोरी होत असल्याचा दावा विकास लवांडे यांनी केल्याचा आरोप होता. या वक्तव्याविरोधात नलिनी आशिष वायाळ (वय 41, रा. येरवडा) यांनी वाघोली पोलिस ठाण्यात तक्रार दाखल केली होती. त्यानंतर लवांडे यांच्याविरोधात गुन्हा नोंदवण्यात आला होता. या प्रकरणात अतिरिक्त सत्र न्यायालयाने यापूर्वी 20 मेपर्यंत अंतरिम अटकपूर्व जामीन मंजूर केला होता. तसेच तपास अधिकारी, सरकार पक्ष आणि वाघोली पोलिसांना याबाबत भूमिका मांडण्याचे निर्देशही देण्यात आले होते.

दरम्यान, तपासादरम्यान विकास लवांडे यांनी अटकपूर्व जामिनाच्या अर्जात स्वतःविरोधातील पूर्वी दाखल असलेल्या 4 गुन्ह्यांची माहिती लपविल्याचे समोर आले. सरकारी वकील राजेश कावेडिया यांनी न्यायालयात यावर जोरदार आक्षेप घेत लवांडे यांचे संरक्षण रद्द करण्याची मागणी केली. न्यायालयाने हा युक्तिवाद ग्राह्य धरत त्यांचा अंतरिम अटकपूर्व जामीन रद्द केला. न्यायालयाच्या निर्णयानंतर पोलिसांनी तत्काळ हालचाली करत लवांडे यांना अटक केली.

दरम्यान आपल्या अटकेची बातमी लवांडे यांनी स्वतः ट्विटर वरून शेअर केली आहे काय म्हटले आहे त्यांनी ते त्यांच्याच शब्दात पहा

पुणे पोलिसांची चोर सोडून संन्याशाला फाशी..
माझ्यावर जीवघेणा हल्ला करणारे गुंड संग्राम भंडारे व इतर सर्व आरोपी मोकाट असून वाघोली पोलीस स्टेशनचे पोलिस एका खोट्या फिर्यादीवरून कसलाही पुरावा नसताना मला अटक करण्यासाठी मला फोन न करता रात्री घरी आले मी घरी नव्हतो. कुटुंबीयांना माझ्या अटकेबाबत निरोप दिला कुटुंबांना घाबरवण्याचा हा प्रयत्न होता काय ? असा माझा सवाल आहे ? पोलीस मला फोन करू शकले असते. मी फरार नाही किंवा माफीवीर नाही. शासनाने मला जरूर अटक करावी मी पोलिसांना सहकार्य करणारा माणूस आहे कारण मी कायदा पाळणारा माणूस आहे कायदा हातात घेणारा माणूस नाही. सत्यासाठी लढत राहणार सत्याग्रही पद्धतीने जामीन , वकील ,दंड देणार नाही. पुणे पोलिसांनी मला जरूर अटक करावी मी तयार आहे.
आता मला पुण्यातून पोलीस #वाघोली पोलीस स्टेशनला घेऊन चाललेले आहेत.

पुणे, : काँग्रेसने पुणे शहर पक्ष संघटनेत मोठे फेरबदल करत दोन शहराध्यक्षांची नियुक्ती केली आहे. शहर पूर्व भागाच्या अध्यक्षपदी नगरसेवक प्रशांत जगताप, तर पश्चिम भागाच्या शहराध्यक्षपदी माजी आमदार दीप्ती चवधरी यांची नियुक्ती केली आहे. पिंपरी-चिंचवडच्या शहराध्यपदी नरेंद्र बनसोडे यांची नियुक्ती करण्यात आली आहे.

गेल्या काही काळापासून अरविंद शिंदे यांच्याकडे शहराध्यक्षपदाचा प्रभारी कार्यभार होता. नवनियुक्त दोन्ही अध्यक्षांनी यापूर्वी पुण्याचे महापौरपद भूषविले आहे. चवधरी यांच्या नियुक्तीमुळे दीर्घकाळानंतर शहराध्यक्षपदी महिलेला संधी मिळाली.
आहे. याबरोबरच पुणे ग्रामीण उत्तरचे अध्यक्ष म्हणून ज्येष्ठ नेते कमलाकर सातव आणि दक्षिणच्या अध्यक्षपदी वरिष्ठ नेते लहू निवंगुणे यांची नियुक्ती केली आहे. पक्षाच्या संघटन सृजन’ अभियानांतर्गत हे फेरबदल केले आहेत. राष्ट्रवादी काँग्रेस आणि शिवसेना उद्धव बाळासाहेब ठाकरे पक्षाच्या धर्तीवर. पुण्यात दोन शहराध्यक्ष नेमण्याचा प्रस्ताव पक्षश्रेष्ठींनी मान्य केला. अखिल भारतीय काँग्रेस समितीचे प्रतिनिधी विनोद सुलतानपुरी यांनी कार्यकत्र्त्यांची मते जाणून घेतली. त्यानंतर पक्षाचे प्रदेशाध्यक्ष हर्षवर्धन सपकाळ यांनी दोन शहराध्यक्षांची आणि जिल्हाध्यक्षांची नियुक्ती केली.

जगताप यांनी अलीकडेच राष्ट्रवादी काँग्रेसमधून काँग्रेसमध्ये प्रवेश केला होता, तर चवधरी या विधान परिषदेच्या माजी आमदार आहेत. या नियुक्त्यांच्या माध्यमातून काँग्रेसने मराठा आणि ओबीसी समाजाला प्रतिनिधित्व देत सामाजिक संतुलन साधण्याचा प्रयत्न केला आहे.

महिनाभरात पडक्या इमारती पा डून परिसर सुरक्षित करणार, सुरक्षा वाढवण्याच्या सूचना

• ​महिला डब्यांजवळील सिग्नल पॉइंटवर गर्दुल्ल्यांचा वावर रोखण्यासाठी ‘अॅक्सेस’ यंत्रणा उभारणार
• ​प्लॅटफॉर्मवर बीट मार्शल नेमण्याची आणि स्थानकांवर सातत्याने संवेदनशील उद्घोषणा (Announcements) करण्याची मागणी
• ​रेल्वे डीआरएम हरीश मीना यांच्यासोबत शिवसेना शिष्टमंडळाची उच्चस्तरीय बैठक

​मुंबई दि.२० : कल्याण रेल्वे स्थानक परिसरात एका अल्पवयीन मुलीवर झालेल्या अत्याचार प्रकरणाची गंभीर दखल घेत शिवसेना नेत्या आणि विधानपरिषद आमदार डॉ. नीलम गोऱ्हे यांनी आज मध्य रेल्वेचे डीआरएम (Divisional Railway Manager) हरीश मीना यांची शिवसेना शिष्टमंडळासह भेट घेतली. या वेळी त्यांनी रेल्वे प्रशासनाला स्थानक परिसर आणि रेल्वे हद्दीतील महिलांच्या सुरक्षेबाबत अत्यंत कडक पावले उचलण्याचे निर्देश दिले. या बैठकतीतील सविस्तर चर्चेअंती, रेल्वेच्या हद्दीतील धोकादायक आणि पडक्या इमारती येत्या महिन्याभराच्या आत पाडण्याचे आश्वासन डीआरएम यांनी शिष्टमंडळाला दिले. ​

राज्याचे उपमुख्यमंत्री एकनाथ शिंदे आणि खासदार डॉ. श्रीकांत शिंदे यांच्या सूचनेनुसार या संपूर्ण प्रकरणाचा रेल्वे प्रशासनाकडे पाठपुरावा करण्यात येत असल्याचे डॉ. गोऱ्हे यांनी सांगितले.

​बैठकीतील महत्त्वाचे मुद्दे आणि रेल्वे प्रशासनाला दिलेल्या सूचना:

• ज्या मोडकळीस आलेल्या आणि निर्जन रेल्वे इमारतींचा गैरफायदा घेऊन गुन्हेगार कृत्य करतात, अशा रेल्वे लगतच्या सर्व पडक्या इमारती महिन्याभराच्या आत पाडून तिथे रखडलेल्या विकासकामांना गती दिली जाईल, असे आश्वासन डीआरएम हरीश मीना यांनी दिले.
• रेल्वे यार्ड, शेवटचे प्लॅटफॉर्म्स आणि रेल्वेच्या निर्जन जागांवर तात्काळ हायटेक सीसीटीव्ही कॅमेरे बसवण्यात यावेत आणि संपूर्ण परिसरात पुरेशी प्रकाशयोजना (Flashing/Searchlights) करण्यात यावी.
• शहरात पोलिसांचे बीट मार्शल ज्याप्रमाणे फिरतात, त्याच धर्तीवर रेल्वे स्टेशनच्या प्रत्येक प्लॅटफॉर्मवर कर्तव्य दक्ष रेल्वे पोलीस आणि आरपीएफचे जवान तैनात राहावेत. रात्रीच्या शेवटच्या लोकलच्या वेळी प्रवासी उतरतात, तिथे चोख बंदोबस्त असावा.
• लोकल ट्रेन किंवा स्थानकांवर एखाद्या महिलेला अडचण आल्यास तिला तात्काळ मदत कुठे मिळेल, याबद्दलची माहिती देणारी उद्घोषणा सातत्याने रेल्वे स्थानकांवर स्पष्ट आणि संवेदनशील भाषेत केली जावी, जेणेकरून पीडित महिला त्वरित संपर्क साधू शकेल.
• अनेकदा रेल्वे स्थानकात येण्यापूर्वी गाड्या आऊटर किंवा सिग्नलला थांबतात. याचा फायदा घेऊन गर्दुल्ले किंवा समाजकंटक महिलांच्या डब्यात घुसून त्रास देतात. अशा संवेदनशील जागांवर काय घडतंय याचा थेट ‘अॅक्सेस’ आणि नियंत्रण यंत्रणा रेल्वे पोलिसाकडे असणे आवश्यक आहे.
• रेल्वे क्षेत्रात सध्या साडेतीनशे महिला कर्मचारी/अधिकारी कार्यरत आहेत. त्यांची सक्षमता आणि संख्या वाढवून, महिला प्रवाशांपर्यंत अधिक व्यापकपणे पोहोचून त्यांच्यात सुरक्षिततेची भावना निर्माण केली जाईल.
• रेल्वे गाड्यांमधून अनेकदा लहान मुली आणि महिलांची अनैतिक वाहतूक केली जाते. अशा गुंड प्रवृत्तींना रोखण्यासाठी रेल्वे पोलीस यंत्रणा अधिक सतर्क केली जाईल.
• रेल्वे परिसरात रात्रीच्या वेळी भटकणाऱ्या किंवा बेवारस आढळणाऱ्या मुलांसाठी सुरक्षित निवारा गृह (Shelter Home) उपलब्ध करून देऊन, नंतर त्यांना मुख्य प्रवाहात आणण्यासाठी शाळेत दाखल करण्याची व्यवस्था रेल्वे आणि राज्य शासनाच्या मदतीने केली जाईल.
  ​
  ​या वेळी डॉ. नीलम गोऱ्हे यांच्यासोबत आलेल्या शिष्टमंडळात ​तसेच धर्मवीर आनंद दिघे साहाय्यता राज्य प्रमुख राजर्षी अहिरराव, महिला विभागप्रमुख निलम पवार, रेखा सुरणकर, स्मिता देवकर, कल्याण संपर्क संघटक कविता गावंड, रेल्वे पोलीस कल्याण सहाय्यक आयुक्त श्री पाटील आदी उपस्थिती होती.

​”महिलांचा अधिकार आणि सन्मान राखणे हे आमचे सर्वोच्च कर्तव्य आहे. मुख्यमंत्री एकनाथ शिंदे आणि खासदार श्रीकांत शिंदे यांच्या मार्गदर्शनाखाली आम्ही रेल्वे प्रशासनाकडे या विषयाचा तीव्र पाठपुरावा केला आहे. पीडित महिलांना रेल्वे प्रवासात कुठे आणि कशी मदत मिळेल, याची माहिती देणारी विशेष योजना आम्ही तात्काळ सुरू करत आहोत. रेल्वे पोलिसांनी महिलांच्या सुरक्षेसाठी संपूर्ण ताकद पणाला लावावी, अशा सूचना दिल्या आहेत.”
— डॉ. नीलम गोऱ्हे, शिवसेना नेत्या व आमदार