• विशेष मोहीम : नियमांचे उल्लंघन करणाऱ्यांवर याच आठवड्यात कारवाईचा बडगा
• अंतिम संधी : रीतसर परवानगीसाठी पीएमआरडीएकडून होर्डिंगधारकांना शेवटची संधी

पुणे : पुणे महानगर प्रदेश विकास प्राधिकरणाच्या (पीएमआरडीए) हद्दीत बेकायदा आणि धोकादायक होर्डिंगचे फुटलेले पेव आता मोडीत काढले जाणार आहे. महानगर आयुक्त डॉ. अभिजीत चौधरी यांनी यासंदर्भात अतिक्रमण निर्मूलन विभागाला कठोर कारवाईचे आदेश दिले असून, नियमांचे उल्लंघन करणाऱ्या होर्डिंगधारकांवर थेट कारवाई केली जाणार आहे. दरम्यान, अनधिकृत होर्डिंगधारकांना रीतसर परवानगी प्रक्रिया पूर्ण करण्यासाठी ही शेवटची संधी असल्याचे आयुक्तांनी स्पष्ट केले आहे.

पीएमआरडीएच्या हद्दीतील मुळशी, मावळ, हवेली, खेड आणि शिरूर या तालुक्यांमध्ये मोठ्या प्रमाणावर बेकायदा होर्डिंग उभारण्यात आले आहेत. यासंदर्भात नागरिकांच्या वाढत्या तक्रारींची दखल घेत, सोमवारी आकुर्डी येथील मुख्यालयात महानगर आयुक्तांच्या अध्यक्षतेखाली आढावा बैठक पार पडली. या बैठकीस विकास परवानगी विभागाचे संचालक अविनाश पाटील, उपायुक्त आशा होळकर आणि इतर वरिष्ठ अधिकारी उपस्थित होते.

‘क्यूआर कोड’ आणि ‘जिओ फेन्सिंग’ सक्तीचे
महानगराचे विद्रूपीकरण रोखण्यासाठी आणि संभाव्य दुर्घटना टाळण्यासाठी आता होर्डिंगसाठी ऑनलाइन परवानगी प्रक्रिया राबवली जाणार आहे. यापुढे प्रत्येक अधिकृत फलकावर ‘क्यूआर कोड’ आणि ‘जिओ फेन्सिंग’ असणे बंधनकारक असेल. ज्यांचे अर्ज त्रुटींमुळे प्रलंबित आहेत किंवा ज्यांनी अद्याप शुल्क (चलन) भरलेले नाही, त्यांना परिपूर्ण प्रस्ताव सादर करण्याची ही अंतिम संधी असेल. ज्यांना नोटिसा बजावूनही त्यांनी अनधिकृत फलक हटवलेले नाहीत, त्यांच्यावर याच आठवड्यापासून निष्कासनाची धडक मोहीम उघडली जाणार आहे.

होर्डिंगधारकांशी ९ एप्रिलला चर्चा
प्रशासनाची भूमिका स्पष्ट करण्यासाठी आणि एजन्सींचे म्हणणे ऐकून घेण्यासाठी महानगर आयुक्तांनी गुरुवारी (ता. ९) दुपारी १:३० वाजता विशेष बैठकीचे आयोजन केले आहे. ही बैठक आयुक्तांच्या दालनात पार पडणार असून, त्यानंतर कठोर अंमलबजावणीला सुरुवात होईल.

महानगर आयुक्तांचे महत्त्वाचे निर्देश :
१) होर्डिंग परवानगीसाठी पूर्णतः पारदर्शक ऑनलाइन प्रणालीचा अवलंब करावा.
२) मुदतीत बेकायदा होर्डिंग न काढल्यास प्रशासनातर्फे ते निष्कासित केले जातील.
३) वारंवार सूचना देऊनही टाळाटाळ करणाऱ्यांवर कठोर कायदेशीर कारवाई केली जाईल.
४) अपूर्ण प्रस्तावांबाबत नियमानुसार कागदपत्रे व चलन भरून तात्काळ प्रक्रिया पूर्ण करावी.

पुणे- पिंपळे निलख येथील CNG पंपच्या मागे असणाऱ्या ग्रेस्टोंन इन्फ्रा व कार्निवल इन्फ्रा या दोन अनधिकृत RMC प्लॅन्ट असल्याचे पिंपरी चिंचवड महानगरपालिका पर्यावरण विभागास पत्राद्वारे कळवून पिंपरी चिंचवड महानगरपालिकेच्या पर्यावरण विभागाने सिल लावलेले असतानाही RMC प्लॅन्ट चालकाने सिल तोडून पुन्हा प्लॅन्ट चालू केला.तरी देखिल पिंपरी चिंचवड महानगरपालिका पर्यावरण विभाग गुन्हा दाखल केला नाही. आता महाराष्ट्र प्रदुषण नियंत्रण मंडळाने महावितरण विभागास विद्युत प्रवाह रोखण्यासाठी पत्राद्वारे कळवण्यात आल्यानंतर महावितरण विभागास विद्युत प्रवाह खंडित केला आहे.तरीसुद्धा रस्त्यावर असलेली धुळ कमी होत नाहिये.पिंपरी चिंचवड महानगरपालिका अधिकारी गांभिर्याने घ्यायला तयार नाहीत त्यामुळे आज आम्ही ड प्रभाग पिंपरी चिंचवड येथिल आरोग्य विभागचे अधिकारी आणि सहाय्यक आयुक्त यांना पिंपळे निलख येथिल रस्त्यावर असलेली धुळ पिशवीत भरून भेट स्वरूपात दिली.एवढे करून सुद्धा महापालिका कर्मचारी या प्रकरणी गांभीर्याने पाहणार नसतील तर आम्ही तीव्र स्वरूपाच्या आंदोलनाचा मार्ग पत्करू असा इशारा आपचे शहराध्यक्ष रविराज काळे यांनी दिला.

• महापालिका आयुक्तांसह प्रमुख अधिकाऱ्यांच्या उपस्थितीत आपत्ती व्यवस्थापनावर सभागृहनेत्यांची बैठक संपन्न

पुणे (दि. ०६): शहरात गेल्या काही काळामध्ये कमी कालावधीत होणाऱ्या मुसळधार पावसामुळे अनेक ठिकाणी पाणी तुंबण्याच्या घटना समोर आल्या आहेत. विशेषतः उंच भागातून मोठ्या प्रमाणात वाहून येणारे पाणी सखल भागांमध्ये तुंबते, या पार्श्वभूमीवर सखल भागांतील आवश्यक कामे युद्धपातळीवर सुरू करण्यात यावीत. पावसाळ्यात नागरिकांना होणारा त्रास टाळण्यासाठी सर्व आवश्यक उपाययोजना त्वरीत राबवाव्यात, अशी सूचना सभागृह नेते गणेश बिडकर यांनी प्रशासनाला केली आहे.

आगामी पावसाळापूर्वी शहरातील पूरस्थिती टाळण्यासाठी विविध प्रतिबंधात्मक उपाययोजना तातडीने हाती घेण्यात येत आहेत. सभागृह नेते गणेश बिडकर यांच्या अध्यक्षतेखाली पुणे महानगरपालिकेच्या नवीन इमारतीत बैठक पार पडली. यावेळी महापालिका आयुक्त नवल किशोर राम, अतिरिक्त आयुक्त ओम प्रकाश दिवटे, शहर अभियंता अनिरुद्ध पावसकर, उपायुक्त आपत्ती व्यवस्थापन माधव जगताप, मलनिस्सारण विभागाचे मुख्य अधीक्षक अभियंता श्री. खानोरे, तसेच पथ विभागाचे मुख्य अभियंता राजेश बनकर यांच्यासह संबंधित विभागांचे अधिकारी उपस्थित होते.

सदर बैठकीत दिलेल्या निर्देशानुसार शहरातील प्रमुख नाले/कॅनॉल ‘A’ मधील एकूण १२० ठिकाणांपैकी NDMA अंतर्गत सुरू असलेली कामे वगळता इतर ठिकाणी पावसाळ्यापूर्वी आवश्यक कामे पूर्ण करण्यात येणार आहेत. मलनिस्सारण विभागामार्फत अशा ठिकाणांची यादी व अंदाजपत्रक तयार करण्यात आले असून, त्यानुसार आवश्यक कामे करण्यात येणार आहेत. याबाबत सदर उपाययोजना कमी खर्चात अधिक परिणामकारक असतील यावर विशेष भर देण्यात येत येणार आहे.

यावेळी शहरातील पॅचमधील लाकडी पूल ते पुणे स्टेशन या दरम्यानच्या नाल्यांमध्ये साचलेला गाळामुळे नाल्यांची वहन क्षमता कमी झालेली असून त्यामुळे पावसाळ्यात सखल भागात पाणी साचण्याच्या घटना होत आहेत. या अनुषंगाने महानगरपालिकेच्या क्षेत्रीय कार्यालयांना Excavator व तत्सम यंत्रांच्या सहाय्याने नाल्यांची तातडीने सफाई करण्याच्या सूचना गणेश बिडकर यांनी केली आहे.

नाल्यांमध्ये झालेली अतिक्रमणे ही नाल्यांच्या सखल भागात पाणी साचण्याचे प्रमुख कारण असल्याने अतिक्रमण विभागामार्फत अशा ठिकाणी तातडीने कारवाई करून नाल्यांचा प्रवाह सुरळीत करण्याच्या सूचना देण्यात आल्या आहेत. नाला व पावसाळी लाईन साफसफाईच्या कामांची गती वाढविण्यासाठी अनुभवी व गुणवत्तापूर्ण काम करणाऱ्या कंत्राटदारांची निवड करून तातडीने सदर कामे निश्चित मुदतीत पूर्ण करण्याचे आदेश बैठकीत ठरल्याप्रमाणे महापालिका आयुक्तांनी प्रशासनाला दिले आहेत.

सभागृह नेते गणेश बिडकर यांची प्रतिक्रिया

“सखल भागांमध्ये पाणी साचण्याची समस्या गंभीर असून, नागरिकांना होणारा त्रास टाळण्यासाठी नालेसफाई, अडथळे दूर करणे आणि अतिक्रमणांवर कारवाई ही कामे युद्धपातळीवर पूर्ण करणे आवश्यक आहे. सर्व संबंधित विभागांनी समन्वयाने काम करून पावसाळ्यापूर्वी ही कामे वेळेत पूर्ण करावीत,” असे निर्देश दिले आहेत.

चूल पेटवून केला निषेध

पुणे —
घरगुती गॅस सिलेंडरच्या वाढत्या दरांविरोधात तसेच सर्वसामान्य नागरिकांना परवडणाऱ्या दरात सिलेंडर उपलब्ध करून देण्याच्या मागणीसाठी आज सकाळी 11 वाजता जिल्हाधिकारी कार्यालयासमोर राज्यव्यापी आंदोलन करण्यात आले.या आंदोलनाचे नेतृत्व वंचित बहुजन आघाडीचे शहराध्यक्ष अँड. अरविंद तायडे यांनी केले .

या आंदोलनात वंचित बहुजन आघाडी चे पदाधिकारी मोठ्या संख्येने उपस्थित होते. यामध्ये राष्ट्रीय महासचिव अ‍ॅड. प्रियदर्शी तेलंग, प्रदेश उपाध्यक्ष डॉ. अनिल अण्णा जाधव, अ‍ॅड. सर्वजित बनसोडे, युवा सदस्य विशाल गवळी, ज्येष्ठ नेते वसंत दादा साळवे, पुणे जिल्हा अध्यक्ष (पूर्व) राजकुमार, पश्चिम अध्यक्ष संतोष लोखंडे, शहर अध्यक्ष अ‍ॅड. अरविंद तायडे, पिंपरी-चिंचवड महिला आघाडी अध्यक्षा शारदाताई बनसोडे, महासचिव संजीवन कांबळे, युवा आघाडी अध्यक्ष सागर आल्हाट, माथाडी अध्यक्ष विशाल कसबे आणि अ‍ॅड. रेखाताई चौरे यांच्यासह मोठ्या संख्येने कार्यकर्ते सहभागी झाले होते. यावेळी महिला कार्यकर्त्यांनी प्रत्यक्ष चूल पेटवून चुलीवर पिठलं-भाकरी आणि ठेचा तयार करत शासनाचे लक्ष वेधले. “गॅस सिलेंडर महाग झाल्यामुळे सामान्य नागरिकांना पुन्हा पारंपरिक चुलीवर स्वयंपाक करण्याची वेळ आली आहे,” असा तीव्र संदेश या कृतीतून देण्यात आला.

यानंतर निवासी उपजिल्हाधिकारी ज्योती कदम यांना निवेदन सादर करण्यात आले. निवेदनासोबत प्रतीकात्मक स्वरूपात पिठलं-भाकरी व ठेचा यांची डिश देत सरकारने सर्वसामान्यांच्या अडचणींची दखल घ्यावी, अशी मागणी करण्यात आली.

आंदोलनकर्त्यांनी केंद्र सरकारने तातडीने गॅस सिलेंडरचे दर कमी करावेत, तसेच घरगुती सिलेंडरची नियमित आणि अखंड उपलब्धता सुनिश्चित करावी, अशी जोरदार मागणी केली. वाढत्या महागाईच्या पार्श्वभूमीवर सर्वसामान्यांना दिलासा देण्यासाठी तात्काळ ठोस उपाययोजना राबवाव्यात, अशी मागणी यावेळी करण्यात आली.

दिव्यांगांच्या चेहऱ्यावरील आनंद हीच आमची ऊर्जा – मंजुश्री खर्डेकर.

पुणे-वैकुंठ स्मशानभूमीत काही स्नेह्यांच्या अंत्यसंस्कारासाठी गेलो असता तेथे श्रद्धांजली अर्पण करताना तेथील स्पीकर नादुरुस्त असल्याने मान्यवरांना त्यांच्या भावना व्यक्त करताना अडचण होतं असल्याचे लक्षात आले.त्यामुळे आज भारतीय जनता पार्टीच्या  ४६ व्या वर्धापनदिनानिमित्त क्रिएटिव्ह फाउंडेशन तर्फे वैकुंठ विद्युतदाहिनी येथे स्पीकर सेट भेट देण्यात आल्याचे क्रिएटिव्ह फाउंडेशन चे अध्यक्ष संदीप खर्डेकर यांनी सांगितले. तसेच उमेद फाउंडेशन च्या दारवली येथील बालक पालक प्रकल्पास २५ खुर्च्या भेट देण्यात आल्या, संस्थेच्या वतीने राकेश सणस यांनी त्या स्वीकारल्या तर सेवाव्रत फाउंडेशन चे प्रदीप देवकुळे यांच्या पुढाकाराने मावळे आळी,गोसावी वस्ती येथील “वृंदावन शैक्षणिक व सर्वांगीण विकास प्रकल्पास” सतरंज्या भेट देण्यात आल्या.

यावेळी फाउंडेशन च्या विश्वस्त नगरसेविका मंजुश्री खर्डेकर, मनपा विद्युत विभागाचे कार्यकारी अभियंता निलेश कालेकर,उप अभियंता विद्युत जयदीप अडसूळ,विद्युतदाहिनी तील कर्मचारी कुंदन शिंदे,अनुप भातंबरेकर,श्रीनिवास कोटा,अमोल आवळे, अक्षय अवचरे,इ उपस्थित होते.सर्वच ठिकाणी प्रशासन पोहोचू शकत नाही त्यामुळे सामाजिक संस्थांनी सण, उत्सव साजरे करताना त्यातील काही रक्कम ही लोकोपयोगी साहित्य वाटपासाठी राखून ठेवली तर त्याचा सदुपयोग होईल असेही संदीप खर्डेकर म्हणाले.

फाउंडेशन च्या विश्वस्त नगरसेविका मंजुश्री खर्डेकर यांनी आपल्या भावना व्यक्त करताना सांगितले की दिव्यांग मुलांच्या चेहऱ्यावरील आनंद हीच आमची ऊर्जा असून, त्यातूनच अधिकाधिक समाजोपयोगी कार्यक्रम राबविण्याची प्रेरणा मिळते. या सेवा सप्ताहात विविध संस्थांना उपयुक्त वस्तूंची मदत देऊन आम्ही भारतीय जनता पार्टीचा ४६ वा वर्धापनदिन अनोख्या पद्धतीने साजरा करत आहोत असेही मंजुश्री खर्डेकर यांनी स्पष्ट केले.

मनपा विद्युत विभागाचे कार्यकारी अभियंता निलेश कालेकर यांनी या उपक्रमाचे कौतुक केले व विविध संस्था व वैकुंठ परिवार करत असलेल्या कार्याचा गौरवपूर्ण उल्लेख केला.

विद्युतदाहिनीतील कर्मचाऱ्यांनी श्रद्धांजली अर्पण करणाऱ्यांना आम्ही त्वरित हा स्पीकर उपलब्ध करून देऊ व याची योग्य निगा राखू असे सांगितले. स्पीकर सेट सह दोन कॉर्डलेस माईक व एक चार्जिंग वायर सह माईक, रिमोट, ब्लु टूथ इ सुविधा असल्यामुळे त्याचा वापर सुलभ होईल असेही मंजुश्री खर्डेकर यांनी सांगितले.

पुणे, दि. ६ : गायरोप केबल्स आणि विविध टेलिफोन कंपन्यांच्या केबल्स अनियमित पद्धतीने टाकल्यामुळे शहराचे सौंदर्य बाधित झाले असून, जीवित हानी होण्याचा धोका वाढला आहे, अशा कंपन्यांवर महानगरपालिका उद्यापासून फौजदारी गुन्हे दाखल करणार असल्याची माहिती स्थायी समितीचे अध्यक्ष श्रीनाथ भिमाले यांनी दिली.

महानगरपालिकेचा विद्युत विभाग, अतिक्रमण विभाग आणि अग्निशमन विभाग यांच्या संयुक्त कारवाईतून आज फरासखाना, बेलबाग, बुधवार पेठ परिसरात अनधिकृत केबल्सवर कारवाई करण्यात आली. या कारवाईनंतर भिमाले पत्रकारांशी बोलत होते.

भिमाले म्हणाले, “नुकत्याच केलेल्या सर्वेक्षणात महानगरपालिका क्षेत्रात ३,६०० किलोमीटर लांबीच्या केबल्स अनधिकृत असल्याचे प्रथमदर्शनी निदर्शनास आले आहे. नियमांनुसार केवळ भूमिगत केबल टाकण्याची परवानगी असतानाही अनेक कंपन्यांनी अनधिकृतपणे खांबांवर केबल्स टाकून शहराचे विद्रुपीकरण केले आहे. शहरातील अनेक रस्ते, तसेच चौक आणि इमारतींवर गुंतागुंतीचे अनधिकृत केबलचे जाळे निर्माण झाले असून, त्यामुळे अपघात झाले आहेत. काही कंपन्या गायरोपचा वापर करतात. त्यात ॲल्युमिनियम तारांचा समावेश असल्याने प्रवाही विजेचा शॉक बसून मनुष्यहानी होण्याची भीती आहे. अशा अनधिकृत केबल्सवर धडक कारवाई केली जात आहे. कारवाई केल्यानंतरही काही कंपन्या पुन्हा नव्याने अनधिकृत केबल टाकतात. त्यांच्यावर फौजदारी स्वरूपाचे गुन्हे दाखल केले जातील.”

भिमाले पुढे म्हणाले, “केबल्स टाकण्यासाठी महापालिकेची पूर्वपरवानगी आणि शुल्क अनिवार्य करण्यात आलेले आहे. विविध प्रकारच्या सेवा पुरविणाऱ्या कंपन्यांनी महानगरपालिकेकडून रितसर परवानगी घेऊन भूमिगत केबलच टाकाव्यात. या नियमांचे उल्लंघन करणाऱ्या कंपन्यांवर पुढील काळात कठोर दंडात्मक कारवाई करण्यात येईल. सेवा पुरविणाऱ्या छोटे ऑपरेटर किंवा वर्क फ्रॉम होम करणाऱ्यांना या कारवाईमुळे अडचण निर्माण होणार नाही. महापौर मंजुषा नागपुरे यांच्या दालनात आज छोट्या ऑपरेटरच्या शिष्टमंडळासोबत एक बैठक घेण्यात आली. महापौरांच्या निर्देशानुसार छोट्या ऑपरेटर कंपन्यांसाठी एक नियमावली तयार करण्याच्या सूचना करण्यात आल्या आहेत. या नियमावलीचे पालन करून महापालिकेत रीतसर शुल्क जमा करणे बंधनकारक राहणार आहे.”

एक एप्रिल पासून ही कारवाई शहराच्या विविध भागांमध्ये सातत्याने करण्यात येत असून, आज पर्यंत शंभर किलोमीटरच्या केबल्स हटविण्यात आल्या आहेत. आगामी महिनाभरात सुमारे तीन हजार किलोमीटरच्या केबल्स हटविण्याचे उद्दिष्ट असल्याचे भिमाले यांनी सांगितले.