• संसदेतील सर्वोत्तम कामगिरीचा सलग दुसऱ्या वर्षी गौरव

पुणे: संसदेतील सर्वोत्तम कामगिरीसाठी राज्यसभा खासदार प्रा. डॉ. मेधा विश्राम कुलकर्णी यांना सलग दुसऱ्यांदा ‘संसदरत्न’ पुरस्कार जाहीर झाला आहे. मेधा कुलकर्णी यांच्यासह महाराष्ट्रातून भाजपचे हेमंत सावरा, स्मिता वाघ, शिवसेनेचे डॉ. श्रीकांत शिंदे व नरेश मस्के यांचा या पुरस्कारांमध्ये समावेश आहे. प्राईम पॉईंट फाउंडेशनच्या वतीने लोकसभा आणि राज्यसभेतील उल्लेखनीय कार्याबद्दल रवर्षी खासदारांना ‘संसदरत्न’ पुरस्काराने सन्मानित करण्यात येते. पुरस्कारांचे यंदा १६ वे वर्ष होते.

राज्यसभेची पहिलीच टर्म असलेल्या प्रा. डॉ. मेधा कुलकर्णी यांनी संसदेत सक्रिय सहभाग नोंदवत सर्वच आघाड्यांवर उल्लेखनीय व लोक-देशहिताचे मुद्दे मांडत प्रभावी कामगिरी केली. सर्वोत्तम कामगिरीसाठी डॉ. कुलकर्णी यांना सलग दुसऱ्या वर्षी हा पुरस्कार जाहीर झाला असून, महाराष्ट्रासाठी आणि विशेषतः पुण्यासाठी ही गौरवाची बाब ठरली आहे.

प्रा. कुलकर्णी यांनी रेल्वे, महिला सुरक्षा, आरोग्य, ग्रामीण विकास, शिक्षण, सामाजिक न्याय, कॉर्पोरेट जिहादच्या संबंधित विषयांवर संसदेमध्ये सातत्याने मुद्देसूद भाष्य केले आहे. विशेष सत्रात, झिरो अवर, प्रश्नोत्तरे व विविध विषयांवरील चर्चेत सक्रिय सहभाग नोंदवला आहे. नुकत्याच झालेल्या अधिवेशनात त्यांनी महिला सुरक्षा, विमा सुरक्षा, रेनवॉटर हार्वेस्टिंग, आधार प्रमाणीकरण, आरटीई प्रवेश प्रक्रिया, शेतजमिनी याबाबत लक्षवेधी मांडल्या.

पुरस्कार जाहीर झाल्यानंतर आनंद व्यक्त करताना प्रा. डॉ. मेधा कुलकर्णी म्हणाल्या, “सलग दुसऱ्यांदा संसदरत्न पुरस्कार जाहीर होणे आनंदाची गोष्ट आहे. हा सन्मान केवळ माझा नाही, तर जनतेच्या अपेक्षा संसदेत प्रभावीपणे मांडण्याच्या प्रयत्नांचा गौरव आहे. लोकशाहीत लोकप्रतिनिधीची खरी ओळख त्याच्या कृतिशीलतेत असते. जनतेच्या आशीर्वादाची ही पोचपावती आहे. यापुढेही लोकहितासाठी परखडपणे भूमिका मांडत राहीन.”

फुले, गांधी, नेहरू विचारमंच आयोजित “महात्मा गांधी आणि राष्ट्रवाद” व्याख्यानाचे प्रथम पुष्प

पिंपरी, पुणे (दि. २४ मे २०२६) सर्वधर्मसमभाव हीच भारताची ओळख आणि हाच खरा राष्ट्रवाद आहे. १८८५ मध्ये जात, धर्म, भाषा, वर्ण, रंग, वंश हे सर्व सोडून हिंदू, पारशी, ख्रिश्चन, मुसलमान, शीख समाजातील नागरिक एकत्र येऊन त्यांनी काँग्रेसची स्थापना केली. हीच भारत राष्ट्र उभारणीची सुरुवात होय. भारतात एकत्वाची भावना निर्माण करून त्याचे नेतृत्व करण्याचे काम महात्मा गांधीजींनी केले. दलित समाजाला आत्मसन्मान मिळवून देण्याचे काम डॉ. बाबासाहेब आंबेडकरांनी केले. गांधी आणि आंबेडकरांमध्ये मतभेद होते, परंतु देशासाठी ते एकत्र होते. त्याचे फलित म्हणजे भारतीय राज्यघटना आहे असे मत ज्येष्ठ गांधीवादी विचारवंत विजय तांबे यांनी व्यक्त केले.
रविवारी (दि. २४ मे) पिंपरी येथे फुले, गांधी, नेहरू विचारमंच च्या वतीने आयोजित केलेल्या “महात्मा गांधी आणि राष्ट्रवाद” या विषयावर आयोजित केलेल्या व्याख्यानात विजय तांबे बोलत होते. यावेळी महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ, आयोजक दाहर मुजावर, अक्षय शहरकर, केनिथ रेमी तसेच विष्णू नेवाळे, अशोक मोरे, अमरसिंह नाणेकर, मिलिंद फडतरे, किरण खाजेकर, मयूर जैस्वाल, गौरव चौधरी, अनिरुद्ध कांबळे, नरेंद्र बनसोडे, हभप सांगोळे, चैतन्य रणदिवे, महेश पाटील, बाबासाहेब पाटील, गिरिजा कुदळे, सायली नढे, जीविका उठाडा, संदेश भंडारी, महालिंग स्वामी, यशराज पारखी, मॅन्युअल डिसोझा, निक्सन ऑगस्टीन, इरफान शेख, बसवराज कंजे, जिंदा सांडभोर, सूरज कुलकर्णी, सचिन दुरगुडे, वैजनाथ शिरसाठ, अनिल कदम, मनोज ढकोलिया, मंगेश मोरे, राजू शेख, अल्ताफ शेख, सुर्यकांत जाधव, किरण नढे आदी उपस्थित होते.
विजय तांबे यांनी सांगितले की, भारतीय स्वातंत्र्यलढ्याचा पाया १९२८ मध्ये झालेल्या मिठाच्या सत्याग्रहात रचला गेला. हा सत्याग्रह अस्मितेच्या मुद्द्यावर लढला गेला. यामध्ये सर्व समाज घटकांनी सहभाग घेतला होता. १९४२ मध्ये सेवाग्राम मध्ये झालेल्या बैठकीत निशस्त्र प्रतिकाराचा निर्णय झाला. १९४७ ला स्वातंत्र्यप्राप्ती वेळी विस्टन चर्चिल याने भाकीत केले की हा देश खूप काळ एकत्र राहू शकणार नाही. या देशात अनेक धर्म, जाती, वंश आहे. परंतु त्याचे भाकीत भारतीय लोकशाहीचा राज्यघटनेमुळे खरे ठरणार नाही. देशात एकत्वाची भावना निर्माण करून त्याचे नेतृत्व महात्मा गांधी यांनी केले. भारतातील दलित समाजाला आत्मसन्मान मिळवून देण्याचे काम डॉ. बाबासाहेब आंबेडकर यांनी केले. पुण्यामध्ये महात्मा फुले वाड्यावर गेल्यावर महात्मा गांधी म्हणाले होते की देश घडविणारे खरे महात्मा हे जोतीराव फुले आहेत. फुले, गांधी, नेहरू या महान व्यक्तींमुळे भारतीय राष्ट्रवाद सर्व समावेशक आहे. घटना समितीच्या शेवटच्या भाषणात डॉ. आंबेडकर म्हणाले आहेत की घटना चांगली दिली आहे, परंतु ती चालवणारे देखील चांगले पाहिजेत. अशी १८८५ ते भारतीय राज्यघटना या काळातील विस्तृत माहिती विजय तांबे यांनी दिली.
अक्षय शहरकर, केनिथ रेमी यांनी स्वागत केले आणि दाहर मुजावर यांनी सूत्र संचालन केले.

पुणे- केशवनगर-खराडी रखडलेल्या पुलाच्या कामासाठी २० दिवसांची मुदत देत नगरसेवक अजित घुलेंनी म्हटले आहे कि, हे काम 20 दिवसात झाले नाही तर… न्ग्र्सेव्क्प्द गेले तरी चालेल ..असे आंदोलन करेल.. जर कामे होणार नसतील तर या पदाचे करायचे काय ? कामे होणे महत्वाचे आहे ..

ते म्हणाले,’ केशवनगर-खराडी पुलाचे काम गेले अनेक वर्षांपासून संथ गतीने सुरू असून नागरिकांना मोठ्या प्रमाणात वाहतूक कोंडी व गैरसोयींचा सामना करावा लागत आहे. या प्रश्नावर आज स्थानिक नागरिकांसह भव्य ठिय्या आंदोलन करण्यात आले.यावेळी पालिका प्रशासन तसेच बांधकाम विभागाच्या अधिकाऱ्यांनी आंदोलनस्थळी भेट देत पुलाचे काम आगामी 20 दिवसांत पूर्ण करण्याचे आश्वासन दिले. मात्र केवळ आश्वासन नको, तर प्रत्यक्ष काम पूर्ण व्हावे ही आमची ठाम भूमिका आहे.

त्यासाठी आयुक्त, महापौर, बांधकाम विभागाचे सभापती, संबंधित अधिकारी, विद्युत विभागाचे अधिकारी, स्थानिक नगरसेवक, राष्ट्रवादी काँग्रेस पक्षाचे पदाधिकारी व नागरिक यांची तातडीची संयुक्त बैठक घेण्यात यावी आणि पुलाचे काम येत्या 15 ते 20 दिवसांत पूर्ण करण्यात यावे, असा विनंती अर्ज आज पालिका अधिकाऱ्यांना देण्यात आला.जर आगामी 20 दिवसांत पुलाचे काम पूर्ण झाले नाही, तर महापौर आणि आयुक्त यांच्या समोर पालिका सभागृहात तीव्र आंदोलन करण्यात येईल, असा इशाराही यावेळी देण्यात आला.त्यासाठी मला माझ्या नगरसेवक पदावरून हटवले तरी चालेल.असेही घुले यांनी म्हटले आहे.

ना. चंद्रकांतदादांचे काम जलदगतीने मार्गी लावण्याचे निर्देश

कोथरुड : कोथरुडमधील सुतारदरा भागात वारंवार खंडित होणारा वीजपुरवठा आणि वीजवाहिन्यांच्या दुरुस्तीची प्रलंबित समस्या आता लवकरच निकाली निघणार आहे. या भागातील नागरिकांना अखंडित वीजपुरवठा मिळावा यासाठी ३१५ केव्हीए (KVA) क्षमतेचा नवीन ट्रान्सफॉर्मर कार्यान्वित करण्यात येणार आहे.

राज्याचे उच्च व तंत्रशिक्षण मंत्री तथा कोथरुडचे आमदार चंद्रकांतदादा पाटील यांनी आपल्या निवासस्थानी आज शहर अभियंता आणि महावितरणच्या वरिष्ठ अधिकाऱ्यांसोबत महत्त्वपूर्ण बैठक घेतली. बैठकीला महापालिकेचे मुख्य शहर अभियंता अनिरुद्ध पावसकर, महावितरणच्या कोथरुड विभागाचे कार्यकारी अभियंता गणेश सामसे, अतिरिक्त कार्यकारी अभियंता विष्णू माने, हितेंद्र भिरूड, रोहन बिल्डर्सचे प्रतिनिधी ॲड. सावनकुमार कानडे, भाजप कोथरुड मंडल दक्षिणचे माजी अध्यक्ष डॉ. संदीप बुटाला आदी उपस्थित होते.

कोथरुडमध्ये उभ्या राहत असलेल्या नवीन मोठ्या सोसायट्या आणि इमारतींमुळे अनेक भागांतील विजेची मागणी मोठ्या प्रमाणात वाढत आहे. त्यामुळे जुन्या ट्रान्सफॉर्मर आणि वीजवाहिन्यांवर अतिरिक्त ताण येऊन जुन्या वस्त्यांमध्ये व्होल्टेज कमी-जास्त होणे, तसेच वारंवार वीजपुरवठा खंडित होणे अशा समस्या निर्माण होत आहेत. सुतारदरा परिसरातही गेल्या काही काळापासून नागरिकांना अशाच गंभीर अडचणींचा सामना करावा लागत आहे.

या पार्श्वभूमीवर सुतारदरा, शिवतीर्थनगर, पेठकर साम्राज्य आदी भागातील अतिरिक्त भार कमी करण्यासाठी महावितरणने नवीन ट्रान्सफॉर्मर उभारण्याचा निश्चित केले आहे. मात्र, प्रस्तावित जागा खासगी विकासकाच्या ताब्यात असल्याने तांत्रिक अडचणी येत होत्या. त्यामुळे सदर विषयावर मार्ग काढण्यासाठी आणि महावितरणला तातडीने जागा उपलब्ध व्हावी, यासाठी ना. पाटील यांची आज उच्चस्तरिय बैठक घेतली.

या बैठकीत ना. पाटील यांनी मुख्य शहर अभियंता अनिरुद्ध पावसकर यांना विकासकाचे म्हणणे जाणून घेऊन तांत्रिक अडचणी तात्काळ दूर कराव्यात, आणि जागा महावितरणला उपलब्ध करून देण्याचे निर्देश दिले. तसेच, महावितरणच्या अधिकाऱ्यांना सर्व प्रक्रिया प्राधान्याने आणि जलदगतीने पूर्ण करण्याच्या सूचना दिल्या.

नवीन ट्रान्सफॉर्मर कार्यान्वित झाल्यानंतर सुतारदरा आणि परिसरातील विजेवरील ताण कमी होणार असून, वारंवार होणारे ट्रिपिंग आणि भारनियमनाच्या समस्येतून नागरिकांना मोठा दिलासा मिळणार आहे. महावितरणने या कामाचे नियोजन तातडीने सुरू केले असून, लवकरच काम पूर्ण करण्यात येईल, अशी माहिती अधिकाऱ्यांनी बैठकीत दिली.

पुणे : प्रवासी आणि स्थानिक रहिवासी यांना पार्किंग आणि वाहतूक या प्रश्नांना सामोरे जावे लागते. त्यावर महिनाभरात ठोस मार्ग काढण्यात येईल, असे आमदार सिद्धार्थ शिरोळे यांनी आज (रविवारी) प्रसारमाध्यमांना सांगितले.

छत्रपती शिवाजीनगर रेल्वे स्टेशनला आमदार शिरोळे यांनी भेट देत स्टेशन परिसरातील विविध समस्यांचा आढावा घेतला. विशेषतः पार्किंगची समस्या असून प्रवासी, स्थानिक नागरिक आणि वाहतूक व्यवस्थेला त्याचा मोठा त्रास सहन करावा लागत आहे. या प्रश्नावर त्यांनी स्टेशन व्यवस्थापक धनंजयजी सदानंद चंद्रात्रे यांच्याशी सविस्तर चर्चा केली. पार्किंगच्या प्रश्नावर तातडीने उपाययोजना करण्याबाबत सकारात्मक निर्णय झाला असून, येत्या एका महिन्यात ही समस्या मार्गी लावण्यासाठी आवश्यक कार्यवाही करण्यात येणार आहे, असे आमदार शिरोळे यांनी सांगितले.

तसेच स्वच्छता, प्रवाशांसाठी आवश्यक सुविधांबाबतही चर्चा झाली. वाढत्या प्रवासी संख्येनुसार छत्रपती शिवाजीनगर रेल्वे स्टेशन अधिक स्वच्छ, सुस्थित आणि सर्व सुविधांनी सुसज्ज करण्यासाठी संबंधित विभागांशी समन्वय साधून पाठपुरावा केला जाईल, असे आश्वासन आमदार शिरोळे यांनी स्थानिक नागरिकांना दिले.

निसर्गातील अव्यक्त भावभावनांचे ‘प्रतिबिंब’

पुणे : वन्यजीव, पक्षी, विहंगम निसर्गदृश्ये या विषयी शब्दातून व्यक्त न करता येणाऱ्या भावभावना प्रकाशचित्रांच्या माध्यमातून रसिकांना अनुभवता येणार आहेत. निमित्त आहे ते ‘प्रतिबिंब’ या प्रकाशचित्रांच्या प्रदर्शनाचे!

व्यवसाय सांभाळून निसर्गाचे ‘प्रतिबिंब’ टिपणाऱ्या १३ गुणी हौशी कलाकारांच्या कलाकृतींच्या प्रदर्शनाला रविवारी (दि. २४) बालगंधर्व कलादालनात सुरुवात झाली. ‘सुखी पांडा’, ‘देहम नेचरक्युअर’, ‘डिस्कव्हर नेचर’ आणि ‘शांतीवन, पाचगणी’ यांच्या संयुक्त विद्यमाने ‘प्रतिबिंब’चे आयोजन करण्यात आले आहे. प्रदर्शनाचे यंदाचे दुसरे वर्ष असून अमर अतितकर, अमेय वाळवेकर, ओंकार मुळगुंद, शंतनू अंबुळगेकर, शिवयोगी कंठी, नूतन खेडेकर, व्यंकटेशन कालवै, समीर अय्यर, विश्वेश बेहेरे, अनंतप्रसाद देशपांडे, आमोद फडके, भुपिंदर रंधावा आणि सागर मुथा यांच्या १३० कलाकृती या प्रर्दशनात पाहता येणार आहेत. प्रदर्शन दि. २६ मेपर्यंत सकाळी १०:०० ते रात्री ८:०० या कालावधीत सर्वांसाठी खुले आहे.

प्रदर्शनाचे उद्घाटन प्रसिद्ध व ज्येष्ठ प्रकाशचित्रकार सतीश पाकणीकर यांच्या हस्ते झाले. या वेळी ज्येष्ठ प्रकाशचित्रकार सुधीर हसमनीस, सुरतवाला बिझनेस ग्रुपचे संचालक जतिन सुरतवाला, आर्किटेक्ट हैतवी सुरतवाला, डिस्कव्हर नेचरचे संचालक अनंतप्रसाद देशपांडे, शांतीवनचे संचालक प्रदीप कामत, केदार दंडगे, समीर चाफेकर आदी उपस्थित होते.

सतीश पाकणीकर म्हणाले, निसर्गातील अद्‌भुत क्षण टिपून ते रसिकांपर्यंत पोहोचविणे मनाला समाधान देणारे असते. कृत्रिम बुद्धिमत्तेच्या युगात स्वत: काढलेल्या प्रकाशचित्रांच्या स्वामित्व हक्काबाबत प्रत्येकाने जागरूक राहा असा सल्लाही त्यांनी दिला.

जतिन सुरतवाला उपक्रमाचे कौतुक करून म्हणाले निसर्ग किती सुंदर आहे हे येथे मांडण्यात आलेल्या कलाकृतींमधून दिसून येत आहे. सुधीर हसमनीस, हैतवी सुरतवाला यांनी मनोगत व्यक्त केले. प्रिया मुळगुंद यांनी सूत्रसंचालन केले.

‘प्रतिबिंब’ प्रदर्शनाच्या निमित्ताने सोमवारी (दि. २५) सायंकाळी ६:३० वाजता ‘फोटोग्राफी संवाद, अनुभव चर्चा आणि गप्पा’ असा कार्यक्रम सुधीर हसमनीस यांच्या समवेत आयोजित करण्यात आला आहे. तर मंगळवारी (दि. २६) सायंकाळी ५ वाजता राहुल गोळे यांच्याकडून ‘लेन्समागच्या गोष्टी’ ऐकता येणार आहेत.