पुणे
”आजूबाजूंच्या व्यक्तींचे बारकाईने निरीक्षण करणे हेच अभिनय करणाऱ्या कलाकारांचे सर्वात महत्वाचे काम असते. कारण अभिनय कसा करावा ते शिकविता येता नाही. भावनाशील अभिनय हा मुळात आतूनच यावा लागतो. माझ्या दृष्टीने माझा प्रत्येक चित्रपट हा नवा अनुभव असतो” असे मत ज्येष्ठ अभिनेत्री तनुजा मुखर्जी यांनी शुक्रवारी पुण्यात व्यक्त केले. गुरुवारपासून सुरु झालेल्या तेराव्या पुणे आंतरराष्ट्रीय चित्रपट महोत्सवात सुप्रसिद्ध अभिनेत्री तनुजा मुखर्जी यांचा मुख्यमंत्री देवेंद्र फडणवीस यांच्या हस्ते ‘पिफ विशेष गौरव सन्मान २०१५’ प्रदान करण्यात आला त्यानिमित्त आज (शुक्रवारी) पत्रकारांशी वार्तालाप करताना अभिनेत्री तनुजा मुखर्जी यांनी सांगितले की, अभिनय हा कधीच बदलत नसतो. बदलत असते ते सादरीकरण. कारण अभिनय हा मुळातच यावा लागतो. चित्रपटसृष्टीत काम करताना ‘कैमेऱ्यालाच मी मित्र मानले त्यामुळे मी यशस्वी अभिनेत्री होऊ शकले. प्रारंभी पुणे आंतरराष्ट्रीय चित्रपट महोत्सवाचे चेअरमन डॉ. जब्बार पटेल यांनी त्यांचे हार्दिक स्वागत केले.
आपल्या चुलबुल्या भूमिकेसाठी प्रसिद्ध असलेल्या आणि अभिनयाचे ‘समर्थ’ घराणे लाभलेल्या तनुजा मुखर्जी म्हणाल्या की माझे घराणे जरी पहिल्यापासून चित्रपटसृष्टीत होते तरी माझ्या कारकिर्दीला त्याची फार मोठी मदत झाली असे मुळीच नाही कारण मी आधी माझे शिक्षण पूर्ण करावे असा माझ्या आईचा आग्रह होता. मला मराठीसह, गुजराती, बंगाली, मल्याळम, इंग्रजी आदी अनेक भाषा येतात हे त्याचेच एक कारण आहे असेही त्यांनी सांगितले. मी माझ्या भूमिका पारखूनच स्वीकारल्या आणि दिग्दर्शक सांगेल त्याप्रमाणेच भूमिका केल्या असे सांगून त्यांनी आपण मधुबाला, मीनाकुमारी यांच्या सारख्या अभिनेत्रींचे चाहते होते तसेच दिलीपकुमार, किशोरकुमार यांच्यासारखे अलौकिक अभिनेते हे आपले आदर्श होते असे सांगितले. आपली कन्या असलेली सध्याची आघाडीची अभिनेत्री काजोल ही देखील अतिशय ‘समर्थ’ अभिनेत्री असल्याचे त्यांनी आवर्जून सांगितले.
चित्रपट हे प्रामुख्याने मनोरंजनाचे साधन असले तरी जो चित्रपट सामाजिक संदेश देतो तो मी चांगला मानते असे सांगून तनुजा मुखर्जी पुढे म्हणाल्या की कालच्या आणि आजच्या चित्रपटसृष्टीत फारसा काही फरक आहे असे मला वाटत नाही बदल घडला आहे तो फक्त तंत्रज्ञानातील फरकांमुळे. मात्र हा बदल खूप चकित करणारा आहे असेही त्यांनी सांगितले. दूरचित्रवाणीवरील मालिकांमध्ये कोणत्याही समस्यांवर तोडगा सांगितला जात नाही त्यामुळे माझ्या दृष्टीने त्या मालिकां निरर्थक आहेत असेही त्यांनी एका प्रश्नाला उत्तर देताना सांगितले.

पुणे,
” चित्रपटसृष्टीत येण्यापूर्वी मला नाट्यसृष्टीचीही पार्श्वभूमी नव्हती. महाविद्यालयात तर मी ‘नटखट’ विद्यार्थी म्हणून मशहूर होतो मात्र काहीतरी करून दाखवायचे ही जिद्द होती शिवाय त्यावेळी मी प्रसिद्ध अभिनेते ‘राज कपूर यांचा ‘दिवाना’ होतो त्यामुळे मी पुण्यातील फिल्म इंन्सिट्युटमध्ये प्रशिक्षण घेण्यासाठी आलो आणि संघर्ष करीत करीत आजपर्यंत चित्रपटसृष्टीत उभा आहे ” या शब्दात सुप्रसिद्ध अभिनेते शत्रुघ्न सिन्हा यांनी आपल्या जीवनप्रवास उलगडून दाखविला. विशेष म्हणजे ‘कालीचरण’ चित्रपटाद्वारे शत्रुघ्न सिंहा यांना चित्रपटसृष्टीत ‘नायक’ म्हणून ब्रेक देणारे प्रसिद्ध निर्माते सुभाष घई हेही याप्रसंगी उपस्थित होते त्यांनीही अधूनमधून शत्रुघ्न सिन्हा यांच्या आठवणींना उजाळा दिला. गुरुवारपासून सुरु झालेल्या तेराव्या पुणे आंतरराष्ट्रीय चित्रपट महोत्सवात सुप्रसिद्ध अभिनेते खासदार शत्रुघ्न सिन्हा यांचा मुख्यमंत्र्यांच्या हस्ते ‘पिफ विशेष गौरव सन्मान २०१५’ प्रदान करण्यात आला त्यानिमित्त आज (शुक्रवारी) पत्रकारांशी वार्तालाप करताना शत्रुघ्न सिन्हा यांनी आपल्या जीवन प्रवासाची अनेक वैशिष्ठ्ये सांगितली. प्रारंभी पुणे आंतरराष्ट्रीय चित्रपट महोत्सवाचे चेअरमन डॉ. जब्बार पटेल यांनी त्यांचे हार्दिक स्वागत केले.
पुण्यातील फिल्म इंन्सिट्युटमध्ये प्रशिक्षण घेत असताना मला बरेच काही शिकायला मिळाले असे सांगून शत्रुघ्न सिन्हा म्हणाले, त्यामुळेच मी माझा गौरव पुरस्कार फिल्म इंन्सिट्युटला अर्पण केला आहे . फिल्म इंन्सिट्युटमध्ये प्रशिक्षण घेत असताना माझा आवाज आजच्यासारखा खर्जातील नव्हता मात्र मी प्रयत्न करून माझ्या आवाजात सुधारणा केली जेणेकरून नंतर माझा ‘आवाज’ हेच माझ्या कामाचे एक वैशिष्ठ्य बनले. कलाकाराजवळ नुसती बुद्धिमत्ता असून चालत नाही त्यासाठी प्रशिक्षणही आवश्यक असते आणि ते मिळाल्यानंतर आणखी सुधारणा होण्यासाठी ‘रियाज’ही महत्वाचा असतो असे त्यांनी सांगितले. कलाकाराला मिळालेली भूमिका आणि त्या भूमिकेसाठी त्या कलाकाराने घेतलेले परिश्रम याचा योग्य मिलाफ झाला तरच तो कलाकार यशस्वी होऊ शकतो असेही त्यांनी एका प्रश्नाला उत्तर देताना सांगितले. स्वत:ला कलाकार म्हणून सिद्ध करताना सर्वोत्कृष्ट दर्जा ठेवा किंवा स्वत:चे वेगळेपण तरी जपा असाही कानमंत्र त्यांनी यावेळी नवोदित कलाकारांना दिला.
नेता आणि अभिनेता यांच्यातील फरक विशद करताना ते म्हणाले चित्रपटसृष्टीत ‘ग्लैमर’ आहे तर राजकारणात ‘पॉवर’ (सत्ता) आहे. आपल्या हातून सामान्य जनतेचे भले यावे या शुद्ध हेतूनेच आपण राजकारणात आलो असेही त्यांनी सांगितले. उत्तर प्रदेश फिल्म डेव्हलपमेंट कोर्पोरेशन चे चेअरमन असताना आपण तेथील चित्रपटसृष्टीचा सर्वांगीण विकास होण्यासाठी कसे प्रयत्न केले याचीही त्यांनी माहिती दिली. तर चित्रपटसृष्टीला ‘इंडस्ट्रीज’चा दर्जा देण्यासाठी शत्रुघ्न सिन्हा यांनी फार मोलाची मदत केली अशी पावती सुभाष घई यांनी यावेळी दिली. याप्रसंगी सुभाष घई यांनी ‘कालीचरण’ चित्रपटामागच्या अनेक गोष्टी सांगून शत्रुघ्न सिन्हा दोन-तीन पानांच्या ‘डॉयलौग डिलीव्हीरीतही’ कसे तरबेज होते व ते त्यासाठी कसे परिश्रम घ्यायचे याची आठवण सांगितली.

मैत्री.. प्रेम.. या पलीकडे तरुणांचे नातेसंबंध, लाईफस्टाईल, वेगवान आयुष्याबद्दलचे त्यांचे विचार आजच्या काळाप्रमाणे झपाट्याने बदलत चाललेत. तरुणाईचा हाच जोश, सळसळता उत्साह ‘मुव्हिंग पिक्चर्स’ प्रस्तुत नितीन तेज अहुजा, अशोक भूषण निर्मित ‘साटं लोटं’ या आगामी मराठी चित्रपटात पहायला मिळणार आहे. मराठीत उत्तोमोत्तम कलाकृती सादर करणाऱ्या श्रावणी देवधर यांच्या दिग्दर्शनाची कमाल बऱ्याच अवधीनंतर पुन्हा नव्याने अनुभवायला मिळणार आहे.

नुकताच चित्रपटाच्या ट्रेलरची आणि गाण्यांची खास झलक मुंबईत आयोजित सोहळ्यादरम्यान दाखवण्यात आली. चित्रपटाच्या टीमसमवेत हिंदी-मराठी चित्रपटसृष्टीतील असंख्य मान्यवर या प्रसंगी आवर्जून उपस्थित होते. निर्माते-दिग्दर्शक-अभिनेते महेश मांजरेकर, महेश कोठारे, दिग्दर्शक चंद्रकांत कुलकर्णी, गायक-संगीतकार शंकर महादेवन, चित्रपट महामंडळाचे अध्यक्ष विजय पाटकर, लेखक – श्रीरंग गोडबोले, कलाकार मकरंद देशपांडे, श्रेयस तळपदे, यतीने कार्येकर, प्रतीक्षा लोणकर, सुनील बर्वे, जयंत वाडकर, हेमंत ढोमे, क्षमा राज, सुकन्या कुलकर्णी, गिरीजा ओक, क्षिती जोग, दिपाली सय्यद, मानसी नाईक, नृत्यदिग्दर्शक फुलवा खामकर, उमेश जाधव.. यांनी या प्रसंगी हजेरी लावली.

‘थॉटरेन एंटरटेन्मेंट’चे सई देवधर-आनंद आणि शक्ती आनंद सहनिर्मित फन, रोमान्स आणि फुल्ल ऑफ ड्रामा असलेल्या ‘साटं लोटं’ या चित्रपटाचं फर्स्ट लूक लॉंचही हटके होतं. पुष्कर श्रोत्री, आदिनाथ कोठारे, सिद्धार्थ चांदेकर, मृण्मयी देशपांडे, पूजा सावंत या युथफुल कलाकारांनी गमतीदार स्कीट सादर करत कार्यक्रमाचे धमाल सूत्रसंचलन केले.

आपल्या अफलातून अभिनयाने मकरंद अनासपुरे, पुष्कर श्रोत्री, आदिनाथ कोठारे, सिद्धार्थ चांदेकर, मृण्मयी देशपांडे, पूजा सावंत, नागेश भोसले, मालिनी डे यांनी चित्रपटात धमाल उडवून दिली आहे. ‘साटं लोटं’ ची खळखळून हसवणारी कथा श्रावणी देवधर यांनी लिहिली असून खुमासदार पटकथा- संवाद शिरीष लाटकर यांनी लिहिलेत. श्रीरंग गोडबोले लिखित यातील गीतांना युवा संगीतकार सिद्धार्थ महादेवन व सौमिल शृंगारपुरे यांनी सुरेल संगीत दिलंय. चित्रपटाचे छायांकन राहुल जाधव यांनी केलंय. फ्रेश लूक, उत्तम कथानक, वास्तवदर्शी मांडणी, नेटकं दिग्दर्शन, कलाकारांचा सहज सुंदर अभिनय जोडीला अत्याधुनिक तंत्रज्ञांची साथ असलेला ‘साटं लोटं’ २० फेब्रुवारीला महाराष्ट्रात सर्वत्र प्रदर्शित होणार आहे.

पुणे – ‘बॉलिवूडसह राज्यातील चित्रनगरी ही महाराष्ट्राची सांस्कृतिक ओळख आहे. त्यांना अधिक समृद्ध करण्यासाठी सरकार प्रयत्न करणार असून, आधुनिक पायाभूत सुविधा आणि तंत्रज्ञान उपलब्ध करून दिले जाईल. यामुळे सर्व प्रकाराच्या चित्रपटांची निर्मिती तेथे होऊ शकेल आणि या चित्रनगरी जगाच्या आकर्षणाचे केंद्र बनतील,‘‘ अशी घोषणा मुख्यमंत्री देवेंद्र फडणवीस यांनी आज येथे केली.
कोथरूड येथील सिटी प्राइड चित्रपटगृहात “तेराव्या पुणे आंतरराष्ट्रीय चित्रपट महोत्सवा‘चे (पिफ) उद्‌घाटन फडणवीस यांच्या हस्ते झाले. त्या वेळी ते बोलत होते. सांस्कृतिक मंत्री विनोद तावडे, केंद्रीय पर्यावरण मंत्री प्रकाश जावडेकर, पालकमंत्री गिरीश बापट, राज्यमंत्री दिलीप कांबळे, पुण्याचे महापौर दत्तात्रेय धनकवडे, पिंपरी चिंचवडच्या महापौर शकुंतला धराडे, महोत्सवाचे संचालक डॉ. जब्बार पटेल आदी व्यासपीठावर उपस्थित होते.
फडणवीस म्हणाले, “”पुणे आंतरराष्ट्रीय चित्रपट महोत्सवाने यंदा “युद्धाविरुद्ध युद्ध‘ हा चपखल विषय निवडला आहे. जगात मानवतेशी युद्ध सुरू आहे. त्याचा मुकाबला केवळ संस्कृतीची आदान-प्रदान करूनच होऊ शकतो. त्यासाठी चित्रपट हे प्रभावी माध्यम असून, भारतीय सिनेमाही आमचा सांस्कृतिक राजदूत आहे.‘‘ ज्येष्ठ कवी ना. धों. महानोर, अभिनेते शत्रुघ्न सिन्हा आणि अभिनेत्री तनुजा यांनी चित्रपटसृष्टीला दिलेल्या योगदानाबद्दल त्यांचा मुख्यमंत्री फडणवीस यांच्या हस्ते गौरव करण्यात आला. ‘या सन्मानामुळे मराठी शेतकरी कवी “इंटरनॅशनल‘ झाला आहे. या पुढेही मी मराठी चित्रपटसृष्टीला कवितेतून नवे आकाश देत राहीन,‘‘ अशा शब्दांत महानोर यांनी भावना व्यक्त केल्या. शत्रुघ्न सिन्हा यांनी त्यांचा सन्मान हा त्यांनी शिक्षण घेतलेल्या पुण्यातील फिल्म इन्स्टिट्यूटला अर्पण केला.
डॉ. जब्बार पटेल यांनी प्रास्ताविक करताना, या चित्रपट महोत्सवाचा निधी वाढविण्याची तसेच, परदेशी चित्रपटांना भारतात आणण्यासाठी वा चित्रीकरणासाठी वेगवेगळ्या परवानगी घ्याव्या लागतात, असे सांगितले. त्यासाठी एक खिडकी योजना सुरू करण्याची मागणी केली. त्यावर मुख्यमंत्री फडणवीस म्हणाले, ‘चित्रपट क्षेत्र हा उद्योग असल्याने परदेशी असो वा देशी, त्यासाठी लागणाऱ्या परवानगी एकाच ठिकाणी मिळण्यासाठी आम्ही यंत्रणा तयार करीत आहोत. पुढील चित्रपट महोत्सवापर्यंत “एक खिडकी‘ योजना सुरू झालेली असेल.‘‘

ओपन स्टेज, रोषणाईने उजळलेला रंगमंच, भरगच्च प्रेक्षागृह, तबल्यापासून गिटारपर्यंत विविध इंडो-वेस्टर्न म्युझिक इन्स्ट्यूमेन्टसच्या सुरांनी भारलेला आसमंत.. प्रचंड हल्लकल्लोळ माजवणारी.. एकाच ताला-सुरात मग्न होऊन धुंदीत गाणारी-नाचणारी तरुणाई आणि त्यांना आपल्या सुरावटींवर-भेदक तानांवर लक्ष एकवटवणारा ‘एक तारा’. सामान्यतः हे चित्र म्युझिक कॉनसर्टसचं. तरुणाईच्या गळ्यातले ताईत असणारे हे तारे.. त्यांचे स्टारडम, त्यांची एक झलक पाहण्याकरिताही खूप आसुसलेले असतात. रसिकांना मंत्रमुग्ध करणाऱ्या या ताऱ्यांचा-कलाकारांचा इथवरचा प्रवास हा जितका सहजसोपा दिसतो, ज्यावर तरुणाई भुलते तो खरंच तितका सरळसोपा असतो का..? या यशामागे, ग्लॅमरमागेखरंच काय दडलंय..? असण्यापासून दिसण्यापर्यंतची त्यांची धडपड.. या सगळ्या पडद्यामागील गोष्टींचा उहापोह ‘एक तारा’ या चित्रपटाद्वारे गायक – संगीतकार – दिग्दर्शक अवधूत गुप्ते यांच्या दृष्टीकोनातून रेखाटला गेला आहे.

३०
रईस लष्करिया निर्मित आणि अवधूत गुप्ते दिग्दर्शित महत्वाकांक्षी चित्रपट ‘एक तारा’ जानेवारीला चित्रपटगृहात दाखल होत आहे. चित्रपटाची उत्सुकता लक्षात घेता प्रदर्शनाआधी चित्रपटाच्या संगीत अनावरणाचा दिमाखदार सोहळा मुंबईत आयोजित करण्यात आला होता. हिंदी-मराठी चित्रपटसृष्टीतील नामवंत कलाकारांची या सोहळ्याला असलेली उपस्तिथी लक्षवेधी ठरली. शिवसेनेचे आमदार प्रताप सरनाईक, अस्लम लष्करीया, अभिनेता रितेश देशमुख, बॉलीवूडमधील प्रसिद्ध संगीतकार साजिद-वाजीद, निर्माते-दिग्दर्शक-अभिनेते सचिन पिळगांवकर, महेश मांजरेकर, मकरंद देशपांडे, ज्येष्ठ गायक सुरेश वाडकर तसेच चित्रपटाची टीम आणि असंख्य मान्यवरांच्या उपस्थितीत हा नयनरम्य सोहळा रंगला.

रईस ल्ष्करिया प्रोडक्शन्सने स्वराज्य.. मराठी पाऊल पडते पुढे! या दर्जेदार मराठी चित्रपटाद्वारा मराठी चित्रपटसृष्टीत दमदार पाऊल टाकले. स्वराज्य नंतर एक तारा आणि तो येतो या दोन आगामी चित्रपटांची घोषणा करत त्यांनी मराठीत चित्रपटसृष्टीत आपले पाय भक्कमपणे रोवण्यास सुरुवात केली आहे असं म्हटलं वावगं ठरणार नाही. या सोहळ्यादरम्यान आपल्या पहिल्या आणि आगामी चित्रपटांचा ट्रेलर दाखवून रईस ल्ष्करीया प्रॉडक्शनचा दर्जेदार कलाकृती सादर करण्याचा मनसुबा व्यक्त केला.

अवधूत गुप्तेंचा चित्रपट म्हणजे संगीतमय पर्वणीच! ‘एक तारा’ हा संगीतप्रधान चित्रपट असल्यामुळे यातील गाण्यांची गंमतच न्यारी आहे. तब्बल १३ गाण्यांचा रसस्वाद ‘एक तारा’मधून रसिकप्रेक्षकांसोबतच कानसेनानांही घेता येणार आहे. गीतकार गुरु ठाकूर यांनी ‘एक तारा’साठी लिहिलेली वेगवेगळ्या बाजाच्या गीतांना अवधूत गुप्तेंनी आपल्या संगीताच्या लहरींनी स्वरसाज चढवून न्याय तर दिलाच पण आपल्याकडूनही चत्रुस्र गीतलेखन करून घेतल्याबद्दल आभार मानले. या रम्यवेळी अवधूत गुप्ते, ज्ञानेश्वर मेश्राम, मुग्धा कऱ्हाडे तसेच बालगायक विदित पाटणकर यांचे स्वर उपस्थितीत कलाकार-तंत्रज्ञांच्या पसंतीस उतरले. गायकांच्या पर्फोर्मन्सनी साऱ्यांची मनमुराद दादही मिळवली.

तरुणांच्या आवडी-निवडी जपत.. बोली शब्दांची योग्य सांगड घालत, ओठी रुळणारी ‘जिंदगी हे झाड’, ‘ठोक साला’, ‘विसर तू (रॉक)’, ‘हर काश में’, ही वेड लावणारी गुरु ठाकूरची गीते तर अवधूत गुप्तेंच्या लेखणीतून ‘येड लागलं’, ‘देवा तुझ्या नावाचं येड लागलं’, ही दोन भक्तिमय गीतं खरोखरीच उत्तमरीत्या सांधली गेलीयेत. तसेच ‘वाली तू लेकरांचा’, ‘जय जय रामकृष्ण हरी’, ‘चालते नाणे’ आणि ‘अर्ध्या हळकुंडानं’ हे मॉडन भारुडही खासचं जमून आलंय. चित्रपटातील गाण्यांच्या बाजाप्रमाणे सुरेश वाडकर, स्वप्निल बांदोडकर, ज्ञानेश्वर मेश्राम, विदित पाटणकर, मुग्धा कऱ्हाडे आणि अवधूत गुप्ते या कसलेल्या गायकांकडून त्यांच्या सुरेल स्वरात गाऊन घेतली आहेत. तसेच अवधूत गुप्तेंच्या मैत्रीखातर दिग्दर्शक अभिजीत पानसे आणि साउंड रेकॉर्डीस्ट अवधूत वाडकर यांनीही आपल्या आवाजाची कमाल आजमावली आहे.

संतोष जुवेकर, तेजस्विनी पंडित, उर्मिला निंबाळकर, सागर करंडे, सुनील तावडे, मंगेश देसाई आणि चैतन्य चंद्रात्रे यांच्या प्रमुख भूमिका असलेल्या ‘एक तारा’ ची कथा लिहिली आहे अवधूत गुप्ते, सचिन दरेकर यांनी तर पटकथा-संवाद सचिन दरेकर यांचे आहेत. सादिक लष्करीया, विशाल घाग सहनिर्मित विशाल देवरुखकर यांचे सहदिग्दर्शन लाभलेल्या ‘एक तारा’चं छायांकन अमलेंदू चौधरी यांचे असून शैलेश महाडिक कला दिग्दर्शक आहेत. संकलक इम्रान महाडिक, फैझल महाडिक तर वेशभूषा अश्विनी कोचरेकर यांनी केली आहे.

ठाणे : मराठी नाटक आणि चित्रपट अभिनेत्री सुप्रिया पाठारे यांनी खळबळजनक आरोप केला आहे. “एका निर्मात्याने मला तीन महिने ‘कैद’मध्ये ठेवलं होतं. मात्र दिवंगत शिवसेना प्रमुख बाळासाहेब ठाकरे यांच्या हस्तक्षेपानंतर माझी सुटका झाली,” असा दावा सुप्रिया यांनी केला आहे.

ठाण्यात आयोजित केलेल्या ‘महिला सुरक्षा परिसंवाद’ला संबोधित करताना सुप्रिया पाठारे यांनी हा आरोप केला. “1995 मध्ये एक निर्माता सिनेमाच्या शूटिंगच्या निमित्ताने मला राजस्थानला घेऊन गेला आणि तिथे तीन महिने ‘कैद’ केलं,” असं पाठारे यांनी सांगितलं. मात्र त्यांनी निर्मात्याचं नाव आणि घटनास्थळाचा नेमका पत्ता याचा खुलासा केला नाही.सुप्रिया पाठारे यांनी सांगितलं की, “शूटिंसाठी मी इथली एकटीच होते. पुढील तीन महिने निर्मात्याने बंदुकीच्या धाकावर माझ्याकडून अभिनय करवून घेतला. मला तिथल्याच परिसरात डांबलं होतं. मात्र माझ्या कुटुंबियांशी फोनवरुन संवाद साधण्याची परवानी त्याने दिली होती.””मराठीत बोलू नको, असा दम निर्माता देत असे. पण मी कसंतरी बहिणीला गुप्त भाषेत माझ्या परिस्थितीची माहिती दिली. त्यानंतर मुंबईत असलेल्या माझ्या कुटुंबियांनी शिवसेनाप्रमुखांकडे मदतीची विनंती केली. यानंतर बाळासाहेबांच्या सांगण्यावरुन राजस्थान पोलिसांनी या प्रकरणाचा तपास केला.””एक दिवस राजस्थान पोलिसांतील 50 शिपाई माझ्या शोधासाठी आले आणि माझी सुटका केली. त्यानंतर मला कळलं की बाळासाहेबांनी या प्रकरणात लक्ष घातलं होतं. 20 तासांचा प्रवास करुन मी सुरतला पोहोचले आणि यावेळी माझ्याकडे अवघे 12 रुपये शिल्लक राहिले होते. पण सुखरुप सुटकेसाठी मी आयुष्यभर बाळासाहेबांची ऋणी राहिन,” असं सुप्रिया पाठारे यांनी सांगितलं.