पुणे – ‘वैद्यकीय विम्याची कॅशलेस सुविधा बंद करण्याचे कोणतेही आदेश दिले नाहीत; उलट ही सुविधा जास्तीत जास्त लोकांपर्यंत पोचावी, असाच प्रयत्न आहे,‘‘ असे “विमा नियामक आणि विकास प्राधिकरण‘चे (आयआरडीए) उपसंचालक डॉ. एन. एम. मेहेरा यांनी स्पष्ट केले.
पुणे आणि पिंपरी- चिंचवडमधील वैयक्तिक वैद्यकीय विम्याची कॅशलेस सुविधा एक डिसेंबरपासून बंद करण्यात आली आहे. त्याच वेळी कार्पोरेटची वैद्यकीय सुविधा सुरू ठेवण्याची सूचना सार्वजनिक क्षेत्रातील चार विमा कंपन्यांनी रुग्णालयांना ई-मेलद्वारे केली आहे. या पार्श्वभूमीवर “सजग नागरिक मंच‘च्या विवेक वेलणकर यांनी रुग्णालय आणि विमा कंपन्या यांच्या वादात रुग्णांची गैरसोय होत असल्याचे “आयआरडीए‘ यांना कळविले. वेलणकर यांनी पाठविलेल्या ई-मेलची “आयआरडीए‘ने तातडीने दखल घेतली.
वेलणकर यांच्या मेलला उत्तर देताना मेहरा यांनी नमूद केले की, ‘वैद्यकीय विम्याची कॅशलेस सुविधा बंद करण्यात आलेली नाही. उलट, ग्राहकांचे हित लक्षात घेऊन कॅशलेस सुविधा वाढविण्यासाठी “आयआरडीए‘ प्रोत्साहन देत आहे.‘ विमा कंपन्यांनी कॅशलेस सुविधा नाकारल्याचे कोणते प्रकरण असल्यास त्यांनी आमच्याशी संपर्क साधावा, असे आवाहन त्यांनी केले आहे.