पुणे – ‘गरिबांना कमी किमतीतील घरे देण्यासाठी ‘क्रेडाई’ने पुढाकार घ्यावा,’’ असे आवाहन केंद्रीय पर्यावरणमंत्री प्रकाश जावडेकर यांनी गुरुवारी पुण्यात केले. घरे विकत घेणाऱ्या गरिबांची फसवणूक टाळण्यासाठी उपाय आखले पाहिजेत, असेही ते म्हणाले.
‘क्रेडाई’च्या पुणे मेट्रोतर्फे भरविण्यात येणाऱ्या पंधराव्या ‘दी ग्रॅण्ड पुणे प्रॉपर्टी’ प्रदर्शनाचे अनौपचारीक उद्घाटन जावडेकर यांच्या हस्ते झाले. ‘क्रेडाई’चे (पुणे मेट्रो) अध्यक्ष हेमंत नाईकनवरे, उपाध्यक्ष श्रीकांत परांजपे, शांतिलाल कटारिया, अनुज भंडारी आदी उपस्थित होते. एसएसपीएमएस मैदानावर रविवारपर्यंत (ता. ११) सकाळी दहा ते रात्री आठ या वेळेत हे प्रदर्शन खुले आहे.
जावडेकर म्हणाले, ‘विश्वास हा ग्राहकांचा अधिकार असून, तो या प्रदर्शनातून लोकांना मिळतो. देशातील गरीब जनतेने सरकारवर मोठा विश्वास दाखविला आहे. त्याच्या जाणिवेतून सात वर्षांत त्यांना मोठ्या प्रमाणात घरे देण्यात येणार आहेत. घरांसाठी लोक पैसे भरायला तयार असतात. मात्र, त्यांच्या आवाक्यातील मुख्यत: चतुर्थश्रेणी कामगारांना घरे उपलब्ध होत नाहीत. त्यामुळे ते घरांपासून लांब राहण्याची शक्यता असते. त्यामुळे त्यांना केंद्रस्थानी ठेवून नवे गृहप्रकल्प उभारण्यासाठी प्रयत्न केले पाहिजेत. गैरव्यवहार करणाऱ्या व्यावसायिकांमुळे लोकांची फसवणूक होण्याची भीती असते. ती आता थांबली पाहिजे. त्यासाठीही ‘क्रेडाई’ने पुढे येण्याची गरज आहे.’’बांधकामासंदर्भातील सर्व बाबी तपासूनच आणि अटींची पूर्तता केल्याशिवाय पर्यावरण विभाग परवानगीस मंजुरी देत नाही. व्यवसायिकांच्या अडचणी सोडविण्यासाठी प्रयत्न होतील. गरिबांसाठी घरे देण्यासाठी एकत्रित प्रयत्न झाले पाहिजेत. खुल्या प्रॉपर्टी’ प्रदर्शनामुळे घरे घेण्याचा निर्णय लोकांना तातडीने घेता येतो,’’ असेही जावडेकर म्हणाले. नाईकनवरे यांनी प्रदर्शनाच्या आयोजनाची माहिती दिली. परांजपे यांनी आभार मानले.
पुण्यात मोठे गृहप्रकल्प उभे राहात असले तरी, सध्याच्या घडीला ‘वन बीएचके’ फ्लॅटचे प्रमाण कमी झालेले आहे. या फ्लॅटला मोठी मागणी असूनही पुरवठा होत नाही. त्यामुळे भविष्यात सामान्यांसाठी असे फ्लॅट निर्माण करण्याची गरज आहे, असे प्रकाश जावडेकर यांनी स्पष्ट केले.