मुंबई-वांद्रे पूर्व मतदारसंघातील शिवसेना आमदार प्रकाश उर्फ बाळा सावंत यांचं गुरुवारी मध्यरात्री निधन झालं. ते ६४ वर्षांचे होते.
गेल्या काही दिवसांपासून आजारी असलेल्या सावंत यांच्यावर हिंदुजा रुग्णालयात उपचार सुरू होते. अखेर काल मध्यरात्री साडेबाराच्या सुमारास त्यांची प्राणज्योत मालवली. सावंत यांच्या पार्थिवावर आज दुपारी अंत्यसंस्कार केले जाणार आहेत. शिवसेनेचे पक्षप्रमुख उद्धव ठाकरे यांच्यासह अनेक नेते व पदाधिकारी यावेळी उपस्थित राहणार आहेत.
मुंबई महापालिकेत तीनवेळा नगरसेवक म्हणून निवडून आलेले बाळा सावंत २००९मध्ये पहिल्यांदा विधानसभेवर निवडून गेले होते. नुकत्याच झालेल्या विधानसभा निवडणुकीत त्यांनी भाजपचे कृष्णा पारकर यांचा पराभव करून दुसऱ्यांदा आमदार होण्याचा मान मिळवला होता. मनमिळावू स्वभावाच्या सावंत यांचा वांद्रे मतदारसंघात दांडगा जनसंपर्क होता.