पुणे: पर्यावरण जनजागृती, रक्षण व संवर्धन यास चालना देण्यासाठी ‘लायन्स सर्व्हिस फोरम’ तर्फे दि. १६ ते १८ जानेवारी २०१५ दरम्यान साखर संकुल, शिवाजीनगर येथे ‘लायन्स इन्व्हॅारन्मेंट एक्स्पो-2015’ (प्रदर्शनाचे ) आयोजित करण्यात आला आहे.
या कार्यक्रमाचे उध्दघाटन जलसंपदा राज्यमंत्री, (महाराष्ट्र राज्य) मा. विजयबापु शिवतारे यांच्या शुभहस्ते भिडे पुल येथे दि.१२ जानेवारी रोजी, सकाळी ९ वाजता होणार आहे.
‘लायन्स क्लब इंटरनॅशनल’ हि सेवाभावी संस्था नेहमीच सामाजिक कार्यात कायमच अग्रक्रमी राहुन विविध विधायक व सामाजिक उपक्रमांचे आयोजन करित असते. याच अनुषंगाने यावर्षी ‘लायन्स इन्व्हॅारन्मेंट एक्स्पो’ (प्रदर्शनाचे) चे आयोजन मोठ्या दिमाखात करण्यात येणार आहे. या पर्यावरण सप्त्यामध्ये अनेक सामाजिक, राजकीय, सांस्कृतिक आदी क्षेत्रातील मान्यवर उपस्थित राहुन पर्यावरण जनजागृतीचा संदेश सर्वांपर्यंत पोहचविणार आहेत. तसेच पर्यावरण जनजागृती संदर्भात १६ ते १८ जानेवारी दरम्यान प्रदर्शानासोबतच अनेक नामांकित मान्यवरांची व्याख्याने व तज्ञांचा परिसंवाद आयोजित केला आहे. या प्रदर्शन व परिसंवादाचे उध्दघाटन केंद्रीय पर्यावरणमंत्री प्रकाश जावडेकर यांच्या हस्ते दि.१६ जानेवारी रोजी होणार आहे. तसेच दि. १२ ते १६ दरम्यान विविध ठिकाणी विद्यार्थ्यांकरिता पर्यावरणीय विषयक प्रदर्शन, शालेय विद्यार्थ्यांच्या स्पर्धा, प्रत्यक्ष कृती कार्यक्रम, स्वच्छता-साफसफाई मोहिम, नदीपात्र स्वच्छता मोहिम, विद्यार्थ्यांना पर्यावरण रक्षणाविषयीची माहिती व सहभाग अशा प्रकारे कार्यक्रमाचे स्वरुप असणार आहे. विशेष म्हणजे, या पर्यावरण जनजागृती मोहिमेमध्ये ‘पुणे महानगरपालिका’, ‘महाराष्ट्र पर्यावरण नियंत्रक मंडळ’, ‘महाराष्ट्र शासनाचे जलसंपदा विभाग व अनेक स्वयंसेवी संस्था या सहभागी असणार आहेत.
पत्रकार परिषदेमध्ये या प्रदर्शनाबाबत सविस्तर माहिती लायन हसमुख मेहता (अध्यक्ष), लायन बाळासाहेब पाथरकर (समन्वयक) यांनी दिली. याप्रसंगी लायन श्रीकांत सोनी (व्हिडीजी-१) लायन अशोक मिस्त्री (सचिव), लायन कमलेश शहा, लायन सुनिल ओक, लायन सतीश राजहंस, व लायन योगेश कदम, लायन आनंद आंबेकर हे उपस्थित होते.
“सध्या पर्यावरणाचा ढासळत चाललेला समतोल अन त्याचा सजीव सृष्टीवर होत असलेला परिणाम यामुळे पर्यावरण जनजाजगृती महत्त्वाची असून तिचे संरक्षण व संवर्धन होणे अतिशय गरजेचे आहे असे मेहता म्हणाले. या प्रदर्शनाच्या लोगोची टॅगलाईन “बेटर इन्व्हॅारन्मेंट फॅार बेटर टुमारो” अशी आहे. या लोगोच्या माध्यमातून “चांगले पर्यावरण, आपलीच जबाबदारी” अशी संकल्पना पुणेकरांसमोर ठेवण्यात येणार असल्याची माहिती पाथरकर यांनी दिली.
हा संपुर्ण कार्यक्रम व प्रदर्शन नागरिकांकरिता मोफत असणार आहे. या प्रदर्शनाचा सर्वांनी लाभ घ्यावा व पर्यावरण जनजागृती मोहिमेमध्ये सहभाग नोंदवावा असे आवाहन मेहता व पाथरकर यांनी पुणेकरांना केले.