पुणे : युवा पिढीतील आश्वासक गायिका श्रुती विश्वकर्मा, सुप्रसिद्ध गायक जयंत केजकर आणि ज्येष्ठ गायिका विदुषी मधुवंती देव यांनी गायलेल्या प्रभातकालीन रागांचा आनंद रसिकांनी भरभरून घेतला. निमित्त होते डॉ. प्रकाश कुलकर्णी आयोजित निरामय संगीत सभेचे!

सदाशिव पेठेतील भारत इतिहास संशोधन मंडळातील वि. का. राजवाडे सभागृहात रविवारी (दि. ३१) मैफलीचे आयोजन करण्यात आले होते. मैफलीच्या सुरुवातीस संयोजक डॉ. प्रकाश कुलकर्णी यांनी ‘परम विमल तुझे स्मरण’ हे स्तवन सादर केले.

श्रुती विश्वकर्मा यांनी आपल्या मैफलीची सुरुवात राग अहिर भैरवमधील बडा ख्यालने केली. आपले परात्पर गुरू पंडित लक्ष्मणराव बोडस यांनी रचलेली ‘तोरे करतार करो बेडा पार’ ही रचना ऐकवून त्याला जोडून गुरू केदार बोडस यांची मध्यलय तीन तालातील ‘कल ना परे मोहे तुम बिन’ ही रचना प्रभावीपणे ऐकविली. त्यानंतर ‘हु दोम तनन दोम’ हा तराणा दमदार स्वरात सादर केला.

या नंतर जयंत केजकर यांची मैफल रंगली. राग गुजरीतोडी सादर करताना त्यांनी ‘बन रे घर आज’ ही बंदिश ऐकवून करून त्याला जोडून द्रुत लयीत ‘जग के पालन हार’ ही रचना ऐकविली. ‘ए मापी संग खेले बन बन आज ऋत बसंत’ ही रचना प्रभावीपणे सादर करून वसंत ऋतुतील वैशिष्ट्ये साकारली.

मैफलीची सांगता सुप्रसिद्ध गायिका विदुषी मधुवंती देव यांनी केली. त्यांनी राग देसकार ऐकविताना ‘जब परदेस गवन’ ही पारंपरिक बंदिश सादर करून द्रुत लयीत ‘झांझरीया झनके झनके’ ही पारंपरिक बंदिश ऐकविली. त्यानंतर गुरू राजाभाऊ देव यांनी रचलेल्या ‘ना मोहे आस धन सुख जस’ या अर्थपूर्ण बंदिशीने मैफलीची सांगता केली.

एकाहून एक सरस कलाकारांनी साकारलेल्या प्रभातकालीन रागांच्या सादरीकरणाने रसिक आनंदीत झाले.

कलाकारांना सुयोग कुंडलकर, कन्हैया भोसले (संवादिनी), चारुदत्त फडके, श्रीपाद शिरवळकर, अभिजित जायदे (तबला) यांनी साथसंगत केली. सुरुवातीस डॉ. प्रकाश कुलकर्णी यांनी मैफलीविषयी माहिती विशद केली. सूत्रसंचालन आणि आभार प्रदर्शन ऋतुजा फुलकर यांनी केले.

अ. भा. मराठी प्रकाशक संघातर्फे अनिल टांकसाळे यांचा जीवनगौरव तर डॉ. न. म. जोशी यांचा साहित्यसेवा पुरस्काराने गौरव

पुणे : आज महाराष्ट्राची स्थिती बिहारसारखी झाली आहे. यात कुणी एक सरकार, राजकीय शक्ती जबाबदार नसून हे सामुदायिक वैगुण्य आहे. सर्व समाजच या स्थितीला जबाबदार आहे. समाजजीवन तसेच राजकारणाची आज अवनिती झाली असून सर्व वातावरण गढुळलेले आहे. समाजात गुन्हेगारी वाढीस लागली आहे; कोयतेशाही सुरू झाली आहे, अशी परखड टीका इतिहास तज्ज्ञ डॉ. राजा दीक्षित यांनी केली. बिघडलेल्या सामाजिक परिस्थितीत विचार हेच शस्त्र, सदाचार हाच मार्ग आणि मानवता हाच धर्म आशादायी ठरणार आहे. साहित्यिक आणि सांस्कृतिक क्षेत्रांच्या माध्यमातूनच समाजप्रबोधन होऊ शकेल त्यामुळे अशा स्वरूपाचे उपक्रम हे आशेचा किरण ठरत आहेत, असा आशावादही त्यांनी व्यक्त केला.

अखिल भारतीय मराठी प्रकाशक संघातर्फे जीवनगौरव पुरस्काराने अनिल बुक एजन्सीचे संचालक अनिल टांकसाळे तर साहित्यसेवा पुरस्काराने ज्येष्ठ साहित्यिक डॉ. न. म. जोशी, ज्येष्ठ लेखिका डॉ. स्नेहसुधा कुलकर्णी यांचा स्नेहनिहार पुरस्कराने तर ज्येष्ठ मुद्रितशोधक विजय सरदेशपांडे यांचा आज (दि. ३०) विशेष सन्मान करण्यात आला. पुरस्कारांचे वितरण इतिहासतज्ज्ञ डॉ. राजा दीक्षित यांच्या हस्ते झाले. त्या वेळी ते अध्यक्षपदावरून बोलत होते. महाराष्ट्र साहित्य परिषदेचे कोषाध्यक्ष प्रदीप निफाडकर यांची प्रमुख उपस्थिती होती. अखिल भारतीय मराठी प्रकाशक संघाचे अध्यक्ष राजीव बर्वे, उपाध्यक्ष दत्तात्रट पाष्टे, प्रमुख कार्यवाह पराग लोणकर मंचावर होते. मराठा चेंबर ऑफ कॉमर्स, टिळक रोड येथे कार्यक्रम आयोजित करण्यात आला होता. याच कार्यक्रमात उत्कृष्ट ग्रंथनिर्मितीसाठी आणि दिवाळी अंक निर्मितीसाठी दिल्या जाणाऱ्या पुरस्कारांचे वितरणही करण्यात आले. शाल, श्रीफळ, मानपत्र आणि सन्माचिन्ह असे पुरस्काराचे स्वरूप होते.

डॉ. राजा दीक्षित पुढे म्हणाले, अनिल टांकसाळे यांच्या व्यवसायात निष्ठेची जोड असल्याने त्यांच्या ग्रंथविक्री कार्याचा उचित गौरव झाला आहे. डॉ. न. म. जोशी हे माझ्यासाठी पितृतुल्य असून त्यांनी साहित्यक्षेत्रात विविधांगी साहित्यनिर्मिती करून सेवा केली आहे. खडतर प्रवासातून त्यांनी कर्तृत्व घडविले आहे. संशोधकीय, साहित्यिक, ललित लेखनासह बोधकथा हे त्यांच्या लेखनाचे वैशिष्ट्य आहे. नर्मविनोदाचे अंग असलेल्या डॉ. न. म. जोशी यांनी साहित्य क्षेत्रात प्रसन्नतेचा शिडकावा केला आहे. स्नेहसुधा कुलकर्णी या फक्त प्रकाशिका नव्हेत तर लेखिका-कवयित्री आणि संपादिका देखील आहेत. प्रकाशन व्यवसायात कर्तृत्व गाजविणाऱ्या महिलेचा हा अर्थपूर्ण सत्कार आहे. मुद्रितशोधक हा अक्षरवाङ्‌मय वाचकांपर्यंत पोहाचविणारा दुवा असतो. त्यामुळे विजय सरदेशपांडे यांचा सत्कार होणे अभिनंदनीय आहे. प्रकाशक संघाच्या उपक्रमशील कार्याचे डॉ. दीक्षित यांनी कौतुक केले.

सत्काराला उत्तर देताना अनिल टांकसाळे म्हणाले, मी माझा व्यवसाय प्रामाणिकपणे केला आहे, आणि आजही करतो आहे. साहित्याची नगरी, पंढरी, माहेरघर असलेल्या पुण्यात माझा सन्मान होणे आनंददायी आहे. आज पुस्तकविक्री क्षेत्रात आयाम बदललेले आहेत. दुकाने, ग्रंथालये ओस पडत आहेत, वाचकांपर्यंत पुस्तके पोहोचविणे दुरापास्त होत आहे. अशा परिस्थितीत या पुरस्काराच्या माध्यमातून नेटाने, जोमाने कार्य करण्यास मला प्रोत्साहन मिळाले आहे तसेच प्रकाशक संघाचे सहकार्य लाभत आहे.

कृतज्ञता शब्दाला प्रकाशक संघाने मान्यता दिली आहे, असे सांगून डॉ. न. म. जोशी म्हणाले, ज्या प्रकाशकांकडे माझी पुस्तके प्रकाशित झाली नाहीत त्यांनीही मला लेखक म्हणून आज स्वीकारले आहे. बदललेल्या सामाजिक काळात मिळालेला हा सन्मान माझ्यासाठी उर्जादायक आहे.

डॉ. स्नेहसुधा कुलकर्णी यांनी मनोगत व्यक्त केले.

स्वागतपर प्रास्ताविकात राजीव बर्वे यांनी पुरस्कारांविषयी माहिती सांगून प्रकाशक संघाच्या कार्याविषयी अवगत केले.

मानपत्राचे वाचन किरण आचार्य यांनी केले. कार्यक्रमाचे सूत्रसंचालन मधुर बर्वे यांनी केले तर आभार नितीन हिरवे यांनी मानले.

‘देठ त्याचा अजूनही प्रदीप हिरवाच आहे’….

पुरस्कार वितरण समारंभानिमित्त प्रदीप निफाडकर यांच्या गझलांचा कार्यक्रम रंगला. त्या वेळी डॉ. न. म. जोशी यांच्याविषयी ‘हे उन्हाने वाळलेले पान आहे, वृद्ध नाही अनुभवांचे रान आहे’ अशा ओळी त्यांनी उद्‌धृत केल्या. या ओळीचा संदर्भ घेऊन डॉ. न. म. जोशी यांनी ज्येष्ठ गझलकार सुरेश भट माझ्याविषयी काय म्हटले असते असे सांगताना ‘हे उन्हाने वाळलेले पान आहे; देठ त्याचा अजूनही प्रदीप हिरवाच आहे’ अशा शब्दात निफाडकर यांच्या गझलेला उत्स्फूर्तपणे उत्तर दिले.  

पुणे : “देशाच्या प्रगतीसाठी युवा पिढी निरोगी व व्यसनमुक्त असणे आवश्यक आहे. तंबाखू, सिगारेट आणि अंमली पदार्थांच्या वाढत्या विळख्यातून तरुणांना बाहेर काढण्यासाठी सातत्याने जनजागृती करणे काळाची गरज आहे. त्या दृष्टीने  दीप्ती चवधरी यांनी पुढाकार घेऊन काँग्रेस भवन येथे  आयोजित केलेला ‘ व्यसनांची  होळी’ उपक्रम प्रेरणादायी आहे,  असे प्रतिपादन सर्व जीव मंगल प्रतिष्ठानचे अध्यक्ष व व्यसनमुक्ती चळवळीचे जनक डॉ. कल्याण गंगवाल यांनी केले.

    व्यसनाच्या जाहिराती दाखवून तरुणांची दिशाभूल करून त्यांना व्यसनग्रस्त केले जात आहे त्यामुळेच व्यसना विरोधात लढा देण्यासाठी आपण सर्वांनी एकत्र यायला पाहिजे, असे आवाहन त्यांनी केले. काँग्रेस भवन येथे  ते बोलत होते.

      31 मे – जागतिक तंबाखू निषेध दिनानिमित्त  पुणे शहर जिल्हा काँग्रेस कमिटी पश्चिम विभागच्या अध्यक्षा दीप्ती चवधरी यांनी आयोजित केलेल्या  कार्यक्रमात बोलताना दीप्ती चवधरी म्हणाल्या की, देशाचे भविष्य असलेली आपली युवा पिढी जर व्यसनाच्या विळख्यात अडकली, तर देशाची प्रगती खुंटेल. सशक्त आणि बलशाली भारताच्या निर्मितीसाठी सर्वप्रथम आपली तरुण पिढी निरोगी, सुदृढ आणि व्यसनमुक्त असणे अत्यंत आवश्यक आहे. आज  आपण सर्वांनी मिळून तंबाखू, सिग्रेट आणि ड्रग्ज यांसारख्या आरोग्यास घातक असणाऱ्या व कुटुंब उद्ध्वस्त करणाऱ्या व्यसनांना  समाजातून हद्दपार करण्याचा संकल्प केला पाहिजे. पुणे काँग्रेसच्या वतीने केवळ आजच्या दिवसापुरते मर्यादित न राहता, भविष्यातही शाळा, महाविद्यालये आणि सार्वजनिक ठिकाणी व्यसनमुक्तीसाठी सातत्याने जनजागृतीपर उपक्रम राबवले जातील, असे त्या म्हणाल्या.

 काँग्रेस भवन पटांगणात  तंबाखू, सिगारेट व अंमली पदार्थांची ‘होळी’ करण्यात आली.  

यावेळी डॉ. कल्याण गंगवाल यांनी सर्वांना व्यसनमुक्तीची शपथ दिली. पुणे शहर जिल्हा काँग्रेस कमिटीच्या पश्चिम विभागाच्या अध्यक्षा दीप्ती चौधरी यांच्या नेतृत्वाखाली झालेल्या या कार्यक्रमाचे अध्यक्षस्थान पुणे मनपा काँग्रेस पक्षाचे गटनेते एडवोकेट रामचंद्र उर्फ  चंदूशेठ कदम यांनी भूषवले. प्रारंभी दीप्ती चवधरी यांनी  डॉ. कल्याण गंगवाल यांचा स्वागत व सत्कार केला.

    एडवोकेट  रामचंद्र उर्फ चंदू शेठ कदम म्हणाले, शालेय  विद्यार्थी व तरुणांना  व्यसनाकडे आकर्षित करण्यात येत आहे, ही चिंतेची बाब आहे. पुणे शहरात अमली पदार्थ फोफावत  असून हे शहर ड्रग्स मुक्त करण्यासाठी काँग्रेस पक्ष कायम लढा देत राहील असे त्यांनी सांगितले.

   यावेळी “सशक्त भारताचा एकच नारा, तंबाखूला देऊ नका थारा” तसेच “तंबाखू, सिगारेट, ड्रग्जला द्या झटका, युवा पिढी वाचवा” अशा घोषणांनी काँग्रेस भवन  पटांगण दुमदुमून गेले. तंबाखू सेवनामुळे होणारे गंभीर आजार, कर्करोगाचा धोका आणि व्यसनाधीनतेचे दुष्परिणाम दर्शविणारे फलक व जनजागृतीची पोस्टर लावण्यात आली होती.

     यावेळी हृदय रोग तज्ञ डॉ. राहुल सावंत,  द. स. पोळेकर, बाळासाहेब आमराळे, दत्ता जाधव, राजाभाऊ कदम, अविनाश अडसूळ, राहुल वंजारी, सुरेश नागरे, दिलीप लोळगे, एडवोकेट  फैयाज शेख, राजेंद्र भुतडा, वेदिका सकपाळ, किशोर मारणे, शिवाजी सोनार, कान्होजी जेधे, हर्षद हांडे,  युवक काँग्रेसचे राहुल सावंत  यांच्यासह काँग्रेसचे पदाधिकारी, महिला कार्यकर्त्या, युवक काँग्रेसचे सदस्य तसेच नागरिक मोठ्या संख्येने उपस्थित होते

पुणे : 31 मे रोजी साजऱ्या होणाऱ्या जागतिक तंबाखूमुक्त दिनानिमित्त सर्व जीव मंगल प्रतिष्ठानतर्फे तंबाखूविरोधी जनजागृती अभियान राबविण्यात येत आहे. यंदाच्या दिनाची संकल्पना तंबाखू आणि निकोटीन उत्पादनांच्या खोट्या आकर्षणामागील सत्य समोर आणून व्यसनाला आळा घालण्याची आहे.सर्वमंगल प्रतिष्ठानचे संस्थापक अध्यक्ष डॉ. कल्याण गंगवाल यांनी सांगितले की, आधुनिक विपणन तंत्रांचा वापर करून तंबाखू कंपन्या युवकांना लक्ष्य करत आहेत. आकर्षक जाहिराती, रंगीत पॅकेजिंग आणि विविध फ्लेवर्सच्या माध्यमातून तंबाखूजन्य पदार्थांचे आकर्षण वाढवले जात आहे. परिणामी अनेक तरुण व्यसनाच्या गर्तेत ओढले जात आहेत.तंबाखूचे सेवन केवळ व्यक्तीच्या आरोग्यावरच नव्हे तर संपूर्ण कुटुंबावर परिणाम करते. कर्करोग, हृदयविकार, श्वसनाचे विकार आणि स्ट्रोक यांसारख्या गंभीर आजारांमुळे उपचारांचा मोठा आर्थिक बोजा निर्माण होतो. त्यामुळे तंबाखूमुक्त समाज निर्माण करणे ही काळाची गरज असल्याचे त्यांनी नमूद केले.जागतिक तंबाखूमुक्त दिनानिमित्त प्रत्येक नागरिकाने “मी तंबाखूपासून दूर राहीन आणि इतरांनाही तिच्या दुष्परिणामांविषयी जागरूक करीन” हा संकल्प करावा, असे आवाहन करण्यात आले. तसेच शाळा, महाविद्यालये, पालक आणि सामाजिक संस्थांनी एकत्रितपणे युवकांना तंबाखूच्या व्यसनापासून दूर ठेवण्यासाठी प्रयत्न करणे आवश्यक असल्याचेही त्यांनी स्पष्ट केले.“व्यसनमुक्ती हीच खरी देशभक्ती आहे. चला, आजच तंबाखूला कायमचा निरोप देऊन निरोगी आणि सुदृढ समाज घडवूया,” असा संदेश देत कार्यक्रमाचा समारोप करण्यात आला.

अनुसूचित जाती उपवर्गीकरण 2027 च्या जनगणनेच्या आधारे झाले पाहिजे

पुणे : केवळ राज्यातच नव्हे तर देशभरात सर्रास विक्री जाणारी हातभट्टीची दारू अत्यंत घातक असून ती कायमस्वरूपी हद्दपार करण्यासाठी पोलिसांनी कठोर पावले उचलावी, अशी सूचना केंद्रीय सामाजिक न्याय राज्यमंत्री रामदास आठवले यांनी केली.

पुणे आणि पिंपरी चिंचवड या ठिकाणी रसायनयुक्त विषारी दारू घेतल्यामुळे तब्बल 22 जणांचा मृत्यू झाला आहे. आठवले यांनी काही मृतांच्या कुटुंबीयांची भेट घेऊन त्यांचे सांत्वन केले. मुलांच्या कुटुंबीयांना राज्य सरकारकडून पाच लाख रुपये तर महापालिकेकडून एक लाख रुपये मदत देण्यात आली आहे. त्याचप्रमाणे मृतांच्या वारसांना नोकरी मिळावी अशी कुटुंबीयांची मागणी असून त्यादृष्टीने महापालिका आयुक्त चर्चा केल्याचेही आठवले यांनी सांगितले. यानंतर पुण्यात आयोजित पत्रकार परिषदेत आठवले बोलत होते. यावेळी आरपीआयचे पुणे शहराध्यक्ष संजय सोनवणे, प्रदेश सचिव बाळासाहेब जानराव, उपमहापौर परशुराम वाडेकर, नगरसेवक निलेश आल्हट, महिपाल वाघमारे, शाम सदाफुले, मोहन जगताप, अशोक गायकवाड, सलीम सय्यद, बसवराज गायकवाड, उमेश कांबळे, संदीप धांडोरे, सोनू निकाळजे, हबीब सय्यद, सुनील गवळी आदी उपस्थित होते.

मध्यपूर्वेतील युद्धजन्य परिस्थितीमुळे जगभरात आर्थिक संकट उभे राहिले आहे. देशात या संकटाची व्याप्ती कमी करण्यासाठी सरकारला नाईलाजाने इंधन दरात वाढ करावी लागली आहे. त्यामुळे सर्वच क्षेत्रात महागाई वाढली असून त्याची झळ सर्वसामान्य नागरिकांना पोहोचत आहे. मात्र, युद्ध समाप्ती दृष्टिक्षेपात असून त्यानंतर इंधनाचे दर निश्चितपणे कमी केले जातील. अर्थातच महागाईला आळा बसण्यास मदत होईल, अशी ग्वाही आठवले यांनी दिली.

पंतप्रधान नरेंद्र मोदी हे ‘महागाई मॅन’ असल्याचा लोकसभेतील विविरोधीपक्ष नेते राहुल गांधी यांचा आरोप पूर्णपणे बिनबुडाचा असल्याचा दावा आठवले यांनी केला. वास्तविक मोदी हे विकास मॅन आणि देशाची शान असल्याचे त्यांनी नमूद केले.

अनुसूचित जातींच्या उपवर्गीकरणाला काही जातींचा पाठिंबा आहे तर काही जातींचा विरोध आहे. याबाबत आपल्या पक्षाची भूमिका स्पष्ट करताना आठवले म्हणाले की, सन 2027 मध्ये होणाऱ्या जनगणनेच्या आधारे 59 हा अनुसूचित जातींना त्यांच्या लोकसंख्येच्या प्रमाणात आरक्षण देण्यात यावे, अशी आपली भूमिका आहे.

मराठा आरक्षण आंदोलन मनोज जरांगे पाटील यांनी आपले उपोषण मागे घेतल्याबद्दल आठवले यांनी त्यांचे आभार मानले. मुख्यमंत्री देवेंद्र फडणवीस उपमुख्यमंत्री एकनाथ शिंदे आणि सुनेत्रा पवार यांच्यासह राज्य सरकार मराठा आरक्षणाच्या बाजूने आहे. केंद्र सरकारने मराठा समाजाला दहा टक्के इडब्ल्यूएस आरक्षण दिलेले आहे राज्यातही ते मिळावे या दृष्टीने राज्य सरकारने पावले उचलावी. कुणबी नोंदी असलेल्या मराठा समाज घटकांना इतर मागास प्रवर्गातून आरक्षण देण्यास हरकत नाही. मात्र, सरसकट मराठा समाजाला या प्रवर्गातून आरक्षण दिल्यास सर्वोच्च न्यायालयाकडून ते नाकारले जाईल, असे आठवले यांनी स्पष्ट केले.

रिपब्लिकन पक्षाला सत्तेत वाटा मिळालाच पाहिजे

पुरेशा संख्याबळाअभावी रिपब्लिकन पक्षाने विधान परिषदेत उमेदवारीसाठी दावा केलेला नाही. मात्र, रिपब्लिकन पक्षाला विधान परिषदेची एक जागा देण्याचे आश्वासन मुख्यमंत्री देवेंद्र फडणवीस यांनी यापूर्वीच दिले आहे. त्यानुसार या निवडणुकीत पक्षाला एक जागा मिळेल अशी अपेक्षा होती. मात्र, ती मिळालेली नाही. आगामी काळात पाच जागांसाठी होणाऱ्या निवडणुकीत रिपब्लिकन पक्षाला एक जागा मिळेल, अशी आशा असल्याचे आठवले यांनी सांगितले. त्याचप्रमाणे दोन शासकीय महामंडळाचे अध्यक्षपद देखील पक्षाला मिळावे अशी आपली मागणी असून त्यासाठी मुख्यमंत्र्यांशी चर्चा करणार असल्याचेही त्यांनी सांगितले. रिपब्लिकन पक्ष हा छोटा असला तरी देखील तो महायुतीचा घटक पक्ष आहे याची जाणीव मित्र पक्षांनी ठेवावी आणि रिपब्लिकन पक्षाला सत्तेत योग्य तो वाटा मिळावा, असेही आठवले यांनी सुनावले.

पुणे, दि. ३१ मे २०२६ : पुण्यातील कॅम्प परिसरातील ए. के. मोबाईल हे दहशतवादी स्लीपर सेल चा अड्डा असून ते उध्वस्त करा अशी मागणी भीम आर्मी कडून प्रशासनाला करण्यात आली आहे. तसेच १० जुने २०२६ पर्यंत बेकायदेशीर कारवाया प्रतिबंधक कायदा, १९६७ अन्वेय गुन्हा दाखल करून सदरील दुकान बंद करा अन्यथा भीम आर्मी कडून नेस्तनाबूत करण्याचा इशारा भीम आर्मीचे महाराष्ट्र प्रदेश अध्यक्ष अशोक भाऊ कांबळे यांनी दिला आहे.
कांबळे यांनी प्रसिद्धीस दिलेल्या निवेदनात म्हटले आहे कि,’ ए. के. मोबाईल शॉपचे मालक व चालक फय्याज युसुफ खान, अयाज युसुफ खान व साद फय्याज खान, यांच्याबाबत स्थानिक स्तरावर काही गंभीर स्वरूपाची माहिती समोर आली आहे. तसेच फय्याज युसुफ खान याच्याविरुद्ध आंबेडकरी महिला कार्यकर्तीचा विनयभंग केल्याप्रकरणी कोंढवा पोलीस स्टेशन येथे गु.र.नं. ३९६/२०२६ अन्वये भारतीय न्याय संहिता, २०२३ मधील संबंधित कलमांखाली गुन्हा दाखल असून सदर प्रकरणाचा तपास संबंधित पोलीस यंत्रणेमार्फत सुरू आहे.
तसेच संबंधित आरोपी कुटुंबीयांविषयी गंभीर गुन्हे व दहशतवादविरोधी तपासाशी संबंध समोर आलेले आहेत. आरोपी फय्याज युसुफ खान, त्याचा मुलगा साद व त्याचा सख्खा भाऊ अयाझ हे मोबाईल शॉप चालवून व्यवसाय करीत आहे.
सदर व्यवसायाचा कोणत्याही बेकायदेशीर अथवा राष्ट्रविरोधी कारवायांशी संबंध आहे किंवा नाही, याची सक्षम तपास यंत्रणेमार्फत सखोल चौकशी होणे आवश्यक आहे. तसेच आरोपी फय्याज युसुफ खान याचा सख्खा भाऊ अयाज युसुफ खान हा यापूर्वी मोबाईल व्यवसायाशी संबंधित असल्याचे समजते. त्याच्याविरुद्ध बंदी घालण्यात आलेल्या Students Islamic Movement of India (SIMI) व Indian Mujahideen या संघटनांशी संबंध असल्याच्या आरोपावरून एटीएसकडून अटक करण्यात आल्याचे विविध वृत्तांतांमधून समोर आले आहे. अहमदाबाद सिरीयल बॉम्बस्फोट प्रकरण, जर्मन बेकरी बॉम्बस्फोट प्रकरण तसेच बनावट भारतीय चलनी नोटांशी संबंधित प्रकरणांमध्ये त्याची चौकशी व कारवाई झाल्याचेही वृत्त प्रसिद्ध झाले होते. त्याच्यावर दहशतवादी कारवायांसाठी मोबाईल फोन, सिमकार्ड व इतर साहित्य पुरविल्याचे आरोप करण्यात आले होते. तसेच तपासादरम्यान त्याच्याकडून मोठ्या प्रमाणात दारुगोळा, ग्रेनेड, शस्त्रे व इतर आक्षेपार्ह साहित्य जप्त करण्यात आल्याचेही विविध वृत्तांतांमधून समोर आले आहे. वरील बाबींच्या पार्श्वभूमीवर सदर प्रकरणाची तसेच संबंधित व्यक्तींच्या सध्याच्या हालचाली, संपर्क व व्यावसायिक व्यवहारांची सखोल चौकशी करणे आवश्यक आहे.
तसेच फय्याज युसुफ खान याचा दुसरा सख्खा भाऊ फिरोज युसुफ खान उर्फ फिरोज खान (टोटला) हा गंभीर संघटित गुन्हेगारी कारवायांमध्ये सहभागी असल्याचे तसेच मुंबई बॉम्बस्फोट तपासाशी संबंधित आरोपी असल्याचे सांगितले जाते. त्याचा नंतर एन्काऊंटर स्पेशालिस्ट विजय साळसकर यांच्या पथकाकडून झालेल्या पोलिस एन्काऊंटरमध्ये मृत्यू झाला होता. विजय साळसकर हे स्वतः २६/११ मुंबई दहशतवादी अजमल कसाब व इतर दहशतवादी साथीदारांच्या हल्ल्यात एटीएस प्रमुख हेमंत करकरे, अशोक कामटे व इतर पोलीस अधिकाऱ्यांसह शहीद झाले होते. वरील सर्व बाबींच्या पार्श्वभूमीवर संबंधित व्यक्तींच्या हालचाली, संपर्क, आर्थिक व्यवहार व व्यवसायाची सक्षम यंत्रणेमार्फत सखोल चौकशी करून योग्य ती कारवाई करण्यात यावी, अशी मागणी करण्यात आली आहे..
वरील बाबींच्या पार्श्वभूमीवर, संबंधित व्यक्ती फय्याज युसुफ खान, त्याचा मुलगा साद फय्याज खान व अयाज युसुफ खान हे आजही मोबाईल शॉपचा व्यवसाय करीत असल्याचे समजते. त्यामुळे संबंधित व्यक्तींच्या हालचाली, संपर्क, आर्थिक व्यवहार तसेच सदर व्यवसायाची सक्षम यंत्रणेमार्फत सखोल चौकशी करण्यात यावी. उपलब्ध माहिती व पूर्वी समोर आलेल्या आरोपांच्या अनुषंगाने सदर व्यवसायाचा कोणत्याही बेकायदेशीर, राष्ट्रविरोधी अथवा दहशतवादी कारवायांशी प्रत्यक्ष किंवा अप्रत्यक्ष संबंध आहे किंवा नाही, याची कसून पडताळणी करणे आवश्यक आहे. चौकशीदरम्यान कोणतेही बेकायदेशीर कृत्य, संशयास्पद व्यवहार अथवा कायद्याचे उल्लंघन आढळून आल्यास संबंधित व्यक्ती व व्यवसायाविरुद्ध लागू कायद्यांनुसार तात्काळ व कठोर कारवाई करण्यात यावी, अशी देखील मागणी करण्यात आली आहे.
आरोपीच्या कुटुंबाची गंभीर गुन्हेगारी व दहशतवादी पार्श्वभूमी लक्षात घेता सदर आरोपींवर तात्काळ बेकायदेशीर क्रियाकलाप (प्रतिबंध) अधिनियम (UAPA) तसेच इतर लागू कायद्यांनुसार गुन्हा दाखल करून कठोर कारवाई करण्यात यावी व आवश्यकतेनुसार त्यांना अटक करण्यात यावी तसेच १० जुने २०२६ पर्यंत सदरील मोबाईल शॉप हे जप्त करून सील करण्यात यावा अन्यथा भीम आर्मी कडून सदरील दुकान हे दहशतवादी कृत्यास मदत करून देश विरोधी विघातक कृत्यांमध्ये मदत करीत असल्यामुळे ते भीम आर्मी कडून १० जून २०२६ रोजी फोडण्यात येईल असा इशारा शासन प्रशासनाला भीम आर्मी कडून देण्यात आला आहे.