पुणे : प्यार हुआ इकरार हुआ, अजा सनम मधुर चांदनी में हम,  गोरे गोरे ओ बाकी छोरे ,दिल की गिरह मे, बचपन के दिन भूला ना देना, तुझी चाल तुरुतुरु उडते केस भुरुभुरु… अशा हिंदी आणि मराठी संगीताचा सुवर्णकाळ  वादकांनी आपल्या अप्रतिम वादनाने जागा केला. तसेच काही पाश्चात्य फोक संगीतील रचनांसह कलाकारांच्या अकॉर्डियन वादनाने  एक प्रकारे संगीत रसिकांची सायंकाळ सुरेल झाली.
जागतिक अ‍ॅॅकॉर्डियन दिनानिमित्त ‘अ‍ॅन इव्हिनिंग वीथ अ‍ॅॅकॉर्डियन’ हा अ‍ॅॅकॉर्डियन वादनाचा कार्यक्रम पुण्यातील अकॉर्डियन वादक अमित वैद्य यांच्या पुढाकाराने आयोजित करण्यात आला होता. कोथरुडमधील बालशिक्षण मंदिर सभागृहात झालेल्या कार्यक्रमाला महाराष्ट्र एज्युकेशन सोसायटीचे अध्यक्ष राजीव सहस्त्रबुद्धे, डॉ. प्रसाद जोशी, अबुझार मॅनेजर या कार्यक्रमाला प्रमुख पाहुणे म्हणून उपस्थित होते.
अमित वैद्य यांसह गजानन नवाथे (पुणे), रवी बेन्ने (बंगळुरु), सागर साठे (मुंबई) यांनी देखील अकॉर्डियन वादन करून रसिकांची मने जिंकले. त्यांना पद्माकर गुजर व विनोद सोनावणे यांनी साथसंगत केली. डॉ. केतकी वैद्य यांनी उत्तम निवेदनाची साथ देऊन कार्यक्रमाची लज्जत वाढवली.
ज्येष्ठ अकॉर्डियन वादक अनिल गोडे ह्यांचा ही सत्कार करण्यात आला.. त्यानंतर कलाकारांनी अकॉर्डियन वादनाची सुरेल मैफल सुरू केली. अमित वैद्य यांनी श्री ४२० या चित्रपटातील राज कपूर यांचे ‘प्यार हुआ इकरार हुआ’ आणि बन के पंछी गाये प्यार का तराना ही गाणी सादर करून रसिकांना अकॉर्डियन वादनाची अप्रतिम झलक दाखवली व रसिकांची मने जिंकली. त्यानंतर गजानन नवाथे यांनी ‘बडे हे दिल के काले’ आणि ‘मस्ती भरा है समा’ या गाण्यांच्या माध्यमातून रसिक प्रेक्षकांना मंत्रमुग्ध केले. सागर साठे यांनी ‘गोरे गोरे ओ बाकी छोरे’ आणि ‘दिल की गिरह मे’ या गाण्यांच्या माध्यमातून रसिकांना बॉलीवूडच्या संगीत सुवर्णकाळाची सफर घडवली. 
रवी बेन्ने यांनी  पोलका या  संगीत प्रकारची धून मधून पाश्चात्त्य फोक संगीताची मजा रसिकांना दिली तर त्यांनी ती पिगाल या फ्रेंच धून मधून युरोपियन संगीताची ही झलक रसिकांना आपल्या अकॉर्डियन वादनातून अतिशय तरलपणे दाखवून दिली.
अबिझार मॅनेजर म्हणाले, संगीत ही कोणतीही मर्यादा नसलेली भाषा आहे. या संगीताचा केवळ रसिकांचे मनोरंजन म्हणून उपयोग न होता देशाच्या आणि संस्कृतीच्या सीमा ओलांडून सर्वांना एकत्र आणण्यासाठी उपयोग होत आहे. त्यामुळेच संगीतकार आणि वादक हे एक प्रकारे दैवी देणगी लाभलेले आहेत.

‘भवरे की गुंजन है मेरा’, ‘बोले रे कठपुतली डोली’, ‘आजा सनम मधुर चांदनी में हम’ अशा विविध प्रकारच्या अ‍ॅॅकॉर्डियनचा अंतर्भाव असलेली हिंदी आणि मराठी चित्रपट सृष्टीच्या सुवर्णकाळातील गाणी, पाश्चात्य  लोकसंगीत, अ‍ॅॅकॉर्डियन आणि भारतीय शास्त्रीय संगीताचा प्रयोग अशा विविध प्रकारांमध्ये कलाकारांनी अतिशय अप्रतिम सादरीकरण केले.

एसबीए कप बॅडमिंटन स्पर्धा- सुधांशू बॅडमिंटन अकादमीच्या वतीने आयोजन
पुणे: अदिती काळे हिने सुधांशू बॅडमिंटन अकादमीच्या वतीने आणि पीडीएमबीएच्या सहकार्याने आयोजित योनेक्स-सनराईझ एसबीए कप कॉर्पोरेट बॅडमिंटन स्पर्धेत दुहेरी मुकुट मिळवला. तिने महिला एकेरी आणि मिश्र दुहेरीचे विजेतेपद पटकावले.
शिवाजीनगर येथील पीडीएमबीए मॉडर्न स्पोर्ट्स कॉम्प्लेक्समध्ये ही स्पर्धा झाली. सुधांशू मेडसीकर, होस्टरोयलचे संस्थापक साकेत काळे, ऑल थिंग्ज फिजियोच्या संस्थापिका तेजस्विनी वसवे, रसल नेस्टचे संस्थापक सागर हिरे यांच्या उपस्थितीत पारितोषिक वितरण समारंभ पार पडला.
महिला एकेरीच्या अंतिम फेरीत अदितीने अदिती रोडेला १५-५, १५-३ असे सहज पराभूत केले आणि जेतेपद पटकावले. यानंतर मिश्र दुहेरीत अदितीने ऋतुराज देशपांडेच्या साथीने बाजी मारली. अंतिम फेरीत अदिती-ऋतुराज जोडीने अद्वैत साठे – प्रचिती वालापुरे जोडीला १५-१०, १६-१४ असे नमविले. अदितीला महिला दुहेरीच्या अंतिम फेरीत पराभव पत्करावा लागला. त्यामुळे तिचा तिहेरी मुकुट हुकला. प्रचिती वेलापुरे – उन्नती मुनोत जोडीने अदिती काळे-राधिनी भामेरे जोडीवर १५-१० १५-४ अशी मात करून जेतेपद निश्चित केले. 
लोकेशला जेतेपद पुरुष एकेरीच्या अंतिम फेरीत लोकेश जुंगडने अथर्व घाणेकरला १६-१४ १०-१५ १८-१६ असे नमविले आणि विजेतेपद पटकावले. ही लढत ४२ मिनिटे चालली. 
निकाल – अंतिम फेरी –३० वर्षांवरील पुरुष एकेरी – सुशांत पाटील वि. वि. ओंकार केळकर १५-११,१५-११. ३५ वर्षांवरील पुरुष एकेरी – अक्षय गद्रे वि. वि. आनंद साबू १५-८, १४-१६, १५-११.
४० वर्षांवरील पुरुष एकेरी – दिगांत गुप्ता वि. वि. सारंग व्यास १३-१५, १५-५, १५-९.५० वर्षांवरील पुरुष एकेरी – रवी कोळगे वि. वि. एस. कुमार १५-१२, १५-७.
पुरुष दुहेरी – अनिकेत बंडगर – नरेंद्र गोगावले वि. वि. मिहीर रतनजांकर – रोहन जाधव १५-१२, १५-१०.
३० वर्षांवरील पुरुष दुहेरी – अजित उमराणी – हरजितसिंग वि. वि. सचिन मानकर – तुषार बलापुरे १५-१०, १५-१०. 
३५ वर्षांवरील पुरुष दुहेरी – अक्षय गद्रे – विनीत दबक वि. वि. सचिन मानकर – स्वप्नील मालपाठक ७-१५, १५-१२, १५-६.
४० वर्षांवरील पुरुष दुहेरी – स्वप्नील मालपाठक – विनीत दबक वि. वि. आनंद अय्यर – दिनेश गोपानी १५-१२, १५-७.
५० वर्षांवरील पुरुष दुहेरी – केदार टांकसाळे – रवी कोळगे वि. वि. नागेश पालकर – विवेक जबडे १५-११, १५-५.

जिल्हास्तरीय बॉक्सिंग स्पर्धा; गुरुवर्य श्री संजीवजी जनार्दन नाईक सोशल फाउंडेशन चॅरिटेबल ट्रस्टच्या वतीने आयोजन

पुणे : खुशी परदेशी, प्रियानी शिर्के, तेजवीर साहोटा, काया चौधरी यांनी आपापल्या प्रतिस्पर्ध्यावर मात करून गुरुवर्य श्री संजीवजी जनार्दन नाईक सोशल फाउंडेशन चॅरिटेबल ट्रस्टच्या वतीने आयोजित जिल्हास्तरीय बॉक्सिंग चॅम्पियनशिप स्पर्धेत सुवर्णपदक मिळवले.

आमदार मुक्ताताई टिळक यांच्या स्मरणार्थ आयोजित ही स्पर्धा शुक्रवार पेठेतील नातू बाग मैदानावर झाली. स्पर्धेच्या पारितोषिक वितरण समारंभास भाजप महाराष्ट्र प्रदेश प्रवक्ते कुणाल टिळक, परिमंडळ 1 चे पोलीस उपायुक्त संदीपसिंह गिल, पुणे बॉक्सिंग असोसिएशन अध्यक्ष रमेश बागवे, नंदकुमार जाधव, माजी नगरसेविका रूपाली पाटील, दिलीप काळोखे, यूके बॉक्सिंग अकॅडमीचे संचालक उमेश खानेकार, पूजा भगत उपस्थित होते. 

या स्पर्धेतील एलिट मुलींच्या ५२ ते ५४ किलो गटाच्या अंतिम फेरीत खुशी परदेशीने अनुराधावर ५-० ने मात केली. यानंतर ५४ ते ५७ किलो गटाच्या अंतिम फेरीत प्रियानी शिर्केने ऋतुजा रणदिवेवर ४-१ ने विजय मिळवला आणि सुवर्णपदक निश्चित केले. ५७ ते ६० किलो गटात तेजवीर साहोटाने राखी घाडगेला ४-१ ने मात करून सुवर्णयश मिळवले. यानंतर ६० ते ६३ किलो गटाच्या अंतिम फेरीत काया चौधरीने गौरी साकळेला ४-१ ने पराभूत केले.

निकाल : सब – ज्युनियर – ३२ ते ३५ किलो – जिया शेख वि. वि. आइशा शेख.

३५ ते ३७ किलो – सोनिया सूर्यवंशी वि. वि. श्रावणी गायकवाड.

३७ ते ४० किलो – आर्या गर्दे वि. वि. झिनत शेख. ४० ते ४३ किलो – प्रांजल आठवले वि. वि. माही शिंदे.

४३ ते ४६ किलो – सृष्टी दोडमिसे वि. वि. साशा हरपाळे.

४६ ते ४८ किलो – तनिक्षा लोखंडे वि. वि. पूर्वा गाढवे.

ज्युनियर मुली – ४४ ते ४६ किलो – सृष्टी चोरगे वि. वि. अक्षदा जाधव.

४६ ते ४८ किलो – ज्ञानदा जामदर वि. वि. तनिष्का कांबळे.

४८ ते ५० किलो – भूमिका खिलारे वि. वि. रोझ सय्यद.

५० ते ५२ किलो – रिया कुटे वि. वि. एलिझा झोव्हिस

पुणे, दि. ८ : राष्ट्रीय विधी सेवा प्राधिकरण, नवी दिल्ली, महाराष्ट्र राज्य विधी सेवा प्राधिकरण उच्च न्यायालय, मुंबई, जिल्हा विधी सेवा प्राधिकरण आणि जिल्हाधिकारी पुणे यांच्या निर्देशानुसार गुरुवारी ११ मे रोजी जुन्नर-आंबेगाव उपविभागीय अधिकारी यांच्या मंचर येथील कार्यालयात सकाळी ११ वाजता महसूल न्यायालयातील अर्धन्यायिक प्रकरणांसाठी विशेष लोक अदालतीचे आयोजन करण्यात आलेले आहे.

या विशेष लोक अदालतीसाठी संबंधित पक्षकारांना नोटीसा पाठविण्यात आल्या असून विशेष लोक अदालतीचे कामकाज व्यवस्थितरित्या पार पाडण्यासाठी अधिकारी-कर्मचाऱ्यांची एकूण ६ पथके तयार करण्यात आलेली आहेत.

या विशेष लोक अदालतीत सन २०१३ ते २०२० या कालावधीतील प्रलंबित दावे मुख्यत्वे तडजोडीने निकाली काढण्याचा प्रयत्न केला जाईल.

विशेष लोक अदालतीमध्ये पक्षकारांनी व त्यांच्या विधिज्ञांनी हजर राहून जास्तीत जास्त प्रकरणे तडजोडीने निकाली काढण्यासाठी सहकार्य करावे, असे आवाहन गोविंद शिंदे उपविभागीय अधिकारी जुन्नर-आंबेगाव, उपविभाग, मंचर (पुणे) यांनी केले आहे.
***

पुणे, दि. 8: पुणे शहराच्या मध्यवस्तीतून वाहणाऱ्या नागझरी नाल्यातील पूरपरिस्थितीबाबत पालकमंत्री चंद्रकांतदादा पाटील यांच्या अध्यक्षतेखाली शासकीय विश्रामगृह येथे आढावा बैठकीचे आयोजन करण्यात आले होते.

यावेळी पुणे मनपा आयुक्त विक्रम कुमार, अतिरिक्त आयुक्त विकास ढाकणे, अतिरिक्त जिल्हाधिकारी महेश पाटील, श्रमदान मारुती मंडळाचे अध्यक्ष राजेंद्र कोंढरे आदी उपस्थित होते.

श्री. पाटील म्हणाले, नागझरी आजुबाजूला असलेल्या नागरिकांच्या घरात पाणी नाल्यातील पाणी गेल्यामुळे त्यांचे जनजीवन विस्कळीत होते. त्यामुळे येथील नागरिकांची गैरसोय टाळण्यासाठी नाल्याचे रुंदीकरण, खोलीकरण आणि स्वच्छता जून महिन्याअखेर पूर्ण करा. नाल्याच्या भोवती असलेली अतिक्रमणे तात्काळ काढण्याची कार्यवाही करा. मान्सून कालावधीत नाल्यातील पाण्यासोबत येणाऱ्या कचरा उचलण्यासाठी कर्मचाऱ्याची नियुक्ती करा, अशा सूचना देऊन ते पुढे म्हणाले, कायमस्वरुपी उपाययोजना करण्यासाठी 57 कोटी रुपयांची आवश्यकता असून हा निधी उपलब्ध करण्यासाठी प्रयत्न करण्यात येईल, असेही पालकमंत्री श्री. पाटील म्हणाले.

पुणे, दि. ८: समान पाणी पुरवठा योजनेअंतर्गत बाणेर-बालेवाडी भागातील नागरिकांचा पाण्याच्या सोडविण्यासाठी येत्या १७ मे रोजी योजनेचे पहिल्या टप्प्यातील पूर्ण झालेल्या कामाचे लोकार्पण करण्याचे निर्देश पालकमंत्री चंद्रकांतदादा पाटील यांनी अधिकाऱ्यांना आढावा बैठकीत दिले.

शासकीय विश्रामगृह येथे आयोजित या बैठकीस पुणे मनपा आयुक्त विक्रम कुमार, अतिरिक्त आयुक्त विकास ढाकणे, पाणी पुरवठा विभागाचे मुख्य अभियंता अनिरुद्ध पावसकर, २४x७ योजनेचे अधीक्षक अभियंता नंदकिशोर जगताप आदी उपस्थित होते.

महापालिकेच्या माध्यमातून सुरू असलेली समान पाणीपुरवठा योजनेची कामे जलदगतीने पूर्ण करावीत. तसेच पाणी मोजणीसाठी मीटर लावावे, अशा सूचना पालकमंत्री श्री. पाटील यांनी अधिकाऱ्यांना दिल्या.

पुणे दि. ८: पुणे महापालिकेतील १ जानेवारी २०१६ नंतर सेवानिवृत्त झालेल्या सेवक, प्राथमिक, माध्यमिक व तांत्रिक शिक्षण विभागातील सेवानिवृत्त शिक्षक व शिक्षकेतर कर्मचाऱ्यांना सातवा वेतन आयोगानुसार कार्यवाही करुन फरकाची रक्कम मे अखेर अदा करण्याचे निर्देश पालकमंत्री चंद्रकांतदादा पाटील यांनी दिले.

शासकीय विश्रामगृह येथे पुणे मनपा सेवानिवृत्त शिक्षक व शिक्षकेतर कर्मचाऱ्यांच्या सातव्या वेतन आयोग लागू करण्यासंदर्भात आढावा बैठकीचे आयोजन करण्यात आले होते. यावेळी पुणे मनपा आयुक्त विक्रम कुमार, अतिरिक्त आयुक्त विकास ढाकणे, पुणे मनपा प्राथमिक शिक्षण विभागाच्या प्रशासकीय अधिकारी डॉ. मिनाक्षी राऊत, तसेच महानगरपालिका सेवानिवृत्त सेवक संघाचे अध्यक्ष संभाजी भोसले यांच्यासह निवृत्त सेवक संघाचे प्रतिनिधी उपस्थित होते.

पुणे महापालिकेअंतर्गत प्राथमिक शिक्षण विभागातील एकूण २ हजार ५५३ सेवानिवृत्त शिक्षक व शिक्षकेतर कर्मचारी असून तर सन २०१६ पूर्वी शिक्षक व शिक्षकेतर सेवानिवृत्त झालेले कर्मचारी १ हजार ९४३ आहेत. १ जानेवारी २०१६ नंतर सेवानिवृत्त झालेल्या पुणे महानगरपालिकेतील सेवानिवृत्त शिक्षक व शिक्षकेतर कर्मचारी यांना ७ वा वेतन आयोग लागू करण्याबाबत एकूण ३५० सेवानिवृत्त शिक्षक व शिक्षकेतर कर्मचाऱ्यांची विवरणपत्रे तयार केलेली आहेत. त्याअनुषंगाने तांत्रिक अडचणी, वेतन निश्चितीतील त्रुटी पूर्तता करण्याचे काम सुरू असल्याचे यावेळी सांगण्यात आले. त्यावर सर्व अडचणी मेअखेरपर्यंत दूर करुन निवृत्तीवेतन योजना लागू करण्याची प्रक्रिया पूर्ण करण्याच्या सूचना पालकमंत्री चंद्रकांतदादा पाटील यांनी यावेळी दिल्या.

महापालिकेअंतर्गत सेवकांची एकूण १०७ निवृत्तीवेतन प्रकरणे असून त्यातील त्रुटीची पूर्तता करून निवृत्तीवेतन धारकांना लाभ देण्याची कार्यवाही करण्यात येत आहे. आतापर्यंत २०१६ पूर्वी सेवानिवृत्त झालेल्या शिक्षक व शिक्षकेतर कर्मचारी यांना १० महिन्याचा फरक व वेतन आयोगाचा पहिला हप्ता देण्यात आला आहे. त्याप्रमाणे २०१६ पूर्वीच्या शिक्षक व शिक्षकेतर कर्मचारी यांना सर्व लाभ देण्यात आले आहेत, अशीही माहिती मनपाच्या शिक्षण विभागाकडून देण्यात आली. सदरचे कामदेखील तातडीने पूर्ण करुन हे अखेरपर्यंत ७ वा वेतन आयोगानुसार वाढीव निवृत्तीवेतन सेवानिवृत्त कर्मचाऱ्यांना द्यावी. तसेच दोन महिन्यांनंतर सेवा उपदानाची रक्कम देखील अदा करावी, अशा सुचना पालकमंत्री पाटील यांनी यावेळी शिक्षण अधिकाऱ्यांना दिल्या.

पालकमंत्र्यांच्या या निर्णयाचे सर्व प्राथमिक, माध्यमिक व तांत्रिक शिक्षण विभागाकडील सेवानिवृत्त कर्मचाऱ्यांनी स्वागत केले.
0000

‘भारतीय विद्या भवन’,‘इन्फोसिस फाऊंडेशन’च्या सांस्कृतिक प्रसार कार्यक्रमांतर्गत आयोजन

पुणे ः

भारतीय विद्या भवन आणि इन्फोसिस फाऊंडेशनच्या सांस्कृतिक प्रसार कार्यक्रमांतर्गत आयोजित ‘ अनुभूती ‘ या कार्यक्रमाला चांगला प्रतिसाद मिळाला. ‘ ओजस, पुणे ‘ यांनी आयोजन केले होते .
कार्यक्रमामध्ये डॉ. अपूर्वा जयरामन ( चेन्नई ) यांनी भरतनाट्यम नृत्यप्रकारात प्रभावी एकल ( सोलो ) सादरीकरण केले.भारतीय विद्या भवनचे सरदार महादेव बळवंत नातू सभागृह,(सेनापती बापट रस्ता) येथे हा कार्यक्रम झाला. डॉ. अपूर्वा जयरामन यांनी प्रारंभी कृष्णस्तुती, अंबा कामाक्षी स्वरजती वर आधारित नृत्यरचना प्रस्तुत केल्या. प्रेक्षकांनी या रचनांना मोठा प्रतिसाद दिल्या.’ ठुमक चलत रामचंद्र ‘ या भजनावर आधारित नृत्य प्रस्तुतीही लक्षवेधी ठरली. ‘अहल्या ‘ उद्धारावर आधारित नृत्यरचनेने उपस्थितांची वाहवा मिळवली. संत सोयराबाई यांच्या ‘ अवघा रंग एक झाला ‘ या अभंगावरील नृत्य प्रस्तुतीने त्यांनी समारोप केला.

डॉ.परिमल फडके, तमन्ना नायर , अथर्व चौधरी हे मान्यवर उपस्थित होते. भारतीय विद्या भवनचे मानद सचिव प्रा.नंदकुमार काकिर्डे यांनी स्वागत केले. अश्वीनी चौधरी यांनी आभार मानले.

पुणे महापालिकेच्या नदीसुधार प्रकल्पातील त्रुटीबाबत (NEERI) सारख्या संस्थेकडून प्रकल्पाचे आघात परीक्षण व इतर पर्यावरण विषयक काम करणाऱ्या सामाजिक संस्था, कार्यकर्ते, सर्व पक्षीय राजकीय नेते, नागरिक यांची मते विचारात घेऊन पुढील कार्यवाही करण्याबाबत विधान परिषद उपसभापती डॉ. नीलम गोऱ्हे यांचे नगरविकास व पर्यावरण व वातावरणीय बदल विभागाच्या सचिवांना, पुणे महापालिका आयुक्तांना निर्देश

पुणे : पुणे महापालिकेने प्रस्तावित केलेल्या नदी सुधार प्रकल्पाच्या अंमलबजावणीबाबत पर्यावरण निसर्ग अभ्यासक नागरिकांकडून शंका उपस्थित करण्यात येत आहेत. याबाबत लक्ष घालण्यासाठी विधान परिषदेच्या उपसभापती ना. डॉ. नीलम गोऱ्हे यांनी राज्य सरकारकडे निवेदन दिले आहे. नगरविकास विभागाच्या सचिव आणि महापालिका आयुक्तांना याबाबत त्यांनी आज पत्र दिले आहे.

यामध्ये महापालिकेच्या नदिसुधार प्रकल्पात अनेक गोष्टींची कमतरता आढळते.
पुणे महापालिकेने साबरमती माँडेल अंगिकारले असल्याने नदी वाहती न रहाता तिचे डोहात रुपांतर होणार आहे. त्यामुळे पाण्यातील प्रदूषण वाढणार आहे. जलपर्णी सारख्या व शैवालांच्या वाढीस वाव मिळून पाण्याचा दर्जा खराब होणार आहे. यातही नदीपात्राची रुंदी कमी झाल्याने पावसाळ्यात पुराचे पाणी इतस्ततः पसरुन धोका निर्माण होण्याची शक्यता आहे, या ठळक मुद्द्यांकडे लक्ष वेधले आहे.
आपल्या निवेदनात त्यांनीं पुढील मुद्द्यांवर भर दिला आहे.
१. पुणे शहराच्या विविध भागातून नदीत येणारे मैलापाणी प्रक्रिया करून चांगले पाणी नदीपात्रात सोडा व नंतरच नदीकाठ सुधार प्रकल्पाचे काम हाती घ्या. यामुळे जलप्रदूषण कमी होईल.
२. नदीकाठ सुधार प्रकल्पांअंतर्गत नदी पात्रातील पूल पाडण्यात येणार असून रस्तेही बंद करण्यात येणार असल्याने निर्माण होणार्‍या वाहतुकीच्या गंभीर समस्येवरून नागरिकांचाही रोष आहे. यावर योग्य उपाय काढण्याची आवश्यकता आहे. हा प्रकल्प राबविण्यासाठी पुण्यातील अंदाजे ६००० किंवा त्यापेक्षाही जास्त झाडांची कत्तल करण्यात येणार असल्याचे देखील समजत आहे.

३. नीरी (NEERI) सारख्या संस्थेकडून प्रकल्पाचे संभाव्य पर्यावरण आघात परिक्षण करण्यात यावे.

४. पर्यावरण विषयक काम करणाऱ्या, या विषयात पुढाकार घेणाऱ्या इतर सामाजिक संस्थांची, सामाजिक कार्यकर्ते यांची मते विचारात घेण्यात यावीत.

५. महानगरपालिकेच्या सर्व राजकीय पक्षीय नेत्यांची आणि पर्यावरणप्रेमी नागरिकांची याविषयी बैठक घेऊन त्यांचे मतही विचारात घेण्यात यावे. त्यामुळे लोकसहभाग वाढू शकेल. यानंतरच याबाबत निर्णय घेण्यात यावा.

६. त्यानंतर जनसुनावणी घेऊन नंतरच या प्रकल्पास सुरुवात करावी. तोपर्यंत या प्रकल्पासाठी कोणतीही प्रकारची वृक्षतोड होणार नाही, याकडे विशेष लक्ष द्यावे.

सुरळीत कामकाजासाठी आणि वाढीव पारदर्शकतेसाठी एक सॉफ्टवेअर केले लाँच; बीआरओ आणि जीआरएसईने स्वदेशी श्रेणी 70R डबल लेन मॉड्युलर पुलांच्या बांधकामासाठी केला सामंजस्य करार

नवी दिल्‍ली, 7 मे 2023

सीमा रस्ते संघटना (BRO) ने 07 मे 2023 रोजी देशभरातील सर्व केंद्रांमध्ये आपला 64 वा स्थापना दिवस साजरा केला. यानिमित्ताने मुख्य कार्यक्रमाचा भाग म्हणून पुण्यातील सीमा रस्ते संघटना शाळा आणि केंद्रात मुख्य अभियंते आणि उपकरणे व्यवस्थापन परिषद आयोजित करण्यात आली होती. संरक्षण राज्यमंत्री अजय भट्ट या कार्यक्रमात उपस्थित होते. स्थापना दिवसानिमित्त, संरक्षण राज्य मंत्र्यांच्या हस्ते पुण्यातील केंद्राच्या आवारात बीआरओ तांत्रिक प्रशिक्षण संकुल आणि स्वयंचलित ड्रायव्हिंग ट्रॅकचे उद्घाटन झाले. या सुविधांमुळे सीमा रस्ते संघटना कर्मचार्‍यांचा प्रशिक्षण दर्जा सुधारेल आणि विविध आव्हानांना तोंड देण्यासाठी ते अधिक चांगल्या प्रकारे सज्ज होण्यास मदत होईल.

‘डिजिटल इंडिया’ उपक्रमाचा एक भाग म्हणून विकसित केलेले बीआरओ-केंद्रित सॉफ्टवेअरही यावेळी लॉन्च करण्यात आले. बीआरओ च्या कामकाजाचे विविध पैलू स्वयंचलित करण्यासाठी तसेच सुरळीत आणि जलद काम व्हावे यासाठी आणि वाढीव पारदर्शकतेसाठी रिक्रूटमेंट मॅनेजमेंट सिस्टीम, इलेक्ट्रॉनिक मेजरमेंट बुक आणि वर्क मॅनेजमेंट सिस्टीम हे तीनही सॉफ्टवेअर विकसित करण्यात आले आहेत.

याशिवाय, स्वदेशी वर्ग 70R डबल लेन मॉड्युलर पुलांच्या बांधकामासाठी बीआरओ आणि जीआरएसई यांच्यात सामंजस्य करार करण्यात आला. हे पूल सशस्त्र दलांच्या कार्यान्वयन तयारीला चालना देण्यासाठी मदत करतील.

एक संस्था म्हणून उत्तरोत्तर विकास साधण्यासाठी सीमा रस्ते संघटनेने ‘बीआरओ व्हिजन@2047’ वरील मोनोग्राफसह अनेक दस्तऐवजांची संकल्पना केली आहे. यामध्ये, रस्त्यालगतच्या घोषवाक्यांचे संकलन; वैद्यकीय आस्थापनांची सुधारणा आणि मानकीकरण; बीआरओ मालमत्तेचे निरीक्षण करण्यासाठी उपग्रहांच्या वापरासह संरक्षण उत्कृष्टतेसाठीच्या (iDEX) नवकल्पनांची गुणवत्ता नियंत्रण प्रयोगशाळा आणि पुलांची रचना तसेच समस्या समाधान यांचा समावेश आहे. संरक्षण मंत्रालयाच्या जनसंपर्क संचालनालयाकडून प्रकाशित केल्या जाणाऱ्या ‘सैनिक समाचार’ या पाक्षिकाच्या विशेष बीआरओ आवृत्तीचे देखील संरक्षण राज्यमंत्र्यांनी प्रकाशन केले. या आवृत्तीमध्ये बीआरओच्या आजवरच्या कामगिरींची माहिती, निर्माणाधीन प्रकल्प आणि बीआरओ चा इतिहास प्रकाशित करण्यात आला आहे.

या कार्यक्रमात संरक्षण राज्य मंत्री अजय भट्ट यांनी 10 एप्रिल 2023 रोजी सुरू झालेल्या ‘एकता अवाम श्रद्धांजली अभियान’ या मोहिमेला झेंडा दाखविला. या साहसी-जागरूकता मोहिमेत बॉर्डर रोड ऑर्गनायझेशनच्या सर्व घटकांना एकत्र आणण्यात आले होते. मोटार-सायकल आणि चार-चाकी वाहनांचा समावेश असलेल्या या मोहिमेमध्ये विविध सीमावर्ती राज्ये/केंद्रशासित प्रदेशांतील टीमनी मातीचे नमुने, नद्या/तलाव/जलसाठे आणि स्थानिक रोपे यांचे नमुने गोळा केले. भट्ट आणि इतरांनी बीआरओ शाळा आणि केंद्रात रोपांची लागवड केली.

बीआरओच्या सर्व श्रेणींतील अधिकाऱ्यांची आणि कर्मचाऱ्यांची समर्पण भावना आणि त्यांच्या कठोर परिश्रमाची अजय भट्ट यांनी आपल्या भाषणात प्रशंसा केली. बीआरओच्या जवानांनी बांधलेले रस्ते, पूल आणि बोगद्यांमुळे केवळ सशस्त्र दलांची सज्जता वाढली नाही तर सीमावर्ती भागांचा सामाजिक-आर्थिक विकास व्हायलाही मदत झाली आहे, असे ते म्हणाले. सेला बोगदा आणि नेचिफू बोगदा प्रकल्पातील लक्षणीय प्रगतीबद्दलही त्यांनी समाधान व्यक्त केले.

सीमावर्ती क्षेत्राच्या विकासाला सरकारचे सर्वोच्च प्राधान्य असल्याचे त्यांनी सांगितले. पंतप्रधान नरेंद्र मोदी यांच्या नेतृत्वाखाली नवभारत अभूतपूर्व वेगाने प्रगती करत आहे, असे मत त्यांनी पुढे व्यक्त केले. “आपण पाचवी सर्वात मोठी अर्थव्यवस्था बनलो आहोत आणि अनेक देशांना आपण लष्करी उपकरणे निर्यात करत आहोत. हा नवभारत मजबूत आहे आणि स्वतःचे हित जपण्यासाठी सक्षम आहे. आम्ही कोणापुढे झुकत नाही आणि झुकणार नाही”, असे ते म्हणाले.

सर्व पदांवर जोमाने आणि समर्पणाने काम सुरू ठेवण्याचे आवाहन बीआरओचे महासंचालक लेफ्टनंट जनरल राजीव चौधरी यांनी केले. ‘आम्ही एक तर मार्ग शोधू किंवा एक नवीन मार्ग तयार करू’ या मंत्राच्या अनुषंगाने बीआरओ उदयोन्मुख आव्हानांना सामोरे जाईल, असा विश्वासही त्यांनी व्यक्त केला.

बीआरओ 60 वर्षांहून अधिक काळ कार्यरत असून या संघटनेने भारताच्या सीमेवर तसेच भूतान, म्यानमार, अफगाणिस्तान आणि ताजिकिस्तानसह परदेशी मित्र देशांमध्ये 61,000 किलोमीटरहून अधिक रस्ते, 900 हून अधिक पूल, चार बोगदे आणि 19 हवाई क्षेत्रे बांधली आहेत.

2022-23 मध्ये बीआरओने 103 पायाभूत सुविधा प्रकल्प पूर्ण केले. एका वर्षात या संस्थेने बांधलेले हे  सर्वात जास्त प्रकल्प आहेत. यामध्ये पूर्व लडाखमधील श्योक ब्रिज आणि अरुणाचल प्रदेशमधील अलोंग-यिंकिओंग रोडवरील लोड क्लास 70 च्या स्टील आर्क सियोम ब्रिजच्या बांधकामाचा समावेश आहे. हे आणि यासारखे इतर धोरणात्मक महत्त्वाचे प्रकल्प संरक्षण मंत्री राजनाथ सिंह यांनी गेल्या वर्षभरात राष्ट्राला समर्पित केले आहेत.

आदित्य ठाकरे यांच्या बालभारती-पौडफाटा रस्त्याबाबतच्या भूमिकेवर माजी महापौर मुरलीधर मोहोळ यांची भूमिका…

पुण्यातील विकास प्रकल्पांचा ‘कांजूरमार्ग’ होऊ देणार नाही !

पुणे – टेकड्या ,नद्या ,नाले आणि एकूणच निसर्गाबद्दल काळजी घ्या,विकासाच्या नावाखाली पर्यावरणाचा विध्वंस करू नका असे सांगत पुण्यात वेताळ टेकडी ला शिवसेनेच्या आदित्य ठाकरेंनी भेट दिल्यावर पुण्याचे माजी महापौर मुरलीधर मोहोळ यांनी ठाकरेंना टीकेचे लक्ष्य करत म्हटले आहे कि,’आदित्य ठाकरेंनी मुंबईतील आरे कारशेडचे काम थांबवून कांजूरमार्गच्या जागेवर तीन मेट्रो लाईन्सच्या कारशेडचा अत्यंत अव्यवहार्य पर्याय निवडला होता. स्वतःच्या ‘इगो’पायी मुंबईकरांच्या डोक्यावर १० हजार कोटींचा बोजा आला.पर्यावरणाचं रक्षण आणि ज्वलंत नागरी प्रश्नांची सोडवणूक यांचा समतोल न राखता येणाऱ्यांनी पुण्यात येऊन अर्धवट आणि चुकीच्या माहितीच्या आधारे काहीही बोलावे, हा मोठा विनोद आहे.

मोहोळ यांनी पुढे असेही म्हटले आहे कि,’आदित्यजी, मी स्वतः पुण्याचा महापौर राहिलेलो आहे. तुमच्यापेक्षा पुण्याची, पुणेकरांच्या नागरी प्रश्नांची आणि पर्यावरणाची आपल्यापेक्षा अधिक जाण आणि तळमळ आहे. कधीतरीच पुण्यात प्रकटून पुणेकरांबद्दलची खोटी आणि संधीसाधू तळमळ दाखवू नका.नदीकाठसुधार आणि बालभारती-पौडफाट रस्ता हे दोन्ही विकास प्रकल्प पर्यावरणाची काळजी घेऊनच पुढे नेण्यात येत आहेत. तरीही यावर काही पुणेकरांचे आक्षेप असल्यावर त्यावर निश्चितच सुचनांचा विचार करुन पुढे जाऊ.पण बालभारती-पौडफाटा रस्ता रद्दच करण्याची मागणी करण्याचा आदित्य यांना नैतिक अधिकार काय? केवळ विरोधाला विरोध म्हणून राजकारण करण्याच्या प्रयत्नांना सुज्ञ पुणेकर थारा देणार नाहीत.