लोकांची कामे वाढवून ठेवण्याचा प्रशासकीय प्रताप

पुणे- मिळकत करात पूर्वी असलेली आणि नंतर काढून घेतलेली ४० टक्के सवलत पुन्हा सुरु करताना प्रशासकीय कुत्तरओढीत नागरिकांना खेचून त्रास देण्याचा धंदा कशाला करता ? सरळ सरळ ४० टक्के कपात करूनच बिले पाठवा असा नागरी सूर असताना महापालिकेने कागदपत्रांची , विनवणी अर्जांची वाकडी तिकडी वाट करत उपकाराची जाणीव करून देण्याचे काम सुरु केल्याने नागरिकात रोष पसरला आहे.

महापालिकेच्या कर आकारणी आणि कर संकलन विभागाच्या चुकीमुळे घरमालक स्वत: वापर करत असलेल्या मिळकतींची ४० टक्के सवलत काढून घेत सुमारे लाख मिळकतींना फरकाच्या रकमेची देयके पाठविण्यात आली. मात्र, आता ही सवलत पूर्ववत करण्यासाठी आणि मिळकतधारकांनी भरलेली फरकाची रक्कम पुन्हा मिळविण्यासाठी मिळकतधारकांना पीटी-३ अर्ज भरण्याची सक्ती करण्यात आली आहे. अर्ज भरण्यासाठी २५ रुपयांचे चलन भरावे लागणार असून त्याचा भुर्दंड मिळकतधारकांना सहन करावा लागणार आहे. अर्ज भरण्याची सुविधा ऑनलाइन नसल्याने क्षेत्रीय कार्यालयाचे, नागरी सुविधा केंद्रांचे उंबरठे झिजवावे लागणार आहेत.

घरमालक स्वत: वापर करत असलेल्या मिळकतींची ४० टक्के सवलत कायम ठेवण्याचा निर्णय घेण्यात आल्याने यापूर्वी वाढीव देयके पाठविलेल्या मिळकतधारकांना सवलत पूर्ववत मिळविण्यासाठी आवश्यक अर्जांचे वितरण महापालिकेकडून सुरू करण्यात आले आहे. महापालिकेची संपर्क कार्यालये, क्षेत्रीय कार्यालय, मुख्य कार्यालय, नागरी सुविधा केंद्र तसेच पेठ निरीक्षक आणि विभागीय निरीक्षक कार्यालयातून हा अर्ज मिळकतधारकांना घेता येणार आहे. एक एप्रिल २०१९ पूर्वीच्या ज्या निवासी मिळकतींना ४० टक्के सवलत देण्यात आली आहे, त्या मिळकतधारकांना अर्ज करण्याची आवश्यकता नसल्याचे महापालिकेच्या कर आकारणी आणि कर संकलन विभागाकडून स्पष्ट करण्यात आले आहे.

निवासी आणि बिगरनिवासी मिळकतींना १ एप्रिल २०१९ पूर्वीच्या देखभाल-दुरुस्तीसाठी देण्यात येणारी १५ टक्के वजावट रद्द करून दहा टक्के वजावट देण्यात येणार आहे. या दोन्ही निर्णयांची अंमलबजावणी १ एप्रिल २०२३ पासून करण्यात येणार आहे. नव्याने बांधकाम झालेल्या निवासी मिळकतींची आकारणी ४० टक्के सवलत न देता १ एप्रिल २०१९ पासून पुढे झाली आहे. त्या सर्व मिळकतींना आणि ज्या मिळकतींची ४० टक्क्यांची सवलत १ एप्रिल २०१८ पासून काढून घेण्यात आली आहे, अशा मिळकतींना महापालिकेकडून फरकाच्या रकमेची देयके पाठविण्यात आली होती. या सर्व मिळकतींना १ एप्रिल २०२३ पासून सवलतीचा लाभ मिळणार आहे.

१५ नोव्हेंबरपर्यंत पीटी-३ हा अर्ज महापालिकेकडे दाखल न केल्यास मिळकतधारक मिळकतीचा स्वत: वापर करत नसल्याचे गृहीत धरून अशा मिळकतींची सवलत रद्द करण्यात येणार आहे. तर अर्ज दाखल केलेल्या मिळकतधारकांना चार समान हप्त्यामध्ये फरकाची रक्कम जमा करण्यात येणार आहे.

महापालिकेच्या चुकीमुळे शहरातील एक लाख मिळकतधारकांना फरकाच्या रकमेची देयके पाठविण्यात आली होती. यातील बहुतांश मिळकतधारकांनी फरकाची रक्कम एकरकमी भरली होती. चलन भरण्याची रक्कम किरकोळ असली तरी, महापालिकेच्या चुकीची शिक्षा मिळकतधारकांना का, असा प्रश्न उपस्थित होत आहे. त्यातच अर्ज भरण्यासाठीची सुविधा ऑनलाइन नसल्याने क्षेत्रीय कार्यालये, मुख्य भवन, नागरी सुविधा केंद्राचे उंबरठे अर्ज दाखल करण्यासाठी झिजवावे लागणार आहेत.

महापालिकेची संपर्क कार्यालये, क्षेत्रीय कायार्लय, मुख्य कार्यालय, नागरी सुविधा केंद्र तसेच पेठ निरीक्षक आणि विभागीय निरीक्षक कार्यालयातून हा अर्ज मिळकतधारकांना घेता येणार असून propertytax.punecorporation.org या संकेतस्थळावर अर्ज उपलब्ध करून देण्यात आले आहेत. अर्जासमवेत काही कागदपत्रे जोडणे बंधनकारक आहे. त्यामध्ये मिळकतीचा वापर स्वत: राहण्यासाठी करत असल्याबाबत सोसायटीचे ना हरकत प्रमाणपत्र, मतदान ओळखपत्र, पासपोर्ट, वाहनचालक परवाना, गॅसकार्ड, शिधापत्रिका तसेच शहरात अन्य ठिकाणी मिळकत असल्यास त्या मिळकतीच्या मिळकतकराच्या देयकाची प्रत अर्जासोबत पंचवीस रुपयांचे चलन भरून जोडावी लागणार आहे. पेठ निरीक्षक आणि विभागीय निरीक्षकांकडून कागदपत्रांची तपासणी केल्यानंतर प्रकरण अंतिम करण्यात येणार आहे.

महापालिकेच्या स्थायी समितीच्या निर्णयानुसार चलनापोटी २५ रुपये आकारण्याचा निर्णय घेतला आहे. ही रक्कम मोठी नाही. ऑनलाइन सुविधा दिल्यावर कागदपत्रे नीट जोडली न जाण्याची शक्यता आहे. त्यामुळे मिळकतधारक प्रत्यक्ष कागदपत्रांसह आल्यास ही प्रक्रिया सुलभ होणार आहे.

 – अजित देशमुख, उपायुक्त, कर आकारणी आणि कर संकलन विभाग

पुणे-

पाकिस्तानला गोपनीय माहिती पुरविल्याच्या आरोपावरून दहशतवादविरोधी पथकाने (एटीएस) अटक केलेले संरक्षण संशोधन आणि विकास संस्थेचे (डीआरडीओ) संचालक आणि वरिष्ठ शास्त्रज्ञ डॉ. प्रदीप कुरुलकर यांना १५ मेपर्यंत एटीएस पोलीस कोठडीत ठेवण्याचे आदेश मंगळवारी देण्यात आले. विशेष न्यायाधीश एस. आर. नावंदर यांनी हे आदेश दिले.कोठडीची मुदत मंगळवारी संपली होती. त्यामुळे कुरुलकर यांना मंगळवारी एटीएसच्या पथकाकडून न्यायालयात हजर करण्यात आले. कुरुलकर यांची चौकशी तसेच त्यांच्याकडून आतापर्यंत करण्यात आलेल्या तपासात मिळालेली माहिती एटीएसकडून न्यायालयात सादर करण्यात आली. त्यावेळी झालेल्या सुनावणीनंतर विशेष न्यायधीश एस. आर. नावंदर यांनी कुरुलकर यांना १५ मेपर्यंत एटीएस पोलीस कोठडीत ठेवण्याचे आदेश दिले. एटीएसकडून आतापर्यंत करण्यात आलेल्या तपासाची माहिती न्यायालयात सादर केली जाणार आहे. सुरक्षेचा भाग म्हणून कुरुलकर यांची गोपनीय ठिकाणी चौकशी सुरू आहे. भारतीय गुप्तचर यंत्रणेतील (रिसर्च अँड ॲनलिसिस विंग- रॉ) अधिकाऱ्यांकडून कुरुलकरांची चौकशी सुरू करण्यात आली आहे. आतापर्यंतच्या तपासात मिळालेली माहिती तसेच पुढील तपासाचे मुद्दे याबाबतचा अहवाल एटीएसकडून न्यायालयात सादर केला जाणार आहे. त्यांच्याकडून मोबाइल संच आणि लॅपटाॅप जप्त करण्यात आला आहे. कुरुलकर यांच्याकडून जप्त करण्यात आलेल्या इलेक्ट्रॉनिक उपकरणांचे तांत्रिक विश्लेषण सुरू करण्यात आले आहे.

तीन महिन्यांपासून वीजबिल न भरणाऱ्यावर कारवाई

पुणे, दि. ९ मे २०२३: पुणे परिमंडलामध्ये तीन महिन्यांपासून वीजबिल न भरणाऱ्या घरगुती, वाणिज्यिक व औद्योगिक १६ हजार ४१३ थकबाकीदारांचा वीजपुरवठा खंडित करण्यात आला आहे. तर आणखी ७१ हजार ९८ थकबाकीदारांची वीजपुरवठा खंडित करण्याची कारवाई सुरु आहे. वीजग्राहकांनी थकीत बिलांचा ताबडतोब भरणा न केल्यास वीजपुरवठा खंडित करण्याच्या नियमित कारवाईसोबतच ही धडक मोहीम महावितरणकडून सुरू आहे.

पुणे परिमंडलामध्ये तीन महिन्यांपासून विजेचे एकही बिल न भरणाऱ्या घरगुती, वाणिज्यिक व औद्योगिक थकबाकीदारांची यादी तयार करण्यात आली आहे. यामध्ये ५०० रुपयांपेक्षा अधिक थकबाकी असलेल्या ८७ हजार ५११ वीजग्राहकांनी तीन महिन्यांत एकही वीजबिल भरलेले नाही व त्यांच्याकडे ४२ कोटी ६३ लाख रूपयांची थकबाकी असल्याचे निदर्शनास आले. वारंवार आवाहन किंवा विनंती करूनही ज्या ग्राहकांनी थकीत बिलांचा भरणा केला नाही त्यांचा वीजपुरवठा खंडित करण्याची विशेष मोहीम गेल्या एप्रिल महिन्यांपासून सुरु करण्यात आली आहे. यामध्ये १३ कोटी ३७ लाख रूपयांच्या थकबाकीपोटी आतापर्यंत १६ हजार ४१३ थकबाकीदारांचा वीजपुरवठा खंडित करण्यात आला आहे. तर आणखी ७१ हजार ९८ ग्राहकांकडे २९ कोटी २८ लाख रूपयांची थकबाकी आहे. त्यांचाही वीजपुरवठा खंडित करण्याची कारवाई महावितरणकडून सुरू आहे.

पुणे शहरात तीन महिन्यांपासून वीजबिल न भरणाऱ्या घरगुती, वाणिज्यिक व औद्योगिक २६ हजार ७९६ ग्राहकांकडे ११ कोटी ८१ लाख रूपयांची थकबाकी आहे. त्यातील ६ हजार ५३६ ग्राहकांचा ४ कोटी ७१ लाखांच्या थकबाकीपोटी वीजपुरवठा खंडित करण्यात आला आहे तर उर्वरित २० हजार २६० ग्राहकांनी थकीत ७ कोटी १२ लाख रूपयांचा ताबडतोब भरणा न केल्यास त्यांचाही वीजपुरवठा खंडित करण्यात येत आहे.

पिंपरी चिंचवड शहरात १६ हजार ३०० ग्राहकांनी गेल्या तीन महिन्यांपासून १० कोटी ९१ लाख थकीत बिलांचा भरणा केलेला नाही. आतापर्यंत तीन हजार २०९ वीजग्राहकांचा ३ कोटी ५० लाखांच्या थकबाकीपोटी वीजपुरवठा खंडित करण्यात आला आहे तर आणखी १३ हजार ९१ ग्राहकांकडे ७ कोटी ४१ लाखांची थकबाकी असल्याने वीजपुरवठा खंडित करण्यात येत आहे.

ग्रामीण भागातील आंबेगाव, जुन्नर, मावळ, खेड, मुळशी, वेल्हे, हवेली तालुक्यांमध्ये ४४ हजार ४१५ घरगुती, वाणिज्यिक व औद्योगिक वीजग्राहकांनी १९ कोटी ९१ लाख रूपयांच्या थकीत बिलांचा भरणा केला नाही. त्यातील ६ हजार ६६९ ग्राहकांचा वीजपुरवठा ५ कोटी १६ लाखांच्या थकबाकीपोटी खंडित करण्यात आला आहे. तर उर्वरित ३७ हजार ७४७ वीजग्राहकांकडे १४ कोटी ७५ लाखांची थकबाकी असल्याने वीजपुरवठा खंडित करण्यात येत आहे.

वीजपुरवठा खंडित केल्यानंतर संबंधित थकबाकीदार शेजाऱ्यांकडून किंवा इतर ठिकाणाहून वायर किंवा केबलद्वारे विजेचा वापर करीत असल्याचे आढळल्यास शेजारी व संबंधित थकबाकीदारांविरुद्ध भारतीय विद्युत कायदा २००३ च्या कलम १३५/१३८ नुसार कारवाई करण्यात येत आहे. थकीत वीजबिलांचा ताबडतोब भरणा करून सहकार्य करावे व वीजपुरवठा खंडित करण्याची कटू कारवाई टाळावी असे आवाहन महावितरणकडून करण्यात आले आहे.

पुणे- कात्रज येथील स्व. राजीव गांधी प्राणीसंग्रहालयाच्या लगत असलेल्या डासांचे उत्पत्ती स्थान झालेल्या पेशवेकालीन धरणातील पाण्यावरील जलपर्णीने व्यापलेल्या भागात महापालिकेने ड्रोनद्वारे डास प्रतिबंधक औषध फवारण्यात आले..हा प्रयोग प्रायोगिक प्रथमच तत्त्वावर करण्यात आला.

या प्राणी संग्रहालय येथेच सुमारे 50 ते 55 एकरात तलाव विस्तारला असून तलावाच्या अर्थात पेशवेकालीन धरणाच्या लगतचे नैसर्गिक जंगल नाहीसे होऊन आता चारही बाजूने नागरी वस्ती,वसली आहे.कात्रज तलावातील पाणी कमी झाल्याने जलपर्णी तळाला गेली आहे. त्यामुळे मोठ्या प्रमाणात डासांचा प्रादूर्भाव वाढला आहे. याचा त्रास चारही बाजूला असलेल्या लोकवस्तीला सहन करावा लागत आहे. विशेषतः लेक टाऊन सोसायटी, गंगा ओशन पार्क सोसायटी, पद्‌मजा सोसायटी, कात्रज गावठाण व सोसायट्यांना मोठा त्रास होत असल्याच्या तक्रारी येत आहेत.

तलावाच्या बाजूने डासांचा प्रादूर्भाव रोखण्यासाठी औषध फवारणी केली जात होती. मात्र, तलावाच्या मध्यभागी जलपर्णीमुळे पोहचता येत नव्हते. यामुळे शहरात प्रायोगिक तत्वावर प्रथमच ड्रोनद्वारे औषध फवारणी करण्यात आली. या औषध फवारणीनंतर डासांचा प्रादूर्भाव कमी झाल्यास शहरातील इतर ठिकाणीही ड्रोनद्वारे औषध फवारणी प्रयोगाची अमंबलबजवणी होऊ शकते, आरोग्य अधिकारी डॉ. सूर्यकांत देवकर म्हणाले की, या बायोलॉजिकल औषधामुळे तलावातील जीव जंतूंना कोणताही धोका उत्पन्न न होता मात्र डासांच्या आळ्या या पूर्णपणे नष्ट होतील. ड्रोनमध्ये 10 लिटर बायोलॉजिकल औषधाचे मिश्रण असलेली क्षमतेची टाकी बसविण्यात आली आहे, त्याद्वारे तलावाच्या मध्यभागी जाऊन औषध फवारणी करण्यात आली.

कात्रज प्राणिसंग्रहालयातील तलावातील जलपर्णी मनपा पर्यावरण विभागाकडून काढली जात आहे. डासांचा प्रादूर्भाव रोखण्यासाठी किनाऱ्याच्या भागात औषध फवारणी केली जात होती. तलावच्या मध्यभागी ड्रोनद्वारे औषध फवारणी करण्यात आली असून पुढील दहा-पंधरा दिवसांत परिणाम तपासून पुढील धोरण ठरविण्यात येईल.
-डॉ. सूर्यकांत देवकर, सहायक आरोग्य प्रमुख मनपा

पुणे : सासवड रस्त्यावरील दिवे घाटात टँकर उलटून दुचाकीला धडकल्याने दोघांचा मृत्यू झाल्याची घटना सोमवारी रात्री घडली. अपघातात चौघे जण जखमी झाले. कच्च्या अल्कोहोलची वाहतूक करणारा दिवे घाटात उलटला. टँकरने दिवे घाटातून निघालेल्या दोन दुचाकीस्वारांना धडक दिली. अपघातात दोघांचा मृत्यू झाला. टँकर पलटल्यानंतर त्यात दोघे जण अडकल्याची माहिती अग्निशमन दलाला मिळाली. त्यानंतर अग्निशमन दलाच्या जवानांनी घटनास्थळी धाव घेेतली. केबीनमध्ये अडकलेल्या दोघांना बाहेर काढण्यात आले. अपघातात चौघे जण जखमी झाले असून त्यांना तातडीने रुग्णालयात दाखल करण्यात आले.

पुणे-ईडी अर्थात सक्तवसुली संचालनालयाने पुण्यात मोठी कारवाई केली आहे‘एएनआय’ने दिलेल्या वृत्तानुसार, सक्तवसुली संचालनालयाने (ED) पनामा पेपर्स प्रकरणात संशयास्पद व्यवहार केल्याप्रकरणी झेड. एस. पूनावाला आणि त्याच्या कुटुंबातील सदस्यांविरोधात तपास केला . पनामा पेपर प्रकरणात झेड. एस. पूनावाला यांचे काही व्यवहार संशयास्पद आढळले होते. याप्रकरणी ईडीने त्यांच्यावर कारवाई केली असून त्यांची मुंबईतील सीजे हाऊसमधील ४१.६४ कोटी रुपये किमतीच्या तीन स्थावर मालमत्ता जप्त केल्या आहेत. फेमा (FEMA) कायद्याअंतर्गत ही कारवाई करण्यात आली.

ईडीने फेमा कायद्यातील तरतुदींनुसार, पूनावाला यांची मुंबईच्या वरळी येथील सीजे हाऊसमधून ४१.६४ कोटी रुपयांच्या तीन स्थावर मालमत्ता जप्त केल्या. या प्रकरणाचा अधिक तपास ईडीकडून केला जात आहे.जवरेह सोली पुनावाला हे पुण्यातील सीरम इन्स्टिट्यूटचे संचालक असल्याचे वृत्त सूत्रांनी दिले आहे.

पनामा पेपर्स काय आहे?

कर नंदनवन म्हणून ओळखल्या जाणाऱ्या अमेरिकेजवळील पनामा या देशात पैशाचा फेरफार करण्यासाठी जगभरातील अनेक उद्योगपतींसह सेलेब्रिटींनी बनावट कंपन्या स्थापन केल्या. या कंपन्यांचा वापर बेहिशेबी पैसा लपवणे, कर चुकवणे अशा कारणांसाठी केला गेला. जगभरातील शोधपत्रकारांनी एकत्र येत पनामातील मोझॅक फॉन्सेका या कायदेशीर सेवा पुरवणाऱ्या कंपनीची लाखो कागदपत्रे उजेडात आणली. 2016 साली उघड झालेल्या कागदपत्रांत जगातील अनेक मोठ्या व्यक्तींची नावे समोर आली. ज्यामध्ये 500 भारतीयांचाही समावेश होता.

याबाबतची चौकशी करण्यासाठी भारत सरकाकडून मल्टी एजन्सी गृपची (MSG) स्थापना करण्यात आली. ज्याद्वारे उघड झालेल्या गैरव्यवहारातील 426 व्यक्तींची चौकशी चालू आहे. पनामा पेपर्स प्रकरणात नाव आल्यामुळेच पाकिस्तानी पंतप्रधान नवाज शऱीफ यांना पंतप्रधानपद सोडावे लागले होते. एडवर्ड स्नोडेन यानेही हा आजवरचा सर्वात मोठा गौप्यस्फोट असल्याचा दावा केला होता. 

11 दशलक्ष म्हणजे तब्बल एक कोटी दहा लाख पानांचा गोपनीय दस्तावेज या शोध पत्रकारांच्या हाती लागला होता.जगभरातील अनेक शोध पत्रकार या मोहीमेवर काम करत होते. परदेशी पैसे पाठवणं हे बेकायदेशीर नाही, मात्र काही देशांचे प्रमुखच जेव्हा त्यांच्याकडील अतिरिक्त पैसा असा विदेशात छुप्या मार्गाने पाठवतात, तेव्हा नक्कीच संशयास्पद आणि आक्षेपार्ह असतं. यामध्ये 128 राजकारणी आणि बडे अधिकारी यांच्यासह तब्बल 12 देशांचे प्रमुखांचीही नावे आहेत.

पुणे:नोकरी नसलेल्या पतीला पत्नीने 50 हजार रुपयांची कायमस्वरूपी पोटगी देण्याचे मान्य करत घटस्फोट घेतल्याची घटना पुण्यातून समोर आली आहे. पती-पत्नीने सहमतीने दाखल केलेला घटस्फोटाचा हा दावा न्यायालयाने निकाली काढला आहे.

सह दिवाणी न्यायाधीश वरीष्ठ स्तर एस. व्ही. फुलबांधे यांनी हा निकाल दिला. पतीच्या वतीने ॲड. नरेंद्र बाबरे यांनी युक्तिवाद केला.

याविषयी सविस्तर वृत्त असे की, उच्चशिक्षित जोडप्याचा 2018 मध्ये विवाह झाला होता. मात्र एकमेकांसोबत पटत नसल्याने दोघेही 2020 पासून विभक्त राहत होते. यापैकी पती हा बीटेक तर पत्नी एमटेक झालेली होती. पत्नी ही एका खासगी कंपनीत चांगल्या पगाराची नोकरी करते.

पत्नीचे खोटे प्रतिज्ञापत्र निदर्शनास

पत्नीनेच पतीपासून घटस्फोटासाठी अर्ज केला होता. यानंतर न्यायालयाने पोटगीचा आदेश दिला होता. मात्र पत्नीने पोटगीसाठी खोटे प्रतिज्ञापत्र दाखल केल्याचे पतीने न्यायालयाच्या निदर्शनास आणून देत तक्रार केली. आपल्याला नोकरी नसल्याने पत्नीनेच पोटगी देण्याची मागणी पतीने केली. यानंतर न्यायालयाने तडजोडीने दावा निकाली काढण्याबाबत विचारणा केल्यावर दोघांनी त्याला तयारी दाखवली. तर पत्नीने पोटगी देण्यास सहमती दर्शवली.

पुणे, 8 मे 2023

बनावट कागदपत्रांच्या आधारे मिळवलेले फोनचे सीमकार्डस सायबर गुन्ह्यांसाठी वापरले जातात, हे तर उघड सत्य आहे. असे बनावट सीमकार्डस तयार करणारे लोक आता या गैरव्यवहारात इतके सरावले आहेत, की त्यांनी अशा प्रकारची बनावट ओळखपत्रे/ बनावट पत्ते दाखवणारी कागदपत्रे तयार केली आहेत, जी एकेक  प्रकरणापुरता तपास करताना , मानवी तपास पद्धतीत कधीही पकडली जाणार नाहीत. हे लक्षात घेऊन, दूरसंचार विभागाने, अशा कागदपत्रांच्या आधारे होणारे सायबर गुन्हे रोखण्याचे आव्हान हाती घेतले असून त्यासाठी अभिनव आणि स्वदेशी कृत्रिम बुद्धीमत्ता तंत्रज्ञान, ह्या संकल्पनेचा वापर करत त्या आधारावर, चेहऱ्याची ओळख पटवणाऱ्या फेशियल रेक्गनिशन पॉवर्ड सोल्यूशन (ASTR) ह्या अत्याधुनिक प्लॅटफॉर्मच्या मदतीने  बनावट सिम कार्डस शोधून काढली आहेत.

ASTR प्रकल्पामागचे उद्दिष्ट सर्व प्रकारच्या दूरसंचार सेवा प्रदात्यांच्या ग्राहकांचे एकत्रित विश्लेषण करणे, आणि विश्वासार्ह नसलेले मोबाईल क्रमांक ओळखून त्यातून ते वजा करण्याचे काम केले गेले. या सिस्टिममध्ये दूरसंचार कंपन्यांनी, दूरसंचार विभागाला दिलेल्या ग्राहकांचा डेटाबेस वापरुन, एकच चेहरा आणि त्याचे वेगवेगळे क्रमांक ओळखले जातात.

याच प्रणालीचा वापर करत, महाराष्ट्र एलएसएने दूरसंचार विभागाच्या ग्राहक डेटाबेसचे विश्लेषण केले आणि बनावट कागदपत्रांच्या आधारे जारी केल्याचा संशय असलेले एकूण 21031 सिम ओळखून ती  रद्द केली गेली .

अशा फसव्या/बेकायदेशीर कारवायांमध्ये सहभागी असलेल्या दोषी लोकांवर आणि सिम विक्रेत्यांवर कारवाई करण्यात येत आहे. अशा PoS/सिम विक्रेत्यांना सेवा प्रदात्यांद्वारे आणि संपूर्णपणे काळ्या यादीत टाकले जात आहे. पुढील तपास करून दोषींवर आवश्यक कारवाई करण्यासाठी पोलिसांत तक्रार करण्यात येत आहे.

वल्लरी प्रकाशनतर्फे पारिजात या काव्यसंग्रहाचे प्रकाशन
पुणे :  कवीला जात धर्म असतो. परंतु त्या कवीने आपल्या कवितेमध्ये मांडलेल्या वेदना आणि भावनेला जात धर्म नसतो. आजच्या काळामध्ये लोकांच्या मनामध्ये जाती-धर्माचे विष कालवून समाजामध्ये तेढ निर्माण करण्याचा प्रयत्न केला जात आहे. अशा वेळी समाजामध्ये  सांस्कृतिक संवादाची अतिशय गरज आहे, असे मत ज्येष्ठ साहित्यिक, अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांनी व्यक्त केले.

वल्लरी प्रकाशनातर्फे व्यंकटेश कल्याणकर यांनी संपादित केलेल्या “पारिजात” या काव्यसंग्रहाचे प्रकाशन डॉ. श्रीपाल सबनीस यांच्या हस्ते झाले, त्यावेळी ते बोलत होते. वरिष्ठ पोलीस निरीक्षक अशोक इंदलकर, जिल्हा न्यायाधीश सुनील वेदपाठक, प्रकाशक व्यंकटेश कल्याणकर, कवयित्री आश्लेषा महाजन, यशदातील अधिकारी डॉ. बबन जोगदंड, प्रकाश तांबे, मानसी चिटणीस, ज्योती इनामदार, अपूर्वा देव, महेश कुलकर्णी यावेळी उपस्थित होते.

डॉ. श्रीपाल सबनीस म्हणाले, आज माणसा-माणसांमध्ये संवाद कमी होत चालला आहे. जर माणसांमध्ये संवाद राहिला नाही तर संस्कृतीमध्ये संवाद आणि त्याचा विकास कसा होणार. त्यामुळेच कवी आणि साहित्यिकांची समाजाला अत्यंत गरज आहे. साहित्याच्या माध्यमातून समाज एकत्र आणण्याचे महत्त्वपूर्ण काम आज होत आहे. कविता ही केवळ साहित्य नव्हे तर एकात्मतेची भावना निर्माण करण्याचे साधन आहे.

डॉ. बबन जोगदंड म्हणाले, समाजामध्ये प्रबोधन होण्यामध्ये कवींचे मोठे योगदान आहे. कविता हे केवळ साहित्य नव्हे तर तो एक इतिहास आहे. ज्याप्रमाणे पुस्तके माणसं घडवतात, त्याचप्रमाणे कवितांमधून समृद्ध समाजाची निर्मिती होत असते.

अशोक इंदलकर म्हणाले, सर्वांना प्रसन्न करणारे संगीत आपण नेहमी ऐकतो त्या संगीताचे मूळ हे कवितेमध्येच असते. पोलीस खात्यामध्येही हळव्या आणि कलात्मक मनाची अनेक माणसे आहेत. पोलिसांचेही समाजाच्या रक्षणासोबतच साहित्य क्षेत्रातही  योगदान आहे.

आश्लेषा महाजन यांनी पारिजातमधील कवितांचा आढावा घेतला. त्या म्हणाल्या, “कविंनी मोठ्या प्रमाणात लिहिणे ही अभिव्यक्तीची लोकशाही आहे. लिहिताना स्वतः:साठी लिहिण्याबरोबरच समाजासाठी लिहावे.”

सुनील वेदपाठक म्हणाले, कविता हा अत्यंत अवघड साहित्यप्रकार आहे. कविता कोणालाही शिकविता येत नाही किंवा त्या संबंधात कोणालाही मार्गदर्शन करता येत नाही. कवितेचा आनंद केवळ कवीलाच नव्हे तर ती कविता वाचणाऱ्यालाही घेता आला पाहिजे .कविता हे एक प्रतिभा संपन्नतेचे लक्षण आहे.

मानसी चौगुले, शुभांगी जाधव, मुकुंद काजरेकर, सुरेश काळे,  प्रशांत लिंगाडे, वैशाली मराठे, चंचल मुळे, छाया नागर्थवार, निशिगंधा निकस, मंजुषा पागे, रसिका पनके , श्रीपाद पसारकर, प्राजक्ता राजोपाध्ये, अनघा सांगरुळकर, मीनाक्षी शीलवंत, जयश्री श्रीखंडे आदी कवींनी यावेळी आपल्या कविता सादर केल्या.

व्यंकटेश कल्याणकर यांनी प्रास्ताविक केले. प्रज्ञा कल्याणकर यांनी निवेदन केले आरती परळकर यांनी स्वागत गीत तर कीर्ती देसाई यांनी पसायदान म्हटले. मानसी चिटणीस यांनी आभार प्रदर्शन केले.