राज्यात आघाडी; १ कोटी २० लाख रुपयांची वार्षिक बचत

पुणे, दि. १३ मे २०२३: वीजबिलांसाठी छापील कागदाचा वापर पूर्णपणे बंद करीत केवळ ‘ई-मेल’ व ‘एसएमएस’चा पर्याय निवडणाऱ्या पुणे परिमंडलातील पर्यावरणस्नेही वीजग्राहकांनी एक लाखाचा टप्पा गाठला आहे. महावितरणच्या ‘गो-ग्रीन’ योजने अंतर्गत पुणे परिमंडलाने राज्यात आघाडी घेतली असून या योजनेमुळे एक लाख सात वीजग्राहकांची तब्बल एक कोटी २० लाख ८४० रुपयांची वार्षिक बचत होत आहे.

गेल्या फेब्रुवारीपासून या योजनेमध्ये सहभाग नोंदविणाऱ्या पर्यावरणस्नेही ७ हजार १९४ वीजग्राहकांची भर पडली आहे. राज्यात ३ लाख ८७ हजार ७५७ वीजग्राहकांनी गो-ग्रीन योजनेत सहभाग घेतला आहे. यामध्ये पुणे परिमंडलामध्ये सर्वाधिक १ लाख ७ त्यानंतर कल्याण- ४२ हजार २१४ व भांडूप परिमंडलामध्ये ३७ हजार ३९६ ग्राहक या योजनेत सहभागी झाले आहेत.

महावितरणच्या ‘गो-ग्रीन’ योजनेनुसार छापील वीजबिलाच्या कागदाऐवजी फक्त ‘ई-मेल’ व ‘एसएमएस’चा पर्याय निवडल्यास प्रतिबिलात १० रुपये सवलत देण्यात येत आहे. त्यामुळे योजनेत सहभागी ग्राहकांची वीजबिलांमध्ये वार्षिक १२० रुपयांची बचत होत आहे. वीजबिल तयार झाल्यानंतर लगेचच संगणकीय प्रणालीद्वारे ते ‘गो-ग्रीन’मधील ग्राहकांना ‘ई-मेल’द्वारे पाठविण्यात येत आहे. सोबतच ‘एसएमएस’द्वारे देखील वीजबिलाची माहिती देण्यात येत आहे. त्यामुळे ग्राहकांना प्रॉम्ट पेमेंटचा लाभ घेणे अधिक शक्य झाले आहे.

पुणे परिमंडल अंतर्गत पुणे शहरात ५३ हजार २७३ ग्राहक ‘गो-ग्रीन’ योजनेत सहभागी झाले आहेत. यामध्ये हडपसर-१ उपविभागामधील ६ हजार ५०, वडगाव धायरी- ५ हजार १८४, धनकवडी– ४ हजार ९००, औंध- ४ हजार ३६५ आणि विश्रांतवाडी उपविभागामध्ये ३ हजार ८५७ ग्राहकांची संख्या लक्षणीय आहे. पिंपरी चिंचवड शहरात ‘गो-ग्रीन’मध्ये २९ हजार २०५ वीजग्राहक सहभागी झाले आहेत. यामध्ये सांगवी उपविभागातील सर्वाधिक ९ हजार ४२, चिंचवड – ५ हजार ६६१ आणि आकुर्डी- ५ हजार ५२५ मोठ्या संख्येने योजनेत सहभागी आहेत. तसेच पुणे ग्रामीण मंडल अंतर्गत आंबेगाव, जुन्नर, खेड, मावळ, मुळशी, वेल्हे व हवेली तालुक्यामध्ये १७ हजार ५२९ ग्राहकांनी ‘गो-ग्रीन’मध्ये सहभाग घेतला आहे. यामध्ये हडपसर ग्रामीण उपविभागातील ४ हजार ७१२ वीजग्राहकांची सर्वाधिक संख्या आहे.

वीजग्राहकांनी ‘गो-ग्रीन’ योजनेचा पर्याय निवडण्यासाठी महावितरणचे मोबाईल अ‍ॅप किंवा www.mahadiscom.in संकेतस्थळावर अधिक माहिती उपलब्ध आहे. ‘गो-ग्रीन’ योजनेत सहभागी झालेल्या वीजग्राहकांना छापील वीजबिलांची गरज भासल्यास त्यांना ईमेलद्वारे प्राप्त झालेले दरमहा वीजबिल संगणकात सॉफ्ट कॉपीमध्ये जतन करून ठेवता येईल. सोबतच संकेतस्थळावर चालू वीजबिलासह मागील ११ महिन्यांचे वीजबिले मूळ स्वरुपात उपलब्ध आहेत. आवश्यकतेप्रमाणे वीजग्राहकांना ते कधीही डाऊनलोड करण्याची किंवा मूळ स्वरूपात रंगीत प्रिंट करण्याची सोय आहे.

‘समृद्ध पर्यावरणासाठी ‘गो-ग्रीन’ योजना काळाची गरज आहे. ग्राहकांसाठी चालू व मागील वीजबिल, भरणा तसेच मासिक वीज वापर आदींची माहिती महावितरण मोबाईल ऍप व वेबसाईटवर उपलब्ध आहे. त्यामुळे कागदी मासिक बिलाचा वापर बंद करून या योजनेत आणखी जास्तीत जास्त वीजग्राहकांनी सहभागी व्हावे’.

 – राजेंद्र पवार, मुख्य अभियंता, पुणे परिमंडल.

पुणे दि. १३: केंद्र शासनाने ओला, उबर व इतर ॲप आधारित ॲग्रीगेटर्स कंपन्यांसाठी जारी केलेल्या मार्गदर्शक सूचना विचारात घेऊन ॲप आधारित वाहनांच्या प्रचलनासाठी नियमावली तयार करण्याची बाब महाराष्ट्र शासनाच्या विचाराधीन असून त्याविषयी नागरिकांनी आपले अभिप्राय कळवावे, असे आवाहन उप प्रादेशिक परिवहन अधिकारी अतुल आदे यांनी केले आहे.

ॲप आधारीत वाहनांसाठी केंद्राच्या मार्गदर्शक सुचना www.morth.nic.in या संकेतस्थळावर उपलब्ध आहेत. सेवानिवृत्त अपर मुख्य सचिव सुधीर श्रीवास्तव यांच्या अध्यक्षतेखाली महाराष्ट्र मोटार वाहन समुच्चक नियमावलीचा मसूदा तयार करण्यासाठी महाराष्ट्र शासनाद्वारे समिती स्थापन करण्यात आली आहे. नागरिकांनी आपले अभिप्राय dvcommr.enf1@gmail.com या ई-मेलवर अथवा संबंधित प्रादेशिक परिवहन कार्यालयात प्रत्यक्षरित्या २० मे २०२३ पर्यंत सादर करावेत. प्राप्त मते व अभिप्राय विचारात घेऊन सूचना अंतिम करण्याविषयी शासनातर्फे पुढील कार्यवाही करण्यात येणार आहे, असेही पिंपरी चिंचवड उप प्रादेशिक परिवहन कार्यालयातर्फे कळविण्यात आले आहे.

पुणे, दि. १३: जुन्नर-आंबेगाव उपविभागाच्या मंचर येथील कार्यालयात महसूल न्यायालयातील अर्धन्यायिक प्रकरणांसाठी आयोजित केलेल्या विशेष लोक अदालतीत १६४ प्रकरणे निकाली काढण्यात आली आहे, अशी माहिती उप विभागीय अधिकारी गोविंद शिंदे यांनी दिली.

या विशेष अदालतीत जुन्नरचे तहसिलदार रविंद्र सबनिस, आंबेगावचे प्रभारी तहसिलदार अनंता गवारी, जुन्नर तालुका वकील संघटनेचे अध्यक्ष ॲड. गाडेकर, आंबेगाव तालुका वकील संघटनेचे अध्यक्ष ॲड. गावडे, जुन्नर व आंबेगाव तालुक्यातील अनेक विधिज्ञ व प्रकरणातील पक्षकार अधिकारी व कर्मचारी यांनी सहभाग घेतला.

या विशेष लोक अदालतीत ६९० प्रकरणे तडजोडीसाठी ठेवण्यात आली होती. त्यापैकी काही प्रकरणांमध्ये तडजोड केली तसेच काही प्रकरणी लेखी युक्तीवाद दाखल करुन प्रकरण निर्णयासाठी ठेवण्यासाठी पक्षकारांनी मागणी केली. यावेळी दोन पक्षकारांनी दाखल केलेल्या दाव्यामध्ये तडजोड झाल्याने त्यांनी दाखल केलेला दावा पुढे सुरू ठेवायचा नाही असे सांगून अपील कामकाजातून निकाली काढावे म्हणून लेखी विनंती अर्ज दिला. त्यांच्या या सामंजस्याची दखल घेत सर्व गुबालपुष्प देऊन त्यांचा सन्मान करण्यात आला.

या अदालतीमध्ये सर्व अधिकारी, कर्मचारी, विधिज्ञ व पक्षकार यांनी प्रशासनास सहकार्य केल्याबद्दल उपविभागीय अधिकारी श्री. शिंदे यांनी सर्वांचे आभार मानले.

पुणे- तळेगाव दाभाडे येथील जनसेवा विकास समितीचे प्रवर्तक किशोर गंगाराम आवारे (वय ४८, ता. तळेगाव दाभाडे, ता. मावळ) यांची शुक्रवारी (ता. १२) दुपारी पावनेदोनच्या सुमारास गोळ्या झाडून व धारदार शस्त्राने वार करून हत्त्या करण्यात आली. या प्रकरणी आमदार सुनील शेळके, त्यांचा भाऊ सुधाकर शेळके, संदीप गराडे, श्याम निगडकर व त्याचे तीन साथीदार यांच्या विरुद्ध शुक्रवारी रात्री उशिरा गुन्हा दाखल करण्यात आला. आवारे यांच्या मातोश्री सुलोचना गंगाराम आवारे यांनी फिर्याद दिली आहे.

किशोर आवारे यांच्या आई तळेगाव दाभाडेच्या माजी नगराध्यक्ष होत्या. विशेष म्हणजे किशोर आवारे सुद्धा राजकारणात सक्रिय होते. त्यामुळेच त्यांचे आमदार सुनील शेळके, सुधाकर शेळके आणि संदीप गराडे यांच्यात अनेकदा खटके उडायचे. त्यामुळे यांच्यापासून आपल्या जीवाला धोका असल्याचे किशोर आवारे यांनी आपल्या आईला सांगितले होते.

किशोर आवारे यांनी स्वतःचा वेगळा गट केला होता. त्यांनी आमदार सुनील शेळकेंच्या विरोधात आघाडी उघडली होती. त्यांनी केलेल्या चुकीच्या कामांबाबत आंदोलनही केले होते. शिवाय ते संतोष शेळके यांच्यासोबत फिरत. आवारे यांचे वाढते राजकीय प्रस्थ पाहता त्यांच्यावर हल्ला केल्याचा संशय व्यक्त होत आहे.

किशोर आवारे शुक्रवारी दुपारी मारुती मंदिरे येथील तळेगाव दाभाडे नगर परिषदेच्या कार्यालयात मुख्याधिकारी यांना भेटण्यासाठी आलेले होते. मुख्याधिकारी यांना भेटून झाल्यानंतर ते नगरपरिषदेच्या कार्यालयातून बाहेर पडत असताना त्यांच्यावर दबा धरून बसलेल्या दोन हल्लेखोरांनी गोळीबार केला, तर दोन हल्लेखोरांनी कोयत्याने वार केले. त्यात श्याम निगडकर आणि त्याचे तीन साथीदार असल्याचे समजते.

हल्ल्यात आवारे गंभीर जखमी झाले. ते रक्ताच्या थारोळ्यात पडल्यानंतर संबंधित आरोपी घटनास्थळावरून पसार झाले. आवारे यांना सोमाटणे फाटा येथील पावना हॉस्पिटलमध्ये उपचारासाठी दाखल करण्यात आले. मात्र, डॉक्टरांनी तपासून मृत घोषित केले. हल्ल्याची माहिती मिळताच, तळेगाव दाभाडे पोलिस ठाण्याचे पोलिस यांच्यासह मोठा पोलीस फौज फाटा घटनास्थळी दाखल झाला. याबाबत पुढील तपास तळेगाव दाभाडे पोलीस करत आहेत.

पुणे-

” सवलत रद्द करून वाढीव मिळकत कर घेताना घाई आणि परत देताना मात्र दिरंगाई, जाचक अटी, 25 रुपये फी” अशा महानगरपालिकेच्या भोंगळ्या मिळकत कर धोरणाचा आज आम आदमी पार्टीच्या वतीने पुणे महानगरपालिकेच्या बाहेर “कर वापसी आंदोलन” करून निषेध व्यक्त करण्यात आला. आपचे राज्य संघटक व पुणे शहर कार्याध्यक्ष विजय कुंभार यांच्या नेतृत्वात हे आंदोलन करण्यात आले.

पुणे महानगरपालिकेच्या मिळकत कराच घोंगडं अजून भिजतच पडलेल आहे. स्वतः मिळकतीचा वापर करणाऱ्यांना मिळकत करात देण्यात येणारी ४०% सवलत आधी काढून घेण्यात आली आणि नागरिकांच्या प्रखर विरोधानंतर परत बहाल करण्यात आली. मात्र अजूनही ही सवलत कशा पद्धतीने द्यायची याच्या संदर्भात नेमकं कुणालाच काहीही कळत नाहीये. नागरिकांमध्ये गोंधळाचे वातावरण आहे. आता पुणे महापालिकेने यासाठी एक फॉर्म जारी केलेला आहे आणि त्याच्याबरोबर ढीगभर कागदपत्रांची मागणी तसेच २५ रुपये फीची सुद्धा मागणी केलेली आहे. अगोदरच या महागाईच्या काळात सामान्य माणसाला या सरकारकडून गळचेपी करण्याचा प्रयत्न केला जातोय, परंतु सामान्य नागरिकांच्या कष्टाचे पैसे टॅक्स रुपी घेऊन आता तो परत करण्यासाठी नागरिकांकडून वाढीव माहिती मागत आहेत. मुळात यात नागरिकांचा काहीही दोष नाही. पुणे शहरातील नागरिकांना १९६९ पासून असलेली मिळकत करातील सवलत राज्य शासनाने २०१९ पासून बंद केली होती. आता पुन्हा सुरु केली. पण हे करताना भारतीय जनता पक्ष आणि मनपा प्रशासन या दोघांनी मिळून केलेला घातलेला हा गोंधळ आहे. आता या गोंधळामुळे नागरिकांची फरपट फरफट होत आहे.

अस्तित्वात असलेली सोपी मिळकत कर प्रणाली बदलून क्लिष्ट करण्याचा आणि अनेकांना मिळकत कराच्या सवलतीपासून वंचित ठेवण्याचा पुणे महानगरपालिकेचा प्रयत्न आहे. नागरिकांच्या कष्टाचा पैसा प्रशासनाला परत द्यायचा आहे की नाही ? का फक्त नागरिकांसाठी काही तरी केल्याचा या प्रशासनाकडून आव आणला जात आहे ?

यावेळी पुढील मागण्या करण्यात आल्या.

1) 2019 नंतर कर आकारणी झालेल्या मिळकतदारांना 40% मिळकत कर सवलतीसाठी अतिरिक्त कागदपत्रे जमा करण्याचा आदेश रद्द करा. पुणे महापालिकेकडे सर्व मिळकतदारांची संपूर्ण ऑनलाईन माहिती आहे. असं असताना नागरिकांकडे वाढीव माहिती मागण्याची गरज नाही.

2) 2019 पासून घेतलेली वाढीव मिळकत कर रक्कम विनाअडथळा एकवट परत द्या. नागरिकांकडून वसूल केलेली वाढीव कराची रक्कम कोणताही अडथळा न आणता तातडीने परत द्यावी. त्यासाठी पालिकेने केलेले चार टप्पे हे नागरिकांच्या हिताच्या विरोधात आहेत.

3) नागरिकांकडून वाढीव कराच्या स्वरूपात तब्बल 250 कोटी रुपये वसूल केलेल्या पुणे महानगरपालिकेने स्व-मालकीच्या घरात राहणाऱ्या पुणेकरांवर कर सवलतीच्या अर्जापोटी अजून प्रत्येकी 25 रुपयाचा टाकलेला बोजा रद्द करा.

4) पुणे शहरात नव्याने समाविष्ट झालेल्या गावातील मिळकतींना देखील 40% कर सवलत तातडीने लागू करावी.

पुणे महानगरपालिका समोर झालेल्या आंदोलनामध्ये आम आदमी पार्टीचे राज्य संघटक, पुणे शहर कार्याध्यक्ष विजय कुंभार, डॉ अभिजित मोरे, एकनाथ ढोले, किरण कद्रे, सेंथिल अय्यर, सुनीता काळे, वैशाली डोंगरे, साहील परदेशी, शेखर ढगे, रोहन रोकडे, अविनाश भाकरे, संजय भूमकर,अमित म्हस्के, मनोज शेट्टी, श्रद्धा शेट्टी, मिताली वडावराव, उत्तम वडावराव, अमोल काळे, अक्षय दावडीकर, संजय कतारनवरे, चेंथील अय्यर, गणेश थरकुडे, तहसीन देसाई, मीरा बिघे, माधुरी गायकवाड, शिवाजी डॉलरे, फॅबियन अण्णा सेमसन, किशोर मजुमदार, सर्फराज मोमीन, अमोल मोरे, घनःश्याम मारणे, सूरज सोनावणे, जोगिंदर पाल तुरा, साजिद खान, राशीदा सिद्दिकी, समीर अरावडे, रऊफ शेख, राजू परदेशी, आरती करंजावने, धर्मेंद्र डोंगरे, अनिल घोणे, किरण कांबळे, निखिल नेरकर, मिलींद बागलकोटे, आनंद अंकुश, वीरेंद्र बिघे, ऋतूज बिघे, अनिल कोंढाळकर, हेमंत बिघे, विकास चव्हाण, निखिल देवकर, आसिफ बागवान, सुनिता शेरखाने, राजेंद्र साळवे, अमित राखपसरे, सुनंदा जाधव, सचिन कोतवाल, रवी लाटे, बाप्पू रणसिंग, निरंजन अडागळे, मनोज फुलावरे, नरेन्द्र गायकवाड, गणेश जांगमल्ली, अंजली इंगळे, रामभाऊ इंगळे, सुभाष जाधव, शंकर थोरात, ऋषिकेश मारणे, सुजित अग्रवाल हे उपस्थित होते.

अखिल मंडई मंडळातर्फे गणेशोत्सव कार्यकर्त्यांचे निवेदन
पुणे : गणेशोत्सवाची शान असलेल्या विसर्जन मिरवणुकीची सुरूवात मंडई येथील लोकमान्य टिळक पुतळ्यापासून केली जाते. गणेशोत्सव काही महिन्यांवर येऊन ठेपला असला तरी देखील मंडई येथील टिळक पुतळा ते बाबूगेनू चौक तसेच मंडई परिसरातील मेट्रोची कामे थांबली आहेत. ही थांबलेली कामे त्वरीत सुरू होऊन वेळेत संपणे अत्यंत आवश्यक आहे असल्याचे सांगत अखिल मंडई मंडळातर्फे गणेशोत्सव कार्यकर्त्यांनी महाराष्ट्र मेट्रो रेल कॉर्पोरेशन लिमिटेडला निवेदन दिले आहे.

अखिल मंडई मंडळाचे अध्यक्ष अण्णा थोरात यांनी महाराष्ट्र मेट्रो रेल कॉर्पोरेशन लिमिटेड चे संचालक अतुल गाडगीळ यांना निवेदन दिले. लोकमान्य टिळक पुतळ्यापासून लक्ष्मी रस्त्याकडे मानाच्या पाच गणपतींची तसेच भाऊ रंगारी व अखिल मंडई मंडळ यांची विसर्जन मिरवणूक सुरू होते. गणेशोत्सावाचा महत्त्वाचा भाग असलेल्या गणेश विर्सजनाच्या मिरवणूका विनासायस सुरू होण्याकरिता या परिसरातील थांबलेले काम त्वरीत सुरू होऊन वेळेत संपणे अत्यंत आवश्यक आहे.

अण्णा थोरात म्हणाले, गणेशोत्सव ४ महिन्यांवर आला आहे. महाराष्ट्र मेट्रो रेल कॉर्पोरेशनचे मंडई येथील टिळक पुतळा ते बाबूगेनू चौक येथे भुयारी मार्गाचे काम तसेच मंडई परिसरातील इतर मेट्रोची कामे थांबली आहेत, असे निदर्शनास आले. त्यामुळे येथील काम त्वरित सुरु करून लवकर संपवावे, अशी आम्हा गणेशोत्सव कार्यकर्त्यांची मागणी असल्याचे त्यांनी सांगितले.