माजी खासदार काकडे यांच्या संपर्क मोहिमेत कॉंग्रेस नेत्याचेही परिवर्तन …?

पुणे- कालपासून पुण्यातील सहा विधानसभा मतदार संघात माजी खासदार संजय काकडे यांनी प्रकाशित केलेल्या ‘मोदी@9’ या पुस्तिकेच्या वाटपाच्या निमित्ताने काकडे यांनी जोरदार संपर्क मोहीम सुरु केली आहे . या संपर्क मोहिमेत त्यांनी मॉल पासून हातगाडीवाले, हॉटेल्स , विविध दुकानदार तेथील ग्राहक यांना भेटून प्रत्यक्षात पुस्तक वाटपाचे काम सुरु ठेवले आहे. या वेळी त्यांनी कॉंग्रेस मध्ये मोठ मोठी पदे भूषविलेले अल्पसंख्यांकांचे नेते म्हणविले जाणारे पी ए इनामदार यांचीही भेट घेतली यावेळी इनामदार यांनी त्यांचे स्वागत करून पुस्तिकाच केवळ स्वीकारली नाही तर मोदी यांच्या बाबत कौतुकाचे उद्गार देखील काढले , गेल्या ५० वर्षात एवढा कार्यक्षम पंतप्रधान झालेला नाही त्यांच्या समवेतच्या अन्य नेत्यांनी , कार्यकर्त्यांनी देखील मोदींच्या क्षमतेप्रमाणे काम करणे गरजेचे आहे, आंतरराष्ट्रीय स्तरावर मोदींनी जेवढे नाव कमविले तेवढे कोणीच कमविले नाही असेही ते म्हणाले. वेगवेगळ्या भागात काकडे यांचे स्वागतही झाले अनेकांनी आपल्या भावना व्यक्त केल्या .पहा आजच्या दुपारनंतर रात्रीपर्यंतच्या या संपर्क मोहिमेची एक झलक ….

पुणे दि. २६: राज्य शासनाचा महत्त्वाकांक्षी प्रकल्प असलेला प्रस्तावित पुणे चक्राकार रस्ता (रिंग रोड ) हा प्रकल्प केवळ पुण्यासाठीच नव्हे तर राज्य आणि देशाच्यादृष्टीने महत्त्वाचा प्रकल्प असून सर्व जमीनधारकांना विश्वासात घेऊन या प्रकल्पासाठीच्या भूसंपादन प्रक्रियेला गती द्यावी, असे आदेश जिल्हाधिकारी डॉ. राजेश देशमुख यांनी दिले.

प्रस्तावित पुणे चक्राकार रस्त्याच्या (रिंग रोड) भूसंपादन प्रक्रियेला वेग देण्याच्या अनुषंगाने सर्व संबंधित यंत्रणांचे अधिकारी, भूसंपादन अधिकारी, प्रांताधिकारी, तहसीलदार, नायब तहसीलदार, मंडळ अधिकारी, तलाठी यांच्यासह महाराष्ट्र राज्य रस्ते विकास महामंडळाच्या अधिकाऱ्यांची संयुक्त कार्यशाळा जिल्हाधिकारी कार्यालयात आयोजित करण्यात आली होती. त्यावेळी ते बोलत होते. कार्यशाळेस महाराष्ट्र राज्य रस्ते विकास महामंडळाचे सह व्यवस्थापकीय संचालक कैलास जाधव, अधीक्षक अभियंता राहूल वसईकर, अपर जिल्हाधिकारी हणुमंत अरगुंडे आदी उपस्थित होते.

जिल्हाधिकारी डॉ. देशमुख म्हणाले, राज्याच्या सकल राज्य उत्पादनामध्ये (जीएसडीपी) पुणे शहर व जिल्ह्याचे 15 टक्के इतके योगदान असते. प्रस्तावित रिंग रोड मुळे वेगवान मालवाहतुकीला गती मिळून यामध्ये अधिक भर पडेल. त्यामुळे या प्रकल्पासाठी गतीने भूसंपादन प्रक्रिया करुन प्रकल्पाला सुरूवात होणे महत्त्वाचे आहे. या प्रकल्पात मोबदल्याची रक्कमही समाधानकारक निश्चित करण्यात आलेली असल्याने संमती करारनामे व संमती निवाड्यांना जास्तीत जास्त प्राधान्य द्यावे. संमती करारनाम्याद्वारे एकूण मोबदल्याच्या 25 टक्के अतिरिक्त वाढीव मोबदला प्राप्त होऊ शकतो. या बाबीसह पारदर्शक पद्धतीने, लोकांच्या सर्व शंकांचे शंभर टक्के निराकरण करत व योग्य दस्ताऐवजीकरण करत काम केल्यास सर्व प्रक्रिया गतीने आणि जमीनधारकांच्या सहकार्याने पूर्ण होईल, असा विश्वासही जिल्हाधिकाऱ्यांनी व्यक्त केला.

गेल्या 2 वर्षात पुणे जिल्ह्यातील महसूल, भूसंपादन, भूमी अभिलेख, मूल्यांकन आदी सर्वच विभागांनी अतिशय वेगाने काम करुन मेट्रो मार्ग, पालखी मार्ग, पुणे- मीरज नवीन ब्रॉडगेज लाईन, लोणंद- बारामती नवीन रेल्वेमार्ग, चांदणी चौक एकात्मिक प्रकल्प आदींसाठी भूसंपादन प्रक्रियेत वाखाणण्याजोगे काम केले आहे. त्यामुळे या प्रकल्पासाठीच्या भूसंपादनासाठीही आवश्यक नोटीसा देणे, गावनिहाय शिबीरे आयोजित करणे आदी प्रक्रिया राबवित जास्तीतजास्त संमतीनिवाडे होतील याकडे लक्ष द्यावे. या प्रक्रियेत ग्रामस्तरीय तलाठी, मंडळ अधिकारी, नायब तहसीलदार, भूकरमापक यांची अत्यंत महत्त्वाची भूमिका आहे, असेही ते म्हणाले.

जिल्हा, राज्य आणि देशाच्या प्रगतीमध्ये भर घालण्याऱ्या या प्रकल्पामध्ये आपला सहभाग असेल या अभिमानाच्या भावनेतून या भूसंपादन प्रक्रियेत काम करा, अशा शब्दात महसूल विभाग व सर्व संबंधित अधिकाऱ्यांना डॉ. देशमुख यांनी आवाहन केले.

एमएसआरडीसीचे सह व्यवस्थापकीय संचालक कैलास जाधव म्हणाले, हा प्रकल्प पूर्ण झाल्यानंतर पुण्यामध्ये येणारी 30 ते 40 टक्के वाहतूक बाहेरच्या बाहेरून मार्गस्थ होईल. त्यामुळे शहरातील वाहतूक कोंडीची समस्या, पुणेकरांचा त्रास मोठ्या प्रमाणात कमी होईल. त्यामुळे आता पुणे (पश्चिम) चक्राकार मार्गाच्या भूसंपादन प्रक्रियेला गती द्यायची असून पूर्व चक्राकार मार्गासाठीच्या भूसंपादनाबाबतही वेळेत नियोजन करण्यात येईल. एमएसआरडीसी ही राज्यातच नव्हे तर देशात जमीनीचा सर्वाधिक मोबदला देणारी यंत्रणा, असल्याचेही ते म्हणाले.

यावेळी एमएसआरडीसीचे अपर जिल्हाधिकारी श्री. अरगुंडे यांनी भूसंपादन प्रक्रिया आदीच्या अनुषंगाने यावेळी मार्गदर्शन केले.

कार्यशाळेस जिल्हा अधीक्षक भूमि अभिलेख सूर्यकांत मोरे, सहायक संचालक नगररचना अभिजीत केतकर, भूसंपादन (समन्वय) उपजिल्हाधिकारी प्रविण साळुंखे आदी उपस्थित होते.

साहित्य अकादमीतर्फे समर्थ रामदासांचे चरित्र २० भाषांत प्रकाशित होणार

पुणे :
 संत वाङ्मय आणि बहुभाषा अभ्यासक मनीषा बाठे लिखित समर्थ रामदासांवरील मोनोग्राफ (लघुप्रबंध/तात्त्विक चरित्र) साहित्य अकादमीकडून पुस्तक रूपात प्रकाशित करण्यात आला आहे. हे पुस्तक साहित्य अकादमीच्या ‘भारतीय साहित्याचे निर्माते’ या लोकप्रिय मालिकेत समाविष्ट झाले आहे. अशी पुस्तक-मालिका ही अकादमीतर्फे मूळ लेखन भाषेशिवाय एकूण २० भाषांमध्ये केली जाते. त्यामुळे हे पुस्तकही २० भाषेत जाणार आहे !
पुस्तकाच्या लेखिका मनीषा बाठे यांनी पुण्यात प्रसिद्धीस दिलेल्या पत्रकाद्वारे ही माहिती दिली आहे.

 समर्थ रामदासांचे विचार, जीवनकार्य, संप्रदाय,भारत-भ्रमण, दासबोध आदी ग्रंथनिर्मिती यांचा मागोवा या पुस्तकात घेण्यात आल्याने ते महत्त्वाचा दस्तावेज ठरले आहे. 
 साहित्य अकादमीने २०२० मध्ये या विषयाच्या लेखनासाठी मनीषा बाठे यांची निवड केली होती, सदर सैद्धांतिक प्रबंध समीक्षणादी प्रक्रियेनंतर ३ वर्षांनी प्रकाशात येत आहे. याआधी साहित्य अकादमीच्या ‘भारतीय साहित्याचे निर्माते’ या लोकप्रिय मालिकेत मराठीतील ज्ञानदेव, नामदेव, केशवसुत व दत्तकवी आदींबाबत मोनोग्राफ पूर्वप्रसिद्ध आहेत. आता याच मालिकेत समर्थ रामदासांचे तत्त्वज्ञान प्रथमच प्रकाशित होत आहे. समर्थांचे हे तात्त्विक चरित्र ९६ पानी व अंदाजे २९ हजार शब्दांचे आहे.
‘४०० वर्षे अस्तित्वात असलेल्या संप्रदायाचा १८५२पासून उपलब्ध असलेला प्रकाशित वाङ्मयीन इतिहास आणि एकूण ४०० वर्षांचा संप्रदायाचा मागोवा हे या पुस्तकाचे वैशिष्ट्य आहे. समर्थ रामदासांच्या जीवनकार्यासोबत मध्ययुगीन हस्तलिखित साधनांचा संदर्भ, रामदासांची तपश्चर्या,लेखनारंभ ते अनुयायांचे शिक्षण, संप्रदाय स्थापनेमागची पूर्वपीठिका,रामभक्त ते रामोपासक हा प्रवास, पंजाबपर्यंतच्या भारत-भ्रमणाचे पुरावे आदी पुस्तकात देण्यात आले आहेत. समकालीन महाराष्ट्र बाह्य रामदासांचे केलेले उल्लेखही यात समाविष्ट आहेत. चरित्रात ज्ञानोपासक व्यवस्था हे स्वतंत्र प्रकरण असून यात रामदासी संप्रदायाची सैद्धांतिक धारणाही सविस्तर दिलेली आहे,’ असे लेखिका मनीषा बाठे यांनी सांगितले. 

‘भारतीय साहित्याचे निर्माते’ या लोकप्रिय मालिकेत या लघुप्रबंधाचा समावेश झाल्याने तसेच २० भाषांत हे पुस्तक जाणार असल्याने केलेल्या अध्ययन-संशोधनाची फलश्रुती लाभत आहे’, अशी प्रतिक्रिया मनीषा बाठे यांनी व्यक्त केली. ‘रामदासी संप्रदायाच्या ‘रामोपासना, बलोपासना व ज्ञानोपासनेच्या प्रशिक्षणाचे केंद्र असलेल्या मठांचा विस्तार हा महाराष्ट्रासह अकरा राज्यात व्यापला होता. या मठांना तीर्थक्षेत्राचे स्वरूप न देता ‘लोकशिक्षणाची’ प्रेरक श्रद्धास्थाने बनवीत, या ‘रामदासी मठरचना’ समर्थांच्या कारकिर्दीतच नव्हे तर नंतरही तीन शतके अव्याहत विस्तारत आहेत. स्थानिक भाषांमधील हस्तलिखित नोंदी पाहिल्या तर या मठांचे कार्य हे ‘आधुनिक वैचारिक चळवळीप्रमाणे’ होते याची साक्ष मिळते’, असे लेखिका मनीषा बाठे यांनी म्हटले आहे.

 साहित्य अकादमीतर्फे ‘मागील वीस वर्षांत, २० भाषांमध्ये लिहिणाऱ्या व्यक्तींवरील भारतभरातील एकूण १२० तात्त्विक चरित्रे/ प्रबंध (मोनोग्राफ) प्रकाशित झालेली आहेत.

मनीषा बाठे यांच्याविषयी लेखिका मनीषा बाठे या रामदासी वाङ्मयाच्या संशोधनपर वस्तुनिष्ठ लेखन करणाऱ्या अभ्यासक आहेत. त्यांनी एक दशकाहून अधिक काळ विविध राज्यांतील शासकीय आणि अन्य हस्तलिखित दफ्तरे तसेच रामदासी मठांतील वाङ्मयावरील संशोधनातून लिहिलेल्या ग्रंथांना विविध सन्मानांसह महाराष्ट्र राज्य वाङ्मय पुरस्कारही लाभलेला आहे.

मुख्य अभियंता श्री. राजेंद्र पवार यांचे आवाहन

पुणे, दि. २६ जून २०२३:‘जीव कोणाचाही असो, तो सर्वांधिक महत्वाचा आहे. एकजण जीवाला मुकला की त्यांच्या कुटुंबाच्या तीन पिढ्यांचे कधीही भरून न येणारे नुकसान होते. त्यामुळे महावितरणच्या कर्मचाऱ्यांनी विद्युत सुरक्षेच्या नियमांचे काटेकोरपणे पालन करावे. विद्युत सुरक्षेला सर्वोच्च प्राधान्य द्यावे तसेच नागरिकांचे देखील सातत्याने प्रबोधन करावे’, असे आवाहन पुणे परिमंडलाचे मुख्य अभियंता श्री. राजेंद्र पवार यांनी सोमवारी (दि. २६) केले.

महावितरण व विद्युत निरीक्षक विभागाच्या वतीने दि. २६ ते २ जुलैपर्यंत राष्ट्रीय वीजसुरक्षा सप्ताहाचे आयोजन करण्यात आले आहे. महावितरणच्या रास्तापेठ येथील सर विश्वेश्वरैय्या सभागृहात या सप्ताहाचे उद्घाटन मुख्य अभियंता श्री. राजेंद्र पवार यांच्याहस्ते झाले. यावेळी ते बोलत होते. व्यासपीठावर अधीक्षक अभियंता श्री. अरविंद बुलबुले, विद्युत निरीक्षक श्री. नितीन सूर्यवंशी, कार्यकारी अभियंता श्री. भागवत थेटे यांची उपस्थिती होती.

श्री. राजेंद्र पवार म्हणाले, ‘पावसाळा सुरू झाला आहे. वीजसेवा देण्याचा खडतर व विद्युत अपघाताचे अधिक धोके असणारा हा कालावधी आहे. वीजक्षेत्राचे ज्ञान असले तरी वीज कोणालाही ओळखत नाही. जाणता-अजाणता झालेली चूक माफ करीत नाही. त्यामुळे कोणताही अतिआत्मविश्वास न बाळगता सुरक्षेच्या नियमानुसार यंत्रणेच्या दुरुस्तीचे काम करावे. सार्वजनिक ठिकाणच्या वीजयंत्रणेमुळे कोणालाही धोका निर्माण होणार नाही यासाठी कायम दक्ष राहावे. तसेच धोकादायक वीजयंत्रणेबाबत नागरिकांकडून आलेल्या तक्रारी देखील ताबडतोब निकाली काढाव्यात.’

यावेळी विद्युत निरीक्षक श्री. नितीन सूर्यवंशी यांनी सादरीकरणातून विद्युत अपघाताची कारणे व मानवी चुका याबाबत मार्गदर्शन केले. अधीक्षक अभियंता श्री. बुलबुले यांनी वीजसुरक्षेसंबंधी माहिती दिली. कार्यक्रमाचे सूत्रसंचालन डॉ. संतोष पटनी यांनी केले. यावेळी वीजसुरक्षेची शपथ घेण्यात आली.

पुणे परिमंडलामध्ये येत्या २ जुलैपर्यंत वीजसुरक्षेचा जागर करण्यात येत आहे. अभियंता व कर्मचाऱ्यांच्या प्रशिक्षणासोबतच विविध गर्दीच्या ठिकाणी नागरिकांना तसेच शाळा, महाविद्यालयांमध्ये जाऊन वर्गांमध्ये माहितीपत्रके वाटप करून माहिती देण्यात येत आहे. वीजसुरक्षेचे माहिती फलक लावण्यात येत आहेत. यासोबतच सिनेमागृहात वीजसुरक्षेबाबत ध्वनीचित्रफित दाखविण्यात येत आहे. या उपक्रमांमध्ये लघु प्रशिक्षण केंद्राचे समन्वयक डॉ. संतोष पटनी व महावितरणचे २० प्रशिक्षणार्थी व विविध अभियांत्रिकी महाविद्यालयांचे २५ विद्यार्थी सहभागी झाले आहेत.

पुणे- २६ जून २०२३ – इंडसइंड बँकेने आज त्यांच्या ‘इन्स्टिट्यूटशन ऑन सोलर’ या सीएसआर उपक्रमाअंतर्गत पुण्यातील महाराष्ट्र आरोग्य मंडळाच्या साने गुरुजी आरोग्य केंद्रात (रूफटॉप ग्रिड कनेक्टेड) सौर पॅनेल्स बसवण्याचे काम पूर्ण केले. यामध्ये मोठ्या आकाराच्या, १०० केडब्ल्यू ग्रिड सोलर फोटोव्होल्टेक सिस्टीमचा समावेश असून त्याद्वारे दरवर्षी १,४०,००० युनिट्स वीजनिर्मिती केली जाते. त्यामुळे ११३ मेट्रिक टन्स कार्बन उत्सर्जन कमी होण्यास मदत होईल. त्याशिवाय यामुळे हॉस्पिटल्सच्या खर्चात बचत करणे शक्य होणार असून ती रक्कम सामाजिक उपक्रम, उपकरणांची खरेदी, कर्मचाऱ्यांचे प्रशिक्षण अशा कामांसाठी वापरता येईल.’

या उपक्रमाच्या माध्यमातून बँकेने कमी- कार्बन उत्सर्जन असलेल्या अर्थव्यवस्थेच्या दिशेने जाण्याचे आणि विकासाच्या शाश्वत पद्धतींचा वापर करण्याचे ठरवले आहे. बँकेचा ‘इन्स्टिट्यूटशन ऑन सोलर’ हा सीएसआर उपक्रम शाश्वत बँकिंग आणि पर्यावरणीय जबाबदारीवर लक्ष केंद्रित करणारा आहे. या उपक्रमाअंतर्गत २०२३ पर्यंत २० वेगवेगळ्या ठिकाणी ८२३ किलोवॅट क्षमतेची सौर यंत्रणा बसवण्यात आली आहे. बँकेच्या वरिष्ठ अधिकाऱ्यांनी हॉस्पिटलचे विश्वस्त/वरिष्ठ अधिकारी आणि अमलबजावणी भागीदार सीईआरई यांच्या उपस्थितीत सौर पॅनेल्सचे उद्घाटन केले.

या कामगिरीविषयी इंडसइंड बँकेच्या शाश्वत बँकिंग आणि सीएसआर विभागाच्या प्रमुख रूपा सतिश म्हणाल्या, ‘एक बँक या नात्याने आमचा प्रभाव आर्थिक यंत्रणेच्याही पलीकडे जातो याची जाणीव इंडसइंड बँकेला आहे. अर्थव्यवस्था, समाज आणि पर्यावरण यांना समान प्रयत्नांनिशी उंचावर नेण्यासाठी आम्ही बांधील आहोत. पुण्यातील महाराष्ट्र आरोग्य मंडळाच्या साने गुरुजी आरोग्य केंद्रात सौर पॅनेल्स बसवून आम्ही कार्बन उत्सर्जन कमी करण्यास प्रयत्नशील असल्याची बांधिलकी पली आहे. बँकेने कायमच समाजहितासाठी हातभार लावण्यास प्राधान्य दिले आहे व यापुढेही अशाप्रकारच्या विधायक कामांसाठी आम्ही योगदान देत राहू.’