पुणे-पाऊस सुरू झाल्याने आडोशाला थांबलेल्या एका तरुणाला तारेच्या कुंपणात उतरलेल्या वीजप्रवाहाचा धक्का बसल्याने त्याचा जागीच मृत्यू झाल्याची दुर्देवी घटना कोंढवा परिसरात घडली आहे. अजयकुमार विनोदकुमार वर्मा (वय- 30, रा. पवार चाळ, शिवनेरीनगर, कोंढवा खुर्द,पुणे) असे मृत्युमुखी पडलेल्या तरुणाचे नाव आहे. याबाबत विनोदकुमार फेरारीराम वर्मा (वय- 50) यांनी कोंढवा पोलिस ठाण्यात तक्रार दिली आहे. त्यानुसार पोलिसांनी अज्ञातावर गुन्हा दाखल केल्याची माहिती पोलिसांनी सोमवारी दिली.
विनोदकुमार यांचा मुलगा अजयकुमार हा कामानिमित्त घरातून बाहेर पडला. त्यावेळी अचानक पाऊस सुरू झाल्याने अजयकुमार कोंढव्यातील ब्रम्हा इस्टेट सोसायटीच्या सीमाभिंतीलगत असलेल्या तारेच्या कुंपणाजवळ थांबला होता. त्याचवेळी तारेच्या कुंपणात वीजप्रवाह उतरला होता. विनोदकुमार यांच्या हाताचा स्पर्श तारेच्या कुंपणास झाला. कुंपणात उतरलेल्या वीजप्रवाहाचा धक्का लागून तो जागेवर बेशुद्ध पडला.
नागरिकांनी बेशुद्धावस्थेतील अजयकुमारला तातडीने जवळच्या रुग्णालयात दाखल केले. मात्र, उपचारांपूर्वीच त्याचा मृत्यू झाला होता. पोलिसांनी या प्रकरणी अज्ञातावर सदोष मनुष्यवधाचा गुन्हा दाखल केला आहे. दुर्घटना नेमकी कशी घडली, तसेच तारेच्या कुंपणात वीजप्रवाह कसा उतरला, यादृष्टीने तपास करण्यात येत आहे. सहायक पोलिस निरीक्षक रणजीत मोहिते पुढील तपास करत आहेत.