पुणे, दि.२९: राष्ट्रपती द्रौपदी मुर्मू यांचे आज दुपारी भारतीय वायुदलाच्या विशेष विमानाने लोहगाव विमानतळावर आगमन झाले. राज्यपाल रमेश बैस यांनी पुष्पगुच्छ देऊन त्यांचे स्वागत केले. महिला व बालविकास मंत्री कु. आदिती तटकरे, लष्कराच्या दक्षिण कमांडचे प्रमुख लेफ्टनंट जनरल अजय कुमार सिंह, विभागीय आयुक्त सौरभ राव, पोलिस आयुक्त रितेश कुमार, जिल्हाधिकारी डॉ.राजेश देशमुख यावेळी उपस्थित होते.

मकोका अंतर्गत केलेली ही ९१ वी कारवाई

पुणे-महंमदवाडी येथील गणेश बबन लोंढे (टोळी प्रमुख) व त्याचे इतर ०६ साथीदार यांचेवर मकोका अंतर्गत कारवाई करण्यात आल्याचे पुणे पोलिसांनी म्हटले आहे. स्वतःचे गुन्हेगारी टोळीचे वर्चस्व व दहशत निर्माण करण्याकरीता मागील वर्षामध्ये सदर टोळीने संघटितपणे व वैयक्तीकपणे, खुनाचा प्रयत्न, चोरी करणे, सदोष मनुष्यवधाचा प्रयत्न करणे, गंभीर दुखापत करणे, घातक शस्त्राव्दारे जखमी करणे, बेकायदेशीर जमावजमवणे, मालमत्तेचे नुकसान करणे, शिवीगाळ करुन व हत्यारांचा धाक दाखवुन नागरिकांमध्ये दहशत पसरवणे, दरोडयाची तयारी करणे यासारखे गंभीर व हिंसक गुन्हे केलेले आहेत. या टोळीत १) गणेश बबन लोंढे वय २३ वर्षे रा. साठे चौक, तरवडे वस्ती, महंमदवाडी, पुणे (टोळी प्रमुख) याने त्याचे इतर साथिदार २) विशाल माधव गोरे, वय २० वर्षे, रा. वेदात हाईट्स सोसायटी, तरवडे वस्ती, पुणे ३) मयुर माणिक पुरकास्त, वय १८ वर्षे, रा. कृष्णानगर, बुध्दविहार जवळ, पुणे ४) ऋषीकेश विठ्ठल घाडगे, वय २० वर्षे, रा. तरवडे वस्ती, पुणे ५) शुभम नंदु चव्हाण, वय १९ वर्षे, रा. तरवडे वस्ती, बी-६०४, मोहंमदवाडी, पुणे यांनी केला असुन, नमुद गुन्हयात त्यांना अटक करण्यात आलेली आहे. तसेच ६) एक विधिसंघर्षीत बालक (टोळी सदस्य) यास ताब्यात घेवुन बाल न्यायालय येरवडा, पुणे येथे हजर केले आहे. ७) एक wanted आरोपी आहे.

याबाबत सविस्तर माहिती देताना पोलिसांनी म्हटले आहे कि,’दि.०४/१०/२०२३ रोजी एस. डी. बार अॅण्ड रेस्टॉरन्ट समोर मंहमदवाडी, पुणे येथे फिर्यादी थांबले असताना १) गणेश बबन लोंढे २) विशाल माधव गोरे ३) माणिक पुरकास्त ४) ऋषीकेश विठ्ठल घाडगे यांनी मनोज साळवी कोठे आहे आमचे त्याचे कडे काम आहे अशी विचारणा केली असता मला माहित नसल्याचे फिर्यादी यांनी त्यांना सांगताच त्यांनी फिर्यादी सोबत वाद सुरु केला. त्यावर फिर्यादी यांनी त्यांना जाब विचारताच त्याचा राग आल्याने त्यांचेपैकी एकाने त्याचेकडील धारधार हत्याराने, तुला आता संपवतो असे म्हणुन फिर्यादी यांचे पाठीवर मारुन जखमी केले व त्यातील एका पांढरे रंगाचा शर्ट घातलेल्या लुकड्या मुलाने जमिल पठाण याला त्याचेकडील धारदार हत्याराने डावे कानावर डावे दंडावर व मनगटावर मारुन गंभीर जखमी केले तसेच हॉटेल मॅनेंजर विकास गोमसाळे याचे पाठीवर धारधार हत्यार मारुन त्यास जखमी करुन शिवीगाळ व आरडा ओरड करत त्यांचेकडील मोटर सायकलवरून निघुन गेले, तेव्हा तेथे पळापळ झाल्याने तेथे दहशतीचे वातावरण निर्माण झाले. त्यावेळी हॉटेल मॅनेजर विकास याने हॉटेलचे शटर बंद करुन घेतले व हॉटेल मधील कामगार घाबरुन पळुन गेले. म्हणुन वरिल इसमांनी फिर्यादी यांना व जमील पठाण तसेच विकास गोमसाळे यांना धारधार हत्याराने वार करुन जिवे ठार मारण्याचा प्रयत्न केला. म्हणुन फिर्यादी यांनी कोंढवा पोलीस स्टेशन येथे दिले फिर्यादीवरून कोंढवा पोलीस ठाणे, पुणे शहर गुन्हा रजि नं.१०१९/२०२३, भादविक ३०७,५०४,५०६, ३४ क्रि.लॉ.अॅ.अॅक्ट कलम ७ आर्म अॅ. कलम ४(२५) हा गुन्हा नोंद करण्यात आलेला आहे.
दाखल गुन्ह्याच्या तपासा दरम्यान सदरचा गुन्हा हा आरोपी नामे १) गणेश बबन लोंढे वय २३ वर्षे रा. साठे चौक, तरवडे वस्ती, महंमदवाडी, पुणे (टोळी प्रमुख) याने त्याचे इतर साथिदार २) विशाल माधव गोरे, वय २० वर्षे, रा. वेदात हाईट्स सोसायटी, तरवडे वस्ती, पुणे ३) मयुर माणिक पुरकास्त, वय १८ वर्षे, रा. कृष्णानगर, बुध्दविहार जवळ, पुणे ४) ऋषीकेश विठ्ठल घाडगे, वय २० वर्षे, रा. तरवडे वस्ती, पुणे ५) शुभम नंदु चव्हाण, वय १९ वर्षे, रा. तरवडे वस्ती, बी-६०४, मोहंमदवाडी, पुणे यांनी केला असुन, नमुद गुन्हयात त्यांना अटक करण्यात आलेली आहे. तसेच ६) एक विधिसंघर्षीत बालक (टोळी सदस्य) यास ताब्यात घेवुन बाल न्यायालय येरवडा, पुणे येथे हजर केले आहे. ७) एक पाहिजे आरोपी आहे.
नमुद आरोपी नामे गणेश बबन लोंढे (टोळी प्रमुख) याने त्याचे साथीदारांसह संघटित गुन्हेगारी टोळी तयारी केली असुन, सदर टोळीने बेकायदेशीर मार्गाने स्वतःसाठी किंवा अन्य कोणत्याही व्यक्ती साठी इतर फायदा मिळविण्याच्या उद्देशाने संघटित गुन्हेगारी संघटनेचा सदस्य म्हणुन किंवा संघटनेच्या वतीने एकटयाने किंवा संयुक्तपणे हिंसाचाराचा वापर करून किंवा हिंसाचार करण्याची धमकी देवुन किंवा धाकदपटशा दाखवून किंवा जुलूम जबरदस्ती करून किंवा अन्य अवैद्य मार्गाने आपली बेकायदेशीर कृत्य चालू ठेवून, संघटना किंवा टोळी म्हणून संयुक्तपणे संघटित गुन्हेगारी कृत्य करणारा गट तयार करून, दुखापत किंवा हमला इत्यादी करण्याची धमकी देवुन किंवा हमला इत्यादी करण्याची पुर्वतयारी करून स्वतःचे गुन्हेगारी टोळीचे वर्चस्व व दहशत निर्माण करण्याकरीता मागील १० वर्षामध्ये सदर टोळीने संघटितपणे व वैयक्तीकपणे, खुनाचा प्रयत्न, चोरी करणे, सदोष मनुष्यवधाचा प्रयत्न करणे, गंभीर दुखापत करणे, घातक शस्त्राव्दारे जखमी करणे, बेकायदेशीर जमावजमवणे, मालमत्तेचे नुकसान करणे, शिवीगाळ करुन व हत्यारांचा धाक दाखवुन नागरिकांमध्ये दहशत पसरवणे, दरोडयाची तयारी करणे यासारखे गंभीर व हिंसक गुन्हे केलेले आहेत. त्यांचेवर पुणे शहरातील विविध पोलीस स्टेशन येथे शरीरा विरुध्दचे व माला विरुध्दचे गुन्हे दाखल असुन, त्यांचेवर प्रतिबंधात्मक कारवाई करुन देखील त्यांनी पुन्हा पुन्हा गुन्हे केलेले आहेत.
दाखल गुन्हयामध्ये महाराष्ट्र संघटीत गुन्हेगारी नियंत्रण कायदा १९९९ चे कलम कलम ३ (१) (ii), ३(२), ३(४) चा प्रमाणे कलम वाढविण्यासाठी सदर मान्यता मिळणे बाबतचा प्रस्ताव कोंढवा पोलीस स्टेशनचे वरिष्ठ पोलीस निरीक्षक, संतोष सोनवणे यांनी मा. पोलीस उप-आयुक्त परिमंडळ-०५, पुणे, श्री. विक्रांत देशमुख यांचे मार्फतीने अप्पर पोलीस आयुक्त, पुर्व प्रादेशिक विभाग, पुणे, श्री. रंजनकुमार शर्मा यांना सादर केला होता.
सदर प्रकरणी छाननी करून कोंढवा पोलीस ठाणे, पुणे शहर गुन्हा रजि नं. १०१९/२०२३ भादविक ३०७,५०४,५०६,३४ क्रि. लॉ. अॅ. अॅक्ट कलम ७ आर्म अॅ.कलम ४ (२५) या गुन्हयात महाराष्ट्र संघटीत गुन्हेगारी नियंत्रण कायदा १९९९ चे कलम ३ (१) (ii), ३ (२), ३ (४) या कलमाचा अंतर्भाव करण्याची मा. अपर पोलीस आयुक्त, पुर्व प्रादेशिक विभाग, पुणे शहर, श्री. रंजन कुमार शर्मा यांनी मान्यता दिलेली आहे.
सदर गुन्ह्याचा पुढील तपास सहा. पोलीस आयुक्त, वानवडी विभाग, शाहुराजे साळवे हे करीत आहेत.
सदरची कामगिरी पोलीस आयुक्त, पुणे शहर, श्री. रितेश कुमार, अपर पोलीस आयुक्त, पुर्व प्रादेशिक विभाग, पुणे, रंजनकुमार शर्मा, मा. पोलीस उप आयुक्त, परिमंडळ-०५, श्री. विक्रांत देशमुख, मा. सहा. पोलीस आयुक्त, वानवडी विभाग विभाग, पुणे, श्री. शाहुराजे साळवे यांचे मार्गदर्शनाखाली कोंढवा पोलीस ठाणेचे वरिष्ठ पोलीस निरीक्षक, संतोष सोनवणे, पोलीस निरीक्षक, (गुन्हे), संदीप भासले, संजय मोगले, सहा. पोलीस निरीक्षक, राजेश उसगावकर, गणेश तोरगल, पोलीस उप-निरीक्षक, इकबाल शेख, पोलीस अंमलदार, जगदीश पाटील, राजेंद्र ननावरे, नितीन चव्हाण, प्रदिप बेडीस्कर यांनी केली आहे.
पोलीस आयुक्त, पुणे शहर,रितेश कुमार यांनी पुणे शहर पोलीस आयुक्तालयाचा कार्यभार घेतल्या नंतर गुन्हेगारी नियंत्राणांवर बारकाईने लक्ष देवुन शरीराविरुध्द व मालमत्तेविरुध्द गुन्हे कारणारे व नागरिकांमध्ये दहशत निर्माण करणारे सराईत गुन्हेगार यांचे हालचालींवर बारकाईने लक्ष ठेवुन गुन्हेगारीचे समुळ उच्चाटन होईल यावर भर देण्याबाबत सर्व पोलीस अधिकारी व अंमलदार यांना निर्देश देण्यात आले आहेत. त्यांचे मार्गदर्शनाखाली मकोका अंतर्गत केलेली ही ९१ वी कारवाई आहे

पुणे – काँग्रेस पक्षाने आंदोलनाचा दणका दिल्यामुळे शिवाजीनगर एसटी स्थानक पूर्ववत जागी आणि महामेट्रोच्या खर्चात बांधण्याचा निर्णय राज्य सरकारला घ्यावा लागला, अशी प्रतिक्रिया महाराष्ट्र प्रदेश काँग्रेसचे उपाध्यक्ष, माजी आमदार मोहन जोशी यांनी दिली आहे.

प्रवाशांची सोय आणि वाहतुकीची सुरक्षितता लक्षात घेऊन शिवाजीनगर एसटी स्थानक पूर्ववत जागी होण्यासाठी १५ दिवसांत निर्णय घेतला जावा, अशा मागणीसाठी माजी आमदार मोहन जोशी यांच्या नेतृत्वाखाली एसटीच्या विभागीय कार्यालयासमोर दि. ६ ऑक्टोबर २०२३ रोजी आंदोलन करण्यात आले होते. हा प्रश्न मार्गी लागला नाही, तर मुख्य मंत्र्यांनाच पुण्यात अडवू, असा इशारा मोहन जोशी यांनी दिला होता.

महामेट्रोच्या कामासाठी शिवाजीनगर एसटी स्थानकाचे स्थलांतर करण्यात आले होते. महामेट्रोचे काम पूर्ण होऊन वर्ष उलटले तरी एसटी स्थानक पूर्ववत करण्याबाबत निर्णय होत नव्हता. एसटी स्थानकाचा आराखडा मुख्य मंत्री एकनाथ शिंदे यांच्याकडे सादर झाला होता. परिवहन खाते एकनाथ शिंदे यांच्याकडे असल्याने त्यांची गाडी अडविण्याचा इशारा देण्यात आला होता. काँग्रेस पक्षाने आंदोलनानंतरही प्रश्न मार्गी लागण्यासाठी पाठपुरावा केला. त्यामुळे राज्य सरकारला निर्णय घेणे भाग पडले, असे मोहन जोशी यांनी पत्रकात म्हटले आहे.

एसटी प्रवाशांची सोय व्हावी तसेच एसटी स्थानकाचे स्थलांतर पुणे -मुंबई महामार्गावर वाकडेवाडी जवळ झाल्याने तेथील वाहतुकीची समस्या बिकट झाली होती, ती समस्याही सुटावी, अशा दुहेरी हेतूने काँग्रेसने हा प्रश्न हाती घेतला होता. अशी माहिती माजी आमदार मोहन जोशी यांनी पत्रकात दिली आहे.

पुणे : अमली पदार्थ तस्कर ललित पाटीलला ससून रुग्णालयातून पसार होण्यास मदत केल्याप्रकरणी गुन्हे शाखेने येरवडा कारागृहातील रक्षकास अटक केली. ललित पाटील प्रकरणात ससून रुग्णालयातील कर्मचारी महेंद्र शेवते (वय ५७ ,रा. रक्षकनगर, खडकी) याला मंगळवारी अटक करण्यात आली.त्यानंतर कारागृह रक्षक यास अटक करण्यात आली. मोईस अहमद शेख (वय ३०, रा. मूळ रा. देगलूर, नांदेड) असे अटक करण्यात आलेल्याचे नाव आहेशेवते आणि शेख यांना अटक करुन मंगळवारी शिवाजीनगर न्यायालयात हजर करण्यात आले. न्यायालयाने दोघांना १ डिसेंबरपर्यंत पोलीस काेठडीत ठेवण्याचे आदेश दिले

ललित पाटील हा ससून रुग्णालयातील वाॅर्ड क्रमांक १६ मध्ये उपचार घेत होता. २ ऑक्टोबर रोजी तो बंदोबस्तावरील पोलिसांना गुंगारा देऊन पसार झाला होता. त्यादिवशी कारागृह रक्षक शेख वाॅर्ड क्रमांक १६ मध्ये बंदोबस्तात होता. शेखने ललितला पसार होण्यास मदत केल्याचे तपासात उघडकीस झाल्यानंतर त्याला अटक करण्यात आली..शेखच्या मोबाइल क्रमंकावरुन २ ऑक्टोबर रोजी ललितने ॲड. प्रज्ञा कांबळे, अभिषेक बलकवडे, विनय आराहाना यांच्याशी संपर्क साधला होता. याप्रकरणात कांबळे, बलकवडे, आरहाना यांनाही अटक करण्यात आली होती..

संविधान रॅली, व्याख्यान आणि ७३ किलोमीटर सायकलिंग करून संविधान दिन साजरा

पुणे – येथील कर्वे समाज सेवा संस्थेच्यावतीने , सहायक समाज कल्याण आयुक्तालय,  बार्टी तसेच इतर संस्थांच्या मदतीने कर्वे समाज सेवा संस्थेच्या विश्वस्त मंडळाचे अध्यक्ष मधुकर पाठक, व्यवस्थापन समितीचे अध्यक्ष मा.विनायक कराळे, सचिव एम.शिवकुमार, सदस्य शिल्पा पाठक , प्रभारी संचालिका डॉ. शर्मिला सहदेव, सीएसआर सेलचे  संचालक डॉ. महेश ठाकूर, सीएमएचडीचे अध्यक्ष सहाय्यक प्रा.चेतन दिवाण यांच्या मार्गदर्शनाखाली २६ नोव्हेंबर हा संविधान दिन विविध उपक्रम राबवून साजरा करण्यात आला.

सहायक समाजकल्याण आयुक्त कार्यालय व बार्टीच्या पुढाकाराने  आयोजित करण्यात आलेल्या भिडे वाडा ते डॉ. बाबासाहेब आंबेडकर पुतळा, पुणे स्टेशन पर्यंतच्या संविधान जागृती  रॅलीमध्ये कर्वे समाज सेवा संस्थेच्या प्राध्यापक व विद्यार्थ्यांनी सहभाग घेतला तसेच महाविद्यालयामध्ये संविधान जनजागृतीवर आधारित व्याख्यानाचे आयोजन देखील यावेळी करण्यात आले होते

विशेष म्हणजे यावर्षी  ७३ व्या भारतीय संविधान दिनानिमित्त समाजकार्य प्रथम वर्षाचे विद्यार्थी रितेश भोयर, विशाल ठाकूर व अक्षय खोल्लम या तीन विद्यार्थ्यांनी ७३ किलोमीटर सायकलिंग करून हा संविधान दिन साजरा केलातसेच कर्वे समाज सेवा संस्थेमध्ये संविधान जागृतीपर प्रा.मिलिंद माचाळे यांचे व्याख्यान प्रा चेतन दिवाण यांच्या अध्यक्षेताखाली आयोजित करण्यात आले होते यावेळेस संस्थेच्या समुपदेशन व समाजकार्य महाविद्यालयाच्या विद्यार्थ्यांनी संविधान शपथ घेतली.व्याख्यानकार्यक्रमाचे प्रास्ताविक राहुल काकडे यांनी केले, सूत्रसंचालन मुकेश सावकारे यांनी केले तर आभार डॉ पद्मश्री पाटील यांनी मानले.ग्रंथपाल मंगेश तळमले तसेच सर्व शिक्षक व शिक्षकेतर कर्मचारी आणि विशेषत: समाजकार्य व समुपदेशन अभ्यासक्रमाच्या विद्यार्थ्यांनी या उपक्रमात सहभाग घेऊन संविधान जनजागृती केली.

पुणे, 28 नोव्हेंबर 2023   

देशाच्या आदिवासी तसेच ग्रामीण भागात ‘विकसित भारत संकल्प यात्रा’ पोहचल्यानंतर आजपासून शहरी भागातून देखील या यात्रेचा शुभारंभ झाला. केंद्र सरकारच्या योजनांविषयी जनजागृती करण्यासाठी सुरू झालेला हा उपक्रम दोन महीने सुरू राहणार आहे. लोकांनी योजनांची माहिती घेऊन त्याचा लाभ घ्यावा, तसेच अजूनही योजनांच्या लाभापासून दूर असलेल्या नागरिकांपर्यंत शासकीय यंत्रणा पोहचवी असा उद्देश या यात्रेमागे आहे.

आज पुणे, नाशिक, छत्रपती संभाजी नगर व सोलापुर शहरांमधूनही ‘विकसित भारत संकल्प यात्रा’ सुरू झाली.

ग्रामदैवत कसबा गणपती येथे आयोजित विकसित भारत संकल्प यात्रा – पुणे शहर मोहीमेचे उद्घाटन आयुक्त विक्रम कुमार यांच्या हस्ते व अति. आयुक्त कुणाल खेमनार, उपायुक्त नितीन उदास यांच्या प्रमुख उपस्थितीत संपन्न झाले. यावेळी नागरिक मोठ्या संख्येने उपस्थित होते.

नाशिक शहरात यात्रेचा शुभारंभ नाशिक रोड विभागीय कार्यालय येथे नाशिक महानगरपालिका उपायुक्त डॉ. विजयकुमार मुंडे, आरोग्य अधिकारी डॉ. जितेंद्र धनेश्वर, विभागीय अधिकारी सुनिता कुमावत यांच्या हस्ते हिरवा झेंडा दाखवून करण्यात आला. शुभारंभ प्रसंगी महिलांचा मोठा सहभाग होता, शासनाच्या आयुषमान भारत, प्रधानमंत्री आवास योजना, पंडीत दीनदयाल अंत्योदय योजना, महाराष्ट्र राज्य ग्रामीण जीवनोन्नती अभियान, प्रधानमंत्री विश्वकर्मा योजना, प्रधानमंत्री किसान सन्मान योजना, पोषण आहार योजना, प्रधानमंत्री मातृ वंदना योजना, भारतीय डाक विभागातील योजना या विविध योजनेचा लाभ मिळवण्यासाठी यावेळी अनेकांनी नावनोंदणी केली. यात्रेच्या ठिकाणी महिलांची आरोग्य तपासणी रक्त तपासणीची विशेष मोहीम नाशिक महानगरपालिकेच्या वतीने वैद्यकीय अधिकारी डॉ. जितेंद्र धनेश्वर यांच्या मार्गदर्शनाखाली राबवण्यात आली.

सोलापुरात महापालिका आयुक्त शीतल तेली – उगले यांच्या हस्ते विकसित भारत संकल्प यात्रेचे उद्घाटन झाले. यावेळी अतिरिक्त आयुक्त संदीप करंजे, उपायुक्त मच्छिंद्र घोलप उपस्थित होते.

छत्रपती संभाजीनगर मधील सिध्दार्थ उद्यानामध्ये देवशाली जिने, नजरिन सय्यद रफी, फिरोज खान इब्राहिम खान, सइनाज शेख जावेद या लाभार्थीच्या हस्ते यात्रेचे उद्घाटन करण्यात आले. गरीब – वंचित यांच्यापर्यंत राज्य व केंद्रशासनाच्या योजना पोहचवणे, ही आमची जवाबदारी आहे, असे मत छत्रपती संभाजीनगर महानगरपालिकेचे आयुक्त तथा प्रशासक जी श्रीकांत यांनी विकसित भारत संकल्प यात्राच्या उद्घाटनप्रसंगी मांडले. महानगरपालिकेच्या दहा झोन मधील 47 ठिकाणी ही यात्रा 22 डिसेंबरपर्यंत विविध परिसरात जाणार आहे. शहरासाठीच्या सहा योजनांसह केंद्र शासनाच्या सर्व योजनांची माहिती दिली जाणार आहे. याप्रसंगी संकल्प प्रतिज्ञा घेण्यात आली. महानगरपालिकेचे अधिकारी कर्मचारी मोठ्या संख्येने उपस्थित होते.

एमआयटी डब्ल्यूपीयूत व्याख्यानमालेचे चौथे पुष्प गुंफताना

पुणे,दि.२८ नोव्हेंबर:”देश बदलायचा असेल तर प्राथमिक व माध्यमिक शिक्षणाचा आराखडा बदलणे गरजेचे आहे. त्यासाठी गुणवत्तापूर्ण शिक्षकांची गरज आहे. विद्यार्थ्यांमध्ये संशोधकवृत्ती निर्माण करून शिक्षकांनी त्यांच्यावर कठोर परिश्रम घेण्याची गरज आहे.” असे विचार बनारस हिंदू विश्वविद्यालयाचे माजी कुलगुरू प्रा.डाॅ. राकेश भटनागर यांनी व्यक्त केले.
एमआयटी वर्ल्ड पीस युनिव्हर्सिटी, विश्वशांती केंद्र (आळंदी), माईर्स एमआयटी, पुणे आणि संतश्री ज्ञानेश्वर-संतश्री तुकाराम महाराज स्मृती व्याख्यानमाला न्यास यांच्या संयुक्त विद्यमाने आयोजित २८व्या तत्त्वज्ञ संतश्री ज्ञानेश्वर-तुकाराम स्मृती व्याख्यानमालेचे चौथे पुष्प गुंफतांना प्रमुख पाहुणे म्हणून ते बोलत होते.
यावेळी युनेस्को चेअर फॉर पीसचे वरिष्ठ सल्लागार प्रा. डॉ. प्रियंकर उपाध्याय हे सन्माननीय पाहुणे म्हणून उपस्थित होते. अध्यक्षस्थानी एमआयटी वर्ल्ड पीस युनिव्हर्सिटीचे संस्थापक अध्यक्ष व युनेस्को अध्यासनाचे प्रमुख प्रा. डॉ. विश्वनाथ दा. कराड हे होते.
तसेच, एमआयटी डब्ल्यूपीयूचे सल्लागार डॉ. संजय उपाध्ये, व्याख्यानमालेचे मुख्य समन्वयक व प्र कुलगुरू प्रा.डॉ. मिलिंद पांडे , बॉम्बे स्टॉक एक्सचेंजचे माजी अध्यक्ष ए. जंबूनाथन व वत्सला जंबूनाथन उपस्थित होते.
डॉ. भटनागर म्हणाले,” देशातील शिक्षणाची दिशा बदलणे गरजेचे असून त्यात गुणवत्ता व कौशल्यपूर्ण शिक्षण अत्यंत महत्वाचे आहे. प्रगत जर्मनी देशात प्राथमिक व उच्च माध्यमिक शिक्षणासाठी प्रचंड मेहनत घेतली जाते. या देशात आज सर्वोत्तम इंजिनियर आहेत. भारतामध्ये आयआयटी सारख्या  शिक्षण संस्थेने सर्वोत्कृष्ट इंजिनियर निर्माण केले परंतू ते इंजिनियर विदेशात जाऊन संशोधन करतात. अशा वेळेस देशातील विद्यापीठांनी उत्तम संशोधक निर्मितीसाठी शिक्षणावर खर्च करावा. संशोधनामुळेच भारत वैक्सीन निर्मितीची राजधानी बनली आहे.”
डॉ. प्रियंकर उपाध्याय म्हणाले,” संपूर्ण जग शांतीच्या शोधात असतांना विश्वधर्मी प्रा.डॉ. विश्वनाथ कराड यांनी एमआयटीच्या माध्यमातून शांतीची संस्कृती निर्माण केली आहे. जगातील सर्वात मोठ्या डोमच्या माध्यमातून शांतीचा संदेश पसरविला जात असतांना आंतरिक व सामाजिक शांती अत्यंत महत्वाची आहे. तसेच राष्ट्रीय विधायक परिषद या अद्वितीय कार्यक्रमाचे आयोजन करून राहुल कराड यांनी देशातील २ हजार आमदारांचे एकत्र विचार मंथन घडवून आणले.”
तत्पूर्वी सकाळच्या सत्रात डॉ. संजय उपाध्ये यांनी ‘मी, माझे पद आणि मनःशांती’ या विषयावर सांगितले की, पद हे मनुष्याच्या मनात अहंकार निर्माण करते. परंतू जीवनात व्यक्ती म्हणून असलेले पद कायम ठेवा. मन शांती ही अध्यात्मातून नाही तर दैनंदिन जीवनातून, सामाजिक आणि कार्यालयीन स्थळावरून होऊ शकतो. भूमिका ही व्यक्तीनुसार बदलावी जेणे करून शांती निर्माण होईल.”
तसेच डॉ. महेश थोरवे यांनी महाराष्ट्र धर्मावर विचार मांडला तर डॉ.एम.वाय गोखले यांचे ही भाषण झाले.
डॉ. मृदुला कुलकर्णी व पराग खानविलकर यांनी सूत्रसंचालन केले.

लॉलीपॉप इंटरटेनमेंट आणि कॅलिस्टा पिजंट यांचा
महिलांना व्यासपीठ उपलब्ध करून देणारा उपक्रम

पुणे (दि. २८ नोव्हेंबर २०२३) महिलांच्या अंगभूत कलागुणांना प्रोत्साहन देऊन त्यांचा आत्मविश्वास वाढवण्यासाठी त्यांना उत्तम व्यासपीठ उपलब्ध करून देण्याचे काम पिंपरी चिंचवड शहरातील लॉलीपॉप एंटरटेनमेंट आणि कॅलिस्टा पिजंट या संस्थेच्या वतीने करण्यात येते.
या संस्थांच्या वतीने “महाराष्ट्राची सौंदर्यवती स्पर्धा २०२३” पर्व ८ अंतर्गत महिलांच्या खुल्या गटाच्या आणि लहान मुले आणि मुलींच्या सौंदर्य स्पर्धा रविवारी चिंचवड येथे आयोजित करण्यात आल्या होत्या. या सौंदर्य स्पर्धेमध्ये महाराष्ट्राच्या विविध जिल्ह्यातून सौंदर्यवतींनी सहभाग घेतला होता.
या स्पर्धेत झालेल्या विविध फेऱ्यांमध्ये सई तापकीर या प्रथम क्रमांक मिळवित “महाराष्ट्राची सौंदर्यवती स्पर्धा २०२३” चा मुकुट आणि रोख पंधरा हजार रुपयांचे बक्षीसाच्या मानकरी ठरल्या. नेहा निकाळजे द्वितीय क्रमांक मुकुट आणि रोख बारा हजार रुपये, तृतीय क्रमांक सानिका जवंजाळ यांनी मुकुट आणि रोख दहा हजार रुपयांचे बक्षीस पटकावले. विजेत्या स्पर्धकांना ज्येष्ठ कर सल्लागार शाळिग्राम तायडे प्रा. विजय रामाने यांच्या हस्ते सोन्याची नथ, पैठणी आणि सन्मानचिन्ह देऊन गौरविण्यात आले.
लहान मुलांच्या गटात प्रथम क्रमांक अंशिका कदम, द्वितीय क्रमांक अनविका मोरे आणि तृतीय क्रमांक अनिकेत साळुंखे यांनी मिळवला. सर्व विजेत्यांना सन्मानचिन्ह, प्रमाणपत्र आणि रोख पारितोषिक देऊन गौरविण्यात आले. नैना वेदपाठक, डॉ. दुर्गा लकडे, सुहास ढवळे आणि प्रा. सूमीता काटकार यांनी परीक्षक म्हणून काम पाहिले. तर ग्रूमिंग नरेश फुलेलू , क्षितिज गायकवाड आणि इशा राजे यांनी केली. आऊटफिट तृप्ती पवार, वेशभूषा, केशरचना रिया आदमाने आणि प्रिया कानडे यांनी केली. शिल्पा मगरे-गाडेकर, निकिता गायकवाड आणि प्रीती वाघमारे यांनी संयोजनात सहभाग घेतला.
स्वागत लॉलीपॉप इंटरटेनमेंटचे संचालक संजीव जोग, सूत्र संचालन रुचिका भोंडवे आभार कावेरी तांबे यांनी मानले.