पुणे, दि. ५ : जिल्ह्यातील पात्र लघु उद्योजकांनी जिल्हा पुरस्कार-२०२३ साठी २० डिसेंबर पर्यंत विहित नमुन्यातील अर्ज महाव्यवस्थापक, जिल्हा उद्योग केंद्र पुणे यांच्या कार्यालयात सादर कण्याचे आवाहन करण्यात आले आहे.

राज्य शासनाच्यावतीने जिल्ह्यातील उद्योग क्षेत्रातील असामान्य कामगिरी करणाऱ्या लघु उद्योजकांना जिल्हास्तरीय पुरस्कार देण्यात येतात. जिल्हा पुरस्कारासाठी शासनाने विहित केलेल्या निकषाप्रमाणे लघु उद्योगांची निवड करण्यात येते.

जिल्हा पुरस्कारासाठी ज्ञापन पोहोच भाग २, उद्योग आधार, उद्यम नोंदणी हा स्थायी लघु उद्योग म्हणून उद्योग संचालनालयाकडे मागील तीन वर्षे नोंदणीकृत असावा. (१ जानेवारी २०२० पूर्वीची नोंदणी, उद्योग आधार किंवा उद्यम नोंदणी). उद्योग घटक मागील दोन वर्षे सलग उत्पादन प्रक्रियेतील असावा. लघु उद्योग कोणत्याही संस्थेचा, बँकेचा थकबाकीदार नसावा. जिल्हास्तरीय प्रथम क्रमांकासाठी रुपये १५ हजार व द्वितीय पुरस्कारासाठी रुपये १० हजार व मानचिन्ह असे पुरस्कार आहेत.

जिल्हा उद्योग केंद्र येथे अर्ज विनामुल्य उपलब्ध आहे. अधिक माहितीसाठी कार्यालयाच्या ०२०-२५५३९५८७, २५५३७५४१ या दूरध्वनी क्रमांकावर संपर्क साधावा, असे आवाहन महाव्यवस्थापक, जिल्हा उद्योग केंद्र पुणे यांनी केले आहे.
000

पश्चिम महाराष्ट्रात थकीत वीजबिल वसूली मोहिमेला वेग

पुणे, दि. ०५ डिसेंबर २०२३: दिवाळी प्रकाशाचा सण म्हणून नुकतीच उत्साहात साजरी झाली. मात्र सर्वांना प्रकाशमान ठेवणाऱ्या महावितरणच्या वीजबिलांकडे ग्राहकांकडून गेल्या नोव्हेंबरमध्ये चांगला प्रतिसाद दिला नाही. परिणामी आर्थिक कोंडी झाल्यामुळे पश्चिम महाराष्ट्रात महावितरणकडून थकीत वीजबिलांच्या वसूलीला मोठा वेग देण्यात आला आहे. यात घरगुती, वाणिज्यिक व औद्योगिक थकबाकीदारांचा वीजपुरवठा खंडित करण्याची मोहीम सुरू करण्यात आली आहे.

पुणे प्रादेशिक विभागात सद्यस्थितीत १८ लाख २ हजार घरगुती, वाणिज्यिक व औद्योगिक थकबाकीदारांकडे ३७६ कोटी ६७ लाख रुपयांच्या वीजबिलांची थकबाकी आहे. यात पुणे जिल्हा- २३० कोटी २१ लाख रुपये (८ लाख ५२ हजार ग्राहक), सातारा २७ कोटी (२ लाख १४ हजार ग्राहक), सोलापूर- ५४ कोटी ४३ लाख (२ लाख ७४ हजार ग्राहक), कोल्हापूर- ३६ कोटी २० लाख (२ लाख ४५ हजार ग्राहक) आणि सांगली जिल्ह्यात २८ कोटी ८३ लाख रुपयांची (२ लाख १७  हजार ग्राहक) थकबाकी आहे.

महावितरणच्या महसूलाचा आर्थिक स्त्रोत प्रामुख्याने वीजबिलांची वसूली हाच आहे. वीजखरेदीमध्ये दरमहा महसूलामधील सुमारे ८० टक्के रक्कम खर्च होते. त्यानंतर दैनंदिन देखभाल व दुरुस्ती खर्च, कर्जांचे हप्ते, कंत्राटदारांची देणी, आस्थापना आदींचा खर्च वीजबिलातून मिळालेल्या महसूलावरच अवलंबून आहे. गेल्या महिन्यात दिवाळी उत्साहात साजरी झाली. मात्र इतर खर्चाच्या तुलनेत चालू महिन्याचे वीजबिल भरण्याकडे दुर्लक्ष झाल्यामुळे पश्चिम महाराष्ट्रात महावितरणच्या थकबाकीदारांच्या संख्येत वाढ झाली आहे. थकबाकी तसेच चालू महिन्याचे वीजबिल भरून सहकार्य करावे असे आवाहन पुणे प्रादेशिक संचालक श्री. अंकुश नाळे यांनी केले आहे.

पश्चिम महाराष्ट्रात वीजबिलांच्या थकबाकीमध्ये सर्वाधिक १५ लाख ९१ हजार २४६ घरगुती ग्राहकांकडील २४१ कोटी ५२ लाख रुपये तर २ लाख १० हजार ७४४ वाणिज्यिक व औद्योगिक ग्राहकांकडील १३५ कोटी १४ लाख रुपयांचा समावेश आहे. वीजबिलांच्या थकबाकीचा भरणा होत नसल्याने महावितरणकडून नाईलाजाने वीजपुरवठा खंडित करण्याच्या कटू कारवाईला वेग देण्यात आला आहे. आता एका महिन्याचे वीजबिल थकीत असले तरी बिलाची रक्कम किती आहे हे न पाहता नियमानुसार वीजपुरवठा खंडित करण्याची कारवाई सुरु करण्यात आली आहे.

वीजग्राहकांना www.mahadiscom.in या वेबसाईटवर तसेच महावितरणच्या मोबाईल अॅपद्वारे केव्हाही व कुठूनही ऑनलाइन पध्दतीने विनामर्यादा वीजबिलाचा भरणा करता येतो. या व्यतिरिक्त महावितरणने ५ हजार रुपयांपेक्षा अधिक बिल असणाऱ्या सर्व लघुदाब ग्राहकांना आरटीजीएस किंवा एनईएफटीद्वारे देयक भरण्याची सुविधा उपलब्ध करून दिलेली आहे. त्यासाठी आवश्यक माहितीचा तपशिल संबंधित ग्राहकांच्या वीजबिलावर उपलब्ध आहे.

पुणे- दोघेही अल्पवयीन ,याच वयात अडकला, जीव गुदमरला अन मुलाने केली आत्महत्या ..अखेरीस आत्महत्येस प्रवृत्त केल्याबद्दल अल्पवयीन मुलीवर येरवडा पोलिसांनी गुन्हा दाखल केला आहे. अर्थात आता यावर हि प्रेमकहाणी एकतर्फी होती कि दुतर्फी होती हि माहिती उघड व्हावी यात कोणालाही स्वारस्य काही नाही .पण अवघ्या १६ वर्षाच्या मुलाने आपली मैत्रीण बोलत नाही ,मला तुझ्या सोबत बोलायचे नाही या कारणाने १ डिसेंबर रोजी त्याच्या आजीच्या घरी या मुलीसोबत वाद घातला आणि त्यानंतर आजीच्याच घरी गळफास घेऊन आत्महत्या केली . याप्रकरणी मुलाच्या आईने पोलिसात तक्रार दिली आहे . पोलिसांनी मुलीवर गुन्हा दाखल केला आहे .सहायक पोलीस निरीक्षक जमदाडे 9552515238 अधिक तपास करत आहेत .

पुणे, दि. ५: जिल्ह्यातील सर्व महाविद्यालयांनी पात्र विद्यार्थ्यांची मतदार नोंदणी करण्यासाठी ८ डिसेंबरपर्यंत अधिकाधिक विशेष मतदार नोंदणी शिबिराचे आयोजन करावे, असे आवाहन जिल्हाधिकारी डॉ. राजेश देशमुख यांनी सावित्रीबाई फुले पुणे विद्यापीठाच्या कुलगुरुंना पत्राद्वारे केले आहे.

जिल्ह्यात विशेष संक्षिप्त पुनरीक्षण कार्यक्रम सुरू असून विभागीय आयुक्त तथा पुणे विभागाचे मतदार यादी निरीक्षक यांनी पुणे जिल्ह्यात पाहणी दौऱ्यादरम्यान मतदार नोंदणीबाबत विविध सूचना केल्या. मतदान प्रक्रियेत १८ ते १९ आणि २० ते २९ या वयोगटातील युवकांचा सहभाग लोकसंख्येच्या प्रमाणात कमी असल्याने युवा लोकसंख्येच्या मतदार नोंदणीसाठी विशेष लक्ष देण्याच्या सूचना त्यांनी दिल्या. त्यानुसार जिल्हा निवडणूक प्रशासनातर्फे मतदार नोंदणीसाठी विशेष मोहिम सुरू करण्यात आली आहे.

त्या अनुषंगाने महाविद्यालयातील पात्र विद्यार्थ्यांच्या मतदार नोंदणीसाठी शिबिरे आयोजित करावीत, विद्यार्थ्यांना मतदार नोंदणीसाठी आवश्यक कागदपत्रे, शिबिराच्या तारखेची माहिती महाविद्यालयातील सूचना फलकावर लावून विद्यार्थ्यांमध्ये जनजागृती करावी. महाविद्यालयात ऑनलाइन ऑफलाइन मतदार नोंदणीच्या सुविधा लक्षात घेऊन नियोजन करावे, असे आवाहन जिल्हाधिकाऱ्यांनी केले आहे. त्यांनी जिल्ह्यातील सर्व मतदार संघातील मतदार नोंदणी अधिकाऱ्यांनाही अशी शिबिरे आयोजित करण्याचे निर्देश दिले आहेत.

महाविद्यालयांमध्ये शंभर टक्के मतदार नोंदणी करण्यावर भर देण्यात यावा. शिबिर आयोजित करण्यापूर्वी स्थानिक पातळीवर प्रसिद्धी द्यावी तसेच सबंधित मतदार नोंदणी अधिकारी व सहाय्यक मतदार नोंदणी अधिकारी यांनी देखील शिबिराकरिता जिल्हाधिकारी तथा जिल्हा निवडणूक अधिकारी यांचे प्रतिनिधी म्हणून कामकाजाची पहाणी करावी. वर्शिप अर्थ फाऊडेशन यांचा महाविद्यालयांशी युवा मतदार जागृती आदींच्या अनुषंगाने सामंजस्य करार झालेला असून त्यांच्याशी समन्वय साधावा, अशाही सूचना जिल्हाधिकाऱ्यांनी दिल्या आहेत.

दूरदृष्य प्रणालीद्वारे मतदार नोंदणी शिबिराबाबत आढावा
उपजिल्हाधिकारी तथा स्वीप समन्वयक अर्चना तांबे यांनी जिल्हाधिकारी कार्यालयात दूरदृष्य प्रणालीद्वारे आयोजित आढावा बैठकीत मतदार नोंदणीबाबत १५० महाविद्यालयांच्या प्रतिनिधींशी संवाद साधला.

मतदार यादीमध्ये युवकांच्या कमी टक्केवारीचा विचार करता महाविद्यालयांमध्ये शंभर टक्के मतदार नोंदणी करण्याच्यादृष्टीने राष्ट्रीय कर्तव्य म्हणून मोहिम स्तरावर कार्यवाही करुन सहकार्य करावे. ग्रामीण भागातील महाविद्यालयात शंभर टक्के मतदार नोंदणी होईल याकडे लक्ष द्यावे. महाविद्यालयांनी विद्यार्थ्यांना ऑनलाईन मतदार नोंदणी अर्ज भरण्यासाठी करण्यासाठी प्रोत्साहित करावे. मतदार नोंदणीच्या अनुषंगाने आपल्या सूचना किंवा कल्पना असल्यास कळवाव्यात. मतदार नोंदणी प्रक्रियेत अडचण आल्यास जवळच्या मतदान नोंदणी केंद्राशी संपर्क साधावा, असे आवाहन श्रीमती तांबे यांनी यावेळी केले.

बस चालकाविरोधात गुन्हा दाखल

पुणे-वाघोली इथल्या रायझिंग स्टार या शाळेची बस काल दुपारी झाडाला आदळली . बसमधले काही विद्यार्थी जखमी झाले. जखमी विद्यार्थ्यांवर उपचार खासगी रुग्णालयामध्ये सुरू आहेत. लोणीकंद पोलीस स्टेशनच्या हद्दीत हा अपघात घडला. या अपघाताचा थरारक सीसीटीव्ही व्हिडीओही समोर आला आहे.पोलिसांनी या प्रकरणामध्ये बस चालकाविरोधात गुन्हा दाखल केला आहे. या प्रकरणामध्ये आता पोलीस पुढील तपास करत आहेत. मात्र स्कूल बसविरोधात ठोस भूमिका घ्यावी अशी मागणी पालकांकडून केली जात आहे.

या अपघाताचा घटनाक्रम सीसीटीव्हीमध्ये रेकॉर्ड झाला आहे. या सीसीटीव्हीमध्ये रस्त्याच्या बाजूला असलेल्या झाडावर अत्यंत वेगाने स्कूल बस धडकल्याचे दिसून येत आहे. तर बसचा डावा भाग झाडाला धडकल्यानंतर बसची डॅशबोर्डची काच उडून समोर पडताना दिसते. बसचा अपघात झाल्यानंतर बसमधील मुलांचा आरडाओरड आणि किंकाळ्याही ऐकू आल्याची माहिती समोर येत आहे.

अपघात झाल्यानंतर स्थानिकांनी तातडीने या स्कूल बसमधील मुलांना बाहेर काढण्यास सुरुवात केली. काही स्थानिक खिडकीमधून डोकावून रडत असलेल्या मुलांना शांत करण्याचा प्रयत्न करताना ‘शांत व्हा, शांत व्हा. भिऊ नका. काही झालेलं नाही,’ अशा शब्दांत स्थानिक धीर देत होते. मात्र या अपघातामुळे पुन्हा एकदा स्कूल बसमधील विद्यार्थ्यांच्या सुरक्षेचा प्रश्न उपस्थित केला जात आहे.

सुदैवाने या अपघातामध्ये जिवितहानी झालेली नाही. मात्र पैसे मोजूनही मुलांच्या सुरक्षेबद्दल असा बेजबाबदारपणा पाहून पालकांनी संताप व्यक्त केला आहे. या बसेसवर आरटीओचे नियंत्रण नसल्याचा आरोप पालक वर्गाकडून केला जात आहे. आरटीओने अशा बसेसवर कारवाई करण्याची गरज असते. मात्र पुणे आरटीओचे अशा बसेसवर कोणत्याही पद्धतीचे नियंत्रण नसल्याचा आरोप केला जात आहे. अनेकदा मार्यादेपेक्षा अधिक मुले बसमधून नेली जातात. तसेच स्कूल बसऐवजी विद्यार्थ्यांच्या वाहतुकीसाठी इतर वाहनांचाही मोठ्या प्रमाणात वापर केला जातो.

पुणे,दि.५ : जिल्हाधिकारी डॉ. राजेश देशमुख यांच्या निर्देशानुसार प्रशासनातील वरिष्ठ अधिकाऱ्यांनी कोरेगाव भीमा (पेरणे फाटा) विजयस्तंभ अभिवादन कार्यक्रम स्थळाची पाहणी केली, तसेच येथे करण्यात येत असलेल्या पूर्वतयारीचा आढावा घेतला.

यावेळी अपर पोलीस अधीक्षक रंजन कुमार शर्मा, उपविभागीय अधिकारी संजय आसवले, हवेली गट विकास अधिकारी भुषण जोशी आदी उपस्थित होते.

पेरणे फाटा येथे १ जानेवारी रोजी विजयस्तंभास अभिवादन करण्यास येणाऱ्या नागरिकांना सर्व सोयीसुविधा मिळतील यादृष्टीने पिण्याचे पाणी, स्वच्छता गृह, विद्युत प्रकाश व्यवस्था, वाहनतळ, सुरक्षा व्यवस्था, आरोग्य सुविधा, गर्दीचे व वाहतुकीचे नियोजन याविषयी माहिती घेण्यात आली.

या भेटीच्या वेळी विविध कार्यान्वयीन यंत्रणांचे वरिष्ठ अधिकारी उपास्थित होते.

पुणे- गेल्या ४ डिसेंबरला येथील पारशी गार्डनमध्ये खून करून टाकलेल्या एकाचा मृतदेह आढळला आणि पुणे पोलिसांची तपासाची चक्रे फिरू लागली, अवघ्या १२ तासात या मर्डरची कहाणी बोपदेव घाटात उलगडली आणि दोन्ही खुन्यांना चतुर्भुज करण्यात आले . वाचा पोलिसी भाषेतच पोलिसी तपासाची सत्य कहाणी

गुन्हे शाखेकडुन खुनाच्या गुन्हयातील आरोपीतास १२ तासात केले जेरबंद
दिनांक ०४/१२/२०२३ रोजी कोंढवा पोलीस स्टेशनच्या हददीत शिवनेरीनगर येथील गव्हाणे क्रिडांगण समोर असलेले पारशी गार्डन, कोंढवा, पुणे येथे शाहनवाज उर्फ बबलु मुनिर सैय्यद याला कोणीतरी अज्ञात इराद्नेया त्याचे पोटावर व गळ्यावर कसल्यातरी धारदार हत्याराने वार करुन ठार मारले आहे. म्हणुन अज्ञात व्यक्ती विरुध्द कोंढवा पोलीस स्टेशन, पुणे शहर येथे गुन्हा रजि. नं. १२२९/२०२३, भारतीय दंड संहिता कलम ३०२ प्रमाणे गुन्हा दाखल आहे.
सदर गुन्हयाचे घटनास्थळी युनिट-५, गुन्हे शाखेचे टिमने तात्काळ भेट देऊन, दाखल गुन्हयाचा समांतर तपास करीत असताना, तपासादरम्यान युनिटकडील अधिकारी व स्टाफ यांना बातमी मिळाली की, शाहनवाज उर्फ बबलु याचा खुन झाला असुन, त्याचेसोबत शेवटचे साहिल युसूफ शेख, सद्दाम उर्फ सज्जुद्दीन शेख व त्याचा मित्र यांना पाहिलेले असुन, त्यांचेपैकी साहिल शेख व सद्दाम शेख यांचेकडे पांढ-या रंगाचा बर्गमन गाडी असुन ते बोपदेव घाटात लपुन बसलेले असल्याची बातमी मिळाली.
त्याप्रमाणे युनिटकडील पोलीस निरीक्षक, महेश बोळकोटगी व स्टाफ असे बोपदेव घाटात जाऊन पाहणी
करत असताना १) साहिल युसूफ शेख, वय-२३ वर्षे, रा. बी-१, बंगलो सोसायटी, पिसोळी, पुणे व मुळगाव-मु.पो. बैरागड, ता.धार्णी, जि. अमरावती २) सज्जुद्दीन उर्फ सद्दाम सिरखुद्दिन शेख, वय-३५ वर्षे, रा. सायमा रेसीडेन्सी, शिवनेरीनगर, लेन नं.६, कोंढवा, पुणे यांना ताब्यात घेतले. त्यांचेकडे केलेल्या कौशल्यपुर्ण व सखोल तपासात साहिल युसूफ शेख याने सुमारे दिड वर्षापुर्वी बबलु याचेकडुन पल्सर गाडी विकत घेतली. परंतु तो गाडीचे कागदपत्रे न देता वारंवार शिवीगाळ करीत होता. तसेच सज्जुद्दीन उर्फ सद्दाम सिरखुद्दिन शेख याने मयत शाहनवाज उर्फ बबलु याचेकडुन २ लाख रुपये व्याजाने घेतले होते. त्याचेपेक्षा जास्त रक्कम घेऊन सुध्दा मयत वारंवार सद्दाम यास दमदाटी करुन शिवीगाळ करुन आणखी पैशाची मागणी करीत होता. साहिल, सद्दाम व त्यांचा मित्र नोमन खान, रा. पिसोळी असे तिघांनी मिळून मयताचे त्रासाला कंटाळुन त्याला जीवे ठार मारण्याचा कट रचुन, शाहनवाज उर्फ बबलु यास शिवनेरीनगर, पारसी मैदान येथे घेऊन जाऊन, त्यास दारु पाजुन, त्यांनी ठरल्याप्रमाणे शाहनवाज उर्फ बबलु धारदार हत्याराने त्याचे गळ्यावर वार करून, त्याचे पोटात चाकु खुपसून, त्यास गंभीर जखमी करुन जीवे ठार मारल्याचे तपासात निष्पन्न झाले आहे. नमुद आरोपी गुन्हा करतेवेळी व पळुन जाण्याकरीता वापरलेली १,१०,०००/- रु किची बर्गमन मोपेड जप्त करण्यात आली आहे. सदर खुनाच्या गंभीर गुन्हयाचा समांतर तपास करुन, सदरचा गुन्हा हा जलद गतीने व मोठया कुशलतेने हाताळुन अवघ्या १२ तासाच्या आत गुन्हेगाराच्या मुसक्या आवळण्यात आल्या आहेत.
सदरची कामगिरी ही मा. पोलीस आयुक्त, श्री. रितेश कुमार, मा. पोलीस सह आयुक्त, (अतिरिक्त कार्यभार) व मा.अपर पोलीस आयुक्त, गुन्हे, श्री. रामनाथ पोकळे, मा. पोलीस उप आयुक्त, श्री. अमोल झेंडे, मा. सहायक पोलीस आयुक्त, श्री. सतिश गोवेकर यांचे मार्गदर्शनाखाली पोलीस निरीक्षक, श्री. महेश बोळकोटगी, सहा. पोलीस निरीक्षक, कृष्णा बाबर, पोलीस उप-निरीक्षक, अविनाश लोहोटे, पोलीस उप-निरीक्षक, वैताली गपाट, पोलीस अमंलदार, पृथ्वीराज पांडुळे, रमेश साबळे, राजस शेख, प्रताप गायकवाड, दया शेगर, प्रमोद टिळेकर, पल्लवी मोरे, विनोद शिवले, दाऊद सय्यद, अकबर शेख, अमित कांबळे, शहाजी काळे, शशिकांत नाळे यांनी केलेली आहे.

काव्यनिर्मिती करताना समाजाशी एकरूपता असायला हवी ज्येष्ठ साहित्यिक भारत सासणे ; गझलकार मिलिंद दाते लिखित ‘क्षणाचे चांदणे’ या मराठी गझलसंग्रहाचा प्रकाशन सोहळा 
पुणे : कवी हा स्वान्तः सुखाय: असतो. प्रेम, सौंदर्याबद्दल लिहीत असताना त्याच्यावर सामाजिक चिंतन करत नसल्याचा आरोप होतो. अशावेळी काही कवी शरणागती पत्करून वेगळे लिहिण्याचा प्रयत्न हि करतात, परंतु कवींनी स्वतःशी प्रामाणिक राहून आपण समाजाचेही देणे लागतो ही जाणीव ठेवायला हवी. काव्यनिर्मिती करताना  समाजाशी एकरूपता असायला हवी, असे मत अखिल भारतीय मराठी साहित्य संमेलनाचे माजी अध्यक्ष ज्येष्ठ साहित्यिक भारत सासणे यांनी व्यक्त केले. मिलिंद दाते यांचे सामाजिक भान या संग्रहातून दिसून येते, असे प्रतिपादनही त्यांनी यावेळी केले.

गझलकार मिलिंद दाते लिखित प्रेम, विरह, उद्वेग, विफलता आयुष्य अशा विविध भावनांवर रचलेल्या गझलांच्या ‘क्षणाचे चांदणे’ या पुस्तक प्रकाशन सोहळ्याचे आयोजन सदाशिव पेठेतील म.ए.सो. पूर्व प्राथमिक शाळेच्या सभागृहात करण्यात आले होते. यावेळी गझलकार दीपक करंदीकर आणि श्रीकांत वाघ उपस्थित होते.  

यावेळी पुस्तकातील काही निवडक गझलांचे सादरीकरण झाले. गझलकार मिलिंद दाते, संगीत हेमकांत नावडीकर, गायक कलाकार मेहेर परळीकर, रश्मी मोघे, वादक कलाकार डॉ. नरेन्द्र चिपळूणकर, यश सोमण, चिन्मय कारेकर यांनी गझलांचे सादरीकरण केले. “त्या क्षणाचे चांदणे”, “शृंगारले स्वत:ला” आणि “अजूनही स्मरणात राहिले” या गझलांना श्रोत्यांचा उत्स्फूर्त प्रतिसाद मिळाला.

भारत सासणे म्हणाले, स्त्रियांच्या बाबतची किंवा स्त्रियांची चर्चा म्हणजे गझल असे म्हटले गेले आहे. गझल जशी पुढे सरकू लागली तशी  केवळ स्त्री बद्दल नाही तर  भोवतालच्या जगाबद्दल, त्याच्या वास्तवाबद्दल बोलण्यासाठी गझलचा प्रयोग काही बंडखोर कवींनी केला आणि तो प्रत्यक्षात उतरवला. समाजातील काही घटकांबद्दलच्या वेदना, शोषणाबद्दल गझल लिहायला सुरुवात झाली. सर्वसामान्यांचा दबलेला आवाज मांडण्यासाठी गझलचा वापर करण्यात आला. हे सांगताना ‘क्षणाचे चांदणे’ यातील काही रचनांचा त्यांनी उल्लेख केला.

दीपक करंदीकर म्हणाले, आज कवितांप्रमाणे गझल हा काव्यप्रकार देखील मोठ्या प्रमाणात लिहिला जात आहे. समाज माध्यमाद्वारे या काव्य प्रकाराला वाव मिळाला आहे आणि त्यातून गझलकार सुरेश भटांचे स्वप्न साकार होत असल्याचा आनंद आहे.

मिलिंद दाते म्हणाले, कोणत्याही क्षेत्रातील संशोधणासाठी जशी प्रयोगशीलता असायला हवी तशीच प्रयोगशीलता साहित्य निर्मिती करताना असणे महत्वाचे आहे. स्वतःसाठी लिहीत राहिले पाहिजे आणि लिहिताना विविध प्रयोग करायला हवेत, असेही त्यांनी सांगितले. यावेळी श्रीकांत वाघ यांनी देखील मनोगत व्यक्त केले. कार्यक्रमाचे सूत्रसंचालन वीणा केळकर यांनी केले.

प्रा. डॉ. मंगेश कराड: एमआयटी एडीटी विद्यापीठात ईएलटी समिट

पुणे : इंग्रजी भाषा व साहित्य यांच्या माध्यमातून व्यक्तिमत्व सरस होते आणि त्यातून समाजाकडे, देशाकडे पाहण्याची एक दृष्टी विकसित होते. त्यामुळे, समाजाच्या उन्नतीसाठी अशा परिषदेच्या माध्यमातून चर्चा घडवून आणल्या पाहिजेत, असे विचार एमआयटी एडीटी विद्यापीठाचे कुलगुरू तथा कार्याध्यक्ष प्रा. डॉ. मंगेश कराड यांनी व्यक्त केले.

ते इंटरनॅशनल सोसायटी फॉर एज्युकेशनल लीडरशिप (आयएसईएल, यूएसए, ऑस्ट्रेलिया आणि भारत) आणि एमआयटी आर्ट, डिझाईन आणि टेक्नॉलॉजी विद्यापीठ, विश्वराजबाग, पुणे, यांच्या संयुक्त विद्यमाने आयोजित ईएलटी समिट २०२३ या आभासी आंतरराष्ट्रीय परिषदेच्या उद्घाटन कार्यक्रमात बोलत होते. यावेळी विद्यापीठाचे प्र.कुलगुरू प्रा. डॉ. अनंत चक्रदेव, आयएसईएल युएसएचे ध्रुव जोशी, ईएलटी समिटचे सल्लागार डॉ. तरुण पटेल,  स्कूल ऑफ होलिस्टिक डेव्हलपमेंटचे संचालक आणि ईएलटी समिटचे समन्वयक डॉ.अतुल पाटील आदी या प्रसंगी उपस्थित होते.

उद्घाटन कार्यक्रमात बोलताना डॉ. राॅबर्ट फिलबॅक म्हणाले की, प्रत्येकाला इंग्रजी शिकण्यास प्रवृत्त करण्यासाठी व त्यासाठी येणाऱ्या समस्या सोडविण्यासाठी ईएलटी सारख्या चर्चासत्रांचे आयोजन करणे आवश्यक आहे. तर भाषा समाजावर प्रभाव टाकते आणि परिवर्तन आणि नावीन्य आणते, ज्याचा विज्ञान आणि तंत्रज्ञान तसेच इतर क्षेत्रांवर महत्त्वपूर्ण प्रभाव पडतो. मानवाच्या आणि भाषेच्या उन्नतीसाठी सर्वांनी एकत्रित येऊन ईएलटी समिट २०२३ सारखे उपक्रम राबविले पाहिजेत, असे डॉ. पीटर वॅटकिन्स यांनी ईएलटी समिटच्या समारोपाच्या कार्यक्रमाप्रसंगी प्रतिपादन केले. 

या समिटच्या चर्चासत्रांत डॉ. रॉबर्ट फिलबॅक (युएसए), डॉ. जुडिथ हँक्स (यूके), डॉ.कॅथरीन अकर्सो (कॅनडा), डॉ. ब्रेंडा मुझेटा, (यूएसए), मार्शा जिंग-जी लिया (यूके), मौसमी गुहा बॅनर्जी, डॉ. परेश जोशी, डॉ. हरिबाबू थम्मिनेनी, ज्योती रमेश पै, डॉ. शालिनी शर्मा आदि तज्ञ लोकांनी आपले विचार व्यक्त केले. यासोबतच या समिटमध्ये संशोधन पेपर सादरीकरण, पॅनेल चर्चा, नेटवर्किंग आदी सत्रांचे आयोजन करण्यात आले होते. उल्लेखनिय बाब म्हणजे, या परिषदेदरम्यान, यूएसए, यूके, ऑस्ट्रेलिया, कॅनडा, यूके, भारत आणि इतर अनेक देशांतील सहभागींनी १०० हून अधिक शोधनिबंध सादर केले. ज्यामुळे ही परिषद अत्यंत यशस्वी ठरली. डॉ.अशोक घुगे यांनी  उद्घाटनाप्रसंगी, तर प्रा.अमिषा जयकर व प्रा. स्नेहा वाघाटकर यांनी  समारोप कार्यक्रमाचे सूत्रसंचालन केले.

पुणे, दि. ५ – सर्व सामान्य नागरिकांना स्वतःचे घर उपलब्ध करुन देण्यासाठी म्हाडाच्यावतीने प्रयत्न करण्यात येत असून येत्या वर्षभरात विविध गृहनिर्माण योजनेअंतर्गत सुमारे १ लाख कुटुंबांना हक्काचे घर उपलब्ध करुन देण्यात येणार आहे, असे प्रतिपादन गृहनिर्माण मंत्री अतुल सावे यांनी केले.

पुणे मंडळाच्यावतीने जिल्हा परिषद येथे आयोजित सदनिका संगणकीय सोडत समारंभ प्रसंगी ते बोलत होते. यावेळी म्हाडाचे उपाध्यक्ष तथा मुख्य कार्यकारी अधिकारी संजीव जयस्वाल, विभागीय आयुक्त सौरभ राव, जिल्हाधिकारी डॉ. राजेश देशमुख, जिल्हा परिषदेचे मुख्य कार्यकारी अधिकारी रमेश चव्हाण, पीएमआरडीएचे आयुक्त राहुल महिवाल, म्हाडा पुणे मंडळाचे मुख्य अधिकारी अशोक पाटील आदी उपस्थित होते.

  श्री. सावे म्हणाले, नागरिकांच्या हक्काच्या घरांचे स्वप्न पूर्ण करण्यासाठी प्रधानमंत्री नरेंद्र मोदी यांनी ‘सर्वांसाठी घरे’ देण्याची संकल्पना मांडली. त्यानुसार राज्य व केंद्र शासन मिळून प्रधानमंत्री आवास योजनांसारख्या विविध योजनांच्या माध्यमातून नागरिकांना हक्काची घरे उपलब्ध करुन दिली जात आहेत. पुणे म्हाडाच्या आजच्या सोडतीत उपलब्ध सदनिकांच्या तुलनेत सुमारे दहापटीने अर्ज प्राप्त झाले. सदनिकांसाठी नागरिकांनी मोठ्या प्रमाणात अर्ज करुन म्हाडावर विश्वास दाखविल्याबद्दल त्यांनी नागरिकांना धन्यवाद दिले. म्हाडाच्यावतीने नागरिकांना ५ लाख १४ हजार घरे उपलब्ध करुन देण्यात आली आहेत. म्हाडाची सोडत प्रक्रिया पूर्णपणे ऑनलाईन असून अतिशय पारदर्शक आहे, नागरिकांनी अफवांवर विश्वास ठेवू नये, असेही श्री.सावे म्हणाले.

मुंबईतील सुमारे ७५ हजार गिरणी कामगारांच्या घरांचा प्रश्न मार्गी लावण्यात येणार आहे. सोलापूर जिल्ह्यात प्रधानमंत्री आवास योजनेअंतर्गत विविध प्रकल्प उभारण्यात येत आहे. आगामी काळातही विविध उत्पन्न गटातील नागरिकांना परवडणारी घरे उपलब्ध करुन देण्यासाठी प्रयत्न करण्यात येतील. यापुढे घरांची सोडत वर्षातून दोन वेळेस घेण्यासाठी म्हाडानी प्रयत्न करावेत. २० टक्के सर्वसमावेशक गृहनिर्माण योजनेअंतर्गत अधिकाधिक नागरिकांना परवडणारी घरे देण्यासाठी प्रयत्न करावेत. पुणे विभागात विविध गृहनिर्माण योजनेकरीता शासकीय भुखंड उपलब्ध करुन देण्याच्या प्रस्तावाला विभागीय आयुक्तांनी गती देण्याची कार्यवाही करावी, अशा सूचना श्री. सावे यांनी दिल्या.

सोडतीमध्ये घर मिळालेल्यांचे अभिनंदन करतांना ज्यांना घरे मिळाले नाहीत, त्यांनी निराश न होता आगामी काळात होणाऱ्या सोडतीमध्ये पुन्हा अर्ज करावेत, असे आवाहन श्री. सावे यांनी केले.

श्री. जयस्वाल म्हणाले, सर्वसामान्य नागरिकांना हक्काचे घरे उपलब्ध करुन देत त्यांचे जीवनमान उंचविण्यासाठी म्हाडाच्यावतीने सुमारे ९ लाख परवाडणाऱ्या घरांची निर्मिती केली आहे. पुणे म्हाडाच्यावतीने विविध उतपन्न गटातील सुमारे ३५ हजार सदनिका, ७ हजार ८०० भुखंड आणि ७५५ गाळे वितरीत करण्यात आले आहे. सद्यस्थितीत विविध योजनेअंतर्गत ३ हजार ७४० सदनिकांची निर्मिती प्रगतीपथावर आहे. म्हाडातर्फे ५९२ भूखंड वितरीत करण्यात आले आहे. जुन्या इमारतींचे पुर्नविकास करण्याची कार्यवाही करण्याच्यादृष्टीने गती देण्याचे प्रस्तावावर कार्यवाही सुरु आहे.

म्हाडाच्यावतीने घेण्यात येणारी घरांची ऑनलाईन सोडत अतिशय पारदर्शक, मानवी हस्तक्षेपाशिवाय पार पाडण्यात येत आहेत. सर्वसामान्य नागरिकांना सुलभरित्या घरे मिळत असल्याने त्यांच्या मनात शासनाप्रती विश्वास अधिक वृद्धिंगत होत आहे. यापुढेही म्हाडाच्यावतीने विविध घरांच्या विविध सोडती होणार असून नागरिकांनी यांचा लाभ घ्यावा, असे आवाहन श्री. जयस्वाल यांनी केले.

यावेळी श्री. सावे यांच्या हस्ते विजेत्यांना निकालपत्रे देण्यात आली.

सोडतीचा तपशील
पुणे म्हाडाच्या ५ हजार ८६३ घरांसाठी ५९ हजार ३५० ऑनलाईन अर्ज प्राप्त झाले आहेत. त्यामध्ये म्हाडा गृहनिर्माण योजनेच्या ४०३ घरांसाठी १ हजार ७२४, प्रधानमंत्री आवास योजना ४३१ घरांसाठी २७०, २० टक्के सर्वसमावेशक गृहनिर्माण योजना २ हजार ५८४ घरांसाठी ५६ हजार ९४१ आणि प्रथम येणाऱ्यास प्रथम प्राधान्य (म्हाडा गृहनिर्माण योजना) साठी २ हजार ४४५ घरांसाठी ४१५ अर्ज प्राप्त झाले. सोडतीचा निकाल म्हाडाच्या संकेतस्थळावर तसेच कार्यालयाच्या सूचना फलकावरही उपलब्ध आहे. नागरिकांनी संकेतस्थळाला किंवा कार्यालयास भेट द्यावी, असे आवाहन म्हाडाच्यावतीने करण्यात येत आहे.

पुणे प्रार्थना समाजाच्या वतीने पुरस्कार वितरण : संस्थेचा १५३ वा वार्षिकोत्सव

पुणे : समाजामध्ये प्रार्थना समाजा सारख्या संस्थांची गरज आहे. पुणे प्रार्थना समाज विविध उपक्रम समाजातील लोकांसाठी राबवत असते. अशा उपक्रमांतून शाश्वत मूल्ये समाजात रुजवली जात आहेत. त्यामुळे आजच्या काळात प्रार्थना समाजासारख्या संस्थांची गरज आहे, असे मत सावित्रीबाई फुले पुणे विद्यापीठाचे कुलगुरु डॉ. सुरेश गोसावी यांनी व्यक्त केले.
पुणे प्रार्थना समाजाच्या वतीने १५३ व्या वार्षिकोत्सवानिमित्त विविध पुरस्कार प्रदान करण्यात आले. भांडारकर प्राच्यविद्या संस्थेच्या नवलमल फिरोदिया सभागृहात पुरस्कार प्रदान सोहळा झाला. यावेळी संस्थेच्या अध्यक्षा डाॅ. सुषमा जोग, चिटणीस डॉ. दिलीप जोग, शिल्पा मुजुमदार,  नमिता मुजुमदार,  मीरा भरवीरकर, उषा शर्मा, प्रशांत पाडवे, धनराज निंबाळकर उपस्थित होते. 
प्राज इंडस्ट्रीजचे डाॅ.प्रमोद चौधरी यांना डॉ. रामकृष्ण गोपाळ भांडारकर पुरस्कार, सुमेधा चिथडे यांना महर्षी विठ्ठल रामजी शिंदे पुरस्कार, कॉकलिया पुणे संस्थेला डेव्हिडा रॉबर्ट्स् पुरस्कार प्रदान करण्यात आले. कॉकलिया पुणे संस्थेच्या वतीने रक्षा देशपांडे आणि डॉ. अविनाश वाचासुंदर यांनी पुरस्कार स्वीकारले.
सुमेधा चिथडे म्हणाल्या, सैनिक हाच माझ्यासाठी देव आहे. कारण राष्ट्रावर जेव्हा संकट येते तेव्हा सैनिक त्या संकटाला सामोरा जातो. सियाचिन येथे सैनिकांसाठी ऑक्सिजन प्लॅट जेव्हा उभा करायचा होता, तेव्हा समाजातील अनेकांनी मदत केली. परंतु त्यासाठी सुरुवात स्वतःपासून करावी लागते. देहाकडून देवाकडे जाताना मध्ये राष्ट्र लागते, आणि त्या राष्ट्राचे आपण देणे लागतो, असेही त्यांनी सांगितले.
रक्षा देशपांडे म्हणाल्या, ऐकणे शिकविण्यापासून ते बोलणे शिकविण्यापर्यंत काॅकलिया संस्थेचा हा प्रवास आहे. कर्णबधिरत्व हे एकमेव अपंगत्व आहे ज्याचे निदान वेळीच म्हणजे वयाच्या ६ वर्षाच्या आत झाल्यास त्यावर मात करता येते. त्यामुळे ज्यांना उपचारांची गरज आहे, अशा मुलांना आमच्यापर्यंत पोहोचवा, असे आवाहनही त्यांनी यावेळी केले. डाॅ. प्रमोद चौधरी यांनी पुणे प्रार्थना समाजाच्या कार्याचे कौतुक केले.
डाॅ. सुषमा जोग यांनी संस्थेच्या समाजाभिमुख उपक्रमांची माहिती दिली. शिल्पा मुजुमदार यांनी सूत्रसंचालन केले.