पुणे, मार्च 14, 2024 : सह्याद्रि हॉस्पिटलने तुकाराम पिंगळे (नाव बदलले आहे) या हडपसर, पुणे येथील ३३ वर्षीय मजुरावर यशस्वी उपचार करून एक उल्लेखनीय वैद्यकीय कामगिरी केली आहे. ते आपल्या कुटुंबाचे एकमेव उदरनिर्वाहक होते.

21 जानेवारी २०२४ रोजी रुग्णालयात दाखल झाल्यानंतर तुकाराम यांची पल्मोनरी एम्बोलिझमसाठी पर्क्यूटेनियस थ्रोम्बेक्टॉमी करण्यात आली. ही जीवन वाचवणारी प्रक्रिया आहे, जी त्यांच्या उल्लेखनीय प्रकृतीस्वास्थ्यासाठी आवश्यक ठरली. त्यांच्या प्रकृतीच्या गंभीरतेमुळे आणि सह्याद्रि हॉस्पिटल, हडपसर येथील टीमने राबविलेल्या पथदर्शी उपचार योजनेमुळे त्यांची केस उभी राहिली आहे, ज्यामुळे हॉस्पिटलची समाजाची सेवा करण्याची अटळ बांधिलकी अधोरेखित झाली आहे.

“पल्मोनरी एम्बोलिझमवर उपचार करताना, एक जीवघेणी स्थिती, जलद आणि अचूकतेची आपश्यकता असते. विशेषत: तुकारामांसारख्या गंभीर प्रकरणांमध्ये, जेथे त्याच्या आरोग्याच्या पलीकडे त्याच्या संपूर्ण कुटुंबाच्या कल्याणासाठी धोका असतो, असे सह्याद्रि हॉस्पिटल पुणेचे इंटरव्हेन्शनलत रेडिओलॉजिस्ट डॉ. कौरभी झाडे यांनी सांगितले. “स्थानिक ऍनेस्थेसिया अंतर्गत कमीतकमी आक्रमक पेरोनियस थ्रोम्बेक्टॉमीमुळे क्लॉट लवकर काढणे सुलभ होते, कमीतकमी जोखमींसह जलद पुनर्प्राप्ती सुनिश्चित होते. तुकारामचे प्रकरण गंभीर पल्मोनरी एम्बोलिझम प्रदान करण्यासाठी प्रगत, कमी आक्रमक उपचार पर्यायांची आवश्यक भूमिका अधोरेखित करते. गंभीर स्थितीतील रुग्ण, विशेषत: ज्या प्रकरणांमध्ये आपण थ्रोम्बोलाइटिक औषध देऊ शकत नाही किंवा जेव्हा थ्रोम्बोलाइटिक थेरपी दिल्यानंतर रुग्णामध्ये कोणतीही सुधारणा होत नाही, अशा उपचार योजना जीवन वाचवणाऱ्या असतात.”

“तुकारामांच्या पल्मोनरी एम्बोलिझमचे यशस्वी निराकरण हे वेळेवर, नाविन्यपूर्ण वैद्यकीय हस्तक्षेपांचे आणि आरोग्य सेवामधील सहयोगी टीमच्या प्रयत्नांच्या गंभीर प्रभावाचा पुरावा आहे, असे  सह्याद्रि हॉस्पिटल्स, पुणे येथील पल्मोनरी एम्बोलिझम रिस्पॉन्स टीम (पीईआरटी) चे लीडर डॉ.कपिल बोरावके यांनी सांगितले. “आमच्या हॉस्पिटलमध्ये 24/7 तत्पर असलेल्या समर्पित पीईआरटी (PERT)टीमची उपस्थिती, तात्काळ, सर्वसमावेशक काळजी प्रदान करण्यात महत्त्वाची ठरली. या दृष्टिकोनामुळे केवळ रुग्णाचे प्राण वाचले नाहीत तर पल्मोनरी एम्बोलिझमच्या उपचारांमध्ये नवीन मानके स्थापित करण्याची आमची वचनबद्धता देखील दिसून येते. आता हे पाहून त्याच्यासारख्या रुग्णांना शक्य तितक्या चांगल्या परिणामांपर्यंत पोहोचता येईल.”

शस्त्रक्रियेनंतर 1-2 दिवसात, तुकारामांची उल्लेखनीय प्रगती केवळ नाविन्यपूर्ण उपचारांची परिणामकारकता अधोरेखित करत नाही तर सह्याद्रि रुग्णालयातील वैद्यकीय पथकाच्या समर्पणावरही भर देते. लवचिकता आणि उपचारांची ही विजयी कथा सह्याद्रि हॉस्पिटलच्या जीवनाच्या सर्व स्तरांतील व्यक्तींना प्रगत आणि प्रभावी वैद्यकीय सेवा देण्याच्या वचनबद्धतेचा पुरावा आहे.

पुणे : आंतरराष्ट्रीय महिला दिनाच्या निमित्ताने आरएसबी ट्रान्समिशन्सतर्फे कर्तृत्ववान महिलांचा सन्मान करण्यात आला. संस्थेच्या ‘एक पहल’ या महिला सक्षमीकरण उपक्रमांतर्गत सामाजिक बदलांमध्ये योगदान देणाऱ्या पुण्यातील विविध क्षेत्रात कार्यरत महिलांना सन्मानित करण्यात आले.

आरएसबी ग्रुपच्या कार्यकारी संचालक (एचआर) निर्मला बेहेरा यांच्या संकल्पनेतून राबविण्यात येणाऱ्या ‘एक पहल’ उपक्रमांत आरोग्य व स्वच्छता, शिक्षण व विकास, समुदाय सेवा आणि सुरक्षा या चार क्षेत्रांत काम सुरु आहे. याच क्षेत्रांत महत्त्वपूर्ण सामाजिक योगदान देणाऱ्या महिलांना माजी नगरसेविका नंदा नारायण लोणकर यांच्या हस्ते हे पुरस्कार प्रदान करण्यात आले. आरएसबी ग्रुपचे चेअरमन आर. के. बेहरा, व्हाईस चेअरमन व व्यवस्थापकीय संचालक एस.के. बेहरा, संचालक निशित बेहरा यावेळी उपस्थित होते.

कोळवण गावाला वीज, वॉटर फिल्टर, रस्ते बांधणीसाठी आणि ३० बचत गटांच्या निर्माणासाठी योगदान देणाऱ्या सरपंच धनश्री पालकर, कातकरी जमातीतील मातांच्या सुरक्षित प्रसूतीसाठी मदत करणाऱ्या आरोग्य सेवा व्यावसायिक वंदना शेटे, निवासी मतिमंद विद्यालय (लोणीकंद) आणि संत गजानन निवासी मतिमंद विद्यालय (लोहगाव) यांच्यासाठी कार्यरत सुमित्रा शिक्षण मंडळाच्या राजश्री तापकीर, सामुदायिक आरोग्य अधिकारी श्रीमती मेघना पवार यांना सन्मानित करण्यात आले.

निर्मला बेहेरा म्हणाल्या, “आरएसबी ट्रान्समिशन्स ही एक ऑटो कंपोनंट मॅन्युफॅक्चरिंग कंपनी असून, यंदा ५० वर्षे साजरी करत आहे. येत्या काळात आरएसबी ग्रुपने महिला कर्मचारी संख्या ३० टक्के वाढवण्याचे उद्दिष्ट ठेवले आहे. समाजहिताचे काम करत बदल घडवणाऱ्या महिलांचा सत्कार प्रोत्साहन देणारा आहे. आव्हानांचा सामना करूनही या महिलांनी त्यांच्या ध्येयपूर्तीसाठी अथक परिश्रम घेतले आहेत.

पुणे, दि. १५ मार्च २०२४: चालू व थकीत वीजबिलांचा भरणा करणे सोयीचे व्हावे यासाठी पुणे, कोल्हापूर, सांगली, सातारा व सोलापूर जिल्ह्यातील महावितरणचे अधिकृत वीजबिल भरणा केंद्र शनिवारी (दि. १६) व रविवारी (दि. १७) सार्वजनिक सुट्टीच्या दिवशी कार्यालयीन वेळेत सुरू राहणार आहेत.

थकबाकीदार ग्राहकांनी थकीत बिलांचा भरणा न केल्यास वीजपुरवठा खंडित करण्याच्या कारवाईला वेग देण्यात आला आहे. वीजपुरवठा खंडित केल्यानंतर थकबाकी तसेच पुनर्जोडणी शुल्क अधिक जीएसटीचा भरणा केल्यानंतर वीजपुरवठा पूर्ववत करण्यात येत आहे.

पश्चिम महाराष्ट्रात सध्या घरगुती, वाणिज्यिक व औद्योगिक वर्गवारीतील १४ लाख १६ हजार  वीजग्राहकांकडे २५४ कोटी २० लाख रुपयांची थकबाकी आहे. यामध्ये (कंसात ग्राहक) पुणे जिल्हा- १६५ कोटी १४ लाख रुपये (७,३०,८५०), सातारा- १५ कोटी ३४ लाख (१,४२,९००), सोलापूर- ३१ कोटी ९४ लाख (१,९६,९१५), कोल्हापूर- २३ कोटी ९२ लाख (१,८२,५२०) आणि सांगली जिल्ह्यात १७ कोटी ८५ लाख रुपयांची (१,६३,०५०) थकबाकी आहे. वीजपुरवठा खंडित करण्याची कटू कारवाई टाळण्यासाठी वीजग्राहकांनी थकीत बिलांचा भरणा करून सहकार्य करावे, असे आवाहन पुणे प्रादेशिक संचालक श्री. अंकुश नाळे यांनी केले आहे.

वीजग्राहकांना www.mahadiscom.in या वेबसाईटवर तसेच महावितरणच्या मोबाईल अॅपद्वारे केव्हाही व कुठूनही ऑनलाइन पध्दतीने विनामर्यादा वीजबिलाचा भरणा करता येतो. या व्यतिरिक्त महावितरणने पाच हजार रुपयांपेक्षा अधिक बिल असणाऱ्या सर्व लघुदाब ग्राहकांना आरटीजीएस किंवा एनईएफटीद्वारे देयक भरण्याची सुविधा उपलब्ध करून दिलेली आहे. त्यासाठी आवश्यक माहितीचा तपशिल संबंधित ग्राहकांच्या वीजबिलावर उपलब्ध आहे. 

अग्रवाल क्लब चॅरिटेबल ट्रस्टच्या वतीने लवळे येथील सिम्बायोसिस विद्यापीठ रुग्णालयात दोन दिवसीय शिबीर

पुणे : अग्रवाल क्लब पुणे चॅरिटेबल ट्रस्ट आणि सिम्बायोसिस विद्यापीठ रुग्णालय व संशोधन केंद्र यांच्या संयुक्त विद्यमाने लवळे येथील रुग्णालयात विनामूल्य प्लास्टिक, कॉस्मेटिक्स आणि हॅन्ड सर्जरी शिबिर आयोजिले होते. या शिबिरात ३६ रुग्णांवर प्लास्टिक सर्जरी करण्यात आली. शिबिराचे हे बारावे वर्ष होते. या शिबिरात जन्मजात, भाजलेले, अपघातात तुटलेले व मोडलेले, शारीरिक व्यंग नीट करणाऱ्या शस्त्रक्रिया करण्यात आल्या. ज्यामुळे रुग्णांना जीवन जगणे अधिक सुकर होणार आहे.

अग्रवाल क्लबचे अध्यक्ष सुरेंद्र तुलस्यान, माजी अध्यक्ष व शिबिराचे आयोजक उमेश जालान, प्रकल्प समन्वयक कुंज टिबरेवाल, माजी अध्यक्ष राजीव अग्रवाल यांच्यासह इतर मान्यवर, तर सिम्बायोसिस रुग्णालयाकडून प्रमुख प्रशासक डॉ. जयश्री गोरडे, डॉ. टी विजय सागर, इतर डॉक्टर्स, नर्सिंग कर्मचारी यांच्या देखरेखीत हे शिबीर पार पडले.

प्रसिद्ध हॅन्ड सर्जन डॉ. पंकज जिंदल यांच्यासह इतर तज्ज्ञ डॉक्टरांच्या निगराणीत या शस्त्रक्रिया झाल्या. डॉ. जिंदल गेल्या २० वर्षांपासून महाराष्ट्रातील चाळीसगाव, जळगांव, जालना, शाहदा, वडूज, शिर्डी, रायपुर इत्यादि शहरात अशा शिबिरांचे आयोजन करत आहेत. ग्रामीण भागातील गरजू रुग्णांच्या शस्त्रक्रिया करून त्यांचे जीवन सुखकर करण्याचा उद्देश यामागे असल्याचे डॉ. जिंदाल म्हणाले

डॉ. पंकज जिंदाल म्हणाले की, खेड्यापाड्यात राहणाऱ्या रूग्णांना अशा उपचारांची माहिती नसते, तसेच ते परवडणारे नसतात. म्हणून त्यांच्यात उदासीनता, मनोधैर्य कमी होणे, सामान्य दैनंदिन जीवन जगण्याची इच्छा जाणे अशा गोष्टी होतात. समाजाकडूनही ही माणसे उपेक्षित राहतात. या सर्व समस्यांतून सुटका करण्याची सुवर्णसंधी रुग्णांना शिबिराच्या माध्यमातून मिळते. त्यांना सुखी जीवन जगण्याचे साधन मिळते. रुग्णांचा आनंद म्हणजे हे शिबीर यशस्वी झाल्याची पावती मिळते.

पुणे-काल आमदार रवींद्र धंगेकर यांनी आयुक्त विक्रम कुमार यांच्या कारकीर्दीवर आरोप करत बंगल्यावर ठिय्या मांडल्यावर आज त्यांची शासनाने बदली करून त्यांच्या जागेवर राजेंद्र भोसले यांची नियुक्ती केली आहे.विक्रमकुमार यांची अतिरिक्त महानगर आयुक्त, MMRDA, मुंबई म्हणून नियुक्ती करण्यात आली आहे.२००८ साली आय ए एस झालेले राजेंद्र भोसले यांनी यापूर्वी पुणे विभागीय आयुक्तालयात अतिरिक्त विभागीय आयुक्त म्हणून काम केलेले आहे .सांगली जिल्हापरिषद, सोलापूर जिल्हाधिकारी, कल्याण येथे msedcl मध्ये सहसंचालक,मुंबई उपनगरचे जिल्हाधिकारी, म्हणून काम केलेले आहे.

जुलाई २०२० पासून विक्रमकुमार यांच्याकडे पुणे महापालिका आयुक्तपदाची सूत्रे देण्यात आली होती .कोविड-19 साथीच्या रोगाचा प्रादुर्भाव रोखण्यासाठी पुणे शहरात कडक लॉकडाऊन पुन्हा सुरू करण्याबाबत तत्कालीन आयुक्त शेखर गायकवाड यांनी नाराजी व्यक्त केल्यानंतर, राज्य सरकारने शनिवारी अचानकपणे गायकवाड यांची बदली केली. गायकवाड जेमतेम सहा महिने आयुक्त होते सुरुवातीला त्यांनी केलेल्या प्रतिबंधात्मक उपायांसाठी प्रशंसा झाली होती परंतु नंतर काही लोकप्रतिनिधींच्याकडून ते विश्वासात घेत नाहीत असा आक्षेप घेतला गेला , त्यामुळे तात्काळ त्यांची बदली करून विक्रम कुमार यांना आणण्यात आले होते. विक्रम कुमार मार्च 2019 पासून पुणे महानगर प्रदेश विकास प्राधिकरण (PMRDA) चे महानगर आयुक्त होते. कुमार (43) हे PMC आयुक्त बनलेल्या सर्वात तरुण नोकरशहांपैकी एक आहेत. त्यांच्याकडे आर्किटेक्टची पदवी आहे आणि ते भारतीय प्रशासकीय सेवेच्या (IAS) 2004 च्या बॅचचे आहेत.पीएमआरडीएमध्ये काम करण्यापूर्वी कुमार यांनी मुंबईत महाराष्ट्र मेरीटाईम बोर्डाचे मुख्य कार्यकारी अधिकारी, मुंबईतील महाराष्ट्र औद्योगिक विकास महामंडळ (एमआयडीसी) येथे सह मुख्य कार्यकारी अधिकारी, औरंगाबादचे जिल्हाधिकारी, मीरा भाईंदर महापालिकेचे आयुक्त, सिंधुदुर्गचे जिल्हाधिकारी आणि जिल्हाधिकारी म्हणून काम केले आहे. वाशिम, चंद्रपूर आणि अकोला येथे विविध पदांवर पुण्यात येण्यापूर्वी काम केले होते.

या अधिकाऱ्यांची झाली बदली

1. विक्रम कुमार (IAS:MH:2004) महापालिका आयुक्त, पुणे महानगरपालिका, पुणे यांची अतिरिक्त महानगर आयुक्त, MMRDA, मुंबई म्हणून नियुक्ती करण्यात आली आहे.
2. डॉ. राजेंद्र भोसले (IAS:MH:2008) यांची महापालिका आयुक्त, पुणे महानगरपालिका, पुणे म्हणून नियुक्ती करण्यात आली आहे.
3. लहू माळी (IAS:MH:2009) यांची संचालक, आपत्ती व्यवस्थापन, R&FD, मंत्रालय, मुंबई म्हणून नियुक्ती करण्यात आली आहे.
4. कैलाश पगारे (IAS:MH:2010) व्यवस्थापकीय संचालक, M.S. कापूस उत्पादक विपणन महासंघ, मुंबई यांची एकात्मिक आदिवासी विकास योजना, नवी मुंबई या पदावर नियुक्ती करण्यात आली आहे.

पुणे – प्रवाशांच्या सोयीसाठी चार मुख्य मेट्रो स्टेशनवर शेअर रिक्षा सेवा प्रायोगिक तत्त्वावर सुरू केली जाईल, अशी माहिती माजी आमदार आणि ‘वेकअप पुणेकर’ अभियानाचे संयोजक मोहन जोशी आणि रिक्षा पंचायतीचे सरचिटणीस नितीन पवार यांनी आज (शुक्रवारी) दिली.

वेकअप पुणेकर’ च्या ट्रॅफिक परिषदेत मेट्रो स्टेशन बाहेर शेअर रिक्षा सेवा यावर चर्चा झाली होती. त्या अनुषंगाने महा मेट्रो आणि रिक्षा पंचायत यांची एकत्रित बैठक घेतली, असे मोहन जोशी आणि नितीन पवार यांनी स्पष्ट केले.

महा मेट्रोचे प्रशासन, रिक्षा प़चायतीचे प्रतिनिधी यांची बैठक मोहन जोशी आणि नितीन पवार यांच्या पुढाकाराने घेण्यात आली. बैठकीला महा मेट्रोचे व्यवस्थापकीय संचालक श्रावण हर्डीकर आणि हेमंत सोनावणे, तसेच मेट्रो मार्गावरील पौड रस्ता, शिवाजीनगर, राजा बहादूर मोतीलाल मिल (बंडगार्डन) रस्ता परिसरातील रिक्षा पंचायतीचे प्रमुख प्रतिनिधी उपस्थित होते. मुंबईमध्ये लोकल ट्रेन स्थानकाबाहेर शेअर रिक्षांची रांग दिसते. तशी रांग मेट्रो स्टेशन बाहेर दिसत नाही. शेअर रिक्षा वापरासाठी पुणेकरांची मानसिकता तयार करण्याची गरज बैठकीत व्यक्त करण्यात आली. रिक्षांची रांग ज्या मेट्रो स्टेशनच्या बाहेर लागू शकेल, अशा मार्गांचा आढावा घेणे, तिथे जागेची उपलब्धता करून देणे आणि प्रायोगिक तत्त्वावर शेअर रिक्षा सुरू करणे असा निर्णय बैठकीत झाला. प्रारंभी दोन ते चार मेट्रो स्टेशन बाहेर शेअर रिक्षा सुरू करायची आणि नंतर ते प्रमाण वाढवत न्यायचे. याचे सर्वेक्षण पुढील आठवड्यात सुरू होईल, अशी माहिती मोहन जोशी आणि नितीन पवार यांनी दिली.

महा मेट्रोच्या मुख्य कार्यालयाशेजारील कामगार पुतळा परिसराचे सुशोभीकरण करण्याची तयारी महा मेट्रो प्रशासनाने बैठकीत दाखविली.

बैठकीतील चर्चेत प्रशांत सुरसे, सुरेश कांबळे, बाळासाहेब पोकळे, रवींद्र पोरेड्डी, भरत उत्तेकर, सुरेश कानडे, दत्ता साळुंखे आदींनी सहभाग घेतला.

मुख्य अभियंता श्री. राजेंद्र पवार यांची ग्राहकसंवादात माहिती

पुणे, दि. १५ मार्च २०२४: छतावरील सौर ऊर्जा प्रकल्पातून दरमहा तब्बल ३०० युनिटपर्यंत वीजग्राहकांना मोफत वीज मिळवून देणाऱ्या प्रधानमंत्री सूर्यघर योजनेच्या अंमलबजावणीसाठी पुणे परिमंडलातील प्रशिक्षित अधिकारी व कर्मचारी सज्ज आहेत. या योजनेतून सौर प्रकल्प कार्यान्वित करण्यासाठी संबंधित ग्राहकांना कोणतीही हयगय न करता तत्पर सेवा व सहकार्य करण्याचे निर्देश देण्यात आले आहे अशी माहिती मुख्य अभियंता श्री. राजेंद्र पवार यांनी दिली.

रास्तापेठ येथील ‘प्रकाशदूत’ सभागृहात प्रधानमंत्री सूर्यघर योजनेतील लाभार्थी ग्राहकांशी मुख्य अभियंता श्री. पवार यांनी नुकताच संवाद साधला. त्यांच्याकडून अपेक्षा व अडचणी जाणून घेतल्या. यावेळी अधीक्षक अभियंता श्री. अरविंद बुलबुले, श्री. संजीव राठोड, कार्यकारी अभियंता श्री. धनराज बिक्कड, प्रणाली विश्लेषक श्री. बाळकृष्ण पाटील यांची प्रमुख उपस्थिती होती.

मुख्य अभियंता श्री. राजेंद्र पवार म्हणाले की, छतावरील सौर ऊर्जा प्रकल्पाच्या एक किलोवॅट क्षमतेतून दरमहा १२० युनिट, दोन किलोवॅटपर्यंत दरमहा दीडशे युनिट तसेच तीन किलोवॅटपर्यंत दीडशे ते ३०० युनिट वीज मिळणार आहे. यासाठी प्रधानमंत्री सूर्यघर योजनेतून एक किलोवॅटसाठी तीस हजार रुपये, दोन किलोवॅटसाठी साठ हजार रुपये व तीन किलोवॅटसाठी ७८ हजार रुपये अनुदान थेट मिळत आहे. या योजनेस पुणे परिमंडलामध्ये चांगला प्रतिसाद मिळत आहे. आतापर्यंत प्राप्त झालेल्या ६६२ अर्जांप्रमाणे संबंधित ग्राहकांकडे छतावरील सौर ऊर्जा प्रकल्प उभारणीची प्रक्रिया सुरू झाली आहे.

पुणे परिमंडलामध्ये छतावरील सौर ऊर्जा प्रकल्प कार्यान्वित करण्यासाठी गेल्या वर्षभरापासून मोठा वेग देण्यात आला आहे. त्यामुळे छतावरील सौर ऊर्जा प्रकल्पांमध्ये गेल्या वर्षभरात ४४ टक्क्यांनी वाढ झाली आहे. महावितरणचे अभियंता, कर्मचारी तसेच एजन्सीजचे कर्मचारी यांना सातत्याने प्रशिक्षण देण्यात येत आहे. छतावरील सौर प्रकल्प उभारणीसाठी महावितरणशी संबंधित सर्व ग्राहकसेवा तत्परतेने उपलब्ध होईल याकडे विशेष लक्ष देण्यात येत आहे. आतापर्यंत पुणे परिमंडलातील २ हजार ६९२ घरगुती वीजग्राहकांनी केंद्र शासनाकडून सुरू असलेल्या यापूर्वीच्या अनुदानाचा लाभ घेत १४.९१ मेगावॅट क्षमतेचे सौर ऊर्जा प्रकल्प घराच्या छतावर कार्यान्वित केले आहेत. आता प्रधानमंत्री सूर्यघर योजनेत देखील प्रतिसाद वाढला आहे, अशी माहिती मुख्य अभियंता श्री. राजेंद्र पवार यांनी दिली.

प्रधानमंत्री सूर्यघर योजनेत सहभागी होण्यासाठी ग्राहकांनी https://pmsuryaghar.gov.in या राष्ट्रीय पोर्टलवर किंवा पीएम सूर्यघर नावाच्या मोबाईल अॅपवर नोंदणी करावी. अधिक माहितीसाठी महावितरणच्या कार्यालयाशी संपर्क साधावा असे आवाहन श्री. पवार यांनी केले. कार्यक्रमात उपस्थित वीजग्राहकांनी महावितरणकडून मिळणाऱ्या सेवेबाबत समाधान व्यक्त केले. यावेळी प्रधानमंत्री सूर्यघर योजनेतील घरगुती वीजग्राहक नरहरी खांदवे, मेघा राजेंद्र मोरे, राजेंद्र मोरे, मनोज पाटील, आदिक बाबर, ग्रुपकॅप्टन डी. एस. राजपूत, दिलीप मावळे, नीलेश शेवाळे, रमेश शिर्के, सूरज शिंगारे आदींसह अभियंता, अधिकारी उपस्थित होते.

पुणे- बिबवेवाडी परिसरात गॅरेजमधील चारचाकी वाहनांना आग लागली आहे. शुक्रवारी पहाटे ही लागली. आगीची माहिती मिळताच अग्निशामक दलाकडून गंगाधाम, कोंढवा खुर्द आणि दोन वॉटर टँकर रवाना करण्यात आले होते. ही आग कशामुळे लागली याची माहिती अद्याप समजू शकलेली नाही.

दरम्यान, आगीमध्ये गॅरेजमधील एकूण 17 चारचाकी वाहने जळाली आहेत. यामध्ये बीएमडब्ल्यु, मर्सिडीज, रेंज रोव्हर, स्कोडा, हुंदाई, फोर्ड या कंपन्याची वाहने दुरूस्तीकरता आले असल्याचे समजले. तसेच सदर गॅरेजचे नाव हे मतीन कार केअर्स अस आहे. सुदैवाने या घटनेत कोणतीही जिवितहानी झालेली नाहीय.

तीस मिनिटात आग आटोक्यात
घटनास्थळी पोहोचताच मोकळ्या जागेत असलेल्या गॅरेजमधील गाड्यांना आग लागल्याचे अग्निशमन दलाच्या निदर्शनास आले. अग्निशामक दलाच्या जवानांनी आतमध्ये कोणी कामगार नसल्याची खाञी केली. त्यानंतर चारही बाजूने पाण्याचा मारा करून सुमारे तीस मिनिटात आग आटोक्यात आणत आणि कुलिंग ऑपरेशन सुरू ठेवले.आगीत अनेक महागड्या गाड्या आगीत भस्म झाल्यामुळे गॅरेज मालकाचे मोठ्या प्रमाणात आर्थिक नुकसान झाले आहे. या कामगिरीत अग्निशमन अधिकारी संजय रामटेके, कैलास शिंदे, तांडेल मनीष बोंबले, महादेव मांगडे, फायरमन शैलेश गोरे, राजेश घडशी, निलेश वानखडे, वैभव राऊत, कुणाल खोडे, मंदार नलावडे यांनी सहभाग घेतला.