दिल्ली मद्य धोरण घोटाळा प्रकरण
नवी दिल्ली: दिल्लीतील मद्यविक्री घोटाळा प्रकरणात केसीआर यांची मुलगी के.कविता यांच्या अडचणीत वाढल्याचे दिसत आहे. ईडीच्या पथकाने हैदराबाद येथे भारत राष्ट्र समितीच्या नेत्या के. कविता यांच्या घरी छापे टाकले. या कारवाईनंतर चौकशीसाठी म्हणून कविता यांना अटक केली असून त्यांना दिल्लीकडे आणण्यात येत आहे. सूत्रांनी दिलेल्या माहितीनुसार मनी लॉन्ड्रिंग प्रकरणी ही चौकशी सुरू आहे. याआधी तेलंगणाचे माजी मुख्यमंत्री चंद्रशेखर राव यांच्या मुलगी कविता यांना दोन वेळा समन्स पाठवण्यात आले होते. त्यानंतर शुक्रवारी ईडीने मोठी कारवाई केली.
मार्च 2023 मध्ये, ED ने दिल्ली मद्य धोरण घोटाळा प्रकरणात के. कविता यांचे नाव देखील समाविष्ट केले होते. ईडीने तपासासंदर्भात काही कागदपत्रे न्यायालयात सादर केली होती. त्यात कवितांचेही नाव होते. ‘आप’च्या नेत्यांना 100 कोटी रुपये दिल्याचा आरोप त्यांच्यावर आहे. या प्रकरणात नाव समोर आल्यानंतर कविता यांनी भाजपवर निशाणा साधला होता. त्या म्हणाल्या होत्या की, निवडणूक राज्यांमध्ये ईडी पंतप्रधान मोदींच्या आधी पोहोचते.
ईडीने व्यापारी अमित अरोरा यांना गुरुग्राममधून अटक केली होती. ईडीच्या म्हणण्यानुसार, अमित अरोरा यांनी आपल्या जबाबात टीआरएस नेत्यांचे नाव उघड केले होते. एजन्सीने दावा केला होता की कविता या ‘साउथ ग्रुप’ नावाच्या मद्य लॉबीची प्रमुख नेता होत्या. त्यांनी दिल्लीतील आप सरकारच्या नेत्यांना इतर उद्योगपतींमार्फत 100 कोटी रुपये दिले.
ईडीने हैदराबादचे व्यापारी अरुण रामचंद्रन पिल्लई यांना ताब्यात घेतले होते. अरुण हे के कविता यांच्या जवळचे मानले जातात. पिल्लई यांच्यावर मद्य धोरणात बदल करण्यासाठी 100 कोटी रुपये आम आदमी पार्टीला पाठवल्याचा आरोप आहे. आणखी एक मद्य व्यावसायिक अमनदीप ढाल यांनाही ईडीच्या न्यायालयीन कोठडीत पाठवण्यात आले आहे.
