गुरुवार पेठेतील प्रभात मित्र मंडळाच्या ‘शिवसूर्य’ स्मरणिकेचा प्रकाशन सोहळा
पुणे : भारतात जन्माला आलेली प्रत्येक व्यक्ती ही भाग्यवान आहे, कारण आपल्याला छत्रपती शिवाजी महाराजांसारखे राजे लाभले आहेत. आपण छत्रपती शिवाजी महाराजांच्या हिंदवी स्वराज्यातील एक भाग आहोत, हे भान ठेवून प्रत्येकाने जगले पाहिजे. स्वराज्य त्यांनी दिले, परंतु आता हे स्वराज्य सुराज्य करण्यासाठी पुढील पिढी शिवजयंतीत कशी सामील होईल याची तयारी करू. हाच छत्रपती शिवाजी महाराज यांना खरा मानाचा मुजरा असेल, असे मत शिवव्याख्याते सौरभ करडे यांनी व्यक्त केले.  

गुरुवार पेठेतील प्रभात मित्र मंडळाच्या वतीने शिवसूर्य स्मरणिका प्रकाशन सोहळ्याचे आयोजन गुरूवार पेठेतील श्री नाकोडा भैरव जैन धर्मशाळा येथे करण्यात आले. यावेळी हिंदू अध्यात्मिक सेवा संस्थेचे अध्यक्ष अशोक गुंदेचा, अॅड. प्रताप परदेशी, प्रभात मित्र मंडळाचे अध्यक्ष किशोर चव्हाण, सचिव उदय वाडेकर,रवींद्र भन्साळी,संदीप नाकील, मंगेश शिंदे, उत्सव प्रमुख शिवराज बलकवडे,विजय चौधरी उपस्थित होते. यावेळी प्रतापराव गुजर, येसाजी कंक यांचे पुत्र कृष्णाजी कंक आणि छत्रपती शिवाजी महाराज यांनी भारताला दिलेले वरदान म्हणजे आरमार याविषयी त्यांनी माहिती दिली. 

सौरभ करडे म्हणाले, छत्रपती शिवाजी महाराजांनी आपल्याला हिंदवी स्वराज्य दिले. परंतु हल्ली हिंदवी स्वराज्यातील हिंदवी हा शब्द काढला जातो. औरंगजेब, शहाजान, अकबर यांच्या अनेक पिढ्या गेल्या. परंतु छत्रपती शिवाजी महाराजांच्या जन्मानंतर कोणीही हिंदूत्व या मातीपासून वेगळे करू शकले नाही, असे ही त्यांनी सांगितले. 

अशोक गुंदेचा म्हणाले, आज प्रत्येकजण पैसे कमविण्याचे मागे धावत आहे. परंतु त्यामुळे त्याची समाजाशी नाळ तुटत चालली आहे. माणसाला समाजाशी जोडून ठेवण्याचे काम सामाजिक संस्था आणि मंडळे करतात, असेही त्यांनी सांगितले.

अॅड. प्रताप परदेशी म्हणाले, कोणतीही गोष्ट साध्य करण्यासाठी ती अंगावर घेतल्याशिवाय, कष्ट केल्याशिवाय पर्याय नाही. आज तरुणांना कष्टाची सवय नाही. त्यासाठी चांगला मित्र, चांगली सोबत असणे गरजेचे आहे. धर्म टिकला तर संस्कृती टिकेल, संस्कृती टिकली तर समाज घडेल आणि समाज घडला तर राष्ट्र टिकेल असेही त्यांनी सांगितले.

किशोर चव्हाण म्हणाले, शिवजयंतीच्या दिवशी पारंपारिक पध्दतीने शिवजयंती साजरी होईल व घरोघरी शिवचरित्राचे वाचन होईल यासाठी मंडळाच्या माध्यमातून जागृती करण्यात येते. निलेश कांबळे यांनी सूत्रसंचालन केले. ओंकार नाईक यांनी आभार मानले.  

पुणे दि. २७- लोकसभा निवडणूकीची आदर्श आचारंसहितेची अंमलबजावणी सुरू झाली असून राजकीय पक्षांनीही आदर्श आचारसंहितेचे काटेकोरपणे पालन करावे आणि प्रशासनाला सहकार्य करावे, असे आवाहन हडपसर येथील साधना विद्यालय येथे राजकीय पक्षांचे प्रतिनिधी, निवडणूक अधिकारी यांच्या हडपसर येथे आयोजित बैठकीत करण्यात आले.

बैठकीला सहायक निवडणूक निर्णय अधिकारी स्वप्नील मोरे, अतिरिक्त मतदार नोंदणी अधिकारी नागनाथ भोसले यांनी नेमण्यात आलेले भरारी पथक, मतदान केंद्र आणि सहाय्यकारी मतदान केंद्राबद्दल माहिती दिली आणि मार्गदर्शन केले.

निवडणूक शांततेत, निर्भयपणे आणि मुक्त वातावरणात पार पडावी आणि आचारसंहितेच्या अंमलबजावणीवर लक्ष ठेवण्यासाठी प्रशासनाने विविध समित्या स्थापन केल्या आहेत. निवडणूक आयोगाच्या मार्गदर्शक सुचनेनुसार निवडणूक प्रक्रीया पार पडावी यासाठी राजकीय पक्षांच्या प्रतिनिधींनी सहकार्य करावे, असे आवाहन यावेळी करण्यात आले.राजकीय पक्षाच्या प्रतिनिधींनी प्रचारासाठी नियमाप्रमाणे परवानगी घ्यावी. त्यासाठी एक खिडकी कक्षाची स्थापना करण्यात आली आहे, अशी माहिती यावेळी देण्यात आली. आदर्श आचारसंहितेचे उल्लंघन झाल्यास नियंत्रण कक्षाला माहिती देण्यात यावी. सभा, पदयात्रा, रॅलीबाबत निर्धारित वेळ पाळावी आणि त्यासाठी पोलीसांची परवानगी घ्यावी असेही आवाहन यावेळी करण्यात आले. सहायक पोलिस आयुक्त अश्विनी राख आणि गणेश इंगळे यांनीही यावेळी मार्गदर्शन केले. राजकीय पक्षांच्या प्रतिनिधींच्या शंकांचे निरसन यावेळी करण्यात आले. बैठकीला विविध राजकीय पक्षांचे पदाधिकारी, कार्यकर्ते उपस्थित होते.

पुणे,दि.27 – शिरुर लोकसभा मतदारसंघातील मंचर येथील अण्णासाहेब आवटे कॉलेजजवळील आदिवासी बहुल भागात स्वीप कार्यक्रमांतर्गत मतदार जागृतीसाठी विविध उपक्रमांचे आयोजन करण्यात आले. यावेळी नागरिकांना मतदान करण्याचे आवाहन करण्यात आले.

निवडणूक प्रक्रियेमध्ये नागरिकांनी मोठ्या प्रमाणावर सहभागी व्हावे यासाठी समाजातील विविध घटकांच्या सहभागाने प्रशासनातर्फे विविध जनजागृतीचे उपक्रम आयोजित करण्यात येत आहेत. मतदान प्रक्रियेत मतदानाचे प्रमाण व नागरिकांचा उत्स्फूर्त सहभाग वाढावा यासाठी स्वीप अंतर्गत व्यापक जनजागृतीवर भर देण्यात आला असून मतदार जनजागृतीसाठी ग्रामीण भागामध्ये उपक्रम आयोजित करण्यात आले आहेत. याचाच एक भाग म्हणून शिरुर मतदारसंघात व्यापक प्रमाणात जनजागृतीवर भर देण्यात आला आहे.‘युवकांचे मतदान-राष्ट्र निर्माणातील योगदान’ जागृत नागरिक होऊ या-अभिमानाने मत देवू या, या व अशाप्रकारच्या विविध घेाषणा फलकांच्या माध्यमातून मतदान प्रक्रियेविषयी आणि निवडणूक प्रक्रियेसंदर्भात आदिवासी भागात पथकाने मार्गदर्शन केले. मतदानाचा दिनांक, मतदानाचा कालावधी तसेच मतदान केंद्रावरील सुविधा याबाबत नव मतदार, तरुण, वयोवृद्ध नागरिकांना माहिती देण्यात आली. यावेळी अंबेगाव तहसील कार्यालयाचे अधिकारी व कर्मचारी यावेळी उपस्थित होते.

आंबेगाव येथे मतदारांकडून मतदान करण्याबाबत संकल्पपत्र भरून घेण्यात आले. तसेच त्यांना मतदान केंद्राची माहिती कशी घ्यावी याविषयी मार्गदर्शनही करण्यात आले. जुन्नर तालुक्यातील राजुरी येथील विद्या विकास मंदिर विद्यालयातर्फे मतदार जागृती फेरी आणि व्याख्यानाच्या माध्यमातून मतदार जागृती करण्यात आली.

पुणे, दि. २७: नवीन वाहन नोंदणी आणि त्या अनुषंगाने होणाऱ्या करवसुलीची रक्कम शासकीय तिजोरीत जमा होण्याच्या दृष्टीने पिंपरी चिंचवड प्रादेशिक परिवहन कार्यालय येत्या शुक्रवार २९ मार्च ते रविवार ३१ मार्चपर्यंत सुट्टीच्या दिवशीही सुरू राहणार आहे.

सन २०२३-२०२४ या आर्थिक वर्षातील महसूली उद्दीष्ट साध्य करण्यासाठी तसेच मार्चअखेर असल्यामुळे नवीन वाहनांची मोठ्या प्रमाणात खरेदी होण्याची शक्यता आहे. त्याअनुषंगाने गुड फ्रायडे २९ मार्च, शनिवार ३० मार्च व रविवार ३१ मार्च या सार्वजनिक सुट्टीच्या दिवशी नवीन वाहन नोंदणी व त्याअनुषंगीक करवसुलीचे कामकाज तसेच इतर परिवहन विषयक कामकाज जसे थकीत कर वसुली व खटला विभागाचे (महसूल जमा होणारे कामकाज) कामकाज कार्यालयीन वेळेत सुरु राहणार आहे, असे उप प्रादेशिक परिवहन अधिकारी अतुल आदे यांनी कळविले आहे.

पुणे, दि. २७: पिंपरी- चिंचवड प्रादेशिक परिवहन अधिकारी कार्यालयाद्वारे मोटार वाहन कर न भरलेल्या व मोटार वाहन कायद्यातील विविध गुन्ह्याअंतर्गत अटकावून ठेवलेल्या ११ वाहनांचा ६ मार्च रोजी ई-लिलाव करण्यात आला असून त्यामध्ये ३८ लाख ९० हजार रुपयांचा महसूल जमा झाला आहे.

कर न भरलेली व गुन्ह्यात अटकावून ठेवलेली १३ वाहने ई- लिलावासाठी उपलब्ध होती. यात बस, एचजीव्ही, एलजीव्ही, डी व्हॅन, टुरिस्ट टॅक्सी, एक्सकॅव्हेटर आदी वाहनांचा समावेश आहे. या वाहनांच्या मालकांनी वेळोवेळी संधी देऊनही थकीत कर भरणा केला नसल्याने या वाहनांचा www.eauction.gov.in या शासकीय संकेतस्थळावर ई- लिलाव ठेवण्यात आला. त्यापैकी ११ वाहनांना ऑनलाईन बोली प्राप्त झाली व त्यानुसार महसूल प्राप्त झाला आहे.

पिंपरी चिंचवड प्रादेशिक परिवहन कार्यालयाने २०२१ ते मार्च २०२४ या कालावधीत जाहीर ई-लिलावाद्वारे १ कोटी ४८ लाख रुपयांचा शासकीय महसूल वसूल करण्याची कार्यवाही केली आहे. थकीत मोटार वाहन कर वसुलीकरीता यापुढेही ई-लिलाव केले जातील याची नोंद घेऊन थकीत मोटार वाहन कर भरावा, असे आवाहन उप प्रादेशिक परिवहन अधिकारी अतुल आदे यांनी केले आहे.

पुणे, दि.२७: बारामती लोकसभा मतदारसंघात मतदानाचे प्रमाण वाढावे यादृष्टीने कमी मतदान असलेल्या मतदान केंद्राबाबत सूक्ष्म नियोजन करावे आणि स्थलांतरीत कामगारांचे मतदान सुलभ होईल यासाठी कृतीयोजना तयार करावी, अशा सूचना बारामती लोकसभा मतदारसंघाच्या निवडणूक निर्णय अधिकारी कविता द्विवेदी यांनी दिल्या.

विभागीय आयुक्त कार्यालयात आयोजित आढावा बैठकीत त्या बोलत होत्या. बैठकीला अपर जिल्हाधिकारी हनुमंत अरगुंडे, उपायुक्त समिक्षा चंद्राकार, बारामती लोकसभा मतदारसंघातील सर्व सहाय्यक निवडणूक निर्णय अधिकारी आणि लोकसभा निवडणुकीसाठी नियुक्त जिल्हास्तरीय समन्वयक अधिकारी उपस्थित होते.

श्रीमती द्विवेदी म्हणाल्या, मतदानाचे प्रमाण वाढविण्यासाठी स्वीप कार्यक्रमावर अधिक भर द्यावा. स्थलांतरीत कामगारांना त्यांच्या मतदानाबाबत माहिती द्यावी, यासाठी उद्योजक आणि व्यावसायिकांची मदत घ्यावी. वयोवृद्ध आणि दिव्यांग मतदारांना सुलभपणे मतदान करता येईल अशी व्यवस्था करण्यात यावी. मतदान कर्मचाऱ्यांचे प्रशिक्षण घेताना निवडणूक आयोगाच्या सूचनांचे पालन करण्यात यावे, असे त्यांनी सांगितले.

बारामती लोकसभा मतदारसंघांतर्गत सर्व 6 विधानसभा मतदारसंघातील वैशिष्ट्यपूर्ण मतदान केंद्र निश्चित करून त्याची माहिती सादर करावी. अशा मतदान केंद्रांवर मतदारांसाठी सर्व आवश्यक सुविधा असतील आणि अत्यंत सुलभपणे मतदान होईल अशी व्यवस्था करावी, असेही श्रीमती द्विवेदी म्हणाल्या.

यावेळी मतदान कर्मचाऱ्यांचे प्रशिक्षण, ईव्हीएम व्यवस्थापन, स्वीप कार्यक्रम, माध्यम संनियंत्रण आणि प्रमाणीकरण, टपाली मतदान, सुरक्षा व्यवस्था आदी विविध विषयांचा आढावा घेण्यात आला. जिल्हास्तरीय समन्वयक अधिकाऱ्यांनी विविध विषयांबाबत मार्गदर्शन केले.

पुणे- महानगरपालिका हे शहरांमध्ये विविध कामे करताना टेंडर प्रक्रिया पार पाडून ठेकेदारांना टेंडरच्या माध्यमातून शहरातील वेगवेगळी कामे देवू करते परंतु ही कामे करताना ठेकेदारांकडून मात्र टेंडरच्या अटी शर्तींचे उल्लंघन होताना सर्रास दिसून येते. असा आरोप करत पुणे महानगरपालिकेच्या प्रभाग क्रमांक 18 महात्मा फुले पेठ भागातील सहस्त्रअर्जुन नागरी सहकारी पतसंस्था ते सावधान मंडळ या ठिकाणी नव्याने ड्रेनेज लाईन टाकण्याचे काम मागील दीड ते दोन महिन्यापूर्वी काम पूर्ण केले आहे. सध्या परिस्थितीत या ठिकाणी सार्वजनिक शौचालया च्या ड्रेनेज लाईनचे काम झाले असून, ते एकदम निकृष्ट दर्जेचे झालेले असून सदर कामासाठी वापरलेले सिमेंट तसेचं डस्ट पावसाळा सुरू होण्यापूर्वीच निघाल्यामुळे रस्त्याची दुरावस्था झाली आहे.अशी तकरार आम आदमी पार्टीने केली आहे.

आम आदमी पार्टीच्या वतीने अशा प्रकारच्या निकृष्ट दर्जाच्या कामांचा निषेध नोंदविण्यात आला असून याबाबतची माहिती क्षेत्रीय कार्यालयातील अधिकारी तसेच महापालिकेच्या मुख्य कार्यालयातील अधिकाऱ्यांना संपर्क करून वारंवार सांगून देखील त्यांच्याकडून सदर तक्रारी बाबत ठेकेदाराच्या विरुद्ध कोणतीही ठोस भूमिका घेण्यात आली नसल्याने ठेकेदार हे महापालिकेचे जावई आहेत का ? असा प्रश्न विचाण्यात येतो आहे .या ड्रेनेज लाईनच्या निकृष्ट दर्जाच्या कामा संदर्भात महानगरपालिकेमधील कोणताही अधिकारी दखल घेत नसल्याचे ठेकेदारांचे व महापालिकेतील अधिकाऱ्यांचे हितसंबंध असल्याचे चित्र निर्माण होत आहे. नागरिकांच्या कररूपी पैशातून अशा प्रकारची निकृष्ट दर्जाची कामे जर होणार असतील तर महापालिकेने अशी कामे त्वरित थांबवावी. कारण कामाचा दर्जा पाहता सदरील ड्रेनेज लाईन निकृष्ट दर्जाची असून पावसाळ्यामध्ये मैला पाणी रस्त्यावर येऊन नागरिकांना सदर गोष्टींचा त्रास होईल अशी शंका परिसरातील नागरिकांकडून व्यक्त केली जात आहे. आचारसंहिता लागण्या अगोदर जो महापालिकेने कामाचा धडका चालू केला व गडबडीत टेंडर पास करून घेतले त्या सर्व घाईगडबडीमुळेच ठेकेदार कामे नीट करत नसल्याचा आरोप आम आदमी पार्टीचे मीडिया सहसंयोजक निरंजन अडागळे यांनी केला. ते पुढे म्हणाले, आता हे बघावे लागेल की भवानी पेठ क्षेत्रीय कार्यालय हा रोड दुरुस्ती करण्यासाठी त्याच ठेकेदाराला काम करायला सांगणार आहे का दुरुस्तीसाठी नवीन टेंडर काढणार आहे ?