पुणे- पुण्याच्या लोकसभेत अगदी सरळ सरळ फाईट आहे. ती म्हणजे भाजप आणि कॉंग्रेस च्या उमेदवारात,म्हणजेच मुरलीधर मोहोळ आणि रवींद्र धंगेकर यांच्यात.कोणी म्हणतो यातील कोणी ज्याची ग्रुपिंग मोठी त्याला महत्व देणारे, तर यातील कोणी एक कायम भेद न करता सर्वात मिसळतो,आणि प्रामाणिकतेला महत्व देतो..अगदी बडा..आणि सामान्य यांच्यातील हि लढाई आहे असेही अनेकांना वाटते,आता खरे खोटे देव जाणो.पण सरळ लढाई सरळ राहिली तर..आता काही ना सोशल मीडियातील भूल भूलय्याने उतावळा करून पायावर धोंडा मारून घ्यायला तयार करून च ठेवलेले होते ते ठेचकाळत इकडे तिकडे फिरत आहे. आता याच पार्श्वभूमीवर मराठा आरक्षणासाठी ऐतिहासिक आंदोलन करणारे,सरकारला जेरीस आणणारे मनोज जरांगे पाटील यांच्या नावाखाली येथे मराठा समाज एकवटतो आहे. असे म्हणतात कि जरांगे पाटलांनी मराठा उमेदवार उभे करायला सांगितलेत. जरूर सांगितले असतीलही.आणि त्यामागे पाटलांचा काही उद्देश देखील असू शकेल.अर्थात तो सगळीकडे समान तत्वावर लागू होईल काय हा प्रश्न आहेच.पण पाटलांचा नेमका उद्देश लक्षात येणे महत्वाचे आहे. पाटील आणि फडणवीस यांच्यातील फाईट सर्वश्रुत आहे. अर्थात हि राजकीय फाईट देखील नाही मराठा आरक्षण विषयाने तिची सुरुवात होऊन ती टोकाला पोहोचली.लोकसभा निवडणूक जाहीर झाल्यावर आता प्रयेक लोकसभा मतदार संघात जर जरांगे पाटलांनी मराठा उमेदवार उभे करायचे ठरवले असेल तर अर्थात तिरंगी फाईट तर निश्चित आहे. ती म्हणजे भाजप महायुती आणि कॉंग्रेस महाविकास आघाडी यांच्यात या तिसऱ्या उमेदवाराची भर पडेल.आणि हि भर पडली तर मराठा उमेदवार विजयी होईल कि फडणविसांचा म्हणजे भाजपाचा उमेदवार विजयी होईल कि आघाडीचा यावर प्रत्येक ठिकाणी वेग वेगळे मंथन होऊ शकेलही पण सरार्स पहिले तर फडणवीसांची मते एकगठ्ठा आहेत, भाजपची मते कुठे हलत नाहीत असे म्हणतात.मग कुणाच्या मतांची विभागणी होईल तर ती आघाडीच्या होईल हे स्पष्ट आहे.अर्थात दोघाच्या मतांना छेद देऊन मराठा उमेदवार जिथे निवडून येऊ शकतोच तिथे तो येईलही पण असे मतदार संघ कोणते हे देखील समजायला हवेत आणि तिथेच उमेदवार द्यायला हवेत असाही विचार मांडला जाऊ शकतो.

एकूणच मराठा नेते जरांगे पाटील आणि ठीक ठिकाणच्या स्थानिक नेत्यांना स्वतः निवडून येण्यासाठी आपण निवडनुक लढवतो आहे हे प्रथम पटवून द्यावे लागणार आहे. अन्यथा त्यांचा फायदा अन्य उमेदवारांना होऊ शकतो काय याचा हि विचार राजकीय स्तरावर होईल असे वाटते आहे. एकीकडे मतांची विभागणी होऊ नये म्हणून प्रकाश आंबेडकर यांच्याशी शर्थीच्या वाटाघाटी चाललेल्या असताना,दुसरीकडे MIM सारखे पक्ष काय भूमिका घेतात हे पाहावे लागणार असताना आता जरांगे पाटलांनी असे उमेदवार उभे केले तर ते महाविकास आघाडीला धक्का देतील कि फडणविसांच्या युतीला धक्का देतील हे पाहणे महत्वाचे ठरणार आहे.

भोर : पक्षातले 80 टक्के लोक जर अजित पवारांसमवेत आले आहेत. लोकशाही आहे तर मग पक्ष चोरला किंवा सोडून गेला, चुकीचं वागला असं कसं काय म्हणता येईल. जर लोकशाहीच्या गप्पा आपण मारतो तर लोकशाही नक्की कशाला म्हणायचं?, असे प्रश्न करत सुनेत्रा पवार यांनी पहिल्यांदाच शरद पवार, सुप्रिया सुळे यांना टोला लगावला.

लोकसभा निवडणुकीच्या पार्श्वभूमीवर बारामती टेक्सटाईल पार्कच्या अध्यक्षा सुनेत्रा पवार या बारामती लोकसभा मतदार संघाचा दौरा सुरु आहे. सध्या सुनेत्रा पवार या भोर तालुक्याच्या दौऱ्यावर आहेत. त्यांनी सारोळे गावात छत्रपती शिवाजीमहाराजांच्या पुतळ्याला अभिवादन करुन त्यांच्या दौऱ्याला सुरुवात केली. यावेळी ग्रामस्थांशी संवाद साधत सुनेत्रा पवार यांनी अडीअडचणी जाणून घेतल्या.
अजितदादांनी नेहमीच गटतट न पाहता, पक्षपातीपणा न करता नेहमीच लोकांच्या कामांना महत्व दिलं आहे.. विकासाशी बांधिलकी जपणाऱ्या अजितदादांच्या विचाराचा खासदार व्हावा यासाठी घड्याळाला मतदान करण्याचं आवाहन त्यांनी यावेळी सुनेत्रा पवार यांनी केलं.
दरम्यान, सुनेत्रा पवार यांनी संपूर्ण दिवसभरात भोर तालुक्यातील विविध गावांमध्ये जाऊन नागरीकांच्या भेटीगाठी घेतल्या.आणि लोकांच्या समस्या जाणून घेतल्या जेणेकरून भविष्यात त्यावर काम करता येतील.

पुणे- शिरूर लोकसभा मतदार संघात शिवाजीराव आढळराव पाटील हेच घड्याळ चिन्हावर लढतील, ते सामान्य जनतेच्या कामाला येणारे नेते आहेत , अमोल कोल्हे हे अभिनेते आहेत , ते छत्रपती शिवाजी महाराजांची भूमिका केल्याचे सांगतात पण त्यांनी नथुराम गोडसेची देखील भूमिका केलीय .. कॉंग्रेस वाल्यांना असे चालणार आहे काय ?असा सवाल करत आज अजित पवार यांनी आढळराव पाटील यांच्या राष्ट्रवादीत प्रवेशाच्या वेळी मोदी शहांचे भरभरून कौतुक करत आढळरावांची उमेदवारी जाहीर केली आणि अमोल कोल्हे यांच्यावर टीका केली .

‘सध्याचा खासदार डायलॉगबाजी करण्यात वस्ताद आहे. लोकांचे प्रश्न सोडविण्यासाठी घाम गाळावा लागतो. चित्रपट, मालिका तेवढ्यापुरते पाहू; पण सर्वसामान्य लोकांचे प्रश्न सोडविण्यासाठी आणि त्यांच्या हाकेला धावून जाणारा माणूस खासदार म्हणून निवडून द्यावा लागतो,’ अशा शब्दांत उपमुख्यमंत्री अजित पवार यांनी शिरूरचे खासदार डॉ. अमोल कोल्हे यांच्यावर मंगळवारी टीकास्त्र सोडले.राष्ट्रवादी काँग्रेस पक्षातर्फे माजी खासदार शिवाजीराव आढळराव पाटील यांना पवार यांनी शिरूर लोकसभेची उमेदवारी जाहीर केली.मंचर येथील कार्यक्रमात शिवसेनेचे माजी खासदार शिवाजीराव आढळराव पाटील आणि शेकडो कार्यकर्त्यांचा उपमुख्यमंत्री अजित पवार यांच्या हस्ते आणि ‘राष्ट्रवादी’चे प्रदेशाध्यक्ष सुनील तटकरे, सहकारमंत्री दिलीप वळसे पाटील, आमदार दिलीप मोहिते पाटील, अतुल बेनके यांच्या उपस्थितीत ‘राष्ट्रवादी काँग्रेस’मध्ये प्रवेश झाला.’आढळरावांची घरवापसी झाली आहे. कोल्हे यांना मी शिवसेनेतून ‘राष्ट्रवादी’त आणून खासदार केले. त्यांची घरवापसी करायची झाली, तर शिवसेना, मनसे असे अनेक पक्ष शोधावे लागतील, असा टोला पवार यांनी लगावला. ‘नेता पराभूत होत नसेल, तर कलाकाराला समोर उभे करावे लागते. याचप्रमाणे मी कोल्हे यांना आढळरावांच्या विरोधात उभे केले. आढळरावांचा पराभव करताना आमच्या तोंडाला फेस आला होता,’ अशी कबुली देऊन आता त्याच आढळरावांना पुन्हा निवडून आणण्याचे आवाहन पवार यांनी केले.

पुणे-शिवसेना नेते शिवाजी आढळराव पाटील यांनी आज अखेर राष्ट्रवादी काँग्रेस पक्षात प्रवेश केला आहे. उपमुख्यमंत्री अजित पवार यांच्या उपस्थितीत आढळराव पाटील यांनी राष्ट्रवादीचं घड्याळ हाती घेतलं.शिवाजी आढळराव पाटील राष्ट्रवादी अजित पवार गटात प्रवेश करतील, अशी गेल्या अनेक दिवसांपासून चर्चा होती. त्यानंतर आज अखेर त्यांनी राष्ट्रवादी काँग्रेस पक्षात प्रवेश केला आहे. शिवाजी आढळराव पाटील यांना राष्ट्रवादी काँग्रेसकडून शिरुर लोकसभा मतदारसंघातून उमेदवारी मिळणार आहे. त्यामुळे लोकसभा निवडणुकीत शरद पवार गटाचे उमेदवार अमोल कोल्हे यांच्या विरोधात अजित पवार गटाचे आढळराव पाटील अशी लढत आता बघायला मिळणार आहे. गेल्या लोकसभा निवडणुकीत अमोल कोल्हे यांनी आढळराव पाटील यांचा पराभव केला होता. त्यानंतर आगामी निवडणुकीत पुन्हा अमोल कोल्हे विरुद्ध शिवाजी आढळराव पाटील अशी लढत बघायला मिळण्याची शक्यता आहे.लोकसभा निवडणुकीच्या पार्श्वभूमीवर सध्या राज्यात वेगवेगळ्या राजकीय घडामोडी घडत आहेत. प्रत्येक पक्षाकडून उमेदवारांची निवड केली जात आहे. काही ठिकाणी उमेदवारांची चाचपणी केली जात आहे. सत्ताधारी आणि विरोधकांकडून जागावाटप निश्चित करण्यात येत आहे. या घडामोडी गेल्या अनेक दिवसांपासून सुरु आहेत. विशेष म्हणजे शिरुर लोकसभा मतदारसंघाबाबत गेल्या काही दिवसांपासून सस्पेन्स वाढला होता. कारण या मतदारसंघात सध्या राष्ट्रवादीच्या शरद पवार गटाचे नेते अमोल कोल्हे हे खासदार आहेत. त्यामुळे या जागेवर अजित पवार गटाचा दावा होता.महायुतीच्या नेत्यांची जागावाटपाची चर्चा झाली त्यावेळी अजित पवार यांनी या जागेवर दावा सांगितला. दुसरीकडे शिवसेना नेते शिवाजी आढळराव पाटील हे या जागेसाठी आग्रही होते. ते या मतदारसंघाचे माजी खासदार आहेत. त्यांची या मतदारसंघात ताकदही आहे. त्यामुळे शिवसेनेला ही जागा मिळावी, अशी त्यांची मागणी होती. पण महायुतीत ही जागा राष्ट्रवादीला सुटणार असल्याची माहिती समोर आल्यानंतर आढळराव पाटील यांनी घड्याळ चिन्हावरही निवडणूक लढण्यासाठी अनुमती दर्शवली. यासाठी पडद्यामागे जोरदार हालाचाली घडल्या.दरम्यान, आढळराव पाटील यांनी आपल्या कार्यकर्त्यांसोबत बैठक घेतली. या बैठकीत सर्व कार्यकर्त्यांनी आढळराव पाटील यांना पाठिंबा दर्शवला. त्यानंतर आढळराव पाटील हे राष्ट्रवादी अजित पवार गटात सहभागी होतील, अशी चर्चा सुरु होती. अखेर ही चर्चा खरी ठरली आहे. आढळराव पाटील यांचा आज अजित पवार गटात प्रवेश झाला आहे.

प्रकाश आंबेडकरांच्या प्रस्तावासाठी काँग्रेसचे एक पाऊल पुढे, पवार व ठाकरेंनी आंबेडकरांचा प्रस्ताव मान्य करावा: नाना पटोले

महाविकास आघाडीतील दोन जागांवरील पेच चर्चेतून सुटेल, सांगली व भिवंडी काँग्रेसच्या परंपरागत जागा.

नागपूर/मुंबई, दि. २६ मार्च

महाविकास आघाडीच्या जागा वाटपात दोन जागांवर अजून निर्णय झालेला नाही, त्यावर चर्चेतून लवकरच मार्ग निघेल. आघाडीचा धर्म सर्वांनीच पाळला पाहिजे. सांगली व भिवंडी या काँग्रेसच्या परंपरागत जागा आहेत, या जागांवर काँग्रेस पक्षाकडे चांगले उमेदवार आहेत. सांगलीत जे झाले ते बरोबर झाले नाही. असे म्हणत वंचित बहुजन आघाडीचे अध्यक्ष प्रकाश आंबेडकर यांच्या प्रस्तावासाठी काँग्रेसने एक पाऊल पुढे टाकले आहे आता राष्ट्रवादी काँग्रेस पक्ष शरदचंद्र पवार व शिवसेना उद्धव बाळासाहेब ठाकरे या मित्र पक्षांनीही तो प्रस्ताव मान्य करावा, असे आवाहन महाराष्ट्र प्रदेश काँग्रेस कमिटीचे अध्यक्ष नाना पटोले यांनी केले आहे.

नागपूर येथे प्रसार माध्यमांशी बोलताना नाना पटोले म्हणाले की, देशाचे संविधान व लोकशाही टिकवणे हे सर्वांचे काम आहे. आताची निवडणूक ही देश वाचवण्यासाठी आहे. भाजपाचा पराभव करणे हाच मुख्य उद्देश आहे. महाविकास आघाडी या लोकसभा निवडणुकीत भाजपाचा दारूण पराभव करेल. मागील १० वर्षात भाजपाने खोटी आश्वासने देऊन देशाला बरबाद केले त्याचा उगम हा नागपुरच आहे. महागाई, बेरोजगारी प्रचंड वाढलेली आहे, शेतकऱ्याला उद्ध्वस्त केले आहे. देशावर कर्जाचा मोठा डोंगर करून ठेवला आहे. जनतेमध्ये मोदी सरकारविरोधात प्रचंड असंतोष आहे त्यामुळे मोदी सरकारला धडा शिकवल्याशिवाय जनता गप्प बसणार नाही असे चित्र सगळीकडे आहे.

नागपूरमध्ये भाजपाचा उमेदवार कोण आहे हे महत्वाचे नाही. ही लढाई विचाराची आहे. हायवे मॅन चित्रपट फ्लॉप झाला, मोदींवर काढलेला चित्रपटही फ्लॉप झाला पण मुन्नाभाई एमबीबीएस चित्रपट मात्र सुपरहिट झाला होता. आज जनतेला गांधी विचाराची आवश्यकता आहे. विकासाच्या नावाखाली नागपूरचे बेहाल करुन ठेवले आहेत. नेमका कोणाचा विकास झाला? कुठे गेले मिहान? मालवाहतुक करणारी विमाने उतरतील आणि शेतकऱ्यांना फायदा होईल, या आश्वासनांचे काय झाले. नागपूर शहरात सिमेंटचे रस्ते बनवले आहेत, आधीच नागपुरात जास्त तपमान व आता सीमेंटचे रस्ते यामुळे तापमान आणखी वाढणारच. स्थानिक मुद्द्यांबरोबरच राष्ट्रीय मुदद्यांवरही या निवडणुकीत भर दिला जाणार आहे. काँग्रेस पक्षात एकजूट असून नागपूरमधून काँग्रेस व महाविकास आघाडीचा उमेदवार २.५ लाख मताधिक्क्याने विजयी होईल, असा विश्वास नाना पटोले यांनी व्यक्त केला आहे.

महाविकास आघाडीच्या विकास ठाकरे यांचा उमेदवारी अर्ज दाखल करण्यापूर्वी सकाळी व्हरायटी चौकातील गांधी पुतळ्याला आदरांजली अर्पण करण्यात आली व नंतर अर्ज दाखल करण्यात आला. विकास ठाकरे यांचा अर्ज दाखल करतेवेळी प्रदेशाध्यक्ष नाना पटोले, विरोधी पक्षनेते विजय वडेट्टीवार, राष्ट्रवादी काँग्रेसचे नेते माजी मंत्री अनिल देशमुख, माजी मंत्री सुनिल केदार, माजी केंद्रीय मंत्री विलास मुत्तेमवार, माजी मंत्री सतिश चतुर्वेदी, अनिस अहमद, आ. अभिजीत वंजारी, प्रदेश उपाध्यक्ष संघटन व प्रशासन नाना गावंडे, प्रदेश काँग्रेसचे मुख्य प्रवक्ते अतुल लोंढे, अखिल भारतीय काँग्रेस कमिटीचे सचिव रामकिसन ओझा, प्रफुल्ल गुडधे यांच्यासह महाविकास आघाडीचे पदाधिकारी व कार्यकर्ते मोठ्या संख्येने उपस्थित होते.

पुणे- काल ज्यांच्यावर अगदी हीन भाषेत टीका केली आज त्यांच्याच पक्षात जाऊन निवडणूक लढवायची हे गद्दारीचे क्वालिफिकेशन आढळराव यांचे असल्याचे शिक्कामोर्तब आज होईल . एवढेच नव्हे तर ज्यांचे बरेच काही खालच्या भाषेतील वक्तव्ये ऐकून अजितदादा कधी संतापत त्यांनाच आज पक्षात घेऊन उमेदवारी देण्याची नामुष्की अजीत दादांवर आली आहे .या पार्श्वभूमीवर डॉक्टर , अभिनेता असूनही एक प्रामाणिक , जनहिताची कळकळ असलेला, कुठलाही भ्रष्टाचाराचा डाग नसलेला नेता म्हणूनच अमोल कोल्हेंना जनता स्वीकारेल असे पुणे शहर राष्ट्रवादीचे अध्यक्ष प्रशांत जगताप यांनी म्हटले आहे. ते म्हणाले कि,’होय तेच शिवाजीराव आढळराव पाटील ज्यानीं अजितदादा पवार, दिलीप वळसे पाटील व राष्ट्रवादीच्या नेत्यांवर अतिशय खालच्या पातळीवर टीका केली, राष्ट्रवादी संपवण्याची भाषा केली त्यांचे अनेक व्हिडिओ सोशल मीडियामध्ये उपलब्ध आहेत. त्यांनाच राष्ट्रवादी काँग्रेसमध्ये प्रवेश देण्याची नामुष्की अजितदादा पवार यांच्यावर आली, मतदार संघात राष्ट्रवादी काँग्रेस सक्षम असती तर आयात उमेदवार घेण्याची वेळच आली नसती अशा शब्दात राष्ट्रवादी काँग्रेस शरदचंद्र पवार पक्षाचे शहराध्यक्ष प्रशांत जगताप यांनी टीका केली.
अशा गद्दार आढळराव पाटलांना शिरूर लोकसभा मतदारसंघातून मतदार निवडून देणार नाहीत. तर कर्तुत्वान डॉक्टर अमोल कोल्हे पुन्हा खासदार होणार असा विश्वासही प्रशांत जगताप यांनी व्यक्त केला, शिवाजीराव आढळराव पाटील यांचा आज अजित पवारांच्या राष्ट्रवादी काँग्रेस पक्षात प्रवेश होत आहे या पार्श्वभूमीवर प्रशांत जगताप यांनी आढळराव पाटलांसह अजित पवारांना देखील चिमटे काढले आहेत.