पुणे : पुणे लोकसभा मतदार संघातील महायुतीचे उमेदवार मुरलीधर मोहोळ यांनी आपला विजयाचा मार्ग सुकर करण्यासाठी प्रसिद्ध युवा उद्योजक पुनीत बालन यांची सदिच्छा भेट घेतली आहे. पुनीत बालन हे श्रीमंत भाऊसाहेब रंगारी गणपती ट्रस्टचे विश्वस्त आणि उत्सव प्रमुख आहेत.पुनीत बालन यांचे सामाजिक, क्रिडा,शैक्षणिक क्षेत्रात मोठे काम आहे. पुण्यातील बहुतांश गणपती मंडळ, नवरात्र मंडळ, ढोल-ताशा पथकांसोबत बालन यांची नाळ जोडली गेली आहे. युवा वर्गात देखील बालन यांचे लाखो चाहते आहेत. त्यामुळे त्यांचा पुण्यातील जनतेशी प्रचंड मोठा जनसंपर्क आहे. तसेच त्यांचे जिव्हाळ्याचे संबंध देखील आहेत. इंद्राणी बालन फाऊंडेशनच्या माध्यमातून देखील पुनीत बालन यांनी अनेक शाळा, महाविद्यालयांना मोठी मदत केलेली आहे. तर हजारो कुटुंबातील मुलांना शिष्यवृत्ती देखील देण्यात येते. एकंदरीत त्यांच्या वलयाला समाज मान्यता असल्यामुळे पुणे लोकसभेचे महायुतीचे उमेदवार मुरलीधर मोहोळ यांनी त्यांची घेतलेली भेट ही मोहोळ यांना चांगलीच फायद्याची ठरणार आहे. ‘कोरोना’ काळात योद्धा म्हणून मुरलीधर मोहोळ आणि पुनीत बालन यांनी हातात हात घालून मोठे काम केले होते.

पुनीत बालन यांची घेताना मुरलीधर मोहोळ यांच्या चेहऱ्यावरील हास्य बरेच काही सांगून जाते. मुरलीधर मोहोळ यांनी घेतलेली पुनीत बालन यांच्याशी भेट ही राजकीय दृष्टीकोनातून देखील महत्वाची आहे. या भेटीला एक वेगळेच महत्व आहे. महायुतीच्या म्हणजेच भाजपा उमेदवार मुरलीधर मोहोळ यांना ही भेट नक्कीच फायद्याची ठरणार आहे. यामध्ये शंका नाही.

पुण्याची निवडणुक ही तिरंगी होणार असली तरी महायुती आणि महाविकास आघाडीमध्ये फाईट होणार आहे. पुनित बालन ग्रुप तर्फे दरवर्षी पुण्यातील नामांकित गणपती मंडळ, नवरात्र मंडळ, ढोल-ताशा पथकांच्या संघांचा समावेश असलेल्या ‘फ्रेंडशिप करंडक’ स्पर्धेचे आयोजन करण्यात येते. त्याला देखील खूप मोठा प्रतिसाद मिळतो. फ्रेंडशिप करंडकाशी हजारो तरुण जोडले गेलेले आहेत. ते सर्व तरुण पुनीत बालन यांचे चाहते आहेत. मुरलीधर मोहोळ यांनी बालन यांची भेट घेतल्यामुळे आपोआपच त्या सर्व तरुणांचा मोहोळ यांनाच पाठिंबा मिळणार आहे. त्यामुळेच आपला विजय सुकर करण्यासाठी मुरलीधर मोहोळ यांनी पुनीत बालन यांची भेट घेतली आहे.

पुणे : बारामती लोकसभा मतदारसंघाच्या राष्ट्रवादी कॉंग्रेस आणि महायुतीच्या उमेदवार सुनेत्रा पवार यांनी आज सकाळी ज्येष्ठ नेते तथा माजी खासदार नाना नवले यांची सदिच्छा भेट घेतली. यावेळी नाना नवले यांनी अनेक जुन्या आठवणींना उजाळा देत अजितदादांच्या कामाचं कौतुक केलं. तसेच आपले आशिर्वाद कायम पाठीशी असल्याचं सांगितलं..

आज सकाळी सुनेत्रा पवार यांनी पुण्यात नाना नवले व त्यांच्या कुटुंबियांची सदिच्छा भेट घेतली.या भेटीवेळी नाना नवले यांनी माजी मंत्री पद्मसिंह पाटील यांच्याशी असलेल्या ऋणानुबंधाबद्दल माहिती दिली.याचवेळी त्यांनी अनेक जुन्या आठवणींना उजाळा दिला. अजितदादांच्या माध्यमातून वेळोवेळी झालेल्या सहकार्याबद्दल सांगत त्यांच्या कामाचं नाना नवले यांनी कौतुक केलं.. माझे आशिर्वाद कायम तुमच्या पाठिशी राहतील असंही त्यांनी यावेळी आवर्जून सांगितलं. तसेच संत तुकाराम कारखान्याच्या संचालक मंडळाचा पाठिंबा असल्याचंही त्यांनी नमूद केलं..
यावेळी नवले कुटुंबियांनी अतिशय उत्साहपूर्ण वातावरणात सुनेत्रा पवार यांचं स्वागत झाले.यावेळी संत तुकाराम कारखान्याचे व्हाईस चेअरमन बापूसाहेब भेगडे, संचालक अनिल लोखंडे, ज्ञानेश नवले, चेतन भुजबळ, बाळासाहेब बावकर, सुभाष राक्षे, सुभाष जाधव, मधुकर भोंडवे, सखाराम गायकवाड, नरेंद्र ठाकर, ताराबाई सोनवणे, शुभांगी गायकवाड आदी मान्यवर उपस्थित होते .

पुणे-राज्यात 80 टक्के ठिकाणी महिलांकरीता स्वच्छतागृह उपलब्ध नाही. मोठ्या प्रमाणात रस्ते बांधले जातात, पण महिलांसाठी स्वच्छतागृह बांधले जात नाही. राज्यातील प्रत्येक पेट्रोल पंपावर साफ स्वच्छतागृह असणे बंधनकारक करावे. याबाबत सार्वजनिक बांधकाम विभाग यांच्याशी चर्चा करून निर्णय घेतला जाणार आहे. महिलांना पायाभूत सुविधांचा अभाव आहे, असे मत विधान परिषदेच्या उपसभापती डॉ. नीलम गोऱ्हे यांनी पत्रकार परिषदेत व्यक्त केले.

सध्या सुरु असलेल्या लोकसभा निवडणुकांच्या पार्श्वभूमीवर स्त्री आधार केंद्र, पुणे आणि आबासाहेब गरवारे महाविद्यालय (स्वायत्त), पत्रकारिता व जन संज्ञापन विभाग, पुणे यांच्या संयुक्त विद्यमाने ‘महिला मतदार राजकीय सक्षमीकरण आढावा’ पहिला टप्प्याचे सर्व्हेक्षण करण्यात आले. विधान परिषदेच्या उपसभापती आणि अध्यक्षा स्त्री आधार केंद्र डॉ. नीलम गोऱ्हे यांच्या मार्गदर्शनानुसार महाराष्ट्राच्या विविध जिल्ह्यांतील 200 महिला मतदारांचे सर्वेक्षण एका प्रश्नावली फॉर्मच्या माध्यमातून करण्यात आले. पत्रकारितेचे शिक्षण घेणाऱ्या विद्यार्थ्यांनी एक अभ्यासाचा भाग म्हणून उत्स्फूर्तपणे सर्व्हेक्षण केले. यामध्ये महिलांना भेडसावणाऱ्या समस्या, त्यावरील उपाययोजना व त्यांच्या उमेदवारांकडून असणाऱ्या अपेक्षा याचा अभ्यास केला गेला.

डॉ. गोऱ्हे म्हणाल्या, महिलांना वेगवेगळ्या समस्या जाणवत आहेत. त्यांनी काहीं अपेक्षा व्यक्त केल्या आहे. निवडणूक नेमकी का घेतली जाते तर लोकप्रतिनिधी निवडणे आणि विकासकामे करण्यासाठी ही बाब महत्त्वाची असल्याचे त्यांना जाणवते. लोकशाही जिवंत राहण्यासाठी निवडणूक होणे आवश्यक असल्याचे त्यांना वाटत आहे. सार्वजनिक ठिकाणी पुरेशी स्वच्छतागृह नाही, पुरुषांच्या तुलनेत पगार महिलांना कमी आहे, हुंडा अधिक घेतला जात आहे, लैंगिक अत्याचार मध्ये आरोपींना तात्काळ शिक्षा व्हावी, महिलांना राजकारणात स्वतंत्र काम करण्यास वाव मिळावा, सिलेंडर दर कमी व्हावे, ईव्हीएम द्वारे पारदर्शक निवडणूक पार पडाव्यात, महिलांना स्वतःचे मत मांडणे अधिकार हवा असे मत महिलांनी सर्वेक्षणात मांडले आहे.

एप्रिल महिन्याच्या शेवटी पुन्हा एकदा अशाप्रकारे दुसरी प्रश्नावली घेऊन सर्वेक्षण करण्यात येणार आहे. आत्ताच सर्वेक्षणात 200 महिला विविध क्षेत्रातील यांच्याशी चर्चा करण्यात आली आहे. सर्व वयोगटातील या महिला आहे. महिला मतदार यांच्यासाठी खास काही मुद्दे घ्यावेत असे निवडणूक आयोगास वाटत आहे त्यांनी ते या अहवाल मधून घ्यावे. सर्व राजकीय पक्ष आणि महिला आघाडी प्रमुख यांना हे मुद्दे आम्ही देणार आहे. त्याच प्रमाणे प्रत्येक उमेदवाराने महिलांचे मुद्दे लक्षात घेणं गरजेचे आहे. महिलांना निवडणूक जवळ आली असे माहिती असते पण त्यातील नेमकी माहिती आणि महिलांचे मुद्दे पोहचवणे हा या सर्वेक्षणाचा उद्देश होता.

पुणे – राष्ट्रवादी काँग्रेस (शरदचंद्र पवार) ग्रंथालय विभाग, पुणे, शहराध्यक्षपदी प्राजक्ता जाधव यांची नियुक्ती करण्यात आली आहे. पक्षाचे शहराध्यक्ष प्रशांत जगताप यांच्या हस्ते नियुक्तीपत्र सौ.जाधव यांना राष्ट्रवादी काँग्रेस भवन येथे प्रदान करण्यात आले.

राष्ट्रवादी काँग्रेस पक्षात महिला आघाडीच्या चिटणीस,सरचिटणीस आणि उपाध्यक्ष या पदांवर सौ.जाधव यांनी काम केले आहे. खडकवासला विधानसभा मतदारसंघाच्या निरिक्षक म्हणूनही त्यांनी जबाबदारी सांभाळली होती.आता पक्षाच्या ग्रंथालय विभागाचे शहराध्यक्षपद त्यांच्याकडे सोपविण्यात आले आहे.

पक्षाचे राष्ट्रीय अध्यक्ष शरद पवार साहेब, राष्ट्रीय कार्याध्यक्ष खा.सुप्रियाताई सुळे आणि प्रदेशाध्यक्ष जयंतराव पाटील यांच्या मार्गदर्शनाखाली ग्रंथालय विभागाच्या कामातही ठसा उमटवेन, असे सौ.प्राजक्ता जाधव यांनी नियुक्तीपत्र स्वीकारताना सांगितले.

पुणे, दि. ०५ एप्रिल २०२४: नवीन आर्थिक वर्षामध्ये पुणे परिमंडलातील सर्व अभियंता, अधिकारी व कर्मचाऱ्यांनी ‘तत्पर ग्राहकसेवा’, ‘महसूलवाढ’ व वीजबिलांची ‘शून्य थकबाकी’ या त्रिसूत्रीला प्राधान्य द्यावे. यासोबतच ‘इज ऑफ लिव्हिंग’नुसार (राहणीमान सुलभता) आणि कृती मानंकानुसार निश्चित केलेल्या कालावधीत सेवा देण्यासाठी प्रत्येकाने सजग राहावे असे निर्देश महावितरणचे मुख्य अभियंता श्री. राजेंद्र पवार यांनी दिले.

       रास्तापेठ येथील ‘प्रकाशदीप’ सभागृहामध्ये शुक्रवारी (दि. ५) पुणे परिमंडलाची वार्षिक आढावा बैठक झाली. यात श्री. पवार यांनी ग्राहकसेवेसह मागील वर्षात केलेल्या विविध कामांचा आढावा घेतला व त्यासंदर्भात प्रभावी अंमलबजावणीसाठी सूचना दिल्या. यावेळी व्यासपीठावर अधीक्षक अभियंता श्री. अरविंद बुलबुले, श्री. युवराज जरग, श्री. संजीव राठोड, श्री. संजीव नेहेते, श्री. अमित कुलकर्णी, सहायक महाव्यवस्थापक माधुरी राऊत (वित्त व लेखा) व ज्ञानदा निलेकर (मानव संसाधन) यांची उपस्थिती होती.

मुख्य अभियंता श्री. पवार यांनी सांगितले की, सन २०२३-२४ आर्थिक वर्षात पुणे परिमंडलाने विविध आघाड्यांवर रिजल्ट ओरिएंटेड पद्धतीने काम केले आहे. त्यामुळे सर्वच बाबतीत तुलनात्मक यश देखील चांगले मिळाले आहे. मागील आर्थिक वर्षात २ लाख ३८ हजार नवीन वीजजोडण्या देण्यात आल्या. महसूलमध्ये १४ टक्क्यांनी तर वसूली कार्यक्षमतेत १५.५० टक्क्यांनी वाढ झाली आहे. पुणे परिमंडलाचा महसूल गेल्या महिन्यात १६५६ कोटी ७० लाख रुपयांवर गेला आहे. सोबतच वीजहानी व वीजबिलांच्या थकबाकीमध्ये घट करण्याच्या प्रयत्नांना यश आले आहे.

ते पुढे म्हणाले, वीजक्षेत्रात काल केलेल्या कामगिरीवर आज तगू शकत नाही हे वास्तव आहे. तसेच कोणत्याही सेवा क्षेत्रात कृती मानकांनुसार निश्चित कालावधीत सेवा मिळाली तरच ग्राहकांचे समाधान होते. त्यामुळे अशी तत्पर सेवा देण्यासोबतच अचूक बिलींगसह विविध उपाययोजनांमधून महावितरणचा महसूल आणखी वाढवणे व वीजबिलांची थकबाकी शून्य करणे यास प्राधान्य देत दैनंदिन कामकाज गतिमान करण्याची सूचना मुख्य अभियंता श्री. राजेंद्र पवार यांनी यावेळी केली.

या आढावा बैठकीमध्ये मागील आर्थिक वर्षात उत्कृष्ट काम करणाऱ्या पुणे परिमंडलातील विविध कार्यालयांचा मुख्य अभियंता श्री. पवार यांच्याहस्ते गौरव करण्यात आला. कार्यक्रमाचे सूत्रसंचालन डॉ. संतोष पाटणी यांनी केले व आभार मानले. यावेळी मंडल, विभाग, उपविभाग व शाखा कार्यालयांचे अभियंता, अधिकारी व कर्मचारी उपस्थित होते.

पुणे, दि. ५: जिल्हा कोषागार कार्यालय पुणे येथून मासिक निवृत्तीवेतन घेणाऱ्या राज्य शासकीय निवृतीवेतनधारक, कुटुंब निवृतीवेतनधारकांचे निवृत्तीवेतन बँकेमार्फत जमा होत असते. तथापी, एप्रिल २०२४ पासूनचे निवृत्तीवेतन हे ई-कुबेर प्रणालीमार्फत भारतीय रिझर्व्ह बँकेतून थेट निवृत्तवेतनधारकांच्या बँक खात्यात जमा होणार असल्याची माहिती वरिष्ठ कोषागार कार्यालय, पुणे यांनी दिली आहे.

निवृत्तीवेतनधारकांनी पुणे कोषागार कार्यालयातील निवृत्तीवेतन विभागाला सूचीत न करता बँक शाखा किंवा खाते क्रमांक परस्पर बदलला असल्यास त्यांचे निवृत्तीवेतन जमा होणार नाही. अशा निवृत्ती वेतनधारकांनी मूळ बँकेचे ना हरकत प्रमाणपत्र आणि नवीन बँक खात्याच्या पासबुकच्या प्रतिसह जिल्हा कोषागार कार्यालयातील निवृत्तीवेतन विभागाला १९ एप्रिलपर्यंत माहिती द्यावी. अन्यथा एप्रिल महिन्याचे निवृत्तीवेतन जमा होण्यास अडचण निर्माण होऊ शकते, असेही कळविण्यात आले आहे.

सार्वजनिक स्वच्छतागृह उभारणी व दुरुस्तीची कामे तात्काळ मार्गी लावावीत; रोहन सुरवसे-पाटील यांची मागणी
पुणे : शहर-उपनगरातील सार्वजनिक ठिकाणच्या स्वच्छतागृहांची दूरावस्था आणि समाविष्ट गावात स्वच्छतागृह नसल्याने महिला-मुलींची मोठी कुचंबना होत आहे. पीएमपी आणि एसटी बसथांबा, मजूरअड्डा या ठिकाणी प्रशासनाने सार्वजनिक स्वच्छतागृह उभारून, तसेच बांधलेल्या स्वच्छतागृहांची दुरुस्ती व देखभाल तात्काळ करून महिला-मुलींची गैरसोय दूर करावी, अशी मागणी महाराष्ट्र प्रदेश युवक काँग्रेसचे सरचिटणीस रोहन सुरवसे-पाटील यांनी केली. महापालिका प्रशासन, एसटी महामंडळ आणि पीएमपीने प्रवाशांच्या सोयीसाठी स्वच्छतागृह उभारली पाहिजेत अशी मागणी ईमेलद्वारे पुणे महानगरपालिकेकडे रोहन सुरवसे पाटील यांनी केली आहे.
रोहन सुरवसे-पाटील म्हणाले, “उपनगर आणि परिसरातील एसटी बस थांब्यावर कामगारवर्ग, गावाकडे ये-जा करणाऱ्या मंडळींची मोठी गर्दी असते. पीएमपी बसथांब्यावरही प्रवासांची वर्दळ असते. गाव तेथे रस्ता आणि रस्ता तेथे एसटी या धर्तीवर गर्दीच्या ठिकाणी पालिका प्रशासनाने स्वच्छतागृह उभारून पाण्याची व्यवस्था करण्याची गरज आहे. मधुमेहग्रस्तांना लघवीचा त्रास असतो. त्याचबरोबर महिला-मुलींच्या समस्या वेगळ्या आहेत. त्यामुळे पालिका प्रशासनाने नागरिकांच्या आणि शहराच्या आरोग्याच्या दृष्टीने तातडीने स्वच्छतागृह उभारून नागरिकांना दिलासा द्यावा.”
“सातववाडी येथील एसटी थांब्यावर प्रवासी मोठ्या प्रमाणावर असतात, तर कात्रज बाह्यवळण मार्गावर उंड्री चौक, हांडेवाडी चौक, काळेपडळ रेल्वे गेट येथे राज्य-परराज्यातून कुशल-अकुशल कामगार मोठ्या प्रमाणावर उपनगर आणि लगतच्या गावात स्थायिक झाला आहे. दररोज सकाळी उंड्री, काळेपडळ, हडपसर गाव, मगरपट्टा चौक, चंदननगर, मुंढवा, हांडेवाडी चौक आदी परिसरातील मजूर अड्ड्यावर रोजगारासाठी थांबतात. मात्र, या ठिकाणी स्वच्छतागृह नसल्याने महिला कामगारांची गैरसोय होत आहे. पालिका प्रशासन आणि स्वयंसेवी संस्थांनी पुढाकार घेऊन स्वच्छतागृह उभारावेत. लातूर, नांदेड, बार्शी, पंढरपूर, नागपूर, उत्तर प्रदेश, मध्य प्रदेश आदी परिसरातील मजूर मागील अनेक वर्षांपासून उपनगर आणि परिसरात स्थायिक झाले आहेत. मजूर अड्ड्यावर स्वच्छतागृह उभारून महिलावर्गाची अडचण प्रशासनाने दूर केली पाहिजे,” असेही त्यांनी नमूद केले.
हडपसरमधील रवीदर्शन आणि सासवड रस्त्यावरील सातववाडी येथील एसटी थांब्यावर प्रवासी मोठ्या प्रमाणावर असतात. कात्रज बाह्यवळण मार्गावर उंड्री चौक, हांडेवाडी चौक, काळेपडळ रेल्वेगेट येथील मजूर अड्ड्यावर रोजगारासाठी सुमारे दोनशे ते अडीचशे महिला-पुरुष कामगार थांबतात, अशा सार्वजनिक ठिकाणी स्वच्छतागृह असणे अत्यंत गरजेचे आहे.
– रोहन सुरवसे पाटील, सरचिटणीस, प्रदेश युवक काँग्रेस

श्री रामजी संस्थान तुळशीबाग च्यावतीने दि. ९ ते २७ एप्रिल दरम्यान विविध कार्यक्रमांचे आयोजन
पुणे :श्रीराम जन्मोत्सवानिमित्त तुळशीबाग येथील श्रीराम मंदिरात श्री रामजी संस्थान तुळशीबाग च्यावतीने दि. ९ ते २७ एप्रिल दरम्यान  विविध कार्यक्रमांचे आयोजन करण्यात आले आहे. उत्सवांतर्गत श्रीरामरक्षा, अथर्वशीर्ष पठण, श्री विष्णू सहस्त्रनाम, श्रीसूक्त व पुरुषसूक्त पठण, महापूजा, पालखी, श्री कौसल्या माता डोहाळजेवण, श्रीरामजन्म सोहळा, श्रीरामराज्याभिषेक सोहळा अशा धार्मिक कार्यक्रमांबरोबरच रामायण वाचन, कीर्तन सांगितीक कार्यक्रम अशा सांस्कृतिक कार्यक्रमांचे देखील आयोजन करण्यात आले आहे, अशी माहिती संस्थानचे कार्यकारी विश्वस्त राघवेंद्र उर्फ सुहास तुळशीबागवाले यांनी पत्रकार परिषदेत दिली.

पत्रकार परिषदेला संस्थानचे कार्यकारी विश्वस्त राघवेंद्र उर्फ सुहास तुळशीबागवाले, विश्वस्त भरत तुळशीबागवाले, डॉ.रामचंद्र तुळशीबागवाले, कोटेश्वर तुळशीबागवाले, रामदास तुळशीबागवाले, श्रीपाद तुळशीबागवाले यांसह तुळशीबागवाले परिवार उपस्थित होता. पुणे प्रांताचे सरसुभेदार श्रीमंत नारो अप्पाजी तुळशीबागवाले यांनी सन १७६१ साली स्थापन केलेल्या देखण्या मंदिरामधे यंदाचे श्रीरामनवमी उत्सवाचे अखंडीत २६३ वे वर्ष साजरे होत आहे.

गुढीपाडव्याला मंगळवार, दिनांक ९ एप्रिल रोजी श्रीरामनवमी उत्सवास प्रारंभ होणार असून त्यादिवशी सकाळी ७ पासून श्रीरामास पवमान अभिषेक, श्रीरामरक्षा, अथर्वशीर्ष, श्रीविष्णूसहस्त्रनाम, श्रीसूक्त व पुरूषसूक्त पठण होणार आहे. तसेच दि. ९ ते २३ एप्रिल दरम्यान दररोज सकाळी ९ वाजता श्री गणेश्वर शास्त्री पारखी हे रामायण वाचन, दुपारी १२ वाजता श्रीरामांची महापूजा व आरती, सायंकाळी ७.३० वाजता श्रीरामांच्या छबिन्याची मिरवणूक व आरती महापूजा होणार आहे. तर, दि. ९ ते २३ एप्रिल दरम्यान दररोज सायंकाळी ५.१५ वाजता प्रवचनकार मोहना चितळे यांचे प्रवचन होणार आहे.

मंगळवार, दि. १६ एप्रिल रोजी सायंकाळी ५ वाजता श्री कौसल्या माता डोहाळजेवण होणार आहे. श्रीराम जन्मानिमित्त बुधवार, दि. १७ एप्रिल रोजी सकाळी १०.३० वाजता ह.भ.प. दर्शनबुवा वझे यांचे श्रीरामजन्माचे कीर्तन होणार असून सकाळी ११ वाजता श्रीरामांच्या पोषाखाची मिरवणूक निघणार आहे. त्यानंतर श्रीरामजन्माचा मुख्य सोहळा दुपारी १२.४० वाजता साजरा होणार आहे. त्यानंतर सायंकाळी ७.३० वाजता श्रीरामांच्या छबिन्याची मिरवणूक निघणार आहे.

शुक्रवार, दिनांक १९ एप्रिल रोजी सकाळी ७ वाजता ह.भ.प. दर्शनबुवा वझे यांचे लळीत व पायघडीचे कीर्तन आणि समस्त तुळशीबागवाले परिवाराकडून श्रीरामराज्याभिषेक सोहळा संपन्न होणार आहे. मंगळवार, दिनांक २३ एप्रिल रोजी हनुमान जयंतीच्या दिवशी सकाळी ६ वाजता ब्रह्मवृंदाकडून श्रीहनुमंतास रुद्राभिषेक व सकाळी ६.३० वाजता ह.भ.प.दर्शनबुवा वझे यांचे श्रीहनुमान जन्माचे कीर्तन होणार आहे. शनिवार, दि. २७ एप्रिल रोजी सायंकाळी ७ वाजता श्रीसत्यनारायण महापूजेने श्रीराम जन्मोत्सव उत्सवाची सांगता होणार आहे.

सांस्कृतिक कार्यक्रमांतर्गत नवोदितांसह दिग्गज कलाकारांची गायनसेवा
उत्सवादरम्यान बुधवार, दि. १० एप्रिल रोजी पं.शौनक अभिषेकी यांचे सुश्राव्य गायन, शनिवार, दि. १३ एप्रिल रोजी गौरी पाठारे यांचा सांगीतिक कार्यक्रम आणि सोमवार, दि. १५ एप्रिल रोजी प्रख्यात गायक श्रीधर फडके यांचा गीतरामायण कार्यक्रम होणार आहे. सांस्कृतिक कार्यक्रम रात्री ८.३० वाजता होणार असून सर्व कार्यक्रम विनामूल्य आहेत. तरी पुणेकरांनी मोठ्या संख्येने उत्सवात सहभागी व्हावे, असे आवाहन राघवेंद्र उर्फ सुहास तुळशीबागवाले यांनी केले आहे.