नागरिकाच्या मागणीला मंडळांच्या कार्यकर्त्यांचा तीव्र आक्षेप; ‘यांना सभागृहातून बाहेर काढा’ असा सूर, नदीपात्रातील ढोल-ताशांच्या मुद्द्यावरूनही वातावरण तापले
पुणे : आगामी गणेशोत्सवाच्या नियोजनासाठी पुणे महानगरपालिकेत आयोजित गणेश मंडळांच्या बैठकीत ‘यंदाचा गणेशोत्सव DJ मुक्त साजरा करावा’, अशी भूमिका एका नागरिकाने मांडताच वातावरण तापले. संबंधित नागरिकाच्या भूमिकेला काही गणेश मंडळांच्या कार्यकर्त्यांनी तीव्र आक्षेप घेतला. ‘यांना सभागृहातून बाहेर काढा’ असा सूर कार्यकर्त्यांनी लावल्यानंतर अखेर त्या नागरिकाला सभागृहाबाहेर काढण्यात आले.
आगामी गणेशोत्सवातील नियोजन आणि विविध व्यवस्थांबाबत पुणे महानगरपालिकेत ही बैठक आयोजित करण्यात आली होती. बैठकीला महापौर मंजुषा नागपुरे, उपमहापौर परशुराम वाडेकर, महापालिका आयुक्त नवल किशोर राम, सहपोलीस आयुक्त संजय दराडे, अपर पोलीस आयुक्त राजेश बनसोडे यांच्यासह शहरातील विविध गणेश मंडळांचे प्रमुख पदाधिकारी आणि कार्यकर्ते उपस्थित होते.
बैठकीत गणेशोत्सवातील ध्वनिप्रदूषणाचा विषय उपस्थित झाला. यावेळी एका नागरिकाने गणेशोत्सवात मोठ्या आवाजातील DJ आणि ध्वनिक्षेपकांचा वापर टाळण्याची भूमिका मांडत DJ मुक्त गणेशोत्सव साजरा करण्याचे आवाहन केले.
नदीपात्रातील ढोल-ताशांच्या मुद्द्यावरही वाद
मात्र, त्याच्या या भूमिकेनंतर सभागृहातील काही गणेश मंडळांच्या कार्यकर्त्यांनी आक्षेप घेतला. संबंधित नागरिकाच्या वक्तव्याला विरोध करत कार्यकर्त्यांनी त्याला सभागृहाबाहेर काढण्याची मागणी केली. वातावरण तापल्यानंतर अखेर त्या नागरिकाला सभागृहातून बाहेर काढण्यात आले.
याच बैठकीत नदीपात्रात होणाऱ्या ढोल-ताशा पथकांच्या सरावाचा मुद्दाही उपस्थित झाला. पर्यावरणाच्या दृष्टीने नदीपात्रातील अशा उपक्रमांवर आक्षेप नोंदवण्यात आला. त्यावरही काही गणेश मंडळांच्या पदाधिकारी आणि कार्यकर्त्यांनी नाराजी व्यक्त करत पुण्याच्या पारंपरिक ढोल-ताशा संस्कृतीची बाजू मांडली.
पुण्याच्या गणेशोत्सवाची ऐतिहासिक आणि सांस्कृतिक परंपरा असून ढोल-ताशा हा या उत्सवाचा महत्त्वाचा भाग असल्याचे मंडळांच्या कार्यकर्त्यांकडून सांगण्यात आले. पर्यावरण संरक्षणाच्या मुद्द्यावर चर्चा झाली पाहिजे; मात्र पारंपरिक ढोल-ताशा संस्कृतीवर निर्बंध आणण्याला कार्यकर्त्यांनी विरोध दर्शवला.
‘DJ मुक्त’ आवाहनावरून नवा वाद
एकीकडे ध्वनिप्रदूषण रोखण्यासाठी DJ आणि मोठ्या आवाजातील ध्वनिक्षेपकांचा वापर टाळण्याची मागणी, तर दुसरीकडे गणेशोत्सवातील उत्साह आणि मंडळांची भूमिका यामुळे बैठकीत हा विषय चांगलाच गाजला.
विशेष म्हणजे, ‘DJ मुक्त गणेशोत्सव साजरा करा’ अशी भूमिका मांडणाऱ्या नागरिकालाच मंडळांच्या कार्यकर्त्यांच्या विरोधानंतर सभागृहाबाहेर काढण्यात आल्याने हा प्रकार चर्चेचा विषय ठरला आहे.
यंदाच्या गणेशोत्सवात DJ आणि ध्वनिक्षेपकांच्या वापराबाबत प्रशासन व पोलीस कोणती भूमिका घेतात, तसेच उत्सवाचा उत्साह, पुण्याची पारंपरिक ढोल-ताशा संस्कृती आणि ध्वनिप्रदूषण नियंत्रण यामध्ये कसा समतोल साधला जातो, याकडे आता पुणेकरांचे लक्ष लागले आहे.
