‘पुणे महापालिकेची उघड फसवणूक’; महापालिकेचा लोगो नाही, आयुक्त आणि गटनेत्यांनाही निमंत्रण नाही; ५० लाख रुपये वसूल करण्याची धंगेकरांची मागणी
पुणे : पुणे मॅरेथॉन स्पर्धेसाठी पुणे महानगरपालिकेने तब्बल ५० लाख रुपये खर्च करण्यास मान्यता दिली असतानाही, या स्पर्धेच्या निमंत्रण पत्रिकेवर महापालिकेचा लोगो किंवा ‘पुणे महापालिका प्रायोजक’ असा कोणताही उल्लेख नसल्याचा गंभीर आरोप माजी आमदार रवींद्र धंगेकर यांनी केला आहे. महापालिकेचा निधी घेऊनही निमंत्रण पत्रिकेवर महापालिकेचे नाव नाही, आयुक्त आणि गटनेत्यांनाही निमंत्रण नाही. हा प्रकार म्हणजे पुणे महानगरपालिका आणि पुणेकरांची उघड फसवणूक असल्याचा आरोप करत धंगेकर यांनी खासदार मुरलीधर मोहोळ आणि संबंधित महापालिका अधिकाऱ्यांवर फसवणुकीचे गुन्हे दाखल करण्याची मागणी केली आहे.
१५ नोव्हेंबर रोजी पार पडलेल्या पुणे मॅरेथॉनच्या आयोजनासाठी महापालिकेने ५० लाख रुपये दिले आहेत. मात्र, या कार्यक्रमाच्या निमंत्रण पत्रिकेवर महापालिकेचा लोगो अथवा प्रायोजक म्हणून नाव छापण्यात आलेले नाही. उलट इतर खासगी कंपन्यांचे लोगो निमंत्रण पत्रिकेवर वापरण्यात आले आहेत. महापालिकेचा निधी वापरूनही महापालिका आयुक्त आणि गटनेत्यांना निमंत्रित करण्यात आले नसल्याचा मुद्दाही धंगेकर यांनी उपस्थित केला आहे.
‘पैसे वर्ग करण्याची एवढी घाई कशासाठी?’
महापालिका प्रशासनाच्या कार्यपद्धतीवर प्रश्नचिन्ह उपस्थित करत धंगेकर म्हणाले, “महापालिकेकडून कोणत्याही कार्यक्रमाला प्रायोजकत्व देताना नियमानुसार कार्यक्रम झाल्यानंतर पैसे वर्ग केले जातात. असे असताना या कार्यक्रमासाठी अधिकाऱ्यांनी एवढी घाईघाईने तत्परता दाखवण्याचे कारण काय? कोणतीही शहानिशा न करता ५० लाख रुपये वर्ग करताना, या बदल्यात महापालिकेला काय मिळणार आहे, पालिकेचे प्रायोजक म्हणून नाव वापरले जाणार आहे की नाही, याची साधी खातरजमाही अधिकाऱ्यांनी केलेली नाही.”
केवळ एका राजकीय पक्षाच्या नेत्यांची आणि पदाधिकाऱ्यांची नावे निमंत्रण पत्रिकेवर छापून सरकारी पैशातून राजकीय प्रसिद्धी केली जात असल्याचा आरोपही त्यांनी केला.
‘महापालिकेच्या तिजोरीवर ५० लाखांचा दरोडा’
खासदार मुरलीधर मोहोळ यांनी महापालिकेच्या काही अधिकाऱ्यांना हाताशी धरून पुणे महापालिकेच्या तिजोरीवर ५० लाख रुपयांचा दरोडा टाकल्याचा घणाघाती आरोप धंगेकर यांनी केला आहे. पुणेकरांच्या कष्टाच्या कराचा पैसा अशा प्रकारे खासगी आणि राजकीय कार्यक्रमांसाठी वापरला जात असेल, तर ते अजिबात खपवून घेतले जाणार नाही, असा इशाराही त्यांनी दिला.
५० लाख रुपये वसूल करण्याची मागणी
या प्रकरणातील संबंधित महापालिका अधिकारी आणि सांस्कृतिक प्रतिष्ठानचे अध्यक्ष खासदार मुरलीधर मोहोळ यांच्यावर तातडीने फसवणुकीचे गुन्हे दाखल करावेत. तसेच महापालिकेचे ५० लाख रुपये वसूल करण्यात यावेत, अशी ठाम मागणी माजी आमदार रवींद्र धंगेकर यांनी केली आहे.
मॅरेथॉनसाठी महापालिकेने दिलेल्या ५० लाख रुपयांच्या निधीचा वापर, प्रायोजकत्वाच्या अटी आणि निमंत्रण पत्रिकेवरील तपशील यावरून आता महापालिका प्रशासनाच्या भूमिकेकडे लक्ष लागले आहे.
