राज ठाकरे–फडणवीस चर्चेनंतर आशावाद, पण अध्यक्षांच्या राजीनाम्यासह आयोगाच्या शुद्धीकरणाच्या मागणीवर विद्यार्थी ठाम
पुणे : एस. एम. जोशी पुलावरील MPSC विद्यार्थी आंदोलनाचा आज नववा दिवस असून आंदोलन अजूनही सुरू आहे. या पार्श्वभूमीवर मनसे अध्यक्ष राज ठाकरे यांनी मुख्यमंत्री देवेंद्र फडणवीस यांच्याशी MPSC विद्यार्थ्यांच्या मागण्यांबाबत चर्चा केल्यानंतर आमदार रोहित पवार यांनी माध्यमांशी संवाद साधत आपली भूमिका स्पष्ट केली.
राज ठाकरे यांनी मुख्यमंत्री फडणवीस विद्यार्थ्यांच्या प्रश्नांबाबत सकारात्मक असल्याचे सांगत लवकरच चांगली बातमी मिळेल, अशी अपेक्षा व्यक्त केली. यावर रोहित पवार यांनीही सरकारकडून सकारात्मक निर्णयाची अपेक्षा असल्याचे म्हटले. मात्र विद्यार्थी केवळ आश्वासनावर आंदोलन मागे घेणार नसून MPSC अध्यक्ष विवेक भीमनवार यांच्या राजीनाम्यासह आयोगाच्या कामकाजात व्यापक सुधारणा आणि पारदर्शकतेच्या मागण्यांवर ठाम असल्याचे त्यांनी स्पष्ट केले.
दरम्यान, पुणे पोलिसांनी एस. एम. जोशी पुलावरील आंदोलनाला परवानगी नाकारून जागा रिकामी करण्याचे निर्देश दिले असले तरी विद्यार्थी आंदोलन सुरू ठेवत आहेत. पर्यायी आंदोलनस्थळी परवानगीसाठी अर्ज करता येईल, असे पोलिसांनी सांगितले आहे.
आज सकाळच्या आणखी एका महत्त्वाच्या अपडेटनुसार, उपोषणावर असलेल्या सात जणांपैकी तिघांनी प्रकृतीसंदर्भातील कारणांमुळे उपोषण सोडल्याचे वृत्त आहे. मात्र आंदोलन सुरूच आहे.
