गरब्यासाठी पैशांवर पार्टनर देणाऱ्या जाहिरातींवर बंदी घाला; जाहिरातींमागील रॅकेटची चौकशी करण्याची संतोष शिंदे यांची मागणी
पुणे : प्रतिनिधी
आगामी नवरात्रोत्सवाच्या पार्श्वभूमीवर सोशल मीडियावर व्हायरल होत असलेल्या ‘रेंट अ गरबा पार्टनर’ या जाहिरातींवरून संभाजी ब्रिगेड आक्रमक झाली आहे. पैसे घेऊन गरब्यासाठी पार्टनर उपलब्ध करून देण्याच्या प्रकारांना महाराष्ट्रात थारा देऊ नये आणि अशा जाहिराती तसेच कार्यक्रमांवर सरकारने तातडीने कारवाई करावी, अशी मागणी संभाजी ब्रिगेडचे महाराष्ट्र प्रदेश प्रवक्ते ॲड. संतोष शिंदे यांनी केली आहे.
सोशल मीडियावर ‘रेंट अ गरबा पार्टनर’ नावाच्या जाहिराती अलीकडे मोठ्या प्रमाणावर चर्चेत आल्या आहेत. काही जाहिरातींमध्ये वेगवेगळ्या दरांचे पॅकेज दाखविण्यात आले असून, अशा पोस्टच्या सत्यतेबाबतही प्रश्न उपस्थित झाले आहेत. अहमदाबाद सायबर क्राइम सेलनेही अशा अज्ञात प्रोफाइलना पैसे पाठवू नयेत, असा इशारा दिला आहे.
या पार्श्वभूमीवर संतोष शिंदे यांनी म्हटले आहे की, “गरबा करण्यासाठी एक हजार, अडीच हजार किंवा पाच हजार रुपये मोजून पार्टनर उपलब्ध करून देण्याची संस्कृती महाराष्ट्राची असू शकत नाही.” धार्मिक आणि पारंपरिक उत्सवांचे अशा प्रकारे व्यापारीकरण करणे योग्य नसल्याची भूमिका त्यांनी मांडली आहे.
‘ही कसली संस्कृती?’
शिंदे यांनी सवाल उपस्थित केला की, नवरात्रोत्सवात देवीच्या कर्तृत्वाचा जागर करण्याऐवजी पैशांच्या मोबदल्यात तरुण-तरुणींना गरबा पार्टनर म्हणून उपलब्ध करून देण्याच्या जाहिराती केल्या जात असतील तर अशा प्रकारांना सरकारने गंभीरपणे घ्यायला हवे.
“हा जिजाऊ, सावित्री, अहिल्या आणि रमाईचा महाराष्ट्र आहे. पैशांवर पार्टनर विकणाऱ्यांचा महाराष्ट्र नाही,” असे सांगत त्यांनी या प्रकाराचा निषेध केला.
राज्यात शेतकरी, कष्टकरी, कामगार आणि बेरोजगार तरुणांचे प्रश्न गंभीर असताना काही लोक पारंपरिक उत्सवांच्या नावाखाली अशा प्रकारचे व्यवसाय करण्याचा प्रयत्न करत असल्याचा आरोपही त्यांनी केला.
जाहिरातींमागे कोण? चौकशीची मागणी
‘रेंट अ गरबा पार्टनर’च्या नावाखाली जाहिराती प्रसिद्ध करणारे कोण आहेत, प्रत्यक्षात अशी सेवा दिली जात आहे का आणि त्यामागे कोणते संघटित रॅकेट आहे का, याची राज्य सरकारने चौकशी करावी, अशी मागणी संभाजी ब्रिगेडने केली आहे.
पैसे घेऊन गरब्यासाठी पार्टनर उपलब्ध करून देणाऱ्या कार्यक्रमांना परवानगी देऊ नये आणि अशा जाहिरातींवर तात्काळ बंदी घालावी, अशीही भूमिका शिंदे यांनी मांडली.
‘असे कार्यक्रम उधळून लावू’
गरब्याच्या नावाखाली महाराष्ट्रात अशा स्वरूपाचे कार्यक्रम आयोजित करण्यात आले तर संभाजी ब्रिगेड त्याला तीव्र विरोध करेल, असा इशाराही संतोष शिंदे यांनी दिला.
“असे कार्यक्रम आयोजित केले गेले, तर ते उधळून लावल्याशिवाय आम्ही शांत बसणार नाही,” अशी भूमिका त्यांनी मांडली आहे.
दरम्यान, सोशल मीडियावर व्हायरल झालेल्या सर्वच ‘रेंट अ गरबा पार्टनर’ जाहिराती प्रत्यक्ष व्यावसायिक सेवा आहेत की सोशल मीडिया ट्रेंड किंवा दिशाभूल करणाऱ्या पोस्ट आहेत, हे अद्याप सर्व प्रकरणांत स्पष्ट झालेले नाही. त्यामुळे अशा जाहिरातींवर विश्वास ठेवण्यापूर्वी नागरिकांनी सतर्क राहावे, असा सायबर पोलिसांचाही सल्ला आहे.
नेमके प्रकरण काय आहे ?
नवरात्रोत्सवाच्या पार्श्वभूमीवर सोशल मीडियावर ‘Rent A Garba Partner’ नावाच्या पोस्ट आणि जाहिराती व्हायरल झाल्या आहेत. त्यामध्ये दोन तासांपासून संपूर्ण रात्रीपर्यंत गरबा पार्टनर उपलब्ध करून देण्याच्या नावाखाली वेगवेगळ्या किंमतींचे पॅकेज दाखवण्यात आले आहे. काही पोस्टमध्ये १ हजार रुपयांपासून पुढे विविध दर नमूद करण्यात आले आहेत.
अहमदाबाद सायबर क्राइम विभागाने अशा अज्ञात सोशल मीडिया प्रोफाइलना पैसे पाठवू नयेत, तसेच अनोळखी लिंकवर क्लिक करताना सावध राहावे, असे नागरिकांना सांगितले आहे. काही संबंधित सोशल मीडिया अकाउंटची पडताळणीही सुरू असल्याचे वृत्त आहे. या जाहिराती प्रत्यक्ष सेवा आहेत, सोशल मीडिया ट्रेंड आहेत की त्यातून आर्थिक किंवा सायबर फसवणूक करण्याचा प्रयत्न आहे, याची चौकशी सुरू आहे.
