मुख्यमंत्री देवेंद्र फडणवीस यांचा उद्योग क्षेत्रातील प्रमुखांशी ऑनलाइन संवाद; महाराष्ट्रात ४०० नवीन GCC आणि ४ लाख उच्च-कौशल्य रोजगारांचे उद्दिष्ट
पुणे : प्रतिनिधी
पुण्याला जागतिक क्षमता केंद्रांचे (Global Capability Centre – GCC) प्रमुख केंद्र म्हणून विकसित करण्याच्या दृष्टीने तसेच उद्योग क्षेत्राच्या अपेक्षा आणि गरजा जाणून घेण्यासाठी ‘व्हाय नॉट पुणे?’ या विषयावर उच्चस्तरीय संवादाचे आयोजन करण्यात आले. माहिती-तंत्रज्ञान, तंत्रज्ञान, उत्पादन तसेच विविध उद्योग क्षेत्रांतील देशपातळीवरील प्रमुख आणि वरिष्ठ प्रतिनिधी या संवादात सहभागी झाले.पुण्यातील महापालिकेच्या अलिशान सभागृहांमध्ये अथवा महापौर बंगल्यात नाही तर हि बैठक पंचतारांकित हॉटेलात पार पडली . मुख्यमंत्री देवेंद्र फडणवीस यांनी व्हिडिओ कॉन्फरन्सिंगद्वारे या बैठकीला संबोधित केले. पुण्यात उत्पादन, तंत्रज्ञान आणि माहिती-तंत्रज्ञान क्षेत्राची भक्कम पायाभूत परिसंस्था असून GCC केंद्रांसाठी पुणे हे नैसर्गिक आणि सक्षम ठिकाण असल्याचे त्यांनी सांगितले.
राज्य शासनाने स्वतंत्र GCC धोरण तयार केले असून पुण्याला प्रमुख GCC हब म्हणून विकसित करण्याचे उद्दिष्ट असल्याचेही मुख्यमंत्र्यांनी स्पष्ट केले. महाराष्ट्र GCC धोरण २०२५ अंतर्गत राज्यात सुमारे ४०० नवीन GCC केंद्रे आकर्षित करणे आणि ४ लाख उच्च-कौशल्याधारित रोजगार निर्माण करणे, हे उद्दिष्ट निश्चित करण्यात आले आहे.
पुण्यातील मेट्रो, रिंग रोड, बोगदे तसेच वाहतूक आणि दळणवळण क्षेत्रातील विविध प्रकल्पांचा उल्लेख करत शहरातील कनेक्टिव्हिटी आणि राहणीमान अधिक सक्षम करण्यासाठी प्रयत्न सुरू असल्याचे फडणवीस यांनी सांगितले. पुण्यात उपलब्ध असलेले अभियांत्रिकी आणि तंत्रज्ञान क्षेत्रातील कुशल मनुष्यबळ हे GCC विकासासाठी मोठे बलस्थान असल्याचे त्यांनी नमूद केले.
उद्योग क्षेत्रातील प्रतिनिधींनी धोरणातील संभाव्य त्रुटी, कार्यपद्धतीतील अडचणी आणि शासनाच्या हस्तक्षेपाची आवश्यकता असलेल्या बाबींवर सूचना मांडाव्यात, असे आवाहनही मुख्यमंत्र्यांनी केले. व्यवहार्य सूचनांचा गांभीर्याने विचार केला जाईल, अशी ग्वाही त्यांनी दिली.
महापौर मंजुषा नागपुरे यांनी संवादात सहभागी झालेल्या उद्योग प्रतिनिधींचे आभार मानले. अशा संवादातून पुणे शहर, उद्योग क्षेत्र आणि जागतिक व्यावसायिक समुदाय यांच्यातील संबंध अधिक दृढ होण्यास मदत होईल, असे त्यांनी सांगितले.
महापालिका आयुक्त नवल किशोर राम यांनी उद्योग क्षेत्र आणि प्रशासनातील संवादाची दरी कमी करणे, शहरातील विकास आराखडे, पायाभूत सुविधा प्रकल्प आणि भविष्यातील संधींची माहिती उद्योग क्षेत्रापर्यंत पोहोचवणे हा या उपक्रमाचा प्रमुख उद्देश असल्याचे स्पष्ट केले.
हा संवाद केवळ प्रशासनाकडून माहिती देण्यापुरता मर्यादित नसून उद्योग प्रतिनिधींनी आपल्या अपेक्षा आणि सूचना मांडाव्यात आणि त्यानुसार शहर विकासाच्या योजना अधिक व्यावहारिक व उद्योगाभिमुख करता याव्यात, यासाठी हे व्यासपीठ असल्याचे आयुक्तांनी सांगितले.
पुण्याची विविध क्षेत्रांचा समतोल साधणारी ओळख कायम राखत शहराला प्रमुख गुंतवणूक आणि व्यवसाय केंद्र म्हणून विकसित करण्याचे उद्दिष्ट असल्याचेही त्यांनी नमूद केले.
या संवादात महापालिका अतिरिक्त आयुक्त पवनीत कौर, ओमप्रकाश दिवटे, तसेच PMRDA, पोलीस विभाग, जिल्हाधिकारी कार्यालय आणि इतर संबंधित विभागांचे अधिकारी व प्रतिनिधी सहभागी झाले होते.
बैठकीतून आलेल्या सूचना आणि अपेक्षांचे संकलन करून त्याचे कृती आराखड्यात रूपांतर करण्यात येणार असून, त्यानंतर संबंधित कामांचा आढावा, अंमलबजावणी आणि पाठपुरावा करण्यात येईल, असे आयुक्तांनी सांगितले.
या संवादामुळे शासन आणि उद्योग क्षेत्रातील सातत्यपूर्ण समन्वय अधिक मजबूत होऊन पुण्याच्या GCC, तंत्रज्ञान, नवोन्मेष, कुशल मनुष्यबळ आणि भविष्यातील आर्थिक विकासाला चालना मिळण्याची अपेक्षा व्यक्त करण्यात आली.
