मधुसंचय गणपती मंदिरात ३०० महिलांचा सहभाग; ‘कुटुंब प्रबोधन आणि पंच परिवर्तन’ विषयावर मार्गदर्शन
पुणे, दि. २० सप्टेंबर २०२६ : कर्वेनगर येथील मधुसंचय सोसायटीच्या गणपती मंदिरात महिला सामूहिक अथर्वशीर्ष समितीच्या वतीने दरवर्षीप्रमाणे यंदाही सामूहिक ‘श्री गणपती अथर्वशीर्ष’ पठणाचा सोहळा भक्तिमय वातावरणात पार पडला. समितीच्या या उपक्रमाचे यंदाचे १८ वे वर्ष होते.
कार्यक्रमाच्या सुरुवातीला सुप्रसिद्ध शंखवादक मधुकर शिधये यांनी शंखवादन करून मंगलमय वातावरण निर्माण केले. त्यानंतर महिलांनी सामूहिक अथर्वशीर्ष पठण केले. स्वाती हिर्लेकर यांनी अथर्वशीर्ष सादर केले.
या कार्यक्रमाला प्रमुख वक्त्या म्हणून प्रतिमा चोळकर उपस्थित होत्या. त्यांनी ‘कुटुंब प्रबोधन आणि पंच परिवर्तन’ या विषयावर उपस्थित महिलांना मार्गदर्शन केले. कुटुंबसंस्थेचे महत्त्व, संस्कारांचे स्थान आणि समाज परिवर्तनामध्ये महिलांची भूमिका यावर त्यांनी विशेष प्रकाश टाकला.
कर्वेनगर परिसरातील सुमारे ३०० महिलांनी या कार्यक्रमात सहभाग घेतला. सकाळी ८.३० ते १०.३० या वेळेत सामूहिक अथर्वशीर्ष पठणाचा कार्यक्रम पार पडला.
आरती आणि प्रसाद वाटपाने कार्यक्रमाची सांगता करण्यात आली.
कार्यक्रमाच्या यशस्वी आयोजनासाठी मनीषा जावळे, कविता शेंडे, स्मिता लाटे, भारती जोशी, श्वेता क्षीरसागर, माधवी जोशी, ज्योत्स्ना शिंदे आणि समिधा मुळे यांनी परिश्रम घेतले.
या कार्यक्रमाचे आयोजन महिला सामूहिक अथर्वशीर्ष समिती, मधुसंचय, कर्वेनगर, पुणे यांच्या वतीने करण्यात आले होते.
