१० दिवसांत ६८२ कोटी रुपयांच्या वसुलीचे उद्दिष्ट
पुणे, दि. २० सप्टेंबर २०२६ : काळ बदलला आहे. ‘बघतो’, ‘करतो’, ‘पुढच्या महिन्यात होईल’ अशी उत्तरे आता चालणार नाहीत. यापुढे कामाचा रिझल्ट अपेक्षित आहे. उद्दिष्टपूर्ती झाली नाही तर कारवाईला सामोरे जावे लागेल, असा स्पष्ट इशारा महावितरणचे कार्यकारी संचालक (वाणिज्य) दिनेश अग्रवाल यांनी पुणे परिमंडलातील अधिकाऱ्यांना दिला. सप्टेंबरअखेरपर्यंत चालू वीजबिलासोबत अतिरिक्त ६८२ कोटी रुपये थकबाकीतून वसूल करण्याचे उद्दिष्ट त्यांनी दिले आहे.
महावितरणने पुणे व बारामती परिमंडलाचे पालकत्व कार्यकारी संचालक दिनेश अग्रवाल यांच्याकडे सोपविले आहे. पालक संचालक म्हणून अग्रवाल यांनी शनिवारी (दि. १९) रास्तापेठ येथील पॉवर हाऊस येथे पुणे परिमंडलातील वसुली, वीज गळती आणि कामगिरीचा आढावा घेतला. या बैठकीला प्रभारी मुख्य अभियंता ज्ञानदेव पडळकर, अधीक्षक अभियंता सिंहाजीराव गायकवाड, सुरेश सवाईराम, सहायक महाव्यवस्थापक (वि.व ले.) सौ. कीर्ती भोसले यांच्यासह पुणे परिमंडलातील सर्व विभागांचे कार्यकारी अभियंते व अधिकारी उपस्थित होते.
अग्रवाल म्हणाले, “आपला स्वतःचा व्यवसाय पुढे नेण्यासाठी ज्या तळमळीने आणि नियोजनबद्ध पद्धतीने आपण प्रयत्न करतो, त्याच भावनेने महावितरणच्या उत्कर्षासाठी काम करा. शंभर टक्के वसुलीसोबतच वीज गळती कमी करण्यासाठी ठोस ॲक्शन प्लॅन तयार करा. त्यानुसार कामाचे नियोजन करून निश्चित केलेली उद्दिष्टे साध्य करा.”
सप्टेंबर महिन्याच्या चालू देयकासह पुणे परिमंडलाने १,२५४ कोटी रुपयांची वसुली करणे अपेक्षित होते. मात्र, आतापर्यंत ५७१ कोटी रुपयांची वसुली झाली असून अद्याप ६८२ कोटी रुपये वसूल करणे बाकी आहे. ही संपूर्ण रक्कम पुढील १० दिवसांत वसूल करण्याच्या स्पष्ट सूचना अग्रवाल यांनी सर्व क्षेत्रीय अधिकाऱ्यांना दिल्या.
वसुलीसोबतच वीजचोरांविरोधातील मोहीम आणखी तीव्र करण्याचे निर्देशही त्यांनी दिले. ग्राहकसेवा, वीजपुरवठ्याची गुणवत्ता, वसुली आणि वीज गळती कमी करण्याच्या कामात ठोस परिणाम दिसला पाहिजे. केवळ नियोजन न करता त्याची प्रभावी अंमलबजावणी आणि त्यातून अपेक्षित परिणाम साध्य झाले पाहिजेत, असे अग्रवाल यांनी अधिकाऱ्यांना सांगितले.
