बससेवा, वेळापत्रक, मार्ग आणि सुविधांबाबत नागरिकांच्या तक्रारी व सूचना स्वीकारल्या
पुणे : पुणे महानगर परिवहन महामंडळाच्या (पीएमपीएमएल) वतीने आयोजित करण्यात आलेल्या ‘प्रवासी दिना’ला नागरिकांचा उत्स्फूर्त प्रतिसाद मिळाला. मनपा भवन मुख्य बसस्थानक येथे पीएमपीएमएलचे संचालक अजय खेडेकर यांनी प्रवाशांशी थेट संवाद साधत त्यांच्या समस्या, सूचना आणि तक्रारी जाणून घेतल्या.
पीएमपीएमएलचे अध्यक्ष व व्यवस्थापकीय संचालक महेश आव्हाड यांच्या संकल्पनेतून प्रवाशांच्या समस्या थेट प्रशासनापर्यंत पोहोचाव्यात आणि त्यावर तातडीने कार्यवाही व्हावी, या उद्देशाने दर महिन्याच्या दुसऱ्या शुक्रवारी ‘प्रवासी दिन’ आयोजित करण्यात येत आहे.
याच उपक्रमांतर्गत मनपा भवन मुख्य बसस्थानक येथे सायंकाळी ५ ते ७.३० या वेळेत प्रवासी दिन घेण्यात आला. यावेळी संचालक अजय खेडेकर यांनी नागरिकांशी संवाद साधून त्यांच्या लेखी तक्रारी आणि अर्ज स्वीकारले.
प्रवाशांनी बससेवेची वारंवारता, वेळापत्रक, विविध मार्ग, बसथांब्यांची स्थिती, वाहतूक व्यवस्था आणि प्रवाशांसाठी उपलब्ध सुविधांबाबत समस्या व सूचना मांडल्या. प्राप्त झालेल्या तक्रारींवर आवश्यक कार्यवाही करण्याच्या सूचना संबंधित अधिकाऱ्यांना देण्यात आल्या.
यावेळी आगारप्रमुख मदगे, जनसंपर्क अधिकारी नागेश गायकवाड तसेच संबंधित विभागातील अधिकारी व कर्मचारी उपस्थित होते.
पीएमपीएमएलच्या सर्व आगारांमध्येही प्रवासी दिनाचे आयोजन करण्यात आले. विविध आगारांतील अधिकारी आणि कर्मचाऱ्यांनी प्रवाशांकडून सूचना, समस्या आणि लेखी तक्रारी स्वीकारल्या.
प्रवासी हा सार्वजनिक वाहतूक व्यवस्थेचा केंद्रबिंदू असून प्रवाशांना अधिक सुरक्षित, सुलभ, विश्वासार्ह आणि दर्जेदार सेवा उपलब्ध करून देण्यासाठी अशा उपक्रमांचे सातत्याने आयोजन करण्यात येणार असल्याचे पीएमपीएमएल प्रशासनाने स्पष्ट केले.
