अहिल्यानगर, नाशिक, पुणे शहर आणि पुणे जिल्ह्यातील 42 ज्युडोपटूंचा सहभाग
पुणे : सावित्रीबाई फुले पुणे विद्यापीठ आणि मराठवाडा मित्रमंडळाच्या कॉलेज ऑफ कॉमर्स, पुणे यांच्या संयुक्त विद्यमाने आयोजित आंतरविभागीय पुरुष ज्युडो स्पर्धा 2026-27 दिनांक 9 आणि 10 सप्टेंबर रोजी उत्साहपूर्ण वातावरणात पार पडली. या स्पर्धेत अहिल्यानगर, नाशिक, पुणे शहर आणि पुणे जिल्हा विभागातील खेळाडूंनी मोठ्या संख्येने सहभाग नोंदवत उत्कृष्ट कौशल्याचे प्रदर्शन केले.
स्पर्धेचे उद्घाटन सावित्रीबाई फुले पुणे विद्यापीठाचे क्रीडा संचालक डॉ. सुदाम शेळके यांच्या उपस्थितीत झाले. यावेळी मराठवाडा मित्रमंडळाच्या कॉलेज ऑफ कॉमर्सचे प्राचार्य डॉ. किशोर निकम, डॉ. गणेश पटारे, महाविद्यालयाचे शारीरिक शिक्षण व क्रीडा संचालक अमित गिरिगोसावी, विद्यापीठ प्रतिनिधी किशोर घडियार, दत्ता उतेकर तसेच निवड समिती सदस्य प्रा. ऋषिकेश वाघचौरे आणि योगेश धडावे उपस्थित होते.
स्पर्धेत विविध विभागांतील एकूण 42 ज्युडोपटूंनी सहभाग घेतला. खेळाडूंनी कौशल्य, शिस्त, चपळता आणि जिद्दीचे दर्शन घडवत रंगतदार सामने खेळले. खेळाडूंमधील स्पर्धात्मक भावना, क्रीडावृत्ती आणि आत्मविश्वासामुळे स्पर्धेला विशेष रंगत प्राप्त झाली.
स्पर्धेच्या यशस्वी आयोजनासाठी पुणे ज्युडो असोसिएशनचे मुख्य पंच सेन्सई अनिल सकपाळ आणि सेन्सई सुधीर कोंडे यांनी महत्त्वपूर्ण भूमिका बजावली. तसेच प्रा. दशरथ गवित, सहाय्यक प्रा. रेणुका तलवार, प्रा. रेखा कटारमल, प्रा. शिवानी माळी आणि सौ. मोनाली कबदुले यांनी आयोजनात योगदान दिले.
विद्यार्थ्यांमध्ये क्रीडा संस्कृती रुजविणे, त्यांच्या शारीरिक आणि मानसिक क्षमतांचा विकास करणे तसेच विद्यापीठ स्तरावरील गुणवंत खेळाडूंना व्यासपीठ उपलब्ध करून देणे हा या स्पर्धेचा प्रमुख उद्देश होता.
स्पर्धेच्या यशस्वी आयोजनाबद्दल सहभागी खेळाडू, पंच, अधिकारी, आयोजक आणि स्वयंसेवकांचे कौतुक करण्यात आले. या स्पर्धेमुळे महाविद्यालयाच्या क्रीडा क्षेत्रातील योगदानात आणखी एक मानाचा तुरा रोवला गेल्याची भावना आयोजकांनी व्यक्त केली.
