पुणे- कात्रज-कोंढवा रस्त्यावर झालेल्या अपघातात एका शाळकरी मुलीचा मृत्यू झाला. या घटनेचे पडसाद पुणे महापालिकेच्या सर्वसाधारण सभेत उमटले. काँग्रेस, राष्ट्रवादी काँग्रेस (अजित पवार गट), राष्ट्रवादी काँग्रेस (शरद पवार गट) आणि शिवसेना (उद्धव ठाकरे गट) या पक्षांच्या नगरसेवकांनी प्रशासनाविरोधात आक्रमक भूमिका घेतली आणि आंदोलन केले. त्यांनी ‘चिमुकलीला न्याय मिळालाच पाहिजे, दोषी प्रशासनावर कारवाई झालीच पाहिजे,’ अशी मागणी केली. तसेच, महापौर मंजुषा नागपुरे आणि आयुक्त नवल किशोर राम यांनी या प्रकरणाची जबाबदारी निश्चित करावी, अशी मागणीही करण्यात आली.विरोधी पक्षांनी एकत्र येऊन महापालिकेत आंदोलन करून अधिकाऱ्यांवर कारवाईची मागणी केली.महापौर मंजुषा नागपुरे यांनी आयुक्त नवल किशोर राम यांना प्रशासनाची जबाबदारी निश्चित करण्याचे निर्देश दिले. पण तीन तास चर्चा होऊनही ठोस आश्वासन व कारवाई झाली नाही. केवळ आयुक्तांनी हे ५० मीटरच्या रुंदीकरणाचे काम मार्च २०२७ पर्यंत पूर्ण केले जाईल असे आश्वासन दिले.
नगरसेवक अरविंद शिंदे यांनी कात्रज-कोंढवा रस्त्याचे रखडलेले काम आणि प्रशासनाच्या भूमिकेवरून तीव्र नाराजी व्यक्त केली. या रस्त्यावर आतापर्यंत 21 जणांचा बळी गेला आहे, तरीही महावितरणचे खांब अजूनही हटवले नाहीत, असे त्यांनी सांगितले. याच कारणामुळे दोन दिवसांपूर्वी शाळकरी मुलीचा मृत्यू झाल्याचा आरोपही त्यांनी केला. सुमारे 150 कोटी रुपये खर्च करूनही रस्त्याचे काम पूर्ण होत नसल्याबद्दल त्यांनी प्रशासनावर टीका केली.
शिंदे यांनी पुढे म्हटले की, 60 कोटी रुपये खर्च करूनही चौकाचौकात वाहतूक वॉर्डन उपलब्ध नाहीत. प्रशासन कधी जबाबदारी घेणार, असा प्रश्न त्यांनी विचारला. या रस्त्याच्या प्रश्नावर आतापर्यंत सात वेळा सर्वसाधारण सभेत चर्चा झाली आहे. तरीही परिस्थितीत कोणताही बदल झालेला नाही. त्यामुळे ‘आणखी किती वेळा चर्चा करायची आणि हा प्रश्न कधी सुटणार?’ असा संताप व्यक्त करत शिंदे यांनी प्रश्न विचारला. महापौर आणि आयुक्तांनी संबंधित अधिकाऱ्यांवर कारवाई करावी आणि त्यांची जबाबदारी निश्चित करावी, अशी मागणीही त्यांनी केली.
नगरसेवक बाबूराव चांदेरे यांनीही रस्त्याच्या रखडलेल्या कामावरून प्रशासनावर टीका केली. ते म्हणाले की, मी स्थायी समितीचा सभापती असताना हा रस्ता सार्वजनिक-खाजगी भागीदारी (पीपीपी) तत्त्वावर पूर्ण करण्यासाठी पुढाकार घेतला होता. त्यावेळी माझ्या या भूमिकेला विरोध झाला आणि माझ्यावर टीकाही झाली. मात्र, आज रस्ता अपूर्ण राहिल्याने नागरिकांचा जीव जात आहे, असे त्यांनी सांगितले.
नगरसेवक गफूरभाई पठाण यांनी कोंढवा परिसरातील डीपी रस्ते, पाणी आणि कचरा यांसारख्या विविध प्रलंबित प्रश्नांवर लक्ष वेधले. प्रशासनच राजकारण करत असल्याचा आरोप करत, हे प्रश्न नेमके कोणाकडे मांडायचे, असा प्रश्न त्यांनी विचारला.
बांधकाम विभागाचे प्रमुख अनिरुद्ध पावसकर यांनी प्रशासनाची बाजू मांडली. ते म्हणाले की, एफएसआय आणि टीडीआरच्या माध्यमातून रस्त्यासाठी आवश्यक जागा ताब्यात घेण्याचे प्रयत्न सुरू आहेत. सुमारे दहा जागामालक रोख स्वरूपात मोबदला मागत आहेत. त्यांचा प्रश्न येत्या दोन ते तीन आठवड्यांत सोडवण्याचा प्रयत्न आहे. त्यानंतर संपूर्ण रस्त्याचे काम सहा ते सात महिन्यांत पूर्ण करण्याचे नियोजन आहे, असेही त्यांनी सांगितले.
कात्रज-कोंढवा रस्त्यावर आतापर्यंत २१ जणांचे बळी गेले आहेत. रस्त्याचे भूसंपादन रखडले आहे, सर्वत्र खड्ड्यांचे साम्राज्य आहे, वाहतूक नियंत्रणासाठी वॉर्डन नाहीत, रस्त्यात आडवे येणारे महावितरणचे खांब काढले नाहीत, आत्तापर्यंत १५० कोटी रुपये खर्च करूनही रस्ता पूर्ण होत नाही, अशी टीका नगरसेवक अरविंद शिंदे यांनी केली.
मी स्थायी समितीचा अध्यक्ष असताना हा रस्ता पीपीपी तत्त्वावर करण्यासाठी पुढाकार घेतला होता. पण त्यावेळी विरोध झाल्याने या रस्त्यावर नागरिकांचे बळी जात आहेत, अशी टीका बाबूराव चांदेरे यांनी केली. गफूर पठाण यांनी कोंढवा परिसरातील विकास आराखड्यातील रस्ते विकसीत झाले नसल्याचा मुद्दा यावेळी मांडला. विरोधी पक्षाच्या इतर नगरसेवकांनी टीकेची झोड उठवलेली असताना सभागृह नेते गणेश बिडकर यांनी आरोप फेटाळून लावत त्यास प्रत्युत्तर दिले.
कात्रज-कोंढवा रस्ता भूसंपादन न झाल्याने रखडला आहे. पण शहराच्या सर्व भागात उड्डाणपूल, भुयारी मार्ग बांधले आहेत. काही ठिकाणी कामे सुरू होत आहेत. आम्ही ज्या कामांचे भूमिपूजन केले त्यांची उद्घाटनेही केली आहेत. गणेशखिंड रस्त्यावरील चुकलेला उड्डाणपूल पाडून पुन्हा बांधला. ही कामे आम्ही करत असलो तरी कात्रज कोंढवा रस्त्यावरील चुकीच्या कामाची जबाबदारी अधिकाऱ्यांवर निश्चित करा, पाठीशी घालू नका अशी मागणी बिडकर यांनी केली.
कात्रज-कोंढव्याची बातमी दिल्लीत वाचायचो – आयुक्त
आयुक्त नवल किशोर राम म्हणाले, कात्रज-कोंढवा रस्त्याच्या समस्येबाबत आपण दिल्लीमध्ये असतानाही बातम्या वाचल्या होत्या. आयुक्त म्हणून पुण्यात आल्यानंतर पहिल्याच आठवड्यात या रस्त्याची पाहणी केली. त्यामुळे हा रस्ता पूर्ण करण्यास प्राधान्य आहे. सध्या या रस्त्याची रुंदी अवघी १४ मीटर असून दररोज सुमारे दोन लाख वाहने या मार्गावरून जातात. त्यामुळे वाहतुकीचा वाढता ताण लक्षात घेऊन रस्ता ५० मीटर रुंद करण्याचे नियोजन करण्यात आले आहे. हा निर्णय कोणाला मान्य नसेल तर त्यांनी न्यायालयात जावे, असेही आयुक्तांनी स्पष्ट केले.सर्वसाधारण सभेत कात्रज कोंढवा रस्त्याची जबाबदारी प्रशासनाला घ्यावी लागेल, अधिकाऱ्यांवर कारवाई करा अशी आग्रही मागणी केली गेली. तसेच या रस्त्यावर मृत्युमुखी पडलेल्या नागरिकांना मदत करा अशी मागणी केली. पण यावर प्रशासनाकडून कोणताही खुलासा करण्यात आला नाही. त्यामुळे एवढी चर्चा करून काय उपयोग झाला असा प्रश्न नगरसेवक अमोल बालवडकर यांनी उपस्थित केला.
