सहकारनगर परिसरात युनिट-२ची कारवाई; सुमारे १.६१ लाखांचा मुद्देमाल जप्त
पुणे : पुणे शहर गुन्हे शाखेच्या युनिट-२ने सहकारनगर परिसरात कारवाई करत पाच जणांना ताब्यात घेऊन त्यांच्याकडून चार पिस्तुले आणि सहा जिवंत काडतुसे जप्त केली आहेत. जप्त करण्यात आलेल्या शस्त्रसाठ्याची किंमत सुमारे १ लाख ६१ हजार २०० रुपये असल्याची माहिती पोलिसांनी दिली.
पोलिसांनी दिलेल्या माहितीनुसार, १३ ऑगस्ट रोजी गुन्हे शाखा युनिट-२चे अधिकारी व कर्मचारी प्रतिबंधात्मक गस्त घालत असताना पोलीस अंमलदार शिवानंद कायगुडे आणि उज्ज्वल मोकाशी यांना गोपनीय बातमीदारामार्फत सहकारनगर परिसरातील वनशिव वस्ती येथे काही संशयितांकडे अग्निशस्त्रे असल्याची माहिती मिळाली. त्यानंतर वरिष्ठ पोलीस निरीक्षक राहुल खिलारे यांच्या सूचनेनुसार पथकाने संबंधित ठिकाणी कारवाई केली.
या कारवाईत सुफियान बशीर शेख (वय २२), निलेश प्रभुलिंग कुंभार (वय २१), तुकाराम बाबासाहेब गवते (वय १९), ऋषभ ऊर्फ ऋषी शिवाजी भगत (वय २३) आणि अमित राजाराम पिलावरे (वय २५) यांना ताब्यात घेण्यात आले. त्यांच्या ताब्यातून चार पिस्तुले व सहा जिवंत काडतुसे जप्त करण्यात आली.
याप्रकरणी सहकारनगर पोलीस ठाण्यात गुन्हा क्रमांक २८८/२०२६ नोंदविण्यात आला असून, शस्त्र अधिनियम व महाराष्ट्र पोलीस अधिनियमातील संबंधित कलमांनुसार पुढील कारवाई सुरू आहे.
ही कारवाई अपर पोलीस आयुक्त (गुन्हे) तेजस्वी सातपुते, पोलीस उपायुक्त (गुन्हे) गौहर हसन आणि सहायक पोलीस आयुक्त राजेंद्र मुळीक यांच्या मार्गदर्शनाखाली वरिष्ठ पोलीस निरीक्षक राहुल खिलारे, पोलीस निरीक्षक अविनाश माने यांच्या सूचनेनुसार पोलीस उपनिरीक्षक ज्ञानेश्वर दळवी, महिला पोलीस उपनिरीक्षक तेजश्री पवार, तसेच शिवानंद कायगुडे, उज्ज्वल मोकाशी, शंकर नेवसे, कुंदन शिंदे, नागनाथ राख, विनोद चव्हाण, संदीप शिर्के, साधना ताम्हाणे, विद्या शिंदे, ओंकार कुंभार, आशिष यादव, शंकर कुंभार, विजय पवार आणि विनायक वगारे यांच्या पथकाने केली.
