नागपूर, 6 ऑगस्ट 2026
इंडियन इन्स्टिट्यूट ऑफ मास कम्युनिकेशन म्हणजेच आयआयएमसी, अमरावती कॅम्पस, शैक्षणिक वर्ष 2026-27 साठी इंग्रजी आणि मराठी पत्रकारिता पदव्युत्तर पदविका अभ्यासक्रमांमधील रिक्त जागांसाठी 13 ऑगस्ट 2026 रोजी सकाळी 10:00 वाजल्यापासून स्पॉट ॲडमिशन म्हणजे थेट प्रवेश प्रक्रिया राबवणार आहे. जागांची उपलब्धता आणि विहित आरक्षण धोरणाच्या अधीन राहून गुणवत्तेच्या आधारावर प्रवेश दिले जातील.
‘मास कम्युनिकेशन अँड जर्नलिझम’ (सीओक्यूपी17) या विषयांतर्गत सीयुईटी (पीजी) 2026 परीक्षेत गुणवत्ता यादीत स्थान मिळवलेल्या उमेदवारांचा त्यांच्या गुणवत्ता क्रमांकांनुसार प्रवेशासाठी विचार केला जाईल.
जे पात्र उमेदवार सीयुईटी (पीजी) 2026 परीक्षेला बसू शकले नाहीत, परंतु ज्यांनी कोणत्याही शाखेतील पदवी परीक्षेत किमान 50 टक्के गुण मिळवले आहेत,ते देखील या थेट प्रवेश प्रक्रियेत सहभागी होऊ शकतात. अशा उमेदवारांना 13 ऑगस्ट रोजी लेखी प्रवेश परीक्षा द्यावी लागेल. लेखी परीक्षेत उत्तीर्ण होणाऱ्या उमेदवारांना गुणवत्ता आणि लागू असलेल्या आरक्षण नियमांच्या आधारे प्रवेश दिला जाईल.
प्रवेशासाठी कमाल वयोमर्यादा खुल्या प्रवर्गातील उमेदवारांसाठी 25 वर्षे, इतर मागासवर्ग अर्थात ओबीसी उमेदवारांसाठी 28 वर्षे आणि अनुसूचित जाती जमाती अर्थात एससी/एसटी व दिव्यांग उमेदवारांसाठी 30 वर्षे इतकी आहे.
इच्छुक उमेदवारांनी 13 ऑगस्ट 2026 रोजी सकाळी 10:00 वाजता सर्व मूळ शैक्षणिक प्रमाणपत्रे, स्व-साक्षांकित छायाप्रती, पासपोर्ट-आकाराचे फोटो आणि इतर आवश्यक कागदपत्रांसह आयआयएमसी अमरावती कॅम्पस येथे उपस्थित राहावे.
प्रवेश प्रक्रियेबाबत अधिक माहितीसाठी, उमेदवार आयआयएमसी अमरावती कार्यालयाशी संपर्क साधू शकतात. प्रवेशाशी संबंधित चौकशीसाठी डॉ. राजेश सिंग कुशवाह (9415862377), डॉ. विनोद निताळे (9860046706), रोहन तायडे (8275734035) किंवा कार्यालयाशी (0721-2668180) संपर्क साधता येईल.
