पुणे महापालिकेच्या स्थायी समितीसमोर ठराव; बेकायदेशीर राडारोड्याविरोधात विशेष मोहीम राबविण्याची मागणी
पुणे, दि. ५ ऑगस्ट — माय मराठी प्रतिनिधी
शहरातील सार्वजनिक जागा आणि रस्त्यांवर बेकायदेशीरपणे बांधकामाचा राडारोडा टाकणाऱ्या वाहनमालकांवर किमान १० हजार रुपयांची दंडात्मक कारवाई करावी, तसेच पुराव्यासह संबंधित वाहन पकडून देणाऱ्या नागरिकाला प्रति वाहन पाच हजार रुपयांचे बक्षीस द्यावे, असा ठराव पुणे महानगरपालिकेच्या स्थायी समितीसमोर मांडण्यात आला आहे.
पुणे शहराचा भौगोलिक विस्तार मोठ्या प्रमाणावर झाला असला, तरी घनकचरा आणि बांधकाम राडारोडा व्यवस्थापनामध्ये शहर मागे पडत असल्याचे या ठरावात म्हटले आहे. प्रशासकीय दुर्लक्ष आणि अशास्त्रीय पद्धतीने होणाऱ्या राडारोडा व्यवस्थापनामुळे शहरातील अनेक रस्ते, मोकळ्या जागा आणि सार्वजनिक ठिकाणी रात्रीच्या वेळी बेकायदेशीरपणे राडारोडा टाकला जात असल्याचेही नमूद करण्यात आले आहे.
रस्त्याच्या कडेला किंवा सार्वजनिक जागांवर टाकण्यात येणाऱ्या राडारोड्यामुळे वाहतुकीला अडथळा निर्माण होतो. शहराच्या स्वच्छतेवर परिणाम होण्याबरोबरच पुण्याच्या प्रतिमेलाही धक्का बसत असल्याचा दावा प्रस्तावात करण्यात आला आहे. त्यामुळे महापालिका प्रशासनाने अशा वाहनांविरोधात विशेष अभियान राबवून कठोर कारवाई करावी, अशी मागणी करण्यात आली आहे.
बेकायदेशीरपणे राडारोडा टाकणाऱ्या वाहनमालकावर किमान १० हजार रुपयांचा दंड आकारावा. महापालिकेच्या आरोग्य विभागाला वाहन क्रमांक, छायाचित्रे किंवा व्हिडिओसारख्या पुराव्यांसह माहिती देणाऱ्या नागरिकास प्रति वाहन पाच हजार रुपयांचे बक्षीस देण्यात यावे, असे ठरावात सुचविण्यात आले आहे.
या योजनेसाठी महापालिका आयुक्तांनी तातडीने आवश्यक निधी उपलब्ध करून द्यावा. नागरिकांचा सहभाग वाढल्यास सार्वजनिक ठिकाणांवरील राडारोड्याचे प्रमाण कमी होऊन शहर स्वच्छ ठेवण्यास मदत होईल, असेही प्रस्तावात म्हटले आहे.
हा प्रस्ताव सूरज नथुराम लोखंडे यांनी मांडला असून, हिमाली संतोष डोख आणि गौरव गणेश घुले यांनी त्याला अनुमोदन दिले आहे.
