कर्जात घट, यशस्वी विभाजन आणि विक्रमी नफ्याच्या जोरावर वेदांता लिमिटेडसह ॲल्युमिनियम, ऑइल अँड गॅस कंपन्यांना क्रेडिट रेटिंगमध्ये बढती
मुंबई: क्रिसिल रेटिंग्जने वेदांता समूहासाठी मोठा विश्वासदर्शक निर्णय घेत वेदांता लिमिटेड, वेदांता ॲल्युमिनियम आणि वेदांता ऑइल अँड गॅस या कंपन्यांचे दीर्घकालीन क्रेडिट रेटिंग AA+/Stable पर्यंत वाढवले आहे. तसेच या कंपन्यांना ‘रेटिंग वॉच विथ डेव्हलपिंग इम्प्लिकेशन्स’ यादीतूनही वगळण्यात आले आहे. वेदांता पॉवरच्या गॅरंटीड बँक सुविधांचे रेटिंगही AA+(CE) पर्यंत सुधारण्यात आले असून, वेदांता लिमिटेडला २०१४ नंतरचे सर्वोच्च क्रेडिट रेटिंग मिळाले आहे.
क्रिसिलच्या अहवालानुसार, वेदांता समूहाने अलीकडेच केलेले यशस्वी कॉर्पोरेट विभाजन, सातत्याने कमी होत असलेले कर्ज आणि विविध व्यवसायांतील विक्रमी आर्थिक कामगिरी यामुळे हा सकारात्मक निर्णय घेण्यात आला आहे.
वेदांता लिमिटेडच्या बाबतीत हिंदुस्तान झिंकमधील ६१ टक्के भागभांडवल, झिंक, शिसे आणि चांदीच्या उत्पादनातील नेतृत्व तसेच तांबे, निकेल आणि इतर महत्त्वाच्या खनिज क्षेत्रातील उपस्थिती ही कंपनीची मोठी ताकद असल्याचे क्रिसिलने नमूद केले आहे. ३१ मार्च २०२६ पर्यंत कंपनीचे नेट लिव्हरेज ०.७ पटांवर आले असून, भविष्यातही ते १ पटाच्या खाली राहण्याची शक्यता व्यक्त करण्यात आली आहे.
वेदांता ॲल्युमिनियमबाबत क्रिसिलने कंपनीला देशातील सर्वात मोठी आणि चीन वगळता जगातील तिसरी सर्वात मोठी ॲल्युमिनियम उत्पादक कंपनी म्हटले आहे. आर्थिक वर्ष २०२६ मध्ये कंपनीने २५,२०८ कोटी रुपयांचा EBITDA नोंदवत विक्रमी नफा कमावला असून, तो मागील वर्षाच्या तुलनेत ४३ टक्क्यांनी अधिक आहे.
वेदांता ऑइल अँड गॅसनेही आर्थिक वर्ष २०२६ मध्ये सुमारे ४,३५० कोटी रुपयांचा EBITDA नोंदवला असून, विभाजनानंतर कंपनी नेट कॅश स्थितीत पोहोचली आहे. त्यामुळे ही कंपनी समूहातील सर्वात मजबूत आर्थिक स्थिती असलेल्या कंपन्यांपैकी एक ठरल्याचे क्रिसिलने स्पष्ट केले आहे.
दरम्यान, वेदांता पॉवरच्या रेटिंगमध्येही सुधारणा करण्यात आली आहे. कंपनीच्या मजबूत दीर्घकालीन वीज खरेदी करारांमुळे (PPA), इंधन सुरक्षेच्या व्यवस्थेमुळे आणि तलवंडी साबो प्रकल्पाच्या सातत्यपूर्ण कार्यक्षमतेमुळे हे रेटिंग वाढविण्यात आल्याचे क्रिसिलने नमूद केले आहे.
क्रिसिलने संपूर्ण वेदांता समूहाबाबतही सकारात्मक भूमिका घेत झिंक, चांदी, शिसे, ॲल्युमिनियम, तांबे आणि निकेल या विविध धातूंच्या व्यवसायातील मजबूत उपस्थिती, कमी उत्पादन खर्च आणि मोठ्या प्रमाणातील उत्पादन क्षमता यामुळे समूहाची आर्थिक लवचिकता अधिक बळकट झाल्याचे म्हटले आहे. तसेच, विभाजनानंतर वेदांता रिसोर्सेसच्या गुंतवणुकीचे बाजारमूल्य ३० जून २०२६ पर्यंतच्या निव्वळ कर्जाच्या ५.६ पट असल्याचेही अहवालात नमूद करण्यात आले आहे.
