पुणे-लोकमान्य टिळक स्मारक ट्रस्टच्या वतीने देण्यात येणारा लोकमान्य टिळक राष्ट्रीय पुरस्कार या वर्षी पंतप्रधान नरेंद्र मोदी यांना जाहीर झाला आहे. टिळक स्मारक ट्रस्टचे विश्वस्त डॉ. रोहित टिळक यांनी यासंबंधी घोषणा केली. एक लाख रुपये स्मृतीचिन्ह आणि मानपत्र असे टिळक पुरस्काराचे स्वरूप आहे. एक ऑगस्ट रोजी पुण्यामध्ये टिळक महाराष्ट्र विद्यापीठाच्या प्रांगणात पुरस्कार वितरण समारंभ होणार आहे. डॉ. दीपक टिळक यांच्या हस्ते पुरस्कार वितरण समारंभ होणार आहे. राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार तसेच ट्रस्टचे विश्वस्त आणि कॉंग्रेसचे नेते सुशीलकुमार शिंदे यावेळी उपस्थित राहणार आहेत.
ट्रस्टचे विश्वस्त रोहित टिळक म्हणाले की, मंगळवारी दिनांक 1 ऑगस्ट रोजी लोकमान्य टिळक यांची 103 वी पुण्यतिथी आहे. या निमित्त पुण्यात टिळक महाराष्ट्र विद्यापीठाच्या प्रांगणात होणाऱ्या सोहळ्यात मोदी यांना या पुरस्काराने गौरविले जाणार आहे. दीपक टिळक यांच्या हस्ते हा पुरस्कार मोदींना दिला जाणार आहे. पुरस्काराचे यंदाचे 41 वे वर्ष आहे.पंतप्रधान मोदी यांच्या नेतृत्वाखाली आत्मनिर्भर भारत या संकल्पनेअंतर्गत देशाने प्रगतीची नवी शिखरे सर केली आहेत. देशवासीयांमध्ये त्यांनी राष्ट्रप्रेमाची भावना जागृत करुन देशाला जागितक पटलावर महत्त्वाचे स्थान मिळवून दिले आहे. या कार्यासाठी ट्रस्टच्या विश्वस्तांनी मोदींच्या नावाची या पुरस्कारासाठी एकमताने निवड केली आहे. या सोहळ्यासाठी प्रमुख पाहुणे म्हणून ज्येष्ठ नेते शरद पवार यांना निमंत्रित करण्यात आल्याचे रोहित टिळक यांनी पत्रकारपरिषदेत सांगितले.
पंतप्रधान नरेंद्र मोदी यांनी नुकताच एका जाहीर सभेत कॉंग्रेससह राष्ट्रवादी कॉंग्रेसवर जोरदार हल्ला चढवत घोटाळ्याचा आरोप केला होता. त्यानंतर काही दिवसातच राष्ट्रवादीत फूट पडून अजित पवार यांच्यासह 40 आमदारांनी शिंदे-फडणवीस सरकारमध्ये सहभागी होण्याचा निर्णय घेतला. दरम्यान, त्यानंतर शरद पवार यांनी येवला, सातारा जिल्ह्यात सभा घेऊन या फूटीमागे नरेंद्र मोदी यांचाच हात असल्याचा घणाघात केला होता. एकीकडे दोन्ही नेत्यांमध्ये आरोप-प्रत्यारोप सुरू असताना दुसरीकडे दोन्ही नेते एका व्यासपिठावर एकत्र येत असल्याने राजकीय वर्तुळात चांगलीच चर्चा रंगली आहे.
