पुणे : ‘गुरुंच्या नावाने शिष्येला पुरस्कार मिळणे, हा अतिशय आनंदाचा क्षण आहे. हा पुरस्कार म्हणजे गुरू श्रीकांत ठाकरे यांचा आशीर्वाद आहे. मी नम्रतापूर्वक हा प्रसाद स्वीकारते, असे भावपूर्ण मनोगत ज्येष्ठ पार्श्वगायिका उत्तरा केळकर यांनी मंगळवारी येथे व्यक्त केले.
‘संवाद, पुणे’ आणि महाराष्ट्र नवनिर्माण सेना आयोजित विशेष कार्यक्रमात ज्येष्ठ संगीतकार श्रीकांत ठाकरे यांच्या स्मृती दिनानिमित्त केळकर यांना ‘श्रीकांत ठाकरे संगीत’ पुरस्कार समारंभपूर्वक प्रदान करण्यात आला. मानपत्र, शाल, श्रीफळ आणि महावस्त्र असे या पुरस्काराचे स्वरूप आहे. यशवंतराव चव्हाण नाट्यगृह येथे संपन्न झालेल्या या कार्यक्रमात ज्येष्ठ गायक आनंद माडगूळकर यांच्या हस्ते हा पुरस्कार देण्यात आला. कार्यक्रमाची संकल्पना सुनील महाजन यांची होती तर सूत्रधार निकिता मोघे होत्या.
याप्रसंगी ‘संवाद, पुणे ‘चे सुनील महाजन, निकिता मोघे, मनसेचे नेते अनिल शिदोरे, हेमंत संभूस, चित्रपट अभ्यासक दिलीप ठाकूर, योगेश राजापूरकर आदी व्यासपीठावर उपस्थित होते.
श्रीकांत ठाकरे यांच्या आठवणींना उजाळा देत उत्तराताई म्हणाल्या, ‘मी त्यांच्याकडे अनेक वर्षे शिकले. त्यांनी सर्व संगीत प्रकल्पांमध्ये मला गाण्याची संधी दिली. अतिशय मनापासून गझल, ठुमर्या शिकवल्या. कोणतीही तडजोड न करता, त्यांनी मनाला पटेल तेच काम केले,’.
माडगूळकर यांनीही आठवणींना उजाळा दिला. ‘लाखाची गोष्ट ‘चित्रपटाची सुंदर अर्कचित्रे ठाकरे यांनी तेव्हा ‘मार्मिक’ मध्ये केली होती. श्रीकांत ठाकरे यांनी स्वत:चा वेगळा बाज जपून, निष्ठेने काम केले. ‘लोकप्रिय’ वाटांनी ते कधीच गेले नाहीत. त्यामुळे ते मुख्य प्रवाहापासून दूर राहिले, असे माडगूळकर म्हणाले.
अनिल शिदोरे यांनी ‘श्रीकांत ठाकरे यांच्या स्मृतिप्रीत्यर्थ दरवर्षी उपक्रम करावा आणि त्यांच्या जन्मशताब्दी वर्षानिमित्त २०३० मध्ये श्रीकांत ठाकरे यांचे बहुढंगी व्यक्तिमत्त्व उलगडणारा मोठा समारंभ करण्याचे आवाहन केले.
सुनील महाजन यांनी प्रास्ताविकात ‘स्वरराज’ या कार्यक्रमाचा हेतू स्पष्ट केला. निकिता मोघे यांनी आभार मानले.
कार्यक्रमाच्या उत्तरार्धात कै. श्रीकांत ठाकरे यांनी संगीत दिलेल्या गाण्यांवर आधारित ‘स्वरराज’ हा विशेष गाण्यांचा कार्यक्रम सादर करण्यात आला. त्यामध्ये गप्पागोष्टी आणि आठवणींना उजाळा देखील देण्यात आला.
‘स्वरराज’ या कार्यक्रमात रश्मी मोघे, धनश्री गणात्रा, अजित विसपुते आणि सारंग कुलकर्णी यांनी गीते सादर केली. त्यांना अमृता ठाकूरदेसाई, केदार परांजपे, नितीन शिंदे, अपूर्व द्रवीड, अभय इंगळे यांनी साथसंगत केली. ज्येष्ठ पत्रकार दिलीप ठाकूर यांचा विशेष सहभाग या कार्यक्रमात होता. स्नेहल दामले यांनी सूत्रसंचालन केले.
——–
फोटो ओळ : ‘संवाद, पुणे’ आणि महाराष्ट्र नवनिर्माण सेना यांच्या संयुक्त विद्यमाने आयोजित ज्येष्ठ संगीतकार श्रीकांत ठाकरे यांच्या स्मृतिनिमित्त आयोजित ‘स्वरराज’ या विशेष कार्यक्रमात ज्येष्ठ पार्श्वगायिका उत्तरा केळकर यांना श्रीकांत ठाकरे संगीत पुरस्कार आनंद माडगूळकर यांच्या हस्ते प्रदान करण्यात आला. यावेळी सुनील महाजन, आनंद माडगूळकर, अनिल शिदोरे, हेमंत संभूस, दिलीप ठाकूर आदी उपस्थित होते.