नागपूर येथे शक्ती आणि सेवेचा संगम; भारतदुर्गा मंदिर व अत्याधुनिक रुग्णालयाचे भूमिपूजन

नागपूर -रा. स्व. संघाचे सरसंघचालक डॉ. मोहन भागवत यांच्या हस्ते आणि मुख्यमंत्री देवेंद्र फडणवीस व केंद्रीय मंत्री नितीन गडकरी यांच्या उपस्थितीत काल नागपूर येथे डॉ. आबाजी थत्ते सेवा आणि संशोधन संस्थेच्या मध्य भारतातील अत्याधुनिक मल्टीस्पेशालिटी आणि सुपर स्पेशलिटी 461 बेडचे रुग्णालय ‘नॅशनल हेल्थ केअर इन्स्टिट्यूटचे’ भूमिपूजन व कोनशिला अनावरण करण्यात आले. तसेच डॉ. आबाजी थत्ते सेवा व संशोधन संस्थेद्वारे संचालित भारतदुर्गा मंदिराचे भूमिपूजन व कोनशिला अनावरण करण्यात आले. यावेळी आयोजित धर्मसभा येथे मुख्यमंत्री फडणवीस यांनी उपस्थितांना संबोधित केले. मुख्यमंत्री देवेंद्र फडणवीस यावेळी म्हणाले, भारतदुर्गा मंदिराच्या भूमिपूजनाला संतांचा आशीर्वाद लाभला आहे. देशातील सर्वार्थाने सुंदर आणि शक्तिशाली मंदिर उभे राहील, तसेच देशातील सर्वोत्तम रुग्णालयांपैकी एक रुग्णालय येथे उभारले जात आहे. ‘नॅशनल हेल्थ केअर इन्स्टिट्यूट’चा मुख्य उद्देश गरिबांपर्यंत दर्जेदार उपचार आणि आरोग्यसेवा पोहोचवणे हा आहे. त्याच हेतूने या संस्थेची स्थापना करण्यात आली आहे. याच अंतर्गत ४६१ खाटांचे मल्टीस्पेशालिटी आणि सुपर स्पेशालिटी रुग्णालय उभारण्यात येत आहे. हे इन्स्टिट्यूट दर्जाच्या बाबतीत कॉर्पोरेट रुग्णालयांच्या तोडीस तोड असेल, असेही मुख्यमंत्री फडणवीस यांनी सांगितले. यावेळी मंत्री चंद्रशेखर बावनकुळे, राज्यमंत्री ॲड. आशिष जयस्वाल, नागपूरच्या महापौर निता ठाकरे, श्री कार्ष्णि पीठाधीश्वर पूज्य श्री गुरु शरणानंदजी महाराज, जुनापीठाधिश्वर आचार्य महामंडलेश्वर पूज्य स्वामी अवधेशानंद गिरीजी महाराज, श्रीराम जन्मभूमी तीर्थक्षेत्र ट्रस्टचे कोषाध्यक्ष पूज्य स्वामी गोविंददेव गिरीजी महाराज, पूज्य स्वामी मित्रानंदजी महाराज, पद्मभूषण दीदी माँ पूज्य साध्वी ऋतंभराजी, बागेश्वर धाम सरकार चे पीठाधीश्वर पूज्य पं. धीरेन्द्र शास्त्रीजी, एनसीआयचे अध्यक्ष ॲड. सुनील मनोहर, एनसीआयचे सीईओ शैलेश जोगळेकर व इतर मान्यवर उपस्थित होते.