पीएमआरडीए व पुणे महापालिकेला संयुक्तपणे कार्यवाही करण्याचे आदेश

मुंबई, दि. ४ :  कात्रज-येरवडा ट्वीन टनेलच्या कामासाठी स्वतंत्र विशेष उद्देश वहन संस्था निर्माण करावी. त्यासाठी पुणे महापालिकेने पुढाकार घ्यावा. तसेच पीएमआरडीए व पुणे महापालिकेने संयुक्तपणे कार्यवाही करावी. तसेच पुणे महापालिकेमध्ये गेलेल्या २३ गावांचा विकास आराखडा तयार करावा. तत्पूर्वी तेथे प्रथम संरचनात्मक आराखडा तयार करावा, असे आदेश इथे मुख्यमंत्री देवेंद्र फडणवीस यांनी दिलेपुणे महानगर विकास प्रदेश प्राधिकरणाने संरचनात्मक (स्ट्रक्चरल) आराखडा तयार करताना प्रत्यक्ष जागेवर जाऊन पाहणी करावी. तसेच येत्या सहा महिन्यात हा आराखडा तयार करावा, असे निर्देश मुख्यमंत्री देवेंद्र फडणवीस यांनी दिले. तसेच पीएमआरडीएच्या २०२६–२०२७ च्या ४,६२८ कोटींच्या अर्थसंकल्पास मान्यता देण्यात आली.

मुख्यमंत्री देवेंद्र फडणवीस यांच्या अध्यक्षतेखाली पुणे महानगर प्रदेश विकास प्राधिकरणाची १४ वी वार्षिक सर्वसाधारण सभा सह्याद्री अतिथीगृहात झाली. यावेळी उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, राज्यमंत्री माधुरी मिसाळ, पुण्याच्या महापौर मंजुषा नागपुरे, पिंपरी चिंचवड महापालिकेचे महापौर रवि लांडगे आदी उपस्थित होते. पीएमआरडीएचे महानगर आयुक्त तथा मुख्य कार्यकारी अधिकारी डॉ. अभिजीत चौधरी यांनी सादरीकरणाद्वारे माहिती दिली.

‘पीएमआरडीए‘च्या ४,६२८ कोटींच्या अर्थसंकल्पास प्राधिकरण सभेची मान्यता

पुणे महानगर प्रदेश विकास प्राधिकरणाच्या (पीएमआरडीए) १४ व्या वार्षिक सभेत २०२६–२०२७ चा ₹४,६२८.८५ कोटींचा अर्थसंकल्प सादर करण्यात आला व त्यास मंजुरी देण्यात आली. नागरिकांना वेळेत आणि जलद गतीने सेवा देता यावी यासाठी जमीन विल्हेवाटीच्या दैनंदिन कामकाजाचे अधिकार थेट महानगर आयुक्तांना देण्याचा महत्त्वपूर्ण निर्णय या बैठकीत मंजूर करण्यात आला.

या अर्थसंकल्पात ₹२,९१८.८१ कोटी इतका सर्वाधिक निधी अभियांत्रिकी विभाग (१ व २) साठी पायाभूत सुविधा आणि विकासकामांसाठी  मंजूर करण्यात आला आहे. यामुळे पुणे महानगर क्षेत्रातील रिंग रोड, मेट्रो प्रकल्प, रस्ते विकास, कात्रज–येरवडा ट्विन टनेल, लोणावळा स्कायवॉक या कामांना गती मिळणार आहे. तसेच जमीन व मालमत्ता विभागासाठी ₹९७०.७६ कोटींचा भांडवली खर्च नियोजित करण्यात आला आहे. यंदाचा अर्थसंकल्प ₹३.५५ कोटींच्या शिलकीचा आहे.

‘पीएमआरडीए’चे २०२५–२६ चे सुधारित व २०२६–२७ चे मूळ अंदाजपत्रक या सभेत मांडण्यात आले. २०२६–२७ साठी प्राधिकरणाची एकूण महसुली व भांडवली जमा ₹४,६२८.८५ कोटी अपेक्षित आहे. याच्या तुलनेत एकूण खर्च ₹४,६२५.३० कोटी असून, अर्थसंकल्प ₹३.५५ कोटी शिलकीचा आहे. प्राधिकरणाच्या अग्निशमन निधीसाठी स्वतंत्र तरतूद करण्यात आली असून, २०२६–२७ मध्ये या निधीत ₹१००.०५ कोटी जमा होण्याचा अंदाज आहे. त्यापैकी ₹७१.०४ कोटी खर्च अपेक्षित असून ₹२९.०१ कोटी शिल्लक राहतील. प्राधिकरणाला सर्वाधिक महसूल जमीन व मालमत्ता विभागाकडून ₹१,६४७.६५ कोटी आणि विकास परवानगी विभागाकडून ₹८०५.४५ कोटी मिळण्याची अपेक्षा आहे.

पिंपरी-चिंचवड नवनगर विकास प्राधिकरणाचे (पीसीएनटीडीए) ११ जून २०२१ रोजी पीएमआरडीएमध्ये विलीनीकरण झाले होते. त्यानंतर मोकळे भूखंड, व्यापारी इमारती आणि निवासी मालमत्तांचे दायित्व पीएमआरडीएकडे आले. महाराष्ट्र लोकसेवा हक्क अधिनियम २०१५ अंतर्गत नागरिकांना विहित मुदतीत सेवा देणे आवश्यक असल्याने जमीन व मालमत्ता विभागाच्या प्रक्रियेत सुलभता आणणे गरजेचे होते. यापूर्वी नागरी सेवा प्रदान करण्याचे अंतिम अधिकार ‘विकास प्राधिकरण’ स्तरावर होते. मात्र, ‘जमीन विल्हेवाट विनियम, २०२३’ मधील नियम क्र. २७ अन्वये अनेक अधिकार थेट महानगर आयुक्तांना देण्याचा प्रस्ताव मंजूर करण्यात आला. यामुळे भूखंड व गृहयोजनांचे वाटप, मालमत्तांचे हस्तांतरण, सबलीज मंजुरी, वारस नोंद, ना हरकत दाखला (एनओसी) देणे, मोकळ्या जागा तात्पुरत्या भाडेतत्त्वावर देणे, भाडेपट्ट्यानंतर ताबा देणे, फेरमोजणी करणे आदी कामे जलद गतीने होणार आहेत. तसेच ११/०६/२०२१ पासून आतापर्यंत वापरलेल्या अधिकारांना पूर्वलक्षी मान्यता देण्याचा निर्णयही घेण्यात आला आहे.

अर्थसंकल्पाचा तपशील:

‘पीएमआरडीए’च्या २०२६–२०२७ च्या अर्थसंकल्पात एकूण अपेक्षित जमा ₹४,६२८.८५ कोटी असून, एकूण खर्च ₹४,६२५.३० कोटी आहे. त्यामुळे ₹३.५५ कोटींचे शिलकी अंदाजपत्रक सादर करण्यात आले आहे.

• महसुली जमा ₹४,४२८.३५ कोटी असून, त्यात जमीन व मालमत्ता विभागाकडून ₹१,६४७.६५ कोटी व विकास परवानगी विभागाकडून ₹८०५.४५ कोटी अपेक्षित आहेत. लेखा व वित्त विभागाकडून ₹३६०.०३ कोटी आणि इतर स्रोतांतून ₹१,६१५.२२ कोटी जमा अपेक्षित आहे.
• भांडवली जमा ₹२००.५० कोटी असून, लोणावळा स्कायवॉक प्रकल्पासाठी जिल्हा नियोजन समितीकडून ₹१०० कोटी व केंद्र शासनाकडून ₹१०० कोटी अपेक्षित आहेत. तसेच प्रधानमंत्री आवास योजनेतून ₹५० लाख मिळण्याचा अंदाज आहे.
• खर्चाच्या बाजूस, भांडवली खर्चाला प्राधान्य देण्यात आले असून तो ₹३,८९४.६७ कोटी आहे. अभियांत्रिकी विभागासाठी ₹२,९१८.८१ कोटी, जमीन व मालमत्ता विभागासाठी ₹९७०.७६ कोटी आणि इतर विभागांसाठी ₹५.१० कोटींची तरतूद आहे.
• महसुली खर्च ₹७३०.६३ कोटी असून, त्यात आस्थापना खर्च ₹४२.१६ कोटी, कंत्राटी मानधन ₹२५.८७ कोटी, प्रशासकीय खर्च ₹२२.९५ कोटी, इतर विभागांचा खर्च ₹४३९.६५ कोटी आणि इतर संस्थांना निधी वर्ग ₹२०० कोटी आहे.
• अग्निशमन दलासाठी ₹१००.०५ कोटी जमा अपेक्षित असून, त्यापैकी ₹६२ कोटी भांडवली व ₹९.०४ कोटी महसुली खर्चासाठी नियोजित आहेत. शिल्लक ₹२९.०१ कोटी राहतील.

नगरविकास विभागाचे अपर मुख्य सचिव असीमकुमार गुप्ता, मुख्यमंत्री यांचे अपर मुख्य सचिव लोकेश चंद्रा, मुख्यमंत्री कार्यालयाचे प्रधान सचिव श्रीकर परदेशी, पुण्याचे जिल्हाधिकारी जितेंद्र डुडी, पिंपरी चिंचवड महापालिका आयुक्त डॉ. विजय सूर्यवंशी,  पीएमआरडीएचे महानगर आयुक्त तथा मुख्य कार्यकारी अधिकारी डॉ. अभिजीत चौधरी, अतिरिक्त महानगर आयुक्त के. मंजुलक्ष्मी, वित्तीय नियंत्रक जितेंद्र कोळंबे, सहआयुक्त (जमीन व मालमत्ता) पूनम मेहता, संचालक (विकास परवानगी) अविनाश पाटील, मुख्य अभियंता शिवप्रसाद बागडी, तसेच दोन्ही महापालिकाच्या स्थायी समिती अध्यक्ष आदि उपस्थित होते.

नवी दिल्ली, 4 मे 2026

केंद्रीय रस्ते वाहतूक आणि महामार्ग मंत्री नितीन गडकरी यांनी आज महाराष्ट्रातील प्रस्तावित अतिवेगवान आणि सर्वाधिक वर्दळीच्या मार्गिका आणि इतर महत्त्वाच्या राष्ट्रीय महामार्ग मार्गिकांचा आढावा घेतला.

नवी दिल्ली येथे झालेल्या या आढावा बैठकीत केंद्रीय मंत्री  नितीन गडकरी यांनी अनेक प्रमुख महामार्ग विकास प्रकल्पांवर चर्चा केली. यामध्ये नागपूर-भंडारा विभागाचे सहा पदरीकरण, तळोदा-बुऱ्हाणपूर विभागाचे चौपदरीकरण, दुर्ग-गडचिरोली-मंचेरियाल मार्गिका, गडचिरोली-कांकेर (रायपूर-विशाखापट्टणम ) मार्गिका, ग्वाल्हेर-नागपूर मार्गिका, नागपूर-हैदराबाद मार्गिका, भंडारा-रायपूर विभागाचे सहा पदरीकरण, लखनादौन-दुर्ग-रायपूर मार्गिका, नागपूर-अमरावती विभागाचे सहा पदरीकरण, राष्ट्रीय महामार्ग क्रमांक-44 वरील मध्य प्रदेश-महाराष्ट्र सीमा-नागपूर बायपास-बोरखेडी टप्पा आणि पुणे-सातारा विभागाच्या सहा पदरीकरणाचा समावेश आहे.

या आढावा बैठकीत महाराष्ट्रातील राष्ट्रीय महामार्गावरील एकूण 527 किमी लांबीच्या नऊ राज्य बीओटी (बांधा-वापरा-हस्तांतरित करा) प्रकल्पांवरही चर्चा करण्यात आली. या प्रकल्पांमध्ये खालील मार्गिकांचा समावेश आहे:

शिरूर-अहिल्यानगर (4-पदरी)
अहिल्यानगर-वडाळा (4-पदरी)
वडाळा-छत्रपती संभाजीनगर (4-पदरी)
छत्रपती संभाजीनगर-जालना (4-पदरी)
जालना-वाटूर (4-पदरी)
नांदेड-नरसी-देगलूर (4-पदरी आणि 2-पदरी)
जाम-वरोरा (4-पदरी)
वरोरा-चंद्रपूर-बामणी (4-पदरी)
मलकापूर-चिखली (2-पदरी)

रस्तेमार्गांद्वारे संपर्कव्यवस्था बळकट करण्यासाठी आणि प्रदेशाच्या आर्थिक विकासाला गती देण्यासाठी प्रकल्पांचे नियोजन आणि अंमलबजावणी जलद करण्यावर या आढावा बैठकीत भर देण्यात आला.

‘अ‍ॅन इव्हिनिंग विथ अ‍ॅकॉर्डियन’मध्ये अ‍ॅकॉर्डियन वादक अमित वैद्य यांचे सादरीकरण

पुणे : ‘प्यार हुआ इकरार हुआ’, ‘आजा सनम मधुर चांदनी में हम’, ‘बाबूजी धीरे चलना’ आणि ‘आईये मेहेरबान’ यांसारख्या अ‍ॅकॉर्डियनच्या सुरांनी सजलेल्या अजरामर गीतांनी ‘अ‍ॅन इव्हिनिंग विथ अ‍ॅकॉर्डियन’ या कार्यक्रमात रसिकांना मंत्रमुग्ध केले. अ‍ॅकॉर्डियन वादक अमित वैद्य यांनी आपल्या वादनातून या  गाण्यांतील खास सुरावटी पुन्हा जिवंत करत प्रेक्षकांना हिंदी चित्रपट संगीताच्या सुवर्णकाळात नेले.

‘अ‍ॅन इव्हिनिंग विथ अ‍ॅकॉर्डियन’ या कार्यक्रमात अ‍ॅकॉर्डियन वादक अमित वैद्य यांनी प्रेक्षकांना अविस्मरणीय संगीतसफरीवर नेले. कोथरूड येथील एमईएस बालशिक्षण ऑडिटोरियममध्ये पार पडलेल्या या कार्यक्रमाला रसिकांचा उत्स्फूर्त प्रतिसाद लाभला. कार्यक्रमाच्या उद्घाटनप्रसंगी कर्नल प्रसाद मिजार, अमित आपटे, देसाई बंधू आंबेवाले चे नरेंद्र देसाई उपस्थित होते. यावर्षी ज्येष्ठ अभिनेते राज कपूर (२०२४), ज्येष्ठ संगीतकार सलील चौधरी (२०२५) आणि ओ. पी. नय्यर (२०२६) यांच्या जन्मशताब्दीनिमित्त हा कार्यक्रम त्यांना समर्पित करण्यात आला. 

कार्यक्रमाची सुरुवात ‘वो चांद खिला’ आणि ‘प्यार हुआ इकरार हुआ’ या गाण्यांनी होताच वातावरण सुरेल झाले. त्यानंतर ‘बन के पंछी गाये प्यार का तराना’, ‘दिल की नजर से’, ‘आजा सनम मधुर चांदनी में हम’, ‘जहां मैं जाती हूं’ आणि ‘हर दिल जो प्यार करेगा’ या गीतांनी प्रेक्षकांना जुन्या आठवणींच्या विश्वात नेले. ‘आहाहा रिमझिम के ये प्यारे प्यारे’ आणि ‘दिल से दिल की डोर बांधू’ यांसारख्या गीतांनी कार्यक्रमात रंगत आणली.

कार्यक्रमात ‘मधुमती’ चित्रपटातील शीर्षक गीत आणि ‘जुल्मी संग आंख लड़ी’ या गाण्यांचे ध्वनीमुद्रण सादर करण्यात आले. त्यानंतर ‘आजा रे परदेसी’ आणि ‘इतना न मुझसे तू प्यार बढ़ा’ या गीतांनी रसिकांना भारावून टाकले. ‘प्रेमपत्र’ चित्रपटातील ‘सावन की रातों में’ या गीताच्या ध्वनीमुद्रणातून संवाद आणि निसर्गध्वनींचा सुंदर वापर दाखवण्यात आला. विशेष सादरीकरणातून अ‍ॅकॉर्डियन वादनातील वेगळा प्रयोग श्रोत्यांना अनुभवायला मिळाला.

कार्यक्रमात ज्येष्ठ संगीतकार सलील चौधरी यांच्या प्रसिद्ध कवितांपैकी एक असलेल्या “एक गुच्छ चाबी…” या कवितेचा मराठी अनुवाद केतकी वैद्य यांनी  सादर केला. संगीतकार सलील चौधरी यांच्या वैशिष्ट्यपूर्ण संगीतशैलीचे दर्शन घडवणारा एक आगळावेगळा कार्यक्रम रंगला. कार्यक्रमात मधुमती चित्रपटाचे शीर्षक संगीत सादर करून सलीलदांच्या शीर्षक संगीत रचनेतील अफाट प्रतिभा उलगडण्यात आली. या प्रारंभीच्या संगीतामधून संपूर्ण चित्रपटाची कथा थोडक्यात आणि प्रभावीपणे कशी व्यक्त होते, हे प्रेक्षकांना अनुभवता आले.

याशिवाय मेमदीदी मधील “बचपन ओ बचपन” आणि मधुमती मधील “जुल्मी संग आँख लड़ी” या गाण्यांच्या ऑडिओ क्लिप्स सादर करण्यात आल्या. या माध्यमातून सलीलदांच्या खास शैलीतील कॉन्ट्रा मेलडीची अनोखी मांडणी अधोरेखित करण्यात आली.

कार्यक्रमात सादर झालेल्या लाईव्ह डेमोने विशेष लक्ष वेधले. यात अमित आपटे यांनी “ए दिल कहाँ तेरी मंजिल” या गाण्याची मुख्य धून सादर केली, तर त्यांच्या पत्नी केतकी वैद्य यांनी आपल्या आवाजातून पार्श्वसंगीत साकारत कॉन्ट्रा मेलडीची प्रभावी अनुभूती प्रेक्षकांना दिली.

 समारोपाच्या सत्रात ‘बाबूजी धीरे चलना’, ‘आईये मेहेरबान’, ‘पिया पिया पिया जिया पुकारे’ आणि ‘चैन से हमको कभी’ या गाण्यांनी रसिकांना मंत्रमुग्ध करत कार्यक्रमाची सांगता झाली. अमित वैद्य यांना पद्माकर गुजर (ढोलक) आणि विनोद सोनवणे (ऑक्टोपॅड) यांनी सुरेख साथसंगत केली. संपूर्ण कार्यक्रमात अ‍ॅकॉर्डियनच्या सुरांनी रसिकांना एका वेगळ्याच संगीतमय विश्वाची अनुभूती दिली. सुहास किर्लोस्कर  यांनी निवेदन  केले. कार्यक्रमाच्या शेवटी केतकी वैद्य यांनी आभार मानले.

पुणे बाल पुस्तक जत्रेला उत्स्फूर्त प्रतिसाद

पुणे : उन्हाळी सुटीचा रविवार पुणेकर मुले आणि पालकांसाठी पुस्तक खरेदीचा ठरला. पुणे बाल पुस्तक जत्रेत पालक-मुलांनी भरभरून पुस्तक खरेदी करून सुट्टी वाचनमय करण्याची तयारी केली आहे. तसेच रविवारी झालेल्या कार्यक्रमांतून कथा कवितांसह विमानांचे विज्ञान समजून घेण्याची संधी मुलांनी पुरेपूर अनुभवली.

पुणे पुस्तक महोत्सव, पुणे महापालिका, समर्थ युवा फाउंडेशन आणि संवाद पुणे यांच्यातर्फे गणेश कला क्रीडा मंच परिसरात पुणे बाल पुस्तक जत्रेचे आयोजन करण्यात आले आहे. या जत्रेत पारंपरिक भारतीय खेळ, खाऊगल्ली, पुस्तक प्रदर्शन, सांस्कृतिक कार्यक्रमांची मेजवानी उपलब्ध झाली आहे. ३० एप्रिलपासून सुरू झालेल्या या पुस्तक जत्रेला मोठा प्रतिसाद मिळाला आहे. रविवारी सकाळच्या सत्रात बालसाहित्यकार एकनाथ आव्हाड यांचा ‘कथा कवितांच्या राज्यात’ हा कार्यक्रम झाला. आव्हाड यांनी मुले आणि पालकांशी संवाद साधत कथा-कवितांच्या राज्याची मनोरंजक सफर घडवून आणली. दुपारच्या सत्रात हवेत उडणाऱ्या विमानांमागील विज्ञान समजून घेण्याची संधी मुले आणि पालकांना ‘सलाम भारतीय वायुसेनेला’ या कार्यक्रमातून मिळाली. ज्येष्ठ एअरो मॉडेलर सदानंद काळे यांनी या कार्यक्रमात अत्यंत रंजक पद्धतीने विमानांचे विज्ञान उलगडले. तसेच मिग २१, राफेल, जॅग्वार अशा लढाऊ विमानांची माहिती सांगितली. विमान तयार करण्याची प्रात्यक्षिकेही दाखवली. या कार्यक्रमाला पालक, मुलांनी मोठा प्रतिसाद दिला. प्रश्नोत्तरांनी या सत्राची रंगत वाढवली. ड्रोन इंडस्ट्री वाढत असताना या क्षेत्रातील करिअरसंधींबाबत माहिती दिली. यावेळी मुले पारंपरिक जुने खेळ खेळण्यात हरवून गेली होती.

कार्यक्रमांना उत्तम प्रतिसाद मिळत असतानाच पुस्तकांची दालनेही पालक-मुलांनी गजबजलेली होती. गोष्टींची पुस्तके, बालकादंबरी, विज्ञानावरील पुस्तके, शास्त्रज्ञांच्या गोष्टी अशी विविध प्रकारची पुस्तकांची भरभरून खरेदी करण्यात आली. ‘पुणे बाल पुस्तक जत्रा हा उन्हाळी सुटीतील महत्त्वाचा उपक्रम झाला आहे. या जत्रेमुळे मुले, पालक पुन्हा पुस्तकांकडे वळत आहेत. पुस्तकांतील नवे प्रयोग बालवाचकांपर्यंत पोहोचत आहेत. जत्रेला मिळत असलेल्या प्रतिसादामुळे प्रकाशक म्हणून उत्साह दुणावला आहे,’ अशी भावना प्रकाशकांनी व्यक्त केली.

आज जत्रेचा समारोप

बालपुस्तक जत्रेचा सोमवारी (४ मे ) सायंकाळी मान्यवरांच्या उपस्थितीत समारोप करण्यात येणार आहे. त्या पूर्वी सकाळी १०.३० वाजता ‘स्क्रीन टाइम कसा आणि कुठे?’ या सत्रात डॉ. श्रुती पानसे, स्मिता पाटील वळसंगकर सहभागी होणार आहेत. त्यानंतर एस. एन. डी. टी. महिला महाविद्यालयाच्या मोहिनी भुसे आणि सहकारी संबळ गोंधळ आणि अन्य गाण्यांचा कार्यक्रम सादर करणार आहेत. समारोप कार्यक्रमानंतर ‘बाल गीत रामायण’ कार्यक्रम होणार आहे.

बालपुस्तक जत्रेला पुणेकरांनी भरभरून प्रतिसाद दिला आहे. जत्रेत मोठ्या प्रमाणात झालेली पुस्तक खरेदी आनंददायी आहे. या पुस्तकांमुळे उन्हाळी सुटी भरपूर वाचनाची होईल हा विश्वास वाटतो.

• राजेश पांडे, मुख्य संयोजक, पुणे पुस्तक महोत्सव

कबड्डी, कुस्ती, खो-खो व बास्केटबॉलच्या स्पर्धेसाठी ४१ संघ सहभागी होणार

पुणे, दि. ४ मे २०२६: अखिल भारतीय विद्युत क्रीडा नियामक मंडळाच्या ४७ व्या राष्ट्रीय कबड्डी, कुस्ती, खो-खो व बास्केटबॉलच्या क्रीडास्पर्धेचे आयोजन बुधवार (दि. ६) ते शुक्रवारपर्यंत (दि. ८) बालेवाडी येथील श्री शिवछत्रपती क्रीडा संकुलामध्ये करण्यात आले आहे. या राष्ट्रीय स्पर्धेमध्ये १० राज्यांतील विविध विद्युत कंपन्यांचे पुरुष व महिला गटातील तब्बल ४१ संघ सहभागी होत आहेत.

या राष्ट्रीय स्पर्धेत महाराष्ट्रासह गुजरात, हरियाणा, तेलंगाणा, राजस्थान, उत्तराखंड, पंजाब, हिमाचल प्रदेश, मध्यप्रदेश, दिल्ली आदी राज्यांतील सरकारी व खासगी विद्युत कंपन्यांचे ४१ संघ आणि सुमारे ५३८ महिला व पुरुष खेळाडू सहभागी होत आहेत. कबड्डी, कुस्ती, खो-खो व बास्केटबॉलमध्ये पुरुष संघात लढत होईल तर कबड्डी व खो-खोमध्ये महिला संघांचा समावेश करण्यात आला आहे. राष्ट्रीय स्पर्धेतील अजिंक्यपदासाठी कबड्डीमध्ये पुरुष व महिला गटातील १८ संघ तर खो-खोसाठी ९ संघ सहभागी होत आहेत. तसेच कुस्ती व बास्केटबॉलमध्ये अजिंक्यपदासाठी पुरुष गटामध्ये प्रत्येकी ७ संघांमध्ये लढत होणार आहे.

विद्युत क्रीडा नियामक मंडळाच्या या राष्ट्रीय क्रीडा स्पर्धेचे उद्घाटन बुधवारी (दि. ६) सकाळी ९.३० वाजता राज्याच्या ऊर्जा विभागाच्या अपर मुख्य सचिव आभा शुक्ला यांच्या मुख्य उपस्थितीत महावितरणचे अध्यक्ष व व्यवस्थापकीय संचालक श्री. लोकेश चंद्र यांच्याहस्ते होणार आहे. यावेळी राज्याच्या क्रीडा आयुक्त सौ. शीतल तेली-उगले प्रमुख पाहुणे म्हणून उपस्थित राहतील. तसेच महावितरण, महानिर्मीती, महापारेषण कंपनीच्या संचालक मंडळासह अखिल भारतीय विद्युत क्रीडा नियामक मंडळाचे अध्यक्ष श्री. जिग्नेश राय, सरचिटणीस श्री. नरेश कुमार यांची विशेष उपस्थिती राहणार आहे. तर शुक्रवारी (दि. ८) सायंकाळी ५ वाजता अध्यक्ष व व्यवस्थापकीय संचालक डॉ. संजीवकुमार (महापारेषण) व श्री. राधाकृष्णन बी. (महानिर्मिती) यांच्या प्रमुख उपस्थितीत बक्षिस वितरणाचा कार्यक्रम होईल.

महावितरणचे संचालक (मानव संसाधन) श्री. राजेंद्र पवार यांच्या मार्गदर्शनात या राष्ट्रीय क्रीडा स्पर्धेच्या आयोजन समितीचे अध्यक्ष म्हणून पुणे प्रादेशिक संचालक श्री. सुनील काकडे तसेच उपाध्यक्ष म्हणून मुख्य अभियंता श्री. अनिल कोलप (महापारेषण) व अधीक्षक अभियंता श्री. अशोक घाडगे (महानिर्मिती) आणि मुख्य समन्वयक म्हणून मुख्य औद्योगिक संबंध अधिकारी श्री. संजय ढोके (महावितरण) व श्री. पुरुषोत्तम वारजुरकर (महानिर्मिती) आणि विविध समितीचे प्रमुख व सदस्य कार्यरत आहेत.

पुणे–विवेक वाडेकर (आयआरएस १९९१ ची तुकडी) यांनी पुणे येथील आयकर विभागाचे ‘प्रधान मुख्य आयुक्त’ म्हणून पदभार स्वीकारला आहे. पदभार स्वीकारण्यापूर्वी वाडेकर हे पुणे येथे ‘मुख्य आयकर आयुक्त’ म्हणून काम पाहत होते. वाडेकर यांनी तीन दशकांहून अधिक सेवाकाळात करप्रणाली, आर्थिक अंमलबजावणी, राष्ट्रीय सुरक्षा आणि सार्वजनिक धोरण यांसारख्या विविध क्षेत्रांतील गुंतागुंतीच्या आणि आव्हानात्मक बाबी हाताळताना त्यांनी उत्कृष्ट कामगिरी बजावली आहे. याशिवाय, आर्थिक गुन्हे आणि बेकायदेशीर पैशांचे व्यवहार संदर्भातील दिल्ली येथील ‘सक्तवसुली संचालनालय’ मध्ये विशेष संचालक आणि ‘आर्थिक गुप्तचर’ विभागात अतिरिक्त संचालक म्हणून त्यांनी काम केले आहे.

तसेच , त्यांनी केंद्रीय गृह मंत्रालयात आणि केंद्रीय सांस्कृतिक मंत्रालयात उपसचिव, राष्ट्रीय सुरक्षा परिषदेच्या सचिवालयात संचालक, आयकर विभागाच्या ‘दक्षता संचालनालय’ मध्ये अतिरिक्त सहसंचालक, तर दिल्ली येथील मुख्य आयकर आयुक्त आणि प्रधान आयकर आयुक्त म्हणूनही सेवा बजावली आहे. विवेक वाडेकर यांच्या विविध पदांवरील नियुक्त्यांमुळे त्यांची कारकीर्द एका सामान्य महसूल अधिकाऱ्यांच्या पारंपरिक कामाच्या कक्षेपलीकडे विस्तारली आहे.

वाडेकर यांनी दिल्ली विद्यापीठातून शिक्षण घेतले. इतिहासातील पदवी आणि पदव्युत्तर पदवी प्राप्त केली असून, त्यांनी पुणे विद्यापीठातून जर्मन भाषेचा पदविका अभ्यासक्रमही पूर्ण केला आहे.

पुणे : समस्त ब्राह्मण संघ व राष्ट्रीय स्वयंसेवक संघ यांच्या संयुक्त विद्यमाने ओंकारेश्वर मंदिर येथे आज सामूहिक उपनयन सोहळा आयोजित करण्यात आला होता. या सोहळ्यात एकूण ३० बटू सहभागी झाले होते. विशेष म्हणजे या वर्षी ३ मुलींचाही समावेश करण्यात आला.

हिंदू धर्मपरंपरेनुसार उपनयन हा १६ संस्कारांपैकी अत्यंत महत्त्वाचा संस्कार मानला जातो. हजारो वर्षांपासून चालत आलेल्या या परंपरेला पुढे नेत, सर्व जाती व घटकांतील मुला-मुलींना एकत्र आणण्याचा प्रयत्न या सामूहिक सोहळ्यातून करण्यात आला. या माध्यमातून शिक्षण, संस्कार आणि ब्रह्मचर्याचे पालन करण्याचा संकल्प सहभागी विद्यार्थ्यांनी यावेळी केला.

स्वातंत्र्यवीर विनायक दामोदर सावरकर यांच्या सर्वसमावेशक व प्रगत विचारांना अनुसरून, समाजातील सर्व घटकांना एकत्र आणण्याचा संदेश या कार्यक्रमातून देण्यात आला.

सचिन टापरे, विजय पाठक, तेजस पाठक, रीमा कुलकर्णी, स्वाती पाठक, प्रज्ञा कापरे, अभय देशपांडे, हेमंत ढवळे, सुनील शिरगावकर आणि विराज जोशी यांचे या सोहळ्याच्या यशस्वी आयोजनात विशेष योगदान लाभले.