युरोसॅटरी, पॅरिस, फ्रान्स | १७ जून २०२६ : ‘भारत फोर्ज लिमिटेड’ची संपूर्ण मालकीची संरक्षण क्षेत्रातील उपकंपनी कल्याणी स्ट्रॅटेजिक सिस्टिम्स लिमिटेड (केएसएसएल) आणि पॅरामाउंट यांनी आज ‘युरोसॅटरी २०२६’मध्ये ‘सिंहा ४x४’ या नव्या पिढीतील हलक्या चिलखती बहुउद्देशीय वाहनाचे अनावरण केले. भारत, आफ्रिका, दक्षिण आशिया आणि इतर जागतिक बाजारपेठांतील सशस्त्र दलांच्या वेगाने बदलणाऱ्या हालचाली, सुरक्षा आणि मोहिमांशी संबंधित गरजा लक्षात घेऊन ‘सिंहा ४x४’ विकसित करण्यात आले आहे. हे वाहन सुरुवातीपासून नव्याने तयार करण्यात आलेले डिझाइन असून, विविध कामांसाठी उपयुक्त असे एक सक्षम व्यासपीठ त्याद्वारे उपलब्ध झाले आहे.
शक्ती, चपळता आणि संरक्षण यांचा संगम असलेले ‘सिंहा ४x४’ हे वाहन शहरी भागातील लढाई तसेच रस्त्यावर आणि खडतर भागांतील टेहळणी मोहिमांसाठी उपयुक्त आहे. विश्वासार्ह तांत्रिक घटकांच्या आधारे तयार करण्यात आलेल्या या वाहनाची रचना लवचिक स्वरूपाची आहे. त्यामुळे त्यात सहजपणे सुधारणा आणि आवश्यक बदल करता येतात. यामुळे वापरकर्त्यांना त्यांच्या पुरवठा साखळीचे आणि देखभाल-दुरुस्ती व्यवस्थेचे अधिक प्रभावी नियोजन करता येते.
‘सिंहा ४x४’ हे चिलखती वाहन सुरुवातीपासूनच विविध गरजांनुसार बदल करता येईल, अशा लवचिक आणि मोहिमेनुसार वापरता येणाऱ्या स्वरूपात तयार करण्यात आले आहे. सुरक्षित, वेगवान हालचाल करू शकणाऱ्या आणि विविध कामांसाठी वापरता येणाऱ्या वाहनांची उपलब्धता ही आधुनिक सशस्त्र दलांची एक महत्त्वाची गरज आहे. ती पूर्ण करण्यासाठी ‘सिंहा ४x४’ विकसित करण्यात आले आहे. हे वाहन टेहळणी, अंतर्गत सुरक्षा, सीमासुरक्षा, विशेष मोहिमा, नियंत्रण व समन्वय, जवानांची वाहतूक आणि दलाच्या सुरक्षेसारख्या विविध कामांसाठी वापरता येते. प्रगत डिजिटल तंत्रज्ञानाचा वापर करून आणि उत्पादनाची कठोर चाचणी व पडताळणी करत ‘सिंहा ४x४’ विक्रमी कालावधीत विकसित करण्यात आले आहे.
‘केएसएसएल’ची मूळ कंपनी असलेल्या ‘भारत फोर्ज लिमिटेड’चे उपाध्यक्ष आणि संयुक्त व्यवस्थापकीय संचालक अमित कल्याणी म्हणाले, “सिंहा ४x४ हे जागतिक स्तरावर आम्ही सादर करत असलेल्या अभियांत्रिकी कौशल्याचे आणि संरक्षण क्षेत्रातील अनुभवांचे प्रतीक आहे. याचे डिझाइन युरोपीय मानकांनुसार तयार करण्यात आले असून, नाटो मान्यताप्राप्त तांत्रिक घटकांचा त्यात वापर करण्यात आला आहे. त्यामुळे जगभरातील भागीदार देशांमध्ये त्याचे उत्पादन जलद गतीने सुरू करता येऊ शकते. भारताचा संरक्षण उद्योग जगातील सर्वोत्तम उद्योगांबरोबर स्पर्धा करू शकतो, हे या बहुउद्देशीय वाहनातून दिसून येते. सशस्त्र दलांना उच्च दर्जाचे संरक्षण आणि रणनितीला पूरक हालचालींची क्षमता ते उपलब्ध करून देते आणि विविध देशांना त्यांच्या स्वतःच्या देशात अशी संरक्षण क्षमता विकसित करण्यास मदत करते.”
‘पॅरामाउंट’चे वरिष्ठ उपाध्यक्ष एरिक इचिकोवित्झ म्हणाले, “जगभरातील संरक्षण दलांना अशी वाहने हवी आहेत, जी विविध मोहिमा पार पाडू शकतील, नव्या तंत्रज्ञानाशी सुसंगत असतील आणि स्थानिक पातळीवर तयार करता येतील. सिंहा वाहनाची रचना सुरुवातीपासूनच या गरजा लक्षात घेऊन करण्यात आली आहे. या वाहनात संरक्षण, गतिशीलता, लवचिक रचना आणि परवडणारी किंमत यांचा समतोल साधण्यात आला आहे. त्यामुळे बदलत्या कामकाजाच्या गरजांनुसार त्यात सुधारणा करता येऊ शकतात. ‘सिंहा ४x४’ हे केवळ नवे वाहन नाही, तर संरक्षण क्षेत्रातील विश्वासार्ह कंपन्या आपले कौशल्य, औद्योगिक क्षमता आणि दीर्घकालीन दृष्टीकोन एकत्र आणल्यास काय साध्य होऊ शकते, याचे हे एक महत्त्वाचे उदाहरण आहे.”
स्थानिक उत्पादनाला चालना देणे आणि संरक्षण क्षेत्रात स्वावलंबन वाढवणे या उद्देशाने ‘सिंहा ४x४’ची रचना करण्यात आली आहे. भागीदार देशांमध्ये या वाहनाचे उत्पादन आणि स्थानिकीकरण जलद गतीने करता येऊ शकते. त्यामुळे त्या देशांच्या संरक्षण उद्योग विकासाला मदत होईल आणि परदेशी पुरवठा साखळीवरील दीर्घकालीन अवलंबित्व कमी होईल. पॅरामाउंट आणि केएसएसएल यांच्या भागीदारीतून विकसित झालेल्या संरक्षण उपाययोजनांच्या वाढत्या संचामध्ये ‘सिंहा ४x४’ची भर पडली आहे. यामुळे पुढील पिढीतील लष्करी क्षमता विकसित करण्यासाठी धोरणात्मक औद्योगिक सहकार्याचे महत्त्व अधोरेखित झाले आहे.
