पुणे : पावसाळ्यात आलेल्या पुराने ताडीवाला रोड येथील गोदामात पाणी शिरुन मालाचे नुकसान झाले. याचे पैसे द्यावेत म्हणून व्यावसायिकाकडे सावकारांनी तगादा लावला़ मुलाला उचलून नेण्याची धमकी दिली. या मानसिक त्रासामुळे एका व्यावसायिकाने गळफास घेऊन आत्महत्या केल्याचा प्रकार समोर आला आहे.

राजा परदेशी (वय ४४, रा. महाराष्ट्र तरुण मंडळा शेजारी, हरकानगर, काशेवाडी, भवानी पेठ) असे आत्महत्या केलेल्याचे नाव आहे. याप्रकरणी त्यांची पत्नी कंचन राजा परदेशी (वय ३८, रा. काशेवाडी, भवानी पेठ) यांनी खडक पोलीस ठाण्यात फिर्याद दिली आहे. त्यावरुन पोलिसांनी लक्कडसिंग याच्याविरुद्ध गुन्हा दाखल केला आहे. हा प्रकार काशेवाडी येथील घरात शनिवारी दुपारी १२ वाजता घडला.याबाबत पोलिसांनी दिलेल्या माहितीनुसार, राजा परदेशी यांचे ताडीवाला रोड येथे गोदाम होते. लक्कडसिंग हा त्यांना डुक्कर पुरविण्याचे काम करीत असे. परदेशी हे या डुक्करांचे मांस तयार करुन ताडीवाला रोड येथील गोदामात ठेवत असे. ग्राहकांच्या मागणी नुसार त्यांना पुरवठा करत असे. पावसाळ्यात त्यांच्या गोदामात पुराचे पाणी शिरले आणि सर्व माल खराब झाला. जवळपास १० लाख रुपयांचे नुकसान झाले.

हे नुकसान परदेशी भरुन काढू शकले नाही. दुसरीकडे लक्कडसिंग हा त्यांच्याकडे तुझे नुकसान झाले त्याला मी काय करु,
माझे पैसे दे, असे म्हणून पैशांची वारंवार मागणी करत होता.तो शिवीगाळ करुन मानसिक त्रास देत होता. मुलांना उचलून नेण्याची धमकी देत होता.त्याच्या या मानसिक त्रासाला कंटाळून राजा परदेशी यांनी शनिवारी दुपारी घरी गळफास घेऊन आत्महत्या केली.पोलीस उपनिरीक्षक आकाश विटे तपास करीत आहेत

पुणे : मुंबई -पुणे महामार्गावर कात्रजकडे जाणार्‍या वारजे पुलावर एलपीजीने भरलेला टँकर उलटला. त्यामुळे या महामार्गावरील वाहतूक पूर्णपणे ठप्प झाली आहे. अग्निशमन दलाचे दोन क्रेनने हा ट्रॅकर बाजूला करण्याचे काम सुरु आहे.
मुंबईहून एलपीजीने भरलेला टँकर कात्रजकडे जात होता. वारजे येथील पुलावर आल्यावर या टँकरच्या पुढील बाजूचा टायर फुटला. त्यामुळे टँकरची पुढील बाजू पुलाला घासत जाऊन पलटला. त्यामुळे टँकरची मागील बाजूची कॅप्सुल संपूर्ण रोडवर आडवी झाली. त्यामुळे संपूर्ण रस्ता बंद झाला. याची खबर रविवारी सकाळी १० वाजून ५९ मिनिटांनी अग्निशमन दलाला मिळाली. त्याबरोबर वारजे येथील गाडी घटनास्थळी पोहचली. पोलीसही दोन क्रेनसह आले. ही घटना पाहण्यासाठी मोठ्या प्रमाणावर गर्दी झाली होती. एलपीजी गॅस भरलेला टँकरची मागील कॅप्सुल बाजूला करण्याचे काम सुरु आहे. तासाभराच्या प्रयत्नानंतर पोलिसांना टँकरचा पुढील भाग व कॅप्सुल बाजूला करण्यात यश आले आहे. दोन्ही बाजूची वाहतूक सुरु करण्यात आली आहे. आता तिसरी क्रेन मागविण्यात आली असून तिच्या सहाय्याने टँकरची कॅप्सुल पुढील भागावर ठेवण्यात येणार आहे

पुणे : दुभाजक उजेडात असावेत , त्यावर लाईट्स असावेत दुभाजकाची जाणीव वाहनचालकाला अगोदरच होईल अशी व्यवस्था असावी असे सारे नियम असतानाही पुण्यात एकाच रात्री दोन ठिकाणी भरधाव मोटारसायकल दुभाजकाला धडकून अपघात झालेत. भरधाव मोटारसायकल दुभाजकाला धडकल्याने एका घटनेत चालकाचा मृत्यु झाला तर दुसरा गंभीर जखमी झाला आहे.

हर्षद दिपक बर्गे (वय २५, रा. मिलेटरी हौसिंग सोसायटी,सदर बाजार, सातारा) असे मृत्यु पावलेल्या दुचाकीस्वाराचे नाव आहे. याप्रकरणी त्याचा मित्र ऋषिकेश हेमंत धोत्रे (वय २६, रा. देशमुख कॉलनी, सदर बाजार, सातारा) यांनी भारती विद्यापीठ पोलीस ठाण्यात फिर्याद दिली आहे. हा अपघात कात्रजमधील मोरेबाग बसस्टॉपसमोर शनिवारी पहाटे अडीच वाजता घडला.

फिर्यादी व त्यांचा मित्र हर्षद बर्गे हे मोटारसायकलवरुन जात होते. बर्गे याने भरधाव मोटारसायकल चालविताना मोरेबाग बसस्टॉपसमोरील दुभाजकाला धडक दिली. त्यात ते रस्तावर पडल्याने दोघे जखमी झाले. हर्षद बर्गे याचा मृत्यु झाला असून ऋषिकेश धोत्रे हा जखमी झाला आहे. पोलीस उपनिरीक्षक देशमुख तपास करीत आहेत.

दुसरी घटना कर्वे रोडवरील रांका ज्वेलर्ससमोरील उड्डाण पुलाच्या सुरुवातीला घडली. त्यात वैभव हनुमंत पिंपळे (वय ३५, रा. सरस्वती कॉलनी, शिवनगर, संभाजीनगर, सातारा) हा तरुण जखमी झाला आहे. याबाबत पोलीस अंमलदार अमोल खारतोडे यांनी डेक्कन पोलीस ठाण्यात फिर्याद दिली आहे. वैभव पिंपळे हा शुक्रवारी रात्री अकरा वाजता भरधाव वेगाने कर्वे रोडवरुन जात होता.नळस्टॉपजवळील उड्डाणपुल सुरु होत असताना पुलाच्या कठड्याला दुचाकीची जोरात धडक दिली.
त्यात तो गंभीर जखमी झाला आहे. पोलीस उपनिरीक्षक योगिता गायकवाड तपास करीत आहे

पुणे:खडकवासला विधानसभा मतदारसंघातील निवडणूक कार्यालयाने निवडणूक प्रक्रियेच्या प्रत्येक टप्प्यात प्रभावी व्यवस्थापनाचे उदाहरण दिले आहे. या कार्यालयाने पारदर्शकतेची आणि अचूकतेची उच्चतम पातळी गाठत एक आदर्श कार्यप्रणाली स्थापित केली आहे. निवडणूक निर्णय अधिकारी डॉ. यशवंत माने, सहा. निवडणूक निर्णय अधिकारी किरण सुरवसे, इव्हीएम कक्षाचे नोडल अधिकारी सचिन आखाडे, सहा. अधिकारी नारायण पवार, प्रमोद भांड, अंकुश गुरव आणि इतर अधिकारी तसेच कर्मचार्‍यांच्या योग्य नेतृत्वामुळे निवडणूक प्रक्रिया सुसंगत पार पडली.
निवडणूक काळात, मतदार यादीचे अद्ययावत व्यवस्थापन, मतदान केंद्रांची अचूक योजना, आणि प्रशिक्षण सत्रांचे आयोजन अत्यंत काटेकोरपणे पार पडले. याशिवाय, मतदान केंद्रांवर तांत्रिक साधनांचा वापर करत प्रक्रिया सुलभ करण्यात आली. निवडणूक प्रक्रियेच्या प्रत्येक टप्प्यात अत्याधुनिक तंत्रज्ञानाचा वापर करून व्यवस्थापन सुलभ बनवण्यात आले.योगेश हांडगे यांच्या नेतृत्वात मीडिया कक्षाने या कार्यप्रणालीचे व्यवस्थित वृत्तांकन केले आणि त्यामुळे अनेक वर्तमानपत्रांमध्ये अनेक बातम्या प्रसारित होऊन मतदारांमध्ये जागरूकता निर्माण झाली. या कार्यकालात, निवडणूक प्रक्रियेत पारदर्शकतेच्या माध्यमातून जनतेचा विश्वास प्राप्त करण्यात आले.खडकवासला विधानसभा निवडणूक कार्यालयाने आपल्या कार्यप्रणालीच्या माध्यमातून लोकशाही प्रक्रियेचे उच्च मानक ठेवले आणि एक आदर्श प्रशासकीय कार्यसंस्कृती निर्माण केली.

पुणे:पुणे जिल्हयातील २१ मतदारसंघात यंदा विधानसभा निवडणुकीसाठी ६१.०५ टक्के मतदान पार पडले हाेते. .महायुतीने जिल्हयातील २१ पैकी १८ जागा जिंकल्या असून त्यांचा एक अपक्ष देखील निवडून आल्याने १९ जागा प्राप्त करत त्यांनी माेठा विजय मिळवला आहे. तर, शरद पवार गट अाणि उबाठा गट यांना प्रत्येकी एक जागा मिळाली असून काँग्रेस पुणे जिल्हयातून हद्दपार झाली अाहे. पुणे जिल्हयात सर्वाधिक महत्वपूर्ण निवडणुक बारामती मतदारसंघात अजित पवार विरुध्द युगेंद्र पवार अशी हाेती. राष्ट्रवादी काँग्रेस पक्ष फुटीनंतर खा.शरद पवार यांच्या करिष्मामुळे लाेकसभा निवडणुकीत अजित पवार यांच्या पत्नी सुनेत्रा पवार यांना पराभवास समाेरे जावे लागले हाेते. त्यामुळे विधानसभा निवडणुक अजित पवार यांच्यासाठी प्रतिष्ठेची बनली हाेती परंतु या निवडणुकीत एकतर्फी काैल मतदारांनी त्यांना दिला आहे. तर, पुण्यातील कसबा मतदारसंघात अनेक वर्ष भाजपचा बालेकिल्ला हाेता. परंतु पाेटनिवडणुकीत दीड वर्षापूर्वी काँग्रेसच्या रविंद्र धंगेकर यांनी आमदारकी प्राप्त केली हाेती. परंतु त्यानंतर पराभूत झालेले भाजपचे हेमंत रासने यांनी मतदारसंघात संर्पक व कामाच्या माध्यमातून पुर्नबांधणी करुन हा मतदारसंघ पुन्हा भाजपला मिळवून देण्यात यशस्वी झाले आहे. तर, काेथरुड मतदारसंघात राज्याचे मंत्री चंद्रकांत पाटील यांनी एक लाखापेक्षा अधिक आघाडी घेत मनसे व शिवसेना उबाठा गटाच्या उमेदवारांना चीतपट केले. पुण्यातील पर्वती मतदारसंघातून माधुरी मिसाळ व खडकवासला मतदारसंघातून भीमराव तापकीर यांनी सलग चाैथ्यंदा विजय संपादन केल्याने भावी मंत्रीमंडळाचे वेध त्यांना लागले आहे. तर, पाेर्श कार प्रकरणात अडकलेले राष्ट्रवादी काँग्रेस पक्ष अजित पवार गटाचे अामदार सुनील टिंगरे यांना शरदचंद्र पवार गटाचे उमेदवार बापू पठारे यांच्याकडून पराभवाचा सामना करावा लागला आहे.

राज्यात राजकीय दृष्टया महत्वपूर्ण समजल्या जाणाऱ्या पुणे जिल्हयात नेमका निकाल काेणाच्या बाजूने लागताे याची उत्सुकता हाेती. लाेकसभा निवडणुकीत आघाडीने बाजी मारली असली तरी विधानसभा निवडणुकीत त्याचा काेणताही परिणाम दिसून आला नाही

पुणे, २३ नोव्हेंबर २०२४
राज्यातील प्रतिष्ठित लढत समजल्या जाणाऱ्या वडगाव शेरी मतदार संघात धक्कादायक निकाल समोर आले आहेत. ५० हजारांहून अधिकची हक्काची मतं असून देखील तेवढीही मतं न मिळाल्याने ईव्हीएम यंत्रणेत घोळ असल्याचा आरोप वडगाव शेरी मतदार संघातील बहुजन समाज पक्षाचे उमेदवार आणि प्रदेश महासचिव, पश्चिम महाराष्ट्र प्रभारी डॉ.हुलगेश चलवादी यांनी शनिवारी (ता.२३) केला.ईव्हीएम यंत्रणेसंबंधी अनेक तक्रारी असून देखील त्यावरच निवडणूकीचे चक्र अवलंबून असल्याने आता याविरोधात सर्वोच्च न्यायालयात दाद मागणार असून लवकरच जनहित याचिका न्यायालयात दाखल करणार असल्याची माहिती डॉ.चलवादींनी दिली आहे.
प्रस्थापित पक्षांनी यावेळी मतदार संघात पैशांचे अमाप वाटप केल्याने हा धनबलाचा आणि ईव्हीएमचा कौल आहे; जनमताचा नाही, अशी खंत देखील डॉ.चलवादी यांनी बोलून दाखवली.वडगाव शेरी मतदार संघात जवळपास १५० कोटींचे वाटप झाल्याचा धक्कादायक आरोप देखील त्यांनी यावेळी केला.मतदार संघात दलित, मागासवर्गीय, ओबीसी,अल्पसंख्याक मतदारांची मोठी संख्या आहे. ही सर्व मतदार बहुजन समाज पक्षांच्या बाजूने कौल देतात. यंदा मतदारसंघात बसपाचे वारे होते. विविध वस्त्यांमध्ये, सोसायटी,परिसरात बसपचीच चर्चा होती. 
डॉ.चलवादी यांनी त्यांच्या प्रचारातही अगोदरपासून आघाडी घेतली होती. प्रसारमाध्यमांमध्ये देखील बसप आणि डॉ.चलवादींचे नाव चांगलेच चर्चेत होते.पहिल्या तीन उमेदवारांमध्ये डॉ.चलवादींची चर्चा होती. असे असतांना केवळ ३ हजार ७६२ मतं मिळाल्याने ईव्हीएम यंत्रणेत घोळ झाल्याचा संशय डॉ.चलवादी यांनी व्यक्त केला आहे. वडागाव शेरी मतदार संघातील सर्व जनता ठामपणे पाठिशी उभी असतांना देखील प्रत्यक्षात मिळालेली मतं बघता हा निकाल जनतेचा नाही, तर भ्रष्ट ईव्हीएमचा असल्याचा दावा डॉ.चलवादी यांनी केला.यामुळे मतपत्रावर निवडणूक होणे आवश्यक आहे. जेणेकरून मतदारांचे खर मत कुणाला हे कळत.आता ईव्हीएम विरोधात अधिक तीव्र आंदोलन उभारू असे,डॉ.चलवादी म्हणाले.