पुणे:महाराष्ट्र गांधी स्मारक निधीचे  ग्रंथालय आणि युवक क्रांती दलाच्या वतीने ‘किताबे कुछ कहती है ‘ हा चर्चात्मक कार्यक्रम  आयोजित करण्यात आला होता . शनिवार,दि.२१ ऑगस्ट रोजी सायंकाळी ४ ते ६ या वेळेत हा कार्यक्रम गांधी भवन(कोथरूड) येथे झाला.या कार्यक्रमास चांगला प्रतिसाद मिळाला. 
‘ बोलना ही है’ ,’इष्क में शहर होना’ या  रवीश कुमार यांच्या  दोन पुस्तकावर चर्चा आयोजित करण्यात आली होती. पत्रकार,लेखिका हिना खान यांनी या दोन पुस्तकांचे रसग्रहण प्रस्तुत केले. महाराष्ट्र गांधी स्मारक निधीचे अध्यक्ष डॉ. कुमार सप्तर्षी ,या उपक्रमाच्या समन्वयक प्रा.डॉ.शशिकला राय, डॉ.ऊर्मिला सप्तर्षी ,विश्वस्त अन्वर राजन,अप्पा अनारसे,अॅड.स्वप्नील तोंडे,कैलास यादव  , प्रमोद मुजुमदार,रजनी रणपिसे, अप्पा अनारसे उपस्थित होते. प्रारंभी स्वामिनी पारखे यांनी संविधानाच्या उद्देशिकेचे  वाचन केले. पोपट खोसे यानी हीना खान यांचा सत्कार केला एड. स्वप्नील तोंडे यांनी प्रास्ताविक केले. तेजस भालेराव यांनी आभार मानले 
रविशकुमार यांच्या लिखाणाबद्दल बोलताना हीना खान म्हणाल्या,’ अल्पसंख्य समुदायाच्या हक्कांचा संकोच केला जात आहे.अल्पसंख्य समुदाय हा बहुसंख्य समुदायाच्यापेक्षा दुय्यम आहे,असे जाणवून देण्याचा प्रयत्न केला जात आहे.तशी सभोवताली परिस्थिती आहे.या पार्श्वभूमीवर रवीश कुमार यांच्या लिखाणाचे महत्व आहे.हा खेड्यातून शहरात आलेला पत्रकार आहे. अशावेळी शहरात वावरताना मनावर दडपण असते. पण संवेदनशीलता हे त्यांचे वैशिष्ट्य घेऊन ते पुढे जातात. बोलण्यासाठी कोणी तयार नाही, असे अनेक मुद्दे रवीश कुमार बोलत असतो. भय वाटू न देता तो बोलतो आणि तसेच लिहितो. त्यांची मांडणी मित्राने धीरगंभीरपणे बोलावे तशी आहे’.
‘आपल्यातील भीती संपली की सत्तास्थाने डळमळू लागतात. माणसाला माणसा विरुद्ध उभे केले जात आहे. पत्रकारिता खोटी होवू लागली आहे,हेच रवीश कुमार या पुस्तकातून मांडत राहतो. बोलणे, लिहिणे हेच पत्रकारांचे काम असून त्यावर बंधने आली आहेत. आवाज बंद करण्याच्या प्रवृत्तीचा निषेध होताना दिसत नाही. कळ लावून देणे ही पत्रकारिता वाहिनींच्या स्टुडिओ त वाढत आहे.टीकेच्या पातळीचा विचार केला जात नाही. सोशल मीडियावर आवेग दिसतो, मुद्दे कमी दिसत आहेत. अशावेळी रवीश कुमार यांची पुस्तकलेखनातील छोटी -छोटी वाक्ये प्रभावी ठरतात.’इश्क में शहर होना ‘मधून प्रेमळ आश्वासक व्यक्ती समोर येते. सर्व भिंती ओलांडून होणारे प्रेम सिनेमातून दिसत नाही. प्रेमासाठी शहरात जागा आहे का, असाही प्रश्न रवीश कुमार विचारतात. ‘प्रेम, सहवास यासाठी जागा नाही. मोकळीक नाही. माध्यमातून प्रेमाच्या गोष्टी पुढे न येता विखार येत आहे,असे रवीश कुमार मांडतात.ही दोन्ही पुस्तके वेगळी असली तरी लेखकाची ती अभिन्न अंग आहेत’,असेही हीना खान यांनी सांगितले. 

चतुःश्रृंगी पोलिसांची कारवाई

पुणे- तीन दुचाकींवर येवून बालेवाडी ज्युपीटर हॉस्पीटलचे मागे असलेल्या एका ऑटोमोबाईलच्या दुकानावर सशस्त्र दरोडा टाकणाऱ्या आरोपींना चतुःश्रृंगी पोलिसांनी अवघ्या २ तासात गजाआड केले आहे.
या संदर्भात पोलिसांनी सांगितले कि,’ दिनांक २०/०९/२०२४ रोजी सायंकाळी ०५/३० वा चे सुमारास विराज ऑटोमोबाईल्स अॅण्ड वॉशिंग सेंटर, विलास तात्या बालवडकर चौक, ज्युपीटर हॉस्पीटलचे मागे, डी.एस. के. गंधकोश इमारती शेजारी, बालेवाडी, पुणे याठिकाणी एका ऑटोमोबाईलच्या दुकानावर आठ ते नऊ जणांनी तीन दुचाकींवर येवून दुकान मालकास तसेच दुकानामध्ये आलेल्या त्यांच्या चार मित्रांना लोखंडी हत्याराने तसेच लाकडी दांडक्याने मारहाण करून धमकावून त्यांचेकडील रोख रक्कम ४९,०००/- रु व २०,०००/- रु चा मोबाईल फोन असा एकूण ६९,०००/- रु चा मुद्देमाल हे जबरदस्तीने घेवून गेलेबाबत सिध्देश्वर दिगंबर ढेरे, वय ३४ वर्षे, धंदा मोटारगॅरेज, रा. फ्लॅट नं. ३०३, क्रिआंश बिल्डींग, पाटीलवस्ती, बालेवाडी, पुणे यांनी चतुःश्रृंगी पोलीस स्टेशन येथे तक्रार दिल्याने गु. र. क्र. ७५८/२०२४ भा. न्या. सं. कलम ३१० (२) ३११ सह भारतीय हत्यार कायदा कलम ४(२५) सह महाराष्ट्र पोलीस कायदा कलम ३७ (१),१३५ अन्वये दाखल करण्यात आला .
या गुन्हयाच्या घटनास्थळी चतुःश्रृंगी पोलीस स्टेशनचे वरिष्ठ पोलीस निरीक्षक महेश बोळकोटगी, पो. नि. (गुन्हे) युवराज नांद्रे, विजयानंद पाटील तसेच तपास पथकामधील आधिकारी व अंमलदार यांनी तात्काळ भेट देवून घटनास्थळावरील सीसीटिव्ही फुटेज तपासून तपासाची चक्रे फिरवली. तपास पथकाने गोपनिय बातमीदारामार्फत माहिती काढून नमूद गुन्हा हा औंध येथील रेकॉर्डवरील गुन्हेगार आल्ल्या सय्यद, मोहन आडागळे व देवा शिरोळे यांनी त्यांच्या साथीदारांसह केला असून ते सध्या पिंपळे गुरव येथे असल्याची खात्रीलायक माहिती मिळाल्याने पोलीस पथकासह पिंपळे गुरव येथे जावून सापळा रचून गुन्हयातील आरोपी १) अलीम ऊर्फ आल्ल्या सिंकदर सय्यद, रा. पी एम सी कॉलनी बिल्डीग, रुम नं. ४२, नागरास रोड, वात्सल्य विहार शेजारी, औध, पुणे, २) देव ऊर्फ देवा काकासाहेब शिरोळे, रा. भोई गल्ली, विठठल मंदीराजवळ, कसबा पेठ, पुणे व ३) मोहन अरुण अडागळे, रा. जय गणेश कॉलनी, दत्तनगर, बाबुलाल किराणामाल दुकानाशेजारी, विधातेवस्ती, औध, पुणे यांना ताब्यात घेवून अटक करण्यात आली . तपासादरम्यान आरोपीतांनी सदरचा गुन्हा हा त्यांचे इतर पाच ते सहा ज्युवेनाईल साथीदारांसह केला असल्याची कबूली दिली आहे. गुन्हयाच्या तपासामध्ये आरोपींनी सदरचा गुन्हा हा पैशांच्या हव्यासापोटी केल्याचे प्रथमदर्शनी निष्पन्न झाले आहे. तरी गुन्हयाचा पूढील तपास सहा. पोलीस निरीक्षक० नरेंद्र पाटील हे करत आहेत.
सदरची उल्लेखनीय कामगिरी पोलीस आयुक्त पुणे शहर अमितेशकुमार, पोलीस सह- आयुक्त पुणे शहर रंजनकुमार शर्मा, मा. अपर पोलीस आयुक्त पुर्व प्रादेशिक विभाग, पुणे शहर, श्री मनोज पाटील, पोलीस उप आयुक्त, परि-४, पुणे शहर, हिंमत जाधव, सहा पोलीस आयुक्त, खडकी विभाग, पुणे शहर, श्रीमती अनुजा देशमाने यांचे मार्गदर्शनाखाली चतुःश्रृंगी पोलीस स्टेशनचे वरिष्ठ पोलीस निरीक्षक महेश बोळकोटगी, पोलीस निरीक्षक (गुन्हे) युवराज नांद्रे, पोलीस निरीक्षक (गुन्हे) विजयानंद पाटील, सपोनि नरेंद्र पाटील, पोउनि प्रणिल चौगुले, पोहवा दुशिंग, पोहवा वाघवले, पोहवा दांगडे, पोहवा दुर्गे, पोहवा मोमीन, पोहवा विशाल शिर्के, पोहवा श्रीधर शिर्के, पोहवा माने, पोशि भांगले, पोशि खरात व पोशि तरंगे यांनी केली आहे.

पुणे- महापालिकेतील आरोग्य खात्यात नियमबाह्य बदल्या आणि कमाईच्या जागा मिळविण्यासाठीची रस्सीखेच झाल्यावर आता शहरात डेंग्यू आणि चिकन गुनिया ने थैमान घातले असताना महापालिकेचे आरोग्य प्रमुख अजूनही पुण्यात बदली करवून घेतल्याच्या आनंदी गुंगीतच आहेत काय ? असा सवाल विचारला जाऊ लागला आहे तर एक्सपायरी डेट च्या औषधांच्या अद्लाबद्लीत आणि भांडारात अडकून पडलेले सहायक प्रमुख अजूनही UK तच मौजमजा करताहेत काय ?तसेच त्यांच्या सोनेरी टोळीतील आणखी प्रसिद्धीचे आणि लोभी कार्यकर्त्यांचे सोनेरी वलय प्राप्त झालेले अधिकारी आता कोणत्या षड्यंत्रात बिझी आहेत ? असे सवाल करत आरोग्य खात्यावर आता भडीमार होऊ पाहतो आहे.याच पार्श्वभूमीवर सत्ताधारी म्हणून यशस्वी कारकीर्द सांभाळलेल्या माजी सभागृहनेते गणेश बिडकर यांनी शहरातील अनारोग्याच्या स्थितीवर महापालिका आयुक्तांचेच डोळे उघडावेत म्हणून त्यांना एक पत्रही पाठविले आहे .

गणेश बिडकर यांनी काय म्हटले आहे पत्रात ते वाचा जसेच्या तसे ….

सध्यःस्थितीमध्ये संपुर्ण पुणे शहरामध्ये मोठया प्रमाणावर डेंग्यु, चिकनगुणिया व इतर साथीच्या रोगांच्या रुग्णांची संख्या झपाटयाने वाढत आहे. यामध्ये पुणे शहरातील सर्वच भागांमधील नागरिक या रोगांचे बळी झाले असल्याने पुणे शहरातील सर्व छोटे-मोठ्या रुग्णालयांमध्ये नागरिकांना औषधोपचाराकरिता बेडसाठी प्रतिक्षा करावी लागत असून वेळेवर बेड उपलब्ध होत नाहीत. यामुळे अनेक नागरिकांची तब्येत खालावत असून यामध्ये काही नागरिकांना आपला जीव देखील गमवावा लागत आहे.
तसेच पुणे मनपामार्फत कीटक फवारणी देखील फक्त पुणे मनपाच्या कायम सेवकांमार्फत सुरु असून सदर सेवक संख्या ही अपुरी असल्याने पुणे शहराच्या संपुर्ण परिसरामध्ये कीटक फवारणी पुर्णपणे होत नाही. त्याचअनुषंगाने पुणे मनपामार्फत गेले अनेक वर्षांपासून कीटक फवारणी करिता निविदा राबवून कंत्राटी कर्मचा-यांमार्फत पुणे शहरामध्ये संपुर्ण परिसरामध्ये कीटक फवारणी करण्यात येत होती, परंतु गेले ३ ते ४ वर्षे सदर निविदा प्रक्रिया न राबविल्यामुळे पुणे शहराच्या संपुर्ण भागात कीटक फवारणी होत नाही व त्यामुळेच सर्वत्र साथीचे रोग झपाटयाने पसरत आहेत.
याबाबत आज दि. २०/०९/२०२४ रोजी मी महापालिका आयुक्त, पुणे मनपा यांची समक्ष भेट घेतली व महापालिका आयुक्त यांना सध्यःस्थितीमध्ये संपुर्ण पुणे शहरामध्ये मोठ्या प्रमाणावर डेंग्यु, चिकनगुणिया व इतर साथिच्या रोगांचा प्रमाण वाढत असल्याने सदर रोगांबाबत पुणे मनपामार्फत त्वरीत आवश्यक त्या सर्व उपाययोजना करून साथीच्या रोगांना नियंत्रणात आणावे व याबाबत संपुर्ण पुणे शहरामध्ये जनजागृती करण्यात यावी. पुण्यातील नागरिकांच्या आरोग्याची दक्षता आपण आता तरी घ्याल अशी अपेक्षा आहे.

पुणे, दि.२१ :  छत्रपती शिवाजी महाराजांचे ‘मराठा लष्करी भूप्रदेश’अंतर्गत जिल्ह्यातील शिवनेरी, लोहगड आणि राजगड किल्ले जागतिक वारसा स्थळाच्या यादीत नामांकनाच्या अनुषंगाने जनजागृती कार्यक्रम जिल्हा प्रशासन, तुळजाभवानी मर्दानी खेळ प्रतिष्ठान आणि सांस्कृतिक सेवा संस्था यांच्या संयुक्त विद्यमाने नौरोसजी वाडिया महाविद्यालय येथे आयोजित करण्यात आला.

यावेळी पुरातत्व विभागाचे सहायक संचालक डॉ. विलास वाहणे, नौरोसजी वाडिया महाविद्यालयाचे प्राचार्य व्ही. व्ही. चाबुकस्वार, उप जिल्हा नियोजन अधिकारी गणेश दानी, नौरोसजी वाडिया महाविद्यालयाच्या डॉ. मंजुषा मुसमदे,  समन्वयक प्रा. प्रमिला दस्तुरे, विद्यार्थी उपस्थित होते.

जिल्हा प्रशासनाच्यावतीने करण्यात येणाऱ्या जनजागृती मोहीमेबाबत माहिती देऊन डॉ. वाहणे म्हणाले, जिल्हाधिकारी डॉ. सुहास दिवसे यांच्या मार्गदर्शनाखाली जागतिक वारसा स्थळाच्या यादीत नामांकनासाठी प्रस्तावित किल्ल्यांबाबत जनजागृतीच्या अनुषंगाने जिल्ह्यात विविध उपक्रम, जनजागृती मोहीम राबविण्यात येत आहेत. या मोहिमेत नागरिकांनी सहभागी व्हावे, असे आवाहन डॉ. वाहणे यांनी केले.

यावेळी लोहगड किल्ल्याला जागतिक वारसा स्थळ नामांकन यादीत समावेशनाबाबत प्रोत्साहनात्मक स्वाक्षरी मोहीमही आयोजित करण्यात आली.

पुणे : महाराष्ट्रीय कलोपासक आयोजित पुरुषोत्तम करंडक स्पर्धेच्या अंतिम फेरीला शनिवारी (दि. 21) सुरुवात झाली. रविवारी (दि.22) दोन सत्रात संघांचे सादरीकरण होणार असून त्यानंतर पुरुषोत्तम करंडकावर कोण नाव कोरतो ते स्पष्ट होणार आहे. भरत नाट्य मंदिर येथे स्पर्धा सुरू आहे. स्पर्धेचे जनक राजाभाऊ नातू यांचे यंदाचे जन्मशताब्दी वर्ष असून स्पर्धेचे 59वे वर्ष आहे.
शनिवारी सखा (आय. एम. सी. सी.), तेंडुलकर्स्‌ (म. ए. सो.चे सिनिअर कॉलेज), 11,111 (फर्ग्युसन महाविद्याल) या एकांकिकांचे सादरीकरण झाले. तर रविवारी (दि. 22) सकाळच्या सत्रात पार्टनर (स. प. महाविद्यालय, पुणे), तृष्णाचक्र (डॉ. भानुबेन नानावटी कॉलेज ऑफ आर्किटेक्चर), पाटी (विद्या प्रतिष्ठान कला, वाणिज्य, विज्ञान महाविद्यालय, बारामती) या एकांकिकांचे तर सायंकाळच्या सत्रात देखावा (न्यू आर्टस्‌‍ कॉमर्स ॲन्ड सायन्स महाविद्यालय, अहमदनगर), बस नं. 1532 (गरवारे वाणिज्य महाविद्यालय), बिजागरी (बी. व्ही. जी. कॉलेज ऑफ इंजिनिअरिंग टेक्नॉलॉजी) या एकांकिकांचे सादरीकरण होणार आहे.
पुरुषोत्तम करंडक स्पर्धेच्या अंतिम फेरीचा पारितोषिक वितरण समारंभ शनिवार, दि. 28 सप्टेंबर रोजी सायंकाळी 5 वाजता भरत नाट्य मंदिर येथे आयोजित करण्यात आला असून पारितोषिक वितरण ज्येष्ठ नाटककार चं. प्र. देशपांडे यांच्या हस्ते होणार आहे.

पुणे : प्रभाजी महान आणि प्रतिभावान कलाकार होत्या. त्यांचा व माझा अनेक वर्षांचा स्नेह होता. आमचे नाते मैत्रीपूर्ण होते. ज्यात हसी, मजाक, प्यार, गुस्सा यांचा मिलाफ होता. त्या सतत गायन, लेखन, मनन, चिंतन, अभ्यास यात व्यग्र असत. संगीत हेच त्यांचे पहिले प्रेम होते, असे गौरवोद्गार ज्येष्ठ बासरीवादक पद्मविभूषण पंडित हरिप्रसाद चौरसिया यांनी काढले. ज्यांच्याकडून विद्या मिळवावी, ज्यांना गुरूस्थानी मानावे असे कलाकार आता फार कमी राहिलेले आहेत, अशी टिप्पणीही त्यांनी केली.
डॉ. प्रभा अत्रे शिष्य परिवारातर्फे स्वरयोगिनी, पद्मविभूषण डॉ. प्रभा अत्रे यांच्या साहित्य, कला आणि संगीत या क्षेत्रांमधील कार्यावर आधारित ‌‘स्वरयोगिनी : भारतीय संगीतातील नवोन्मेष‌’ या महोत्सवातील पहिल्या दिवशी (दि. 21) प्रभा अत्रे लिखित ‌‘स्वरमयी‌’ पुस्तकाच्या पाचव्या आणि ‌‘सुस्वराली‌’ या पुस्तकाच्या चौथ्या आवृत्तीचे लोकार्पण झाले. त्या वेळी पंडित चौरसिया बोलत होते. ज्येष्ठ पत्रकार व साहित्यिक विजय कुवळेकर, डॉ. प्रभा अत्रे फाऊंडेशनचे अध्यक्ष ॲड. अशोक वळसंगकर, डॉ. मदन फडणीस, ॲड. किरण कोठाडिया, फाऊंडेशनचे कार्यक्रम निर्देशक प्रसाद भडसावळे, डॉ. मनिषा रवी प्रकाश व्यासपीठावर होते. ज्येष्ठ कवी, साहित्यिक, समीक्षक डॉ. अशोक वाजपेयी दृकश्राव्य प्रणालीद्वारे कार्यक्रमात सहभागी झाले होते. बालगंधर्व रंगमंदिरात कार्यक्रमाचे आयोजन करण्यात आले होते.
डॉ. प्रभा अत्रे यांनी भारतीय संगीतविषयक केलेल्या व्याख्यांनाचा समावेश असलेल्या ‌‘आलोक‌’ या 19 भागांच्या दृकश्राव्य मालिकेच्या इंग्रजी आवृत्तीचे लोकार्पण या प्रसंगी करण्यात आले.
डॉ. अशोक वाजपेयी म्हणाले, प्रभा अत्रे या इतर संगीतकारांपेक्षा वेगळ्या होत्या. त्यांच्यामध्ये अनेक दुर्लभ गुण होते. त्या उत्तम गायिका, संगीतकार, लेखिका, अभ्यासक होत्या. त्यांचे संगीताविषयीचे लिखाण अतिशय विचारपूर्वक केलेले असे. व्यावहारिक संगीतकाराच्या भूमिकेतून आलेल्या अनुभवातून त्यांचे विचार कागदावर उतरत असल्याने त्यात प्रामाणिकपणा व विश्वसनीयता होती.
प्रभाताई अत्रे यांच्या आठवणींना उजाळा देताना विजय कुवळेकर म्हणाले, डॉ. प्रभा अत्रे या अत्यंत साध्या आणि तेजस्वी कलाकार होत्या. त्यांच्या आंतरिक तेजाची प्रभा त्यांच्या व्यक्तीमत्त्वातून जाणवत असे. कलाकार म्हणून असलेल्या मोठेपणाचे ओझे त्यांनी कधीच वागविले नाही. प्रतिभावंत कलाकार असूनही माणूस म्हणून त्या खूप महान होत्या. कसोटीच्या प्रसंगातही त्यांनी स्वत्व व सत्व सोडले नाही. संगीत क्षेत्रातील शुद्धपण जपले जावे याकरीता त्या स्पष्ट भाष्य करीत. कृतज्ञता हा त्यांच्या स्वभावाचा लोभसवाणा भाग होता. त्या संवेदनशीलही होत्या. परंपरेच्या चौकटीच्या भिंती न बांधता प्रभाताईंनी गायन क्षेत्रात काळानुरूप बदल स्वीकारात नवनवीन प्रयोगही केले. त्या अपूर्णत्वाची जाण ठेवून पूर्णत्वाचा ध्यास घेतलेल्या कलाकार होत्या.
डॉ. प्रभा अत्रे फाऊंडेशनच्या सविच डॉ. भारती एम. डी. यांनी ‌‘स्वरमयी‌’ आणि ‌‘सुस्वरली‌’ पुस्तकांच्या प्रकाशनाविषयी तसेच फाऊंडेशनच्या आगामी उपक्रमांची माहिती दिली.
मान्यवरांचे सत्कार अशोक वळसंगकर आणि डॉ. मनिषा रवी प्रकाश यांनी केले. सूत्रसंचालन राजेश दामले यांनी केले तर आभार प्रसाद भडसावळे यांनी मानले.
कार्यक्रमाच्या उत्तरार्धात डॉ. प्रभा अत्रे यांच्या पुस्तकांमधील निवडक सांगीतिक लेखांचे अभिवाचन आणि त्यांनी रचलेल्या वेगळ्या घाटातील बंदिशींवर आधारित सांगीतिक सादरीकरण झाले. यात डॉ. केशवचैतन्य कुंटे, डॉ. वंदना बोकील-कुलकर्णी तसेच डॉ. प्रभा अत्रे यांचे शिष्य डॉ. चेतना पाठक व डॉ. अतिंद्र सरवडिकर यांचा सहभाग होता. कलाकारांना माधव मोडक (तबला), लीलाधर चक्रदेव (संवादिनी) यांनी साथसंगत केली. कलाकारांचे स्वागत रघुवीर कुलकर्णी, अशोक वळसंगकर यांनी केले.

थकबाकीमुक्तीच्या संधीला उरले आता ७० दिवस

पुणे, दि. २१ सप्टेंबर २०२४: कायमस्वरुपी वीजपुरवठा खंडित असलेल्या ग्राहकांना केवळ मूळ थकबाकीची रक्कम एकरकमी किंवा सहा हप्त्यांत भरणा करून थकबाकीमुक्ती व पुनर्वीजजोडणीची संधी महावितरण अभय योजनेतून उपलब्ध झाली आहे. संपूर्ण व्याज व विलंब आकार १०० टक्के माफ होणाऱ्या या योजनेत पश्चिम महाराष्ट्रामध्ये आतापर्यंत ५ हजार ५३८ ग्राहकांनी सहभाग नोंदविला आहे. त्यातील तब्बल ५ हजार ३१२ वीजग्राहकांनी आणखी सूट घेऊन थकबाकी एकरकमी भरण्यास पसंती दिली आहे.

वीजबिलांच्या थकबाकीमुळे दि. ३१ मार्च २०२४ पर्यंत कायमस्वरुपी वीजपुरवठा खंडित झालेल्या वीजग्राहकांसाठी महावितरण अभय योजना ९१ दिवसांसाठी म्हणजे दि. १ सप्टेंबर ते दि. ३० नोव्हेंबरपर्यंत आहे. आता या योजनेच्या कालावधीला ७० दिवस शिल्लक आहेत. कृषी व सार्वजनिक पाणीपुरवठा योजना वगळून उर्वरित घरगुती, वाणिज्यिक, औद्योगिक व इतर वीजग्राहकांसाठी ही योजना आहे. तसेच मूळ थकबाकीचा एकरकमी भरणा केल्यास त्यात लघुदाब ग्राहकांना आणखी १० टक्के तर उच्चदाब ग्राहकांना ५ टक्के सूट मिळत आहे. किंवा मूळ थकबाकीची सुरवातीला ३० टक्के रक्कम भरून उर्वरित ७० टक्के रक्कम व्याजमुक्त सहा हप्त्यांत भरण्याची देखील सोय आहे.

पश्चिम महाराष्ट्रातील ६ लाख २९ हजार ८३ अकृषक ग्राहकांकडे सद्यस्थितीत ९०१ कोटी ९७ लाख रुपयांची एकूण थकबाकी आहे. यातील मूळ थकबाकीपोटी ७६२ कोटी १९ लाख रुपयांचा भरणा केल्यास संपूर्ण व्याज व विलंब आकाराचे १०० टक्के म्हणजे १३९ कोटी ७८ लाख रुपये माफ होणार आहेत. कायमस्वरुपी वीजपुरवठा खंडित असलेल्या या सर्व ग्राहकांनी अभय योजनेत सहभागी होऊन थकबाकीमुक्त् व्हावे असे आवाहन पुणे प्रादेशिक संचालक श्री. भुजंग खंदारे यांनी केले आहे. 

पश्चिम महाराष्ट्रात आतापर्यंत ५ हजार ५३८ वीजग्राहकांनी थकबाकीमुक्तीसाठी या योजनेत सहभाग घेतला आहे. या ग्राहकांकडे एकूण ११ कोटी ५५ लाख रुपयांची एकूण थकबाकी असून त्यातील मूळ थकबाकीच्या १० कोटी ६ लाखांचा भरणा केल्यास व्याज व विलंब आकाराची संपूर्ण १ कोटी ५० लाख रुपये माफ होणार आहे. विशेष म्हणजे यातील ५ हजार ३१२ ग्राहकांनी मूळ थकबाकीचे ९ कोटींची रक्कम एकरकमी भरण्यास पसंती दिली आहे. त्यापैकी ४ हजार ६२ ग्राहकांनी ४ कोटी ५ लाख रुपयांचा भरणा केला आहे. पुणे जिल्ह्यात २७८८, सातारा- २५१, सोलापूर- ८७९, कोल्हापूर- ३२१ आणि सांगली जिल्ह्यातील १२९९ थकबाकीदारांनी या योजनेत सहभाग घेतला आहे. 

वीजबिलांची थकबाकी असलेल्या एखाद्या जागेची मालकी बदलल्यानंतर देखील नवीन जागामालक किंवा ताबेदार यांना थकबाकीची रक्कम भरावी लागेल असा निकाल मा. सर्वोच्च न्यायालयाने दिला आहे. त्यामुळे जागा वापरात असो किंवा नसो, वीजबिलांच्या थकबाकीमधून मुक्त होण्याची संधी महावितरणकडून देण्यात आली आहे. तसेच वीजग्राहकांना मागणीनुसार नवीन वीजजोडणी देण्यात येत आहे. महावितरणच्या फ्रेंचायझी क्षेत्रातील ग्राहक देखील या योजनेत सहभागी होऊ शकतात.

या योजनेत सहभागी होण्यासाठी महावितरणची www.mahadiscom.in ही वेबसाईट व मोबाईल अॅपद्वारे योजनेत सहभागी होण्याची व थकबाकी भरण्याची सोय उपलब्ध आहे. तसेच योजनेचा लाभ घेण्यासाठी व अधिक माहितीसाठी नजीकच्या महावितरण कार्यालयात संपर्क साधावा असे आवाहन करण्यात आले आहे.

यंदा निवडणुकीत २ शिवसेना २ राष्ट्रवादी त्यामुळे रंजकता वाढणार- वंचीत , एम आय एम सह आता तिसरी आघाडी ही येणार –

महाराष्ट्रातील 288 सदस्यीय महाराष्ट्र विधानसभेच्या यंदाच्या निवडणुकीकडे अवघ्या देशाचे लक्ष लागले आहे. गत काही वर्षांत राज्याचे शिवसेना व राष्ट्रवादी काँग्रेस या 2 महत्त्वाच्या पक्षांत फूट अनुभवली आहे. सध्या या दोन्ही पक्षांचे 2 स्वतंत्र गट निवडणुकीच्या मैदानात आहेत. त्यातच माजी खासदार राजू शेट्टी यांच्या नेतृत्वात राज्यात तिसरी आघाडी स्थापन करण्याचेही प्रयत्न सुरू असल्यामुळे ही निवडणूक चांगलीच रंजकदार होणार आहे.

27 तारखेपासून सलग 2 दिवस बैठक–

मुंबई-केंद्रीय निवडणूक आयोगाचे एक पथक येत्या 27 व 28 सप्टेंबर रोजी महाराष्ट्राच्या दौऱ्यावर येणार आहे. हे पथक राज्यातील प्रमुख अधिकाऱ्यांची बैठक घेऊन स्थितीचा आढावा घेणार आहे. या बैठकीमुळे महाराष्ट्र विधानसभा निवडणुकीचा कार्यक्रम जवळपास निश्चित झाल्याची चर्चा असून, त्याला या बैठकीनंतर हिरवा कंदील मिळेल असा दावा केला जात आहे.
महाराष्ट्र विधानसभेची निवडणूक लवकर होण्याची शक्यता आहे. निवडणूक आयोग पुढील महिन्यात केव्हाही निवडणुकीच्या तारखांची घोषणा करण्याची शक्यता आहे. त्यानुसार सर्वच राजकीय पक्ष आपापल्या तयारीला लागलेत. त्यातच केंद्रीय निवडणूक आयोगाचे एक पथक येत्या 27 व 28 सप्टेंबर रोजी महाराष्ट्राच्या दौऱ्यावर येणार आहे. त्यामुळे निवडणुकीच्या तारखांची वाट पाहणाऱ्या सत्ताधारी महायुती व विरोधी बाकावरील महाविकास आघाडीने आपले कान टवकारलेत.

यासंबंधीच्या वृत्तानुसार, केंद्रीय निवडणूक आयोगाचे पथक 27 तारखेला महाराष्ट्राच्या दौऱ्यावर येऊन सलग दोन दिवस राज्यातील प्रमुख अधिकाऱ्यांशी संवाद साधणार आहे. या बैठकीत राज्यातील निवडणूक तयारीचा आढावा घेऊन हे पथक संबंधितांना योग्य ते दिशानिर्देश व सूचना करेल असा अंदाज आहे. या बैठकीनंतर महाराष्ट्र विधानसभा निवडणुकीसाठी ग्रीन सिग्नल मिळण्याची शक्यता आहे. विशेषतः राज्यातील सणवार व इतर महत्त्वाचे दिवस पाहून या बैठकीत निवडणुकीची तारीख ठरवली जाईल असे सांगितले जात आहे.