संत नामदेव महाराज यांच्या  ७५४ व्या जयंतीनिमित्त श्री क्षेत्र पंढरपूर ते श्री क्षेत्र घुमान सायकल वारीचे आयोजन

पुणे :  संत नामदेव महाराज यांच्या  ७५४ व्या जयंतीनिमित्त पंढरपूर (महाराष्ट्र) ते श्री क्षेत्र घुमान (पंजाब) सायकल वारीचे आयोजन करण्यात आले आहे. पुण्यात आल्यावर या सायकल वारीचे  श्री नामदेव शिंपी समाज पुणे लष्कर, नामदेव समाजोन्नती परिषद व पुणेकरांनी उत्स्फूर्त स्वागत केले. यावेळी लक्ष्मी रोड मार्गे बुधवार पेठ येथील संत नामदेव मंदिरापर्यंत नामदेव महाराजाच्या जयघोषात मिरवणूक काढण्यात आली होती.
भागवत धर्म प्रसारक मंडळ, नामदेव समाजोन्नती परिषद, महाराष्ट्र राज्य, पालखी सोहळा पत्रकार संघ महाराष्ट्र राज्य, श्री नामदेव दरबार कमिटी श्री क्षेत्र घुमान (पंजाब) यांच्या संयुक्त विद्यमाने या वारीचे आयोजन करण्यात आले. पालखी सोहळा पत्रकार संघाचे अध्यक्ष सूर्यकांत भिसे, नामदेव समाजोन्नती परिषदेचे अध्यक्ष संजय नेवासकर, सरचिटणीस डॉ. अजय फुटाणे यांनी सोहळ्याचे संयोजन केले आहे. पालखीचे स्वागत पुणे विभागीय उपाध्यक्ष रणजित माळवदे, जिल्हाध्यक्ष विजय कालेकर, ना स.प. पुणे शहर शाखेचे अध्यक्ष संदीप लचके, सचिव सुभाष मुळे, प्रशांत सातपुते, सुभाष पांढरकामे, सोमनाथ मेटे, कुंदन गोरटे, अक्षय मांढरे यांनी केले.

श्री क्षेत्र पंढरपूरहून या सोहळ्यास प्रारंभ झाला. सोलापूर, सातारा, पुणे जिल्ह्यात निरा, जेजुरी, सासवड, हडपसर मार्गे वारी पुणे शहरात दाखल झाली. पालखी सोहळा व सायकल वारीची मिरवणूक बुधवार पेठ येथील नामदेव मंदिर येथे आल्यानंतर महिलांनी ओवाळून व पुष्पवृष्टी करीत स्वागत केले. यावेळी सायकल स्वारांचा सत्कार देखील करण्यात आला.

यावेळी वारीतील सहभागी सायकल स्वारांना मेडिकल किट देण्यात आले. सायकल स्वारांना प्रोत्साहन मिळावे यासाठी नृत्य व सायकल वारीवर हिंदी गीताचे सादरीकरण करण्यात आले. या गीताची रचना करणारे सुधाकर मेहेर व संगीतकार हरीश धोंगडे यांचा विशेष सन्मान करण्यात आला. तसेच संत शिरोमणी नामदेव महाराज यांच्या पादुकांची पूजा करून महाआरती करण्यात आली. यावेळी बुधवार पेठ शिंपी समाज व संस्थेचे अध्यक्ष कैलास देवळे, चिटणीस डॉ. लक्ष्मण कालेकर यांच्यावतीने उपस्थितांसाठी महाप्रसादाचे आयोजन करण्यात आले. 

पंच पक्वांन्नाच्या नैवेद्याचे सामाजिक संस्थांना दान

पुणे :
हिंदुस्थानातील पहिला सार्वजनिक गणपती ‘श्रीमंत भाऊसाहेब रंगारी गणपती’ येथे त्रिपुरारी पौर्णिमेनिमित्त दीपोत्सव, तुळशी विवाह आणि ५६ भोग चा नैवेद्य करण्यात आला. यावेळी विविध पंच पक्वान आणि फळाची आरास बाप्पा समोर साकारण्यात आली होती.
श्रीमंत भाऊसाहेब रंगारी ट्रस्टने नेहमी प्रमाणे सामाजिक भान राखून बाप्पाला दाखविण्यात येणाऱ्या नैवद्यातील सर्व मिठाई, फराळ आणि फळे सामाजिक संस्थांना देण्याचा निर्णय घेतला आहे. त्यानुसार दत्तवाडी येथील देवतारू आश्रम आणि मुळशी खोऱ्यातील कातकर वस्ती वरील ३०० विद्यार्थ्याना शिक्षण देणाऱ्या आणि दररोज ९० मुलांना जेवण पुरविणाऱ्या पौड येथील ‘डोनेट ऐड’ संस्था आणि भाजे येथील बालग्राम केंद्र यासर्वांना हे सर्व नैवेद्यचे पदार्थ देण्यात येणार आहे.

दिव्यांच्या सजावटीने श्रीमंत भाऊसाहेब रंगारी बाप्पाचे मंदिर उजळले
त्रिपुरारी पौर्णिमेंनिमित्त श्रीमंत भाऊसाहेब रंगारी गणपती मंदिरात दिवे लावून फुलांनी सुंदर सजावट करण्यात आली होती. काचेच्या ग्लासमधील दिव्यांनी संपूर्ण मंदीर उजळून निघाले होते. यावेळी भाविकांनी दर्शनासाठी मोठी गर्दी केली होती. ट्रस्टचे सर्व पदाधिकारीही यावेळी उपस्थित होते.

पुणे: विधानसभा सार्वत्रिक निवडणुकीच्या पार्श्वभूमीवर पुणे जिल्ह्यात राज्य उत्पादन शुल्क विभागाच्यावतीने १ ऑक्टोबर २०२४ पासून १ हजार २६७ गुन्हे नोंदविण्यात आले असून १ हजार १७९ जणांना अटक करण्यात आली आहे. या कारवाईत ९८२ वाहनासह ५ कोटी ५५ लाख ६२ हजार रुपये किंमतीचा मुद्देमाल जप्त करण्यात आलेला आहे, अशी माहिती राज्य उत्पादन शुल्क पुणे विभागाचे अधीक्षक चरणसिंह राजपूत यांनी दिली आहे.

जिल्ह्यात सराईत गुन्हेगारांविरुद्ध महाराष्ट्र दारुबंदी कायदा १९४९ चे कलम ९३ अन्वये ५९ प्रस्ताव संबंधित दंडाधिकाऱ्यांकडे दाखल करण्यात आले आहेत. सदर इसमांकडून चांगल्या वर्तणुकीचे बंधपत्र घेण्यात येत असून आतापर्यंत १२ प्रकरणात रक्कम ११ कोटी ८० हजार रुपये इतक्या रक्कमेचे बंधपत्रे घेण्यात आलेली आहेत. या काळात गोवा राज्य निर्मित मद्याचे तीन गुन्हे उघडकीस आले असून या गुन्ह्यांमध्ये ४१ लाख ७७ हजार ३०५ रुपये किंमतीचा मुद्देमाल २ वाहनांसह जप्त करण्यात आलेला आहे.

निवडणुकीच्या पार्श्वभूमीवर राज्य उत्पादन शुल्क आयुक्त डॉ. विजय सूर्यवंशी, पुणे जिल्ह्याचे जिल्हाधिकारी तथा जिल्हा निवडणूक अधिकारी डॉ. सुहास दिवसे, राज्य उत्पादन शुल्कचे अंमलबजावणी व दक्षता सह आयुक्त प्रसाद सुर्वे व श्री सागर धोमकर विभागीय उपायुक्त , राज्य उत्पादन शुल्क पुणे विभाग यांच्या मार्गदर्शन व सूचनेनुसार १ ऑक्टोबर २०२४ पासून विधानसभा निवडणूकीच्या पार्श्वभूमीवर विविध पथके तयार करण्यात आली आहेत. या पथकांकडून जिल्ह्यातील सर्व हातभट्टी निर्मिती, वाहतूक, विक्री, तसेच धाबे, अवैध ताडी धंदे यांच्यावर कारवाई करण्यात येत आहे.

जिल्हयात कार्यक्षेत्रामध्ये कार्यरत असलेल्या अनुज्ञप्तीचे वारंवार सखोल तपासणी करुन अनुज्ञप्तीच्या ठिकाणी नियमबाह्य बाबी आढळल्यास संबंधिताविरुद्ध नियमातील तरतुदीनुसार कठोर कारवाई करण्यासाठी विशेष निरीक्षण मोहिम राबविण्यात येत आहे. अनुज्ञप्तीद्वारे शासनाने दिलेल्या नियमांचे काटेकोरपणे पालन होईल याकरिता २४ बाय ७ गस्ती घालण्यात येत आहे. तसेच भारत निवडणूक आयोगाच्या निर्देशांचे उल्लंघन करणाऱ्या एकुण १०९ अनुज्ञप्ती विरुध्द विभागीय विसंगती नोंदविण्यात आले असुन जिल्हाधिकारी यांच्या आदेशान्वये त्यांच्यावर कठोर कारवाई करण्यात येत आहे. जिल्ह्यात अवैध मद्य वाहतुकीस आळा घालण्याच्या दृष्टीने एकूण १८ तात्पुरते चेकनाके उभारुन संशयित वाहनांची तपासणी करण्यात येत आहे. मतदारांना प्रलोभन दाखविण्यासाठी अवैध मद्याची वाहतूक होणार नाही, मद्य विक्रीच्या अनुज्ञप्त्या विहित वेळेत चालू व बंद होतील तसेच अल्पवयीन ग्राहकांना मद्यविक्री होणार नाही याबाबत दक्षता घेण्यात येत आहे. तसेच मद्य विक्रीच्या अनुज्ञप्तीचे नियमित निरीक्षण करण्यात येत आहे.

विधानसभा सार्वत्रिक निवडणूक २०२४ च्या अनुषंगाने मतदारांना प्रलोभन दाखविण्यासाठी अवैध मद्याची वाहतुक केली जाणार तसेच कुठल्याही अनुज्ञप्तीमधून विहीत वेळेच्या अगोदर व नंतर मद्य विक्री होणार नाही व वाईन शॉप व देशी दारुच्या दुकानांमधून घाऊक विक्री होणार नाही याकरिता डॉ. सुहास दिवसे, मा. जिल्हाधिकारी तथा जिल्हा निवडणूक अधिकारी, पुणे यांनी त्यांसबंधित कडक कारवाई करण्याचे निर्देश राज्य उत्पादन शुल्क विभागाच्या अधिकाऱ्यांना दिले आहेत.

जिल्ह्यात १८ नोव्हेंबर २०२४ रोजी सायंकाळी ६ वाजल्यापसून ते २० नोव्हेंबर २०२४ मतदानप्रक्रिया पार पडेपर्यंत आणि २३ नोव्हेंबर २०२४ मतमोजणीच्या दिवशी सर्व विधानसभा मतदार संघाचे अधिकृत निकाल घोषित होईपर्यंत कोरडा दिवस (ड्रायडे) घोषित करण्यात आलेला आहे. या काळात जिल्ह्यातील मद्य विक्रीच्या अनुज्ञप्ती बंद राहतील. अवैध मद्य निर्मिती, विक्री, वाहतूक किंवा मद्य वाटप आदी संबंधी माहिती, तक्रार द्यावयाची असल्यास टोल फ्री क्रमांक १८००२३३९९९९ व राज्य उत्पादन शुल्क, पुणे विभाग अधीक्षक कार्यालयाच्या ०२०-२६१२७३२१ या क्रमांकावर संपर्क साधावा, असे आवाहन राज्य उत्पादन शुल्क अधीक्षक चरणसिंह राजपूत यांनी केले आहे.

पुणे, दि. १६ : पर्वती मतदारसंघातील ज्येष्ठ नागरिक आणि उद्योगपती चंद्रभान पुनमचंद भन्साळी यांनी वयाच्या १०४ व्या वर्षी गृहमतदानाद्वारे हक्क बजावून लोकशाहीच्या उत्सवात सहभाग नोंदवला. श्री. भन्साळी यांच्यामध्ये असलेला उत्साह आणि लोकशाहीबद्दलची दृढ निष्ठा यावेळी पहावयास मिळाली. प्रत्येकाने मतदान करून आपली लोकशाही बळकट करण्याचे आवाहन त्यांनी यावेळी केले.

निवडणूक निर्णय अधिकारी श्री मनोजकुमार खैरनार यांच्या मार्गदर्शनाखाली पर्वती मतदारसंघात गृह मतदान प्रक्रिया सूरू करण्यात आली आहे. फॉर्म १२ डी भरून गृह मतदानासाठी नोंदणी करणाऱ्या ज्येष्ठ नागरिक व दिव्यांग मतदारांच्या घरी जाऊन ही प्रक्रिया पार पाडली जात आहे. यासाठी स्वतंत्र पथकांची नियुक्ती करण्यात आली आहे. श्री. भन्साळी यांचे गृह मतदान करून घेण्यासाठी हे पथक त्यांच्या घरी पोहोचले. सहाय्यक निवडणूक निर्णय अधिकारी व्यंकटेश दुर्वास, नायब तहसीलदार सरिता पाटील पथकासोबत भन्साळी यांच्या उपस्थितीत गृहमतदानाची प्रक्रिया पार पडली.

पुणे, दि. १५: बालदिनाचे औचीत्य साधुन पुणे कॅन्टोन्मेंट (अ.जा.) विधानसभा मतदार संघात स्वीप व्यवस्थापन कक्षामार्फत विविध शाळा, महाविद्यालयांमध्ये ७ हजार ६०० संकल्प पत्रांचे वाटप करुन विद्यार्थ्यांमार्फत “लोकशाहीच्या उत्सवात आई-बाबा तुम्ही सहभाग घ्या” अशी साद घालण्यात आली.

मतदान जनजागृती अंतर्गत कॅन्टोन्मेंट मतदार संघातील सरदार दस्तुर कॉमर्स ॲन्ड सायन्स कॉलेज, सरदार दस्तुर हायस्कुल व इतर संलग्न शाळा, कस्तुरबा गांधी मनपा शाळा, वाडीया ज्युनीअर कॉलेज आर्टस् सायन्स, वाडीया ज्युनीअर कॉलेज कॉमर्स, वाडीया ज्युनीअर इंजिनीअरींग कॉलेज, संत गाडगे महाराज शाळा, कॅम्प एज्युकेशन डॉ.सायरा पुनावाला स्कूल, रवींद्रनाथ टागोर स्कूल, पुना इस्लामीया उर्दु स्कुल तसेच संत गाडगे महाराज या शाळा, महाविद्यालयांमध्ये संकल्प पत्राचे वाटप करण्यात आले

शाळेत पालक सभेला उपस्थित पालकांना मतदानाची शपथ घेण्यात आली तसेच मतदानाबाबत मार्गदर्शन करण्यात आले. मतदानाचा टक्का वाढविण्यासाठी पुणे कॅन्टोन्मेंट मतदार संघात आत्तापर्यंत जवळपास ४० शाळा,महाविद्यालये, २०० गृहनिर्माण सोसायट्या व ३० शासकीय, निमशासकीय कार्यालयांमध्ये जाऊन २८ हजार संकल्प पत्रांचे स्वीप कक्षामार्फत वाटप करण्यात आले आहे.

पुणे-
प्लॉटिंगबाबत राष्ट्रीय हरित प्राधिकरणाकडे दिलेली तक्रार मागे घ्या, असे म्हणत माहिती अधिकार कार्यकर्त्याला बेदम मारहाण केली. तसेच, अपहरण करून जीवे मारण्याची धमकी दिल्याप्रकरणी भाजपच्या माजी नगरसेविकेचा पती आणि भाजपच्या माजी प्रभाग स्वीकृत सदस्यासह ११ जणांवर चिखली पोलीस ठाण्यात गुन्हा दाखल करण्यात आला आहे. ही घटना चिखलीतील जाधववाडी येथे घडली.

अमित रमेश मोहिते, (वय – ३०, रा. गणेशसिद्धी सोसायटी, नेवाळे वस्ती, चिखली) यांनी चिखली पोलीस ठाण्यात फिर्याद दिली आहे. त्यावरून भाजपचे माजी प्रभाग स्वीकृत सदस्य दिनेश लालचंद यादव, भाजपच्या माजी नगरसेविका अश्विनी जाधव यांचा पती संतोष तात्या जाधव यांच्यासह निलेश लालचंद यादव, गणेश किसन यादव, दिपक घन, गणेश नंदू मोरे, सोमनाथ यादव, स्वराज पिंजण, प्रकाश चौधरी, मनोज मोरे, कुंदन गुप्ता (सर्व रा. चिखली) यांच्यावर गुन्हा दाखल करण्यात आला आहे.मिळालेल्या माहितीनुसार, ” मोहिते हे माहिती अधिकार कार्यकर्ता आहेत. ते कामानिमित्त चिखली येथे थांबले असताना आरोपी त्याठिकाणी आले. चिखली येथील प्लॉटिंगबाबत एनजीटीकडे दिलेली तक्रार मागे घ्या. तेथे राहणारे लोक माझ्याकडे आले होते. हे लोक माझे आहेत, असे सांगितले.

फिर्यादी व त्यांचे मित्र गोपाळ यांनी त्यांना आमचा व तुमचा काही संबध नाही. आम्ही न्यायालयात त्याबाबत उत्तर देवू, असे सांगितले. त्यामुळे आरोपींनी आपापसात संगनमत करून काठी व लाथाबुक्क्यांनी बेदम मारहाण केली. यामध्ये मोहिते जखमी झाले असून त्यांचा दात तुटला. त्यानंतर आरोपींनी मोहिते यांचे मोटारीत बसवून अपहरण केले. पुन्हा मारहाण करून जीवे मारण्याची धमकी देऊन जाधववाडी येथे सोडून दिले. याबाबत सहायक निरीक्षक राम गोमारे तपास करीत आहेत.

पुणे, : पर्वती मतदारसंघामध्ये 344 मतदान केंद्रे असून 3 लाख 60 हजार 974 इतकी मतदार संख्या आहे. आज अखेर 1 लाख 44 हजार 389 मतदारांना मतदान चिठ्ठीचे वाटप करण्यात आले असून वितरण प्रक्रिया 17 नोव्हेंबर 2024 पर्यंत पूर्ण करण्यात येणार असल्याची माहिती निवडणूक निर्णय अधिकारी मनोजकुमार खैरनार यांनी दिली आहे.

येत्या विधानसभा निवडणुकीत मतदानाची टक्केवारी वाढावी यासाठी निवडणूक प्रशासनाच्यावतीने स्वीप कार्यक्रम राबवला जात आहे. निवडणुकीच्या अनुषंगाने स्थापित करण्यात आलेल्या मतदान केंद्रावर आवश्यक सोयी सुविधा उपलब्ध करून देण्यासाठी नियोजन करण्यात आले असून त्याप्रमाणे कार्यवाही केली जात आहे. प्रत्येक मतदान केंद्रावर मतदानाची टक्केवारी वाढावी यादृष्टिने प्रयत्न करण्यात येत असल्याचे श्री. खैरनार यांनी सांगितले. मतदारांना आपल्या केंद्राचे नाव आणि स्थळ यांची माहिती होवून मतदान प्रक्रियेस मदत होण्याच्या दृष्टिने मतदारांना मतदान चिठ्ठीचे वाटप 21 क्षेत्रिय अधिकारी आणि 344 मतदान केंद्र स्तरीय अधिकाऱ्यांच्या माध्यमातून वितरण करण्यात येत आहे.

​पुणे :

ज्येष्ठ गझलकार, कवी राजेंद्र शहा यांच्या ‘एकांत​​स्वर​’ या कवितासंग्रहाचे प्रकाशन दि.१६ नोव्हेंबर रोजी ज्येष्ठ पत्रकार विजय कुवळेकर,विश्वकोश निर्मिती मंडळाचे माजी अध्यक्ष प्रा.डॉ. राजा दीक्षित यांच्याहस्ते करण्यात आले. संवेदना प्रकाशनने हा संग्रह प्रकाशित केला आहे.याच कार्यक्रमात राजेंद्र शहा यांच्या गीत,गझलांचा राहुल घोरपडे यांनी संगीतबद्ध केलेला अल्बम सुप्रसिद्ध गायक रवींद्र साठे यांच्या हस्ते प्रकाशित करण्यात आला.

प्रकाशित अल्बममधील गीत -गझला या ज्येष्ठ गायक सुरेश वाडकर, रविंद्र साठे , पं. रघुनंदन पणशीकर , हृषिकेश रानडे आदि गायकांनी गायलेली आहेत.

राहुल घोरपडे, रवींद्र साठे यांनी निवडक रचना व्यासपीठावरून सादर केल्या.त्यानंतर ‘एकांत स्वर’ ही कविता -गीत -गझलांची मनस्वी मैफल प्रसिद्ध गझलकार रमण रणदिवे यांच्या अध्यक्षतेखाली रंगली .या मैफलीत प्रदीप निफाडकर,म.भा.चव्हाण,ज्योत्स्ना चांदगुडे,डॉ.संदीप अवचट आणि राजेंद्र शहा सहभागी झाले. प्रकाशन कार्यक्रमाचे सूत्रसंचालन स्नेहल दामले यांनी केले,तर मैफिलीचे सूत्रसंचालन धनंजय तडवळकर यांनी केले.

साहित्यदीप प्रतिष्ठान पुणे यांनी या कार्यक्रमाचे आयोजन केले होते .शनिवार​, १६ नोव्हेंबर २०२४​ रोजी सायंकाळी ५.३०​ वाजता गणेश हॉल​( न्यू इंग्लिश स्कूल, टिळक रोड​) येथे हा कार्यक्रम पार पडला.धनंजय तडवळकर​(कार्याध्यक्ष, साहित्यदीप प्रतिष्ठान)​,नितीन हिरवे (प्रकाशक, संवेदना प्रकाशन)​,ज्योत्स्ना चांदगुडे (अध्यक्ष, साहित्यदीप प्रतिष्ठान)​ यांनी स्वागत केले. प्रकाश भोंडे,डॉ.सौ.माधवी वैद्य,सौ. सुनंदा शहा,संजय खरोटे, अजिंक्य शहा, डॉ. सोनल शहा,प्रकाश बोंगाळे, सुभाषचंद्र जाधव,मीरा शिंदे यांच्यासह अनेक मान्यवर उपस्थित होते.

राजेंद्र शहा यांच्या यु ट्यूब चॅनेलवर ‘ एकांतस्वर ‘ मधील ही संगीतबद्ध गीते, गझला उपलब्ध करून देणार असल्याची माहिती देण्यात आली.

डॉ.राजा दीक्षित म्हणाले,’ १९६०,७० या दशकांतील काळ हा मंतरलेला काळ होता. दिग्गज कवींचा होता. त्याची आठवण करून देणारे राजेंद्र शहा हे एकांतात रमलेले, कवितेत बुडलेले आहेत. केशवसूत ते सुरेश भट असा तरल कवितेचा प्रवास आहे. सुरेश भटांनी गझल युग आणले. अनील कांबळे यांची आठवण अशा प्रसंगी येते.मराठीतील तरल, हळूवार कवितेची परंपरा शहा यांनी पुढे सुरु ठेवली आहे. ते या गझल युगाचे पाईक आहेत.निसर्गप्रेमी मानवतावादाची वाट राजेंद्र शहा यांच्या कवितेने पकडली आहे.हा एकांतस्वर एकांगी, एकट्याचा नसून सर्वांपर्यंत पोहोचणारा आहे ‘.

रवींद्र साठे म्हणाले,’राजेंद्र शहा यांच्या शब्दात सहजता आहे. क्लिष्टता नाही. शहा नावाची गुजराती व्यक्ती असे उत्तम मराठी शब्द लिहिते,ही मोठी गोष्ट आहे.राहुल घोरपडे संगीत देताना श्रीनिवास खळे यांचा वारसा चालवताना अनुभवास येते’.

राहुल घोरपडे म्हणाले,’ सूर, तालांबरोबबर गीतांमधील भावनांना न्याय देणे,महत्वाचे असते.हा अल्बममधील वैविध्य हे शब्दातील भावनांमुळे आलेले आहे.’

मनोगत व्यक्त करताना राजेंद्र शहा म्हणाले,’ आयुष्यात आता कोणालाही उसंत नसल्याने गझलांचे आदान प्रदान होत नाही.सुरेश नाडकर्णी यांच्यामुळे उर्दू गझलांची ओळख झाली आणि अनुभवविश्व विस्तारले.ते कवितेत उमटले आहे’.

अध्यक्षस्थानावरुन बोलताना विजय कुवळेकर म्हणाले,’ कवी प्रसिध्दीच्या झगमगाटात असतात, पण काही कवींच्या सोबत कविताच नसते.खरा कवी कधी संपत नाही. कविता कधी प्रकट होते, कधी अंतर्मनात रुजून राहते. दुसऱ्या काव्यसंग्रहासाठी २० वर्ष थांबणारे राजेंद्र शहा यांच्यासारखे कवी दुर्मीळ आहेत. दुःख, वेदना,शल्य याचे पडसाद ‘ एकांतस्वर ‘ मधील कवितेत असूनही प्रकाशाच्या कवडशांचा शोध आहे. त्यात सकारात्मक ऊर्जा, मानवी मूल्ये आहेत. कवी काळाच्या पुढे पाहत राहतो, आशावादी राहतो. हे सर्व शहांच्या कवितेत दिसून येते.’

पुणे: येथील खडकवासला विधानसभा मतदारसंघातील निवडणूक कार्यालयात निवडणूक अधिकाऱ्यांमार्फत मतमोजणी प्रक्रियेसाठी कर्मचारी प्रशिक्षण आयोजित करण्यात आले. या प्रशिक्षणास निवडणूक अधिकारी डॉ. यशवंत माने आणि सहा निवडणूक अधिकारी किरण सुरवसे, सचिन आखाडे , अंकुश गुरव यांचे मार्गदर्शन लाभले. प्रा. माधुरी माने आणि प्रा. तुषार राणे यांनी उपस्थित कर्मचाऱ्यांना मतमोजणी प्रक्रियेतील तांत्रिक आणि व्यवस्थापनाच्या महत्त्वाच्या बाबी समजावून सांगितल्या.
प्रशिक्षणादरम्यान, मतमोजणीसंबंधीच्या नियम, पद्धती, आणि प्रक्रियेवर विशेष भर देण्यात आला. ईव्हीएम (इलेक्ट्रॉनिक व्होटिंग मशीन) आणि व्हीव्हीपॅट (व्होटर व्हेरिफिएबल पेपर ऑडिट ट्रेल) प्रणालींचा वापर कसा करायचा, याची सविस्तर माहिती कर्मचाऱ्यांना देण्यात आली. मतमोजणीदरम्यान उद्भवणाऱ्या संभाव्य समस्या आणि त्यांचे निराकरण यावरही प्रात्यक्षिकांसह मार्गदर्शन करण्यात आले.
निवडणूक अधिकारी डॉ. यशवंत माने यांनी मतमोजणी ही प्रक्रिया अत्यंत पारदर्शक आणि अचूक असणे महत्त्वाचे असल्याचे सांगितले. “मतमोजणीसाठी योग्य प्रशिक्षण घेतल्यास निवडणूक प्रक्रियेवरील विश्वास अधिक दृढ होतो,” असे ते म्हणाले. सहा निवडणूक अधिकारी किरण सुरवसे यांनी कर्मचाऱ्यांच्या प्रश्नांना उत्तरे देत त्यांच्या शंका दूर केल्या.
प्रा. माधुरी माने यांनी मतमोजणीसाठी आवश्यक असलेल्या नियोजनावर भर दिला, तर प्रा. तुषार राणे यांनी वेळेचे व्यवस्थापन आणि टीमवर्कच्या महत्त्वावर प्रकाश टाकला. प्रशिक्षणाच्या यशस्वी आयोजनासाठी प्राजक्ता वनारसे आणि सुवर्णा गुजर यांचे सहकार्य महत्त्वाचे ठरले.या प्रशिक्षणामुळे निवडणूक कर्मचाऱ्यांना मतमोजणी प्रक्रियेत अधिक आत्मविश्वास आणि कौशल्य मिळाले आहे. उपस्थित कर्मचाऱ्यांनी या उपक्रमाचे कौतुक केले आणि मतमोजणी प्रक्रिया यशस्वी करण्यासाठी सज्ज असल्याचे सांगितले.

निवडणूक कामकाजाचे चित्रीकरण करुन सोशल मीडियावर प्रसारित केल्याबद्दल भोरमध्ये गुन्हा दाखल- निवडणूक निर्णय अधिकारी डॉ. विकास खरात यांची माहिती

पुणे, दि. 16: भोर विधानसभा मतदार संघातील ईव्हीएम व व्हीव्हीपॅट कमिशनींगच्या कामकाजाचे मोबाईलवरुन बेकायदेशीरपणे व्हिडीओ चित्रीकरण करुन समाज माध्यमांवर (सोशल मीडिया) प्रसारित केल्याबद्दल दोन उमेदवारांच्या प्रतिनिधींवर गुन्हा दाखल करुन पोलीसांनी ताब्यात घेतले असल्याची माहिती निवडणूक निर्णय अधिकारी डॉ. विकास खरात यांनी दिली आहे.

सरदार कान्होजी जेधे शासकीय औद्योगिक प्रशिक्षण संस्था, भोर येथे बुधवारी (दि. 13 नोव्हेंबर) ईव्हीएम व व्हीव्हीपॅट कमीशनींगचे कामकाज सुरु होते. यावेळी मोबाईल आदी उपकरणांना बंदी असताना उमेदवार शंकर हिरामण मांडेकर यांचे प्रतिनिधी विजय हनुमंत राऊत, रा. लवळे (ता. मुळशी) आणि कुलदिप सुदाम कोंडे यांचे प्रतिनिधी नारायण आनंदराव कोंडे रा. केळवडे (ता. भोर) यांनी बेकायदेशीरपणे मोबाईल घेऊन येऊन मॉकपोलचे चित्रीकरण करुन ते सोशल मीडियावर प्रसारित करुन गोपनियतेचा भंग केला. त्यामुळे विजय हनुमंत राऊत आणि नारायण आनंदराव कोंडे यांच्यावर 14 नोव्हेंबर रोजी भोर पोलीस ठाणे येथे गु.र.नं.222/2024, बी.एन.एस.171(1), 223, आय.टी. अॅक्ट 72 नुसार गुन्हा दाखल केलेला आहे. या आरोपींना पोलीसांनी ताब्यात घेऊन त्यांच्यावर कायदेशीर कारवाई केली आहे.

या घटनेचे गांर्भीय लक्षात घेता घेता जिल्हाधिकारी डॉ. सुहास दिवसे आणि जिल्हा पोलीस अधीक्षक पंकज देशमुख यांनी औद्योगिक प्रशिक्षण संस्था भोर येथे भेट देवून घटनेची माहिती घेतली, असेही डॉ. खरात यांनी प्रसिद्धीपत्रकात म्हटले आहे.

डॉ. सुहास दिवसे, जिल्हाधिकारी: ईव्हीएम कमिशनींग, मतदान केंद्र, मतमोजणी केंद्र आदी ठिकाणी निवडणूक प्रक्रियेच्या कोणत्याही टप्प्यादरम्यान निवडणूक कर्तव्यावरील अधिकारी, कर्मचारी, उमेदवार, मतदान प्रतिनिधी, मतमोजणी प्रतिनिधी, मतदार, वार्ताहर आदी कोणाही व्यक्तीला कोणताही मोबाईल, स्मार्टवॉच, इलेक्ट्रॉनिक उपकरणे घेऊन येण्यास पूर्णत: बंदी आहे. तसेच निवडणूक कामकाजाचे व्हिडीओ तसेच छायाचित्रे काढून विविध व्हॉटस्अॅप ग्रुप, सोशल मीडियावर प्रसारित करणे हा गंभीर गुन्हा आहे. असे करणाऱ्यावर गुन्हा दाखल करुन कठोर कारवाई करण्यात येईल.