पुणे, दि. १८: मतदान यादीत नाव नसल्यास नमुना क्र.१७ चा अर्ज भरून आणि आपले मतदार ओळखपत्र दाखवून मतदान करता येणार असल्याचा दिशाभूल करणारा संदेश व्हॉट्सअपद्वारे पसरविला जात असल्याचे आढळून येत आहे. असे निवडणूक प्रक्रियेविषयक चुकीचे संदेश, अफवा पसरविल्यास कठोर कारवाई करण्यात येईल, असा इशारा जिल्हा निवडणूक प्रशासनाने दिला आहे.

मतदान यादीत नाव नसल्यास फॉर्म क्र.१७ चा अर्ज भरून आणि आपले मतदार ओळखपत्र दाखवून मतदान करता येणार असल्याच्या संदेश मोबाईलद्वारे पसरविण्यात येत आहे. फॉर्म क्र. १७ हा दहावी, बारावीच्या परीक्षेस बाह्यरित्या प्रविष्ठ होऊ इच्छिणाऱ्या विद्यार्थ्यांसाठी असतो. त्यामुळे निवडणूक प्रक्रियेबाबत अशा दिशाभूल करणाऱ्या संदेशामुळे नागरिकांमध्ये संभ्रम निर्माण होत असून नागरिक व प्रशासन अशा दोघांना विनाकारण त्रासाला सामारे जावे लागत आहे. असे संदेश जिल्ह्यात पसरविले जात असल्याचे निदर्शनास आले असून दिशाभूल करणाऱ्या संदेशांपासून सावध रहावे, अफवांवर विश्वास ठेऊ नये तसेच असे संदेश पुढे पाठवू नयेत, असे आवाहनही प्रशासनाने केले आहे.

भारत निवडणूक आयोगाच्या निर्देशानुसार मतदार नोंदणीबाबत विशेष संक्षिप्त मोहीम २०२४ अंतर्गत मतदार नोंदणी, वगळणी व दुरुस्तीबाबत सर्व विधानसभा मतदार संघात गेली वर्षभर काम करण्यात आले असून त्यानुसार मतदार याद्या अद्ययावत करण्यात आल्या आहेत. मतदाराचे नाव वगळणी करताना नियमानुसार सर्व कार्यपद्धतीचा अवलंब करण्यात आलेला आहे. त्यामुळे व्हॉट्सॲप संदेशाद्वारे प्रसारीत केलेली माहिती अत्यंत चुकीची आहे.

मतदार यादीत नाव नसेल तर संबंधितास मतदान करता येणार नाही. मतदार यादीत नाव असल्यास मतदार ओळखपत्र किंवा भारत निवडणूक आयोगाने मान्य केलेल्या १२ पुराव्यापैकी एक दाखवून मतदान करता येईल, असे प्रशासनाने स्पष्ट केले आहे.

पुणे-

प्रचाराच्या शेवटच्या टप्प्यात चंद्रकांतदादा पाटील यांनी कमिन्सच्या कर्यचाऱ्यांशी संवाद साधला. यावेळी कमिन्स कर्मचाऱ्यांनी चंद्रकांतदादा पाटील यांना जास्तीत जास्त मतदान करुन विजयी करण्याचा निर्धार व्यक्त केला.

यावेळी भाजप कोथरुड दक्षिणचे अध्यक्ष डॉ संदीप बुटाला, सरचिटणीस विठ्ठल आण्णा बराटे, दीपक पवार, नवनाथ जाधव, राजाभाऊ बराटे, बाळासाहेब टेमकर, अमित तोरडमल, बाळासाहेब दांडेकर यांच्या सह इतर मान्यवर उपस्थित होते.

यावेळी कामगार युनियनचे उपाध्यक्ष सुधीरबापू सरोदे म्हणाले की, गेल्या पाच वर्षांत चंद्रकांतदादा पाटील यांचे काम सर्वसमावेशक आहे. कोणतीही जात पंथ यांचा विचार न करता तुम्ही प्रत्येक घटकांसाठी काम केले आहे. त्यामुळे तुम्हाला विधानसभा निवडणुकीत जास्तीत जास्त मतदान होण्यासाठी प्रयत्न करु, अशी कामगार युनियनच्या वतीने ग्वाही दिली.

‌‘सावरकर : एक क्रांतिज्वाला‌’ विषयावर व्याख्यान
स्वातंत्र्यवीर सामाजिक संस्थेचा उपक्रम
स्वातंत्र्यवीर सावरकर क्रांतिज्वाला दिनदर्शिकेचे प्रकाशन

पिंपरी : विश्व रानटी अवस्थेत जगत असताना सुसंस्कृत जीवनपद्धती जगणारा देश अशी हिंदुस्थानची ओळख होती. आक्रमणकर्त्यांमुळे हिंदू संस्कृतीची मोडतोड झाली. इंग्रजांच्या राजवटीत देशवासीयांना मानसिक, बौद्धिक पातळीवर दुबळे बनविले गेले. हिंदुस्थानची समृद्ध संस्कृती स्वातंत्र्यपूर्व काळात आणि स्वातंत्र्यानंतरही दडपली गेली. हिंदूंनो आता तरी जावे व्हा, निदान स्वातंत्र्यानंतरचा इतिहास तरी वाचा त्यातून देशाचे वाटोळे कुणी केले हे तरी समजेल, असे परखड प्रतिपादन सावरकर अभ्यासक, चतुरस्र अभिनेते, लेखक शरद पोंक्षे यांनी केले.

स्वातंत्र्यवीर सामाजिक संस्थेतर्फे ‌‘सावरकर : एक क्रांतिज्वाला‌’ या विषयावर आयोजित व्याख्यानात पोंक्षे बोलत होते. निगडी प्राधिकरणातील मनोहर वाढोकार सभागृहात आयोजित कार्यक्रमात सावरकर साहित्य अभ्यासक, वक्ते अक्षय जोग यांची प्रमुख उपस्थिती होते. स्वातंत्र्यवीर सावरकर सामाजिक संस्थेचे संस्थापक अध्यक्ष श्रीनिवास कुलकर्णी, विक्रम दिवाण, कृष्णा वैद्य, अतुल रेवाणीकर मंचावर होते. स्वातंत्र्यवीर सावरकर क्रांतिज्वाला या दिनदर्शिकेचे प्रकाशन या वेळी पोंक्षे यांच्या हस्ते करण्यात आले. संस्थेचा पदवितरण सोहळा या प्रसंगी झाला त्यात अमित सबनीस (ठाणे शहराध्यक्ष), आदीश जोशी (ठाणे शहर कार्याध्यक्ष), विदुला शेट्टीगार (अंबरनाथ शहर प्रमुख), श्री. वर्बे (महाराष्ट्र राज्य समन्वयक) यांना पद बहाल करण्यात आले.
छत्रपती शिवाजी महाराज नसते तर आज आपण हिंदू म्हणून जगू शकलो नसतो. स्वातंत्र्यवीर सावरकर यांनी छत्रपती शिवाजी महाराज यांना गुरुस्थानी मानून आपले संपूर्ण आयुष्य देशसेवेसाठी वेचले, असे नमूद करून शरद पोंक्षे म्हणाले, देशाचा वैभवशाली इतिहास शिक्षणपद्धतीत असावा यासाठी स्वातंत्र्यवीर सावरकर आग्रही होते. पण इतिहासाची मोडतोड करून इतिहास शिकविला गेला. इतिहासात कुणाला रस नाही, संस्कृतीविषयी अभिमान नाही असे असताना भविष्य ठरविणार कसे? इतिहास वाचा कारण इतिहास भविष्य ठरवायला मदत करतो असे स्वातंत्र्यवीर सावरकर सांगत असत. आजही सरस्वतीचा अपमान होत आहे, हे विसरून कसे चालेल? राष्ट्रासाठी आपण काय करू शकतो याचा विचार करा, राष्ट्रासाठी खारीचा वाटा उचला, असे आवाहन पोंक्षे यांनी केले.
अक्षय जोग यांनी स्वातंत्र्यवीर सावरकर यांच्या हिंदुत्वाविषयी विवेचन केले.
प्रास्ताविकात स्वातंत्र्यवीर सावरकर सामाजिक संस्थेचे संस्थापक अध्यक्ष श्रीनिवास कुलकर्णी यांनी संस्थेच्या कार्याची माहिती सांगितली. सावरकर क्रांतिज्वाला दिनदर्शिका महाराष्ट्राच्या कानाकोपऱ्यातच नव्हे तर विविध देशांमध्ये पोहोचली असल्याचे त्यांनी आवर्जून नमूद केले.
सुरुवातीस छत्रपती शिवाजी महाराज यांच्या मूर्तीचे तसेच स्वातंत्र्यवीर सावरकर यांच्या प्रतिमेचे पूजन मान्यवरांच्या हस्ते झाले. त्यानंतर छत्रपती शिवाजी महाराज यांची आरती करण्यात आली. मान्यवरांचा परिचय सागर बर्वे यांनी करून दिला तर आभार सौरभ दुराफे यांनी मानले. सूत्रसंचालन शितल कापशीकर यांनी केले. कार्यक्रमाच्या यशस्वीतेसाठी प्रसाद सराफ, चैतन्य कुलकर्णी, केदार भातलवंडे, रमाकांत जोग, संदीप गद्रे यांनी परिश्रम घेतले.

पुणे, दि. १८: विधानसभा सार्वत्रिक निवडणुकीत मतदान करता यावे यासाठी २० नोव्हेंबर २०२४ या मतदानाच्या दिवशी उद्योग, ऊर्जा व कामगार विभागांतर्गत सर्व आस्थापनांतील अधिकारी, कर्मचारी, कामगारांना भरपगारी सुट्टी देण्याचे आदेश राज्य शासनाने दिले आहेत, अशी माहिती जिल्हाधिकारी तथा जिल्हा निवडणूक अधिकारी डॉ. सुहास दिवसे यांनी दिली आहे.

उद्योग, ऊर्जा व कामगार विभागाच्या परिपत्रकानुसार मतदान क्षेत्रात मतदार असलेले कामगार, अधिकारी, कर्मचारी यांना ते कामासाठी मतदार संघांच्या बाहेर असतील, तरी मतदानाचा हक्क बजावण्यासाठी भरपगारी सुट्टी देण्यात यावी, असे स्पष्ट करण्यात आले आहे.

विभागाअंतर्गत येणाऱ्या सर्व आस्थापना, कारखाने, दुकाने उदा. खासगी कंपन्यांमधील आस्थापना, सर्व दुकाने व अन्य आस्थापना, निवासी हॉटेल, खाद्यगृहे, अन्य गृहे, नाट्यगृहे, व्यापार, औद्योगिक उपक्रम किंवा इतर आस्थापना तसेच माहिती तंत्रज्ञान कंपन्या, शॉपिंग सेंटर, मॉल्स, रिटेलर्स आदींना ही सुट्टी किंवा सवलत लागू राहील.

अपवादात्मक परिस्थितीत कामगार, अधिकारी, कर्मचारी इत्यादींना पूर्ण दिवस सुट्टी देणे शक्य नसेल तर, मतदान क्षेत्रातील कामगारांना मतदानाचा हक्क बजावण्यासाठी सुट्टी ऐवजी दोन ते तीन तासांची सवलत देता येईल, मात्र त्याबाबत संबंधित जिल्हाधिकारी तथा जिल्हा निवडणूक अधिकारी यांची पूर्व परवानगी घेणे आवश्यक राहील, कोणत्याही परिस्थितीत मतदारांना मतदानासाठी किमान दोन ते तीन तासांची भरपगारी सवलत मिळेल याची दक्षता संबंधित आस्थापनांनी घेणे आवश्यक राहील.

लोकप्रतिनिधीत्व कायदा, १९५१ मधील कलम १३५ (ब) नुसार मतदानाच्या दिवशी सर्वसाधारणपणे मतदारांना त्यांच्या मतदानाचा हक्क बजावता यावा यासाठी भरपगारी सुट्टी देण्यात येते किंवा काही ठिकाणी कामाच्या तासात सवलत देण्यात येते. मात्र, काही आस्थापना, संस्था भरपगारी सुट्टी किंवा सवलत देत नसल्याचे आढळून आले आहे. त्यामुळे हे आदेश देण्यात आले असून सुट्टी किंवा सवलत न दिल्यामुळे मतदान करता येणे शक्य न झाल्याबाबत तक्रार आल्यास आस्थापनांविरुद्ध योग्य ती कारवाई करण्यात येईल, असेही स्पष्ट करण्यात आले आहे.
0000

पुणे, दि. १८: विधानसभा सार्वत्रिक निवडणुकीत मतदान करता यावे यासाठी २० नोव्हेंबर २०२४ या मतदानाच्या दिवशी उद्योग, ऊर्जा व कामगार विभागांतर्गत सर्व आस्थापनांतील अधिकारी, कर्मचारी, कामगारांना भरपगारी सुट्टी देण्याचे आदेश राज्य शासनाने दिले आहेत, सुट्टी किंवा सवलत न दिल्यामुळे मतदान करता येणे शक्य न झाल्याबाबत तक्रार आल्यास आस्थापनांविरुद्ध योग्य ती कारवाई करण्यात येईल, अशी माहिती अपर कामगार आयुक्त शैलेंद्र पोळ यांनी दिली आहे.

अपवादात्मक परिस्थितीत कामगार, अधिकारी, कर्मचारी इत्यादींना पूर्ण दिवस सुट्टी देणे शक्य नसेल तर, मतदान क्षेत्रातील कामगारांना मतदानाचा हक्क बजावण्यासाठी सुट्टी ऐवजी दोन ते तीन तासांची सवलत देता येईल, मात्र त्याबाबत संबंधित जिल्हाधिकारी तथा जिल्हा निवडणूक अधिकारी यांची पूर्वपरवानगी घेणे आवश्यक राहील, कोणत्याही परिस्थितीत मतदारांना मतदानासाठी किमान दोन ते तीन तासांची भरपगारी सवलत मिळेल याची दक्षता संबंधित आस्थापनांनी घेणे आवश्यक राहील.

उद्योग, ऊर्जा व कामगार विभागाच्या परिपत्रकानुसार मतदान क्षेत्रात मतदार असलेले कामगार, अधिकारी, कर्मचारी यांना ते कामासाठी मतदार संघांच्या बाहेर असतील, तरी मतदानाचा हक्क बजावण्यासाठी भरपगारी सुट्टी देण्यात यावी, असे स्पष्ट करण्यात आले आहे. विभागाअंतर्गत येणाऱ्या सर्व आस्थापना, कारखाने, दुकाने उदा. खासगी कंपन्यांमधील आस्थापना, सर्व दुकाने व अन्य आस्थापना, निवासी हॉटेल, खाद्यगृहे, अन्य गृहे, नाट्यगृहे, व्यापार, औद्योगिक उपक्रम किंवा इतर आस्थापना तसेच माहिती तंत्रज्ञान कंपन्या, शॉपिंग सेंटर, मॉल्स, रिटेलर्स आदींना ही सुट्टी किंवा सवलत लागू राहील. सर्व आस्थापना, कारखाने व दुकानांनी या परिपत्रकाची काटेकोरपणे अंमलबजावणी करावी.

जिल्ह्यातील सर्व आस्थापना, कारखाने व दुकाने यामध्ये काम करणाऱ्या अधिकारी, कर्मचारी, कामगारांनी आपल्या कार्यक्षेत्रातील निवडणूकीच्या दिवशी मतदान करण्यासाठी भरपगारी सुट्टी अथवा सवलत न दिल्यास पुणे विभाग सहाय्यक कामगार आयुक्त श्री. नि. अ. वाळके, भ्रमणध्वनी क्र.9975933416, श्रीमती त. श. अत्तार, भ्रमणध्वनी क्र. 9890424813, श्री. डी. डी. पवार, भ्रमणध्वनी क्र. 7775963065, दुकाने निरीक्षक श्री. बी. व्ही. लांडे, भ्रमणध्वनी क्र. 9921971163, श्री. राजेंद्र ताठे, भ्रमणध्वनी क्र. 9420763111 तसेच अपर कामगार आयुक्त यांचे कार्यालय, पुणे विभाग या कार्यालयाच्या alcpune5@gmail.com व कामगार उप आयुक्त यांचे कार्यालय, पुणे जिल्हा या कार्यालयाच्या dyclpune2021@gmail.com ई-मेल आयडीवर तक्रार दाखल करावी, असेही श्री. पोळ यांनी प्रसिद्धी पत्रकान्वये कळविले आहे.
0000

पुणे : झाड तोडले जात असताना त्यालाही प्रचंड वेदना होतात. ते आक्रोश करते, किंचाळतेही. झाडाला शाश्वत सुरक्षिततेची जाणीव करून दिल्यास ते आपल्याशी मैत्री करते, संवाद साधते, अशा भावना नक्षत्र वन उभारणारे दीपक जोशी यांनी व्यक्त केल्या. झाडे कधीही फसवत नाहीत, ती मतलबी नसतात तर कायम आधारस्तंभच असतात, असेही त्यांनी आवर्जून सांगितले.
वृक्षांना भावभावना असतात त्या जाणून पाच हजारांपेक्षा जास्त वृक्ष लावून त्यांचे संगोपन करणारे तसेच भारतातले पहिले संस्कारित वृक्षांचे नक्षत्र वन उभारणारे दीपक जोशी यांचा संवाद, पुणे, भावार्थ आणि अक्षरसेवा, पुणे यांच्या संयुक्त विद्यमाने ज्योतिष विद्यावाचस्पती आरती घाटपांडे यांच्या हस्ते ‌‘वृक्षसखा पुरस्कार‌’ देऊन आज गौरव करण्यात आला. त्या व्ोळी सत्काराला उत्तर देताना जोशी बोलत होते. आयुर्वेदाचार्य डॉ. वेदिका साधले यांची प्रमुख उपस्थिती होती. अक्षरसेवाच्या विनिता पिंपळखरे, संवाद, पुणेचे सुनील महाजन, भावार्थच्या कीर्ती जोशी मंचावर होते. सन्मानपत्र, शाल, श्रीफळ, तुळशीचे रोप असे पुरस्काराचे स्वरूप होते. कोथरूड येथील भावार्थ पुस्तक दालनात कार्यक्रमाचे आयोजन करण्यात आले होते.
दीपक जोशी म्हणाले, गुरूंच्या आदेशानुसार नक्षत्र वनाच्या निर्मिती कार्यास प्रारंभ केला. त्यांनी मला वनस्पतींशी संवाद साधण्याचे तंत्र शिकविले. वनस्पतींनीही मला खूप शिकविले, सतत मार्गदर्शन केले. झाडे एकमेकांशीही संवाद साधतात. मला झाडांशी बोलायला आवडते. प्रत्येक झाडाचा स्वभाव सुंदरच आहे, तो कळण्यासाठी त्याच्याशी दोस्ती होणे आवश्यक आहे. झाडांमध्ये जातीयवाद नाही, मोठे झाड कायमच लहान झाडाची काळजी घेते. अनेक झाडांना संगीत आवडते, असे सांगताना नक्षत्र वनात एका सुहृदांनी माऊथ ऑर्गनवर गाणे वाजविल्यावर बकुळीचे झाड कसे डोलू लागले याचा अनुभवही त्यांनी सांगितला. चैत्य वन, बोधी वन, नक्षत्र वन, शांती वन, गणेशमंत्र वन, पसायदान वन, देवराई आदी वनांची निर्मिती झाडांवरील प्रेमातून झाली असल्याचे त्यांनी आवर्जून सांगितले.

आरती घाटपांडे म्हणाल्या, वृक्षांवर संस्कार, माया करून, संवाद साधत नक्षत्र वनाची निर्मिती करणारे दीपक जोशी फक्त वृक्षसखाच नाही तर वृक्षांचा प्राणसखा आहेत. प्रत्येक वृक्षाबद्दलचे त्यांचे ज्ञान अगाध आहे. नक्षत्रांचा अभ्यास करताना जोशी यांचे नक्षत्र वृक्षांचे ज्ञान अनुभवायला मिळाले. नक्षत्र वृक्षांच्या सान्निध्यात राहणे हे आपल्याला पोषक ठरू शकते, त्यांच्यातून येणारी स्पंदने पूरक ठरतात.
सुरुवातीस विनिता पिंपळखरे यांनी पुरस्कारच्या आयोजनामागील भूमिका विशद करताना वृक्षांनाही भावभावना असतात, वृक्षांवर अफाट प्रेम करणाऱ्या व्यक्तीच्या कार्याची जाणीव ठेवावी या उद्देशाने पुरस्काराचे आयोजन करण्यात आले असल्याचे सांगितले.
डॉ. वेदिका साधले म्हणाल्या, दीपक जोशी यांनी निर्माण केलेले नक्षत्रवन संस्कारित आहे. ते वनस्पती संगोपनाचे, त्यांच्या पालन-पोषणाचे कार्य निस्पृहपणे करत आहेत. आयुर्वेद अभ्यासकांना त्यांच्या ज्ञानाचा, नक्षत्र वनाचा नक्कीच उपयोग होईल. समस्त सृष्टीच्या कल्याणासाठी जोशी यांचे काम मोलाचे ठरणार आहे.
सन्मापत्राचे लेखन वलय मुळगुंद यांचे होते तर वाचन कीर्ती जोशी यांनी केले. सूत्रसंचालन मेधा गोखले यांनी केले. सुनील महाजन यांनी आभार मानले.