मुंबई-राज्यातील विधानपरिषदेच्या 17 जागांसाठी निवडणुकांची घोषणा झाली असून उमेदवारी अर्ज भरण्यासही सुरुवात झाली आहे, या निवडणुकीत महायुती विरुद्ध महाविकास आघाडी असा थेट सामना पाहायला मिळणार आहे. महायुतीमध्ये सध्या 12-5-2 असा जागावाटपाचा फॉर्म्युला ठरल्याची चर्चा असून, त्यानुसार भाजप 12, शिंदेंची शिवसेना 5 आणि राष्ट्रवादी काँग्रेसला 2 जागा मिळण्याची शक्यता आहे. यासंदर्भात अद्याप अंतिम निर्णय झाला नसला तरी तिन्ही पक्षांचे प्रमुख लवकरच एकत्र बैठक घेऊन जागावाटपावर शिक्कामोर्तब करणार आहेत.

दरम्यान, भाजपने आपल्या कोट्यातील 12 जागांसाठी जोरदार तयारी सुरू केली असून उमेदवारांच्या नावांची प्राथमिक यादीही निश्चित केली आहे, ज्या अंतर्गत तब्बल 48 संभाव्य नावांची यादी घेऊन भाजप प्रदेशाध्यक्ष रवींद्र चव्हाण आज दिल्लीला रवाना होत आहेत.

विधान परिषदेच्या उमेदवार निश्चितीसाठी भाजपमधील राजकीय हालचालींना प्रचंड वेग आला असून, आगामी 2 ते 3 दिवसांत उमेदवारांची अंतिम नावे जाहीर केली जाणार आहेत. याच पार्श्वभूमीवर, विधान परिषदेच्या एकूण 12 जागांसाठी तब्बल 48 संभाव्य उमेदवारांच्या नावांची यादी घेऊन भाजप प्रदेशाध्यक्ष रवींद्र चव्हाण आज दिल्लीला रवाना होत आहेत. आपल्या या दिल्ली दौऱ्यात रवींद्र चव्हाण भाजपचे राष्ट्रीय अध्यक्ष नितीन नबीन आणि केंद्रीय गृहमंत्री अमित शाह यांची भेट घेणार असून, त्यांच्यासोबत या नावांवर सविस्तर चर्चा करून उमेदवारांची यादी अंतिम करणार असल्याचे समजते.
विधानपरिषद निवडणुकांसाठीचा महायुतीमधील जागावाटपाचा फॉर्म्युला, भाजपच्या संभाव्य उमेदवारांची नावे आणि इतर महत्त्वपूर्ण बाबींची तपशीलवार माहिती या दौऱ्यात केंद्रीय पक्ष नेतृत्वाला दिली जाणार आहे. विशेष म्हणजे, प्रदेशाध्यक्ष रवींद्र चव्हाण यांच्या या दिल्ली दौऱ्यातच भाजपच्या 12 उमेदवारांची नावे अंतिम केली जाणार असून, उमेदवारी अर्ज भरण्यासाठी 1 जूनपर्यंतचीच मुदत असल्याने पुढील 2 ते 3 दिवसांत या नावांवर शिक्कामोर्तब होण्याची दाट शक्यता आहे. जेणेकरून नावे निश्चित होताच संबंधित उमेदवारांना तातडीने निवडणुकीच्या तयारीला लागण्याचे आदेश पक्षाकडून दिले जातील.

विधानपरिषद निवडणुकांच्या जागावाटपासाठी मुख्यमंत्री देवेंद्र फडणवीस आणि भाजपच्या प्रमुख नेत्यांशी एकनाथ शिंदे यांची अनेकदा सविस्तर चर्चा झाली आहे. विशेष म्हणजे, एकनाथ शिंदे यांनी यासाठी दिल्ली वारी करूनही या निवडणुकीच्या जागावाटपावर अद्याप कोणताही ठोस तोडगा निघू शकलेला नाही, असेच चित्र सध्या दिसत आहे. याच राजकीय तणावातून की काय, आज जागावाटपाच्या मुद्द्यावरून विचारलेल्या प्रश्नावर एकनाथ शिंदे पत्रकारांवर चांगलेच भडकल्याचे पाहायला मिळाले.

विधान परिषदेच्या जागावाटपासंदर्भात मुख्यमंत्री आणि उपमुख्यमंत्री एकनाथ शिंदे यांच्यात एक महत्त्वाची बैठक पार पडली. या बैठकीनंतर एकनाथ शिंदे जेव्हा पत्रकारांसमोर आले, तेव्हा त्यांना पहिलाच प्रश्न या बैठकीबाबत विचारण्यात आला. हा प्रश्न ऐकताच त्यांचा संताप अनावर झाला आणि “कुठलं बोलणार… काय आहे?” असा उलट सवाल करत ते पत्रकारांवर प्रचंड संतापले. त्यांची ही बदललेली देहबोली आणि संताप पाहता राजकीय वर्तुळात उलट-सुलट चर्चांना उधाण आले असून, या बैठकीत नेमके काय घडले, याबाबत आता मोठा प्रश्न उपस्थित केला जात आहे

पुणे- प्रधान जनगणना अधिकारी तथा महापालिका आयुक्त नवल किशोर राम यांनी आज मुख्य कार्यालयात सर्व झोनल उपआयुक्त तसेच सर्व १५ सहायक आयुक्त तथा चार्ज ऑफिसर्स यांची जनगणना कामकाजाबाबत सविस्तर आढावा बैठक आयोजित पार पाडली. सदर बैठकीमध्ये ज्या चार्ज ऑफिसर्स यांच्या कार्यक्षेत्रातील एचएलबी (हाऊस लिस्टिंग ब्लॉक) अर्थात प्रगणक गटांचे काम अद्याप सुरू झालेले नाही किंवा अत्यंत संथ गतीने सुरू आहे, त्याबाबत सविस्तर आढावा घेण्यात आला.
पुणे महापालिकेच्या ६०% गटांचे काम सुरू झाले असून उर्वरित गटांचे काम अद्याप ही सुरू झाले नसलेबाबत तिव्र नाराजी व्यक्त करण्यात आली.
यामध्ये प्रामुख्याने नगर रोड, येरवडा-वाघोली, ढोले पाटील रोड, औंध-बाणेर तसेच सिंहगड रोड क्षेत्रीय कार्यालयांअंतर्गत जनगणनेचे ५०% देखील गटांचे काम सुरू झाले नसल्याचे निदर्शनास आले. याबाबत सर्व चार्ज ऑफिसर्सना दोन दिवसात सुमारे११००० गटांचे १००% गटांचे काम ऑनलाइन ऐप द्वारे सुरू करण्यासाठी आवश्यक उपाययोजना करण्याचे निर्देश देण्यात आले.

बैठकीत सर्व चार्ज ऑफिसर्स यांनी त्यांच्या कार्यक्षेत्रात जनगणनेच्या कामासाठी नियुक्त करण्यात आलेल्या शासकीय/निमशासकीय कार्यालयांतील कर्मचाऱ्यांशी तात्काळ दूरध्वनीद्वारे संपर्क साधून, अद्याप हजर न झालेल्या कर्मचाऱ्यांना त्वरित कामावर रुजू होण्याच्या सूचना देण्याचे आदेश देण्यात आले. तसेच, संबंधित कर्मचारी अनुपस्थित राहत असल्यास, ते जनगणना अधिनियमांतर्गत सोपविण्यात आलेल्या कर्तव्यात कसूर करीत असल्याचे मानून त्यांच्याविरुद्ध फौजदारी कारवाई प्रस्तावित करण्यात यावी व संबंधित कार्यालय प्रमुखांना अशा कर्मचाऱ्यांना तात्काळ निलंबित करण्याबाबत आवश्यक आदेश निर्गमित करण्यास कळविण्याचे निर्देश देण्यात आले.
यावेळी महापालिकेच्या प्राथमिक शिक्षण विभाग तसेच मनपा चे सेवकवर्ग देखील जनगणनेच्या कामासाठी अद्याप रुजू झाले नसल्याची बाब निदर्शनास आली. याबाबत, महापालिका अथवा शिक्षण विभागातील जे कर्मचारी जनगणनेच्या कामासाठी अद्याप रुजू झालेले नाहीत, त्यांना तात्काळ रुजू करण्याबाबत सूचित करण्याचे आदेश देण्यात आले. अन्यथा, संबंधितांविरुद्ध जनगणना अधिनियमांतर्गत फौजदारी कारवाई सुरू करून त्यांना निलंबित करण्याची कार्यवाही करण्याचे निर्देश देण्यात आले. तसेच, प्राथमिक व माध्यमिक शिक्षण विभागांतर्गत कंत्राटी पद्धतीवर कार्यरत शिक्षकांना जनगणनेच्या कामासाठी नियुक्त/रुजू करण्याबाबत संबंधितांना कळविण्याचे निर्देश देण्यात आले असून, त्यांच्या सेवामुदतीस आवश्यकतेनुसार मुदतवाढ देण्यासंदर्भात स्वतंत्र प्रस्ताव तात्काळ सादर करण्याचे आदेशही देण्यात आले. तसेच ज्या शासकीय कार्यालय प्रमुखानी अद्यापही जनगणना कामकाजासाठी नियुक्त कर्मचारी याना कार्यमुक्त केले नाही त्यांना अर्ध शासकीय पत्र/आदेश पाठवून संपर्क करून या राष्ट्रीय कामामध्ये सर्व कर्मचारी यांना तातडीने उपलब्ध करण्याचे आदेश देण्यात यावेत असेही निर्देश दिले.
कामकाजासाठी आवश्यकतेप्रमाणे मुख्य कार्यालयात काम करणारे अभियंते लिपिक संवर्गातील सेवकांची देखील नियुक्ती करण्याचे आदेश देण्यात आले.
तसेच, जनगणना कामामध्ये सर्वात कमी काम असलेल्या असलेल्या सुपरवायजर्सची बैठक माननीय महापालिका आयुक्त कार्यालयात आयोजित करून त्यांच्या कामकाजाचा सविस्तर आढावा घेण्याचे निर्देश देण्यात आले. याशिवाय, वरील नमूद चार्ज ऑफिसर्स यांच्या कार्यक्षेत्रातील जनगणनेचे काम असमाधानकारक असल्याचे निदर्शनास आल्याने, संबंधितांना लेखी नोटीस बजावून त्यांच्याकडून खुलासा मागविण्याचे निर्देशही देण्यात आले. सर्व चार्ज ऑफिसर्स आणि झोनल उपायुक्त यांनी याबाबत तत्काळ दखल घेऊन काम मुदतीत पूर्ण करावे त्याबाबत रोज आयुक्त स्तरावर VC द्वारे/समक्ष आढावा बैठकीचे आयोजन करण्यात यावी असे निर्देश दिले.

सदर बैठकीस अतिरिक्त महापालिका आयुक्त (विशेष) ओमप्रकाश दिवटे तसेच जॉइंट डायरेक्टर, जनगणना तथा उपायुक्त लांडगे उपस्थित होते.महापालिका आयुक्त नवल किशोर राम यांनी जनगणना हे अत्यंत महत्त्वाचे आणि प्राधान्याचे शासकीय काम असून, यामध्ये कोणत्याही प्रकारची दिरंगाई अथवा निष्काळजीपणा खपवून घेतला जाणार नसल्याचे स्पष्ट करत सर्व संबंधित अधिकारी व कर्मचाऱ्यांनी तत्काळ जबाबदारीने कामकाज पूर्ण करण्याच्या सूचना दिल्या.

पुणे : पंतप्रधान नरेंद्र मोदी एच जनतेच्या हलाखीच्या परिस्थितीला जबाबदार आहेत , जनतेला महागाईच्या खाईत लोटून ते परदेश दौऱ्यांचा मस्त आनंद लुटत आहेत असा आरोप करत केंद्र सरकारने केलेल्या पेट्रोल व डिझेल दरवाढीच्या विरोधात पुणे शहर जिल्हा काँग्रेस कमिटीच्या वतीने आज जिल्हाधिकारी कार्यालय, पुणे येथे पेट्रोल, डिझेल व घरगुती गॅसची दरवाढ रद्द करावी यासाठी आंदोलन करण्यात आले.

      पुणे शहर जिल्हा काँग्रेस कमिटीच्या वतीने जिल्हाधिकारी कार्यालय येथे बैलगाडा व टांगागाडी यावर बसून आंदोलन करण्यात आले. यावेळी बोलताना पूर्व विभागाचे अध्यक्ष प्रशांत जगताप म्हणाले की, ‘‘पश्चिम आशिया युध्दामुळे जागतिक बाजारातील कच्च्या इंधनाचे दर दररोज वाढत आहेत. त्यामुळे सार्वजनिक इंधन कंपन्यांनी इंधनाचे दर वाढविले. जागतिक बाजारात इंधनाचे दर कमी असताना पेट्रोल आणि डिझेलवर दररोज १ हजार कोटी रूपयांचा केंद्रीय कर लादूनही भाजप सरकारचे पोट भरलेले नाही. इंधनाचे दर कमी असताना भाजप सरकारने त्याचा लाभ जनतेला मिळवून दिला नाही. जेव्‍हा पेच प्रसंग उद्‌भवला तेव्‍हा भाजपचे नेतृत्व निवडणुकांमध्ये व्‍यस्त झाले. निवडणुका संपल्यानंतर ते त्यागाचा उपदेश देऊ लागले. त्यानंतर सातत्याने इंधन दरवाढ होत आहे. आज चौथ्यांदा इंधन दरवाढ करण्यात आली आहे. इतर देशांच्या तुलनेत भारतातील दर कमी असल्याचे सरकार खोटे सांगत आहे. इंधन दरवाढीमुळे जीवनावश्यक वस्तूंचे भाव वाढले आहे. त्यामुळे सामान्य जनता हवालदिल झाली आहे. ग्रामीण भागात अनेक ठिकाणी इंधनचा तुटवडा निर्माण झाला आहे, त्यामुळे शेतकऱ्यांना शेतीची कामे करण्यासाठी अडथळा येत आहे. निवडणुकीच्या काळामध्ये भारतीय जनता पार्टीने खर्चात कुठलीही काटकसर केली नाही आणि त्याचा र्भुदंड सर्वसामान्य जनतेला सोसावा लागत आहे. UPA सरकारच्या काळात कच्च्या इंधन तेलाचे भाव वाढलेले असताना सुध्दा जनतेचे हित लक्षात घेवून इंधन दरवाढ कमी प्रमाणात करण्यात आली. मोदी सरकारच्या काळात कच्च्या तेलाच्या निष्क्रीय आयात धोरणामुळे देशाला आर्थिक संकटातून जावे लागणार आहे. या कठिण परिस्थितीत सुध्दा केंद्र सरकारने तोडगा काढण्यासाठी सर्व पक्षिय बैठक बोलविली नाही, ही देशासाठी फार मोठी चिंतेची बाब आहे. काँग्रेस पक्ष सदैव जनतेच्या हितासाठी लढत आहे.’’

      यानंतर पश्चिम विभागाच्या अध्यक्षा दिप्तीताई चवधरी म्हणाल्या की, ‘‘पेट्रोल, डिझेल बरोबरच घरगुती गॅसची दरवाढ व नागरिकांना घरगुती गॅसचा पुरवठा कमी केला आहे. त्यामुळे सर्वसामान्य नागरिकांना नाहक त्रासाला सामोरे जावे लागत असून मोदी सरकारने महिलांच्या हितासाठी मते मागीतली परंतु महिलांवरील अत्याचार थांबले नाहीत त्याचबरोबर घरगुती गॅस सिलेंडर च्या कमतरतेमुळे घरगुती-  

आर्थिक गणित कोलमडे असून याला जबाबदार केवळ आणि केवळ केंद्रातील मोदी सरकार आहे. महागाईमुळे जीवनावश्यक वस्तू महाग झाल्या असून सर्वसामान्य नागरिकांना घर चालविणे देखील कठिण झाले आहे. उत्पन्न वाढत नाही परंतु महागाई झपाट्याने वाढत आहे त्यामुळे सर्वसामान्यांचे जगणे मुश्किल झाले आहे.ज्यावेळेला जागतिक पातळीवर क्रुड ऑईलचे दर अत्यंत कमी होते त्यावेळी ७७ हजार कोटींचा नफा केंद्र सरकारने ऑईल कंपनीला मिळवून दिला मग आत्ता केंद्र सरकारने सबसिडी देवून सामान्य जनतेला दिलासा द्यावा.’’

      यानंतर माजी न्यायमूर्ती बी. जी. कोळसेपाटील व माजी आमदार मोहन जोशी यांनी केंद्रसरकारवर पेट्रोल-डिझेल दरवाढी विरोधात टिका केली.

      यावेळी महानगर पालिकेतील गटनेते चंदूशेठ कदम, प्रदेश प्रवक्ते गोपाळ तिवारी, शानी नौशाद, नगरसेवक दिपाली डोख, अश्विन लांडगे, सुनिल शिंदे, महिला अध्यक्षा स्वाती शिंदे, युवक अध्यक्ष सौरभ अमराळे, सेवादलाचे लतेंद्र भिंगारे, इंटक अध्यक्ष चेतन आगरवाल, ज्येष्ठ नागरिक संघाचे द. स. पोळेकर, राजेंद्र भुतडा, रमेश अय्यर, सचिन आडेकर, रमेश सोनकांबळे, रवींद्र माझीरे, बाळासाहेब अमराळे, सुरेश कांबळे, पप्पु घोलप, राहुल जगताप, केविन मॅन्युल, गौरव बाळिंदे, हर्षद हांडे, सेल्वराज ॲथोनी, नितीन परतानी, आयुव पठाण, नरसिंह अंदोली, वैभव डांगमाळी, रवि आरडे, संदिप मोकाटे, राहुल वंजारी, ॲड. संतोष जाधव, मजहर मणियार, सागर धावडे, कान्हुभाऊ साळूंके, पांडुरंग गायकवाड, शिवाजी सोनार, सोमनाथ पवार, सुरेश तनपुरे, सचिन गोरड, अक्षय मराठे, सागर घारे, नवनाथ जोरी, निलेश खैरे, बाळा धायगुडे, सतिश मंगडे, प्राजक्ता जाधव, ज्योती अडागळे, अंजली सोलापूरे, कल्पना शिंदे, प्रवीणा तांबोळी आदीसह असंख्य पदाधिकारी व कार्यकर्ते उपस्थित होते. 

रामायणातील कोड्यांची वैध आणि समर्पक उत्तरे पुस्तकात सापडतील

पुणे, २६ मेः मोतीलाल बनारसीदास पब्लिशर्स, भारतीय विचार साधना पुणे प्रकाशन आणि माईर्स एमआयटी वर्ल्ड पीस युनिव्हर्सिटीच्या संयुक्त विद्यमाने अमेरिकन ज्युईश लेखिका डेना मरियम यांनी मुळ इंग्रजी पुस्तक ‘द अनटोल्ड स्टोरी ऑफ सीता’ याचे मराठी अनुवादीत ‘सीतेची न सांगितलेली कथा’ या पुस्तकाचे प्रकाशन करण्यात येणार आहे. अशी माहिती पुस्तकाचे कोऑर्डिनेटर मुकुंद हिरवे आणि भारतीय विचार साधना, पुणे प्रकाशनचे कार्यवाह काशीनाथ देवधर यांनी पत्रकार परिषदेत दिली.
हा सोहळा २८ मे २०२६ रोजी सायंकाळी ५.०० वा. कोथरुड येथील एमआयटी डब्ल्यूपीयूच्या संत श्री ज्ञानेश्वर सभागृहात होणार आहे. यावेळी विश्व हिंदू परिषदेचे मार्गदर्शक भैय्याजी जोशी हे सन्माननीय प्रमुख पाहुणे म्हणून उपस्थित राहणार आहेत. तसेच, एमआयटी वर्ल्ड पीस युनिव्हर्सिटीचे संस्थापक अध्यक्ष डॉ. विश्वनाथ दा. कराड हे शुभाशीर्वाद देतील. एमआयटी डब्ल्यूपीयूचे कार्यकारी अध्यक्ष डॉ. राहुल वि. कराड हे सन्माननीय पाहुणे म्हणून उपस्थित राहणार आहेत. तसेच एमआयटी डब्ल्यूपीयूचे कुलगुरू डॉ. आर.एम.चिटणीस उपस्थित राहणार आहेत.
रामायणातील कोड्यांची वैध आणि समर्पक उत्तरे, ‘सीतेची न सांगितलेली कथा’ या मराठी पुस्तकात सापडेल. ‘सीतेची न सांगितलेली कथा’ ही रामायणात सांगितलेल्या सीतामातेच्या आयुष्याच्या पारंपरिक कथानकाऐवजी, महान नारायणी देवीचा अवतार असलेल्या सीतामातेला, तिच्या खर्‍या स्वरुपात सादर करते. ज्या काळात मानव निसर्गापासून दुरावत चालला होता, त्या काळात एका नवीन संस्कृतीचा पाया घालण्यासाठी श्रीरामांबरोबर सामील होण्यासाठी सीतामाता पृथ्वीवर येते आणि लोकांच्या हृदयात आणि मनात घर करते. महान स्त्री-ऋषी आणि स्त्री-संतांच्या उच्च आध्यात्मिक सिद्धी इतरांना सांगण्याचा सीतामातेचा प्रयत्न करते.
या पुस्तकात स्त्रीच्या शहाणपणा, धैर्य आणि सामर्थ्याची, तसेच तिच्या व्यक्त आणि अव्यक्त जगावरील प्रेमाची आणि सर्वांच्या कल्याणासाठी केलेल्या तिच्या निःस्वार्थ त्यागाची कथा आपणास मिळेल.

पुणे- बांधकाम नियमानुसार प्रत्येक बांधकामाच्या ठिकाणी साईड मार्जिन, फ्रंट मार्जिन, पार्किंग स्पेसेस या असायलाच हव्यात ,आणि ज्या त्या बिल्डींगचे , व्यावसायिक गाळ्यांचे ,हॉल, हॉटेल्स,ऑफिसेस यांचे पार्किंग रस्त्यावर येत कामा नये हा साधा आणि जुना नियम पाळला तर रस्त्यावर पार्किंग ची समस्या निर्माण होणार नाही. पण याकडे महापालिका जाणून बुजून दुर्लक्ष करते आहे, तक्रारी केल्यावर होणार्या कारवाय या तात्पुरती मलम पट्टी करणाऱ्या ठरत आहेत. हा रोग एकदाचा समूळ नष्ट करा अशी मागणी क्रिएटिव्ह फाउंडेशनचे अध्यक्ष संदीप खर्डेकर यांनी केली आहे.

महापालिका आयुक्तांच्या नावे दिलेल्या पत्रात त्यांनी म्हटले आहे कि,’शहरातील वाहतुकीच्या कोंडीची समस्या दिवसेंदिवस गंभीर होतं आहे. यांस कळत नकळत मनपा चे कचखाऊ धोरण आणि अनधिकृत व्यवसायावर कठोर कारवाई प्रती ची अनास्था हे मुख्य कारण असल्याचे दिसून येते.शहरातील सर्व मुख्य रस्त्यांची पाहणी केली असती सर्वत्र साईड मार्जिन, फ्रंट मार्जिन व पार्किंग च्या जागेत अतिक्रमण करण्यात आले असून येथे अनधिकृतपणे व्यवसाय केला जातो.नागरिकांनी आवाज उठविल्यावर मनपा तोंड देखली कारवाई करते आणि पुन्हा पहिले पाढे पंचावन्न !!

वारंवार अतिक्रमण करणाऱ्यांविरुद्ध फौजदारी गुन्हा दाखल करण्याची तरतूद असतानाही प्रशासन हे करत नसल्याने ही समस्या गंभीर होतं चाललीये.वानगी दाखल गोपाळकृष्ण गोखले रस्त्यावर ( फर्गयुसन कॉलेज रस्त्यावर ) तर व्यवसायिक इमारती अथवा प्रसिद्ध रेस्टॉरंट मधील पार्किंग ची जागा दाखवा आणि बक्षीस मिळवा अशी स्थिती आहे. ह्या रस्त्यावर वारंवार कारवाई होऊन ( म्हणजे कदाचित कारवाई चा विश्वविक्रम होईल इतक्यांदा कारवाई होते ) ही परिस्थिती जैसे थे आहे. याचे गमक काय असा प्रश्न सर्वसामान्य पुणेकरांना पडतो.

यात व्हॅलेट पार्किंग (Valet Parking) ची भर पडली असून ( हॉटेल्स किंवा रेस्टॉरंट्समध्ये तुमची गाडी पार्क करण्यासाठी असणारा नियुक्त सेवक.) हे ग्राहकांच्या गाड्या सार्वजनिक रस्त्यांवर पार्क करतात ( जणू ह्या रस्त्यांचे तेच मालक असल्याच्या अविर्भावात.) गेल्या आठवड्यात वारजे कर्वेनगर क्षेत्रीय कार्यालयाच्या अध्यक्ष नगरसेविका मंजुश्री खर्डेकर यांनी कोथरूड च्या करिष्मा सोसायटी परिसरासह एरंडवण्यातील अनेक भागात नागरिक वाहतूक पोलिसांसह भेट दिली असता ही बाब प्रकर्षाने जाणवली. विशेषत: हॉटेल व्यवसायिक अरुंद गल्ल्यात व्हॅलेट पार्किंग उपलब्ध च्या नावाखाली गाड्या लावतात व त्याचा त्रास सामान्य नागरिकांना होतो.यावर त्वरित कारवाई व कायमस्वरूपी उपाययोजना न केल्यास शहराची वाहतुकीची स्थिती अधिकच गंभीर होतं जाईल हे स्पष्ट दिसतंय.” आपलं पुणं ” देशातील सर्वोत्तम शहरात गणलं जावं असं वाटत असेल तर आता प्रशासनाने अंग झटकून कामं करणे आणि घटनेने दिलेले अधिकार आणि जबाबदारी यांचा निर्वाहन करणे ही काळाची गरज आहे. आपण याबाबत सकारात्मक पावले उचलाल व सक्त कारवाई कराल अशी खात्री वाटते.

पुणे, २६ मेः इलेक्ट्रिक मोबिलिटीच्या अत्याधुनिक तंत्रज्ञानाचा अभ्यास करण्यासाठी एमआयटी वर्ल्ड पीस युनिव्हर्सिटीमध्ये स्थापन केलेल्या सेंटर फॉर एक्सलेन्स इलेक्ट्रिक व्हेकल्सचे माध्यमातून इलेक्ट्रिक वाहने आणि संबंधीत तंत्रज्ञानाच्या क्षेत्राला परिपूर्ण करण्यासाठी संशोधन, विकास, कौशल्य विकास यावर अधिक भर दिला जात आहे. तसेच टीबीआय सेंटर मध्ये३ यशस्वी स्टार्टअप, ४५ वेगवेगळ्या स्टार्टअप वर कार्य सुरू आहे. ज्यांना यशस्वीरित्या स्वतःचे स्टार्टअप सुरू करावयाचे आहे, त्यांच्यासाठी हे सेंटर सर्वतोपरी मदत करेल. अशी माहिती माईर्स एमआयटीचे संस्थापक व सेंटर फॉर एक्सलेन्स इलेक्ट्रीक व्हेइकल्सचे संचालक प्रा. प्रकाश जोशी यांनी पत्रकार परिषदेत दिली. यावेळी एमआयटी टीबीआयचे मुख्य कार्यकारी अधिकारी प्रसाद गोरे, ईअ‍ॅण्डटीसीच्या विभाग प्रमुख प्रा.डॉ. पारुल जाधव व सहयोगी प्राध्यापक डॉ. साकेत येवलेकर उपस्थित होते.
एमआयटी वर्ल्ड पीस युनिव्हर्सिटीच्या इलेक्ट्रिकल आणि इलेक्ट्रॉनिक्स अभियांत्रिकी विभागाच्या माध्यमातून या सेंटरमध्ये कार्य केले जात आहे. शैक्षणिक ज्ञान आणि वेगाने विकसित होणार्‍या इलेक्ट्रिक वाहन उद्योग यांच्यातील दरी भरुन काढणे हा या उपक्रमाचा मुख्य उद्देश्य आहे. तसेच उद्योग व शैक्षणिक संस्थामधील सहकार्याला प्रोत्साहन देणे आणि  ईव्ही तंत्रज्ञानाबद्दल जागरुकता वाढवावी लागेल असे ही प्रा. जोशी यांनी सांगितली.
डॉ. पारुल जाधव म्हणाल्या, सेंटरच्या माध्यमातून प्रकल्प विकास, सहयोगी संशोधन, करिअर कौन्सिलिंग, विद्यार्थी आणि प्राध्यपकांचे प्रशिक्षण, उदयोगांशी सल्लामसलत, स्टार्टअप सहाय्य आणि ईव्ही क्षेत्रात संशोधन आणि विकासावर विशेष कार्य केले जात आहे. नव्या युगात आयसी इंजिनाबरोबरच इलेक्ट्रिक कार झपाट्याने वाढतांना दिसत आहेत. भविष्यात हायब्रीड व्हेइकल्स, इलेक्ट्रिक कार आणि हायड्रोजन कार असे अनेक पर्याय इलेक्ट्रिक कार मध्ये उपलब्ध होतील. लवकरच हे सेक्टर फार मोठा पल्ला गाठणार आहे. या सर्व उद्योगाला मदत करणारे एमआयटी डब्ल्यूपीयू येथील ई मोबिलिटी सेंटर फॉर एक्सलन्स हे आहे.
प्रसाद गोरे यांनी सांगितले की, या एमआयटी टीबीआय सेंटरच्या माध्यमातून जवळपास ७५ स्टार्टअपला सपोर्ट करण्यात आला आहे. तसेच शिक्षण, कृषी, स्पेस, आयटी या क्षेत्राशी स्टार्टअप सुरू करण्याला मदत केली जाणार आहे. ज्यांना उद्योजक व्हावयाचे आहे त्यांना प्रोत्साहन दिले जाईल. येथे लॅबटेस्टींग आणि तज्ज्ञ सल्लागार उपलब्ध आहेत.
डॉ. साकेत येवलेकर म्हणाले, उद्योग क्षेत्रातील वाढत्या गरजा पूर्ण करण्यासाठी जागतिक दर्जाची पायाभूत सुविधा आणि व्यावहारिक प्रशिक्षण उपलब्ध करुन देणे, प्रशिक्षण सत्रे, कार्यशाळा, इंटर्नशिप, परिसंवाद आणि तज्ज्ञांचे व्याख्यान यांसारखे विशेष कार्यक्रमांद्वारे विद्यार्थी व उद्योग व्यावसायिकांना इलेक्ट्रिक मोबिलिटीमधील नाविन्यपूर्ण अद्ययावत ज्ञान व कौशल्ये प्रदान केली जात आहेत.
या सेंटरच्या माध्यमातून विद्यार्थी आणि संशोधकांना नाविन्यपूर्ण एक प्रणाली शोधण्यास, डिझाइन करण्यास आणि विकसित करण्यास प्रोत्साहित केले जाते. इलेक्ट्रिक मोबिलिटी ही केवळ वाहतुकीची भविष्यातील दिशा नाही तर आजची गरज आहे.
 

पुणे, दि. 26: शासकीय वसतिगृह (नविन) येरवडा, विश्रांतवाडी या वसतिगृहात प्रवेश घेण्याकरिता इच्छुक विद्यार्थ्यांनी https://hmas.mahait.org/ या संकेतस्थळावर 15 जुलैपर्यंत ऑनलाईन अर्ज करावे.
सन 2026-27 या शैक्षणिक वर्षात सामाजिक न्याय विभागाअंतर्गत डॉ. बाबासाहेब आंबेडकर मुलांचे शासकीय वसतिगृह (नविन) येरवडा, विश्रांतवाडी येथे इयत्ता 10 वी नंतर कनिष्ठ महाविद्यालय, तंत्रनिकेतन, शासकिय औद्योगिक प्रशिक्षण संस्था येथे प्रवेश घेवू इच्छिणा-या अनु. जाती प्रवर्गाच्या विद्यार्थ्यांच्या मोफत शासकिय वसतिगृह प्रवेश देण्यात येणार आहे.
वसतिगृह प्रवेश हा प्रवर्ग निहाय गुणवत्तेनुसार राहील. सदर शासकीय वसतिगृहात विनामुल्य निवास, आंथरूण-पांघरुण, भोजन, पुस्तके, स्टेशनरी इतर शैक्षणिक बाबींकरीता आर्थिक सहाय्य, तसेच दरमहा निर्वाह भत्ता इत्यादी सुविधा पुरविण्यात येतात. इच्छुक विद्यार्थ्यांनी वसतिगृह प्रवेशासाठी ऑनलाईन फॉर्म भरावे, असे आवाहन समाज कल्याण विभागातर्फे करण्यात आले आहे.

रस्त्यावरील वेबारस वाहनांबाबत वाहतूक विभागास कळविण्याचे आवाहन

पुणे, दि.25: पोलीस आयुक्त पुणे शहर अमितेश कुमार यांच्या आदेशान्वये शहरातील बिनधनी,बेवारस वाहने हटविण्याची विशेष मोहीम राबवून वाहतूक शाखेअंतर्गत ११ पोलीस स्टेशनकडील ३६६ व वाहतूक शाखेकडील ३७३ अशी एकूण ७३९ वाहनांचा ई-लिलाव करण्यात आला, याद्वारे ५० लाख १० हजार १२८ रुपये इतकी रक्कम शासन जमा होणार आहे, अशी माहिती पुणे शहर वाहतूक शाखेचे पोलीस उपायुक्त डॉ. संदीप भाजीभाकरे यांनी दिली आहे. शहरात मोठ्या प्रमाणावर बिनधनी वाहने अनेक वर्षापासून पडून असल्याने नागरिकांना गैरसोयीचा सामना करावा लागत होता. याबाबींचा विचार करता पोलीस आयुक्त यांनी या वाहनांची कायदेशीर विल्हेवाट प्रक्रिया राबविण्याचे आदेश दिले होते.

वाहतुक शाखेने शहरातील विविध रस्त्यांवरील बेवारस वाहनांची माहिती संकलित करून योग्य नियोजनाद्वारे ती वाहने जमा केली. तसेच वाहनांच्या मालकांचा शोध घेण्यासाठी वृत्तपत्रामध्ये प्रसिद्धी, जाहीरनामे व जमा केलेल्या वाहनांचे प्रादेशिक परिवहन कार्यालयाकडून मुल्यांकन इत्यादीबाबत विशेष मोहीम राबविण्यात आली. ज्या वाहनांचे मालक उपलब्ध झाले, त्यांना त्यांची वाहने परत करण्यात आली. तसेच मालक न मिळालेल्या वाहनांबाबत न्यायालयाकडून नाश करण्याचे आदेश प्राप्त करण्यात आले. महाराष्ट्र पोलीस अधिनियम १९५१ मधील कलम ८७ अन्वये काही वाहनांच्या लिलावास अंतिम मंजुरी देण्यात आली. त्यानुसार मेटल स्क्रॅप ट्रेड कॉर्पोरेशन लिमिटेड या केंद्र शासन संलग्न संस्थेमार्फत २० मे रोजी लिलाव प्रक्रिया करण्यात आले. या कामी आयुक्तालयातील सर्व संबंधित वरिष्ठ अधिकारी तसेच वाहतूक विभागाचे प्रभारी अधिकारी, पोलीस ठाण्याचे अधिकाऱ्यांचे योगदान लाभले आहे.

या प्रक्रियेमुळे शहरातील बेवारस वाहनांची समस्या अंशतः कमी झाली असून, यापुढेही वाहतूक विभाग अशा प्रक्रिया राबविणार आहे. नागरिकांनी रस्त्यावर बरेच कालावधी पासून बेवारस स्थितीत उभ्या असलेल्या, वाहतुकीस अडथळा करणाऱ्या व परिणामी वाहतुकीचा वेग मंदावण्यास कारणीभूत ठरणाऱ्या बेवारस वाहनांची माहिती पी.टी.पी अॅपद्वारे वाहतुक विभागास कळवावी, तसेच अडथळेमुक्त, सुरक्षित व परिणामी वाहतुकीचा वेग वाढविणेस सहकार्य करावे, असे आवाहन डॉ. भाजीभाकरे यांनी केले आहे.

पुणे, दि. 26 : जिल्हा कौशल्य विकास, रोजगार व उद्योजकता मार्गदर्शन केंद्र, पुणे आणि एज्युस्पार्क इंटरनॅशनल प्रा. लि., एमआयडीसी स्किल डेव्हलपमेंट सेंटर, पुणे यांच्या संयुक्त विद्यमाने शुक्रवार, २९ मे २०२६ रोजी रांजणगाव एमआयडीसी, ता. शिरूर येथे पंडित दीनदयाळ उपाध्याय रोजगार मेळाव्याचे आयोजन करण्यात आले आहे.
या रोजगार मेळाव्यात विविध नामांकित कंपन्यांमार्फत एकूण ५६५ रिक्त पदांसाठी भरती प्रक्रिया राबविण्यात येणार आहे. एसएससी, एचएससी, आयटीआय, डिप्लोमा, पदवीधर व पदव्युत्तर पात्रताधारक उमेदवारांसाठी रोजगाराच्या विविध संधी उपलब्ध करून देण्यात येणार आहेत.
इच्छुक उमेदवारांनी www.rojgar.mahaswayam.gov.in⁠ संकेतस्थळावर भेट देऊन संबंधित रिक्त पदांसाठी अर्ज करावा. तसेच प्रत्यक्ष मुलाखतीसाठी उपस्थित राहताना शैक्षणिक कागदपत्रांच्या छायांकित प्रती व किमान ५ रेझ्युमे प्रती सोबत आणाव्यात, असे आवाहन करण्यात आले आहे.
अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन केंद्र, ४८१ रास्ता पेठ, पुणे येथे संपर्क साधावा किंवा दूरध्वनी क्रमांक ०२०-२६१३३६०६ वर संपर्क साधावा.

पुणे, दि. 26 : जिल्हा कौशल्य विकास, रोजगार व उद्योजकता मार्गदर्शन केंद्र, पुणे आणि दत्तकला शिक्षणसंस्था, पुणे यांच्या संयुक्त विद्यमाने नोकरी इच्छुक बेरोजगार उमेदवारांसाठी बुधवार, ३ जून २०२६ रोजी पंडित दीनदयाळ उपाध्याय रोजगार मेळाव्याचे आयोजन करण्यात आले आहे. हा रोजगार मेळावा दत्तकला कॉलेज ऑफ फार्मसी, स्वामी चिंचोली, भिगवण, ता. दौंड, जि. पुणे येथे आयोजित करण्यात आला आहे.

लाईफ सायन्स क्षेत्रातील विविध रिक्त पदांसाठी आयोजित या मेळाव्यात सोहन हेल्थकेअर, क्लीन सायन्स अँड टेक्नोलॉजी, मोडेप्रो इंडिया प्रा. लि., ओमनी अॅक्टीव्ह इंडिया प्रा. लि., एम जे बायोफार्मा लि., सेंच्युरी फार्मास्युटिकल लि., एमक्युअर फार्मा प्रा. लि., जिनेव्हा बायोफार्मा लि., इटेनरीस फाईन लि., हॉनर लॅब लि., अलिवुस लाईफसायन्स लि. यांसह नामांकित कंपन्या सहभागी होणार असून एकूण १९८ रिक्त पदे भरली जाणार आहेत.

१० वी, १२ वी, डी. फार्म, बी. फार्म, बीएससी केमिस्ट्री, एमएससी केमिस्ट्री आणि एमएससी बायोटेक्नॉलॉजी पात्रताधारक उमेदवारांना या रोजगार मेळाव्याद्वारे नोकरीच्या संधी उपलब्ध होणार आहेत.

इच्छुक उमेदवारांनी रिक्त पदांच्या माहितीसाठी www.rojgar.mahaswayam.gov.in⁠ या संकेतस्थळावर अर्ज करावेत तसेच प्रत्यक्ष मुलाखतीसाठी शैक्षणिक कागदपत्रांच्या छायांकित प्रती आणि किमान पाच बायोडाटा प्रती सोबत आणाव्यात, असे आवाहन करण्यात आले आहे.

अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन केंद्र, ४८१ रास्ता पेठ, पुणे येथे संपर्क साधावा किंवा दूरध्वनी क्रमांक ०२०-२६१३३६०६ वर संपर्क करावा.