पुणे :- गोयल गंगा फाऊंडेशनतर्फे  पंढरपूरला जाणाऱ्या पालखी सोहळ्यात गोयल गंगा इंटरनॅशनल स्कूल मधील १००हुन अधिक विद्यार्थ्यांनी सहभाग घेतला. दरवर्षीप्रमाणे विद्यार्थ्यांनी वारकऱ्यांशी बोलून स्वच्छता आणि आरोग्याचे  महत्व समजून सांगितले. शिवाय विद्यार्थ्यांनी पोस्टर्स आणि पथनाट्यातून स्वच्छता कशी ठेवावी ,कचरा कुंडीत टाकला जावा,पाण्याचे संवर्धन कसे करावे याची देखील माहिती  दिली. विद्यार्थ्यांनी विविध खाद्यपदार्थांच्या दुकानाजवळ उभे राहून कचरा गोळा करत वारकऱ्यांना स्वच्छतेविषयी माहिती दिली.

विद्यार्थ्यांनी पंढरीच्या दिशेने प्रस्थान करणाऱ्या वारकऱ्यांना गुलमोहर,नीम,आंबा,चिंच अशा वेगवेगळ्या प्रकारचे बीजगोळे दिले. वारकरी पालखी मार्गावर ‘ज्ञानोबा, तुकोबांच्या’ जयघोषात बीजगोळे टाकतील. बीजगोळ्यावर जेव्हा पावसाचा शिडकावा होईल आणि ते जमिनीत रुजून वृक्षसंवर्धनाचा हेतू साध्य होईल.

मोठया उत्साहाने भक्तीमय वातावरणात विद्यार्थ्यांनी जगतगुरू संत तुकाराम महाराज पालखी सोहळयात सहभागी झाले यावेळी शाळेच्या विश्वस्त सोनू गुप्ता ,मुख्याध्यापिका भारती भागवानी, तसेच इतर शिक्षक व विद्यार्थी मोठया संख्येने उपस्थित होते.

पुणे-  विठुरायाचा  अखंड जयघोष करीत लाखोच्या संख्येने वैष्णवांचा मेळा शहरात दाखलझाला . यावेळी  संपूर्ण वातावरण भक्तीमय बनले. फुलांच्या वर्षावात संत तुकाराम महाराजांच्या पालखीचे स्वागत करण्यात आले. महापौर मुक्ता टिळक, उपमहापौर सिद्धार्थ धेंडे, स्थायी समितीचे अध्यक्ष मुरलीधर मोहोळ, यांनी संत तुकाराम महाराज व संत ज्ञानेश्वर महाराजांच्या पालखीचे स्वागत केले. पाटील इस्टेट येथील उड्डाणपुलाखालच्या चौकात पालख्यांच्या स्वागतासाठी महापालिकेकडून विशेष कक्ष उभारण्यात आला होता. याचबरोबर इतर राजकीय पक्ष, संस्था, बँका यांनीही स्वागतासाठी कक्ष उभारले होते. सायंकाळी पाचच्या सुमारास संत तुकारामम हाराजांच्या पालखीचे तर पावणेसातच्या सुमारास संत ज्ञानेश्वर महाराजांच्या पालखीचे पाटील इस्टेट इथे आगमन झाले.

पालख्यांच्या आगमनानंतर नंतर दर्शनासाठी भाविकांची मोठी झुंबड उडाली. चौकात दोरीने फुलांच्या करंड्या बांधण्यात आल्या होत्या, पालख्या चौकात येताच या करंड्यांमधील फुलांचा वर्षाव करण्यात आला. ‘बोला पुंडलिक वरदा हरी विठ्ठल, श्री ज्ञानदेव-तुकाराम, ज्ञानोबा माऊली.. माऊली’ असा एकच जयघोष यावेळी झाला. स्वागताचे अत्यंत मनोहारी दृश्य यावेळी पाहायला मिळाले.

पालख्यांचे स्वागत करताना मुक्ता टिळक म्हणाल्या की, पुणेकर कित्येक दिवसांपासून वाट पाहत असलेल्या पालख्यांचे आज आगमन झाले आहे. वारकऱ्यांच्या सेवेसाठी पुणेकर आसुसलेले आहेत. दोन दिवस त्यांचा मुक्काम पुण्यात असेल. या काळात पुणेकर वारकऱ्यांच्या सेवेत कुठेही कमी पडणार नाहीत. त्यांच्या आगमनाने पावसाचा वर्षाव व्हावा, असे पांडुरंगाला साकडे आहे.

पाटील इस्टेट येथे महापालिकेच्या वतीने उभारण्यात आलेल्या कक्षामध्ये वीणाधारी वारकऱ्यांना श्रीफल देऊन त्यांचे स्वागत केले जात होते. कक्षातील स्पीकरवर भक्तीगीते लावण्यात आली होती.

दगडूशेठ गणपती मंदिरासमोर पुष्पवृष्टी

माउली…माउलीच्या जयघोषात पुण्यामध्ये लाखो वारक-यांसोबत आलेल्या संतश्रेष्ठ ज्ञानेश्वर माउली व जगद्गुरू तुकाराम महाराजांच्या पालखी रथावर श्रीमंत दगडूशेठ हलवाई गणपती मंदिरासमोर पुष्पवृष्टी करण्यात आली. यावेळी माउली…माउली, तुकोबा… तुकोबाच्या जयघोषासोबतच गणपती बाप्पा मोरयाच्या घोषणांनी परिसर दुमदुमून गेला. दोन्ही संस्थानच्या विश्वस्तांनी गणरायाचरणी नतमस्तक होत आरोग्यदायी, निर्मल आणि हरित महाराष्ट्रासाठी साकडे घातले.

श्रीमंत दगडूशेठ हलवाई गणपती मंदिरातर्फे तुकाराम महाराज व ज्ञानेश्वर महाराज पालखी सोहळयाचे स्वागत मोठया उत्साहात करण्यात आले. यावेळी दगडूशेठ गणपती ट्रस्टचे अध्यक्ष अशोक गोडसे, कोषाध्यक्ष महेश सूर्यवंशी, सुनील रासने यांसह वारकरी मंडळी मोठया संख्येने उपस्थित होती.

ट्रस्टचे अध्यक्ष अशोक गोडसे म्हणाले, वारीची शेकडो वर्षांची परंपरा आहे. दरवर्षी दगडूशेठ हलवाई गणपती मंदिरासमोर पालखीचे उत्साहात स्वागत केले जाते. यंदा ट्रस्टच्या 125 व्या वर्षानिमित्त वारी सोहळ्यातील राबविण्यात येणा-या उपक्रमांची सुरुवात झाली असून हरित वारी, स्वच्छता आणि वारक-यांकरिता अनेक उपक्रम राबविण्यात येणार आहेत. नुकतेच जय गणेश हरित वारी या 50 लक्ष वृक्षारोपण कार्यक्रमाला सुरुवात झाली आहे. वारक-यांनी यामध्ये सहभाग घेत वृक्षलागवड व संवर्धन करावे, असे आवाहनही त्यांनी केले.

पुणे-विठुरायाच्या जयघोषात ज्ञानोबा-तुकोबांच्या पालख्यांच्या आगमनानंतर पालख्या क्रमाने मुक्कामी स्थळावर मार्गस्त होताना, शिस्तबद्ध जाणा-या ज्ञानोबांच्या पालखीला गुडलक चौकात मध्येच थांबवे लागले. यामुळे मोठा गोंधळ निर्माण होऊन ज्ञानोबांच्या पालखीला अर्ध्यातासाचा विलंब झाला .दरम्यान संभाजी ब्रिगेड चे संतोष शिंदे यांनी पोलीस व वारकरी यांच्यात वाद निर्माण व्हायला कारीभूत ठरलेल्या ,आणि नंग्या तलवारी घेवून पालखीत घुसलेल्या व्यक्तींवर तत्काळ कारवाई करावी अशी मागणी केली आहे .

याबाबतची हकीकत अशी की, संगमपुल येथून फर्ग्युसन महाविद्यालय रस्त्यावर पालख्या क्रमाने मुक्कामी स्थळावर मार्गस्थ होतात. प्रथम संत तुकाराम, त्यानंतर संत गब्बर शेख, संताजी महाराज जागणारे आणि संत ज्ञानेश्वर पालखी असतात. मात्र, हिंदुत्ववादी संभाजी भिडे गुरुजी संघटना मोठ-मोठ्याने घोषणा देत मध्येच घुसते. त्यामुळे ज्ञानेश्वर पालखी प्रमुखांनी पालखी गुडलक चौकातच थांबवली. यामुळे एकच गोंधळ उडाला. पोलिसांनी तात्काळ येथे येऊन मध्यस्थी केली. दरम्यान, भिडे गुरुजी संघटनामधील काही व्यक्तींच्या हातामध्ये तलवारी व डोक्याला फेटे घातलेले असतात. तीन ते चार वर्षांपासून हा प्रकार सुरू असल्याचे भालदार चोपदार यांनी सांगितले.

संत ज्ञानेश्वर पालखी प्रमुखांकडून यापूर्वी पोलिसांना याबाबत सांगण्यात आले होते. तसेच, तुम्हाला हे बंद करता येत नसेल, तर आम्ही आमचा मार्ग बदलू असेही सांगण्यात आले होते. मात्र, पोलिसांकडून याबाबत काहीच निर्णय घेण्यात न आल्याने यंदाही गुडलक चौकात पालखी आल्यानंतर भिडे गुरुजी संघटचे लोक पालखी त सहभागी झाले . त्यामुळे ज्ञानेश्वर महाराजांच्या पालखी प्रमुखांनी पालखी जागेवरच थांबवत पुढे न जाण्याचा निर्णय घेतला.

त्यानंतर याठिकाणी मोठा गोंधळ उडाला. वरिष्ठ अधिकार्‍यांनी तात्काळ धाव घेऊन मध्यस्थी केली. त्यामुळे वातारवण शांत झाले. तसेच ज्ञानेश्वर पालखी प्रमुखांना यापुढे असे होऊ न देण्याची हमी परिमंडळ एकचे पोलीस उपायुक्त बसवराज तेली यांनी दिली. त्यानंतर पालखी येथून मार्गस्थ झाली. या गोंधळात तब्बल अर्धातास पालखी गुडलक चौकात थांबवण्यात आली.

लोणावळ्यात क्रेडाईच्या राज्यस्तरीय ‘महाकॉन’ परिषदेचे समापन

पुणे– क्रेडाई सदस्यांनी रेरा आणि जीएसटीच्या नियमांचा अभ्यास करावा. बांधकाम उद्योगाचे भवितव्य उज्ज्वल आहे, विशेषतः परवडणाऱ्या घरांच्या क्षेत्रात अशा प्रकारचा विश्वास ‘महाकॉन’ या दोन दिवसीय परिषदेत व्यक्त करण्यात आला. क्रेडाई महाराष्ट्रने या परिषदेचे आयोजन केले होते आणि १६ व १७ जून रोजी ती लोणावळा येथे पार पडली. ही पाचवी वार्षिक परिषद असून या कार्यक्रमाला ३७ शहरांतील ३६५ पेक्षा जास्त बांधकाम व्यावसायिक उपस्थित होते.

या दोन दिवसीय परिषदेत  विविध विषयांवर चर्चा झाली. यात रेरानंतरच्या काळातील व्यवसायाचा दृष्टिकोन, व्यापक परवडणाऱ्या गृहनिर्माणाची अंमलबजावणी, जीएसटीच्या अंमलबजावणीनंतर बांधकाम उद्योगातील आव्हानांचा सामना इत्यादी विषयांचा समावेश होता.

महाकॉनचे उद्घाटन १६ जून रोजी स्टेट बँक ऑफ इंडियाचे कर्ज विभागाचे राष्ट्रीय प्रमुख वैजनाथ एम. जी. यांच्या हस्ते झाले. क्रेडाई –नॅशनलचे निर्वाचित अध्यक्ष सतीश मगर, क्रेडाई – महाराष्ट्रचे अध्यक्ष शांतिलाल कटारिया  हे यावेळी व्यासपीठावर उपस्थित होते. क्रेडाई नॅशनलचे सचिव रोहीत राज मोदी, क्रेडाई  महाराष्ट्रचे उपाध्यक्ष राजीव पारेख, महाकॉनचे निमंत्रक गिरीश रायबागे यांचा यावेळी उपस्थित मान्यवरांमध्ये समावेश होता.

या प्रसंगी बोलताना वैजनाथ यांनी ग्वाही दिली, की एसबीआय खासकरून दुसऱ्या व तिसऱ्या स्तरातील शहरांतील बांधकाम उद्योगासोबत काम करत असून परवडणाऱ्या घरांच्या बांधणीसाठी मदत पुरवत आहे.  कमीत कमी व्याजदरांवर आकर्षक कर्ज पुरवून विकसकांना तसेच वैयक्तिक ग्राहकांनाही ही मदत देण्यात येत आहे, असे त्यांनी सांगितले.

आपल्या उद्घाटनाच्या भाषणात सतीश मगर म्हणाले, की सदस्यांनी सक्रिय होऊन स्वतःमध्ये बदल घडवून आणावा  आणि  रेरामुळे येत असलेल्या सुधारणा घडवून आणाव्यात.

या परिषदेचा हेतू स्पष्ट करताना क्रेडाई  महाराष्ट्रचे अध्यक्ष शंतिलाल कटारिया म्हणाले, “उद्योगातील नवीनतम ज्ञान इतरांना देण्यासाठी आणि बांधकाम उद्योगात येत असलेल्या नियम व नियमनांची माहिती देण्यासाठी ही परिषद आयोजित केली आहे. जेणेकरून सर्व प्रकारच्या शंका दूर व्हाव्यात. रेरा आणि जीएसटीमुळे आलेल्या या संक्रमणाच्या काळात सदस्यांच्या जबाबदाऱ्या काय आहेत, याचे स्पष्टीकरण त्यांनी केले. रेरा व जीएसटीच्या नियमांचे पालन करण्याचे त्यांनी सदस्यांना आवाहन केले आणि शिस्तबद्ध व संघटीत विकसकांसाठी भविष्य उज्ज्वल असल्याची ग्वाही दिली.

समारोप समारंभात महाराष्ट्राच्या नगर नियोजन विभागाचे संचालक विजय शेंडे यांनी समान विकास व बांधकाम नियमावलीवर भाष्य केले तसेच महाराष्ट्रातील नगर नियोजनातील येऊ घातलेल्या सुधारणांची माहितीही दिली.  महारेराचे अध्यक्ष गौतम चटर्जी यांच्याशी सदस्यांच्या थेट संवादाचे यावेळी आयोजन करण्यात आले होते. यात  चटर्जी यांनी रेरा कायद्याचे विवेचन करून उपस्थितांच्या शंकांना उत्तरे दिली.  चटर्जी म्हणाले, की ३१ जुलै २०१७ पर्यंत ताबा प्रमाणपत्र मिळणाऱ्या प्रकल्पांसाठी नोंदणी करण्याची गरज नाही. त्यांनी सदस्यांना नोंदणीचे फायदेही स्पष्ट करून सांगितले.

भारतातील आघाडीच्या शोभा ग्रुपचे उपाध्यक्ष जी. सी. शर्मा यांनी भारतात बांधकाम उद्योगाचे भवितव्य उज्ज्वल असल्याचे स्पष्ट केले आणि या क्षेत्रातील वित्तीय शिस्तीच्या टीप्स दिल्या. प्रसिद्ध आर्किटेक्ट हाफीस काँट्रॅक्टर यांनी परवडणाऱ्या घरांबाबत दृष्टिकोन मांडला.

या दोन दिवसांच्या कार्यक्रमात परवडणारी घरे, कागदपत्रे बनवतानाची (ग्राहक/सोसायटी/अपार्टमेंट) मुख्य कलमे, व्यवसायवाढीची रणनीती, व्यापक परवडणाऱ्या घरांची बांधणी, बांधकाम व्यवसायातील आव्हाने, जीएसटीची अंमलबजावणी, गृहकर्ज आणि पंतप्रधान आवास योजना इ. विषयांवर सादरीकरणे झाली. रेरावरील एक खुली चर्चाही यावेळी झाली.

या परिषदेच्या निमित्ताने जीएसटीची सांगोपांग माहिती देणारे पुस्तक श्री. कटारिया यांच्या हस्ते प्रकाशित करण्यात आले. पुढील महाकॉन डिसेंबरमध्ये नाशिकमध्ये घेण्यात येईल, अशी माहितीही त्यांनी दिली.

पुणे: श्री क्षेत्र आळंदी येथील इंद्रायणी नदीच्या तीरावर घाटाची निर्मिती केली व १४५ फूटाच्या गरूड स्तंभ आणि भागवत धर्माची पताका उभारल्यामुळे आळंदीच्या वैभवात भर पाडल्याबद्दल विश्‍वशांती केंद्र (आळंदी), माईर्स एमायटी चे संस्थापक अध्यक्ष प्रा.डॉ.विश्‍वनाथ दा .कराड व त्यांच्या पत्नी सौ.उर्मिला विश्‍वनाथ कराड यांचा आळंदी नगरपालिका आणि आळंदीकरांच्या वतीने नगराध्यक्षा सौ.वैजंताताई अशोक उमरगेकर व नगरपालिकेचे सर्व सदस्य यांच्या हस्ते विश्‍वरूप दर्शन मंच, श्री क्षेत्र आळंदी येथे पालखी सोहळ्याच्या प्रस्थानाच्यावेळी पुणेरी पगडी परिधान करून भव्य नागरी सत्कार करण्यात आला.
यावेळी महाराष्ट्राचे माजी मंत्री श्री.बबनराव पाचपुते, ह.भ.प.श्री.डॉ. तुकारामबुवा गरूड (ठाकुरबुवा) दैठणेकर, श्री. बाळासाहेब रावडे, डॉ. सुदाम महाराज पानेगावकर, पं.उद्धवबापू आपेगावकर , अशोक उमरगेकर, आळंदी नगरपालिकेचे सर्व नगरसेवक उपस्थित होते.
सत्काराला उत्तर देतांना प्रा. डॉ. विश्‍वनाथ दा. कराड म्हणाले की,“महाराष्ट्राचे आराध्य दैवत पंढरपूर येथील पांडूरंगाची मूर्ति सोन्याची करण्याचा माझा संकल्प आहे. सुवर्ण मंदिर व कोलार येथील ५५० किलोची सोन्याच्या मंदिराप्रमाणेच आता सर्व वारकर्‍यांना मिळून पंढरपूरच्या विठूरायाला सोन्याचे करायचे आहे. पांडूरंगाला सजवल तर त्यात वाईट काय आहे? असा प्रश्‍न त्यांनी आळंदीकरांबरोबरच वारकर्‍यांना विचारला. तसेच, तीर्थक्षेत्र आळंदी बरोबरच पंढरपूर येथे १८ घाटाची निर्मिती करावयाचा संकल्प आहेे. भविष्यात आळंदी- देहू हे विश्‍वशांतीचे केंद्र बनेल. कालानुरूप वारकरी संप्रदायाचे कार्य हे जगभर पसरेल. भविष्यात वारकरी संप्रदाय हा जगाला सुख, समाधान व शांतीचा संदेश देईल. २१वें शतक हे भारताचे असेल.”
श्री.मा. बबनराव पाचपुते म्हणाले,“आळंदी येथील स्वच्छतेची सुरूवात डॉ. विश्‍वनाथ कराड यांनी केली. त्या वेळेस झालेली टीका टिप्पणी याकडे त्यांनी लक्ष दिले नाही म्हणून आज या तीर्थ क्षेत्राच्या ठिकाणी वारकर्‍यांना सर्व सुविधा उपलब्ध झाल्या आहेत.”
श्री. संजय देशमुख यांनी वारकरी सांप्रदायाच्या वतीने डॉ.विश्‍वनाथ कराड यांना पंढरपूर येथील श्री विठ्ठल-रूक्मिणी मंदिर समितीचे अध्यक्ष बनवावे, अशी मागणी महाराष्ट्र शासनाकडे केली आहे. याकरिता समस्त वारकर्‍यांनी संमती दर्शविली आहेे.
ह.भ.प.श्री.डॉ. तुकारामबुवा गरूड (ठाकुरबुवा) दैठणेकर म्हणाले,“मानवी जीवनाचा हेतू संत संगतीचा असेल तरच जीवनाला खरी दिशा मिळते. मानवी जीवनातील सर्वात मोठी संधी म्हणजे ईश्‍वर दर्शन होय. म्हणून वारीच्या प्रस्थानाला विशेष महत्व आहे. संसाराची आसक्ती सोडून भगवंताकडे जावे त्यातच संपूर्ण जीवनाचा सार आहे.”
विश्‍वशांती केंद्र (आळंदी), माईर्स एमआयटी, पुणे व श्री क्षेत्र आळंदी-देहू परिसर विकास समिती यांच्या संयुक्त विद्यमाने श्री संत ज्ञानेश्‍वर-तुकाराम ज्ञानतीर्थ, विश्‍वरूप दर्शन मंच, श्री क्षेत्र आळंदी येथे पालखी सोहळ्यानिमित्त युनेस्को अध्यासना अंतर्गत तीन दिवसीय लोकशिक्षणपर कार्यक्रम आयोजित करण्यात आला होता. या कार्यक्रमाच्या समारोपात ह.भ.प.श्री.किसन महाराज साखरे यांचे सुश्राव्य कीर्तन झाले. श्रीमती गोदावरीताई मुंडे, श्री. रमेशबुवा शेनगावकर, श्री. काशीरामबुवा इडोळीकर व श्री. दिगंबरबुवा कुटे यांच्या सांप्रदायिक संगीत भजानाच्या कार्यक्रमाने या तीन दिवसीय कार्यक्रमाचा समारोप झाला.