पुणे- दिनांक 8 मार्च 2018 रोजी महिला दिन साजरा करण्यात येणार आहे. या अनुषंगाने महिलांमध्ये निवडणूक विषयक जागरूकता निर्माण व्हावी या दृष्टीने निवडणूक विषयक कार्यक्रमाचे आयोजन करण्यात आले आहे.

या निमित्त दिनांक 3 मार्च 2018 रोजी  कमिन्स अभियांत्रिकी महिला महाविद्यालय, कर्वेनगर, पुणे येथून महिलांची 4 कि.मी. ची मॅरेथॉन स्पर्धा आयोजीत करण्यात आलेली आहे. या स्पर्धेत 200 ते 300 विद्यार्थिनी व महिला सहभागी होणार आहेत. या स्पर्धेची सूरुवात कमिन्स अभियांत्रिकी महिला महाविद्यालय, कर्वेनगर येथून सकाळी 7 वाजता होणार असून सहभागींनी या ठिकाणी सकाळी 6.30 वाजता उपस्थित रहावे. मॅरेथॉन कर्वेनगर चौक-वनदेवीमंदिर- हहाणूकर कॉलनी मार्गे, कर्वे पूतळा व कर्वे रोड पासून परत त्याच मार्गे कमिन्स अभियांत्रिकी महिला महाविद्यालय, कर्वेनगर येथे सकाळी 8 वाजता येवून समाप्त होणार आहे.

तसेच दिनांक 8 मार्च 2018 रोजी अल्पबचत भवन, पुणे येथेही महिला दिनाच्या अनुषंगाने निवडणूक विषयक विविध कार्यक्रमाचे आयोजन करण्यात आले आहे, अशी  माहिती उप जिल्हा निवडणूक अधिकारी मोनिका सिंह यांनी प्रसिद्धीपत्रकाद्वारे  दिली आहे.

पुणे : सीए इंटरमिजीएटचे ऑल इंडिया रँकर, महेश प्रोफेशनल फॉरम आणि विदर्भ महेश असोसिएशनचे माजी अध्यक्ष असलेले सीए आनंद आर जाखोटिया यांची आयसीएआयच्या पुणे शाखेच्या अध्यक्षपदी निवड झाली आहे. अध्यक्षपदाचा कार्यभार घेण्यापूर्वी त्यांनी कोषाध्यक्ष, सचिव आणि उपाध्यक्ष म्हणून काम केले आहे. विकासाच्या अध्यक्षपदाचा कार्यभारही त्यांनी ह्यापूर्वी सांभाळला आहे जे विद्यार्थ्यांच्या प्रगतीसाठी काम करते. सीए आनंद आर जाखोटिया यांच्या कार्यकाळात विकासाच्या पुणे शाखेने २०१५-२०१६ मध्ये बेस्ट ब्रांच इन दि रिजन आणि बेस्ट ब्रांच इन दि नेशन हे अवॉर्ड प्राप्त केले होते. सीए आनंद आर जाखोटिया हे एमव्हीपीएम, माहेश्वरी विद्या प्रचारक मंडळाच्या महेश विद्यालय कोथरूडच्या मॅनेजिंग कमिटीतदेखील आहेत.

अध्यक्ष सीए आनंद आर जाखोटिया ह्यांच्याप्रमाणेच सीए ऋता चितळे ह्यांची उपाध्यक्ष म्हणून निवड झाली असून सीए राजेश अग्रवाल हे सचिव आणि विकासाचे अध्यक्ष म्हणून तर सीए अभिषेक धामणे यांची आयसीआयच्या कोषाध्यक्षपदी निवड झाली आहे.

विद्यार्थ्यांना मदत करण्यासाठी त्यांना अतिशय आवश्यक आणि महत्वाचे असलेले ग्रंथालय आणि अभ्यासिकांची सोय आयसीएआयचे नवे अध्यक्ष सीए आनंद जाखोटिया करणार आहेत. विद्यार्थ्यांसाठी फक्त शैक्षणिकच नव्हे तर सामाजिक कार्यक्रमाचे आयोजनदेखील ते करणार आहेत. सदस्यांकरिता सीपीइ आणि नॉन-सीपीइ कार्यक्रमांचे अगदी वाजवी किमतीत आयोजन करण्याची त्यांची इच्छा आहे. सदस्यांसाठी नेहमीच्या ट्रेनिंग कार्यक्रमांव्यतिरिक्त आणखी कार्यक्रम आयोजित करण्याचा त्यांचा अजेंडा आहे.

सीए आनंद आर जाखोटिया यांनी अध्यक्षपदाचा कार्यभार घेतल्यानंतर ३ मार्चला मेगा बँकिंग समिट हॉटेल शेरेटन ग्रँड येथे आयोजित करण्यात आले आहे ज्यात वेगवेगळ्या शहरातून ३०० लोक सहभागी होणार आहेत. मोठमोठ्या बँकांचे एमडी, इडी, रिजनल हेड्स आणि अनेक एक्स्पर्ट फॅकल्टीस या समीटमध्ये उपस्थित असतील. डब्लूआरसीचे नवे अध्यक्ष सीए संदीप जैन आणि त्यांची टीमही या समीटला उपस्थित असेल.

पुणे : मंत्रीपदासाठी आमदारात स्पर्धा ऐकली असेल, पण  इथल्या राजकारणात हल्ली अजब गजब गोष्टी घडत आहेत , महापालिकेच्या तिजोरीची चावी स्थायी समितीच्या अध्यक्षाकडे असे मानले जाते .हा स्थायी समितीच्या अध्यक्ष कोण असणार ? याची उत्सुकता आता वाढली आहे. कारण हे पद आपल्या घरात ..म्हणजे घरातील नातलग असलेल्या नगरसेवकाला मिळावे या साठी तीन आमदारांमध्ये  स्पर्धा लागली आहे . यांच्यात जिंकणार कोण ? कि तिघे हारणार ? याचा निर्णय अर्थात भाजपचे पक्षश्रेष्ठी म्हणजे मुख्यमंत्रीच घेतील असे दिसते आहे .
स्थायी समिती अध्यक्ष पदासाठी आमदार योगेश टिळेकर यांच्या मातोश्री रंजना टिळेकर, आमदार जगदीश मुळीक यांचे भाऊ योगेश मुळीक, समाजकल्याण राज्यमंत्री दिलीप कांबळे यांचे भाऊ सुनील कांबळे यांच्यात स्पर्धा निर्माण झाली आहेत. महापालिकेतील सत्ताकाळात आपण एकदाही पदाची मागणी केलेली नाही, त्यामुळे आईला हे पद द्यावे, अशी टिळेकर यांची आग्रही मागणी आहे. मात्र महापौरपदी पुढील सव्वावर्ष पुन्हा महिलाच असल्याने महापालिकेतील दोन महत्त्वाची पदे महिलांकडे कशी द्यायची, असा प्रश्न यात निर्माण झाला आहे. तरीही शिल्लक राहिलेल्या नावांमध्येही जोरदार चुरस आहे.
आमदार जगदीश मुळीक यांनीही आपला  विधानसभा मतदार संघ भक्कम ठेवण्याच्या आपल्या राजकीय व्युहाचा एक भाग म्हणून योगेश यांना संधी द्यावी, असे त्यांचे म्हणणे आहे. तसाच दावा  सुनील कांबळे यांचा ही आहे. कांबळे गेली अनेक वर्षे कासेवाडी, लोहियानगर सारख्या भागात भाजपाचे काम करीत आहेत. मात्र समाजकल्याण राज्यमंत्रीपद त्यांच्या घरात असल्याने एकाच घरात दोन महत्त्वाची पदे द्यायची का, अशी विचारणा करण्यात येत आहे. त्याचा प्रतिवाद कांबळे यांच्याकडून भावाचे राजकारण वेगळे व माझे वेगळे, भाऊ मंत्री झाल्याने ,मग मला कधीच संधी मिळणारच नाही का? असा प्रश्न सुनील कांबळे च्या बाबतीत उपस्थित केला जातो आहे .

अध्यक्षपद कोणाला द्यायचे, याचा निर्णय सर्वस्वी पालकमंत्री गिरीश बापट यांच्यावर अवलंबून आहे असे सांगण्यात येत असले तरी त्यात काही तथ्य दिसत नाही .ते निर्णय जाहीर करतील पण गिरीश बापट हे मुख्यमंत्री देवेंद्र फडणवीस देतील तेच नाव जाहीर करतील. येत्या शनिवारी (दि.३) दुपारी ३ वाजेपर्यंत उमेदवारी अर्ज दाखल करण्याची मुदत आहे. त्यादिवशी भाजपाकडून एकच अर्ज दाखल झाला तर त्याचदिवशी अध्यक्ष कोण होणार याचा निकाल लागेल. मात्र एकापेक्षा जास्त अर्ज दाखल झाले तर त्यासाठी निवडणुकीच्या दिवसापर्यंत (दि.७ मार्च) प्रतीक्षा करावी लागणार आहे.
-समितीमधील विरोधकांचे म्हणजे राष्ट्रवादी काँग्रेस, काँग्रेस व शिवसेना यांचे वर्चस्व अगदीच कमी म्हणजे ६ सदस्य इतकेच आहे. भाजपाचे १० सदस्य आहेत. त्यामुळे विरोधकांकडून केवळ अस्तित्व दाखविण्यासाठी  निवडणूक लढवली जाण्याची शक्यता आहे किंवा न लढवण्याचा निर्णय झाला तर अध्यक्षपद बिनविरोधही निवडले जाईल.

जुन्नर-तालुक्यातील हिवरे खुर्द गावाच्या हद्दीत बिबट्याला जेरबंद करण्यात आले आहे. हा बिबट्या ८ ते ९ वर्षांचा असल्याची आणि नर जातीचा असल्याची माहिती वनविभागाने दिली आहे. या बिबट्याने मागच्या महिन्यात उसतोड कामगार महिलेवर हल्ला करून तिला ठार केले होते. त्यामुळे हिवरे खुर्द भागात या बिबट्याची दहशत पसरली होती. त्यानंतर गावकऱ्यांनी वन विभागाला बिबट्याबाबत माहिती दिली. बिबट्याला पकडण्यासाठी हिवरे खुर्द भागात पिंजरा लावण्यात आला होता. त्याच पिंजऱ्यात या बिबट्याला जेरबंद करण्यात आले. या बिबट्यात वनविभागाच्या मदतीने बिबट निवारण केंद्रात पाठवले जाणार आहे. हिवरे खुर्द गावात या बिबट्याची दहशत पसरली होती. त्याला जेरबंद केल्याने गावकऱ्यांनी सुटकेचा निश्वास सोडला आहे.

पुणे – वयाच्या अवघ्या २७ व्या वर्षी महाराष्ट्र लोकसेवा आयोगाची जेएमएफसी परीक्षा उत्तीर्ण होत न्यायाधीश होण्याचे असामान्य काम पुण्यातल्या सायली शेंडगे हिने केले आहे. पुण्यातल्या दत्तवाडी परिसरात सर्वसाधारण कुटुंबातल्या सायलीने मिळवलेले हे यश अनेकांसाठी प्रेरणादायी आहे.

टेलरींग व्यवसायाच्या जोरावर आपले कुटूंब पोसणाऱ्या सायलीच्या वडिलांनी आपल्या तिन्ही मुलींना चांगले शिक्षण देत स्वतःच्या पायावर उभ केले. सायलीने विधी महाविद्यालयात प्रवेश घेत एलएलएमपर्यंतचे शिक्षण घेतल्यानंतर ज्यूडीशियल मॅजिस्ट्रेटची परीक्षा दिली होती. मात्र अवघ्या एका गुणाने तिची ती संधी हुकली होती. या अपयशाने खचून न जाता सायलीने जिद्दीने अभ्यास सुरूच ठेवला आणि गेल्या वर्षी झालेल्या जेएमएफसी परीक्षेत घवघवीत यश मिळवत न्यायाधीश बनण्याचे स्वप्न साकारले. दत्तवाडी हा तसा पुण्यातला गुन्हेगारी पार्श्वभूमी असलेला परिसर, अशा भागात राहत तसेच प्रसंगी वडिलांच्या टेलरींग व्यवसायात मदत करत सायलीने जिद्दीने शिक्षण पूर्ण केले. फक्त इथेच न थांबता काहीतरी बनण्याच्या ध्येयाने सायलीने नेटाने प्रयत्न केले आणि अखेर तिला यश आले. तिच्या या यशाबद्दल सर्व स्तरातून तिच्यावर कौतुकाचा वर्षाव होत आहे.

पुणे-डेक्कनची एज्युकेशन सोसयटीच्या नवीन मराठी शाळेत मराठी राजभाषा दिन उत्साहात साजरा करण्यात आला. विष्णू वामन शिरवाडकर म्हणजेच कुसुमाग‘ज यांचा जन्मदिन मराठी राजभाषा दिन म्हणून साजरा केला जातो.
कार्यक्रमाच्या सुरुवातीस प्रमुख पाहुण्या सौ. बागेश्री मंठाळकर मा. मुख्याध्यापक सौ. कल्पना वाघ यांच्या हस्ते सरस्वती पूजन व कुसुमाग्रजांच्या प्रतिमेचे पूजन करण्यात आले.
कार्यक्रमाच्या सुरुवातीस माननीय मु‘याध्यापिका यांनी स्वागत व प्रास्ताविक केले. मराठी दिनाचे औचित्य साधून इयत्ता चौथी पुरंदर वर्गातील विद्यार्थ्यांनी मराठी साहित्यिक व त्यांची पुस्तके यांवर आधारित परिपाठ सादर केला. ‘लाभले आम्हास भाग्य, बोलतो मराठी’ हे गाणे सौ. मनाली गोवंडे यांनी सादर केले. सौ. सोनाली मुंढे यांनी मराठी राजभाषा दिनाची माहिती सांगितली. प्रमुख पाहुण्यांची ओळख सौ. प्रतिभा पाखरे यांनी करुन दिली.
कार्यक्रमाच्या प्रमुख पाहुण्या सौ. बागेश्री मंठाळकर यांनी रोज एक तरी गोष्टीचे पुस्तक वाचायचेच असा संकल्प करण्याबाबत विद्यार्थ्यांना मार्गदर्शन केले.
मराठी राजभाषा दिनानिमित्त शिक्षण विवेक तर्फे घेण्यात आलेल्या सांगू का गोष्ट या स्पर्धेचा बक्षीस वितरण कार्यक्रम करण्यात आला. तसेच भाषा ऑलिम्पियाडमध्ये यश संपादन केलेल्या २९ विद्यार्थ्यांचा देखील बक्षीस देऊन सत्कार करण्यात आला. कार्यक्रमात सूत्रसंचालन सौ. सोनाली मुंढे व आभार प्रदर्शन सौ. स्वाती तळपे यांनी केले.

पुणे- स्‍वच्‍छता ही एक चळवळ झाली असून सर्व नागरिकांच्‍या सहकार्याशिवाय ती यशस्‍वी होणार नाही, असे प्रतिपादन शिरुर नगर परिषदेच्‍या नगराध्‍यक्षा वैशाली वाखारे यांनी केले. शिरुर येथे स्‍वच्‍छ भारत अभियान-स्‍वच्छता सर्वेक्षण 2018 च्‍या जनजागृती कार्यक्रमात त्‍या बोलत होत्‍या. यावेळी शिरुरचे तहसिलदार रणजीत भोसले,जिल्‍हा माहिती अधिकारी राजेंद्र सरग, मुख्‍याधिकारी विद्यादेवी पोळ, क्षेत्रीय प्रचार अधिकारी माधव जायभाये, क्षेत्रीय प्रचार सहायक पी. कुमार, स्‍वच्‍छता दूत व हरियाली संस्‍थेचे अध्‍यक्ष सुरेश खामकर, पर्यावरणतज्ञ प्रशांत अवचट, दत्‍तात्रय  बर्गे आदी उपस्थित होते.

नगराध्‍यक्षा वाखारे म्‍हणाल्‍या, शहर असो की ग्रामीण भाग स्‍वच्‍छता पाळणे, ती टिकवणे ही काळाची गरज आहे. आपल्‍या सर्वांच्‍या उत्‍तम आरोग्‍यासाठी, पर्यावरण संरक्षणासाठी स्‍वच्‍छतेचे मोठे महत्‍त्‍व आहे.

शिरुरचे तहसिलदार रणजीत भोसले यांनी आपल्‍या मनोगतात गावाने ठरवले तर कोणतीही गोष्‍ट अंमलात आणणे अवघड नाही. स्‍वच्‍छता हा आपल्‍या जीवनाचा अविभाज्‍य भाग बनली पाहिजे. स्‍वच्‍छतेबाबत जनतेमध्‍ये जाणीवजागृती होत असल्‍याबद्दल त्यांनी समाधान व्‍यक्‍त केले.

जिल्‍हा माहिती अधिकारी राजेंद्र सरग यांनी माहिती व जनसंपर्क महासंचालनालयाच्‍या वतीने शासकीय योजनांच्‍या प्रसिध्‍दीसाठी आकाशवाणी, दूरचित्रवाणी, मुद्रीत माध्‍यमे आणि सोशल मिडीयाचा वापर नियमितपणे केला जात असल्‍याचे सांगितले. लोकराज्‍य मासिकांतून शासनाच्‍या विविध योजनांची माहिती दिली जात असून या मासिकाचे वर्गणीदार होण्‍याचे आवाहनही त्‍यांनी केले.

स्‍वच्‍छता दूत व हरियाली संस्‍थेचे अध्‍यक्ष सुरेश खामकर यांनी स्‍वच्‍छता आणि आरोग्‍य याबाबत आपले मनोगत मांडले. पर्यावरणतज्ञ प्रशांत अवचट यांनी प्‍लास्‍टीक आणि थर्माकोलचा वापर टाळण्‍याचे कळकळीचे आवाहन केले.  मुख्‍याधिकारी विद्यादेवी पोळ यांनी शिरुर नगर परिषदेच्‍या वतीने स्‍वच्‍छता अभियानाबाबत हाती घेतलेल्‍या उपाययोजनांची माहिती दिली.

क्षेत्रीय प्रचार अधिकारी माधव जायभाये यांनी केंद्र सरकारच्‍या शहरी विकास मंत्रालय, माहिती आणि प्रसारण मंत्रालयाच्‍या क्षेत्रीय प्रचार संचालनालय आणि शिरुर नगरपरिषदेच्‍या मदतीने जनजागृती कार्यक्रम आयोजित करण्‍यात येत असल्‍याचे प्रास्‍ताविकात सांगितले.

कार्यक्रमात लोकजागृती कला पथक, वसुंधरा पपेट शो आणि स्‍त्री शक्‍ती, आदी शक्‍ती या बचतगटाने मनोरंजनपर प्रबोधक कार्यक्रम सादर केले. कार्यक्रमस्‍थळी शासनाचे मुखपत्र असलेल्‍या लोकराज्‍य मासिकाचा स्‍टॉल लावण्‍यात आला होता. त्‍यास शिरुर नगर परिषदेच्‍या नगराध्‍यक्षा वैशाली वाखारे यांच्‍यासह इतर मान्‍यवरांनी भेट दिली.

जनजागृती कार्यक्रमानिमित्‍त आयोजित करण्‍यात आलेल्‍या विविध स्‍पर्धांमधील विजेत्‍यांना पारितोषिके वितरित करण्‍यात आली. यामध्‍ये रांगोळी स्‍पर्धेतील प्रियंका काळे,वैभवी वाटेकर, आकांक्षा वरखेडे, पल्‍लवी शेंडगे, संस्‍कृती भोसले, सानिका साळुंखे,  कोमल गायकवाड तर निबंध स्‍पर्धेत अनुष्‍का गावित्रे, ऋतुजा शेवाळे, अक्षदा खिल्‍लारे, सायली थापा, मुक्‍ता कळसकर यांचा आणि वक्‍तृत्‍व स्‍पर्धेत  देवेंद्र वेताळ, क्रांती गायकवाड आणि कोमल गायकवाड यांचा समावेश होता.

प्रारंभी विद्याधाम हायस्‍कूल च्‍या विद्यार्थी आणि विद्यार्थिनींची जनजागरण रॅली काढण्‍यात आली. या रॅलीला हिरवा झेंडा शिरुर नगर परिषदेच्‍या नगराध्‍यक्षा वैशाली वाखारे यांनी दाखवला. कार्यक्रमास नगरपरिषदेचे अधिकारी,कर्मचारी,नागरिक, स्‍वच्‍छता दूत, विद्यार्थी मोठ्या संख्‍येने उपस्थित होते.