मुंबई, दि. 25 : सकल मराठा समाजाच्या वतीने राज्यात काढण्यात आलेल्या शांततापूर्ण मोर्चांनंतर, राज्य सरकारने त्याची दखल घेत विविध प्रकारचे निर्णय घेतले. आजही सकल मराठा समाजाशी चर्चा करण्यास राज्य सरकार तयार आहे, असे मुख्यमंत्री देवेंद्र फडणवीस यांनी एका निवेदनात म्हटले आहे.मुख्यमंत्र्यांनी आपल्या निवेदनात म्हटले आहे की, राज्य सरकारने मराठा समाजासाठी अनेक निर्णय घेतले. विशेषत: मराठा समाजाला आरक्षण देण्यासाठी राज्य सरकार पूर्णत: कटिबद्ध आहे. त्यामुळेच राज्य सरकारने यासंदर्भातील कायदा तयार केला. परंतु, उच्च न्यायालयाने त्या कायद्याला स्थगिती दिली. त्यानंतर राज्य सरकारने सर्वोच्च न्यायालयात धाव घेतली. मात्र, तेथे राज्य सरकारला उच्च न्यायालयाच्या आदेशावर स्थगिती मिळाली नाही. त्यामुळे आरक्षणाचा प्रश्न हा उच्च न्यायालयात प्रलंबित आहे. तथापि, यासंदर्भात संवैधानिक कारवाई पूर्ण करण्यासाठी राज्य सरकारने मागासवर्ग आयोग स्थापन केला आहे. त्या माध्यमातून कायद्याच्या कक्षेत संवैधानिक प्रस्ताव तयार केला जात आहे. सध्या हा प्रश्न न्यायप्रविष्ट आहे. त्यामुळे राज्य सरकार आपल्या अखत्यारितील सर्व बाबी पूर्ण करण्याचा प्रामाणिकपणे प्रयत्न करीत आहे.

यासोबतच छत्रपती राजर्षि शाहू महाराज शैक्षणिक शुल्क प्रतिपूर्ती योजनेच्या माध्यमातून सुमारे 602 अभ्यासक्रमांसाठी 50 टक्के शैक्षणिक शुल्काचा परतावा राज्य सरकार देत आहे. सुमारे दोन लाखांहून अधिक विद्यार्थ्यांना याचा लाभ झालेला आहे. मराठा समाजाच्या विद्यार्थ्यांसाठी प्रत्येक जिल्ह्यात वसतिगृह उभारण्याचा व्यापक कार्यक्रम हाती घेण्यात आला असून, त्यापैकी दोन वसतिगृहांचे काम अंतिम टप्प्यात आहे. अण्णासाहेब पाटील आर्थिक विकास महामंडळाच्या माध्यमातून मराठा समाजातील तरुण उद्योजकांना व्याज परतावा तत्वावर सुलभ कर्ज देणारी योजना सुरू करण्यात आली आहे. या सर्व योजनांच्या प्रभावी अंमलबजावणीसाठी मंत्रिमंडळ उपसमिती तयार करून त्याला सर्व अधिकार बहाल करण्यात आले आहेत. यावरूनच राज्य सरकारची याबाबतची भूमिका अतिशय स्पष्टपणे अधोरेखित होते.

गेल्या काही दिवसांपासून होणारी आंदोलने, आत्महत्या किंवा आत्महत्येचे प्रयत्न या सर्व बाबी अतिशय दु:खदायी आहेत. राज्य सरकारचे असे स्पष्ट मत आहे की, या योजनांसंदर्भात किंवा इतर बाबींमध्ये कोणत्याही त्रुटी आढळून येत असतील, तर त्या चर्चेच्या माध्यमातून दूर करण्याची राज्य सरकारची तयारी आहे. मेगाभरतीच्या संदर्भात जो संभ्रम सकल मराठा समाजाच्या मनात निर्माण झाला आहे, त्याही बाबतीत चर्चा करून सर्वमान्य असा उचित निर्णय घेणे शक्य आहे. त्यामुळे हिंसा किंवा आंदोलनाचा अवलंब न करता शासनाशी चर्चा करावी, असे आवाहन मुख्यमंत्र्यांनी केले आहे.

काही राजकीय नेते परिस्थिती आणखी चिघळवून त्याचा राजकीय लाभ घेण्याचा प्रयत्न करीत आहेत, त्यांनी महाराष्ट्राच्या हितार्थ व्यापक भूमिका घेऊन प्रश्नांचे निराकरण करण्यासाठी हातभार लावावा, असेही मुख्यमंत्र्यांनी आवाहन केले आहे.

मुंबई : महाराष्ट्र औद्योगिक विकास महामंडळाने या पावसाळ्यात बारवी धरणासंदर्भात  विशेष खबरदारी घेतली आहे. सातत्याने पडणाऱ्या पावसामुळे आपत्ती ओढवू नये यासाठी ओव्हर फ्लो होण्याआधीच  ( Hydro Generation )  जलविद्युत निर्मितीसाठी पाण्याचा वापर केला, त्यामुळे गावांच्या दिशेने होणारा पाण्याचा फुगवटा कमी झाला आणि  रस्ते पाण्याखाली जाण्याचे टळले आहे,  अशी माहिती उद्योगमंत्री सुभाष देसाई यांनी आज मंत्रालयात झालेल्या पत्रकार परिषदेत दिली.

श्री. देसाई म्हणाले, कोळेवडखळ या गावाला असलेला पुराच्या पाण्याचा संभाव्य धोका लक्षात घेऊन इथे होड्या सज्ज ठेवण्यात आल्या आहेत.   पुराच्या पाण्याच्या अभ्यासासाठी पहिल्यांदाच ड्रोनने सर्व्हेक्षण करण्यात येत आहे. रात्रंदिवस सतर्क राहणारे पथक रेस्क्यू टीम (Rescue Team) कार्यरत आहे. आपत्कालीन मदतीसाठी टोल फ्री क्रमांक 180 023 343 96 कार्यान्वित करण्यात आला आहे. तर, मुरबाड येथे आपत्कालीन केंद्रही तयार करण्यात आले आहे. या साठी dmcellbarvidam@midcindia.org या ई मेल पत्त्यावर संपर्क साधता येणार आहे.

बारवी धरणातून पाणी ओव्हरफ्लो झालेल्या अंबरनाथ तालुक्यातील अनसोली, राहतोली, चोण, सागाव, पाटीलपाडा, चंदनपाडा, पादिरपाडा, पिंपळोली, करंद या गावांमध्ये सतर्कतेचा इशारा देण्यात आला आहे. याशिवाय तोंडली, काचकोली व संलग्न पाडे, मोहघर, कोळेवडखळ, मानिवली, सुकाळवाडी हे अतिबाधित होत असून येथे रस्ते पाण्याखाली जाण्याची शक्यता आहे. या ठिकाणीही  विशेष काळजी घेण्यात येत आहे. खबरदारीचा उपाय म्हणून  या  परिसरात नदीच्या बाजूस तात्पुरते बॅरिकेड्स लावण्यात आलेले आहेत.

तोंडली येथील  286 कुटुंबाना खावटी खर्च  देण्यात आला  आहे. यात एकवेळ  खर्च म्हणून  रु.10 हजार, किराणा मालासाठी रु.  5 हजार आणि मिनरल वॉटरसाठी रु. 2 हजार 790 धनादेशाद्वारे देण्यात आले आहेत. त्याचप्रमाणे काचकोली पाडयांसाठीही खावटी खर्च देण्यात आला आहे. जुलै महिन्याचा हा खर्च अदा करण्यात आला असून आवश्यकता भासल्यास ऑगस्ट व  सप्टेंबर पर्यंत हा खावटी खर्च देण्यात येईल.

पूरग्रस्त घरातील 20 परिवारांना मुरबाड येथे भाडयाच्या  घरात हलविण्यात आले आहे. तर 45 लोकांना  लोवर तोंडली येथील तात्पुरत्या शेडमध्ये हलविण्यात आले आहे. तसेच तेथील अडचणींचा विचार करता व लोकांच्या मागणीनुसार त्यांना तोंडली गाव येथे नवीन 45 शेड बांधून स्थलांतरित करण्यात येणार आहे. या शेडचे बांधकाम सुरु आहे. त्याचप्रमाणे काचकोली येथे लोकांच्या मागणीनुसार 19 शेडचे बांधकाम सुरु आहे.

इतर भागातील लोकांसाठी तात्पुरते शेडस् उभारण्यात आले आहेत. त्यांच्यासाठी  वीज, डी.जी.सेट, पिण्याचे पाणी आणि वाहनांची 24 तास  सज्जता ठेवण्यात आली आहे. तोंडली व कोचकोली येथील उभारण्यात आलेल्या तात्पुरत्या शेडच्या दुरुस्तीचे कामही हाती घेण्यात आलेले आहे.  त्या अंतर्गत त्यांना शौचालय व बाथरुमची व्यवस्था करण्यात येत आहेत. काचकोली येथील जांभुळवाडी व कोळेवडखळ येथे पिण्याच्या पाण्यासाठी बोअरवेल उपलब्ध करुन देण्यात आलेली आहे. या सर्व मोहिमेत जिल्ह्याची महसूल यंत्रणा संपूर्ण सहकार्य देत आहे.

मुंबई : मातंग समाजाच्या सर्वांगिण विकासासाठी गठीत केलेल्या क्रांतीवीर लहुजी साळवे मातंग समाज अभ्यास आयोगाने केलेल्या शिफारशींची प्रभावीपणे अंमलबजावणी करण्याचे निर्देश सामाजिक न्याय मंत्री राजकुमार बडोले यांनी आज दिले.

क्रांतीवीर लहुजी साळवे मातंग समाज अभ्यास आयोगाने केलेल्या शिफारशींच्या अनुषंगाने आढावा बैठक मंत्रालयात आयोजित करण्यात आली होती. त्यावेळी ते बोलत होते. यावेळी सामाजिक न्याय विभागाचे सचिव दिनेश वाघमारे व विविध विभागांचे अधिकारी उपस्थित होते.

श्री. बडोले म्हणाले, क्रांतीवीर लहुजी साळवे मातंग समाज अभ्यास आयोगाने केलेल्या शिफारशी या मातंग समाजाच्या सर्वांगीण विकासासाठी उपयुक्त आहेत. बेरोजगार तरुणांना रोजगार, मातंग समाजातील महिला बचत गट स्थापन करण्यासाठी विशेष प्रोत्साहन, दारिद्रय निर्मूलन करण्यासाठी विशेष कृती कार्यक्रम, सरकारी स्वस्त धान्य दुकान, रॉकेल, गॅस व पेट्रोल एजन्सी मातंग समाजातील बेरोजगार तरुणांना विशेष प्राधान्यक्रमाने देण्यात यावे. मातंग समाजातील विद्यार्थ्यांसाठी राज्यात पुणे व औरंगाबाद येथे वसतीगृह,  पाच ठिकाणी निवासी शाळा स्थापन करण्याबाबतची कार्यवाही त्वरित करण्याचे निर्देश यावेळी श्री. बडोले यांनी दिले.

कायगाव टोका – काकासाहेब शिंदे यांच्या पार्थिवावर अंत्यसंस्कार करण्यात आले आहेत. यावेळी हजारोंच्या संख्येने कार्यकर्ते उपस्थित होते. कार्यकर्त्यांनी ‘काकासाहेब अमर रहे’च्या घोषणांनी परिसर दणाणून सोडला. अंत्यविधीला तब्बल 800 पोलिसांचा बंदोबस्त होता. पंचक्रोशीतील हजारोंच्य संख्येने गावकरी हजर होते. या वेळी सरकारविरोधात जोरदार घोषणाबाजी करण्यात आली. औरंगाबाद-नगर महामार्ग बंद करण्‍यात आला आहे. हजारो मराठा समाजाचे कार्यंकर्ते रस्त्यावर ठिय्या मांडून आहेत.

खैरेंना मज्जाव, 150 ते 200 जणांनी लावले पिटाळून, पोलिस संरक्षणात खासदार परतले

अंत्यविधी कार्यक्रमासाठी खासदार चंद्रकांत खैरे, तसेच सुभाष झांबड आले, परंतु संतप्त जमावाने त्यांच्याविरोधात घोषणाबाजी सुरू केली. त्यांना अंत्यविधीस्थळी प्रवेशापासून मज्जाव करण्यात आला. ‘गो बॅक- गो बॅक’ अशा घोषणाबाजी सुरू झाली. जवळजवळ दीडशे ते 200 जणांचा जमाव खैरेंवर चालून गेला. त्यांच्या गाडीलाही धक्काबुक्की केली. खैरेंना पोलिस तसेच एसआरपीएफच्या संरक्षणात माघारी जावे लागले.

संतोष मानेंना किरकोळ दुखापत

दरम्यान, या गोंधळात माजी आमदार अण्णासाहेब माने यांचा मुलगा संतोष माने हा किरकोळ जखमी झाल्याची माहिती आहे.

अंबासाहेब दानवे, झांबड उपस्थित

अंत्यविधीच्या कार्यक्रमात शिवसेना जिल्हाप्रमुख अंबादास दानवे, माजी आमदार अण्णासाहेब माने, माजी सभापती संतोष जाधव, कृष्णा पाटील डोणगावकर यांच्यासह अनेक नेते-पदाधिकारी उपस्थित आहेत. तसेच काकासाहेब शिंदे यांच्या आणि आजूबाजूच्या गावांतील नागरिक हजारोंच्या संख्येने दाखल झाले आहेत.

सकाळपासून हजारोंची गर्दी

‘काकासाहेब शिंदे अमर रहे’च्या घोषणा पुलावर सुरू आहेत. या पुलावर हजारोंच्या संख्येने आंदोलक जमले. सरकारच्या विरोधात घोषणाबाजी केली जात आहे.

पोलिसच म्हणाले, उड्या मारा , आंदोलकांचा गंभीर आरोप

दरम्यान, पोलिसांच्या निष्काळजीपणामुळेच काकासाहेब शिंदेंचा बळी गेल्याचा आरोप प्रदीप निरफळ आणि सुदाम मंडलिक यांनी केला. हे दोघेही काल घटनास्थळी उपस्थित होते. त्यांनी दिव्य मराठीला माहिती दिली की, काल पोलिसच आंदोलकांना उड्या मारा म्हणत होते. यावर खरंच काकासाहेब याने गोदावरीत उडी मारल्यावर त्याला वाचवण्यासाठी इतर कार्यकर्त्यांनी वाचवण्यापासून रोखले. पोलिस म्हणत होते, तुम्ही उडी घेऊ नका, इतर लोक त्याला वाचवतील.

मनसे कार्यकर्ते अण्णासाहेब जाधव यांनीही पोलिसांवर आरोप केला. पोलिसांच्या बेजबाबदारपणामुळेच काकासाहेब शिंदेंचा बळी गेल्याचे ते म्हणाले.

पोलिसांची अतिरिक्त कुमक आंदोलनस्थळी दाखल
तथापि, डीएसपी उज्ज्वला बनकर यांनी माहिती दिली की, उस्मानाबाद आणि बीडवरून पोलिसांची अतिरिक्त कुमक बोलावलेली आहे. यात 4 डीवायएसपी, 2 अॅडिशनल एसपी आणि वरिष्ठ पोलिस अधिकाऱ्यांसह 100 पोलिस कर्मचारी व एसआरपीच्या 3 तुकड्या आंदोलनस्थळी दाखल आहेत.

मुंबई-मराठा आरक्षणासाठी राज्यभरात मराठा संघटनांनी आंदोलन सुरु केले असतानाच ‘या आंदोलनात काही पेड लोक घुसली असून हे आंदोलन बदनाम करुन महाराष्ट्र अस्थिर करण्याचा त्यांचा डाव आहे’, असा आरोप महसूलमंत्री चंद्रकांत पाटील यांनी केला.

राज्यात मराठा संघटनांनी आरक्षणाच्या मागणीवरुन आंदोलन सुरु केले असून या आंदोलनात सोमवारी औरंगाबादजवळ काकासाहेब शिंदे यांचा मृत्यू झाला. यानंतर आंदोलन चिघळले असून मंगळवारी राज्यात बंदची हाक देण्यात आली आहे. या पार्श्वभूमीवर चंद्रकांत पाटील यांनी ‘एबीपी माझा’ या वृत्तवाहिनीला मुलाखत दिली. चंद्रकांत पाटील म्हणाले, आरक्षणासंदर्भात राज्य सरकारने काम केले आहे. आता हा मुद्दा न्यायालयाच्या अखत्यारित आहे. मंत्र्यांच्या गाड्या फोडून आरक्षण मिळणार असेल तर गाड्या फोडा. पण शेवटी यात समाजाचे मोठे नुकसान होणार आहे. काही पेड लोक या आंदोलनात घुसली असून त्यांना महाराष्ट्र अस्थिर करायचा आहे, असा आरोप त्यांनी केला.

राज्यात चार वर्षे उत्तम कारभार चालला. शेतकऱ्यांना कर्जमाफीही झाली. पण आता निवडणुका जवळ येताच हिंसक आंदोलनाचे प्रकार वाढतील. आता जे खरे आंदोलक आहेत, त्यांनी समाजकंटकांना खड्यासारखे बाजूला काढावे, असे आवाहन त्यांनी केले. सरकार आंदोलकांशी चर्चा करण्यास तयार असल्याचे त्यांनी स्पष्ट केले.

आरक्षणासाठी काकासाहेब शिंदे या तरुणाला जीव गमवावा लागला, ही दुर्दैवी गोष्ट आहे. पण अशा मार्गाने प्रश्न सुटणार नाही. जे आपल्या हातात नाही, त्यासाठी आंदोलन करुन उपयोग नाही. बंदमुळे पंढरपूरमध्ये ७ लाख वारकरी अडकून पडले आहेत, याला जबाबदार कोण, असा सवालही त्यांनी विचारला.