दहावीत उत्कृष्ट यश मिळवून कचरावेचकांच्या मुलामुलींनी शिक्षणात उमटवला आपला ठसा आईवडिलांच्या कष्टातून प्रेरणा घेत परीक्षा दिलेल्या पैकी ८४ % विद्यार्थ्यांनी परीक्षा उत्तीर्ण केली.

पुणे- कचरावेचकांच्या मुलामुलींनी १० वी च्या परीक्षेत उत्तुंग यश मिळवून सामाजिक पूर्वग्रह, आर्थिक अडचणी, अभ्यास करायला जागेची कमतरता आणि आसपासचे पोषक नसलेले वातावरण सारख्या आव्हानांना चपखल उत्तर दिले आहे.

परीक्षा दिलेल्या एकूण १९९ विद्यार्थ्यांपैकी १०९ मुलांनी आणि ९० मुलींनी यंदा १० वी ची परीक्षा दिली. यामध्ये शिक्षण अपूर्ण राहिलेल्या ११ जणांनी १७ नंबर फॉर्म भरून जिद्दीने बाह्य स्वरूपात परीक्षा दिली. त्याचबरोबर, ३ कचरावेचकांनी देखील यावर्षी आपले दहावी पूर्ण करण्याचे स्वप्न पूर्ण केले. सकाळी घरोघरी कचरा संकलनाची सेवा देणाऱ्या, कुटुंबाची पूर्ण जबाबदारी घेणाऱ्या स्वच्छ च्या महिला कचरावेचकांनी देखील संस्थेच्या आणि कागद काच पत्रा कष्टकरी पंचायत संघटनेच्या मदतीने मुलांसोबत दहावी देऊन यश मिळवले.

कचरावेचकांच्या कागद, काच, पत्रा कष्टकरी पंचायत संघटनेतर्फे कचरावेचकांच्या पाल्यांना या महत्वाच्या शैक्षणिक टप्प्यावर आर्थिक सहाय्यासाठी शिष्यवृत्ती, योग्य मार्गदर्शनासाठी शिकवणी, अभ्यास करण्यासाठी व परीक्षेसाठी वह्या व स्टेशनरी सारखी मदत वर्षभरात करण्यात आली. त्याचबरोबर, आता थांबायचं नाय या चित्रपटाचा विशेष शो देखील कचरावेचक व त्यांच्या पाल्यांसाठी संघटनेने आयोजित केला होता. सफाई कामगारांनी दहावी पास केल्याची कहाणी दाखवणाऱ्या या चित्रपटातून अनेकांनी प्रेरणा घेत यंदा दहावीची परीक्षा दिली.

चिंता जगी या सर्वथा कोणा न येई टाळता, उद्योग चिंता घालवी एवढे लक्षात ठेवा या ओळी मुलामुलींनी आपल्या आईवडिलांप्रमाणेच प्रत्यक्षात आणल्या आहेत. शिक्षण घेऊन आत्मविश्वासाने आपला पुढचा मार्ग स्वतः घडवण्याच्या प्रवासाची दमदार सुरुवात कचरावेचकांच्या पाल्यांनी या निकालातून केली आहे.

मुलांना शिक्षणात मदत करताना स्वतः १० वी पास केली; स्वच्छ च्या कचरावेचक महिलांची प्रेरणादायी कहाणी
सकाळी घरोघरी जाऊन कचरा घेतला, रात्री जागून अभ्यास केला, स्वच्छ च्या ३ कचरावेचक महिलांनी १० वी पास केली.

नाव: वर्षा ओव्हाळ
गुण: ४६%
मागच्या वर्षी मे महिन्यात संघटनेने आता थांबायचं नाय हा सफाई कामगारांनी सर्व अडचणींवर मात करत १० वी पास केल्याची कहाणी दाखवणाऱ्या चित्रपटाचा विशेष शो कचरावेचकांसाठी आयोजित केला होता. हा चित्रपट पाहिल्यानंतर वर्षा ओव्हाळांनी निश्चय केला कि यंदा दहावी द्यायची आणि पास व्हायचंच. आपल्या दोन मुलांची पूर्ण जबाबदारी घेणाऱ्या एकल माता असलेल्या वर्षा ताईंनी रात्रशाळेत जाऊन दहावीचा अभ्यास केला. अगदी शेवटच्या क्षणापर्यंत, कागदपत्रांच्या अभावी परीक्षेस बसता येईल कि नाही अशी शंका असताना, वर्षा ताईंनी जिद्दीने अभ्यास केला आणि ४६% गुण मिळवून आपले स्वप्न पूर्ण केले.

नाव: ज्योती पंडित
गुण: ४१%
स्वच्छ संस्थेतील कचरावेचक ज्योती अशोक पंडीत SRPF भागातील गावठाण भागात घरोघरी जाऊन कचरा संकलन करण्याचे काम करतात. याआधी ज्योती पंडित यांचे ७ वी पर्यंतच शिक्षण झालेले होते. २७ वर्षापूर्वी कौटुंबिक जबाबदारीमुळे शिक्षण अर्धवट सोडून कुटुंबाची जबाबदारी त्यांच्यावर आली. स्वतःच शिक्षण अर्धवट राहिले तरी, आपल्या पुढच्या पिढीला चांगलं शिकवून उच्च पदावर व प्रशासकीय सेवेत जावे पाठवायचे त्यांचे स्वप्न होते. त्यासाठी अथक परिश्रम घेऊन ज्योतीताईंनी आपली मुलगी श्वेता हिचे भारतीय नौसेनेत काम करण्याचे स्वप्न पूर्ण करण्यासाठी मदत केली. तसेच आपल्या दोन्ही मुलांना त्या पोलीस व आर्मी मध्ये भरती होण्यासाठी मदत करत आहेत.

ज्योती ताई सांगतात, “मुलगी श्वेताचे (भारतीय नौसेना दल ) स्वप्न पूर्ण झाले. माझ्या मुलीने माझ्यासाठी स्वप्न पाहिले कि, मी यावर्षी दहावीची परीक्षा द्यावी. आणि तिला माझ्यावर पूर्ण विश्वास असल्याने सर्व कागदपत्रे आणि ऑनलाईन फॉर्म तिनेच भरला. मला आमच्या स्वच्छ संस्था आणि कागद काच पत्रा कष्टकरी पंचायत मार्फत मासूम संस्थेच्या रात्रशाळेत प्रवेश मिळाला. यासाठी संघटनेतील अनेकांनी मला अडमिशन घेण्यासाठी प्रवृत्त केले. आम्हाला दाखवण्यात आलेली शिक्षणावरील फिल्म “आता थांबायचं नाही” हि माझ्यासाठी खूप प्रेरणादायी होती.

सकाळी कचऱ्याचे काम आणि संध्याकाळी शाळा असे माझे नियोजन होते. यासाठी माझ्या दोघ मुलांची व पतीची पण तेवढीच साथ मिळाली, असे ज्योतीताईंनी सांगितले. रात्रशाळेतून येण्यापूर्वी घरातील सर्व गोष्टी त्या आवरून ठेवत असत जेणेकरून अभ्यासाला वेळ मिळेल. या सर्वांच्या सहकार्याने मी आज ४१% मिळवू शकले. पुढे मी पण प्रशासकीय सेवेत जाऊन काम करावे असे स्वप्न असेल. त्या साठी पुढे जिद्दीने शिकणार आहे. आणि सोबत काम पण चालू ठेवणार आहे, अशा भावना ज्योतीताईंनी व्यक्त केल्या.

कचरावेचक आई आणि मुलाची दहावीच्या परीक्षेत यशस्वी भरारी

आईचे नाव: अर्चना घोडके
गुण: ६०%
मुलाचे नाव: यश घोडके
गुण: ५४%

शिक्षणाची आवड आणि मनात जिद्द ठेवून या आई-मुलाच्या जोडीने एकत्र दहावीची तयारी केली आणि दोघेही उत्तीर्ण झाले.

पुण्यातील स्वच्छ संस्थेतील कचरावेचक अर्चना विकास घोडके या SRPF, वानवडी भागात दारोदारी कचरा संकलनाचे काम करतात. २५ वर्षापूर्वी अर्चना यांचे आधी ९ वी पर्यंत शिक्षण झाले होते .परंतु कुटुंबाची पूर्ण जबाबदारी अंगावर पडल्याने त्यांना शिक्षण अर्धवट सोडावे लागले होते. परंतु यंदा स्वतःचा मुलगा यश विकास घोडके १० वी ची परीक्षा देणार होता. यशला दहावीच्या तयारीसाठी मदत करणाऱ्या अर्चना ताईंना स्वतःला शिक्षणाची गोडी नव्याने लागली आणि त्यांनी देखील १७ नंबर फॉर्म भरून परीक्षा देण्याचे ठरवले. कागद काच पत्रा कष्टकरी पंचायत व स्वच्छ संस्थेमधील सहकाऱ्यांनी शिक्षणासाठी प्रवृत्त केले असे अर्चना ताईंनी सांगितले. मासूम संस्थेच्या रात्र शाळेत प्रवेश घेवून ,सकाळी काम आणि रात्री अभ्यास करत अर्चना यांनी ६० % मिळवून यश संपादन केले आहे. आणि मुलगा यश याने ५४ % मिळवून स्वतःच्या नावाचा अर्थ प्रत्यक्षात उतरवला आहे.

मुलगा यश सांगतो कि ,मी स्वतः अभ्यास करायचो, तेव्हा आईला काही विषयांची अडचण आल्यास समजून सांगायचो आणि आम्ही दोघांनीही कुठला क्लास न लावता घरीच राहून अभ्यास केला. आई कामावरून आल्यावर संध्याकाळी रात्र शाळेत जायची तिथून आल्यावर जे शिकवले आहे ते मला सांगायची. यातून आमची अभ्यासाची गोडी वाढायची. कधी कधी मी झोपून जायचो पण आई अभ्यास करायची त्यामुळे कदाचित आईला माझ्यापेक्षा जास्त टक्के मिळाले असे यशने सांगितले.

कोणताही क्लास न लावता खुशी ने मिळवले ८९%

विद्यार्थ्याचे नाव : खुशी गणेश खुपटे
आईचे नाव: कावेरी खुपटे
गुण : 89%
Mobile: 8459695110
वस्ती – पाटील इस्टेट, शिवाजीनगर

मी कोणताही क्लास लावला नाही कारण माझा स्वतःचा स्वतः अभ्यास करण्यावर ठाम विश्वास आहे. माझी आई मला शक्य त्या सर्वप्रकारे माझ्या अभ्यासात मदत करते. आईच्या कागद, काच, पत्रा कष्टकरी पंचायत संघटनेने मला आर्थिक मदत केलीच, पण त्याबरोबर अडचणींवर लक्ष केंद्रित न करता माझे मनोबल वाढावे यासाठी देखील वेळोवेळी मार्गदर्शन केले.

मी इतरही सर्व विद्यार्थ्यांना हे सांगू इच्छिते कि मोटिव्हेशन व्हिडीओ पाहून मिळत नाही, प्रेरणा आपल्या आत असते जिचा आपण फक्त शोध घ्यायचा असतो.

पाटील इस्टेट, शिवाजीनगर इथे राहणाऱ्या कावेरी खुपटे कागद,काच,पत्रा कष्टकरी पंचायत संघटनेच्या सभासद आहेत. एकल माता असलेल्या कावेरी आपल्या दोन्ही मुलांची जबाबदारी फिरून कचरा गोळा करण्याचे काम करून सांभाळतात

विद्यार्थ्याचे नाव : सार्थक मेश्राम चंदनशिवे
आईचे नाव: साधना मेश्राम चंदनशिवे
गुण : 86.60%
Mobile: 9881895802
वस्ती – दांडेकर पूल, सिंहगड रोड.

साधना मेश्राम चंदनशिवे या मागील २ वर्षांपासून स्वच्छ संस्थेच्या सभासद आहेत. त्यांचे पती रोजगार पद्धतीने कष्टाची कामे करतात. आपल्या आईवडिलांच्या कष्टांचे चीज करत सार्थकने १० वी मध्ये तो ८६.६०% मिळवले. साधना ताईंचे कुटुंब अगोदर बार्शी या गावी राहत होते आणि दुसऱ्यांच्या शेतात अल्प रोजगारावर मजुरी करत होते. पण भविष्यात मुलांच्या शिक्षणासाठी चांगले उत्पन्न मिळावे याचा विचार करून त्यांनी गाव सोडले आणि पुण्यामध्ये राहायला आले.

विद्यार्थ्याचे नाव : तनू भारत तरकसे
सभासद नाव : भारत मुकुंद तरकसे
गुण : ८१.८%
Mobile: 7030713870
वस्ती: निगडी ओटा स्कीम, निगडी

तनू अत्यंत हुशार आणि जिद्दी मुलगी आहे. लहानपणापासूनच तिला शिक्षणाची आवड आहे ती तिच्याबरोबर तिच्या लहान भावाचा देखील अभ्यास घेत असते. तिचे वडील भारत तरकसे हे गेल्या ८ वर्षापासून कागद काच पत्रा कष्टकरी पंचायत संघटनेचे सभासद आहेत, ते पिंपरी चिंचवड भागात घंटा गाडीवर काम करतात.

वडिलांच्या कष्टाची मला जाणीव आहे आणि मी त्यांचे सर्व स्वप्न पूर्ण करणार आहे, त्याकरिता मी खूप अभ्यास करीन आणि स्वप्न साकार करून दाखविन”, अशा भावना तनुने व्यक्त केल्या.

तनू चे वडील सांगतात, “संस्थेने केलेली मदत मौल्यवान आहे, वेळोवेळी केले गेलेले मार्गदर्शन, शैक्षणिक मदत यामुळे तनुच्या यशात खूप मोठा वाटा हा संस्थेचा आहे.”

विद्यार्थ्याचे नाव: सानिका उमेश अडसूळ
सभासद नाव: राणी उमेश अडसूळ
गुण: ७८%
Mobile: 7721809405
वस्ती :- गांधीनगर, पिंपरी

सानिका ने ८ वी पर्यंतचे शिक्षण पिंपरीतील इंटरनॅशन शाळेतून RTE मार्फत पूर्ण केले. परंतु आई ची परिस्थिती नसल्यामुळे तिला तिथून दाखला काढून प्रथमेश इंग्लिश स्कूल नेहरूनगर पिंपरी या ठिकाणी प्रवेश घेतला.

राणी उमेश अडसूळ या गेल्या १० वर्षापासून कागद काच पत्रा कष्टकरी पंचायत संघटनेच्या सभासद आहेत.
राणी अडसूळ या एकल माता असून त्यांच्या पतीचे २०१६ साली निधन झाले. त्यानंतर मुलांची संपूर्ण जबाबदारी त्यांच्यावर आली. त्यांनी हार न मानता सानिका चे माध्यमिक पर्यंत चे शिक्षण पूर्ण केले.सानिका ने अथक प्रयत्न करून १० वी ची परीक्षा दिली त्यात भरघोस यश देखील संपादन केले.

सानिका ११ वी मध्ये विज्ञान शाखेमध्ये प्रवेश घेण्यास इच्छुक असून ती मेडिकल मध्ये करिअर करायचे आहे असे तिचे स्वप्न आहे. सानिका ला संस्थेमार्फत शैक्षणिक मदत वारंवार करण्यात आली तसेच तिला अतिरिक्त क्लास करिता देखील संस्थेमार्फत मदत करण्यात आली.

विद्यार्थ्याचे नाव – दिव्या विकास शिरसाठ
सभासद नावं – विकास शिरसाठ
गुण – ७५%
मोबाईल नंबर – 9049804881
वस्ती – पाटील इस्टेट, शिवाजीनगर

दिव्याने दहावीच्या परीक्षेची तयारी अत्यंत मेहनतीने आणि सातत्याने केली. ती नियमितपणे घरी अभ्यास करत असे तसेच वर्गात जाऊन अभ्यासातील शंका शिक्षकांना विचारून त्यांचे मार्गदर्शन घेत असे. मोबाईलपासून दूर राहून तिने पूर्ण लक्ष अभ्यासावर केंद्रित केले. तिची आजी व वडील दोघेही कचरावेचक म्हणून काम करतात.कागद, काच, पत्रा कष्टकरी पंचायतच्या मदतीने तिला दहावीचा क्लास लावण्यात आला, ज्याचा तिच्या अभ्यासाला मोठा फायदा झाला.

आजच्या विद्यार्थ्यांना ती एकच संदेश देते, “मोबाईलचा मर्यादित वापर करा, अभ्यासात सातत्य ठेवा आणि शिक्षकांचे मार्गदर्शन घ्या. मेहनत आणि चिकाटीमुळे यश निश्चित मिळते.”

संतप्त नागरिकांकडून टँकरची तोडफोड

नसरापूर –

पुणे-बंगळुरू राष्ट्रीय महामार्गावरील खेड शिवापूर टोल नाक्याजवळ शुक्रवारी दुपारी झालेल्या भीषण अपघातात दुचाकीवरील पती-पत्नीचा जागीच मृत्यू झाला. गॅस टँकरने दुचाकीला जोरदार धडक दिल्याने ही दुर्घटना घडली. अपघातानंतर काही काळ महामार्गावरील वाहतूक विस्कळीत झाली होती.

मिळालेल्या माहितीनुसार, वारजे माळवाडी (पुणे) येथील राजेंद्र बबन मोरे (वय ५५) व सविता राजेंद्र मोरे (वय ४२) हे दुचाकी क्रमांक एमएच १२ एफएच ४६९६ वरून साताऱ्याकडे जात होते. खेड शिवापूर टोल नाक्याच्या पाठीमागील सातारा लेनवर आले असता गॅस टँकर क्रमांक एपी ०३ टीई ५७५९ याने त्यांच्या दुचाकीला जोरदार धडक दिली. धडक इतकी भीषण होती की दोघेही टँकरखाली ओढले गेले आणि त्यांचा घटनास्थळीच मृत्यू झाला.

प्रत्यक्षदर्शींच्या माहितीनुसार, टँकर आणि दुचाकी दोन्ही वाहने वेगात होती. टँकर चालकाचे वाहनावरील नियंत्रण सुटल्याने अपघात घडल्याचा प्राथमिक अंदाज व्यक्त करण्यात येत आहे. धडकेनंतर दुचाकी रस्त्याच्या कडेला दूरपर्यंत फेकली गेली होती.

घटना घडताच स्थानिक नागरिकांनी तातडीने मदतीसाठी धाव घेत पोलिसांना माहिती दिली. मात्र, गंभीर दुखापतींमुळे दाम्पत्याचा जागीच मृत्यू झाल्याचे स्पष्ट झाले. अपघातानंतर परिसरात मोठी गर्दी झाली होती. संतप्त नागरिकांनी गॅस टँकरची तोडफोड केल्याची माहिती समोर आली असून काही काळ तणावाचे वातावरण निर्माण झाले होते.

परिस्थिती नियंत्रणात आणण्यासाठी पोलिसांनी तातडीने घटनास्थळी धाव घेतली. वाहतूक सुरळीत करत पंचनामा करण्यात आला. मृतदेह शवविच्छेदनासाठी रुग्णालयात पाठवण्यात आले आहेत. टँकर चालक राज किशन बी. (रा. तिरुपुरम) याला पोलिसांनी ताब्यात घेतले असून या घटनेचा पुढील तपास सुरू आहे.

पुणे : कोथरूडमधील केळेवाडी परिसरात असलेल्या पुणे महानगरपालिका संचालित कै. सुंदराबाई गणपत राऊत दवाखान्याची नगरसेवक हर्षवर्धन मानकर यांनी पाहणी केली. यावेळी आरोग्य प्रमुख डॉ. नीना बोराडे यांच्या समवेत दवाखान्यातील विविध आरोग्य सुविधा, उपलब्ध सेवा तसेच आवश्यक विकासकामांचा सविस्तर आढावा घेण्यात आला.
गेल्या पाच वर्षांपासून प्रशासनाच्या काळात या दवाखान्यात डायलेसीस केंद्र तसेच गरोदर माता-भगिनींसाठी प्रसूतिगृह सुरू करण्यात यावे, यासाठी सातत्याने पाठपुरावा करण्यात येत आहे. मात्र प्रशासनाकडून अपेक्षित कार्यवाही होत नसल्याने नागरिकांना आवश्यक आरोग्य सुविधा उपलब्ध होऊ शकलेल्या नाहीत.
यासंदर्भात नगरसेवक हर्षवर्धन मानकर यांनी आरोग्य प्रमुख डॉ. नीना बोराडे यांच्याशी सविस्तर चर्चा करून दवाखान्यात तातडीने डायलेसीस केंद्र आणि प्रसूतिगृह सुरू करण्यात यावे, अशी मागणी केली. परिसरातील नागरिकांची वाढती गरज लक्षात घेता या सुविधा अत्यंत आवश्यक असल्याचे त्यांनी यावेळी नमूद केले.
सध्या या दवाखान्यात सामान्य आरोग्य तपासणी, औषधोपचार तसेच विविध मोफत आरोग्य शिबिरांचे आयोजन नियमितपणे करण्यात येते. विशेषतः ३० ते ६० वयोगटातील महिलांसाठी मोफत आरोग्य तपासणी शिबिरांचे आयोजन करण्यात येते. या शिबिरांमध्ये रक्तदाब (बीपी), मधुमेह (शुगर) आणि हिमोग्लोबिन तपासणी केली जाते. त्यामुळे महिलांमध्ये आरोग्याबाबत जागरूकता वाढण्यास मदत होत आहे.
नगरसेवक हर्षवर्धन मानकर यांनी सांगितले की, “प्रभागातील सर्वसामान्य नागरिकांना परवडणाऱ्या आणि दर्जेदार आरोग्य सुविधा उपलब्ध व्हाव्यात, यासाठी डायलेसीस केंद्र आणि प्रसूतिगृह सुरू होणे अत्यंत गरजेचे आहे. नागरिकांना उपचारासाठी खासगी रुग्णालयांमध्ये मोठ्या प्रमाणावर खर्च करावा लागू नये, यासाठी प्रशासनाने तातडीने कार्यवाही करावी.”
डायलेसीस केंद्र सुरू झाल्यानंतर किडनीविकारग्रस्त रुग्णांना मोठा दिलासा मिळणार असून प्रसूतिगृह सुरू झाल्यास गरोदर माता-भगिनींना परिसरातच सुरक्षित व सुलभ आरोग्यसेवा उपलब्ध होणार आहे. त्यामुळे नागरिकांची गैरसोय कमी होऊन सर्वसामान्य कुटुंबांना मोठा आधार मिळणार आहे.
सदर पाहणीदरम्यान डॉ. सुनील आंधळे, क्षेत्रीय वैद्यकीय अधिकारी डॉ. आत्माराम काकडे, डॉ. सविता वावरे तसेच संबंधित अधिकारी व कर्मचारी उपस्थित होते.

पुणे, दि. ८ : अष्टविनायक विकास आराखड्याअंतर्गत तसेच पुरातत्त्व विभागाच्या मार्गदर्शनाखाली सुरू असलेल्या जतन, संवर्धन व दुरुस्ती कामांच्या पार्श्वभूमीवर श्री मयुरेश्वर मंदिर, श्री चिंतामणी मंदिर आणि श्री सिद्धिविनायक मंदिर ही मंदिरे दिनांक १० मे २०२६ ते ९ जून २०२६ या कालावधीत भाविकांच्या दर्शनासाठी पूर्णपणे बंद ठेवण्यात येणार असल्याची माहिती पुरातत्त्व विभागाकडून देण्यात आली आहे.

अष्टविनायकातील मंदिरांचे जतन, देखभाल व दुरुस्ती करण्यासाठी महाराष्ट्र शासनाने विशेष निधी उपलब्ध करून दिला असून, या कामांसाठी चिंचवड देवस्थान ट्रस्टतर्फे शासनाचे आभार मानण्यात आले आहेत. सध्या मोरगाव, थेऊर आणि सिद्धटेक येथे मुख्य मंदिर तसेच मंदिर परिसरातील जतन, संवर्धन आणि दुरुस्तीची कामे प्रगतीपथावर आहेत.

पुरातत्त्व विभागाच्या नियोजनानुसार मंदिरांचा मुख्य गाभारा आणि सभामंडप यांचे पौराणिक स्वरूप जपत सुबक दगडी बांधकामाद्वारे संवर्धन करण्यात येणार आहे. या कामादरम्यान भाविकांची मोठ्या प्रमाणातील उपस्थिती कामात अडथळा निर्माण करू शकते तसेच कामाचा कालावधी वाढण्याची शक्यता असल्याने मंदिरे तात्पुरती बंद ठेवण्याचा निर्णय घेण्यात आला आहे.
यासंदर्भात पुरातत्त्व विभागाच्या संचालकांनी सह धर्मादाय आयुक्त, पुणे विभाग यांच्याकडे विनंती अर्ज सादर केला होता. त्यानंतर पुरातत्त्व विभाग, मंदिर प्रशासन, पुजारी वर्ग आणि ग्रामस्थ यांचे म्हणणे ऐकून घेत सह धर्मादाय आयुक्तांनी दि. ७ मे २०२६ रोजी मंदिरे तात्पुरती बंद ठेवण्याचे आदेश दिले आहेत.

सह धर्मादाय आयुक्तांच्या सूचनेनुसार चिंचवड देवस्थान ट्रस्टच्या विश्वस्त मंडळानेही मोरगाव, थेऊर आणि सिद्धटेक येथील मंदिरे भाविकांसाठी बंद ठेवण्याचा ठराव मंजूर केला आहे. तसेच दि. ८ मे २०२६ रोजी संबंधित ठिकाणी ग्रामस्थांच्या उपस्थितीत ग्रामसभा घेऊन मंदिर बंद ठेवण्याबाबत माहिती देण्यात येणार आहे.

या कालावधीत मंदिरांमध्ये नित्य पूजाअर्चा व धार्मिक विधी नियमितपणे सुरू राहतील. मात्र भाविकांना मंदिर परिसरात प्रवेश किंवा प्रत्यक्ष दर्शनाची सुविधा उपलब्ध राहणार नाही. मंदिरांचे पुजारी, बांधकाम यंत्रणा, अधिकृत अधिकारी, कर्मचारी आणि विश्वस्त यांच्याशिवाय अन्य कोणालाही प्रवेश दिला जाणार नसल्याचे स्पष्ट करण्यात आले आहे.

ही विकासकामे मंदिरांची दीर्घकालीन सुरक्षितता, सुविधा आणि भाविकांच्या सोयीसाठी अत्यंत आवश्यक असून ती नियोजनबद्ध व वेळेत पूर्ण व्हावीत यासाठी नागरिकांनी आणि भाविकांनी मंदिर संस्थान, जिल्हा प्रशासन, पोलीस प्रशासन व स्थानिक प्रशासनास सहकार्य करावे, असे आवाहन करण्यात आले आहे.

पुणे- गे डेटींग अॅण्ड चॅट या अॅपद्वारे लोकांना भुरळ घालून बोलवायचे नंतर मारहाण करत लुटमार करून पळून जायचे अशा पद्धतीची गुन्हेगारी करणारे दोन भामटे गुन्हा दाखल होताच अवघा अर्धा तासात पोलिसांनी पकडले आणि गजाआड केले.

या संदर्भात पोलिसांनी सांगितले कि,’ वारजे माळवाडी पोलीस ठाण्यात एक फिराय्द दाखल झाली . यातील फिर्यादीला गे डेटींग अॅण्ड चॅट या अॅपद्वारे चॅटिंग करून बोलावून घेवून त्याला मारहाण करून मोबाईलद्वारे जबरदस्तीने पैसे ट्रान्सफर केले आणि त्याची चांदीची चैन हिसकावून घेतल्यामुळे फिर्यादी यांच्या तक्रारीवरून वारजे माळवाडी पोलीस ठाणे येथे गुन्हा रजिस्टर नंबर १५३/२०२६, भारतीय न्याय संहिता कलम ३०९ (६), ३५२, ३५१ (२), ३(५) हा जबरी चोरीचा गुन्हा चार अनोळखी इसमांविरुध्द दि. ०८/०५/२०२६ रोजी दाखल केला होता. दाखल गुन्हा हा गंभीर स्वरूपाचा असल्याने वारजे माळवाडी पोलीस ठाण्याचे वरिष्ठ पोलीस निरीक्षक महेश बोळकोटगी यांनी तात्काळ तपास पथकाचे प्रभारी संजय नरळे पोलीस उपनिरीक्षक यांना त्यांचे स्टाफ करवी आरोपीचा शोध घेण्याबाबत तोंडी आदेश दिले. लागलीच तपास पथकाचे प्रभारी संजय नरळे, पोलीस उपनिरीक्षक, वारजे माळवाडी पोलीस ठाणे यांनी फिर्यादी यांच्याशी बोलून आरोपींच्याबाबत माहिती घेवून आरोपींच्या मोबाईलचे तांत्रिक विश्लेषण केले. तसेच पोलीस अंमलदार बालाजी काटे व महादेव शिंदे यांना त्यांच्या गोपनिय खबऱ्यामार्फत माहिती मिळाली की, सदरची जबरी चोरी करणाऱ्यापैकी एक इसम हा अतुलनगर चौकामध्ये थांबला आहे. ही माहिती प्राप्त होताच संजय नरळे, पोलीस उपनिरीक्षक व त्यांच्या सोबत पोलीस अंमलदार बालाजी काटे, महादेव शिंदे व निखील तांगडे असे माहितीच्या ठिकाणी रवाना होवून तेथून एका आरोपीला ताब्यात घेतले व त्याला विचारपूस केल्यानंतर त्याने गुन्हा केल्याचे कबूल केले. त्यास दाखल गुन्हयात अटक करण्यात आली असून त्याच्या आणखी एका अल्पवयीन साथीदारालासुध्दा ताब्यात घेण्यात आले आहे. दाखल गुन्हयाचा पुढील तपास शंकर पाटील, पोलीस उपनिरीक्षक वारजे माळवाडी पोलीस ठाणे पुणे शहर हे करत आहेत.
वरिष्ठ पोलीस निरीक्षक महेश बोळकोटगी यांनी आव्हान केले आहे की, गे डेटींग अॅण्ड चॅट व इतर अॅपद्वारे लोकांनी अशाप्रकारे फसवणूकीला बळी पडू नये. तसेच कोणाची अशाप्रकारची फसवणूक झाली असेल तर त्यांनी तात्काळ वारजे माळवाडी पोलीस ठाणे किंवा आपल्या जवळच्या पोलीस स्टेशनला जावून तक्रार द्यावी.
कारवाई ही पोलीस आयुक्त अमितेश कुमार,पोलीस सह आयुक्त रंजनकुमार शर्मा, अप्पर पोलीस आयुक्त राजेश बनसोडे, पोलीस उप-आयुक्त, परिमंडळ ३ संभाजी कदम, सहा. पोलीस आयुक्त, कोथरुड विभाग सुजाता तानवडे यांचे सुचनेनुसार व महेश बोळकोटगी,निरीक्षक (गुन्हे) प्रकाश धेंडे यांचे मार्गदर्शनाखाली पोलीस उप-निरीक्षक संजय नरळे, पोलीस अंमलदार बालाजी काटे, शरद पोळ, निखील खील तांगडे, अमित जाधव, अमित शेलार, सत्यजित लोंढे, गणेश शिंदे, महादेव शिंदे, सागर कुंभार, अमोल सुतकर यांनी केलेली आहे.

सामजिक न्याय मंत्र्यांच्या हस्ते अधिकाऱ्यांच्या दोन दिवसीय कार्यशाळेचे उद्घाटन

पुणे, दि.८: सामाजिक न्याय विभागाकडे समाजाचा बघण्याचा दृष्टिकोन दिवसेंदिवस बदलत आहे, आगामी काळातही कामात सातत्य ठेवून समाजकल्याण खात्याला अधिक उंचीवर नेण्यासाठी आणखीन चांगले काम करावे; ‘सामाजिक न्याय’ संकल्पना डोळ्यासमोर ठेवून समाजातील शेवटच्या घटकांना न्याय देण्यासाठी अधिकाऱ्यांनी काम करावे, असे आवाहान राज्याचे सामाजिक न्यायमंत्री संजय शिरसाट यांनी केले.

डॉ. बाबासाहेब आंबेडकर प्रशिक्षण व संशोधन संस्थेच्यवतीने सामाजिक न्याय व विशेष सहाय्य विभागाच्या अधिकाऱ्यांच्या लोणावळा येथे आयोजित राज्यस्तरीय कार्यशाळेच्या उद्घाटनप्रसंगी ते बोलत होते. यावेळी विभागाचे सचिव डॉ. हर्षदीप कांबळे, आयुक्त दिपा मुधोळ-मुंडे, सामाजिक न्याय खात्यातील सहसचिव सो.ना. बागुल, उपसचिव वर्षा देशमुख, अवर सचिव सतीश खैरमोडे, राज्यातील प्रादेशिक उपायुक्त, सहायक उपायुक्त उपस्थित होते.

श्री. शिरसाट म्हणाले, विभागाच्यावतीने विद्यार्थी घडविण्याचे फार मोठे काम करण्यात येते. विद्यार्थीच्या जीवनात आमूलाग्र बदल घडविण्यासाठी वसतिगृहाचे अनन्यसाधारण महत्व आहे. त्यामुळे राज्यात वसतिगृह उभारण्याचे काम हाती घेण्यात आले आहे. विद्यार्थ्यांना वसतिगृहामध्ये देण्यात येणाऱ्या प्रवेश प्रक्रियेमध्ये बदल करुन त्यामध्ये कृत्रिम बुद्धिमतेचा वापर करण्यात यावा.

विभागामध्ये चांगले काम करणाऱ्या अधिकारी व कर्मचाऱ्यांना प्रोत्साहन देण्यात यावे. त्यांनीही विभागात आपल्या कामाच्या माध्यमातून वेगळी छाप निर्माण करावी, राज्याला दिशादर्शक होईल यादृष्टीने नवनवीन उपक्रम राबवावेत, या उपक्रमाचे इतरांनी अनुकरण करण्याची गरज आहे. अधिकारी-कर्मचाऱ्यांकरिता कार्यालयाच्याजवळ निवासस्थान उपलब्ध करण्यासोबतच सोसायटी स्थापन करण्याबाबत नियोजन करावे.

कार्यशाळा ही अधिकारी-कर्मचाऱ्यांच्या विचारांची देवाण-घेवाण तसेच त्यांच्या अडीअडचणी मांडण्याची व्यासपीठ आहे, त्यामुळे या कार्यशाळेचा आनंद घेत विचाराची देवाण-घेवाण करावी. याठिकाणी झालेले निर्णय, चर्चेच्या अनुषंगाने विभागात प्रभावीपणे अंमलबजावणी करून आगामी सकारात्मक परिणाम दिसले पाहिजे.
राज्याच्या अर्थसंकल्पात विभागासाठी मंजूर झालेला निधी वेळेत खर्च होईल, यादृष्टीने काम करावे, असेही शिरसाट म्हणाले.

प्रधान सचिव डॉ. कांबळे म्हणाले, महाराष्ट्र हे पुरोगामी राज्य म्हणून ओळखले जाते. विभागाच्यवतीने समाजातील विद्यार्थी, ज्येष्ठ नागरिक, महिला, नागरिक आदी घटकांसाठी लोक कल्याणकारी योजना राबविण्यात येतात. या योजनांची प्रभावीपणे अंमलबजावणी करुन त्यांच्या जीवनात सकारात्मक परिवर्तन घडविण्यासाठी काम करावे. येत्या काळात शिक्षण, पायाभूत सुविधा, उद्योजकता, सामजिक सुरक्षा आणि तंत्रज्ञानाचा प्रभावीपणे वापर या पाच पैलूंवर काम करुन विभागाची धोरण ठरविण्यात येणार आहे, त्यामुळे विभागाने विकसित महाराष्ट्र २०२७ चा दृष्टिकोन समोर ठेवून प्रभावीपणे काम करावे, असेही डॉ. कांबळे म्हणाले.

श्रीमती मुधोळ-मुंडे म्हणाल्या, सामाजिक न्याय व विशेष सहाय्य विभागावतीने येत्या काळात नवनवीन धोरणे, योजना राबविण्याचा मानस आहे. केंद्र सरकारच्या ‘आय-गॉट’ संकेतस्थळाच्या माध्यमातून अधिकारी-कर्मचाऱ्यांचे प्रशिक्षण पूर्ण करण्यात आले. अधिकारी-कर्मचारी तसेच विद्यार्थ्यांच्या राज्यस्तरीय क्रीडा स्पर्धा या वर्षी प्रथमच आयोजित करण्यात आल्या, त्याला उत्स्फूर्त प्रतिसाद लाभला. ऊसतोड कामगार, विद्यार्थी, ज्येष्ठ नागरिक आणि तृतीयपंथीयांच्या कल्याकरिता काम करण्याचे नियोजन करण्यात आले आहे, या कार्यशाळेचा विभागाला निश्चित उपयोग होईल, असेही श्रीमती मुधोळ-मुंडे म्हणाल्या.

यावेळी दिवसभर विविध योजनांच्या संदर्भात प्रादेशिक उपायुक्त व सहाय्यक आयुक्त यांनी सादरीकरण केले.

कार्यशाळेचे सूत्रसंचालन व आभार बार्टीचे विभागप्रमुख डॉ. बबन जोगदंड यांनी केले.

बांधकाम परवानग्या आता सुपरफास्ट, प्रकल्पानुसार बांधकाम विभागाच्या अधिकार्‍यांच्या मंजुरी अधिकारांची पुनर्रचना

महापालिका आयुक्तांचा ऐतिहासिक निर्णय–

महापालिकेतील स्थानिक स्तरावर बांधकाम परवानग्या देण्याची जुनी पद्धत आता बंद करण्यात येत आहे. ३० वर्षांपासून चालत आलेल्या काही पद्धतींमुळे शहराची अनियंत्रित वाढ झाली. नवीन पद्धतीचा मुख्य उद्देश शहराचा विकास नियोजित आणि पारदर्शक पद्धतीने व्हावा हा आहे.
– नवलकिशोर राम, आयुक्त पुणे महापालिका

मंजुरी अधिकारांच्या विकेंद्रीकरणाचा निर्णय हा पुणे महापालिकेचा एक सकारात्मक प्रशासकीय बदल आहे. प्रकल्पाच्या आकारानुसार अधिकारांचे वाटप केल्याने कार्यक्षमता आणि उत्तरदायित्व वाढेल. जर याची डिजिटल ट्रॅकिंगद्वारे प्रभावी अंमलबजावणी झाली, तर याचा फायदा घर खरेदीदार, सोसायट्यांचा पुनर्विकास आणि पुण्याच्या सर्वांगीण नागरी विकासाला होईल.
– कपिल गांधी, व्यवस्थापकीय संचालक सिग्मा वन युनिव्हर्सल आणि जनसंपर्क संयोजक क्रेडाई पुणे

पुणे- बांधकाम परवानग्यांच्या प्रक्रियेला गती देण्यासाठी आणि वर्षानुवर्षे सुरू असलेल्या स्थानिक स्तरावरील अनियंत्रित मंजुरींना चाप लावण्यासाठी महापालिका आयुक्त नवलकिशोर राम यांनी धोरणात्मक बदल केला आहे. आयुक्तांनी प्रकल्पाच्या आकारानुसार बांधकाम विभागाच्या अधिकार्‍यांच्या मंजुरी अधिकारांची पुनर्रचना केली आहे. या निर्णयामुळे लहान आणि मध्यम आकाराच्या प्रस्तावांना गती मिळण्याची अपेक्षा असली, तरी गेल्या तीन दशकांपासून सुरू असलेल्या स्थानिक स्तरावरील मंजुरीच्या पद्धतीला आता पूर्णविराम मिळाला आहे.

गुरुवारी जारी केलेल्या आदेशानुसार, महानगरपालिकेने बांधकाम विभागाकडे प्राप्त होणाऱ्या प्रस्तावांच्या मंजुरी प्रक्रियेत मोठे बदल केले आहेत. यापुढे मंजुरीचे अधिकार प्रकल्पाच्या एकूण बांधकामाच्या क्षेत्रावर आधारित असतील. उपअभियंता, कार्यकारी अभियंता किंवा अधीक्षक अभियंता यापैकी कोणत्या स्तरावर कोणता प्रस्ताव मंजूर केला जाऊ शकतो, याबाबत स्पष्ट मार्गदर्शक तत्त्वे आखून देण्यात आली आहेत.
स्थानिक स्तरावर बांधकाम परवानग्या देण्याच्या जुन्या पद्धतीवर अनेक वर्षांपासून प्रश्नचिन्ह उपस्थित केले जात होते. अनियंत्रित बांधकामे, अतिक्रमणे, नियमबाह्य मंजुरी आणि फायली जाणीवपूर्वक प्रलंबित ठेवण्याच्या तक्रारी सामान्य होत्या. या पार्श्वभूमीवर, आयुक्तांनी जुनी स्थानिक मंजुरी पद्धत थेट मोडीत काढली आहे. आदेशात म्हटले आहे की, “गेल्या ३० वर्षांत विकसित झालेल्या काही पद्धतींमुळे शहरात अनियोजित वाढ आणि अनियमितता वाढली. त्यामुळे मंजुरी प्रक्रियेत अधिकारांचे स्पष्ट वाटप, उत्तरदायित्व आणि वरिष्ठ स्तरावरील नियंत्रण वाढवण्याचा निर्णय घेण्यात आला आहे.”

कोणाकडे किती अधिकार असतील?

-२००० चौरस मीटरपर्यंतचे प्रकल्प : उपअभियंता मंजुरी देतील.

-२००० ते १०,००० चौरस मीटरपर्यंतचे प्रकल्प : ले-आउट आणि बांधकाम परवानगी कार्यकारी अभियंत्यांच्या मंजुरीने दिली जाईल.
-१०,००० चौरस मीटरवरील प्रकल्प : मोठे प्रकल्प किंवा ज्यांना भविष्यात पर्यावरण मंजुरी आवश्यक आहे, अशा प्रस्तावांना अधीक्षक अभियंता स्तरावर मंजुरी दिली जाईल.

-दुसऱ्या आणि तिसऱ्या स्तरावरील प्रस्तावांच्या मंजुरीनंतर, संबंधित कनिष्ठ अभियंता आणि उपअभियंत्यांच्या स्वाक्षरीने संमती पत्र जारी केले जाईल.

सिंगल विंडोमुळे मंजुरीची प्रक्रिया होणार वेगवान

बांधकाम परवानगी विभाग प्रस्तावांना महिनोनमहीने प्रलंबित ठेवण्यासाठी टीकेचा धनी ठरला होता. अनेक स्तरांवरून फाईल फिरत असल्याने नागरिक, बांधकाम व्यावसायिक आणि वास्तुविशारदांना मोठा विलंब सहन करावा लागत असे. प्रशासनाचा दावा आहे की, अधिकारांच्या विकेंद्रीकरणामुळे लहान आणि मध्यम प्रस्तावांवर खालच्या स्तरावर निर्णय घेता येईल, ज्यामुळे मंजुरीची प्रक्रिया वेगवान होईल.

मोठ्या प्रकल्पांवर वरिष्ठांचे नियंत्रण कायम

मोठे प्रकल्प आणि पर्यावरणावर परिणाम होण्याची शक्यता असलेल्या प्रकल्पांसाठी वरिष्ठ स्तरावरील नियंत्रण कायम ठेवण्यात आले आहे. १०,००० चौरस मीटरपेक्षा जास्त असलेल्या प्रकल्पांसाठी अधीक्षक अभियंत्यांची मंजुरी अनिवार्य करण्यात आली आहे. यामुळे मोठ्या प्रकल्पांची तांत्रिक तपासणी आणि पर्यावरणीय पैलूंकडे अधिक लक्ष दिले जाईल याची खात्री केली जाणार आहे.